UzbekAI

Ўзбекистон Республикаси Президентининг

Қарори

Сирдарё вилоятида «Ҳар бир оила — тадбиркор» Дастурини амалга оширишга доир қўшимча чора-тадбирлар тўғрисида

Ўзбекистон Республикаси Президентининг 2018 йил 7 июндаги ««Ҳар бир оила — тадбиркор» дастурини амалга ошириш тўғрисида» ПҚ-3777-сонли Қарорига мувофиқ аҳолининг моддий шароитларини тубдан яхшилаш, турмуш тарзи сифати ва даражасида сезиларли ижобий ўзгаришларни таъминлашга қаратилган «Ҳар бир оила — тадбиркор» дастурини Сирдарё вилоятининг барча туман ва шаҳарларида амалга оширишни янада кенгайтириш мақсадида:

1. Сирдарё вилоятида «Ҳар бир оила — тадбиркор» дастурининг амалга оширилишини молиялаштириш мақсадларига қўшимча равишда Ўзбекистон Республикаси Тикланиш ва тараққиёт жамғармаси АТ Ўзсаноатқурилишбанкка 50 млн. АҚШ доллари эквиваленти миқдорида маблағларни миллий валютада йиллик 5 фоиз ставкада, 3 йил имтиёзли давр билан 7 йил муддатга ажратсин.

2. Дастур амалга оширилишини мувофиқлаштириш, тизимли мониторинг қилиш ва рўёбга чиқарилишига кўмаклашиш Ўзбекистон Республикаси Молия вазирининг ўринбосари А.Р. Каримов, Иқтисодиёт ва саноат вазирининг ўринбосари Б.Ш. Усмонов, Марказий банк раисининг ўринбосари А.Р. Исламовлар — Дастур координаторларига юклатилсин.

3. АТ Ўзсаноатқурилишбанк (А. Воитов) ушбу кредит маблағларини Дастур координаторлари тақсимотига асосан Сирдарё вилоятида фаолият юритувчи тижорат банкларига миллий валютада йиллик 5 фоиз ставкада, 3 йил имтиёзли давр билан 7 йил муддатда қайтариш шарти билан қайта молиялаштирсин.

Дастур координаторлари зиммасига Сирдарё вилоятининг туманлари (шаҳарлари) салоҳияти, шакллантирилган лойиҳаларнинг истиқболи ва қўшимча иш ўринлари яратишга йўналтирилганлиги ҳамда ҳақиқий эҳтиёждан келиб чиққан ҳолда Сирдарё вилоятидаги тижорат банклари ва туманлар (шаҳарлар) кесимида тақсимласин ҳамда уларга зарур ҳолларда қайта тақсимлаш ваколати берилсин.

4. Мазкур маблағлар ҳисобидан кредитлар тадбиркорлик билан шуғулланиш ва фаолият турини кенгайтириш истагини билдирган аҳоли ҳамда тадбиркорлик субъектларига йиллик 8 фоиз ставкада 6 ойгача имтиёзли давр билан 3 йилдан кўп бўлмаган муддатга ажратилади.

5. Белгилаб қўйилсинки, ушбу Дастур доирасида тижорат банклари томонидан:

энг кам иш ҳақининг юз эллик бараваригача миқдоридаги микрокредитлар — даромад олишга қаратилган муайян меҳнат фаолияти билан шуғулланиш истагида бўлган жисмоний шахсларга товарлар (хизматлар) шартнома асосида келишилган нархда етказиб берилгандан (хизматлар кўрсатилгандан) ва жисмоний шахс — лойиҳа эгаси ундан қониқиш ҳосил қилганидан сўнг ажратилади ва маблағлар маҳсулот етказиб берувчи (хизмат кўрсатувчи)нинг ҳисобрақамига ўтказиб берилади;

энг кам иш ҳақининг минг бараваригача миқдордаги кредитлар — устувор равишда имтиёзли кредитларга муҳтож кичик тадбиркорлик субъектларининг янги иш ўринлари яратишга қаратилган ва замонавий мини технологиялар асосида ишлаб чиқариш ҳамда хизматлар кўрсатишга доир лойиҳаларига йўналтирилади;

энг кам иш ҳақининг минг бараваридан ортиқ миқдорда кредитлар — вилоятнинг туман ва шаҳарларини ижтимоий-иқтисодий ривожлантиришда муҳим аҳамиятга эга, самарадорлиги юқори ва барқарор иш ўринлари яратишга қаратилган кичик тадбиркорлик субъектларининг лойиҳаларига Дастур координаторларининг хулосалари асосида ажратилади.

6. «Ҳар бир оила — тадбиркор» дастурини амалга ошириш доирасида:

имтиёзли кредитлар туман ва шаҳарларда ташкил этилган Ҳудудий ишчи гуруҳларнинг оилаларни хоҳиш ва истакларини, ушбу фаолиятни амалга ошириш учун етарли шароитлари мавжудлигини чуқур ўрганиб, ҳар бир оиланинг таклиф этаётган лойиҳаларига кредит ажратиш мақсадга мувофиқлиги тўғрисида хулосалари асосида ажратилиши;

кредитларнинг самарадорлигини ва ўз муддатларида қайтарилишини таъминлашга вилоят Ташкилий мувофиқлаштирувчи ишчи гуруҳи ва Ҳудудий ишчи гуруҳлар масъул эканликлари белгилаб қўйилсин.

7. Сирдарё вилояти ҳокимлиги (Ғ.Ғ. Мирзаев) туман ва шаҳар ҳокимликлари, вилоят Ташкилий мувофиқлаштирувчи ишчи гуруҳи ва Ҳудудий ишчи гуруҳлар билан биргаликда вилоятнинг туман ва шаҳарларида фаолият кўрсатаётган хўжалик юритувчи субъектлар томонидан аҳоли ва тадбиркорлик субъектларига мақбул нархларда мини технологиялар, асбоб-ускуналар, чорва моллари (наслдор қорамол, қўй, эчки), парранда, балиқ, асалари уяси, чорва озуқаси ҳамда бошқа зарур хом ашё ва материаллар етказилишини, ихчам иссиқхоналар қуриб берилишини ва бошқа хизматлар кўрсатилишини таъминлаш чораларини кўрсин.

8. Ўзбекистон Республикаси Президентининг «Ҳудудларнинг жадал ижтимоий-иқтисодий ривожланишини таъминлашга доир устувор чора-тадбирлар тўғрисида» 2017 йил 8 августдаги ПҚ-3182-сонли қарорига мувофиқ ташкил этилган сектор раҳбарлари ўзлари раҳбарлик қилаётган ҳудудларга ажратилган кредитларнинг мақсадли ишлатилиши таъминланишида ва кредитларнинг белгиланган муддатда қайтарилишида масъул эканлиги белгилаб қўйилсин ва бу борада тижорат банкларига ҳар томонлама амалий ёрдам кўрсатсин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — Молия вазири Ж.А. Қўчқоров, Ўзбекистон тикланиш ва тараққиёт жамғармаси ижрочи директори Ш.А. Вафоев ва Сирдарё вилояти ҳокими Ғ.Ғ. Мирзаев зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2019 йил 11 февраль,

ПҚ-4172-сон

Oʻzbekiston Respublikasi Prezidentining

Qarori

Sirdaryo viloyatida “Har bir oila — tadbirkor” Dasturini amalga oshirishga doir qoʻshimcha chora-tadbirlar toʻgʻrisida

Oʻzbekiston Respublikasi Prezidentining 2018-yil 7-iyundagi ““Har bir oila — tadbirkor” dasturini amalga oshirish toʻgʻrisida” PQ-3777-sonli Qaroriga muvofiq aholining moddiy sharoitlarini tubdan yaxshilash, turmush tarzi sifati va darajasida sezilarli ijobiy oʻzgarishlarni taʼminlashga qaratilgan “Har bir oila — tadbirkor” dasturini Sirdaryo viloyatining barcha tuman va shaharlarida amalga oshirishni yanada kengaytirish maqsadida:

1. Sirdaryo viloyatida “Har bir oila — tadbirkor” dasturining amalga oshirilishini moliyalashtirish maqsadlariga qoʻshimcha ravishda Oʻzbekiston Respublikasi Tiklanish va taraqqiyot jamgʻarmasi AT Oʻzsanoatqurilishbankka 50 mln. AQSH dollari ekvivalenti miqdorida mablagʻlarni milliy valyutada yillik 5 foiz stavkada, 3 yil imtiyozli davr bilan 7 yil muddatga ajratsin.

2. Dastur amalga oshirilishini muvofiqlashtirish, tizimli monitoring qilish va roʻyobga chiqarilishiga koʻmaklashish Oʻzbekiston Respublikasi Moliya vazirining oʻrinbosari A.R. Karimov, Iqtisodiyot va sanoat vazirining oʻrinbosari B.Sh. Usmonov, Markaziy bank raisining oʻrinbosari A.R. Islamovlar — Dastur koordinatorlariga yuklatilsin.

3. AT Oʻzsanoatqurilishbank (A. Voitov) ushbu kredit mablagʻlarini Dastur koordinatorlari taqsimotiga asosan Sirdaryo viloyatida faoliyat yurituvchi tijorat banklariga milliy valyutada yillik 5 foiz stavkada, 3 yil imtiyozli davr bilan 7 yil muddatda qaytarish sharti bilan qayta moliyalashtirsin.

Dastur koordinatorlari zimmasiga Sirdaryo viloyatining tumanlari (shaharlari) salohiyati, shakllantirilgan loyihalarning istiqboli va qoʻshimcha ish oʻrinlari yaratishga yoʻnaltirilganligi hamda haqiqiy ehtiyojdan kelib chiqqan holda Sirdaryo viloyatidagi tijorat banklari va tumanlar (shaharlar) kesimida taqsimlasin hamda ularga zarur hollarda qayta taqsimlash vakolati berilsin.

4. Mazkur mablagʻlar hisobidan kreditlar tadbirkorlik bilan shugʻullanish va faoliyat turini kengaytirish istagini bildirgan aholi hamda tadbirkorlik subyektlariga yillik 8 foiz stavkada 6 oygacha imtiyozli davr bilan 3 yildan koʻp boʻlmagan muddatga ajratiladi.

5. Belgilab qoʻyilsinki, ushbu Dastur doirasida tijorat banklari tomonidan:

eng kam ish haqining yuz ellik baravarigacha miqdoridagi mikrokreditlar — daromad olishga qaratilgan muayyan mehnat faoliyati bilan shugʻullanish istagida boʻlgan jismoniy shaxslarga tovarlar (xizmatlar) shartnoma asosida kelishilgan narxda yetkazib berilgandan (xizmatlar koʻrsatilgandan) va jismoniy shaxs — loyiha egasi undan qoniqish hosil qilganidan soʻng ajratiladi va mablagʻlar mahsulot yetkazib beruvchi (xizmat koʻrsatuvchi)ning hisobraqamiga oʻtkazib beriladi;

eng kam ish haqining ming baravarigacha miqdordagi kreditlar — ustuvor ravishda imtiyozli kreditlarga muhtoj kichik tadbirkorlik subyektlarining yangi ish oʻrinlari yaratishga qaratilgan va zamonaviy mini texnologiyalar asosida ishlab chiqarish hamda xizmatlar koʻrsatishga doir loyihalariga yoʻnaltiriladi;

eng kam ish haqining ming baravaridan ortiq miqdorda kreditlar — viloyatning tuman va shaharlarini ijtimoiy-iqtisodiy rivojlantirishda muhim ahamiyatga ega, samaradorligi yuqori va barqaror ish oʻrinlari yaratishga qaratilgan kichik tadbirkorlik subyektlarining loyihalariga Dastur koordinatorlarining xulosalari asosida ajratiladi.

6. “Har bir oila — tadbirkor” dasturini amalga oshirish doirasida:

imtiyozli kreditlar tuman va shaharlarda tashkil etilgan Hududiy ishchi guruhlarning oilalarni xohish va istaklarini, ushbu faoliyatni amalga oshirish uchun yetarli sharoitlari mavjudligini chuqur oʻrganib, har bir oilaning taklif etayotgan loyihalariga kredit ajratish maqsadga muvofiqligi toʻgʻrisida xulosalari asosida ajratilishi;

kreditlarning samaradorligini va oʻz muddatlarida qaytarilishini taʼminlashga viloyat Tashkiliy muvofiqlashtiruvchi ishchi guruhi va Hududiy ishchi guruhlar masʼul ekanliklari belgilab qoʻyilsin.

7. Sirdaryo viloyati hokimligi (Gʻ.Gʻ. Mirzayev) tuman va shahar hokimliklari, viloyat Tashkiliy muvofiqlashtiruvchi ishchi guruhi va Hududiy ishchi guruhlar bilan birgalikda viloyatning tuman va shaharlarida faoliyat koʻrsatayotgan xoʻjalik yurituvchi subyektlar tomonidan aholi va tadbirkorlik subyektlariga maqbul narxlarda mini texnologiyalar, asbob-uskunalar, chorva mollari (nasldor qoramol, qoʻy, echki), parranda, baliq, asalari uyasi, chorva ozuqasi hamda boshqa zarur xom ashyo va materiallar yetkazilishini, ixcham issiqxonalar qurib berilishini va boshqa xizmatlar koʻrsatilishini taʼminlash choralarini koʻrsin.

8. Oʻzbekiston Respublikasi Prezidentining “Hududlarning jadal ijtimoiy-iqtisodiy rivojlanishini taʼminlashga doir ustuvor chora-tadbirlar toʻgʻrisida” 2017-yil 8-avgustdagi PQ-3182-sonli qaroriga muvofiq tashkil etilgan sektor rahbarlari oʻzlari rahbarlik qilayotgan hududlarga ajratilgan kreditlarning maqsadli ishlatilishi taʼminlanishida va kreditlarning belgilangan muddatda qaytarilishida masʼul ekanligi belgilab qoʻyilsin va bu borada tijorat banklariga har tomonlama amaliy yordam koʻrsatsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Moliya vaziri J.A. Qoʻchqorov, Oʻzbekiston tiklanish va taraqqiyot jamgʻarmasi ijrochi direktori Sh.A. Vafoyev va Sirdaryo viloyati hokimi Gʻ.Gʻ. Mirzayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2019-yil 11-fevral,

PQ-4172-son