📅 2019-yil 7-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 7 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 7 февраля 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 7 February 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сирдарё вилоятида қишлоқ хўжалиги соҳасида давлат-хусусий шериклик асосида илмий-тадқиқот ишларини ташкил этиш чора-тадбирлари тўғрисида
Ўзбекистон Республикаси Президентининг «Сирдарё вилоятида замонавий пахтачилик-тўқимачилик кластерини барпо этиш чора-тадбирлари тўғрисида» 2017 йил 15 сентябрдаги ПҚ-3279-сон қарорига мувофиқ ҳамда қишлоқ хўжалигида таркибий ислоҳотларни янада чуқурлаштириш, илмий ва инновацион фаолиятга тўғридан-тўғри инвестициялар жалб этишни рағбатлантириш, қишлоқ хўжалиги ва ўсимлик маҳсулотлари етиштиришнинг илмий асосланган самарали усулларини жорий этиш мақсадида Вазирлар Маҳкамаси қарор қилади:
1. Сирдарё вилоятининг Мирзаобод туманида «BEK Cluster» масъулияти чекланган жамияти муассислигида «Ўсимлик маҳсулотларини етиштириш ва қайта ишлаш технологиялари илмий-амалий маркази» масъулияти чекланган жамият (кейинги ўринларда Марказ деб аталади) ташкил этилганлиги маълумот учун қабул қилинсин.
2. Сирдарё вилояти ҳокимлиги, Ўзбекистон Республикаси Олий ва ўрта махсус таълим вазирлиги, Қишлоқ хўжалиги вазирлиги, Давлат активларини бошқариш агентлигининг Сирдарё вилояти, Мирзаобод тумани, Оқолтин ШФЙ, Ёшлик кўчасида жойлашган Ўзбекистон Республикаси Олий ва ўрта махсус таълим вазирлигининг Касб-ҳунар таълими марказига тегишли Мирзаобод гидромелиорация касб-ҳунар коллежи бино ва иншоотларини тегишли ҳудуди билан бирга (кейинги ўринларда объект деб аталади) давлат-хусусий шериклик шартлари асосида «BEK Cluster» масъулияти чекланган жамиятига (кейинги ўринларда хусусий шерик деб аталади) Марказ фаолиятини ташкил қилиш учун текин фойдаланиш ҳуқуқи асосида бериш таклифи маъқуллансин.
Белгилаб қўйилсинки, Мирзаобод гидромелиорация касб-ҳунар коллежи ўқувчилари ўқишни битиргунларига қадар мазкур коллеж биносида ўқув жараёнини давом эттирадилар.
3. Белгилансинки, хусусий шерик давлат-хусусий шериклик тўғрисида битимни амалга ошириш доирасида қуйидаги мажбуриятларни ўз зиммасига олади:
икки йил давомида камида 2 млн. АҚШ доллари миқдорида инвестиция киритиш орқали объектни реконструкция қилиш, жиҳозлаш ва илмий лаборатория асбоб-ускуналарини сотиб олиш;
объект негизида ўсимлик маҳсулотларини етиштириш ва қайта ишлаш технологияларини яратишга қаратилган илмий-тадқиқот фаолиятини ташкил этиш ҳамда ўн йил давомида фаолият турини сақлаб қолиш;
камида 44 та янги иш ўринларини яратиш ва бир йил давомида сақлаб туриш;
ҳудуддаги илмий-тадқиқот ва олий таълим муассасалари ходимлари ҳамда талабаларига илмий-тадқиқот ва тажриба-синов ишларини амалга ошириш учун лаборатория ҳамда тажриба ерларидан бепул фойдаланиш учун зарур шароитлар яратиш;
илмий-тадқиқотларда фаол қатнашаётган Марказ ва ҳудуддаги илмий-тадқиқот ҳамда олий таълим муассасаларида фаолият олиб бораётган ёш мутахассисларнинг ҳар йили камида 5 нафарини беш йил мобайнида хорижий илмий-тадқиқот ва таълим муассасаларида тажриба орттиришга юбориш;
Мирзаобод гидромелиорация касб-ҳунар коллежи битирувчиларини ўқишни битирганларидан сўнг Марказда иш билан таъминлаш;
Сирдарё вилояти қишлоқ хўжалигини ривожлантириш эҳтиёжини инобатга олиб, вилоятнинг ер ва сув ресурсларидан самарали фойдаланишга йўналтирилган илғор технологиялар, шунингдек, инновацион суғориш усулларини қўллаш тизимини ташкил этиш.
4. Сирдарё вилояти ҳокимлиги:
ўн беш кун муддатда ушбу қарорнинг 3-бандида назарда тутилган шартлар асосида белгиланган тартибда объект бўйича хусусий шерик билан давлат-хусусий шериклик тўғрисида битим тузилишини;
хусусий шерик томонидан ушбу қарорнинг 3-бандида назарда тутилган мажбуриятларнинг ўз вақтида ва сифатли бажарилиши мониторингини таъминласин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Э.М. Ганиев, Сирдарё вилояти ҳокими Ғ.Г. Мирзаев ҳамда Ўзбекистон Республикаси олий ва ўрта махсус таълим вазири И.У. Маджидов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 7 февраль,
105-сон
Oʻzbekiston Respublikasi Vazirlar Mahkamasining
qarori
Sirdaryo viloyatida qishloq xoʻjaligi sohasida davlat-xususiy sheriklik asosida ilmiy-tadqiqot ishlarini tashkil etish chora-tadbirlari toʻgʻrisida
Oʻzbekiston Respublikasi Prezidentining “Sirdaryo viloyatida zamonaviy paxtachilik-toʻqimachilik klasterini barpo etish chora-tadbirlari toʻgʻrisida” 2017-yil 15-sentabrdagi PQ-3279-son qaroriga muvofiq hamda qishloq xoʻjaligida tarkibiy islohotlarni yanada chuqurlashtirish, ilmiy va innovatsion faoliyatga toʻgʻridan-toʻgʻri investitsiyalar jalb etishni ragʻbatlantirish, qishloq xoʻjaligi va oʻsimlik mahsulotlari yetishtirishning ilmiy asoslangan samarali usullarini joriy etish maqsadida Vazirlar Mahkamasi qaror qiladi:
1. Sirdaryo viloyatining Mirzaobod tumanida “BEK Cluster” masʼuliyati cheklangan jamiyati muassisligida “Oʻsimlik mahsulotlarini yetishtirish va qayta ishlash texnologiyalari ilmiy-amaliy markazi” masʼuliyati cheklangan jamiyat (keyingi oʻrinlarda Markaz deb ataladi) tashkil etilganligi maʼlumot uchun qabul qilinsin.
2. Sirdaryo viloyati hokimligi, Oʻzbekiston Respublikasi Oliy va oʻrta maxsus taʼlim vazirligi, Qishloq xoʻjaligi vazirligi, Davlat aktivlarini boshqarish agentligining Sirdaryo viloyati, Mirzaobod tumani, Oqoltin SHFY, Yoshlik koʻchasida joylashgan Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markaziga tegishli Mirzaobod gidromelioratsiya kasb-hunar kolleji bino va inshootlarini tegishli hududi bilan birga (keyingi oʻrinlarda obyekt deb ataladi) davlat-xususiy sheriklik shartlari asosida “BEK Cluster” masʼuliyati cheklangan jamiyatiga (keyingi oʻrinlarda xususiy sherik deb ataladi) Markaz faoliyatini tashkil qilish uchun tekin foydalanish huquqi asosida berish taklifi maʼqullansin.
Belgilab qoʻyilsinki, Mirzaobod gidromelioratsiya kasb-hunar kolleji oʻquvchilari oʻqishni bitirgunlariga qadar mazkur kollej binosida oʻquv jarayonini davom ettiradilar.
3. Belgilansinki, xususiy sherik davlat-xususiy sheriklik toʻgʻrisida bitimni amalga oshirish doirasida quyidagi majburiyatlarni oʻz zimmasiga oladi:
ikki yil davomida kamida 2 mln. AQSH dollari miqdorida investitsiya kiritish orqali obyektni rekonstruksiya qilish, jihozlash va ilmiy laboratoriya asbob-uskunalarini sotib olish;
obyekt negizida oʻsimlik mahsulotlarini yetishtirish va qayta ishlash texnologiyalarini yaratishga qaratilgan ilmiy-tadqiqot faoliyatini tashkil etish hamda oʻn yil davomida faoliyat turini saqlab qolish;
kamida 44 ta yangi ish oʻrinlarini yaratish va bir yil davomida saqlab turish;
hududdagi ilmiy-tadqiqot va oliy taʼlim muassasalari xodimlari hamda talabalariga ilmiy-tadqiqot va tajriba-sinov ishlarini amalga oshirish uchun laboratoriya hamda tajriba yerlaridan bepul foydalanish uchun zarur sharoitlar yaratish;
ilmiy-tadqiqotlarda faol qatnashayotgan Markaz va hududdagi ilmiy-tadqiqot hamda oliy taʼlim muassasalarida faoliyat olib borayotgan yosh mutaxassislarning har yili kamida 5 nafarini besh yil mobaynida xorijiy ilmiy-tadqiqot va taʼlim muassasalarida tajriba orttirishga yuborish;
Mirzaobod gidromelioratsiya kasb-hunar kolleji bitiruvchilarini oʻqishni bitirganlaridan soʻng Markazda ish bilan taʼminlash;
Sirdaryo viloyati qishloq xoʻjaligini rivojlantirish ehtiyojini inobatga olib, viloyatning yer va suv resurslaridan samarali foydalanishga yoʻnaltirilgan ilgʻor texnologiyalar, shuningdek, innovatsion sugʻorish usullarini qoʻllash tizimini tashkil etish.
4. Sirdaryo viloyati hokimligi:
oʻn besh kun muddatda ushbu qarorning 3-bandida nazarda tutilgan shartlar asosida belgilangan tartibda obyekt boʻyicha xususiy sherik bilan davlat-xususiy sheriklik toʻgʻrisida bitim tuzilishini;
xususiy sherik tomonidan ushbu qarorning 3-bandida nazarda tutilgan majburiyatlarning oʻz vaqtida va sifatli bajarilishi monitoringini taʼminlasin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari E.M. Ganiyev, Sirdaryo viloyati hokimi Gʻ.G. Mirzayev hamda Oʻzbekiston Respublikasi oliy va oʻrta maxsus taʼlim vaziri I.U. Madjidov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 7-fevral,
105-son