📅 2019-yil 3-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 3 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 мая 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 3 May 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Республикаси Мудофаа вазирлигининг Маънавият ва маърифат маркази ҳузуридаги «Турон» театр студияси фаолиятини янада такомиллаштириш чора-тадбирлари тўғрисида
Ўзбекистон Республикаси Президентининг «Ўзбекистон Республикаси Қуролли Кучлари ташкил этилганлигининг 27 йиллиги ҳамда Ватан ҳимоячилари кунини нишонлашга тайёргарлик кўриш ва ўтказиш чора-тадбирлари тўғрисида» 2018 йил 13 декабрдаги 5413-Ф-сон фармойишига мувофиқ ҳамда театр санъати ёрдамида Ўзбекистон Республикаси Мудофаа вазирлиги қўшинлари шахсий таркибида фуқаролик ва ҳарбий бурчга садоқат, Ватанга муҳаббат туйғуларини шакллантириш, ҳарбий жамоаларда соғлом ахлоқий-руҳий муҳитни ва ҳарбий интизомни янада мустаҳкамлаш мақсадида Вазирлар Маҳкамаси қарор қилади:
1. Ўзбекистон Республикаси Мудофаа вазирлиги ва Маданият вазирлигининг Ўзбекистон Республикаси Мудофаа вазирлигининг Маънавият ва маърифат маркази ҳузуридаги «Турон» театр студиясини Ўзбекистон Республикаси Мудофаа вазирлигининг Маънавият ва маърифат маркази ҳузуридаги «Турон» ҳарбий театри» давлат муассасасига (кейинги ўринларда Театр деб аталади) айлантириш тўғрисидаги таклифига розилик берилсин.
2. Театрнинг асосий вазифалари этиб қуйидагилар белгилансин:
миллий ва жаҳон маданиятининг энг яхши асарларини, шунингдек, ўзбек халқининг бой маданиятини, буюк аждодларимизнинг меросини, урф-одатларимизни, ота-боболаримиз ҳамда замондошларимизнинг юрт тинчлиги ва осойишталиги йўлидаги жасоратини мадҳ этувчи, халқ ва армия бирлигини, Ватанга муҳаббат ва Ватанга қасамёдга содиқликни тараннум этувчи бадиий асарларни тарғиб қилиш;
ўсиб келаётган ёш авлоднинг маънавиятини ва уларнинг санъатга бўлган қизиқишларини кучайтириш, ёшларга ўзбек миллий театр санъати тарихи асосларини, театр санъати ёрдамида маданий-маърифий ва ижодий-бадиий соҳаларда эришилган ютуқларни таништириш;
ёшларнинг ижодий фаоллигини ривожлантириш, ўсиб келаётган ёш авлодни ватанпарварлик ва миллий қадриятларимизга ҳурмат руҳида тарбиялаш, театр санъатига янги усулларни миллий руҳга мослаштирган ҳолда жорий этиш;
ўзида ватанпарварлик, инсонийлик, миллийлик, буюк аждодларимизнинг тарихини акс эттирган спектаклларни намойиш этиш;
турли маданий-маърифий тадбирлар, гастроллар, танловлар, таниқли санъат арбоблари билан учрашувлар ва форумлар, режиссёр ва актёрлар учун маҳорат дарслари ва ўқув тренингларини ташкил этиш, ёшларга жаҳон маданияти ва санъатининг ёрқин намуналарини таништириш орқали уларнинг маънавий ўсишига кўмаклашиш;
давлат ва жамиятда Ўзбекистон Республикаси Қуролли Кучлари обрўсини, Ўзбекистон Республикаси фуқаролари ўртасида ҳарбий хизматнинг жозибадорлигини оширишда иштирок этиш;
Ўзбекистон Республикаси Мудофаа вазирлиги қўшинлари шахсий таркибини Ватанга муҳаббат, конституцион ва ҳарбий бурчга садоқат руҳида тарбиялашга кўмаклашиш, ҳарбий хизматчиларда юксак маънавий-ахлоқий хусусиятларни шакллантириш ва ривожлантириш;
ҳарбий хизматчилар ва уларнинг оила аъзоларининг маънавий эҳтиёжларини қондириш, уларни бадиий ижодга фаол жалб қилиш.
3. Белгилаб қўйилсинки:
Театрнинг бадиий-раҳбар ходимлари меҳнатига ҳақ тўлаш Ўзбекистон Республикаси Вазирлар Маҳкамасининг 2018 йил 19 июндаги 458-сон қарори билан тасдиқланган Концерт ташкилотлари ва саройлари (театр-концерт саройлари)нинг маъмурий-бошқарув ва бадиий-раҳбар ходимлари меҳнатига ҳақ тўлаш бўйича базавий лавозим маошлари миқдорларининг учинчи гуруҳи, ижодий (артист) ходимлари меҳнатига ҳақ тўлаш эса — ушбу қарор билан тасдиқланган Театрлар артист ходимлари меҳнатига ҳақ тўлаш бўйича базавий лавозим маошлари миқдорларининг драма театри ходимлари учун белгиланган миқдорларда амалга оширилади;
Театр фаолиятини молиялаштириш Ўзбекистон Республикаси Мудофаа вазирлиги учун ажратиладиган Ўзбекистон Республикаси Давлат бюджети маблағлари, чипта сотиш ва пулли хизматлар кўрсатишдан тушадиган бюджетдан ташқари маблағлар, юридик ва жисмоний шахсларнинг ҳомийлик хайриялари ҳамда қонунчилик ҳужжатларида тақиқланмаган бошқа манбалар ҳисобидан амалга оширилади.
5. Ўзбекистон Республикаси Маданият вазирлиги мунтазам равишда тажрибали театр ижодкорлари ва мутахассисларини жалб этган ҳолда Театр ижодий жамоасига муассаса фаолиятини йўлга қўйиш, моддий-техник базасини янада мустаҳкамлаш, шу жумладан репертуарларнинг ғоявий-бадиий савиясини ошириш, спектаклларнинг таъсирчанлигини кучайтириш юзасидан услубий ва амалий ёрдам кўрсатсин.
6. Ўзбекистон Республикаси Вазирлар Маҳкамасининг «Ўзбекистонда театр ва мусиқа санъатини янада ривожлантиришни қўллаб-қувватлаш ва рағбатлантириш чора-тадбирлари тўғрисида»ги Фармонни амалга ошириш масалалари ҳақида» 1995 йил 28 октябрдаги 415-сон қарорига 1-илованинг «Тошкент шаҳри» кичик бўлимига «Турон» ҳарбий театри давлат муассасаси» сўзлари қўшилсин.
7. Ўзбекистон Республикаси Мудофаа вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
8. Мазкур қарорнинг бажарилишини назорат қилиш Ўзбекистон Республикаси мудофаа вазири Б.Н. Курбанов ва Ўзбекистон Республикаси маданият вазири Б.С. Сайфуллаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 3 май,
370-сон
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Mudofaa vazirligining Maʼnaviyat va maʼrifat markazi huzuridagi “Turon” teatr studiyasi faoliyatini yanada takomillashtirish chora-tadbirlari toʻgʻrisida
Oʻzbekiston Respublikasi Prezidentining “Oʻzbekiston Respublikasi Qurolli Kuchlari tashkil etilganligining 27 yilligi hamda Vatan himoyachilari kunini nishonlashga tayyorgarlik koʻrish va oʻtkazish chora-tadbirlari toʻgʻrisida” 2018-yil 13-dekabrdagi 5413-F-son farmoyishiga muvofiq hamda teatr sanʼati yordamida Oʻzbekiston Respublikasi Mudofaa vazirligi qoʻshinlari shaxsiy tarkibida fuqarolik va harbiy burchga sadoqat, Vatanga muhabbat tuygʻularini shakllantirish, harbiy jamoalarda sogʻlom axloqiy-ruhiy muhitni va harbiy intizomni yanada mustahkamlash maqsadida Vazirlar Mahkamasi qaror qiladi:
1. Oʻzbekiston Respublikasi Mudofaa vazirligi va Madaniyat vazirligining Oʻzbekiston Respublikasi Mudofaa vazirligining Maʼnaviyat va maʼrifat markazi huzuridagi “Turon” teatr studiyasini Oʻzbekiston Respublikasi Mudofaa vazirligining Maʼnaviyat va maʼrifat markazi huzuridagi “Turon” harbiy teatri” davlat muassasasiga (keyingi oʻrinlarda Teatr deb ataladi) aylantirish toʻgʻrisidagi taklifiga rozilik berilsin.
2. Teatrning asosiy vazifalari etib quyidagilar belgilansin:
milliy va jahon madaniyatining eng yaxshi asarlarini, shuningdek, oʻzbek xalqining boy madaniyatini, buyuk ajdodlarimizning merosini, urf-odatlarimizni, ota-bobolarimiz hamda zamondoshlarimizning yurt tinchligi va osoyishtaligi yoʻlidagi jasoratini madh etuvchi, xalq va armiya birligini, Vatanga muhabbat va Vatanga qasamyodga sodiqlikni tarannum etuvchi badiiy asarlarni targʻib qilish;
oʻsib kelayotgan yosh avlodning maʼnaviyatini va ularning sanʼatga boʻlgan qiziqishlarini kuchaytirish, yoshlarga oʻzbek milliy teatr sanʼati tarixi asoslarini, teatr sanʼati yordamida madaniy-maʼrifiy va ijodiy-badiiy sohalarda erishilgan yutuqlarni tanishtirish;
yoshlarning ijodiy faolligini rivojlantirish, oʻsib kelayotgan yosh avlodni vatanparvarlik va milliy qadriyatlarimizga hurmat ruhida tarbiyalash, teatr sanʼatiga yangi usullarni milliy ruhga moslashtirgan holda joriy etish;
oʻzida vatanparvarlik, insoniylik, milliylik, buyuk ajdodlarimizning tarixini aks ettirgan spektakllarni namoyish etish;
turli madaniy-maʼrifiy tadbirlar, gastrollar, tanlovlar, taniqli sanʼat arboblari bilan uchrashuvlar va forumlar, rejissyor va aktyorlar uchun mahorat darslari va oʻquv treninglarini tashkil etish, yoshlarga jahon madaniyati va sanʼatining yorqin namunalarini tanishtirish orqali ularning maʼnaviy oʻsishiga koʻmaklashish;
davlat va jamiyatda Oʻzbekiston Respublikasi Qurolli Kuchlari obroʻsini, Oʻzbekiston Respublikasi fuqarolari oʻrtasida harbiy xizmatning jozibadorligini oshirishda ishtirok etish;
Oʻzbekiston Respublikasi Mudofaa vazirligi qoʻshinlari shaxsiy tarkibini Vatanga muhabbat, konstitutsion va harbiy burchga sadoqat ruhida tarbiyalashga koʻmaklashish, harbiy xizmatchilarda yuksak maʼnaviy-axloqiy xususiyatlarni shakllantirish va rivojlantirish;
harbiy xizmatchilar va ularning oila aʼzolarining maʼnaviy ehtiyojlarini qondirish, ularni badiiy ijodga faol jalb qilish.
3. Belgilab qoʻyilsinki:
Teatrning badiiy-rahbar xodimlari mehnatiga haq toʻlash Oʻzbekiston Respublikasi Vazirlar Mahkamasining 2018-yil 19-iyundagi 458-son qarori bilan tasdiqlangan Konsert tashkilotlari va saroylari (teatr-konsert saroylari)ning maʼmuriy-boshqaruv va badiiy-rahbar xodimlari mehnatiga haq toʻlash boʻyicha bazaviy lavozim maoshlari miqdorlarining uchinchi guruhi, ijodiy (artist) xodimlari mehnatiga haq toʻlash esa — ushbu qaror bilan tasdiqlangan Teatrlar artist xodimlari mehnatiga haq toʻlash boʻyicha bazaviy lavozim maoshlari miqdorlarining drama teatri xodimlari uchun belgilangan miqdorlarda amalga oshiriladi;
Teatr faoliyatini moliyalashtirish Oʻzbekiston Respublikasi Mudofaa vazirligi uchun ajratiladigan Oʻzbekiston Respublikasi Davlat budjeti mablagʻlari, chipta sotish va pulli xizmatlar koʻrsatishdan tushadigan budjetdan tashqari mablagʻlar, yuridik va jismoniy shaxslarning homiylik xayriyalari hamda qonunchilik hujjatlarida taqiqlanmagan boshqa manbalar hisobidan amalga oshiriladi.
5. Oʻzbekiston Respublikasi Madaniyat vazirligi muntazam ravishda tajribali teatr ijodkorlari va mutaxassislarini jalb etgan holda Teatr ijodiy jamoasiga muassasa faoliyatini yoʻlga qoʻyish, moddiy-texnik bazasini yanada mustahkamlash, shu jumladan repertuarlarning gʻoyaviy-badiiy saviyasini oshirish, spektakllarning taʼsirchanligini kuchaytirish yuzasidan uslubiy va amaliy yordam koʻrsatsin.
6. Oʻzbekiston Respublikasi Vazirlar Mahkamasining “Oʻzbekistonda teatr va musiqa sanʼatini yanada rivojlantirishni qoʻllab-quvvatlash va ragʻbatlantirish chora-tadbirlari toʻgʻrisida”gi Farmonni amalga oshirish masalalari haqida” 1995-yil 28-oktabrdagi 415-son qaroriga 1-ilovaning “Toshkent shahri” kichik boʻlimiga “Turon” harbiy teatri davlat muassasasi” soʻzlari qoʻshilsin.
7. Oʻzbekiston Respublikasi Mudofaa vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
8. Mazkur qarorning bajarilishini nazorat qilish Oʻzbekiston Respublikasi mudofaa vaziri B.N. Kurbanov va Oʻzbekiston Respublikasi madaniyat vaziri B.S. Sayfullayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 3-may,
370-son