📅 2019-yil 29-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 29 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 мая 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 29 May 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Наманган вилоятининг Наманган шаҳрида хусусий тадбиркорликни ривожлантиришга доир қўшимча чора-тадбирлар тўғрисида
Наманган вилоятининг Наманган шаҳрида хусусий тадбиркорликни ривожлантириш учун қўшимча шароитлар яратиш, жумладан, ахборот технология маркази ҳамда инновацион технопаркларни ташкил этиш мақсадида Вазирлар Маҳкамаси қарор қилади:
1. Наманган вилояти ҳокимлиги, Ўзбекистон Республикаси Молия вазирлиги, «Ўзбекнефтгаз» АЖ ва Давлат активларини бошқариш агентлигининг «Карбонам» МЧЖга тегишли Наманган шаҳар А.Хўжаев кўчаси, 38-уй манзилида жойлашган бино ва иншоотларни (кейинги ўринларда объект деб аталади) белгиланган тартибда Наманган вилояти ҳокимлигига давлат мулки сифатида оператив бошқарувга бепул бериш тўғрисидаги таклифи маъқуллансин.
2. «Ўзнефтмаҳсулот» АЖ бир ой муддатда объектнинг қолдиқ (баланс) қиймати бўйича берилишини, Наманган вилояти ҳокимлиги эса қабул қилинишини таъминласин.
3. Наманган вилояти ҳокимлиги «Ўзбекнефтгаз» АЖ билан биргаликда уч ой муддатда Наманган шаҳридаги «Карбонам» МЧЖга тегишли коммуникация тармоқлари мавжуд бўлган ер участкасини ажратиш, жамият ходимларининг иш жойларини сақлаб қолган ҳолда мавжуд ишлаб чиқариш технологик ускуналарини демонтаж қилиб кўчириб ўтказиш ва инвесторларни жалб қилган ҳолда ишлаб чиқаришни ташкил этиш чораларини кўрсин.
4. Наманган вилояти ҳокимлиги, Ахборот технологиялари ва коммуникацияларини ривожлантириш вазирлиги ҳамда Инновацион ривожланиш вазирлигининг объект негизида энг илғор хорижий тажрибалар намунасида «IT park» мажмуасини (кейинги ўринларда мажмуа деб аталади) ташкил этиш ҳамда мазкур мажмуада замонавий ахборот дастурларини яратиш учун инновацион технологиялар асосида ишлайдиган «IT school» ахборот технологиялари марказини жойлаштириш тўғрисидаги таклифлари маъқуллансин.
5. Қуйидагилар «IT school» ахборот технологиялари марказининг асосий фаолияти йўналишлари этиб белгилансин:
ахборот технологиялари соҳасида рақобатбардош маҳсулот ва хизматларни, инновацион ишланмаларни ишлаб чиқариш, уларни ички ва ташқи бозорларда илгари суришга қулай шарт-шароитлар яратиш ва кўмаклашиш;
юқори технологияли маҳсулот ва хизматлар ишлаб чиқариш занжирининг узлуксизлигини таъминлаш мақсадида илмий, таълим, ишлаб чиқариш ташкилотларининг интеграциялашувига кўмаклашиш;
маҳаллий дастурчилар маҳсулотларини ишлаб чиқариш ва экспортини амалга оширишга кўмаклашиш, миллий дастурий маҳсулотларнинг ишлаб чиқувчилар ва уларнинг маҳсулотлари тўғрисидаги ахборотнинг ягона электрон банкини шакллантириш;
етакчи компаниялар ва уларнинг мутахассислари иштирокида курслар, тренинглар ва мастер классларни, шунингдек, меҳнат бозорида талаб юқори бўлган ва малакали мутахассислар синфини шакллантириш учун илмий-амалий анжуманлар ташкил этиш.
6. Наманган вилояти ҳокимлиги Инновацион ривожланиш вазирлиги, Ахборот технологиялари ва коммуникацияларини ривожлантириш вазирлиги билан биргаликда икки ой муддатда «IT school» ахборот технологиялари марказининг низомини белгиланган тартибда тасдиқланишини таъминласин.
7. Вазирлар Маҳкамасининг «Нефть-газ тармоғи ташкилотларининг активларидан янада самарали фойдаланиш чора-тадбирлари тўғрисида» 2018 йил 25 августдаги 685-сон қарорига 1-иловадан 151-банд чиқариб ташлансин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — транспорт вазири А.Ж. Раматов ва Наманган вилояти ҳокими Х.Х. Бозаров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 29 май,
442-сон
Oʻzbekiston Respublikasi Vazirlar Mahkamasining
qarori
Namangan viloyatining Namangan shahrida xususiy tadbirkorlikni rivojlantirishga doir qoʻshimcha chora-tadbirlar toʻgʻrisida
Namangan viloyatining Namangan shahrida xususiy tadbirkorlikni rivojlantirish uchun qoʻshimcha sharoitlar yaratish, jumladan, axborot texnologiya markazi hamda innovatsion texnoparklarni tashkil etish maqsadida Vazirlar Mahkamasi qaror qiladi:
1. Namangan viloyati hokimligi, Oʻzbekiston Respublikasi Moliya vazirligi, “Oʻzbekneftgaz” AJ va Davlat aktivlarini boshqarish agentligining “Karbonam” MChJga tegishli Namangan shahar A.Xoʻjayev koʻchasi, 38-uy manzilida joylashgan bino va inshootlarni (keyingi oʻrinlarda obyekt deb ataladi) belgilangan tartibda Namangan viloyati hokimligiga davlat mulki sifatida operativ boshqaruvga bepul berish toʻgʻrisidagi taklifi maʼqullansin.
2. “Oʻzneftmahsulot” AJ bir oy muddatda obyektning qoldiq (balans) qiymati boʻyicha berilishini, Namangan viloyati hokimligi esa qabul qilinishini taʼminlasin.
3. Namangan viloyati hokimligi “Oʻzbekneftgaz” AJ bilan birgalikda uch oy muddatda Namangan shahridagi “Karbonam” MChJga tegishli kommunikatsiya tarmoqlari mavjud boʻlgan yer uchastkasini ajratish, jamiyat xodimlarining ish joylarini saqlab qolgan holda mavjud ishlab chiqarish texnologik uskunalarini demontaj qilib koʻchirib oʻtkazish va investorlarni jalb qilgan holda ishlab chiqarishni tashkil etish choralarini koʻrsin.
4. Namangan viloyati hokimligi, Axborot texnologiyalari va kommunikatsiyalarini rivojlantirish vazirligi hamda Innovatsion rivojlanish vazirligining obyekt negizida eng ilgʻor xorijiy tajribalar namunasida “IT park” majmuasini (keyingi oʻrinlarda majmua deb ataladi) tashkil etish hamda mazkur majmuada zamonaviy axborot dasturlarini yaratish uchun innovatsion texnologiyalar asosida ishlaydigan “IT school” axborot texnologiyalari markazini joylashtirish toʻgʻrisidagi takliflari maʼqullansin.
5. Quyidagilar “IT school” axborot texnologiyalari markazining asosiy faoliyati yoʻnalishlari etib belgilansin:
axborot texnologiyalari sohasida raqobatbardosh mahsulot va xizmatlarni, innovatsion ishlanmalarni ishlab chiqarish, ularni ichki va tashqi bozorlarda ilgari surishga qulay shart-sharoitlar yaratish va koʻmaklashish;
yuqori texnologiyali mahsulot va xizmatlar ishlab chiqarish zanjirining uzluksizligini taʼminlash maqsadida ilmiy, taʼlim, ishlab chiqarish tashkilotlarining integratsiyalashuviga koʻmaklashish;
mahalliy dasturchilar mahsulotlarini ishlab chiqarish va eksportini amalga oshirishga koʻmaklashish, milliy dasturiy mahsulotlarning ishlab chiquvchilar va ularning mahsulotlari toʻgʻrisidagi axborotning yagona elektron bankini shakllantirish;
yetakchi kompaniyalar va ularning mutaxassislari ishtirokida kurslar, treninglar va master klasslarni, shuningdek, mehnat bozorida talab yuqori boʻlgan va malakali mutaxassislar sinfini shakllantirish uchun ilmiy-amaliy anjumanlar tashkil etish.
6. Namangan viloyati hokimligi Innovatsion rivojlanish vazirligi, Axborot texnologiyalari va kommunikatsiyalarini rivojlantirish vazirligi bilan birgalikda ikki oy muddatda “IT school” axborot texnologiyalari markazining nizomini belgilangan tartibda tasdiqlanishini taʼminlasin.
7. Vazirlar Mahkamasining “Neft-gaz tarmogʻi tashkilotlarining aktivlaridan yanada samarali foydalanish chora-tadbirlari toʻgʻrisida” 2018-yil 25-avgustdagi 685-son qaroriga 1-ilovadan 151-band chiqarib tashlansin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — transport vaziri A.J. Ramatov va Namangan viloyati hokimi X.X. Bozarov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 29-may,
442-son