📅 2019-yil 26-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 26 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 26 февраля 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 26 February 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Ўзбекистон Республикаси Олий таълим, фан ва инновациялар вазирлигининг Олий таълим муассасаларини ривожлантириш жамғармаси тўғрисидаги низомни тасдиқлаш ҳақида
Олий таълим муассасаларининг бюджетдан ташқари маблағлари ва даромадлари жамғарилишини таъминлаш, моддий-техника базасини мустаҳкамлаш ва ходимларини моддий рағбатлантириш мақсадида Вазирлар Маҳкамаси қарор қилади:
1. Ўзбекистон Республикаси Олий таълим, фан ва инновациялар вазирлигининг Олий таълим муассасаларини ривожлантириш жамғармаси тўғрисидаги низом 1-иловага мувофиқ тасдиқлансин.
3. Ўзбекистон Республикаси Олий ва ўрта махсус таълим вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
4. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.Д. Абдухакимов ҳамда олий ва ўрта махсус таълим вазири И.У. Маджидов зиммасига юклансин.
Вазирлар Маҳкамасининг 2019 йил 26 февралдаги 172-сон қарорига 1-ИЛОВА
Ўзбекистон Республикаси Олий таълим, фан ва инновациялар вазирлигининг Олий таълим муассасаларини ривожлантириш жамғармаси тўғрисида
1-боб. Умумий қоидалар
1. Ушбу Низом Ўзбекистон Республикаси Олий таълим, фан ва инновациялар вазирлигининг Олий таълим муассасаларини ривожлантириш жамғармаси (кейинги ўринларда жамғарма деб аталади) маблағларини шакллантириш ва улардан фойдаланиш тартибини белгилайди.
Ушбу Низом Ўзбекистон Республикаси ҳудудида жойлашган хорижий олий таълим муассасалари ёки уларнинг филиаллари, нодавлат таълим хизматлари фаолияти билан шуғулланувчи юридик шахслар ҳамда Ўзбекистон Республикаси Мудофаа вазирлиги, Ички ишлар вазирлиги, Адлия вазирлиги, Фавқулодда вазиятлар вазирлиги, Мактабгача ва мактаб таълими вазирлиги, Давлат хавфсизлик хизмати, Миллий гвардияси ва Давлат божхона қўмитаси тасарруфидаги олий таълим муассасаларига нисбатан татбиқ этилмайди.
2. Жамғарма юридик шахс ҳисобланмайди ва унинг маблағлари Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида очилган Ўзбекистон Республикаси Олий таълим, фан ва инновациялар вазирлигининг (кейинги ўринларда вазирлик деб аталади) бюджетдан ташқари шахсий ғазна ҳисобварағида жамланади ва ушбу Низомда белгиланган мақсадларга сарфланади.
3. Ўзбекистон Республикаси Олий таълим, фан ва инновациялар вазирлигининг Олий таълим муассасаларини ривожлантириш жамғармаси фаолиятини ташкил этиш ушбу Низомга иловада келтирилган схемага мувофиқ амалга оширилади.
2-боб. Жамғарма маблағларини шакллантириш тартиби
4. Жамғарма маблағлари қуйидаги манбалар ҳисобидан шакллантирилади:
олий таълим муассасаларининг тўлов-контракт (шу жумладан, табақалаштирилган тўлов-контракт) шаклида ўқитишдан тушадиган маблағларининг мазкур маблағлар бўйича молия йили охирига қолдиқ (тижорат банкларининг депозитларига жойлаштирилган маблағлар ҳам инобатга олинган ҳолда) қисмининг 4 фоизи миқдоридаги ажратмалар;
Жамғарманинг вақтинчалик бўш турган маблағларини тижорат банкларига депозитга қўйишдан олинган фоиз тарзидаги даромадлар;
ҳомийлик хайриялари, халқаро ташкилотларнинг грантлари ва қонунчилик ҳужжатларида тақиқланмаган бошқа манбалар.
5. Жамғармага олий таълим муассасаларининг тўлов-контракт маблағлари ҳисобидан ўтказиладиган ажратмалар ҳар йилнинг 10 январидан кечиктирмай туширилиши шарт.
6. Жамғармага тўлов-контракт маблағлари ҳисобидан ўтказиладиган ажратмалар ҳажмининг тўғри белгиланиши ҳамда белгиланган муддатда ўтказилиши юзасидан масъулият олий таълим муассасаларининг ректорлари зиммасига юкланади.
7. Жамғарманинг вақтинчалик бўш турган маблағлари Вазирлик томонидан Ўзбекистон Республикаси тижорат банкларининг депозит ҳисобварақларига жойлаштирилиши мумкин. Олинган фоиз даромадлари мазкур Низомнинг 9 , 11 ва 13-бандларида назарда тутилган мақсадларга сарфлаш учун тақсимланади.
8. Жамғарманинг жорий йилда фойдаланилмаган маблағлари кейинги йилга ўтади.
3-боб. Жамғарма маблағларидан фойдаланиш тартиби
9. Жамғарма маблағлари қуйидаги мақсадларга йўналтирилади:
ўқув ва илмий адабиётларни яратиш, чоп этиш ва олий таълим муассасалари китоб фондини тўлдиришга;
ўқув бинолари, талабалар турар жойлари, спорт иншоотлари ва бошқа инфратузилма объектларида қурилиш, реконструкция қилиш, мукаммал ва жорий таъмирлаш ишларини (лойиҳа-смета ҳужжатларини ишлаб чиқиш харажатларини инобатга олган ҳолда) амалга оширишга, уларнинг моддий ҳолатини яхшилаш, шу жумладан зарур замонавий ўқув ва илмий-лаборатория ускуналари, мебель, инвентарлар билан жиҳозлаш, кузатув, назорат ва идентификация тизимлари, воситалари ва қурилмалари билан таъминлаш ва бошқа товар-моддий қимматликлар харид қилишга;
ахборот-коммуникация, мультимедиа ва тармоқ қурилмалари, техникалари, воситалари ҳамда дастурий таъминотларни харид қилиш, замонавий технологияларни жорий этиш, ахборот-таълим ресурсларини ишлаб чиқиш, ўқув ва бошқарув жараёнини автоматлаштиришга хизмат қилувчи тизимларни яратиш, вазирлик ва олий таълим муассасалари ўртасида электрон ахборот алмашинувини ташкил этиш, интерактив таълим ресурслари ва маълумотлар базасини шакллантириш, «Электрон таълим» миллий тармоғи қурилмаларини ишчи ҳолатда сақлаш ва хизмат кўрсатишга;
ўқув ва илмий лабораторияларни зарур материаллар ва бутловчи қисмлар билан таъминлашга;
хорижнинг етакчи олим, профессор-ўқитувчи ва мутахассисларини республика олий таълим, қайта тайёрлаш ва малака ошириш муассасалари ўқув ва илмий-методик жараёнига жалб этишга;
олий таълим тизимида таълим ва илм-фан жараёнини ислоҳ қилиш ва такомиллаштириш мақсадларида хорижий эксперт ва консультантларни жалб этишга;
инвестиция лойиҳалари доирасида лойиҳа, танлов ҳамда шартнома ҳужжатларини экспертизадан ўтказиш ва рўйхатга олиш, товар қабул қилиш билан боғлиқ бўлган декларация-сертификация ишлари, вақтинчалик омбордан фойдаланиш ва консалтинг хизматлари учун ҳақ тўлашга;
олий таълим муассасаларида ижтимоий, тарбиявий, психологик ва бошқа ўқув-услубий, илмий лойиҳалар ҳамда тадқиқотларни ташкил этиш ва ўтказиш (ишчи гуруҳларнинг иш ҳақи, хизмат сафари ва бошқа харажатлар)га;
профессор-ўқитувчилар ёки талабалар ўртасида ўтказиладиган республика танловлари ғолибларини тақдирлаш ва рағбатлантиришга;
мамлакатда амалга оширилаётган ислоҳотларни оммавий ахборот воситаларида кенг ёритишда фаоллик кўрсатган олий таълим муассасаларининг раҳбар ходимлари ва профессор-ўқитувчиларини моддий рағбатлантиришга;
кам таъминланган оилалар ва етим болалар тоифасига кирувчи талабаларни ижтимоий ҳимоялаш тадбирлари (бир йилда бир талабага базавий ҳисоблаш миқдорининг 10 (ўн) баравари миқдоридан ошмайдиган бир марталик моддий ёрдам)га;
вакиллик тадбирларини (хорижий делегацияларни кутиб олиш, транспорт хизмати, таржимонларни жалб қилиш, совға ва сувенирлар сотиб олиш, овқатлантириш) ўтказишга;
зарур ҳолларда, олий таълим муассасаларининг иш ҳақи ва унга тенглаштирилган тўловлари ҳамда стипендия тўловларини амалга ошириш учун 6 ойгача бўлган муддатга фоизсиз ссуда маблағлари ажратишга;
Ўзбекистон Республикаси Президенти ва Ўзбекистон Республикаси Ҳукумати қарорларига кўра ўтказиладиган спорт-соғломлаштириш ва бошқа тадбирларни амалга оширишга;
вазирлик раҳбар ва ходимларини хорижий бошқарув идоралари, таълим муассасалари ва бошқа ташкилотларга тажриба ўрганиш ва ҳамкорлик ўрнатиш мақсадларида хорижий хизмат сафарига юборишга;
Вазирлик ташкилий тузилмасига кирувчи ташкилотлар ходимларининг ижтимоий ҳимоясини таъминлаш мақсадида уларнинг ойлик маошларига устамалар белгилаш, моддий рағбатлантириш ҳамда моддий-техника базасини мустаҳкамлаш билан боғлиқ харажатларни қоплашга.
10. Жамғарма маблағлари олий таълим муассасаларининг Бюджет муассасаларини ривожлантириш жамғармасининг бюджетдан ташқари шахсий ғазна ҳисобварағига ўтказилади, ғазна ижроси билан қамраб олинмаган муассасалар бундан мустасно.
11. Жамғарма маблағлари вазирлик марказий аппаратининг қуйидаги харажатларига йўналтирилиши мумкин:
вазирликнинг моддий-техник базасини мустаҳкамлаш, шу жумладан ахборот-коммуникация жиҳозлари, мебель, инвентарлар ва транспорт воситаларини харид қилиш, реконструкция, таъмирлаш ва ободонлаштириш ишлари билан боғлиқ харажатлар;
ходимларнинг лавозим маошига ҳар ойлик устамалар, мукофотлар, уларга моддий ёрдам бериш ва ижтимоий муҳофаза қилиш (йўлкира ва овқатланиш харажатлари учун қўшимча ҳақлар кўринишида) харажатларини амалга ошириш.
Вазирлик марказий аппарати ходимларининг лавозим маошига ҳар ойлик устамалар, мукофотлар, уларга моддий ёрдам бериш ва ижтимоий муҳофаза қилиш харажатларини тўлаш тартиби Ўзбекистон Республикаси олий ва ўрта махсус таълим вазири (кейинги ўринларда вазир деб аталади) томонидан белгиланади.
12. Жамғармадан маблағ ажратишга оид мурожаатлар ушбу харажатларни асословчи тегишли ҳужжатлар билан бирга тақдим этилади.
Ҳужжатларнинг асосланганлиги ва сифати, келтирилган маълумотларнинг тўғрилиги юзасидан олий таълим муассасалари ректорлари жавобгардир.
13. Зарур холларда, Жамғарма маблағлари ҳисобидан Ўзбекистон Республикаси Президенти ва Ўзбекистон Республикаси Вазирлар Маҳкамаси ҳужжатлари, мажлис баёнлари асосида вазирлик ҳузурида ташкил этиладиган муассаса (ташкилот)ларни ҳамда вазирлик марказий аппарати учун қўшимча штат бирликларини сақлаш амалга оширилади.
14. Жамғарма маблағларидан фойдаланиш унинг тасдиқланган даромадлар ва харажатлар сметаси асосида амалга оширилади.
Жамғарманинг даромадлари ва харажатлари сметаси бюджет ташкилотлари учун бюджетдан ташқари маблағлар бўйича қонунчилик ҳужжатларида белгиланган тартибда тузилади, вазирлик томонидан тасдиқланади ва Ўзбекистон Республикаси Иқтисодиёт ва молия вазирлигида рўйхатдан ўтказилади.
15. Жамғарманинг даромадлар ва харажатлар сметасига йил давомида белгиланган тартибда Вазирлик томонидан ўзгартиришлар киритилиши мумкин.
4-боб. Жамғармани бошқариш
16. Жамғарма фаолиятини бошқариш ва унинг маблағларини тақсимлаш учун жамғармани бошқариш кенгаши (кейинги ўринларда кенгаш деб аталади) ташкил этилади.
Кенгаш аъзолари кенгаш таркибида ўз фаолиятини жамоатчилик асосида амалга оширадилар.
Кенгаш иштирок этишнинг ихтиёрийлиги ва кенгаш ваколатига тегишли масалаларни ҳал этишда унинг барча аъзоларининг тенг ҳуқуқлилиги тамойиллари асосида шакллантирилади.
Кенгаш, қоидага кўра, кенгаш раиси, раиснинг ўринбосари, котиб ва аъзоларидан иборат таркибда шакллантирилади.
Кенгаш 7 ― 9 нафар вазирлик ва олий таълим муассасаларининг ректорлари ва масъул ходимларидан иборат таркибда шакллантирилади. Кенгашнинг шахсий таркиби, қоидага кўра, бир йилда бир марта вазир томонидан тасдиқланади.
Вазир лавозимига кўра кенгаш раиси ҳисобланади.
17. Кенгаш аъзоларининг вазифалари қуйидагилардан иборат:
кенгаш мажлисларида кўриб чиқиладиган масалаларни муҳокама қилиш ва ҳал этишда иштирок этиш;
олий таълим тизимини ривожлантиришнинг долзарб масалалари бўйича кенгашга таклифлар киритиш;
кенгаш томонидан кўриб чиқиладиган масалалар бўйича овоз бериш.
кенгаш аъзолари мажлисда шахсан қатнашадилар. Бундай қатнашишнинг имкони бўлмаган тақдирда кенгаш аъзоси мажлиснинг кун тартиби бўйича ўз фикрини ёзма равишда тақдим этишга ҳақлидир.
18. Кенгаш раиси:
кенгаш мажлиси кун тартибини белгилайди ва уни чақиради;
кенгаш қарорларини тасдиқлайди ва уларнинг бажарилишини назорат қилади;
кенгаш аъзоларига юкланган вазифалар бажарилиши юзасидан уларнинг ишини мувофиқлаштиради;
кенгашнинг самарали ишлашини таъминлаш учун бошқа ваколатларни амалга оширади.
19. Кенгаш котиби:
кенгаш мажлисига барча зарур ҳужжатларнинг ўз вақтида тайёрланишини таъминлайди;
мажлисни ўтказиш муддатлари ва жойини Кенгаш раиси билан келишади;
кун тартиби масалалари бўйича Кенгаш мажлислари ўтказилишини ташкил этади:
кенгаш аъзолари ва таклиф этилган шахсларни мажлиснинг санаси, вақти, жойи ва кун тартиби лойиҳасидан хабардор қилади:
кенгаш қарорлари бажарилиши мониторингини юритади;
кенгаш баённомаларини расмийлаштиради ва тасдиқланган баённомаларни кенгаш аъзоларига ва бошқа манфаатдор ташкилотларга юборади.
Кенгаш котиби кенгаш аъзоси ҳисобланади.
20. Кенгаш ўз мажлисларини заруриятга кўра, бироқ ҳар чоракда камида бир марта ўтказади.
21. Кенгаш мажлисини кенгаш раиси, у бўлмаган тақдирда эса — кенгаш раисининг ўринбосари бошқаради.
22. Кенгаш мажлиси унда кенгаш аъзоларининг камида учдан икки қисми қатнашганда ўтказилган ҳисобланади.
23. Мажлисни ўтказиш учун кворум ёки раис ва унинг ўринбосари бўлмаганда, кенгаш мажлисини ўтказишнинг янги санаси эълон қилинади.
24. Кенгаш мажлисида кўриб чиқиладиган масалаларнинг хусусиятига кўра давлат органлари ва бошқа ташкилотларнинг раҳбарлари ва мутахассислари, олий таълим муассасасининг ходимлари таклиф этилиши мумкин.
25. Кенгаш қарори кенгашнинг мажлисда қатнашган аъзоларининг оддий кўпчилик овози билан қабул қилинади. Овозлар тенг бўлган тақдирда кенгаш раисининг овози ҳал қилувчи ҳисобланади.
Жамғарманинг даромадлари ва харажатларининг йиллик молиявий режасини, шунингдек кенгаш маблағларидан фойдаланилишини тасдиқлаш масалалари бўйича қарор кенгашнинг мажлисда қатнашган аъзолари учдан икки қисмининг овози билан қабул қилинади.
Кенгаш қарорлари кенгаш мажлисининг баённомаси билан расмийлаштирилади. Кенгаш мажлисининг баённомаси кенгаш раиси томонидан тасдиқланади ҳамда вазир буйруғи асосида амалга оширилади.
26. Қуйидагилар кенгашнинг асосий вазифалари ҳисобланади:
ҳисобот йили якуни бўйича жамғарма маблағларининг даромадлари ва харажатлари тўғрисидаги ҳисоботларни кўриб чиқиш ва тасдиқлаш;
жамғарма маблағларидан мақсадли ва самарали фойдаланилишини назорат қилиш.
27. Вазирликнинг Иқтисодиёт бошқармаси жамғарманинг ишчи органи ҳисобланади.
Жамғарма ҳисобидан унинг фаолиятини юритиш учун икки бирлик бош мутахассис лавозими штатини сақлашга рухсат этилади.
28. Ишчи орган қуйидаги функцияларни амалга оширади:
жамғарманинг даромадлари ва харажатларининг йиллик молиявий режасини ишлаб чиқади:
даромадлар ва харажатлар сметаларини тайёрлайди, шунингдек уларга қонунчилик ҳужжатларида белгиланган тартибда ўзгартиришлар киритади;
жамғарма тушумларини кўпайтириш ва унинг маблағларидан самарали фойдаланиш бўйича таклифлар тайёрлайди:
олий таълим муассасалари ҳамда жамғармадан сақлаш харажатлари молиялаштириладиган ташкилотларнинг жамғармадан маблағ ажратишга оид мурожаатларини умумлаштиради ва кенгашга кўриб чиқиш учун материаллар тайёрлайди;
жамғарманинг тушумлар манбалари бўйича даромадлари ҳамда асосий харажатлар йўналишлари бўйича ҳисобини юритади;
ҳар чорак якуни бўйича жамғарма маблағларидан фойдаланилиши тўғрисида ҳисобот тайёрлайди ҳамда кенгашга кўриб чиқиш ва тасдиқлаш учун тақдим этади.
29. Жамғарма маблағларининг ҳисоб ва ҳисоботини юритиш ҳамда жорий хизмат кўрсатиш ишлари вазирликнинг Бюджет ҳисоби методологияси ва бухгалтерия ҳисоботи таҳлили бошқармаси томонидан амалга оширилади.
5-боб. Ҳисоб, ҳисобот ва назорат
30. Жамғарма маблағларидан фойдаланиш бўйича ҳисоб ва ҳисоботлар вазирликнинг бюджетдан ташқари бошқа маблағларидан алоҳида юритилади.
31. Жамғарманинг даромадлар ва харажатлар сметасининг ижроси тўғрисидаги йиллик ҳисобот кенгаш томонидан кўриб чиқилади ҳамда хар йили вазирлик ҳайъати йиғилишида 15 мартгача тасдиқланади.
32. Жамғарманинг даромадлар ва харажатлар сметаси ва унинг ижроси тўғрисидаги ҳисоботлар, шунингдек, товарлар (иш ва хизматлар)ни харид қилиш бўйича тузилган шартномалар рўйхатлари вазирликнинг расмий веб-сайтларида эълон қилинади.
33. Жамғарма маблағларидан оқилона ва мақсадли фойдаланилиши юзасидан давлат молиявий назорати қонунчилик ҳужжатларида белгиланган тартибда Давлат молиявий назорати инспекцияси ҳамда вазирликнинг ички аудит ва молиявий назорат хизмати томонидан амалга оширилади.
6-боб. Якунловчи қоидалар
34. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.
35. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Ўзбекистон Республикаси Олий таълим, фан ва инновациялар вазирлигининг Олий таълим муассасаларини ривожлантириш жамғармаси тўғрисидаги низомга ИЛОВА
Ўзбекистон Республикаси Олий таълим, фан ва инновациялар вазирлигининг Олий таълим муассасаларини ривожлантириш жамғармаси фаолиятини ташкил этиш
Босқич Масъуллар Чора-тадбирлар Бажариш муддатлари 1-босқич Олий таълим муассасалари Олий таълим муассасалари томонидан тўлов-контракт (шу жумладан, оширилган тўлов-контракт) шаклида ўқитишдан тушадиган маблағларининг мазкур маблағлар бўйича даромадлар ва харажатлар сметаларида акс эттириладиган йил бошига қолдиқ қисмининг 5 фоизи миқдоридаги ажратмалар тўланади. ҳар йили 1 апрелига қадар 2-босқич Ўзбекистон Республикаси Олий таълим, фан ва инновациялар вазирлиги Жамғарма фаолиятини бошқариш ва унинг маблағларини тақсимлаш учун жамоатчилик асосида фаолият юритувчи Жамғармани бошқариш кенгаши тузилади ва унинг шахсий таркиби тасдиқланади. ҳар йили 3-босқич Ўзбекистон Республикаси Олий таълим, фан ва инновациялар вазирлиги, Иқтисодиёт ва молия вазирлиги Жамғарманинг даромадлари ва харажатлари сметаси бюджет ташкилотлари учун бюджетдан ташқари маблағлар бўйича қонун ҳужжатларида белгиланган тартибда тузилиб тасдиқланади ва Ўзбекистон Республикаси Иқтисодиёт ва молия вазирлигида рўйхатдан ўтказилади. Ўзбекистон Республикаси Бюджет кодексида белгиланган муддатларда 4-босқич Жамғармани бошқариш кенгаши 1 Жамғармадан маблағ ажратиш масалалари Жамғармани бошқариш кенгаши мажлисида муҳокама этилади, маблағ ажратиш тўғрисида қарор қабул қилинади. 2. Кенгаш қарорлари кенгаш мажлисининг баённомаси билан расмийлаштирилади. Кенгаш мажлисининг баённомаси кенгаш раиси томонидан тасдиқланади ҳамда Ўзбекистон Республикаси олий таълим, фан ва инновациялар вазири буйруғи асосида амалга оширилади. заруриятга кўра (ҳар чоракда камида бир марта) 5-босқич Ўзбекистон Республикаси Олий таълим, фан ва инновациялар вазирлиги Жамғарманинг даромадлар ва харажатлар сметасининг ижроси тўғрисидаги йиллик ҳисобот Жамғармани бошқариш кенгаши томонидан кўриб чиқилади ҳамда ҳар йили Ўзбекистон Республикаси Олий таълим, фан ва инновациялар вазирлиги Ҳайъати йиғилишида тасдиқланади. ҳар йили 15 мартга қадар
Ўзбекистон Республикасининг Бош вазири А. АРИПОВ
Тошкент ш.,
2019 йил 26 февраль,
172-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Oʻzbekiston Respublikasi Oliy taʼlim, fan va innovatsiyalar vazirligining Oliy taʼlim muassasalarini rivojlantirish jamgʻarmasi toʻgʻrisidagi nizomni tasdiqlash haqida
Oliy taʼlim muassasalarining budjetdan tashqari mablagʻlari va daromadlari jamgʻarilishini taʼminlash, moddiy-texnika bazasini mustahkamlash va xodimlarini moddiy ragʻbatlantirish maqsadida Vazirlar Mahkamasi qaror qiladi:
1. Oʻzbekiston Respublikasi Oliy taʼlim, fan va innovatsiyalar vazirligining Oliy taʼlim muassasalarini rivojlantirish jamgʻarmasi toʻgʻrisidagi nizom 1-ilovaga muvofiq tasdiqlansin.
3. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.D. Abduxakimov hamda oliy va oʻrta maxsus taʼlim vaziri I.U. Madjidov zimmasiga yuklansin.
Vazirlar Mahkamasining 2019-yil 26-fevraldagi 172-son qaroriga 1-ILOVA
Oʻzbekiston Respublikasi Oliy taʼlim, fan va innovatsiyalar vazirligining Oliy taʼlim muassasalarini rivojlantirish jamgʻarmasi toʻgʻrisida
1-bob. Umumiy qoidalar
1. Ushbu Nizom Oʻzbekiston Respublikasi Oliy taʼlim, fan va innovatsiyalar vazirligining Oliy taʼlim muassasalarini rivojlantirish jamgʻarmasi (keyingi oʻrinlarda jamgʻarma deb ataladi) mablagʻlarini shakllantirish va ulardan foydalanish tartibini belgilaydi.
Ushbu Nizom Oʻzbekiston Respublikasi hududida joylashgan xorijiy oliy taʼlim muassasalari yoki ularning filiallari, nodavlat taʼlim xizmatlari faoliyati bilan shugʻullanuvchi yuridik shaxslar hamda Oʻzbekiston Respublikasi Mudofaa vazirligi, Ichki ishlar vazirligi, Adliya vazirligi, Favqulodda vaziyatlar vazirligi, Maktabgacha va maktab taʼlimi vazirligi, Davlat xavfsizlik xizmati, Milliy gvardiyasi va Davlat bojxona qoʻmitasi tasarrufidagi oliy taʼlim muassasalariga nisbatan tatbiq etilmaydi.
2. Jamgʻarma yuridik shaxs hisoblanmaydi va uning mablagʻlari Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan Oʻzbekiston Respublikasi Oliy taʼlim, fan va innovatsiyalar vazirligining (keyingi oʻrinlarda vazirlik deb ataladi) budjetdan tashqari shaxsiy gʻazna hisobvaragʻida jamlanadi va ushbu Nizomda belgilangan maqsadlarga sarflanadi.
3. Oʻzbekiston Respublikasi Oliy taʼlim, fan va innovatsiyalar vazirligining Oliy taʼlim muassasalarini rivojlantirish jamgʻarmasi faoliyatini tashkil etish ushbu Nizomga ilovada keltirilgan sxemaga muvofiq amalga oshiriladi.
2-bob. Jamgʻarma mablagʻlarini shakllantirish tartibi
4. Jamgʻarma mablagʻlari quyidagi manbalar hisobidan shakllantiriladi:
oliy taʼlim muassasalarining toʻlov-kontrakt (shu jumladan, tabaqalashtirilgan toʻlov-kontrakt) shaklida oʻqitishdan tushadigan mablagʻlarining mazkur mablagʻlar boʻyicha moliya yili oxiriga qoldiq (tijorat banklarining depozitlariga joylashtirilgan mablagʻlar ham inobatga olingan holda) qismining 4 foizi miqdoridagi ajratmalar;
Jamgʻarmaning vaqtinchalik boʻsh turgan mablagʻlarini tijorat banklariga depozitga qoʻyishdan olingan foiz tarzidagi daromadlar;
homiylik xayriyalari, xalqaro tashkilotlarning grantlari va qonunchilik hujjatlarida taqiqlanmagan boshqa manbalar.
5. Jamgʻarmaga oliy taʼlim muassasalarining toʻlov-kontrakt mablagʻlari hisobidan oʻtkaziladigan ajratmalar har yilning 10-yanvaridan kechiktirmay tushirilishi shart.
6. Jamgʻarmaga toʻlov-kontrakt mablagʻlari hisobidan oʻtkaziladigan ajratmalar hajmining toʻgʻri belgilanishi hamda belgilangan muddatda oʻtkazilishi yuzasidan masʼuliyat oliy taʼlim muassasalarining rektorlari zimmasiga yuklanadi.
7. Jamgʻarmaning vaqtinchalik boʻsh turgan mablagʻlari Vazirlik tomonidan Oʻzbekiston Respublikasi tijorat banklarining depozit hisobvaraqlariga joylashtirilishi mumkin. Olingan foiz daromadlari mazkur Nizomning 9 , 11 va 13-bandlarida nazarda tutilgan maqsadlarga sarflash uchun taqsimlanadi.
8. Jamgʻarmaning joriy yilda foydalanilmagan mablagʻlari keyingi yilga oʻtadi.
3-bob. Jamgʻarma mablagʻlaridan foydalanish tartibi
9. Jamgʻarma mablagʻlari quyidagi maqsadlarga yoʻnaltiriladi:
oʻquv va ilmiy adabiyotlarni yaratish, chop etish va oliy taʼlim muassasalari kitob fondini toʻldirishga;
oʻquv binolari, talabalar turar joylari, sport inshootlari va boshqa infratuzilma obyektlarida qurilish, rekonstruksiya qilish, mukammal va joriy taʼmirlash ishlarini (loyiha-smeta hujjatlarini ishlab chiqish xarajatlarini inobatga olgan holda) amalga oshirishga, ularning moddiy holatini yaxshilash, shu jumladan zarur zamonaviy oʻquv va ilmiy-laboratoriya uskunalari, mebel, inventarlar bilan jihozlash, kuzatuv, nazorat va identifikatsiya tizimlari, vositalari va qurilmalari bilan taʼminlash va boshqa tovar-moddiy qimmatliklar xarid qilishga;
axborot-kommunikatsiya, multimedia va tarmoq qurilmalari, texnikalari, vositalari hamda dasturiy taʼminotlarni xarid qilish, zamonaviy texnologiyalarni joriy etish, axborot-taʼlim resurslarini ishlab chiqish, oʻquv va boshqaruv jarayonini avtomatlashtirishga xizmat qiluvchi tizimlarni yaratish, vazirlik va oliy taʼlim muassasalari oʻrtasida elektron axborot almashinuvini tashkil etish, interaktiv taʼlim resurslari va maʼlumotlar bazasini shakllantirish, “Elektron taʼlim” milliy tarmogʻi qurilmalarini ishchi holatda saqlash va xizmat koʻrsatishga;
oʻquv va ilmiy laboratoriyalarni zarur materiallar va butlovchi qismlar bilan taʼminlashga;
xorijning yetakchi olim, professor-oʻqituvchi va mutaxassislarini respublika oliy taʼlim, qayta tayyorlash va malaka oshirish muassasalari oʻquv va ilmiy-metodik jarayoniga jalb etishga;
oliy taʼlim tizimida taʼlim va ilm-fan jarayonini isloh qilish va takomillashtirish maqsadlarida xorijiy ekspert va konsultantlarni jalb etishga;
investitsiya loyihalari doirasida loyiha, tanlov hamda shartnoma hujjatlarini ekspertizadan oʻtkazish va roʻyxatga olish, tovar qabul qilish bilan bogʻliq boʻlgan deklaratsiya-sertifikatsiya ishlari, vaqtinchalik ombordan foydalanish va konsalting xizmatlari uchun haq toʻlashga;
oliy taʼlim muassasalarida ijtimoiy, tarbiyaviy, psixologik va boshqa oʻquv-uslubiy, ilmiy loyihalar hamda tadqiqotlarni tashkil etish va oʻtkazish (ishchi guruhlarning ish haqi, xizmat safari va boshqa xarajatlar)ga;
professor-oʻqituvchilar yoki talabalar oʻrtasida oʻtkaziladigan respublika tanlovlari gʻoliblarini taqdirlash va ragʻbatlantirishga;
mamlakatda amalga oshirilayotgan islohotlarni ommaviy axborot vositalarida keng yoritishda faollik koʻrsatgan oliy taʼlim muassasalarining rahbar xodimlari va professor-oʻqituvchilarini moddiy ragʻbatlantirishga;
kam taʼminlangan oilalar va yetim bolalar toifasiga kiruvchi talabalarni ijtimoiy himoyalash tadbirlari (bir yilda bir talabaga bazaviy hisoblash miqdorining 10 (oʻn) baravari miqdoridan oshmaydigan bir martalik moddiy yordam)ga;
vakillik tadbirlarini (xorijiy delegatsiyalarni kutib olish, transport xizmati, tarjimonlarni jalb qilish, sovgʻa va suvenirlar sotib olish, ovqatlantirish) oʻtkazishga;
zarur hollarda, oliy taʼlim muassasalarining ish haqi va unga tenglashtirilgan toʻlovlari hamda stipendiya toʻlovlarini amalga oshirish uchun 6 oygacha boʻlgan muddatga foizsiz ssuda mablagʻlari ajratishga;
Oʻzbekiston Respublikasi Prezidenti va Oʻzbekiston Respublikasi Hukumati qarorlariga koʻra oʻtkaziladigan sport-sogʻlomlashtirish va boshqa tadbirlarni amalga oshirishga;
vazirlik rahbar va xodimlarini xorijiy boshqaruv idoralari, taʼlim muassasalari va boshqa tashkilotlarga tajriba oʻrganish va hamkorlik oʻrnatish maqsadlarida xorijiy xizmat safariga yuborishga;
Vazirlik tashkiliy tuzilmasiga kiruvchi tashkilotlar xodimlarining ijtimoiy himoyasini taʼminlash maqsadida ularning oylik maoshlariga ustamalar belgilash, moddiy ragʻbatlantirish hamda moddiy-texnika bazasini mustahkamlash bilan bogʻliq xarajatlarni qoplashga.
10. Jamgʻarma mablagʻlari oliy taʼlim muassasalarining Budjet muassasalarini rivojlantirish jamgʻarmasining budjetdan tashqari shaxsiy gʻazna hisobvaragʻiga oʻtkaziladi, gʻazna ijrosi bilan qamrab olinmagan muassasalar bundan mustasno.
11. Jamgʻarma mablagʻlari vazirlik markaziy apparatining quyidagi xarajatlariga yoʻnaltirilishi mumkin:
vazirlikning moddiy-texnik bazasini mustahkamlash, shu jumladan axborot-kommunikatsiya jihozlari, mebel, inventarlar va transport vositalarini xarid qilish, rekonstruksiya, taʼmirlash va obodonlashtirish ishlari bilan bogʻliq xarajatlar;
xodimlarning lavozim maoshiga har oylik ustamalar, mukofotlar, ularga moddiy yordam berish va ijtimoiy muhofaza qilish (yoʻlkira va ovqatlanish xarajatlari uchun qoʻshimcha haqlar koʻrinishida) xarajatlarini amalga oshirish.
Vazirlik markaziy apparati xodimlarining lavozim maoshiga har oylik ustamalar, mukofotlar, ularga moddiy yordam berish va ijtimoiy muhofaza qilish xarajatlarini toʻlash tartibi Oʻzbekiston Respublikasi oliy va oʻrta maxsus taʼlim vaziri (keyingi oʻrinlarda vazir deb ataladi) tomonidan belgilanadi.
12. Jamgʻarmadan mablagʻ ajratishga oid murojaatlar ushbu xarajatlarni asoslovchi tegishli hujjatlar bilan birga taqdim etiladi.
Hujjatlarning asoslanganligi va sifati, keltirilgan maʼlumotlarning toʻgʻriligi yuzasidan oliy taʼlim muassasalari rektorlari javobgardir.
13. Zarur xollarda, Jamgʻarma mablagʻlari hisobidan Oʻzbekiston Respublikasi Prezidenti va Oʻzbekiston Respublikasi Vazirlar Mahkamasi hujjatlari, majlis bayonlari asosida vazirlik huzurida tashkil etiladigan muassasa (tashkilot)larni hamda vazirlik markaziy apparati uchun qoʻshimcha shtat birliklarini saqlash amalga oshiriladi.
14. Jamgʻarma mablagʻlaridan foydalanish uning tasdiqlangan daromadlar va xarajatlar smetasi asosida amalga oshiriladi.
Jamgʻarmaning daromadlari va xarajatlari smetasi budjet tashkilotlari uchun budjetdan tashqari mablagʻlar boʻyicha qonunchilik hujjatlarida belgilangan tartibda tuziladi, vazirlik tomonidan tasdiqlanadi va Oʻzbekiston Respublikasi Iqtisodiyot va moliya vazirligida roʻyxatdan oʻtkaziladi.
15. Jamgʻarmaning daromadlar va xarajatlar smetasiga yil davomida belgilangan tartibda Vazirlik tomonidan oʻzgartirishlar kiritilishi mumkin.
4-bob. Jamgʻarmani boshqarish
16. Jamgʻarma faoliyatini boshqarish va uning mablagʻlarini taqsimlash uchun jamgʻarmani boshqarish kengashi (keyingi oʻrinlarda kengash deb ataladi) tashkil etiladi.
Kengash aʼzolari kengash tarkibida oʻz faoliyatini jamoatchilik asosida amalga oshiradilar.
Kengash ishtirok etishning ixtiyoriyligi va kengash vakolatiga tegishli masalalarni hal etishda uning barcha aʼzolarining teng huquqliligi tamoyillari asosida shakllantiriladi.
Kengash, qoidaga koʻra, kengash raisi, raisning oʻrinbosari, kotib va aʼzolaridan iborat tarkibda shakllantiriladi.
Kengash 7 ― 9 nafar vazirlik va oliy taʼlim muassasalarining rektorlari va masʼul xodimlaridan iborat tarkibda shakllantiriladi. Kengashning shaxsiy tarkibi, qoidaga koʻra, bir yilda bir marta vazir tomonidan tasdiqlanadi.
Vazir lavozimiga koʻra kengash raisi hisoblanadi.
17. Kengash aʼzolarining vazifalari quyidagilardan iborat:
kengash majlislarida koʻrib chiqiladigan masalalarni muhokama qilish va hal etishda ishtirok etish;
oliy taʼlim tizimini rivojlantirishning dolzarb masalalari boʻyicha kengashga takliflar kiritish;
kengash tomonidan koʻrib chiqiladigan masalalar boʻyicha ovoz berish.
kengash aʼzolari majlisda shaxsan qatnashadilar. Bunday qatnashishning imkoni boʻlmagan taqdirda kengash aʼzosi majlisning kun tartibi boʻyicha oʻz fikrini yozma ravishda taqdim etishga haqlidir.
18. Kengash raisi:
kengash majlisi kun tartibini belgilaydi va uni chaqiradi;
kengash qarorlarini tasdiqlaydi va ularning bajarilishini nazorat qiladi;
kengash aʼzolariga yuklangan vazifalar bajarilishi yuzasidan ularning ishini muvofiqlashtiradi;
kengashning samarali ishlashini taʼminlash uchun boshqa vakolatlarni amalga oshiradi.
19. Kengash kotibi:
kengash majlisiga barcha zarur hujjatlarning oʻz vaqtida tayyorlanishini taʼminlaydi;
majlisni oʻtkazish muddatlari va joyini Kengash raisi bilan kelishadi;
kun tartibi masalalari boʻyicha Kengash majlislari oʻtkazilishini tashkil etadi:
kengash aʼzolari va taklif etilgan shaxslarni majlisning sanasi, vaqti, joyi va kun tartibi loyihasidan xabardor qiladi:
kengash qarorlari bajarilishi monitoringini yuritadi;
kengash bayonnomalarini rasmiylashtiradi va tasdiqlangan bayonnomalarni kengash aʼzolariga va boshqa manfaatdor tashkilotlarga yuboradi.
Kengash kotibi kengash aʼzosi hisoblanadi.
20. Kengash oʻz majlislarini zaruriyatga koʻra, biroq har chorakda kamida bir marta oʻtkazadi.
21. Kengash majlisini kengash raisi, u boʻlmagan taqdirda esa — kengash raisining oʻrinbosari boshqaradi.
22. Kengash majlisi unda kengash aʼzolarining kamida uchdan ikki qismi qatnashganda oʻtkazilgan hisoblanadi.
23. Majlisni oʻtkazish uchun kvorum yoki rais va uning oʻrinbosari boʻlmaganda, kengash majlisini oʻtkazishning yangi sanasi eʼlon qilinadi.
24. Kengash majlisida koʻrib chiqiladigan masalalarning xususiyatiga koʻra davlat organlari va boshqa tashkilotlarning rahbarlari va mutaxassislari, oliy taʼlim muassasasining xodimlari taklif etilishi mumkin.
25. Kengash qarori kengashning majlisda qatnashgan aʼzolarining oddiy koʻpchilik ovozi bilan qabul qilinadi. Ovozlar teng boʻlgan taqdirda kengash raisining ovozi hal qiluvchi hisoblanadi.
Jamgʻarmaning daromadlari va xarajatlarining yillik moliyaviy rejasini, shuningdek kengash mablagʻlaridan foydalanilishini tasdiqlash masalalari boʻyicha qaror kengashning majlisda qatnashgan aʼzolari uchdan ikki qismining ovozi bilan qabul qilinadi.
Kengash qarorlari kengash majlisining bayonnomasi bilan rasmiylashtiriladi. Kengash majlisining bayonnomasi kengash raisi tomonidan tasdiqlanadi hamda vazir buyrugʻi asosida amalga oshiriladi.
26. Quyidagilar kengashning asosiy vazifalari hisoblanadi:
hisobot yili yakuni boʻyicha jamgʻarma mablagʻlarining daromadlari va xarajatlari toʻgʻrisidagi hisobotlarni koʻrib chiqish va tasdiqlash;
jamgʻarma mablagʻlaridan maqsadli va samarali foydalanilishini nazorat qilish.
27. Vazirlikning Iqtisodiyot boshqarmasi jamgʻarmaning ishchi organi hisoblanadi.
Jamgʻarma hisobidan uning faoliyatini yuritish uchun ikki birlik bosh mutaxassis lavozimi shtatini saqlashga ruxsat etiladi.
28. Ishchi organ quyidagi funksiyalarni amalga oshiradi:
jamgʻarmaning daromadlari va xarajatlarining yillik moliyaviy rejasini ishlab chiqadi:
daromadlar va xarajatlar smetalarini tayyorlaydi, shuningdek ularga qonunchilik hujjatlarida belgilangan tartibda oʻzgartirishlar kiritadi;
jamgʻarma tushumlarini koʻpaytirish va uning mablagʻlaridan samarali foydalanish boʻyicha takliflar tayyorlaydi:
oliy taʼlim muassasalari hamda jamgʻarmadan saqlash xarajatlari moliyalashtiriladigan tashkilotlarning jamgʻarmadan mablagʻ ajratishga oid murojaatlarini umumlashtiradi va kengashga koʻrib chiqish uchun materiallar tayyorlaydi;
jamgʻarmaning tushumlar manbalari boʻyicha daromadlari hamda asosiy xarajatlar yoʻnalishlari boʻyicha hisobini yuritadi;
har chorak yakuni boʻyicha jamgʻarma mablagʻlaridan foydalanilishi toʻgʻrisida hisobot tayyorlaydi hamda kengashga koʻrib chiqish va tasdiqlash uchun taqdim etadi.
29. Jamgʻarma mablagʻlarining hisob va hisobotini yuritish hamda joriy xizmat koʻrsatish ishlari vazirlikning Budjet hisobi metodologiyasi va buxgalteriya hisoboti tahlili boshqarmasi tomonidan amalga oshiriladi.
5-bob. Hisob, hisobot va nazorat
30. Jamgʻarma mablagʻlaridan foydalanish boʻyicha hisob va hisobotlar vazirlikning budjetdan tashqari boshqa mablagʻlaridan alohida yuritiladi.
31. Jamgʻarmaning daromadlar va xarajatlar smetasining ijrosi toʻgʻrisidagi yillik hisobot kengash tomonidan koʻrib chiqiladi hamda xar yili vazirlik hayʼati yigʻilishida 15-martgacha tasdiqlanadi.
32. Jamgʻarmaning daromadlar va xarajatlar smetasi va uning ijrosi toʻgʻrisidagi hisobotlar, shuningdek, tovarlar (ish va xizmatlar)ni xarid qilish boʻyicha tuzilgan shartnomalar roʻyxatlari vazirlikning rasmiy veb-saytlarida eʼlon qilinadi.
33. Jamgʻarma mablagʻlaridan oqilona va maqsadli foydalanilishi yuzasidan davlat moliyaviy nazorati qonunchilik hujjatlarida belgilangan tartibda Davlat moliyaviy nazorati inspeksiyasi hamda vazirlikning ichki audit va moliyaviy nazorat xizmati tomonidan amalga oshiriladi.
6-bob. Yakunlovchi qoidalar
34. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.
35. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Oʻzbekiston Respublikasi Oliy taʼlim, fan va innovatsiyalar vazirligining Oliy taʼlim muassasalarini rivojlantirish jamgʻarmasi toʻgʻrisidagi nizomga ILOVA
Oʻzbekiston Respublikasi Oliy taʼlim, fan va innovatsiyalar vazirligining Oliy taʼlim muassasalarini rivojlantirish jamgʻarmasi faoliyatini tashkil etish
Bosqich Masʼullar Chora-tadbirlar Bajarish muddatlari 1-bosqich Oliy taʼlim muassasalari Oliy taʼlim muassasalari tomonidan toʻlov-kontrakt (shu jumladan, oshirilgan toʻlov-kontrakt) shaklida oʻqitishdan tushadigan mablagʻlarining mazkur mablagʻlar boʻyicha daromadlar va xarajatlar smetalarida aks ettiriladigan yil boshiga qoldiq qismining 5 foizi miqdoridagi ajratmalar toʻlanadi. har yili 1-apreliga qadar 2-bosqich Oʻzbekiston Respublikasi Oliy taʼlim, fan va innovatsiyalar vazirligi Jamgʻarma faoliyatini boshqarish va uning mablagʻlarini taqsimlash uchun jamoatchilik asosida faoliyat yurituvchi Jamgʻarmani boshqarish kengashi tuziladi va uning shaxsiy tarkibi tasdiqlanadi. har yili 3-bosqich Oʻzbekiston Respublikasi Oliy taʼlim, fan va innovatsiyalar vazirligi, Iqtisodiyot va moliya vazirligi Jamgʻarmaning daromadlari va xarajatlari smetasi budjet tashkilotlari uchun budjetdan tashqari mablagʻlar boʻyicha qonun hujjatlarida belgilangan tartibda tuzilib tasdiqlanadi va Oʻzbekiston Respublikasi Iqtisodiyot va moliya vazirligida roʻyxatdan oʻtkaziladi. Oʻzbekiston Respublikasi Budjet kodeksida belgilangan muddatlarda 4-bosqich Jamgʻarmani boshqarish kengashi 1 Jamgʻarmadan mablagʻ ajratish masalalari Jamgʻarmani boshqarish kengashi majlisida muhokama etiladi, mablagʻ ajratish toʻgʻrisida qaror qabul qilinadi. 2. Kengash qarorlari kengash majlisining bayonnomasi bilan rasmiylashtiriladi. Kengash majlisining bayonnomasi kengash raisi tomonidan tasdiqlanadi hamda Oʻzbekiston Respublikasi oliy taʼlim, fan va innovatsiyalar vaziri buyrugʻi asosida amalga oshiriladi. zaruriyatga koʻra (har chorakda kamida bir marta) 5-bosqich Oʻzbekiston Respublikasi Oliy taʼlim, fan va innovatsiyalar vazirligi Jamgʻarmaning daromadlar va xarajatlar smetasining ijrosi toʻgʻrisidagi yillik hisobot Jamgʻarmani boshqarish kengashi tomonidan koʻrib chiqiladi hamda har yili Oʻzbekiston Respublikasi Oliy taʼlim, fan va innovatsiyalar vazirligi Hayʼati yigʻilishida tasdiqlanadi. har yili 15-martga qadar
Oʻzbekiston Respublikasining Bosh vaziri A. ARIPOV
Toshkent sh.,
2019-yil 26-fevral,
172-son