UzbekAI

Ўзбекистон Республикаси Вазирлар Маҳкамасининг

қарори

НИЗОМ

Ўзбекистон Республикаси Давлат божхона қўмитасининг Божхона институти шахсий таркибининг овқатланиш тизимини аутсорсинг шартларида ташкил этиш тартиби тўғрисидаги низомни тасдиқлаш ҳақида

Ўзбекистон Республикаси Президентининг «Ўзбекистон Республикаси божхона органлари кадрларини тайёрлаш тизимини тубдан такомиллаштириш чора-тадбирлари тўғрисида» 2018 йил 2 ноябрдаги ПҚ-3995-сон қарорига мувофиқ, шунингдек, Ўзбекистон Республикаси Давлат божхона қўмитасининг Божхона институти (кейинги ўринларда Божхона институти деб аталади) шахсий таркибининг овқатланиш тизимини янада такомиллаштириш ҳамда бюджет маблағларидан самарали фойдаланишни йўлга қўйиш мақсадида Вазирлар Маҳкамаси қарор қилади :

1. Ўзбекистон Республикаси Давлат божхона қўмитасининг Божхона институти шахсий таркибининг овқатланиш тизимини аутсорсинг шартларида ташкил этиш тартиби тўғрисидаги низом иловага мувофиқ тасдиқлансин.

2. Ўзбекистон Республикаси Давлат божхона қўмитаси:

Божхона институти шахсий таркибини озиқ-овқат билан таъминлашни ташкил қилиш бўйича аутсорсинг хизматлари жорий этилиши муносабати билан ошхона ходимлари штат бирликларини қайта кўриб чиқиб, қисқартириш ва ушбу билан боғлиқ бошқа харажатларни оптималлаштириш чораларини кўрсин;

аутсорсинг тизимига ўтиш муносабати билан тежалган пул маблағларини, биринчи навбатда, Божхона институти шахсий таркибининг овқатланиш шарт-шароитларини яхшилашга йўналтирсин;

манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Н.С. Отажонов ва Ўзбекистон Республикаси Давлат божхона қўмитаси раиси М.Б. Азимов зиммасига юклансин.

Вазирлар Маҳкамасининг 2019 йил 21 январдаги 52-сон қарорига ИЛОВА

Ўзбекистон Республикаси Давлат божхона қўмитасининг Божхона институти шахсий таркибининг овқатланишини аутсорсинг шартларида ташкил этиш тартиби тўғрисида

1-боб. Умумий қоидалар

1. Ушбу Низом Ўзбекистон Республикаси Давлат божхона қўмитасининг Божхона институти (кейинги ўринларда Институт деб аталади) шахсий таркибининг овқатланишини аутсорсинг шартларида ташкил этиш тартибини белгилайди.

2. Ушбу Низомда қуйидаги асосий тушунчалар қўлланилади:

аутсорсинг — буюртмачининг шахсий таркибни овқатлантириш вазифасини шартнома асосида аутсорсерга ўтказиш;

аутсорсер — шартнома асосида буюртмачига аутсорсинг хизматини кўрсатувчи юридик шахс;

буюртмачи — Ўзбекистон Республикаси Давлат божхона қўмитасининг Божхона институти;

Институт шахсий таркиби — Институтда хизмат ўтаётган давлат божхона хизмати органлари ходимлари ва курсантлари.

3. Институт шахсий таркиби Ўзбекистон Республикаси Давлат божхона қўмитаси (кейинги ўринларда Давлат божхона қўмитаси деб аталади) томонидан Молия вазирлиги ва Соғлиқни сақлаш вазирлиги билан келишилган ҳолда тасдиқланган нормалар асосида овқат билан таъминланади.

4. Институт шахсий таркибини овқатлантириш қуйидагиларни ўз ичига олади:

стационар ва дала шароитида озиқ-овқат таъминоти;

қуруқ маҳсулотлар таъминоти.

5. Аутсорсинг хизмати буюртмачининг тасдиқланган харажатлар сметаси доирасида бюджет маблағлари ҳисобидан молиялаштирилади.

6. Аутсорсер ходимларининг буюртмачига тегишли ҳудудга белгиланган тартибда олдиндан тақдим этилган рўйхат асосида киришига рухсат берилади.

7. Аутсорсинг хизматини кўрсатиш жараёнида махфийлик тартибига риоя этиш буюртмачи томонидан таъминланади.

2-боб. Аутсорсерни танлаш, шартнома тузиш ва ҳисоб-китобларни амалга ошириш

8. Аутсорсер Ўзбекистон Республикасининг «Давлат харидлари тўғрисида»ги Қонуни ва бошқа қонун ҳужжатларига мувофиқ танланади.

9. Аутсорсерга талабгорларга нисбатан қуйидаги талаблар қўйилади:

юридик шахс бўлиши;

умумий овқатланиш соҳасида камида уч йил фаолият олиб борган бўлиши;

аутсорсинг хизмати бўйича камида бир ойлик шартнома суммасига тенг айланма маблағларга эга бўлиши;

молиявий аҳволи барқарорлиги, солиқ ва бошқа мажбурий тўловлардан қарздорлиги мавжуд эмаслиги;

стационар ва дала шароитида аутсорсинг хизматини кўрсатиш учун етарли моддий-техника ва логистика базасига эга бўлиши;

штатида етарли иш тажрибаси ва кўникмага эга ходимлар бўлиши.

10. Аутсорсинг хизматини кўрсатиш бўйича шартнома буютмачи ва аутсорсер ўртасида календарь йил учун ёзма шаклда уч нусхада тузилади.

Шартномада Институт шахсий таркибининг сони, бир нафар овқатланувчи учун тасдиқланган нормалардаги кунлик озиқ-овқат қиймати, календарь куни ва жами йиллик сумма акс эттирилади.

Маҳаллий давлат ҳокимияти органларидан олинган озиқ-овқат маҳсулотлари нархи ўзгарганда ёки бошқа асосли ҳолларда, шартномага тегишли ўзгартириш киритилиши мумкин.

11. Буюртмачи маҳаллий давлат ҳокимияти органларидан кўпи билан бир ойда бир марта озиқ-овқат маҳсулотларининг ўртача бозор нархлари бўйича маълумот олади.

12. Бир нафар овқатланувчи учун кунлик озиқ-овқат маҳсулотларининг ўртача нархи озиқ-овқат маҳсулотларининг ўртача бозор нархларидан келиб чиққан ҳолда буюртмачи томонидан аниқланади ва Молия вазирлиги билан келишилади.

13. Аутсорсинг хизматига ҳақ тўлаш шартнома имзоланадиган ойда Институт шахсий таркиби учун кунлик озиқ-овқат маҳсулотларининг ўртача нархи ва аутсорсернинг харажатлари (солиқлар, ходимларнинг иш ҳақи, транспорт хизматлари, асбоб-ускуналарни таъмирлаш, улардан фойдаланиш ва бошқаларни) ҳамда уларга нисбатан 20 фоизгача устама ҳисобга олинган ҳолда буюртмачи томонидан белгиланади.

14. Кўрсатилган хизматлар ҳисоб-китоби шартноманинг ойлик суммасининг 15 фоизи миқдорида олдиндан, 85 фоизи ҳақиқатда кўрсатилган хизматлар суммасидан келиб чиқиб ҳар 10 кунда, якуний ҳисоб-китоб эса кейинги ойнинг 5 санасига қадар амалга оширилади.

15. Институт шахсий таркибини овқатлантириш бўйича ҳисобга киритишда ёки ҳисобдан чиқаришда ҳисоб-китоблар белгиланган кунлик норма суммасига нисбатан қуйидагича амалга оширилади:

нонушта учун 25 %;

тушлик учун 50 %;

кечки таом учун 25 %.

3-боб. Аутсорсерга қўйиладиган талаблар

16. Аутсорсинг хизматлари асосида овқат билан таъминлаш қонун ҳужжатларида белгиланган техника ва ёнғин хавфсизлиги, меҳнат муҳофазаси ҳамда санитария қоидалари, нормалари ва гигиена нормативларига риоя қилинган ҳолда амалга оширилиши лозим.

17. Аутсорсер томонидан фойдаланиладиган озиқ-овқат маҳсулотлари тегишли сертификатлар билан тасдиқланиши, шунингдек, халқаро ва миллий стандартлар талабларига жавоб бериши шарт.

18. Озиқ-овқат маҳсулотларини белгиланган тартибда сақлаш қоидаларига риоя этилиши бўйича жавобгарлик аутсорсер зиммасига юкланади.

19. Аутсорсер ходимлари:

сифатли озиқ-овқат маҳсулотларини қабул қилиши, уларни тўғри сақлаши ва белгиланган нормалар асосида сарфлаши;

белгиланган нормалар асосида таом тайёрлаш технологиясига қатъий амал қилиши, ортиқча исрофгарчиликка йўл қўймаслиги;

озиқ-овқат тайёрлаш ва хизмат кўрсатиш жараёнида санитария қоидалари, нормалари ва гигиена нормативларига риоя этиши;

ошпазлик соҳасида зарур билим ва кўникмаларга эга бўлиши ва ўз малакасини доимий равишда ошириб бориши зарур.

Аутсорсер ходимлари қонун ҳужжатларида белгиланган тартибда тиббий кўрикдан ўтиши ва тиббий дафтарчага эга бўлиши шарт.

Мазкур бандда белгиланган талабларга риоя қилмаган шахсларнинг аутсорсер томонидан хизмат кўрсатишга жалб қилиниши тақиқланади.

4-боб. Аутсорсер ва буюртмачининг ҳуқуқлари ва мажбуриятлари

20. Аутсорсер қуйидаги ҳуқуқларга эга:

ижарага олинган мол-мулкдан фойдаланиш;

ижарага олинган бино ва иншоотларнинг ички қисмида техник жиҳатдан жиҳозлаш ва таъмирлаш ишларини амалга ошириш;

Институт шахсий таркибининг сони ва овқатланиш жадвалини белгиланган тартибда олиш;

олинган озиқ-овқат маҳсулотлари нархларининг ўзгариши муносабати билан шартномага ўзгартириш киритиш таклифи билан чиқиш;

кўрсатилган хизматлар учун ўз вақтида тўловлар амалга оширилишини талаб қилиш;

буюртмачидан шартнома шартларининг бажарилишини талаб қилиш.

Аутсорсер қонун ҳужжатларига мувофиқ бошқа ҳуқуқларга ҳам эга бўлиши мумкин.

21. Аутсорсер:

Институт шахсий таркибининг озиқ-овқат таъминотини узлуксиз, шу жумладан дам олиш ва байрам кунлари ҳамда дала шароитида амалга ошириши;

озиқ-овқат маҳсулотларининг янги ва сифатли бўлишини таъминлаши;

соғлиқ учун зарарли ва яроқсиз озиқ-овқат маҳсулотларидан фойдаланмаслик ва таомларни тарқатмаслиги;

дала шароитида кўчма ошхона фаолиятини тўлиқ ташкил этган ҳолда, Институт шахсий таркибининг озиқ-овқат таъминотини амалга ошириши;

ижарага олинган бино ва иншоотлар, жиҳозлардан мақсадли ҳамда оқилона фойдаланиши, сақлаши, носоз ҳолга келганда уларни ўз ҳисобидан таъмирлаши, шунингдек, мулкни сақлаш харажатларини қоплаши;

аутсорсинг хизматини кўрсатишда техника, ёнғин, меҳнат муҳофазаси ҳамда санитария қоидалари, нормалари ва гигиена нормативларига қатъий риоя этиши;

озиқ-овқат маҳсулотларининг сифатли сақланишини таъминлаши;

махфийлик тартибига қатъий риоя қилиши лозим.

Аутсорсер зиммасига қонун ҳужжатларига мувофиқ бошқа мажбуриятлар ҳам юкланиши мумкин.

22. Буюртмачи қуйидаги ҳуқуқларга эга:

аутсорсердан шартнома шартларини бажариш билан боғлиқ жараёнда қатнашувчи шахслар (ошхона ходимлари) рўйхатини олиш;

озиқ-овқат маҳсулотларининг сифатини тасдиқловчи ҳужжатларни талаб қилиш;

овқатланиш жадвалига ўзгартиришлар киритиш;

аутсорсернинг ишлаб чиқариш фаолиятига аралашмаган ҳолда, шартнома шартларининг бажарилишини назорат қилиш.

Буюртмачи қонун ҳужжатларига мувофиқ бошқа ҳуқуқларга ҳам эга бўлиши мумкин.

23. Буюртмачи:

аутсорсерга Институт шахсий таркибининг сони ва уларнинг овқатланиш жадвалини ўз вақтида тақдим этиши;

шартномага мувофиқ белгиланган муддат ва шартлар асосида аутсорсерга кўрсатилган хизматлар учун тўловларни амалга ошириши лозим.

Буюртмачи зиммасига қонун ҳужжатларига мувофиқ бошқа мажбуриятлар ҳам юкланиши мумкин.

24. Аутсорсерга вақтинчалик фойдаланишга бериладиган ошхона биносига қўйиладиган асосий талаблар қуйидагилар ҳисобланади:

етарли ўринга эга бўлган, технологик жиҳозлар билан таъминланган, техник ҳолати белгиланган нормаларга мос бўлган овқатланиш биносининг мавжуд бўлиши;

маҳсулотларни сақлаш учун омборлар мавжудлиги;

таом тайёрлаш ускуналари, ошхона мебеллари ва овқатланиш учун зарур бўлган бошқа жиҳозлар мавжудлиги.

5-боб. Аутсорсер томонидан буюртмачи мол-мулки ва моддий-техника воситаларидан фойдаланиш

25. Ошхонанинг ишлаб чиқариш хоналари, асбоб-ускуналари, идиш-товоқлари ва мебеллари ижара шартномаси асосида ҳамда тегишли қабул қилиш-топшириш далолатномаси (кейинги ўринларда далолатнома деб аталади) расмийлаштирилган ҳолда, «ноль ставка» бўйича аутсорсерга вақтинчалик фойдаланишга берилади.

Далолатнома буюртмачининг комиссияси ва аутсорсер томонидан имзоланади.

26. Аутсорсерга кўрсатилган коммунал хизматлар қиймати буюртмачига ажратилган бюджет маблағлари доирасида қопланади.

6-боб. Аутсорсинг хизмати кўрсатилиши юзасидан мониторингни амалга ошириш

27. Аутсорсинг хизмати кўрсатилиши юзасидан мониторинг буюртмачи ташкил этадиган комиссия (кейинги ўринларда комиссия деб аталади) томонидан амалга оширилади.

28. Комиссия:

аутсорсинг хизмати кўрсатилиши юзасидан доимий мониторинг олиб боради, жумладан Институт шахсий таркиби ўртасида сўровномалар ўтказади;

мониторинг натижаларидан келиб чиқиб, буюртмачи ва аутсорсерга тегишли таклиф ва тавсиялар киритади;

ошхона ва омборларда санитария қоидалари, нормалари ва гигиена нормативларига риоя қилиниши ҳамда эпидемияга қарши тадбирлар бажарилишига риоя қилишнинг бузилиш ҳолатларини бартараф этиш чораларини кўради;

тайёр озиқ-овқатнинг белгиланган кунлик нормаларга мос келиши ҳамда сифатини ўрганади, зарур ҳолларда четдан мутахассислар жалб этади.

Комиссия буюртмачи томонидан юкланган бошқа ваколатларни ҳам амалга ошириши мумкин.

29. Комиссия томонидан ўтказилган ўрганиш натижалари алоҳида юритиладиган журналда қайд этиб борилади.

7-боб. Якунловчи қоидалар

30. Ушбу Низомда назарда тутилган талабларнинг бузилиши буюртмачи ва аутсорсернинг тузилган шартномани белгиланган тартибда бекор қилишига асос бўлади.

31. Мазкур Низом талабларининг бузилишида айбдор бўлган шахслар қонун ҳужжатларида белгиланган тартибда жавобгар бўлади.

Ўзбекистон Республикасининг Бош вазири А. АРИПОВ

Тошкент ш.,

2019 йил 21 январь,

52-сон

(Қонун ҳужжатлари маълумотлари миллий базаси, 22.01.2019 й., 09/19/52/2521-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Oʻzbekiston Respublikasi Davlat bojxona qoʻmitasining Bojxona instituti shaxsiy tarkibining ovqatlanish tizimini autsorsing shartlarida tashkil etish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Oʻzbekiston Respublikasi bojxona organlari kadrlarini tayyorlash tizimini tubdan takomillashtirish chora-tadbirlari toʻgʻrisida” 2018-yil 2-noyabrdagi PQ-3995-son qaroriga muvofiq, shuningdek, Oʻzbekiston Respublikasi Davlat bojxona qoʻmitasining Bojxona instituti (keyingi oʻrinlarda Bojxona instituti deb ataladi) shaxsiy tarkibining ovqatlanish tizimini yanada takomillashtirish hamda budjet mablagʻlaridan samarali foydalanishni yoʻlga qoʻyish maqsadida Vazirlar Mahkamasi qaror qiladi :

1. Oʻzbekiston Respublikasi Davlat bojxona qoʻmitasining Bojxona instituti shaxsiy tarkibining ovqatlanish tizimini autsorsing shartlarida tashkil etish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Davlat bojxona qoʻmitasi:

Bojxona instituti shaxsiy tarkibini oziq-ovqat bilan taʼminlashni tashkil qilish boʻyicha autsorsing xizmatlari joriy etilishi munosabati bilan oshxona xodimlari shtat birliklarini qayta koʻrib chiqib, qisqartirish va ushbu bilan bogʻliq boshqa xarajatlarni optimallashtirish choralarini koʻrsin;

autsorsing tizimiga oʻtish munosabati bilan tejalgan pul mablagʻlarini, birinchi navbatda, Bojxona instituti shaxsiy tarkibining ovqatlanish shart-sharoitlarini yaxshilashga yoʻnaltirsin;

manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.S. Otajonov va Oʻzbekiston Respublikasi Davlat bojxona qoʻmitasi raisi M.B. Azimov zimmasiga yuklansin.

Vazirlar Mahkamasining 2019-yil 21-yanvardagi 52-son qaroriga ILOVA

Oʻzbekiston Respublikasi Davlat bojxona qoʻmitasining Bojxona instituti shaxsiy tarkibining ovqatlanishini autsorsing shartlarida tashkil etish tartibi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Davlat bojxona qoʻmitasining Bojxona instituti (keyingi oʻrinlarda Institut deb ataladi) shaxsiy tarkibining ovqatlanishini autsorsing shartlarida tashkil etish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

autsorsing — buyurtmachining shaxsiy tarkibni ovqatlantirish vazifasini shartnoma asosida autsorserga oʻtkazish;

autsorser — shartnoma asosida buyurtmachiga autsorsing xizmatini koʻrsatuvchi yuridik shaxs;

buyurtmachi — Oʻzbekiston Respublikasi Davlat bojxona qoʻmitasining Bojxona instituti;

Institut shaxsiy tarkibi — Institutda xizmat oʻtayotgan davlat bojxona xizmati organlari xodimlari va kursantlari.

3. Institut shaxsiy tarkibi Oʻzbekiston Respublikasi Davlat bojxona qoʻmitasi (keyingi oʻrinlarda Davlat bojxona qoʻmitasi deb ataladi) tomonidan Moliya vazirligi va Sogʻliqni saqlash vazirligi bilan kelishilgan holda tasdiqlangan normalar asosida ovqat bilan taʼminlanadi.

4. Institut shaxsiy tarkibini ovqatlantirish quyidagilarni oʻz ichiga oladi:

statsionar va dala sharoitida oziq-ovqat taʼminoti;

quruq mahsulotlar taʼminoti.

5. Autsorsing xizmati buyurtmachining tasdiqlangan xarajatlar smetasi doirasida budjet mablagʻlari hisobidan moliyalashtiriladi.

6. Autsorser xodimlarining buyurtmachiga tegishli hududga belgilangan tartibda oldindan taqdim etilgan roʻyxat asosida kirishiga ruxsat beriladi.

7. Autsorsing xizmatini koʻrsatish jarayonida maxfiylik tartibiga rioya etish buyurtmachi tomonidan taʼminlanadi.

2-bob. Autsorserni tanlash, shartnoma tuzish va hisob-kitoblarni amalga oshirish

8. Autsorser Oʻzbekiston Respublikasining “Davlat xaridlari toʻgʻrisida”gi Qonuni va boshqa qonun hujjatlariga muvofiq tanlanadi.

9. Autsorserga talabgorlarga nisbatan quyidagi talablar qoʻyiladi:

yuridik shaxs boʻlishi;

umumiy ovqatlanish sohasida kamida uch yil faoliyat olib borgan boʻlishi;

autsorsing xizmati boʻyicha kamida bir oylik shartnoma summasiga teng aylanma mablagʻlarga ega boʻlishi;

moliyaviy ahvoli barqarorligi, soliq va boshqa majburiy toʻlovlardan qarzdorligi mavjud emasligi;

statsionar va dala sharoitida autsorsing xizmatini koʻrsatish uchun yetarli moddiy-texnika va logistika bazasiga ega boʻlishi;

shtatida yetarli ish tajribasi va koʻnikmaga ega xodimlar boʻlishi.

10. Autsorsing xizmatini koʻrsatish boʻyicha shartnoma buyutmachi va autsorser oʻrtasida kalendar yil uchun yozma shaklda uch nusxada tuziladi.

Shartnomada Institut shaxsiy tarkibining soni, bir nafar ovqatlanuvchi uchun tasdiqlangan normalardagi kunlik oziq-ovqat qiymati, kalendar kuni va jami yillik summa aks ettiriladi.

Mahalliy davlat hokimiyati organlaridan olingan oziq-ovqat mahsulotlari narxi oʻzgarganda yoki boshqa asosli hollarda, shartnomaga tegishli oʻzgartirish kiritilishi mumkin.

11. Buyurtmachi mahalliy davlat hokimiyati organlaridan koʻpi bilan bir oyda bir marta oziq-ovqat mahsulotlarining oʻrtacha bozor narxlari boʻyicha maʼlumot oladi.

12. Bir nafar ovqatlanuvchi uchun kunlik oziq-ovqat mahsulotlarining oʻrtacha narxi oziq-ovqat mahsulotlarining oʻrtacha bozor narxlaridan kelib chiqqan holda buyurtmachi tomonidan aniqlanadi va Moliya vazirligi bilan kelishiladi.

13. Autsorsing xizmatiga haq toʻlash shartnoma imzolanadigan oyda Institut shaxsiy tarkibi uchun kunlik oziq-ovqat mahsulotlarining oʻrtacha narxi va autsorserning xarajatlari (soliqlar, xodimlarning ish haqi, transport xizmatlari, asbob-uskunalarni taʼmirlash, ulardan foydalanish va boshqalarni) hamda ularga nisbatan 20 foizgacha ustama hisobga olingan holda buyurtmachi tomonidan belgilanadi.

14. Koʻrsatilgan xizmatlar hisob-kitobi shartnomaning oylik summasining 15 foizi miqdorida oldindan, 85 foizi haqiqatda koʻrsatilgan xizmatlar summasidan kelib chiqib har 10 kunda, yakuniy hisob-kitob esa keyingi oyning 5 sanasiga qadar amalga oshiriladi.

15. Institut shaxsiy tarkibini ovqatlantirish boʻyicha hisobga kiritishda yoki hisobdan chiqarishda hisob-kitoblar belgilangan kunlik norma summasiga nisbatan quyidagicha amalga oshiriladi:

nonushta uchun 25 %;

tushlik uchun 50 %;

kechki taom uchun 25 %.

3-bob. Autsorserga qoʻyiladigan talablar

16. Autsorsing xizmatlari asosida ovqat bilan taʼminlash qonun hujjatlarida belgilangan texnika va yongʻin xavfsizligi, mehnat muhofazasi hamda sanitariya qoidalari, normalari va gigiyena normativlariga rioya qilingan holda amalga oshirilishi lozim.

17. Autsorser tomonidan foydalaniladigan oziq-ovqat mahsulotlari tegishli sertifikatlar bilan tasdiqlanishi, shuningdek, xalqaro va milliy standartlar talablariga javob berishi shart.

18. Oziq-ovqat mahsulotlarini belgilangan tartibda saqlash qoidalariga rioya etilishi boʻyicha javobgarlik autsorser zimmasiga yuklanadi.

19. Autsorser xodimlari:

sifatli oziq-ovqat mahsulotlarini qabul qilishi, ularni toʻgʻri saqlashi va belgilangan normalar asosida sarflashi;

belgilangan normalar asosida taom tayyorlash texnologiyasiga qatʼiy amal qilishi, ortiqcha isrofgarchilikka yoʻl qoʻymasligi;

oziq-ovqat tayyorlash va xizmat koʻrsatish jarayonida sanitariya qoidalari, normalari va gigiyena normativlariga rioya etishi;

oshpazlik sohasida zarur bilim va koʻnikmalarga ega boʻlishi va oʻz malakasini doimiy ravishda oshirib borishi zarur.

Autsorser xodimlari qonun hujjatlarida belgilangan tartibda tibbiy koʻrikdan oʻtishi va tibbiy daftarchaga ega boʻlishi shart.

Mazkur bandda belgilangan talablarga rioya qilmagan shaxslarning autsorser tomonidan xizmat koʻrsatishga jalb qilinishi taqiqlanadi.

4-bob. Autsorser va buyurtmachining huquqlari va majburiyatlari

20. Autsorser quyidagi huquqlarga ega:

ijaraga olingan mol-mulkdan foydalanish;

ijaraga olingan bino va inshootlarning ichki qismida texnik jihatdan jihozlash va taʼmirlash ishlarini amalga oshirish;

Institut shaxsiy tarkibining soni va ovqatlanish jadvalini belgilangan tartibda olish;

olingan oziq-ovqat mahsulotlari narxlarining oʻzgarishi munosabati bilan shartnomaga oʻzgartirish kiritish taklifi bilan chiqish;

koʻrsatilgan xizmatlar uchun oʻz vaqtida toʻlovlar amalga oshirilishini talab qilish;

buyurtmachidan shartnoma shartlarining bajarilishini talab qilish.

Autsorser qonun hujjatlariga muvofiq boshqa huquqlarga ham ega boʻlishi mumkin.

21. Autsorser:

Institut shaxsiy tarkibining oziq-ovqat taʼminotini uzluksiz, shu jumladan dam olish va bayram kunlari hamda dala sharoitida amalga oshirishi;

oziq-ovqat mahsulotlarining yangi va sifatli boʻlishini taʼminlashi;

sogʻliq uchun zararli va yaroqsiz oziq-ovqat mahsulotlaridan foydalanmaslik va taomlarni tarqatmasligi;

dala sharoitida koʻchma oshxona faoliyatini toʻliq tashkil etgan holda, Institut shaxsiy tarkibining oziq-ovqat taʼminotini amalga oshirishi;

ijaraga olingan bino va inshootlar, jihozlardan maqsadli hamda oqilona foydalanishi, saqlashi, nosoz holga kelganda ularni oʻz hisobidan taʼmirlashi, shuningdek, mulkni saqlash xarajatlarini qoplashi;

autsorsing xizmatini koʻrsatishda texnika, yongʻin, mehnat muhofazasi hamda sanitariya qoidalari, normalari va gigiyena normativlariga qatʼiy rioya etishi;

oziq-ovqat mahsulotlarining sifatli saqlanishini taʼminlashi;

maxfiylik tartibiga qatʼiy rioya qilishi lozim.

Autsorser zimmasiga qonun hujjatlariga muvofiq boshqa majburiyatlar ham yuklanishi mumkin.

22. Buyurtmachi quyidagi huquqlarga ega:

autsorserdan shartnoma shartlarini bajarish bilan bogʻliq jarayonda qatnashuvchi shaxslar (oshxona xodimlari) roʻyxatini olish;

oziq-ovqat mahsulotlarining sifatini tasdiqlovchi hujjatlarni talab qilish;

ovqatlanish jadvaliga oʻzgartirishlar kiritish;

autsorserning ishlab chiqarish faoliyatiga aralashmagan holda, shartnoma shartlarining bajarilishini nazorat qilish.

Buyurtmachi qonun hujjatlariga muvofiq boshqa huquqlarga ham ega boʻlishi mumkin.

23. Buyurtmachi:

autsorserga Institut shaxsiy tarkibining soni va ularning ovqatlanish jadvalini oʻz vaqtida taqdim etishi;

shartnomaga muvofiq belgilangan muddat va shartlar asosida autsorserga koʻrsatilgan xizmatlar uchun toʻlovlarni amalga oshirishi lozim.

Buyurtmachi zimmasiga qonun hujjatlariga muvofiq boshqa majburiyatlar ham yuklanishi mumkin.

24. Autsorserga vaqtinchalik foydalanishga beriladigan oshxona binosiga qoʻyiladigan asosiy talablar quyidagilar hisoblanadi:

yetarli oʻringa ega boʻlgan, texnologik jihozlar bilan taʼminlangan, texnik holati belgilangan normalarga mos boʻlgan ovqatlanish binosining mavjud boʻlishi;

mahsulotlarni saqlash uchun omborlar mavjudligi;

taom tayyorlash uskunalari, oshxona mebellari va ovqatlanish uchun zarur boʻlgan boshqa jihozlar mavjudligi.

5-bob. Autsorser tomonidan buyurtmachi mol-mulki va moddiy-texnika vositalaridan foydalanish

25. Oshxonaning ishlab chiqarish xonalari, asbob-uskunalari, idish-tovoqlari va mebellari ijara shartnomasi asosida hamda tegishli qabul qilish-topshirish dalolatnomasi (keyingi oʻrinlarda dalolatnoma deb ataladi) rasmiylashtirilgan holda, “nol stavka” boʻyicha autsorserga vaqtinchalik foydalanishga beriladi.

Dalolatnoma buyurtmachining komissiyasi va autsorser tomonidan imzolanadi.

26. Autsorserga koʻrsatilgan kommunal xizmatlar qiymati buyurtmachiga ajratilgan budjet mablagʻlari doirasida qoplanadi.

6-bob. Autsorsing xizmati koʻrsatilishi yuzasidan monitoringni amalga oshirish

27. Autsorsing xizmati koʻrsatilishi yuzasidan monitoring buyurtmachi tashkil etadigan komissiya (keyingi oʻrinlarda komissiya deb ataladi) tomonidan amalga oshiriladi.

28. Komissiya:

autsorsing xizmati koʻrsatilishi yuzasidan doimiy monitoring olib boradi, jumladan Institut shaxsiy tarkibi oʻrtasida soʻrovnomalar oʻtkazadi;

monitoring natijalaridan kelib chiqib, buyurtmachi va autsorserga tegishli taklif va tavsiyalar kiritadi;

oshxona va omborlarda sanitariya qoidalari, normalari va gigiyena normativlariga rioya qilinishi hamda epidemiyaga qarshi tadbirlar bajarilishiga rioya qilishning buzilish holatlarini bartaraf etish choralarini koʻradi;

tayyor oziq-ovqatning belgilangan kunlik normalarga mos kelishi hamda sifatini oʻrganadi, zarur hollarda chetdan mutaxassislar jalb etadi.

Komissiya buyurtmachi tomonidan yuklangan boshqa vakolatlarni ham amalga oshirishi mumkin.

29. Komissiya tomonidan oʻtkazilgan oʻrganish natijalari alohida yuritiladigan jurnalda qayd etib boriladi.

7-bob. Yakunlovchi qoidalar

30. Ushbu Nizomda nazarda tutilgan talablarning buzilishi buyurtmachi va autsorserning tuzilgan shartnomani belgilangan tartibda bekor qilishiga asos boʻladi.

31. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javobgar boʻladi.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 21-yanvar,

52-son

(Qonun hujjatlari maʼlumotlari milliy bazasi, 22.01.2019-y., 09/19/52/2521-son)

lex.uz