📅 2019-yil 12-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 12 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 12 марта 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 12 March 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қашқадарё вилоятида ўрмон хўжалиги соҳасини янада ривожлантириш чора-тадбирлари тўғрисида
Қашқадарё вилоятида тоғ, тоғ ёнбағирлари ва чўл ҳудудларидаги самарасиз фойдаланилаётган ер майдонларидан унумли фойдаланиш, яйловзорлар, писта, бодом плантацияларини барпо этиш ва ўрмонзорларни кўпайтириш мақсадида Вазирлар Маҳкамаси қарор қилади:
1. Ўзбекистон Республикаси Ўрмон хўжалиги давлат қўмитаси ва Қашқадарё вилояти ҳокимлигининг Қашқадарё вилояти Чироқчи туманида Ўзбекистон Республикаси Ўрмон хўжалиги давлат қўмитаси тизимида давлат муассасаси шаклидаги Қумдарё давлат ўрмон хўжалигини ташкил этиш тўғрисидаги таклифига розилик берилсин.
2. Қуйидагилар Қумдарё давлат ўрмон хўжалигининг асосий вазифалари ва фаолияти йўналишлари этиб белгилансин:
ўрмонзорлар барпо этиш, ўрмон фондини ҳар томонлама кенгайтириш ва муҳофаза қилиш, ўрмон бойликларидан оқилона фойдаланишга қаратилган тадбирларни амалга ошириш;
ажратилган ер майдонларида писта, бодом ва доривор ўсимликлар плантацияларини барпо этиш ҳамда кўчатхоналар ташкил этиш;
ўрмонларни тиклаш, иҳота ўрмонзорларини кўпайтириш чора-тадбирларини ишлаб чиқиш ва амалга ошириш, тоғ ёнбағирлари ҳамда чўл ҳудудларида эрозияга қарши дарахтзорлар барпо этиш;
ўрмонларни ёнғиндан, зараркунанда ва касалликлардан, ноқонуний дарахт кесишдан ва ўрмон тўғрисидаги қонунчилик ҳужжатларининг бошқача тарзда бузилишидан муҳофаза ва назорат қилиш.
3. Қашқадарё вилояти ҳокимлиги Ўзбекистон Республикаси Ўрмон хўжалиги давлат қўмитаси ва Ер ресурслари, геодезия, картография ва давлат кадастри давлат қўмитаси билан биргаликда бир ой муддатда:
Қашқадарё давлат ўрмон хўжалигининг Чироқчи тумани, Еттитом қўрғони, 1-уй манзилида жойлашган биноси оператив бошқариш ҳуқуқи билан Қумдарё давлат ўрмон хўжалигига ажратиб берилишини;
табиий ўрмонзорлар майдонлари, доривор ўсимликлар захираси мавжуд майдонлар ва туман ҳокимликлари захирасидаги ер майдонлари писта ва бодом плантацияларини барпо қилиш ҳамда доривор ўсимликлар етиштириш учун доимий фойдаланиш ҳуқуқи билан ўрмон хўжаликларига ажратиб берилишини;
Чироқчи тумани ҳудудидаги ер майдонлари хатловдан ўтказилиб, табиий ўрмонзорлар ва самарасиз фойдаланилаётган ер майдонларидан 28525 гектар майдон доимий фойдаланиш ҳуқуқи билан янги ташкил этилаётган Қумдарё давлат ўрмон хўжалигига белгиланган тартибда ажратиб берилишини таъминласин.
4. Ўзбекистон Республикаси Ўрмон хўжалиги давлат қўмитаси:
бир ой муддатда янги ташкил этилаётган Қумдарё давлат ўрмон хўжалигининг устави ва штат жадвали тасдиқланишини таъминласин;
икки ой муддатда пистачилик соҳасини янада ривожлантириш, пистанинг мамлакатимиз тупроқ-иқлим шароитларига мос серҳосил ва юқори сифатли навларини кўпайтириш ҳамда келажакда янги истиқболли навларини яратиш мақсадида Қашқадарё вилояти Қамаши туманидаги Қамаши давлат ўрмон хўжалиги таркибида юридик шахс мақомига эга бўлмаган Пистачиликни ривожлантириш илмий-тажриба хўжалиги фаолиятини ташкил этсин.
5. Белгилаб қўйилсинки, Қумдарё давлат ўрмон хўжалиги фаолиятини молиялаштириш 2019 йилда Ўрмон хўжалиги давлат қўмитасининг Ўрмон хўжалигини ривожлантириш жамғармаси маблағлари ҳисобига, кейинги йилдан Ўзбекистон Республикаси Давлат бюджети маблағлари, Ўрмон хўжалиги давлат қўмитасининг Ўрмон хўжалигини ривожлантириш жамғармаси маблағлари, бюджетдан ташқари ва қонунчилик ҳужжатларида тақиқланмаган бошқа манбалар ҳисобига молиялаштирилади.
6. Қашқадарё вилояти давлат ўрмон хўжаликлари ер майдонларида 2019-2020 йилларда писта, аччиқ бодом, ёнғоқ ва чаканда плантацияларини барпо этиш ҳажмлари иловага мувофиқ тасдиқлансин.
7. Ўзбекистон Республикаси Ўрмон хўжалиги қўмитаси, Тошкент давлат аграр университети, Ўрмон хўжалиги илмий-тадқиқот институти, академик М. Мирзаев номидаги боғдорчилик, узумчилик ва виночилик илмий-тадқиқот институти:
икки ҳафта муддатда ҳудудларнинг тупроқ-иқлим шароитларидан келиб чиқиб писта, аччиқ бодом, ёнғоқ ва чаканда етиштиришга ихтисослашган плантацияларни ташкил этиш бўйича тавсиялар ишлаб чиқилишини;
2019 йил 1 апрелга қадар Қашқадарё вилоятидаги ўрмон хўжаликлари мутахассислари иштирокида писта, аччиқ бодом, ёнғоқ ва чаканда етиштириш юзасидан ўқув семинарлари ўтказилишини таъминласинлар.
8. Ўзбекистон Республикаси Ўрмон хўжалиги давлат қўмитаси вилоятда мавжуд табиий ҳолда ўсувчи доривор ўсимликлар захирасини ўрганишга ва йўқолиб кетиш арафасида турган ўсимликлар захирасини муҳофаза қилишга, мониторингини олиб боришга ҳамда уларнинг табиий кўпайиш шарт-шароитларининг илмий асосларини тадқиқ этишга йўналтирилган давлат илмий-техника дастури доирасида бажариладиган илмий лойиҳаларни икки ой муддатда Инновацион ривожланиш вазирлигига тақдим этилишини таъминласин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича маслаҳатчиси А.Д. Вахабов, Ўрмон хўжалиги давлат қўмитаси раиси Н.Ж. Бакиров ва Қашқадарё вилояти ҳокими З.Ш. Рўзиев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 12 март,
213-сон
Oʻzbekiston Respublikasi Vazirlar Mahkamasining
qarori
Qashqadaryo viloyatida oʻrmon xoʻjaligi sohasini yanada rivojlantirish chora-tadbirlari toʻgʻrisida
Qashqadaryo viloyatida togʻ, togʻ yonbagʻirlari va choʻl hududlaridagi samarasiz foydalanilayotgan yer maydonlaridan unumli foydalanish, yaylovzorlar, pista, bodom plantatsiyalarini barpo etish va oʻrmonzorlarni koʻpaytirish maqsadida Vazirlar Mahkamasi qaror qiladi:
1. Oʻzbekiston Respublikasi Oʻrmon xoʻjaligi davlat qoʻmitasi va Qashqadaryo viloyati hokimligining Qashqadaryo viloyati Chiroqchi tumanida Oʻzbekiston Respublikasi Oʻrmon xoʻjaligi davlat qoʻmitasi tizimida davlat muassasasi shaklidagi Qumdaryo davlat oʻrmon xoʻjaligini tashkil etish toʻgʻrisidagi taklifiga rozilik berilsin.
2. Quyidagilar Qumdaryo davlat oʻrmon xoʻjaligining asosiy vazifalari va faoliyati yoʻnalishlari etib belgilansin:
oʻrmonzorlar barpo etish, oʻrmon fondini har tomonlama kengaytirish va muhofaza qilish, oʻrmon boyliklaridan oqilona foydalanishga qaratilgan tadbirlarni amalga oshirish;
ajratilgan yer maydonlarida pista, bodom va dorivor oʻsimliklar plantatsiyalarini barpo etish hamda koʻchatxonalar tashkil etish;
oʻrmonlarni tiklash, ihota oʻrmonzorlarini koʻpaytirish chora-tadbirlarini ishlab chiqish va amalga oshirish, togʻ yonbagʻirlari hamda choʻl hududlarida eroziyaga qarshi daraxtzorlar barpo etish;
oʻrmonlarni yongʻindan, zararkunanda va kasalliklardan, noqonuniy daraxt kesishdan va oʻrmon toʻgʻrisidagi qonunchilik hujjatlarining boshqacha tarzda buzilishidan muhofaza va nazorat qilish.
3. Qashqadaryo viloyati hokimligi Oʻzbekiston Respublikasi Oʻrmon xoʻjaligi davlat qoʻmitasi va Yer resurslari, geodeziya, kartografiya va davlat kadastri davlat qoʻmitasi bilan birgalikda bir oy muddatda:
Qashqadaryo davlat oʻrmon xoʻjaligining Chiroqchi tumani, Yettitom qoʻrgʻoni, 1-uy manzilida joylashgan binosi operativ boshqarish huquqi bilan Qumdaryo davlat oʻrmon xoʻjaligiga ajratib berilishini;
tabiiy oʻrmonzorlar maydonlari, dorivor oʻsimliklar zaxirasi mavjud maydonlar va tuman hokimliklari zaxirasidagi yer maydonlari pista va bodom plantatsiyalarini barpo qilish hamda dorivor oʻsimliklar yetishtirish uchun doimiy foydalanish huquqi bilan oʻrmon xoʻjaliklariga ajratib berilishini;
Chiroqchi tumani hududidagi yer maydonlari xatlovdan oʻtkazilib, tabiiy oʻrmonzorlar va samarasiz foydalanilayotgan yer maydonlaridan 28525 gektar maydon doimiy foydalanish huquqi bilan yangi tashkil etilayotgan Qumdaryo davlat oʻrmon xoʻjaligiga belgilangan tartibda ajratib berilishini taʼminlasin.
4. Oʻzbekiston Respublikasi Oʻrmon xoʻjaligi davlat qoʻmitasi:
bir oy muddatda yangi tashkil etilayotgan Qumdaryo davlat oʻrmon xoʻjaligining ustavi va shtat jadvali tasdiqlanishini taʼminlasin;
ikki oy muddatda pistachilik sohasini yanada rivojlantirish, pistaning mamlakatimiz tuproq-iqlim sharoitlariga mos serhosil va yuqori sifatli navlarini koʻpaytirish hamda kelajakda yangi istiqbolli navlarini yaratish maqsadida Qashqadaryo viloyati Qamashi tumanidagi Qamashi davlat oʻrmon xoʻjaligi tarkibida yuridik shaxs maqomiga ega boʻlmagan Pistachilikni rivojlantirish ilmiy-tajriba xoʻjaligi faoliyatini tashkil etsin.
5. Belgilab qoʻyilsinki, Qumdaryo davlat oʻrmon xoʻjaligi faoliyatini moliyalashtirish 2019-yilda Oʻrmon xoʻjaligi davlat qoʻmitasining Oʻrmon xoʻjaligini rivojlantirish jamgʻarmasi mablagʻlari hisobiga, keyingi yildan Oʻzbekiston Respublikasi Davlat budjeti mablagʻlari, Oʻrmon xoʻjaligi davlat qoʻmitasining Oʻrmon xoʻjaligini rivojlantirish jamgʻarmasi mablagʻlari, budjetdan tashqari va qonunchilik hujjatlarida taqiqlanmagan boshqa manbalar hisobiga moliyalashtiriladi.
6. Qashqadaryo viloyati davlat oʻrmon xoʻjaliklari yer maydonlarida 2019-2020-yillarda pista, achchiq bodom, yongʻoq va chakanda plantatsiyalarini barpo etish hajmlari ilovaga muvofiq tasdiqlansin.
7. Oʻzbekiston Respublikasi Oʻrmon xoʻjaligi qoʻmitasi, Toshkent davlat agrar universiteti, Oʻrmon xoʻjaligi ilmiy-tadqiqot instituti, akademik M. Mirzayev nomidagi bogʻdorchilik, uzumchilik va vinochilik ilmiy-tadqiqot instituti:
ikki hafta muddatda hududlarning tuproq-iqlim sharoitlaridan kelib chiqib pista, achchiq bodom, yongʻoq va chakanda yetishtirishga ixtisoslashgan plantatsiyalarni tashkil etish boʻyicha tavsiyalar ishlab chiqilishini;
2019-yil 1-aprelga qadar Qashqadaryo viloyatidagi oʻrmon xoʻjaliklari mutaxassislari ishtirokida pista, achchiq bodom, yongʻoq va chakanda yetishtirish yuzasidan oʻquv seminarlari oʻtkazilishini taʼminlasinlar.
8. Oʻzbekiston Respublikasi Oʻrmon xoʻjaligi davlat qoʻmitasi viloyatda mavjud tabiiy holda oʻsuvchi dorivor oʻsimliklar zaxirasini oʻrganishga va yoʻqolib ketish arafasida turgan oʻsimliklar zaxirasini muhofaza qilishga, monitoringini olib borishga hamda ularning tabiiy koʻpayish shart-sharoitlarining ilmiy asoslarini tadqiq etishga yoʻnaltirilgan davlat ilmiy-texnika dasturi doirasida bajariladigan ilmiy loyihalarni ikki oy muddatda Innovatsion rivojlanish vazirligiga taqdim etilishini taʼminlasin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha maslahatchisi A.D. Vaxabov, Oʻrmon xoʻjaligi davlat qoʻmitasi raisi N.J. Bakirov va Qashqadaryo viloyati hokimi Z.Sh. Roʻziyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 12-mart,
213-son