📅 2019-yil 26-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 26 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 26 марта 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 26 March 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент педиатрия тиббиёт институтининг Нукус филиалида Санкт-Петербург давлат педиатрия тиббиёт университети ва Корё университети билан ҳамкорликда халқаро факультетни ташкил этиш тўғрисида
Ўзбекистон Республикаси Президентининг «Олий таълим тизимини янада ривожлантириш чора-тадбирлари тўғрисида» 2017 йил 20 апрелдаги ПҚ-2909-сон қарорига мувофиқ ҳамда тиббиёт олий таълим тизимида халқаро ҳамкорликни ривожлантириш, хамкорликда факультетлар ташкил этиш ва юқори малакали, халқаро миқёсда рақобатбардош кадрлар тайёрлашни янада такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Соғлиқни сақлаш вазирлиги ҳамда Олий ва ўрта махсус таълим вазирлигининг 2019/2020 ўқув йилидан бошлаб Тошкент педиатрия тиббиёт институтининг Нукус филиалида Санкт-Петербург давлат педиатрия тиббиёт университети ва Корё университети билан ҳамкорликда магистратура ва клиник ординатура таълим йўналишларида халқаро факультет (кейинги ўринларда факультет деб аталади) ташкил этиш тўғрисидаги таклифи маъқуллансин.
2. Қуйидагилар факультетнинг асосий вазифалари этиб белгилансин:
республика иқтисодиётининг реал сектори тармоғи учун муҳим илмий-техник вазифаларни ҳал қилишга қодир бўлган тор доирадаги юқори малакали мутахассисларни, илмий, илмий-педагогик кадрларни магистратура ва клиник ординатура таълим йўналишларида халқаро стандартлар даражасида тайёрлаш;
Оролбўйи минтақасидаги касалликларнинг барвақт профилактикаси, юқори технологияли даволаш усулларини қўллаш, соғлом турмуш тарзини тарғиб қилиш ва атроф муҳитнинг инсон саломатлигига таъсирини ўрганиш соҳасида юқори технологияларга асосланган фундаментал, амалий ва инновацион илмий тадқиқотлар олиб бориш;
мутахассислар ва илмий кадрлар тайёрлаш тизимини илм-фан ва ишлаб чиқаришнинг узвийлиги ҳамда узлуксизлиги, шунингдек, жаҳон таълим ва илмий ҳамжамиятига интеграциялашиш асосида ривожлантириш;
таълим ва илмий-техник соҳаларда хорижий мамлакатларнинг етакчи таълим муассасалари, илмий-тадқиқот марказлари, ишлаб чиқариш тармоқлари ва бизнес-ҳамжамиятлар билан узоқ муддатли алоқалар ўрнатиш.
3. Белгилаб қўйилсинки:
факультет кадрларга бўлган эҳтиёжни инобатга олган ҳолда таълимнинг асосий мутахассисликлари бўйича магистр, таянч докторант (PhD) ва клиник ординаторлар, илмий-педагогик кадрлар тайёрлашни амалга оширадиган, юридик шахс мақомига эга бўлмаган Тошкент педиатрия тиббиёт институти Нукус филиалининг (кейинги ўринларда филиал деб аталади) таркибий бўлинмаси ҳисобланади;
факультетда талабаларни ўқитиш тўлов-контракт асосида рус ва инглиз тилларида, кундузги таълим шаклида Ўзбекистон Республикаси давлат таълим стандартлари талаблари инобатга олинган ҳолда Санкт-Петербург давлат педиатрия тиббиёт университети ва Корё университетида қабул қилинган таълим стандартлари, ўқув режалари ва дастурлари асосида амалга оширилади;
факультетнинг магистратура ва клиник ординатура таълим йўналишларига қабул квотаси мавжуд талаб ва эҳтиёждан келиб чиқиб, Санкт-Петербург давлат педиатрия тиббиёт университети ва Корё университети ҳамда Ўзбекистон Республикаси Иқтисодиёт ва саноат вазирлиги, Олий ва ўрта махсус таълим вазирлиги билан келишув асосида Ўзбекистон Республикаси Соғлиқни сақлаш вазирлиги томонидан белгиланади;
факультетга талабаликка қабул қилиш тартиби, тўлов-контракт асосида ўқитиш қиймати ҳамда маҳаллий ва хорижий профессор-ўқитувчилар меҳнатига ҳақ тўлаш миқдорлари Санкт-Петербург давлат педиатрия тиббиёт университети ва Корё университети ҳамда Ўзбекистон Республикаси Соғлиқни сақлаш вазирлиги билан келишув асосида белгиланади;
факультет битирувчиларига Ўзбекистон Республикасида ҳамда Санкт-Петербург давлат педиатрия тиббиёт университети ва Корё университетида олий таълим тўғрисидаги ҳужжат сифатида тан олинадиган, ўзаро келишув асосида белгиланган намунадаги диплом берилади;
факультет фаолиятини молиялаштириш филиалга талабаларни тўлов-контракт асосида ўқитишдан тушадиган маблағлар, юридик ва жисмоний шахсларнинг ҳомийлик хайриялари, тегишли шартномалар асосида манфаатдор ташкилотлар томонидан тақдим этиладиган грантлар, шунингдек, қонунчилик ҳужжатларида тақиқланмаган бошқа манбалар ҳисобига амалга оширилади.
4. Ўзбекистон Республикаси Соғлиқни сақлаш вазирлиги Олий ва ўрта махсус таълим вазирлиги, манфаатдор вазирликлар ва идоралар билан биргаликда ҳамда Санкт-Петербург давлат педиатрия тиббиёт университети ва Корё университети билан келишган ҳолда 2019 йил 1 сентябрга қадар:
факультетга филиал ҳудудидаги бинолардан мос жой ажратиш;
Санкт-Петербург давлат педиатрия тиббиёт университети ва Корё университети билан ҳамкорликда магистратура ва клиник ординатура таълим йўналишларида ўқув дастурларини тасдиқлаш;
факультетда фаолият олиб борадиган профессор-ўқитувчилар ва илмий ходимлар таркибини юқори малакали маҳаллий ва хорижий илмий-педагог кадрлар ҳисобидан тўлдириш чораларини кўрсин.
5. Белгилансинки, факультетнинг бошланғич фаолиятини самарали ташкил этиш мақсадида унга ажратилган бино ва иншоотларни жорий таъмирлаш ва жиҳозлаш (мебель, компьютер техникаси, ўқув адабиётлари ва бошқа моддий-техника воситалари харид қилиш) ишлари учун филиалнинг бюджетдан ташқари маблағларидан фойдаланилади.
6. Ўзбекистон Республикаси Ташқи ишлар вазирлиги Соғлиқни сақлаш вазирлигининг буюртмаларига биноан ушбу қарорни амалга ошириш доирасида жалб қилинган хорижий профессор-ўқитувчилар ва маъмурий ходимлар учун кириш визалари консуллик йиғимлари ҳамда бошқа йиғимлар ундирилмасдан, зарур ҳолларда Тошкент шаҳридаги И. Каримов номидаги халқаро аэропортда расмийлаштирилишини таъминласин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.А. Абдухакимов ва Ўзбекистон Республикаси соғлиқни сақлаш вазири А.К. Шадманов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 26 март,
253-сон
Oʻzbekiston Respublikasi Vazirlar Mahkamasining
qarori
Toshkent pediatriya tibbiyot institutining Nukus filialida Sankt-Peterburg davlat pediatriya tibbiyot universiteti va Koryo universiteti bilan hamkorlikda xalqaro fakultetni tashkil etish toʻgʻrisida
Oʻzbekiston Respublikasi Prezidentining “Oliy taʼlim tizimini yanada rivojlantirish chora-tadbirlari toʻgʻrisida” 2017-yil 20-apreldagi PQ-2909-son qaroriga muvofiq hamda tibbiyot oliy taʼlim tizimida xalqaro hamkorlikni rivojlantirish, xamkorlikda fakultetlar tashkil etish va yuqori malakali, xalqaro miqyosda raqobatbardosh kadrlar tayyorlashni yanada takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Sogʻliqni saqlash vazirligi hamda Oliy va oʻrta maxsus taʼlim vazirligining 2019/2020 oʻquv yilidan boshlab Toshkent pediatriya tibbiyot institutining Nukus filialida Sankt-Peterburg davlat pediatriya tibbiyot universiteti va Koryo universiteti bilan hamkorlikda magistratura va klinik ordinatura taʼlim yoʻnalishlarida xalqaro fakultet (keyingi oʻrinlarda fakultet deb ataladi) tashkil etish toʻgʻrisidagi taklifi maʼqullansin.
2. Quyidagilar fakultetning asosiy vazifalari etib belgilansin:
respublika iqtisodiyotining real sektori tarmogʻi uchun muhim ilmiy-texnik vazifalarni hal qilishga qodir boʻlgan tor doiradagi yuqori malakali mutaxassislarni, ilmiy, ilmiy-pedagogik kadrlarni magistratura va klinik ordinatura taʼlim yoʻnalishlarida xalqaro standartlar darajasida tayyorlash;
Orolboʻyi mintaqasidagi kasalliklarning barvaqt profilaktikasi, yuqori texnologiyali davolash usullarini qoʻllash, sogʻlom turmush tarzini targʻib qilish va atrof muhitning inson salomatligiga taʼsirini oʻrganish sohasida yuqori texnologiyalarga asoslangan fundamental, amaliy va innovatsion ilmiy tadqiqotlar olib borish;
mutaxassislar va ilmiy kadrlar tayyorlash tizimini ilm-fan va ishlab chiqarishning uzviyligi hamda uzluksizligi, shuningdek, jahon taʼlim va ilmiy hamjamiyatiga integratsiyalashish asosida rivojlantirish;
taʼlim va ilmiy-texnik sohalarda xorijiy mamlakatlarning yetakchi taʼlim muassasalari, ilmiy-tadqiqot markazlari, ishlab chiqarish tarmoqlari va biznes-hamjamiyatlar bilan uzoq muddatli aloqalar oʻrnatish.
3. Belgilab qoʻyilsinki:
fakultet kadrlarga boʻlgan ehtiyojni inobatga olgan holda taʼlimning asosiy mutaxassisliklari boʻyicha magistr, tayanch doktorant (PhD) va klinik ordinatorlar, ilmiy-pedagogik kadrlar tayyorlashni amalga oshiradigan, yuridik shaxs maqomiga ega boʻlmagan Toshkent pediatriya tibbiyot instituti Nukus filialining (keyingi oʻrinlarda filial deb ataladi) tarkibiy boʻlinmasi hisoblanadi;
fakultetda talabalarni oʻqitish toʻlov-kontrakt asosida rus va ingliz tillarida, kunduzgi taʼlim shaklida Oʻzbekiston Respublikasi davlat taʼlim standartlari talablari inobatga olingan holda Sankt-Peterburg davlat pediatriya tibbiyot universiteti va Koryo universitetida qabul qilingan taʼlim standartlari, oʻquv rejalari va dasturlari asosida amalga oshiriladi;
fakultetning magistratura va klinik ordinatura taʼlim yoʻnalishlariga qabul kvotasi mavjud talab va ehtiyojdan kelib chiqib, Sankt-Peterburg davlat pediatriya tibbiyot universiteti va Koryo universiteti hamda Oʻzbekiston Respublikasi Iqtisodiyot va sanoat vazirligi, Oliy va oʻrta maxsus taʼlim vazirligi bilan kelishuv asosida Oʻzbekiston Respublikasi Sogʻliqni saqlash vazirligi tomonidan belgilanadi;
fakultetga talabalikka qabul qilish tartibi, toʻlov-kontrakt asosida oʻqitish qiymati hamda mahalliy va xorijiy professor-oʻqituvchilar mehnatiga haq toʻlash miqdorlari Sankt-Peterburg davlat pediatriya tibbiyot universiteti va Koryo universiteti hamda Oʻzbekiston Respublikasi Sogʻliqni saqlash vazirligi bilan kelishuv asosida belgilanadi;
fakultet bitiruvchilariga Oʻzbekiston Respublikasida hamda Sankt-Peterburg davlat pediatriya tibbiyot universiteti va Koryo universitetida oliy taʼlim toʻgʻrisidagi hujjat sifatida tan olinadigan, oʻzaro kelishuv asosida belgilangan namunadagi diplom beriladi;
fakultet faoliyatini moliyalashtirish filialga talabalarni toʻlov-kontrakt asosida oʻqitishdan tushadigan mablagʻlar, yuridik va jismoniy shaxslarning homiylik xayriyalari, tegishli shartnomalar asosida manfaatdor tashkilotlar tomonidan taqdim etiladigan grantlar, shuningdek, qonunchilik hujjatlarida taqiqlanmagan boshqa manbalar hisobiga amalga oshiriladi.
4. Oʻzbekiston Respublikasi Sogʻliqni saqlash vazirligi Oliy va oʻrta maxsus taʼlim vazirligi, manfaatdor vazirliklar va idoralar bilan birgalikda hamda Sankt-Peterburg davlat pediatriya tibbiyot universiteti va Koryo universiteti bilan kelishgan holda 2019-yil 1-sentabrga qadar:
fakultetga filial hududidagi binolardan mos joy ajratish;
Sankt-Peterburg davlat pediatriya tibbiyot universiteti va Koryo universiteti bilan hamkorlikda magistratura va klinik ordinatura taʼlim yoʻnalishlarida oʻquv dasturlarini tasdiqlash;
fakultetda faoliyat olib boradigan professor-oʻqituvchilar va ilmiy xodimlar tarkibini yuqori malakali mahalliy va xorijiy ilmiy-pedagog kadrlar hisobidan toʻldirish choralarini koʻrsin.
5. Belgilansinki, fakultetning boshlangʻich faoliyatini samarali tashkil etish maqsadida unga ajratilgan bino va inshootlarni joriy taʼmirlash va jihozlash (mebel, kompyuter texnikasi, oʻquv adabiyotlari va boshqa moddiy-texnika vositalari xarid qilish) ishlari uchun filialning budjetdan tashqari mablagʻlaridan foydalaniladi.
6. Oʻzbekiston Respublikasi Tashqi ishlar vazirligi Sogʻliqni saqlash vazirligining buyurtmalariga binoan ushbu qarorni amalga oshirish doirasida jalb qilingan xorijiy professor-oʻqituvchilar va maʼmuriy xodimlar uchun kirish vizalari konsullik yigʻimlari hamda boshqa yigʻimlar undirilmasdan, zarur hollarda Toshkent shahridagi I. Karimov nomidagi xalqaro aeroportda rasmiylashtirilishini taʼminlasin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduxakimov va Oʻzbekiston Respublikasi sogʻliqni saqlash vaziri A.K. Shadmanov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 26-mart,
253-son