UzbekAI

Ўзбекистон Республикаси Вазирлар Маҳкамасининг

қарори

ТУЗИЛМАСИ

УСТАВИ

«Наманган» эркин иқтисодий зонаси фаолиятини ташкил этиш чора-тадбирлари тўғрисида

Ўзбекистон Республикаси Президентининг «Наманган» эркин иқтисодий зонасини ташкил этиш тўғрисида» 2018 йил 20 августдаги ПФ-5517-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Наманган» эркин иқтисодий зонасини ташкил этиш тўғрисида» 2018 йил 20 августдаги ПФ-5517-сон Фармонига мувофиқ «Наманган» эркин иқтисодий зонаси ташкил этилганлиги маълумот учун қабул қилинсин.

2. Бошқарув ходимлари сони 5 нафардан иборат бўлган «Наманган» эркин иқтисодий зонаси дирекцияси» давлат унитар корхонаси (кейинги ўринларда Дирекция деб аталади) ташкил этилсин.

3. Қуйидагилар:

«Наманган» эркин иқтисодий зонаси таркибига кирувчи ҳудудлар 1-иловага ;

«Наманган» эркин иқтисодий зонаси дирекцияси» давлат унитар корхонасининг тузилмаси 2-иловага ;

«Наманган» эркин иқтисодий зонаси дирекцияси» давлат унитар корхонасининг устави 3-иловага мувофиқ тасдиқлансин.

4. Ўзбекистон Республикаси Молия вазирлиги Вазирлар Маҳкамасининг захира жамғармасидан:

Дирекцияга, келгуси йилларда ўзини ўзи молиялаштиришга ўтказиш шарти билан, 2019-2020 йиллар даврида сақлаш харажатлари учун асосланган ҳисоб-китоблар бўйича зарур маблағлар ажратилишини;

Дирекциянинг Устав фондини шакллантиришга 1,0 млрд. сўм миқдорида маблағлар ажратилишини таъминласин.

5. Наманган вилояти ҳокимлиги:

Дирекциянинг Наманган вилояти, Чуст шаҳри, Чарағон кўчаси, 1-уй манзилидаги бинога текин фойдаланиш ҳуқуқи билан жойлаштирилишини ва кейинчалик Дирекция учун замонавий маъмурий бино қурилишини;

Дирекцияни малакали мутахассислар билан таъминлашни, шунингдек, хорижий мамлакатларнинг мазкур йўналишдаги илғор тажрибалари асосида мутахассисларнинг малакасини мунтазам равишда ошириб боришни ҳамда Дирекцияга зарур инвентарлар, ташкилий техника ҳамда самарали фаолият олиб бориш учун талаб этиладиган воситаларни харид қилиш ва сақлаш учун маблағлар ажратилишини таъминласин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — Инвестициялар бўйича давлат қўмитаси раиси С.Р. Холмурадов ва Наманган вилояти ҳокими Х.Х. Бозаров зиммасига юклансин.

Вазирлар Маҳкамасининг 2018 йил 27 декабрдаги 1054-сон қарорига 1-ИЛОВА

«Наманган» эркин иқтисодий зонаси таркибига кирувчи ҳудудлар

1-ер участкаси:

1-бошланғич нуқта Тошкент-Наманган автомобиль йўлининг Чуст канали кесишган жойдан шарқий томонга 710 метр масофада дала йўлигача, шимол томонга олиб борадиган дала йўли бўйлаб 300 метр масофада жойлашган.

1-нуқтадан чегара шимоли-ғарбий йўналишда дала йўли билан 1200 метр масофада бетон ариқгача, бетон ариқдан шу йўналиш бўйича 440 метр, сўнгра шимолий йўналиш бўйича 315 метр масофада 2-нуқтагача давом этади.

2-нуқтадан чегара қуруқ ер билан жануби-ғарбий йўналишда 90 метр масофада дала йўлигача, сўнгра шу йўналиш бўйича қуруқ ер билан 1110 метр масофада 3-нуқтагача давом этади.

3-нуқтадан чегара қуруқ сой билан жануби-шарқий 550 метр, сўнгра жанубий-шарқий йўналишга бурилиш ҳосил қилиб, 240 метр масофадан сўнг жануби-ғарбий йўналишда 300 метр дала йўлигача, шу йўналиш бўйича дала йўли бўйлаб 200 метр, сўнгра ғарбий йўналиш дала йўли бўйлаб 70 метр масофада 4-нуқтагача давом этади.

4-нуқтадан чегара «Навоий» массиви чегараси бўйлаб қуруқ ер билан жануби-шарқий йўналишда 150 метр масофада 5-нуқтагача давом этади.

5-нуқтадан чегара қуруқ ер билан жанубий йўналишда «Навоий» массиви чегараси бўйлаб бурилишлар ҳосил қилиб, 1250 метр масофада 6-нуқтагача давом этади.

6-нуқтадан чегара қуруқ ерлар билан шимоли-шарқий йўналишда 450 метр, сўнгра шу йўналиш бўйича боғзор ерлар билан 850 метр масофада 1-нуқта қўшилгунга қадар давом этади.

2-ер участкаси:

1-бошланғич нуқта Тошкент-Наманган автомобиль йўлининг жанубий томонида Чуст канали кесишган жойидан бошланган дала йўли билан 400 метр масофада жанубий-шарқий йўналишда дала йўли бўйлаб, ушбу дала йўли бўйлаб жануб томонга 80 метр масофада жойлашган.

1-нуқтадан чегара дала йўли бўйлаб жанубий йўналишда 1 520 метр масофада 2-нуқтагача давом этади.

2-нуқтадан чегара қуруқ ер билан ғарбий йўналишда 130 метр масофада 3-нуқтагача давом этади.

3-нуқтадан чегара Поп тумани билан чегарадош ариқ бўйлаб шимолий-ғарб йўналишида бурилишлар ҳосил қилиб, 1420 метр масофада 4-нуқтага туташади.

4-нуқтадан чегара шарқий томонга 90 метр масофада дала йўли билан, сўнгра шимоли-шарқ томонга ариқ билан 420 метр масофада 1-нуқтага қўшилгунга қадар давом этади.

3-ер участкаси:

1-бошланғич нуқта Тошкент-Наманган автомобиль йўлининг Чуст-Чортоқ автомобиль йўли кесишган жойининг шимолий қирғоғида жойлашган.

1-нуқтадан чегара Чуст-Чортоқ автомобиль йўли бўйлаб, шимоли-шарқий йўналиш бўйича 340 метр масофада дала йўли кесишган ергача, кейинчалик дала йўли билан жанубий йўналишда 750 метр масофада 2-нуқтагача давом этади.

2-нуқтадан чегара шимол йўналиш бўйича Тўрақўрғон тумани билан чегарадош ариқ бўйлаб, 400 метр масофада 3-нуқтагача давом этади.

3-нуқтадан чегара дала йўли билан шимоли-ғарбий йўналиши бўйича 180 метр масофада 4-нуқтагача давом этади.

4-нуқтадан чегара Чуст-Чортоқ йўли бўйлаб, жануби-ғарбий йўналиш бўйича 610 метр масофада 5-нуқтагача дала йўли билан туташган жойгача давом этади.

5-нуқтадан чегара дала йўли бўйлаб шимоли-ғарбий йўналишда бурилишлар ҳосил қилиб, 210 метр масофада 6-нуқтагача давом этади.

6-нуқтадан чегара қуруқ ер билан шимоли-шарқий йўналиш бўйича 250 метр масофада 7-нуқтагача давом этади.

7-нуқтадан чегара шимолий йўналиш бўйича қуруқ ер билан 550 метр, сўнгра шу йўналиш бўйича бурилишлар ҳосил қилиб номсиз ариқ бўйлаб 380 метр масофада 8-нуқта бетон ариқгача давом этади.

8-нуқтадан чегара шимолий-ғарбий йўналишда бетон ариқ бўйлаб бурилишлар ҳосил қилиб 450 метр масофада 9-нуқтагача давом этади.

9-нуқтадан чегара ғарбий йўналишда қуруқ ер билан 200 метр масофада 10-нуқтагача давом этади.

10-нуқтадан чегара жанубий йўналишда қуруқ ер билан 450 метр масофада, сўнгра чегара қуруқ ер билан жанубий-шарқий йўналиш бўйича 180 метр, шу йўналиш бўйича боғзор ери билан 70 метр масофада дала йўли билан туташади, дала йўли бўйлаб жанубий-шарқий йўналишда 100 метр масофада 11-нуқтагача давом этади.

11-нуқтадан чегара жанубий йўналишда қуруқ ер билан 650 метр масофада 12-нуқтагача давом этади.

12-нуқтадан чегара ғарбий йўналиш бўйича қуруқ сой билан 350 метр, сўнгра шу йўналиш бўйича ариқ билан бурилишлар ҳосил қилиб 300 метр масофада 13-нуқта дала йўлигача давом этади.

13-нуқтадан чегара жанубий йўналиш бўйича дала йўли билан 60 метр масофада, кейинчалик ушбу дала йўли билан бурилишлар ҳосил қилиб жануби-шарқий йўналиш бўйича 880 метр масофада 14-нуқтагача давом этади.

14-нуқтадан чегара Чуст-Наманган автомобиль йўли билан 240 метр масофада 1-нуқтага қўшилгунга қадар давом этади.

4-ер участкаси:

Бошланғич нуқта «Жанубий айланма йўли»нинг Наманган вилояти Тўрақўрғон тумани «Исоқхон Тўра Ибрат» массивидаги қисмидан ўтувчи Катта Наманган каналидан 70 метр масофада шарқ томонга, 1-нуқтагача давом этади.

1-нуқтадан бошланган чегара «Омад 21» фермер хўжалиги экин ер майдонлари билан 800 метр масофада, «Тешиктош Замин» фермер хўжалиги экин ер майдонлари билан 348 метр масофада шимолдан жануб томонга 2-нуқтагача давом этади.

2-нуқтадан жанубий-шарқ томонга 449 метр, 180 метр «Тешиктош Замин» фермер хўжалиги билан, 100 метр «Омад 21» фермер хўжалиги билан, 169 метр «Мустақил» фермер хўжалиги ер майдонлари билан собиқ дала шийпонининг шарқ томонидаги ички дала йўли кесишмасидаги 3-нуқтагача давом этади.

3-нуқтадан дала ички йўли орқали 880 метр, «Носир Толиб» фермер хўжалигини экин ерлари билан «Поросмон» аҳоли яшаш пунктидан чиқаётган ички дала йўли билан 4-нуқтагача давом этади.

4-нуқтадан шарқ томонга бурилиб, «Омад 21» фермер хўжалиги ерлари билан 570 метр дала орқали дала йўлнинг кесишмасида 5-нуқтагача давом этади.

5-нуқтадан ички дала йўли орқали, 1065 метрда туман ҳокимлиги захира ер майдонлари бўйлаб 6-нуқтагача давом этади.

6-нуқтадан захира ер майдонларидан 90 градус бурчак остида ғарбга бурилиб, «Қаюмжон ота Рахимов» фермер хўжалиги ерлари билан 690 метрда ички суғориш ариғи бўйлаб ўтиб, «Даштобод Барака Замин» фермер хўжалигининг ерлари билан 120 метрда 7-нуқтагача давом этади.

7-нуқтадан шимолга бурилиб, 790 метр масофада Наманган шаҳар «Наманган парранда» МЧЖ ер майдонлари билан «Жанубий айланма йўл» бўйлаб 8-нуқтагача давом этади.

8-нуқтадан чегара ғарб томонга бурилиб, 400 метр Наманган шаҳар «Наманган парранда» МЧЖ ер майдонлари билан, 180 метр Тўрақўрғон туманидаги «Қаюмжон ота Рахимов» фермер хўжалигини ер майдонлари билан ҳамда 306 метр «Омад 21» фермер хўжалигини экин ерлари билан масофада 1-нуқтага қадар давом этади.

5-ер участкаси:

1-бошланғич нуқта «Жанубий айланма йўл»нинг шимолий томонидаги ички йўл билан «Жанубий айланма йўл» кесишмасида жойлашган. Шу нуқтадан «Жанубий айланма йўл» бўйлаб 885 метр «Гулистон Яшнаган Замин» фермер хўжалигининг ерларидан ўтиб 2-нуқтагача давом этади.

2-нуқтадан чегара «Катта Наманган канали» бўйлаб 380 метр «Гулистон Яшнаган Замин» фермер хўжалигининг ерларидан ўтиб, «Тўрақўрғон Агро Пилла» МЧЖ ҳисобида бўлган тутзордан 60 метр ўтиб, «Исоқхон Тўра Ибрат» массивининг чегараси билан 3-нуқтагача давом этади.

3-нуқтадан бошланган чегара 610 метр масофада «Тўрақўрғон Агро Пилла» МЧЖ ҳисобида бўлган тутзордан ўтиб, 510 метр «Гулистон Яшнаган Замин» фермер хўжалигининг ерларидан 4-нуқтагача давом этади.

4-нуқтадан чегара жанубий ғарб томонга бурилиб, 130 метр «Гулистон Яшнаган Замин» фермер хўжалигининг экин ерларидан 5-нуқтагача давом этади.

5-нуқтадан чегара «Исоқхон Тўра Ибрат» массиви чегараси бўйлаб шимолий ғарбга бурилиб, 190 метр масофада закан тармоғи бўйидаги ички дала йўлидаги «Гулистон Яшнаган Замин» фермер хўжалигининг ерларидан 6-нуқтагача давом этади.

6-нуқтадан ер участкасининг чегараси шу нуқтадан жануб томонга бурилиб, ички закан бўйидаги ички дала йўли орқали 1010 метр масофада «Гулистон Яшнаган Замин» фермер хўжалигининг экин ерларидан 7-нуқтагача давом этади.

7-нуқтадан шу нуқтада ажратилаётган ер участкасининг чегараси жануби-ғарбий томонга бурилиб, маҳаллий аҳолининг дала томорқа ер майдонларининг жанубий (пастки) томонидаги чегараси орқали 170 метр масофада «Гулистон Яшнаган Замин» фермер хўжалигининг ерларидан ўтиб, ички суғориш ариғи жойлашган 8-нуқтагача давом этади.

8-нуқтадан чегара шу нуқтадан шимолга бурилиб, юқоридаги ички суғориш ариғи орқали 70 метр масофада «Гулистон Яшнаган Замин» фермер хўжалигининг ерлари ҳамда ички закан тармоғи бўйидаги ички дала йўлида жойлашган 9-нуқтагача давом этади.

9-нуқтадан ажратилаётган ер участкасининг чегараси жануб томонга бурилиб, юқоридаги ички закан тармоғи бўйидаги ички дала йўли орқали «Гулистон Яшнаган Замин» фермер хўжалигининг экин ерларидан 270 метр масофада 1-нуқтага қўшилгунга қадар давом этади.

Вазирлар Маҳкамасининг 2018 йил 27 декабрдаги 1054-сон қарорига 2-ИЛОВА

«Наманган» эркин иқтисодий зонаси дирекцияси» давлат унитар корхонасининг

Вазирлар Маҳкамасининг 2018 йил 27 декабрдаги 1054-сон қарорига 3-ИЛОВА

«Наманган» эркин иқтисодий зонаси дирекцияси» давлат унитар корхонасининг

1-боб. Умумий қоидалар

1. «Наманган» эркин иқтисодий зонаси дирекцияси» (кейинги ўринларда Дирекция деб аталади) оператив бошқарув учун ўзига берилган давлат мулки негизида давлат унитар корхонаси шаклида ташкил этилган тижорат ташкилоти ҳисобланади, у ўзига бириктирилган мулкка нисбатан, қонунчиликда белгиланган доирада, ўз фаолияти мақсадларига, мулкдор (ёки унинг топшириғига биноан унинг томонидан масъул этиб тайинланган давлат органи — муассис) топшириқларига мувофиқ эгалик қилиш, фойдаланиш ва тасарруф этиш ҳуқуқини амалга оширади.

2. Дирекция ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Уставга ҳамда бошқа қонун ҳужжатларига амал қилади.

3. Дирекция юридик шахс ҳисобланади, алоҳида мулкка, мустақил балансга, банкларда ҳисоб рақамларига, шу жумладан, валюта ҳисоб рақамларига, эмблемага, штамплар ва бланкаларга, Ўзбекистон Республикаси Давлат герби тасвири туширилган, ўз номи давлат тилида ёзилган муҳрга ва бошқа реквизитларга эга бўлади.

4. Дирекциянинг расмий номи:

а) давлат тилида:

тўлиқ номи — «Namangan» erkin iqtisodiy zona Direktsiyasi» davlat unitar korxonasi;

қисқартирилган номи — «Namangan» EIZ Direktsiyasi» DUK;

б) рус тилида:

тўлиқ номи — Государственное унитарное предприятие «Дирекция свободной экономической зоны «Наманган»;

қисқартирилган номи — ГУП «Дирекция СЭЗ «Наманган»;

в) инглиз тилида:

тўлиқ номи — «Directorate of free economic zone «Namangan» State Unitary Company;

қисқартирилган номи — «Directorate of FEZ «Namangan» SUC.

5. Дирекциянинг жойлашган жойи (почта манзили): Наманган вилояти, Чуст шаҳри, Чарағон кўчаси, 1-уй.

6. Ўзбекистон Республикаси Вазирлар Маҳкамаси Дирекциянинг муассиси (кейинги ўринларда Муассис деб аталади) ҳисобланади.

7. Дирекция ўз номидан қонун ҳужжатларида белгиланган тартибда мулкий ва шахсий номулкий ҳуқуқларни олиши ва амалга ошириши, мажбуриятлар олиши, судда даъвогар ва жавобгар бўлиши, низоларни ҳал этишда бошқа органларда вакиллик қилиши мумкин.

8. Дирекция Муассиснинг розилигига кўра тижорат ташкилотларининг, шунингдек, Ўзбекистон Республикаси қонун ҳужжатларига мувофиқ юридик шахсларнинг қатнашишига йўл қўйиладиган нотижорат ташкилотларда қатнашчи (акциядор, аъзо) бўлиши мумкин.

9. Дирекция бошқа давлат корхонасининг муассиси бўлиши мумкин эмас.

2-боб. Дирекция фаолиятининг мақсади ва асосий йўналишлари

10. «Наманган» эркин иқтисодий зонасини (кейинги ўринларда «Наманган» ЭИЗ деб аталади) ривожлантириш давлат дастурларининг тўлиқ ва ўз вақтида бажарилишини таъминлаш, шунингдек, «Наманган» ЭИЗ ҳудудида алоҳида ҳуқуқий режимга риоя этилишини таъминлаш йўли билан оператив бошқариш, «Наманган» ЭИЗ қатнашчиларига хизматлар кўрсатишдан ҳамда ушбу Уставда назарда тутилган бошқа ишлар (хизматлар)ни бажаришдан (кўрсатишдан) фойда олиш Дирекция фаолиятининг асосий мақсади ҳисобланади.

11. Қуйидагилар Дирекция фаолиятининг асосий йўналишлари ҳисобланади:

Наманган вилояти махсус иқтисодий зоналар ва кичик саноат зоналари маъмурий кенгашининг (кейинги ўринларда Маъмурий кенгаш деб аталади) қабул қилинган қарорларига мувофиқ «Наманган» ЭИЗ қатнашчиларини рўйхатдан ўтказиш, шунингдек, уларнинг реестрини юритиш;

Маъмурий кенгаш қарорларига мувофиқ инвесторлар билан «Наманган» ЭИЗ ҳудудида инвестициялаш тўғрисида битимлар, давлат мулкини «нол»га тенг харид қиймати бўйича сотиш тўғрисида «Наманган» ЭИЗ қатнашчилари билан шартномалар тузиш;

«Наманган» ЭИЗ ҳудудида инвестиция лойиҳаларини амалга ошириш учун хорижий ва маҳаллий инвесторларни қидириш ва жалб этиш;

ишлаб чиқилган «Наманган» ЭИЗ бош режаси ва Маъмурий кенгаш қарори билан маъқулланган инвестиция лойиҳаларини жойлаштириш;

«ягона дарча» тамойили асосида муҳандислик-коммуникация инфратузилмаси тармоқларига уланиш учун зарур бўлган барча рухсатномалар беришни ташкил этиш;

белгиланган тартибда танлаб олинган инвесторлар томонидан ўз зиммаларига қабул қилинган мажбуриятларнинг зарур тарзда бажарилишини тизимли назорат қилиш, кейинчалик натижаларни Маъмурий кенгашга тақдим этиш;

«Наманган» ЭИЗ ҳудудида жойлашган давлат мулки бўлган кўчмас мулк объектларини ўзига берилган ваколатлар доирасида бошқариш;

«Наманган» ЭИЗ ҳудудидаги лойиҳаларни ўз вақтида ишга тушириш ва корхоналарнинг доимий фаолият юритишини таъминлаш билан боғлиқ масалаларни ҳал этишда «Наманган» ЭИЗ қатнашчиларига кўмаклашиш;

«Наманган» ЭИЗни ривожлантириш дастурининг амалга оширилишини таъминлаш;

экологик ҳолатнинг яхшиланиши юзасидан назоратни таъминлаш, шунингдек, «Наманган» ЭИЗ ҳудудида жойлашган тарихий-маданий бойликларнинг бут сақланиши учун жавоб бериш;

«Наманган» ЭИЗ фаолиятини бошқариш бўйича бошқа функцияларни амалга ошириш.

Ўзбекистон Республикаси қонун ҳужжатларида ушбу Уставда назарда тутилган тегишли фаолият турининг лицензияланиши зарурлиги белгиланган тақдирда, Дирекция фаолиятнинг ушбу турини лицензия олмасдан, тегишли лицензияловчи орган билан тузилган лицензия битими асосида амалга оширишга ҳақлидир.

12. Дирекция қонун ҳужжатларида тақиқланмаган фаолиятнинг бошқа турларини амалга ошириши мумкин.

3-боб. Дирекция фаолиятини бошқариш

13. Дирекция Муассисга ва Маъмурий кенгашга ҳисобот беради.

14. Муассис қуйидаги ҳуқуқларга эга:

Дирекция фаолиятининг мақсади ва йўналишларини белгилаш;

Дирекция Уставига ўзгартириш ва қўшимчалар киритиш тўғрисида қарорлар қабул қилиш;

Дирекциянинг ортиқча, фойдаланилмаётган ёхуд белгиланган мақсадда фойдаланилмаётган мулкини олиб қўйиш ва тасарруф этиш;

Дирекцияга берилган мулкдан фойдаланишдан олинган соф фойданинг бир қисмини ёки ҳаммасини олиш;

Дирекция мулки билан амалга оширилган битимларни ҳақиқий эмас деб ҳисоблаш ва Дирекцияга етказилган зарарларни қоплаш тўғрисида судга даъво аризаси билан мурожаат қилиш;

Дирекцияни қайта ташкил этиш ёки тугатиш тўғрисида қарор қабул қилиш, тугатиш комиссиясини тайинлаш ва оралиқ, тугатиш балансини тасдиқлаш;

меҳнатга оид қонун ҳужжатларида белгиланган тартибда Дирекция раҳбари билан меҳнат шартномасини муддатидан олдин тўхтатиш;

меҳнатга оид қонун ҳужжатларида белгиланган тартибда Дирекция раҳбари билан меҳнат шартномасини муддатидан олдин бекор қилиш.

15. «Наманган» ЭИЗ мустақил бюджети ва «Наманган» ЭИЗни ривожлантириш жамғармаси маблағларидан мақсадли фойдаланилишини назорат қилиш Маъмурий кенгаш томонидан амалга оширилади.

16. Дирекциянинг жорий фаолиятига раҳбарликни Маъмурий кенгаш томонидан лавозимга тайинланадиган ва лавозимдан озод этиладиган Директор амалга оширади.

17. Директор ижро этувчи орган ҳисобланади.

18. Директор:

қонун ҳужжатлари талабларини бажаришга, Дирекция ходимларининг меҳнат шароитларини муҳофаза қилиш ва яхшилашга, атроф-муҳитни муҳофаза қилиш ва табиий ресурслардан оқилона фойдаланиш соҳасидаги норма ва қоидаларга риоя қилинишини таъминлаш тадбирларини ишлаб чиқади ва жорий этади;

«Наманган» ЭИЗни ривожлантириш дастурларининг амалга оширилишини ташкил қилади;

Дирекциянинг асосий фаолиятини такомиллаштиришга, бошқаришнинг энг замонавий усулларини жорий этиш чора-тадбирларини амалга оширади;

Дирекция номидан ишончномасиз ҳаракат қилади, барча ташкилотларда, шу жумладан, хорижий ташкилотларда унинг манфаатларини ифодалайди;

ходимларни ишга қабул қилади, улар билан меҳнат шартномаларини (контрактларини) тузади, ўзгартиради ва уларнинг амал қилишини тугатади;

қонун ҳужжатларида белгиланган тартибда ишончномалар беради;

кадрларни тайёрлаш ва ўқитиш, уларнинг малакасини ошириш чора-тадбирларини амалга оширади;

Дирекциянинг барча ходимлари учун мажбурий бўлган буйруқлар ва кўрсатмалар чиқаради;

Дирекциянинг ички иш тартибини ва хўжалик фаолиятини тартибга солувчи ҳужжатларни тасдиқлайди;

Дирекция томонидан қонун ҳужжатларига риоя қилинишини ташкил этиш ва назорат қилишни таъминлайди;

Дирекцияга юкланган мақсадлар ва вазифаларни бажариш учун зарур бўлган бошқа функцияларни амалга оширади.

19. Директор:

Муассисга Дирекция фаолияти тўғрисида белгиланган тартибда ҳисобот беради;

Директор ўз ҳуқуқларини амалга оширишда ва вазифаларини бажаришда Дирекция манфаатларини кўзлаган ҳолда ҳаракат қилиши лозим ҳамда бюджетга ва бюджетдан ташқари жамғармаларга тўловлар, иш ҳақининг ўз вақтида тўланиши, меҳнатга оид ҳуқуқий муносабатлардан келиб чиқувчи барча талабларнинг ва уларга тенглаштирилган тўловларнинг қондирилиши, ишлаб чиқариш фаолияти билан бевосита боғлиқ эҳтиёжларга маблағлар ўтказилмаганлиги, Дирекциянинг хатти-ҳаракатлари (ҳаракатсизлиги) билан, шу жумладан Дирекцияга берилган давлат мол-мулки йўқолган тақдирда, етказилган зарар юзасидан қонун ҳужжатларида белгиланган тартибда жавоб беради;

«Наманган» ЭИЗнинг Ўзбекистон Республикаси Молия вазирлиги билан келишган ҳолда Маъмурий кенгаш томонидан тасдиқланадиган мустақил бюджет маблағларининг тасарруф этувчиси ҳисобланади;

Ўзбекистон Республикаси Молия вазирлигига «Наманган» ЭИЗнинг мустақил бюджети ижроси тўғрисидаги ҳисоботни келишиш учун белгиланган тартибда тақдим этади.

20. Директор ўз зиммасига юкланган вазифаларнинг бажарилиши, шунингдек, Дирекцияга берилган давлат мулкининг сақланиши ва ундан мақсадли фойдаланилиши юзасидан қонун ҳужжатларида белгиланган тартибда жавоб беради.

4-боб. Дирекциянинг устав фонди

21. Дирекциянинг устав фонди «Наманган» ЭИЗ фаолиятини оператив бошқаришни амалга ошириш учун Муассис томонидан ўзига берилган маблағлар, мол-мулк ва бошқа активлар йиғиндисидан иборат бўлади.

22. Дирекция устав фондининг миқдори 1,0 млрд сўмни ташкил қилади.

5-боб. Дирекциянинг устав фондини кўпайтириш ва камайтириш тартиби

23. Дирекциянинг устав фондини кўпайтириш ёки камайтириш қонун ҳужжатларида белгиланган тартибда, Муассис қарорига биноан амалга оширилади.

6-боб. Дирекция мулкини тасарруф этиш

24. Муассис томонидан Дирекцияга оператив бошқарув ҳуқуқи билан берилган асосий фондлар ва айланма маблағлар Дирекция мол-мулкини ташкил қилади.

25. Дирекциянинг асосий фондлари ва айланма маблағлари бўлинмайди ва улушлар (ҳиссалар, пайлар) бўйича тақсимланиши мумкин эмас.

26. Маъмурий кенгаш Дирекцияга берилган давлат мулкидан белгиланган мақсадда фойдаланилишини ва унинг сақланишини, шунингдек, ўзгага берилишини Муассис номидан назорат қилади.

27. Директор Муассис билан келишган ҳолда Дирекция мулкини қуйидагича тасарруф этиши мумкин:

асосий воситаларни сотиш, уларни ижарага ёки гаровга бериш;

мол-мулкни бошқа хўжалик жамиятининг устав фондига улуш сифатида киритиш;

бошқа хўжалик жамиятларининг акциялари (улушлари)ни сотиб олиш ва сотиш;

мол-мулкни бошқача тарзда тасарруф этиш.

7-боб. Дирекция бюджетини шакллантириш

28. Қуйидагилар Дирекция фаолиятини молиялаштириш манбалари ҳисобланади:

давлат мулки бўлган ва «Наманган» ЭИЗ ҳудудида жойлашган бинолар ва иншоотларни ижарага беришдан олинган даромадларнинг бир қисми;

хизматлар кўрсатишдан олинган даромадлар;

ЭИЗ қатнашчиларининг ажратмалари ва ЭИЗ қатнашчилари сифатида рўйхатдан ўтиш учун тўловлар;

Ўзбекистон Республикасининг ривожланиш давлат дастурларидаги маблағлар;

қонун ҳужжатларида тақиқланмаган бошқа тушумлар.

8-боб. Захира фондини ва бошқа фондларни шакллантириш тартиби

29. Дирекция ўз тасарруфида қоладиган соф фойда ҳисобига захира фондини, шунингдек, бошқа фондларни ташкил этиши мумкин, уларнинг миқдори ва шакллантириш тартиби Муассис томонидан тасдиқланади.

9-боб. Даромад (фойда)ни тақсимлаш ва зарарларни қоплаш тартиби

30. Дирекциянинг соф фойдаси Дирекция тасарруфида қолади ва ундан Муассис қарорига биноан фойдаланилади.

31. Муассис ўз қарори билан ўзга юридик ва жисмоний шахсларга хайрия мақсадлари учун йўналтириладиган пул маблағларининг чекланган суммасини, уларни тасарруф этиш ҳуқуқини Директорга берган ҳолда белгилайди.

32. Дирекциянинг хўжалик фаолияти натижасида кўрилган зарарларини қоплаш ушбу мақсадлар учун ташкил этилган захира фонди маблағлари ҳисобидан амалга оширилиши мумкин.

10-боб. Ҳисоботларни тақдим этиш тартиби

33. Дирекция ҳисобот даври тугагач ваколатли органларга молия ҳисоботини ва рўйхати қонун ҳужжатларида белгиланган бошқа ҳужжатларни тақдим этади ҳамда ҳужжатларнинг сақланиши ва уларнинг давлат томонидан сақлашга берилиши юзасидан белгиланган тартибда жавоб беради.

34. Дирекциянинг хўжалик субъекти сифатидаги фаолиятини назорат қилиш Маъмурий кенгаш томонидан, қонун ҳужжатларида белгиланган тартибда амалга оширилади.

35. Директор ҳар чоракда Дирекция фаолиятининг натижалари ва тасдиқланган ривожлантириш дастурларининг амалга оширилиши тўғрисида Вазирлар Маҳкамасига ҳисобот беради.

11-боб. Дирекциянинг жавобгарлиги

36. Дирекция ўз мажбуриятлари бўйича ўзига тегишли мулк билан жавоб беради. Муассис Дирекциянинг мулки етарли бўлмаган тақдирда унинг мажбуриятлари бўйича субсидиар жавобгарликни амалга оширади.

37. Дирекция Муассис мажбуриятлари бўйича жавоб бермайди.

12-боб. Дирекцияни тугатиш ва қайта ташкил этиш

38. Дирекция Муассиснинг қарорига кўра, Ўзбекистон Республикаси қонун ҳужжатларида назарда тутилган тартибда ёки суд қарорига биноан тугатилиши ёхуд қайта ташкил этилиши мумкин.

39. Дирекцияни тугатиш Дирекция фаолиятининг ҳуқуқ ва мажбуриятлар ҳуқуқий ворислик тартибида бошқа шахсларга ўтмаган ҳолда тўхтатилишига сабаб бўлади.

Дирекция қайта ташкил этилган тақдирда унинг ҳуқуқ ва мажбуриятлари ҳуқуқий ворисга ўтади.

Ўзбекистон Республикасининг Бош вазири А. АРИПОВ

Тошкент ш.,

2018 йил 27 декабрь,

1054-сон

(Қонун ҳужжатлари маълумотлари миллий базаси, 29.12.2018 й., 09/18/1054/2398-сон; Қонунчилик маълумотлари миллий базаси, 29.12.2021 й., 09/21/786/1216-сон)

lex.uz

Oʻzbekiston Respublikasi Vazirlar Mahkamasining

qarori

TUZILMASI

USTAVI

“Namangan” erkin iqtisodiy zonasi faoliyatini tashkil etish chora-tadbirlari toʻgʻrisida

Oʻzbekiston Respublikasi Prezidentining “Namangan” erkin iqtisodiy zonasini tashkil etish toʻgʻrisida” 2018-yil 20-avgustdagi PF-5517-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Namangan” erkin iqtisodiy zonasini tashkil etish toʻgʻrisida” 2018-yil 20-avgustdagi PF-5517-son Farmoniga muvofiq “Namangan” erkin iqtisodiy zonasi tashkil etilganligi maʼlumot uchun qabul qilinsin.

2. Boshqaruv xodimlari soni 5 nafardan iborat boʻlgan “Namangan” erkin iqtisodiy zonasi direksiyasi” davlat unitar korxonasi (keyingi oʻrinlarda Direksiya deb ataladi) tashkil etilsin.

3. Quyidagilar:

“Namangan” erkin iqtisodiy zonasi tarkibiga kiruvchi hududlar 1-ilovaga ;

“Namangan” erkin iqtisodiy zonasi direksiyasi” davlat unitar korxonasining tuzilmasi 2-ilovaga ;

“Namangan” erkin iqtisodiy zonasi direksiyasi” davlat unitar korxonasining ustavi 3-ilovaga muvofiq tasdiqlansin.

4. Oʻzbekiston Respublikasi Moliya vazirligi Vazirlar Mahkamasining zaxira jamgʻarmasidan:

Direksiyaga, kelgusi yillarda oʻzini oʻzi moliyalashtirishga oʻtkazish sharti bilan, 2019-2020-yillar davrida saqlash xarajatlari uchun asoslangan hisob-kitoblar boʻyicha zarur mablagʻlar ajratilishini;

Direksiyaning Ustav fondini shakllantirishga 1,0 mlrd. soʻm miqdorida mablagʻlar ajratilishini taʼminlasin.

5. Namangan viloyati hokimligi:

Direksiyaning Namangan viloyati, Chust shahri, Charagʻon koʻchasi, 1-uy manzilidagi binoga tekin foydalanish huquqi bilan joylashtirilishini va keyinchalik Direksiya uchun zamonaviy maʼmuriy bino qurilishini;

Direksiyani malakali mutaxassislar bilan taʼminlashni, shuningdek, xorijiy mamlakatlarning mazkur yoʻnalishdagi ilgʻor tajribalari asosida mutaxassislarning malakasini muntazam ravishda oshirib borishni hamda Direksiyaga zarur inventarlar, tashkiliy texnika hamda samarali faoliyat olib borish uchun talab etiladigan vositalarni xarid qilish va saqlash uchun mablagʻlar ajratilishini taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Investitsiyalar boʻyicha davlat qoʻmitasi raisi S.R. Xolmuradov va Namangan viloyati hokimi X.X. Bozarov zimmasiga yuklansin.

Vazirlar Mahkamasining 2018-yil 27-dekabrdagi 1054-son qaroriga 1-ILOVA

“Namangan” erkin iqtisodiy zonasi tarkibiga kiruvchi hududlar

1-yer uchastkasi:

1-boshlangʻich nuqta Toshkent-Namangan avtomobil yoʻlining Chust kanali kesishgan joydan sharqiy tomonga 710 metr masofada dala yoʻligacha, shimol tomonga olib boradigan dala yoʻli boʻylab 300 metr masofada joylashgan.

1-nuqtadan chegara shimoli-gʻarbiy yoʻnalishda dala yoʻli bilan 1200 metr masofada beton ariqgacha, beton ariqdan shu yoʻnalish boʻyicha 440 metr, soʻngra shimoliy yoʻnalish boʻyicha 315 metr masofada 2-nuqtagacha davom etadi.

2-nuqtadan chegara quruq yer bilan janubi-gʻarbiy yoʻnalishda 90 metr masofada dala yoʻligacha, soʻngra shu yoʻnalish boʻyicha quruq yer bilan 1110 metr masofada 3-nuqtagacha davom etadi.

3-nuqtadan chegara quruq soy bilan janubi-sharqiy 550 metr, soʻngra janubiy-sharqiy yoʻnalishga burilish hosil qilib, 240 metr masofadan soʻng janubi-gʻarbiy yoʻnalishda 300 metr dala yoʻligacha, shu yoʻnalish boʻyicha dala yoʻli boʻylab 200 metr, soʻngra gʻarbiy yoʻnalish dala yoʻli boʻylab 70 metr masofada 4-nuqtagacha davom etadi.

4-nuqtadan chegara “Navoiy” massivi chegarasi boʻylab quruq yer bilan janubi-sharqiy yoʻnalishda 150 metr masofada 5-nuqtagacha davom etadi.

5-nuqtadan chegara quruq yer bilan janubiy yoʻnalishda “Navoiy” massivi chegarasi boʻylab burilishlar hosil qilib, 1250 metr masofada 6-nuqtagacha davom etadi.

6-nuqtadan chegara quruq yerlar bilan shimoli-sharqiy yoʻnalishda 450 metr, soʻngra shu yoʻnalish boʻyicha bogʻzor yerlar bilan 850 metr masofada 1-nuqta qoʻshilgunga qadar davom etadi.

2-yer uchastkasi:

1-boshlangʻich nuqta Toshkent-Namangan avtomobil yoʻlining janubiy tomonida Chust kanali kesishgan joyidan boshlangan dala yoʻli bilan 400 metr masofada janubiy-sharqiy yoʻnalishda dala yoʻli boʻylab, ushbu dala yoʻli boʻylab janub tomonga 80 metr masofada joylashgan.

1-nuqtadan chegara dala yoʻli boʻylab janubiy yoʻnalishda 1 520 metr masofada 2-nuqtagacha davom etadi.

2-nuqtadan chegara quruq yer bilan gʻarbiy yoʻnalishda 130 metr masofada 3-nuqtagacha davom etadi.

3-nuqtadan chegara Pop tumani bilan chegaradosh ariq boʻylab shimoliy-gʻarb yoʻnalishida burilishlar hosil qilib, 1420 metr masofada 4-nuqtaga tutashadi.

4-nuqtadan chegara sharqiy tomonga 90 metr masofada dala yoʻli bilan, soʻngra shimoli-sharq tomonga ariq bilan 420 metr masofada 1-nuqtaga qoʻshilgunga qadar davom etadi.

3-yer uchastkasi:

1-boshlangʻich nuqta Toshkent-Namangan avtomobil yoʻlining Chust-Chortoq avtomobil yoʻli kesishgan joyining shimoliy qirgʻogʻida joylashgan.

1-nuqtadan chegara Chust-Chortoq avtomobil yoʻli boʻylab, shimoli-sharqiy yoʻnalish boʻyicha 340 metr masofada dala yoʻli kesishgan yergacha, keyinchalik dala yoʻli bilan janubiy yoʻnalishda 750 metr masofada 2-nuqtagacha davom etadi.

2-nuqtadan chegara shimol yoʻnalish boʻyicha Toʻraqoʻrgʻon tumani bilan chegaradosh ariq boʻylab, 400 metr masofada 3-nuqtagacha davom etadi.

3-nuqtadan chegara dala yoʻli bilan shimoli-gʻarbiy yoʻnalishi boʻyicha 180 metr masofada 4-nuqtagacha davom etadi.

4-nuqtadan chegara Chust-Chortoq yoʻli boʻylab, janubi-gʻarbiy yoʻnalish boʻyicha 610 metr masofada 5-nuqtagacha dala yoʻli bilan tutashgan joygacha davom etadi.

5-nuqtadan chegara dala yoʻli boʻylab shimoli-gʻarbiy yoʻnalishda burilishlar hosil qilib, 210 metr masofada 6-nuqtagacha davom etadi.

6-nuqtadan chegara quruq yer bilan shimoli-sharqiy yoʻnalish boʻyicha 250 metr masofada 7-nuqtagacha davom etadi.

7-nuqtadan chegara shimoliy yoʻnalish boʻyicha quruq yer bilan 550 metr, soʻngra shu yoʻnalish boʻyicha burilishlar hosil qilib nomsiz ariq boʻylab 380 metr masofada 8-nuqta beton ariqgacha davom etadi.

8-nuqtadan chegara shimoliy-gʻarbiy yoʻnalishda beton ariq boʻylab burilishlar hosil qilib 450 metr masofada 9-nuqtagacha davom etadi.

9-nuqtadan chegara gʻarbiy yoʻnalishda quruq yer bilan 200 metr masofada 10-nuqtagacha davom etadi.

10-nuqtadan chegara janubiy yoʻnalishda quruq yer bilan 450 metr masofada, soʻngra chegara quruq yer bilan janubiy-sharqiy yoʻnalish boʻyicha 180 metr, shu yoʻnalish boʻyicha bogʻzor yeri bilan 70 metr masofada dala yoʻli bilan tutashadi, dala yoʻli boʻylab janubiy-sharqiy yoʻnalishda 100 metr masofada 11-nuqtagacha davom etadi.

11-nuqtadan chegara janubiy yoʻnalishda quruq yer bilan 650 metr masofada 12-nuqtagacha davom etadi.

12-nuqtadan chegara gʻarbiy yoʻnalish boʻyicha quruq soy bilan 350 metr, soʻngra shu yoʻnalish boʻyicha ariq bilan burilishlar hosil qilib 300 metr masofada 13-nuqta dala yoʻligacha davom etadi.

13-nuqtadan chegara janubiy yoʻnalish boʻyicha dala yoʻli bilan 60 metr masofada, keyinchalik ushbu dala yoʻli bilan burilishlar hosil qilib janubi-sharqiy yoʻnalish boʻyicha 880 metr masofada 14-nuqtagacha davom etadi.

14-nuqtadan chegara Chust-Namangan avtomobil yoʻli bilan 240 metr masofada 1-nuqtaga qoʻshilgunga qadar davom etadi.

4-yer uchastkasi:

Boshlangʻich nuqta “Janubiy aylanma yoʻli”ning Namangan viloyati Toʻraqoʻrgʻon tumani “Isoqxon Toʻra Ibrat” massividagi qismidan oʻtuvchi Katta Namangan kanalidan 70 metr masofada sharq tomonga, 1-nuqtagacha davom etadi.

1-nuqtadan boshlangan chegara “Omad 21” fermer xoʻjaligi ekin yer maydonlari bilan 800 metr masofada, “Teshiktosh Zamin” fermer xoʻjaligi ekin yer maydonlari bilan 348 metr masofada shimoldan janub tomonga 2-nuqtagacha davom etadi.

2-nuqtadan janubiy-sharq tomonga 449 metr, 180 metr “Teshiktosh Zamin” fermer xoʻjaligi bilan, 100 metr “Omad 21” fermer xoʻjaligi bilan, 169 metr “Mustaqil” fermer xoʻjaligi yer maydonlari bilan sobiq dala shiyponining sharq tomonidagi ichki dala yoʻli kesishmasidagi 3-nuqtagacha davom etadi.

3-nuqtadan dala ichki yoʻli orqali 880 metr, “Nosir Tolib” fermer xoʻjaligini ekin yerlari bilan “Porosmon” aholi yashash punktidan chiqayotgan ichki dala yoʻli bilan 4-nuqtagacha davom etadi.

4-nuqtadan sharq tomonga burilib, “Omad 21” fermer xoʻjaligi yerlari bilan 570 metr dala orqali dala yoʻlning kesishmasida 5-nuqtagacha davom etadi.

5-nuqtadan ichki dala yoʻli orqali, 1065 metrda tuman hokimligi zaxira yer maydonlari boʻylab 6-nuqtagacha davom etadi.

6-nuqtadan zaxira yer maydonlaridan 90 gradus burchak ostida gʻarbga burilib, “Qayumjon ota Raximov” fermer xoʻjaligi yerlari bilan 690 metrda ichki sugʻorish arigʻi boʻylab oʻtib, “Dashtobod Baraka Zamin” fermer xoʻjaligining yerlari bilan 120 metrda 7-nuqtagacha davom etadi.

7-nuqtadan shimolga burilib, 790 metr masofada Namangan shahar “Namangan parranda” MChJ yer maydonlari bilan “Janubiy aylanma yoʻl” boʻylab 8-nuqtagacha davom etadi.

8-nuqtadan chegara gʻarb tomonga burilib, 400 metr Namangan shahar “Namangan parranda” MChJ yer maydonlari bilan, 180 metr Toʻraqoʻrgʻon tumanidagi “Qayumjon ota Raximov” fermer xoʻjaligini yer maydonlari bilan hamda 306 metr “Omad 21” fermer xoʻjaligini ekin yerlari bilan masofada 1-nuqtaga qadar davom etadi.

5-yer uchastkasi:

1-boshlangʻich nuqta “Janubiy aylanma yoʻl”ning shimoliy tomonidagi ichki yoʻl bilan “Janubiy aylanma yoʻl” kesishmasida joylashgan. Shu nuqtadan “Janubiy aylanma yoʻl” boʻylab 885 metr “Guliston Yashnagan Zamin” fermer xoʻjaligining yerlaridan oʻtib 2-nuqtagacha davom etadi.

2-nuqtadan chegara “Katta Namangan kanali” boʻylab 380 metr “Guliston Yashnagan Zamin” fermer xoʻjaligining yerlaridan oʻtib, “Toʻraqoʻrgʻon Agro Pilla” MChJ hisobida boʻlgan tutzordan 60 metr oʻtib, “Isoqxon Toʻra Ibrat” massivining chegarasi bilan 3-nuqtagacha davom etadi.

3-nuqtadan boshlangan chegara 610 metr masofada “Toʻraqoʻrgʻon Agro Pilla” MChJ hisobida boʻlgan tutzordan oʻtib, 510 metr “Guliston Yashnagan Zamin” fermer xoʻjaligining yerlaridan 4-nuqtagacha davom etadi.

4-nuqtadan chegara janubiy gʻarb tomonga burilib, 130 metr “Guliston Yashnagan Zamin” fermer xoʻjaligining ekin yerlaridan 5-nuqtagacha davom etadi.

5-nuqtadan chegara “Isoqxon Toʻra Ibrat” massivi chegarasi boʻylab shimoliy gʻarbga burilib, 190 metr masofada zakan tarmogʻi boʻyidagi ichki dala yoʻlidagi “Guliston Yashnagan Zamin” fermer xoʻjaligining yerlaridan 6-nuqtagacha davom etadi.

6-nuqtadan yer uchastkasining chegarasi shu nuqtadan janub tomonga burilib, ichki zakan boʻyidagi ichki dala yoʻli orqali 1010 metr masofada “Guliston Yashnagan Zamin” fermer xoʻjaligining ekin yerlaridan 7-nuqtagacha davom etadi.

7-nuqtadan shu nuqtada ajratilayotgan yer uchastkasining chegarasi janubi-gʻarbiy tomonga burilib, mahalliy aholining dala tomorqa yer maydonlarining janubiy (pastki) tomonidagi chegarasi orqali 170 metr masofada “Guliston Yashnagan Zamin” fermer xoʻjaligining yerlaridan oʻtib, ichki sugʻorish arigʻi joylashgan 8-nuqtagacha davom etadi.

8-nuqtadan chegara shu nuqtadan shimolga burilib, yuqoridagi ichki sugʻorish arigʻi orqali 70 metr masofada “Guliston Yashnagan Zamin” fermer xoʻjaligining yerlari hamda ichki zakan tarmogʻi boʻyidagi ichki dala yoʻlida joylashgan 9-nuqtagacha davom etadi.

9-nuqtadan ajratilayotgan yer uchastkasining chegarasi janub tomonga burilib, yuqoridagi ichki zakan tarmogʻi boʻyidagi ichki dala yoʻli orqali “Guliston Yashnagan Zamin” fermer xoʻjaligining ekin yerlaridan 270 metr masofada 1-nuqtaga qoʻshilgunga qadar davom etadi.

Vazirlar Mahkamasining 2018-yil 27-dekabrdagi 1054-son qaroriga 2-ILOVA

“Namangan” erkin iqtisodiy zonasi direksiyasi” davlat unitar korxonasining

Vazirlar Mahkamasining 2018-yil 27-dekabrdagi 1054-son qaroriga 3-ILOVA

“Namangan” erkin iqtisodiy zonasi direksiyasi” davlat unitar korxonasining

1-bob. Umumiy qoidalar

1. “Namangan” erkin iqtisodiy zonasi direksiyasi” (keyingi oʻrinlarda Direksiya deb ataladi) operativ boshqaruv uchun oʻziga berilgan davlat mulki negizida davlat unitar korxonasi shaklida tashkil etilgan tijorat tashkiloti hisoblanadi, u oʻziga biriktirilgan mulkka nisbatan, qonunchilikda belgilangan doirada, oʻz faoliyati maqsadlariga, mulkdor (yoki uning topshirigʻiga binoan uning tomonidan masʼul etib tayinlangan davlat organi — muassis) topshiriqlariga muvofiq egalik qilish, foydalanish va tasarruf etish huquqini amalga oshiradi.

2. Direksiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Ustavga hamda boshqa qonun hujjatlariga amal qiladi.

3. Direksiya yuridik shaxs hisoblanadi, alohida mulkka, mustaqil balansga, banklarda hisob raqamlariga, shu jumladan, valyuta hisob raqamlariga, emblemaga, shtamplar va blankalarga, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga va boshqa rekvizitlarga ega boʻladi.

4. Direksiyaning rasmiy nomi:

a) davlat tilida:

toʻliq nomi — “Namangan” erkin iqtisodiy zona Direktsiyasi” davlat unitar korxonasi;

qisqartirilgan nomi — “Namangan” EIZ Direktsiyasi” DUK;

b) rus tilida:

toʻliq nomi — Gosudarstvennoye unitarnoye predpriyatiye “Direksiya svobodnoy ekonomicheskoy zoni “Namangan”;

qisqartirilgan nomi — GUP “Direksiya SEZ “Namangan”;

v) ingliz tilida:

toʻliq nomi — “Directorate of free economic zone “Namangan” State Unitary Company;

qisqartirilgan nomi — “Directorate of FEZ “Namangan” SUC.

5. Direksiyaning joylashgan joyi (pochta manzili): Namangan viloyati, Chust shahri, Charagʻon koʻchasi, 1-uy.

6. Oʻzbekiston Respublikasi Vazirlar Mahkamasi Direksiyaning muassisi (keyingi oʻrinlarda Muassis deb ataladi) hisoblanadi.

7. Direksiya oʻz nomidan qonun hujjatlarida belgilangan tartibda mulkiy va shaxsiy nomulkiy huquqlarni olishi va amalga oshirishi, majburiyatlar olishi, sudda daʼvogar va javobgar boʻlishi, nizolarni hal etishda boshqa organlarda vakillik qilishi mumkin.

8. Direksiya Muassisning roziligiga koʻra tijorat tashkilotlarining, shuningdek, Oʻzbekiston Respublikasi qonun hujjatlariga muvofiq yuridik shaxslarning qatnashishiga yoʻl qoʻyiladigan notijorat tashkilotlarda qatnashchi (aksiyador, aʼzo) boʻlishi mumkin.

9. Direksiya boshqa davlat korxonasining muassisi boʻlishi mumkin emas.

2-bob. Direksiya faoliyatining maqsadi va asosiy yoʻnalishlari

10. “Namangan” erkin iqtisodiy zonasini (keyingi oʻrinlarda “Namangan” EIZ deb ataladi) rivojlantirish davlat dasturlarining toʻliq va oʻz vaqtida bajarilishini taʼminlash, shuningdek, “Namangan” EIZ hududida alohida huquqiy rejimga rioya etilishini taʼminlash yoʻli bilan operativ boshqarish, “Namangan” EIZ qatnashchilariga xizmatlar koʻrsatishdan hamda ushbu Ustavda nazarda tutilgan boshqa ishlar (xizmatlar)ni bajarishdan (koʻrsatishdan) foyda olish Direksiya faoliyatining asosiy maqsadi hisoblanadi.

11. Quyidagilar Direksiya faoliyatining asosiy yoʻnalishlari hisoblanadi:

Namangan viloyati maxsus iqtisodiy zonalar va kichik sanoat zonalari maʼmuriy kengashining (keyingi oʻrinlarda Maʼmuriy kengash deb ataladi) qabul qilingan qarorlariga muvofiq “Namangan” EIZ qatnashchilarini roʻyxatdan oʻtkazish, shuningdek, ularning reyestrini yuritish;

Maʼmuriy kengash qarorlariga muvofiq investorlar bilan “Namangan” EIZ hududida investitsiyalash toʻgʻrisida bitimlar, davlat mulkini “nol”ga teng xarid qiymati boʻyicha sotish toʻgʻrisida “Namangan” EIZ qatnashchilari bilan shartnomalar tuzish;

“Namangan” EIZ hududida investitsiya loyihalarini amalga oshirish uchun xorijiy va mahalliy investorlarni qidirish va jalb etish;

ishlab chiqilgan “Namangan” EIZ bosh rejasi va Maʼmuriy kengash qarori bilan maʼqullangan investitsiya loyihalarini joylashtirish;

“yagona darcha” tamoyili asosida muhandislik-kommunikatsiya infratuzilmasi tarmoqlariga ulanish uchun zarur boʻlgan barcha ruxsatnomalar berishni tashkil etish;

belgilangan tartibda tanlab olingan investorlar tomonidan oʻz zimmalariga qabul qilingan majburiyatlarning zarur tarzda bajarilishini tizimli nazorat qilish, keyinchalik natijalarni Maʼmuriy kengashga taqdim etish;

“Namangan” EIZ hududida joylashgan davlat mulki boʻlgan koʻchmas mulk obyektlarini oʻziga berilgan vakolatlar doirasida boshqarish;

“Namangan” EIZ hududidagi loyihalarni oʻz vaqtida ishga tushirish va korxonalarning doimiy faoliyat yuritishini taʼminlash bilan bogʻliq masalalarni hal etishda “Namangan” EIZ qatnashchilariga koʻmaklashish;

“Namangan” EIZni rivojlantirish dasturining amalga oshirilishini taʼminlash;

ekologik holatning yaxshilanishi yuzasidan nazoratni taʼminlash, shuningdek, “Namangan” EIZ hududida joylashgan tarixiy-madaniy boyliklarning but saqlanishi uchun javob berish;

“Namangan” EIZ faoliyatini boshqarish boʻyicha boshqa funksiyalarni amalga oshirish.

Oʻzbekiston Respublikasi qonun hujjatlarida ushbu Ustavda nazarda tutilgan tegishli faoliyat turining litsenziyalanishi zarurligi belgilangan taqdirda, Direksiya faoliyatning ushbu turini litsenziya olmasdan, tegishli litsenziyalovchi organ bilan tuzilgan litsenziya bitimi asosida amalga oshirishga haqlidir.

12. Direksiya qonun hujjatlarida taqiqlanmagan faoliyatning boshqa turlarini amalga oshirishi mumkin.

3-bob. Direksiya faoliyatini boshqarish

13. Direksiya Muassisga va Maʼmuriy kengashga hisobot beradi.

14. Muassis quyidagi huquqlarga ega:

Direksiya faoliyatining maqsadi va yoʻnalishlarini belgilash;

Direksiya Ustaviga oʻzgartirish va qoʻshimchalar kiritish toʻgʻrisida qarorlar qabul qilish;

Direksiyaning ortiqcha, foydalanilmayotgan yoxud belgilangan maqsadda foydalanilmayotgan mulkini olib qoʻyish va tasarruf etish;

Direksiyaga berilgan mulkdan foydalanishdan olingan sof foydaning bir qismini yoki hammasini olish;

Direksiya mulki bilan amalga oshirilgan bitimlarni haqiqiy emas deb hisoblash va Direksiyaga yetkazilgan zararlarni qoplash toʻgʻrisida sudga daʼvo arizasi bilan murojaat qilish;

Direksiyani qayta tashkil etish yoki tugatish toʻgʻrisida qaror qabul qilish, tugatish komissiyasini tayinlash va oraliq, tugatish balansini tasdiqlash;

mehnatga oid qonun hujjatlarida belgilangan tartibda Direksiya rahbari bilan mehnat shartnomasini muddatidan oldin toʻxtatish;

mehnatga oid qonun hujjatlarida belgilangan tartibda Direksiya rahbari bilan mehnat shartnomasini muddatidan oldin bekor qilish.

15. “Namangan” EIZ mustaqil budjeti va “Namangan” EIZni rivojlantirish jamgʻarmasi mablagʻlaridan maqsadli foydalanilishini nazorat qilish Maʼmuriy kengash tomonidan amalga oshiriladi.

16. Direksiyaning joriy faoliyatiga rahbarlikni Maʼmuriy kengash tomonidan lavozimga tayinlanadigan va lavozimdan ozod etiladigan Direktor amalga oshiradi.

17. Direktor ijro etuvchi organ hisoblanadi.

18. Direktor:

qonun hujjatlari talablarini bajarishga, Direksiya xodimlarining mehnat sharoitlarini muhofaza qilish va yaxshilashga, atrof-muhitni muhofaza qilish va tabiiy resurslardan oqilona foydalanish sohasidagi norma va qoidalarga rioya qilinishini taʼminlash tadbirlarini ishlab chiqadi va joriy etadi;

“Namangan” EIZni rivojlantirish dasturlarining amalga oshirilishini tashkil qiladi;

Direksiyaning asosiy faoliyatini takomillashtirishga, boshqarishning eng zamonaviy usullarini joriy etish chora-tadbirlarini amalga oshiradi;

Direksiya nomidan ishonchnomasiz harakat qiladi, barcha tashkilotlarda, shu jumladan, xorijiy tashkilotlarda uning manfaatlarini ifodalaydi;

xodimlarni ishga qabul qiladi, ular bilan mehnat shartnomalarini (kontraktlarini) tuzadi, oʻzgartiradi va ularning amal qilishini tugatadi;

qonun hujjatlarida belgilangan tartibda ishonchnomalar beradi;

kadrlarni tayyorlash va oʻqitish, ularning malakasini oshirish chora-tadbirlarini amalga oshiradi;

Direksiyaning barcha xodimlari uchun majburiy boʻlgan buyruqlar va koʻrsatmalar chiqaradi;

Direksiyaning ichki ish tartibini va xoʻjalik faoliyatini tartibga soluvchi hujjatlarni tasdiqlaydi;

Direksiya tomonidan qonun hujjatlariga rioya qilinishini tashkil etish va nazorat qilishni taʼminlaydi;

Direksiyaga yuklangan maqsadlar va vazifalarni bajarish uchun zarur boʻlgan boshqa funksiyalarni amalga oshiradi.

19. Direktor:

Muassisga Direksiya faoliyati toʻgʻrisida belgilangan tartibda hisobot beradi;

Direktor oʻz huquqlarini amalga oshirishda va vazifalarini bajarishda Direksiya manfaatlarini koʻzlagan holda harakat qilishi lozim hamda budjetga va budjetdan tashqari jamgʻarmalarga toʻlovlar, ish haqining oʻz vaqtida toʻlanishi, mehnatga oid huquqiy munosabatlardan kelib chiquvchi barcha talablarning va ularga tenglashtirilgan toʻlovlarning qondirilishi, ishlab chiqarish faoliyati bilan bevosita bogʻliq ehtiyojlarga mablagʻlar oʻtkazilmaganligi, Direksiyaning xatti-harakatlari (harakatsizligi) bilan, shu jumladan Direksiyaga berilgan davlat mol-mulki yoʻqolgan taqdirda, yetkazilgan zarar yuzasidan qonun hujjatlarida belgilangan tartibda javob beradi;

“Namangan” EIZning Oʻzbekiston Respublikasi Moliya vazirligi bilan kelishgan holda Maʼmuriy kengash tomonidan tasdiqlanadigan mustaqil budjet mablagʻlarining tasarruf etuvchisi hisoblanadi;

Oʻzbekiston Respublikasi Moliya vazirligiga “Namangan” EIZning mustaqil budjeti ijrosi toʻgʻrisidagi hisobotni kelishish uchun belgilangan tartibda taqdim etadi.

20. Direktor oʻz zimmasiga yuklangan vazifalarning bajarilishi, shuningdek, Direksiyaga berilgan davlat mulkining saqlanishi va undan maqsadli foydalanilishi yuzasidan qonun hujjatlarida belgilangan tartibda javob beradi.

4-bob. Direksiyaning ustav fondi

21. Direksiyaning ustav fondi “Namangan” EIZ faoliyatini operativ boshqarishni amalga oshirish uchun Muassis tomonidan oʻziga berilgan mablagʻlar, mol-mulk va boshqa aktivlar yigʻindisidan iborat boʻladi.

22. Direksiya ustav fondining miqdori 1,0 mlrd soʻmni tashkil qiladi.

5-bob. Direksiyaning ustav fondini koʻpaytirish va kamaytirish tartibi

23. Direksiyaning ustav fondini koʻpaytirish yoki kamaytirish qonun hujjatlarida belgilangan tartibda, Muassis qaroriga binoan amalga oshiriladi.

6-bob. Direksiya mulkini tasarruf etish

24. Muassis tomonidan Direksiyaga operativ boshqaruv huquqi bilan berilgan asosiy fondlar va aylanma mablagʻlar Direksiya mol-mulkini tashkil qiladi.

25. Direksiyaning asosiy fondlari va aylanma mablagʻlari boʻlinmaydi va ulushlar (hissalar, paylar) boʻyicha taqsimlanishi mumkin emas.

26. Maʼmuriy kengash Direksiyaga berilgan davlat mulkidan belgilangan maqsadda foydalanilishini va uning saqlanishini, shuningdek, oʻzgaga berilishini Muassis nomidan nazorat qiladi.

27. Direktor Muassis bilan kelishgan holda Direksiya mulkini quyidagicha tasarruf etishi mumkin:

asosiy vositalarni sotish, ularni ijaraga yoki garovga berish;

mol-mulkni boshqa xoʻjalik jamiyatining ustav fondiga ulush sifatida kiritish;

boshqa xoʻjalik jamiyatlarining aksiyalari (ulushlari)ni sotib olish va sotish;

mol-mulkni boshqacha tarzda tasarruf etish.

7-bob. Direksiya budjetini shakllantirish

28. Quyidagilar Direksiya faoliyatini moliyalashtirish manbalari hisoblanadi:

davlat mulki boʻlgan va “Namangan” EIZ hududida joylashgan binolar va inshootlarni ijaraga berishdan olingan daromadlarning bir qismi;

xizmatlar koʻrsatishdan olingan daromadlar;

EIZ qatnashchilarining ajratmalari va EIZ qatnashchilari sifatida roʻyxatdan oʻtish uchun toʻlovlar;

Oʻzbekiston Respublikasining rivojlanish davlat dasturlaridagi mablagʻlar;

qonun hujjatlarida taqiqlanmagan boshqa tushumlar.

8-bob. Zaxira fondini va boshqa fondlarni shakllantirish tartibi

29. Direksiya oʻz tasarrufida qoladigan sof foyda hisobiga zaxira fondini, shuningdek, boshqa fondlarni tashkil etishi mumkin, ularning miqdori va shakllantirish tartibi Muassis tomonidan tasdiqlanadi.

9-bob. Daromad (foyda)ni taqsimlash va zararlarni qoplash tartibi

30. Direksiyaning sof foydasi Direksiya tasarrufida qoladi va undan Muassis qaroriga binoan foydalaniladi.

31. Muassis oʻz qarori bilan oʻzga yuridik va jismoniy shaxslarga xayriya maqsadlari uchun yoʻnaltiriladigan pul mablagʻlarining cheklangan summasini, ularni tasarruf etish huquqini Direktorga bergan holda belgilaydi.

32. Direksiyaning xoʻjalik faoliyati natijasida koʻrilgan zararlarini qoplash ushbu maqsadlar uchun tashkil etilgan zaxira fondi mablagʻlari hisobidan amalga oshirilishi mumkin.

10-bob. Hisobotlarni taqdim etish tartibi

33. Direksiya hisobot davri tugagach vakolatli organlarga moliya hisobotini va roʻyxati qonun hujjatlarida belgilangan boshqa hujjatlarni taqdim etadi hamda hujjatlarning saqlanishi va ularning davlat tomonidan saqlashga berilishi yuzasidan belgilangan tartibda javob beradi.

34. Direksiyaning xoʻjalik subyekti sifatidagi faoliyatini nazorat qilish Maʼmuriy kengash tomonidan, qonun hujjatlarida belgilangan tartibda amalga oshiriladi.

35. Direktor har chorakda Direksiya faoliyatining natijalari va tasdiqlangan rivojlantirish dasturlarining amalga oshirilishi toʻgʻrisida Vazirlar Mahkamasiga hisobot beradi.

11-bob. Direksiyaning javobgarligi

36. Direksiya oʻz majburiyatlari boʻyicha oʻziga tegishli mulk bilan javob beradi. Muassis Direksiyaning mulki yetarli boʻlmagan taqdirda uning majburiyatlari boʻyicha subsidiar javobgarlikni amalga oshiradi.

37. Direksiya Muassis majburiyatlari boʻyicha javob bermaydi.

12-bob. Direksiyani tugatish va qayta tashkil etish

38. Direksiya Muassisning qaroriga koʻra, Oʻzbekiston Respublikasi qonun hujjatlarida nazarda tutilgan tartibda yoki sud qaroriga binoan tugatilishi yoxud qayta tashkil etilishi mumkin.

39. Direksiyani tugatish Direksiya faoliyatining huquq va majburiyatlar huquqiy vorislik tartibida boshqa shaxslarga oʻtmagan holda toʻxtatilishiga sabab boʻladi.

Direksiya qayta tashkil etilgan taqdirda uning huquq va majburiyatlari huquqiy vorisga oʻtadi.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 27-dekabr,

1054-son

(Qonun hujjatlari maʼlumotlari milliy bazasi, 29.12.2018-y., 09/18/1054/2398-son; Qonunchilik maʼlumotlari milliy bazasi, 29.12.2021-y., 09/21/786/1216-son)

lex.uz