📅 2019-yil 17-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 17 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 17 апреля 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 17 April 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТУЗИЛМАСИ
Шоличилик илмий-тадқиқот институти Хоразм филиалини ташкил этиш тўғрисида
Шоличилик соҳасида илмий-тадқиқот ишларини янада кенгайтириш, шолининг янги рақобатбардош, шунингдек, Хоразм воҳасининг табиий-иқлим шароитларига мос, серҳосил навларини яратиш ва етиштириш ишларини жадаллаштириш мақсадида Вазирлар Маҳкамаси қарор қилади:
1. Қишлоқ хўжалиги вазирлиги, Хоразм вилояти ҳокимлигининг Шоличилик илмий-тадқиқот институти Хоразм илмий-тажриба станцияси негизида Шоличилик илмий-тадқиқот институти Хоразм филиалини (кейинги ўринларда филиал деб аталади) ташкил этиш тўғрисидаги таклифига розилик берилсин.
2. Қуйидагилар филиалнинг асосий вазифалари этиб белгилансин:
ҳудуднинг тупроқ-иқлим шароитларига мос, юқори ҳосилли, касалликларга чидамли, гуручининг юқори сифат кўрсаткичлари бўйича ажралиб турувчи шоли навлари ва дурагайларини яратиш бўйича тадқиқотларни кенгайтириш;
янги ва истиқболли шоли навларининг бирламчи уруғчилигини ташкил этиш, уруғчиликнинг илмий асосларини ишлаб чиқиш;
шоли етиштиришда замонавий ресурстежамкор ва сув тежовчи технологияларни яратиш ва ишлаб чиқаришга жорий этиш;
чет эл илғор тажрибаларини қўллаган ҳолда ҳосилдорликни ошириш ҳамда ерларнинг мелиоратив ҳолатини яхшилаш бўйича тавсиялар ишлаб чиқиш;
шоли экинидаги касаллик ва зараркунандаларга қарши курашда атроф-муҳитнинг экологик мувозанатига таъсир этмайдиган усулларни ишлаб чиқиш;
шоли экинини етиштиришдаги асосий агротехник тадбирларни инновацион технологиялар асосида механизациялашни жорий этиш;
соҳанинг етакчи хорижий илмий муассасалари билан қўшма илмий лойиҳаларни амалга ошириш мақсадида ҳамкорлик алоқаларини ривожлантириш, шоличиликни ривожлантириш муаммоларига бағишланган лойиҳа ва инвестицияларни жалб қилиш, тажриба алмашиш, конференциялар, симпозиумлар ва семинарлар ўтказиш;
шоли ва дуккакли дон экинларини етиштиришни ривожлантириш юзасидан тавсиялар ишлаб чиқиш;
юқори малакали илмий кадрларни тайёрлаш, илмий ходимларнинг касбий даражасини доимий ошириш ва такомиллаштириш.
3. Белгилансинки, филиал илмий муассаса шаклидаги юридик шахс бўлиб, у Шоличилик илмий-тадқиқот институти Хоразм илмий-тажриба станциясининг ҳуқуқ ва мажбуриятлари бўйича ҳуқуқий вориси ҳисобланади.
4. Қуйидагилар:
Шоличилик илмий-тадқиқот институтининг Хоразм филиали тузилмаси 1-иловага мувофиқ;
Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази бош директорига, зарур ҳолларда, филиал тузилмасига ходимларнинг тасдиқланган чекланган умумий сони ва меҳнатга ҳақ тўлаш фонди доирасида ўзгартиришлар киритиш ҳуқуқи берилсин.
5. Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги ва озиқ-овқат таъминоти илмий-ишлаб чиқариш маркази Шоличилик илмий-тадқиқот институти билан биргаликда бир ой муддатда филиалнинг уставини тасдиқласин ҳамда унинг белгиланган тартибда давлат рўйхатидан ўтказилишини таъминласин.
6. Қуйидагилар филиални молиялаштириш манбалари этиб белгилансин:
Ўзбекистон Республикасининг Давлат бюджетидан давлат илмий дастурларини амалга ошириш учун ажратилган маблағлар;
хўжалик фаолиятидан тушадиган маблағлар;
халқаро молия институтлари, хорижий ва донор ташкилотларнинг грантлари;
қонунчилик ҳужжатларида тақиқланмаган бошқа манбалар.
7. Хоразм вилояти ҳокимлиги Ўзбекистон Республикаси Ер ресурслари, геодезия, картография ва давлат кадастри давлат қўмитаси билан биргаликда бир ой муддатда филиалга:
Хоразм вилояти, Гурлан тумани, Шоликор қишлоғи, «Чинобод» муқобил машина трактор парки ҳудудидаги 1800 м 2 бўш турган ер майдонини — бино ва иншоотлар қуриш учун;
Хоразм вилояти, Гурлан туманидаги 82 гектар суғориладиган ер майдонларини — доимий фойдаланиш ҳуқуқи асосида илмий-тадқиқот ишлари учун ажратилишини таъминласин.
8. Ўзбекистон Республикаси Фанлар академияси, манфаатдор вазирликлар ва идоралар ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсинлар.
9. Мазкур қарорнинг ижросини назорат қилиш Ўзбекистон Республикаси Қишлоқ хўжалиги вазири Ж.А. Ходжаев, Хоразм вилояти ҳокими Ф.Ў. Эрманов зиммасига ҳамда Вазирлар Маҳкамасининг Телекоммуникациялар, IT-технологиялар ва инновацион фаолиятни ривожлантириш, ахборот хавфсизлигини таъминлаш масалалари котибиятига юклансин.
Вазирлар Маҳкамасининг 2019 йил 17 апрелдаги 327-сон қарорига 1-ИЛОВА
Шоличилик илмий-тадқиқот институтининг Хоразм филиали
Ўзбекистон Республикасининг Бош вазири А. АРИПОВ
Тошкент ш.,
2019 йил 17 апрель,
327-сон
Oʻzbekiston Respublikasi Vazirlar Mahkamasining
qarori
TUZILMASI
Sholichilik ilmiy-tadqiqot instituti Xorazm filialini tashkil etish toʻgʻrisida
Sholichilik sohasida ilmiy-tadqiqot ishlarini yanada kengaytirish, sholining yangi raqobatbardosh, shuningdek, Xorazm vohasining tabiiy-iqlim sharoitlariga mos, serhosil navlarini yaratish va yetishtirish ishlarini jadallashtirish maqsadida Vazirlar Mahkamasi qaror qiladi:
1. Qishloq xoʻjaligi vazirligi, Xorazm viloyati hokimligining Sholichilik ilmiy-tadqiqot instituti Xorazm ilmiy-tajriba stansiyasi negizida Sholichilik ilmiy-tadqiqot instituti Xorazm filialini (keyingi oʻrinlarda filial deb ataladi) tashkil etish toʻgʻrisidagi taklifiga rozilik berilsin.
2. Quyidagilar filialning asosiy vazifalari etib belgilansin:
hududning tuproq-iqlim sharoitlariga mos, yuqori hosilli, kasalliklarga chidamli, guruchining yuqori sifat koʻrsatkichlari boʻyicha ajralib turuvchi sholi navlari va duragaylarini yaratish boʻyicha tadqiqotlarni kengaytirish;
yangi va istiqbolli sholi navlarining birlamchi urugʻchiligini tashkil etish, urugʻchilikning ilmiy asoslarini ishlab chiqish;
sholi yetishtirishda zamonaviy resurstejamkor va suv tejovchi texnologiyalarni yaratish va ishlab chiqarishga joriy etish;
chet el ilgʻor tajribalarini qoʻllagan holda hosildorlikni oshirish hamda yerlarning meliorativ holatini yaxshilash boʻyicha tavsiyalar ishlab chiqish;
sholi ekinidagi kasallik va zararkunandalarga qarshi kurashda atrof-muhitning ekologik muvozanatiga taʼsir etmaydigan usullarni ishlab chiqish;
sholi ekinini yetishtirishdagi asosiy agrotexnik tadbirlarni innovatsion texnologiyalar asosida mexanizatsiyalashni joriy etish;
sohaning yetakchi xorijiy ilmiy muassasalari bilan qoʻshma ilmiy loyihalarni amalga oshirish maqsadida hamkorlik aloqalarini rivojlantirish, sholichilikni rivojlantirish muammolariga bagʻishlangan loyiha va investitsiyalarni jalb qilish, tajriba almashish, konferensiyalar, simpoziumlar va seminarlar oʻtkazish;
sholi va dukkakli don ekinlarini yetishtirishni rivojlantirish yuzasidan tavsiyalar ishlab chiqish;
yuqori malakali ilmiy kadrlarni tayyorlash, ilmiy xodimlarning kasbiy darajasini doimiy oshirish va takomillashtirish.
3. Belgilansinki, filial ilmiy muassasa shaklidagi yuridik shaxs boʻlib, u Sholichilik ilmiy-tadqiqot instituti Xorazm ilmiy-tajriba stansiyasining huquq va majburiyatlari boʻyicha huquqiy vorisi hisoblanadi.
4. Quyidagilar:
Sholichilik ilmiy-tadqiqot institutining Xorazm filiali tuzilmasi 1-ilovaga muvofiq;
Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi bosh direktoriga, zarur hollarda, filial tuzilmasiga xodimlarning tasdiqlangan cheklangan umumiy soni va mehnatga haq toʻlash fondi doirasida oʻzgartirishlar kiritish huquqi berilsin.
5. Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligi va oziq-ovqat taʼminoti ilmiy-ishlab chiqarish markazi Sholichilik ilmiy-tadqiqot instituti bilan birgalikda bir oy muddatda filialning ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin.
6. Quyidagilar filialni moliyalashtirish manbalari etib belgilansin:
Oʻzbekiston Respublikasining Davlat budjetidan davlat ilmiy dasturlarini amalga oshirish uchun ajratilgan mablagʻlar;
xoʻjalik faoliyatidan tushadigan mablagʻlar;
xalqaro moliya institutlari, xorijiy va donor tashkilotlarning grantlari;
qonunchilik hujjatlarida taqiqlanmagan boshqa manbalar.
7. Xorazm viloyati hokimligi Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bilan birgalikda bir oy muddatda filialga:
Xorazm viloyati, Gurlan tumani, Sholikor qishlogʻi, “Chinobod” muqobil mashina traktor parki hududidagi 1800 m 2 boʻsh turgan yer maydonini — bino va inshootlar qurish uchun;
Xorazm viloyati, Gurlan tumanidagi 82 gektar sugʻoriladigan yer maydonlarini — doimiy foydalanish huquqi asosida ilmiy-tadqiqot ishlari uchun ajratilishini taʼminlasin.
8. Oʻzbekiston Respublikasi Fanlar akademiyasi, manfaatdor vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.
9. Mazkur qarorning ijrosini nazorat qilish Oʻzbekiston Respublikasi Qishloq xoʻjaligi vaziri J.A. Xodjayev, Xorazm viloyati hokimi F.Oʻ. Ermanov zimmasiga hamda Vazirlar Mahkamasining Telekommunikatsiyalar, IT-texnologiyalar va innovatsion faoliyatni rivojlantirish, axborot xavfsizligini taʼminlash masalalari kotibiyatiga yuklansin.
Vazirlar Mahkamasining 2019-yil 17-apreldagi 327-son qaroriga 1-ILOVA
Sholichilik ilmiy-tadqiqot institutining Xorazm filiali
Oʻzbekiston Respublikasining Bosh vaziri A. ARIPOV
Toshkent sh.,
2019-yil 17-aprel,
327-son