📅 2019-yil 14-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 14 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 июня 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 14 June 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Республикасида кинотуризмни жадал ривожлантириш ва мамлакат кино жозибадорлигини кенг тарғиб қилиш чора-тадбирлари тўғрисида
Ўзбекистон Республикаси Президентининг «Миллий киноиндустрияни ривожлантириш бўйича қўшимча чора-тадбирлар тўғрисида» 2018 йил 24 июлдаги ПҚ-3880-сон қарори ижросини таъминлаш, кинотуризмни жадал ривожлантириш мақсадида Вазирлар Маҳкамаси қарор қилади:
1. Кинотуризмни ривожлантириш, хорижий кинокомпанияларга Ўзбекистон Республикаси ҳудудида кино маҳсулотларини тасвирга олиш ишларида ташкилий, ишлаб чиқариш, техник ва технологик хизматлар кўрсатиш, мамлакатимиз киноиндустриясини хорижда тарғиб қилишда «Ўзбеккино» Миллий агентлигининг масъулияти кучайтирилсин ва бу борадаги ишларни амалга оширишда фуқаролик жамияти институтлари вакиллари билан яқиндан ҳамкорлик қилсин.
2. «Ўзбеккино» Миллий агентлиги Ўзбекистон ёшлар иттифоқи, Ўзбекистон Республикаси Ташқи ишлар вазирлиги, Молия вазирлиги, Маданият вазирлиги, Туризмни ривожлантириш давлат қўмитаси ва Ўзбекистон кинематографиясини ривожлантириш маркази билан ҳамкорликда:
халқаро кинофестивалларда мамлакат кинолокациясини кенг тарғиб қилиш ҳамда мамлакатимизда бундай кинофестивалларни ташкил этиш, хорижий мамлакатлар билан ўзаро кино кунларини мунтазам ўтказиб бориш юзасидан зарур чоралар кўрсин;
илғор хорижий тажрибани атрофлича ўрганган ҳолда, хорижий кинокомпаниялар Ўзбекистон Республикаси ҳудудида кино маҳсулотларини тасвирга олиши учун уларга имтиёзлар ва преференциялар, давлат томонидан рағбатлантиришнинг самарали механизмларини жорий этиш бўйича бир ой муддатда белгиланган тартибда Вазирлар Маҳкамасига таклиф киритсин.
3. Белгилаб қўйилсинки:
ўзбек киноси кунларини хорижда ташкил этиш билан боғлиқ харажатлар «Ўзбеккино» Миллий агентлиги ҳузуридаги Миллий кинематографияни ривожлантириш жамғармаси маблағларини ҳисобга олган ҳолда, Ўзбекистон Республикаси Давлат бюджети маблағлари ҳисобига молиялаштирилади;
хорижий кинокомпаниялар Ўзбекистон Республикаси ҳудудида кино маҳсулотларини тасвирга олишда давлат мулкидан фойдаланганлик учун ижара тўловининг энг кам ставкаларида тўғридан-тўғри шартномалар тузиши мумкин.
4. Ўзбекистон Республикаси Маданият вазирлиги, Туризмни ривожлантириш давлат қўмитаси, Ички ишлар вазирлиги, Мудофаа вазирлиги, Фавқулодда вазиятлар вазирлиги, Экология ва атроф муҳитни муҳофаза қилиш давлат қўмитаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, бошқа манфаатдор вазирликлар ва идоралар хорижий кинокомпаниялар томонидан Ўзбекистон Республикаси ҳудудида фильмларни кино ва видеотасвирга олиш ишларини амалга ошириш алоҳида келишишни талаб этган ҳолларда «Ўзбеккино» Миллий агентлигининг мурожаати келиб тушган кундан бошлаб уч кун муддатдан кечиктирмасдан ҳал этилишида амалий ёрдам кўрсатсинлар.
5. Ўзбекистон Республикаси Ташқи ишлар вазирлиги хорижий кинокомпанияларни мамлакат ҳудудида фильмларни кино ва видеотасвирга олиш ишларига кенг жалб этиш бўйича Ўзбекистон Республикасининг чет давлатлардаги дипломатик ваколатхоналари томонидан тарғибот ишлари юритилишини ташкил этсин, шунингдек, мамлакатимиз кинолокациясини оммалаштириш мақсадида Ўзбекистон Республикаси делегациясини халқаро кинофестиваллар ва кинокўргазмаларда иштирок этишини таъминлаш чораларни кўрсин.
6. «Ўзбеккино» Миллий агентлиги хорижий кинокомпанияларга Ўзбекистон Республикаси ҳудудида фильмларни кино ва видеотасвирга олиш ишларида ташкилий, ишлаб чиқариш ҳамда юқори профессионал техник ва технологик хизматлар кўрсатувчи маҳаллий ташкилотлар ва киноижодкорлар тўғрисидаги маълумотлар, шунингдек, фильмларни кино ва видеотасвирга олиш учун зарур бўладиган кинотехника ускуналари, реквизитлар ва бошқа материаллар ва жиҳозлар ҳамда уларнинг ижара тўловлари тўғрисидаги маълумотлар Интернет жаҳон ахборот тармоғидаги ўз расмий веб-сайтида эълон қилинишини таъминласин.
7. Ўзбекистон Республикаси Туризмни ривожлантириш давлат қўмитаси:
«Ўзбеккино» Миллий агентлиги хорижий кинофестиваллар ва кинокўргазмаларда ўтказилиши режалаштирилган тадбирларда иштироки доирасида республиканинг туризм салоҳиятини намойиш этадиган зарур реклама-ахборот материаллари билан таъминласин;
халқаро кинофестиваллар ва кинокўргазмаларда Ўзбекистон Республикаси кино туризми жозибадорлигини тарғиб қилишга бағишланган тадбирларни ташкил этишда «Ўзбеккино» Миллий агентлиги билан ҳамкорлик қилсин.
8. Ўзбекистон Республикаси Давлат божхона қўмитаси хорижий кинокомпанияларнинг Ўзбекистон Республикаси ҳудудида фильмларни кино ва видеотасвирга олиш ишлари учун вақтинча олиб кириладиган кинотехника ускуналари, реквизитлар ва жиҳозларни белгиланган тартибда тезкорлик билан божхона расмийлаштирувидан ўтказишда амалий ёрдам кўрсатсин.
9. «Ипак йўли» акциядорлик инновацион тижорат банки томонидан «Ўзбеккино» Миллий агентлигининг ҳар бир кинолойиҳа бўйича хорижий кинокомпаниялар Ўзбекистон Республикаси ҳудудида фильмларни кино ва видеотасвирга олиш ишлари учун киритадиган валюта маблағлари учун алоҳида банк ҳисобварақларини очиш, шунингдек, ушбу маблағларни миллий валютага айирбошлаш бўйича имтиёзли хизматлар кўрсатиши инобатга олинсин.
11. Мазкур қарорнинг бажарилишини назорат қилиш «Ўзбеккино» Миллий агентлиги бош директори Ф.Ш. Зокиров зиммасига ва Вазирлар Маҳкамасининг Ёшлар сиёсати, маданият, маънавият, оммавий ахборот воситалари, ижодий ва жамоат ташкилотлари масалалари котибиятига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 14 июнь,
499-сон
Oʻzbekiston Respublikasi Vazirlar Mahkamasining
qarori
Oʻzbekiston Respublikasida kinoturizmni jadal rivojlantirish va mamlakat kino jozibadorligini keng targʻib qilish chora-tadbirlari toʻgʻrisida
Oʻzbekiston Respublikasi Prezidentining “Milliy kinoindustriyani rivojlantirish boʻyicha qoʻshimcha chora-tadbirlar toʻgʻrisida” 2018-yil 24-iyuldagi PQ-3880-son qarori ijrosini taʼminlash, kinoturizmni jadal rivojlantirish maqsadida Vazirlar Mahkamasi qaror qiladi:
1. Kinoturizmni rivojlantirish, xorijiy kinokompaniyalarga Oʻzbekiston Respublikasi hududida kino mahsulotlarini tasvirga olish ishlarida tashkiliy, ishlab chiqarish, texnik va texnologik xizmatlar koʻrsatish, mamlakatimiz kinoindustriyasini xorijda targʻib qilishda “Oʻzbekkino” Milliy agentligining masʼuliyati kuchaytirilsin va bu boradagi ishlarni amalga oshirishda fuqarolik jamiyati institutlari vakillari bilan yaqindan hamkorlik qilsin.
2. “Oʻzbekkino” Milliy agentligi Oʻzbekiston yoshlar ittifoqi, Oʻzbekiston Respublikasi Tashqi ishlar vazirligi, Moliya vazirligi, Madaniyat vazirligi, Turizmni rivojlantirish davlat qoʻmitasi va Oʻzbekiston kinematografiyasini rivojlantirish markazi bilan hamkorlikda:
xalqaro kinofestivallarda mamlakat kinolokatsiyasini keng targʻib qilish hamda mamlakatimizda bunday kinofestivallarni tashkil etish, xorijiy mamlakatlar bilan oʻzaro kino kunlarini muntazam oʻtkazib borish yuzasidan zarur choralar koʻrsin;
ilgʻor xorijiy tajribani atroflicha oʻrgangan holda, xorijiy kinokompaniyalar Oʻzbekiston Respublikasi hududida kino mahsulotlarini tasvirga olishi uchun ularga imtiyozlar va preferensiyalar, davlat tomonidan ragʻbatlantirishning samarali mexanizmlarini joriy etish boʻyicha bir oy muddatda belgilangan tartibda Vazirlar Mahkamasiga taklif kiritsin.
3. Belgilab qoʻyilsinki:
oʻzbek kinosi kunlarini xorijda tashkil etish bilan bogʻliq xarajatlar “Oʻzbekkino” Milliy agentligi huzuridagi Milliy kinematografiyani rivojlantirish jamgʻarmasi mablagʻlarini hisobga olgan holda, Oʻzbekiston Respublikasi Davlat budjeti mablagʻlari hisobiga moliyalashtiriladi;
xorijiy kinokompaniyalar Oʻzbekiston Respublikasi hududida kino mahsulotlarini tasvirga olishda davlat mulkidan foydalanganlik uchun ijara toʻlovining eng kam stavkalarida toʻgʻridan toʻgʻri shartnomalar tuzishi mumkin.
4. Oʻzbekiston Respublikasi Madaniyat vazirligi, Turizmni rivojlantirish davlat qoʻmitasi, Ichki ishlar vazirligi, Mudofaa vazirligi, Favqulodda vaziyatlar vazirligi, Ekologiya va atrof muhitni muhofaza qilish davlat qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, boshqa manfaatdor vazirliklar va idoralar xorijiy kinokompaniyalar tomonidan Oʻzbekiston Respublikasi hududida filmlarni kino va videotasvirga olish ishlarini amalga oshirish alohida kelishishni talab etgan hollarda “Oʻzbekkino” Milliy agentligining murojaati kelib tushgan kundan boshlab uch kun muddatdan kechiktirmasdan hal etilishida amaliy yordam koʻrsatsinlar.
5. Oʻzbekiston Respublikasi Tashqi ishlar vazirligi xorijiy kinokompaniyalarni mamlakat hududida filmlarni kino va videotasvirga olish ishlariga keng jalb etish boʻyicha Oʻzbekiston Respublikasining chet davlatlardagi diplomatik vakolatxonalari tomonidan targʻibot ishlari yuritilishini tashkil etsin, shuningdek, mamlakatimiz kinolokatsiyasini ommalashtirish maqsadida Oʻzbekiston Respublikasi delegatsiyasini xalqaro kinofestivallar va kinokoʻrgazmalarda ishtirok etishini taʼminlash choralarni koʻrsin.
6. “Oʻzbekkino” Milliy agentligi xorijiy kinokompaniyalarga Oʻzbekiston Respublikasi hududida filmlarni kino va videotasvirga olish ishlarida tashkiliy, ishlab chiqarish hamda yuqori professional texnik va texnologik xizmatlar koʻrsatuvchi mahalliy tashkilotlar va kinoijodkorlar toʻgʻrisidagi maʼlumotlar, shuningdek, filmlarni kino va videotasvirga olish uchun zarur boʻladigan kinotexnika uskunalari, rekvizitlar va boshqa materiallar va jihozlar hamda ularning ijara toʻlovlari toʻgʻrisidagi maʼlumotlar Internet jahon axborot tarmogʻidagi oʻz rasmiy veb-saytida eʼlon qilinishini taʼminlasin.
7. Oʻzbekiston Respublikasi Turizmni rivojlantirish davlat qoʻmitasi:
“Oʻzbekkino” Milliy agentligi xorijiy kinofestivallar va kinokoʻrgazmalarda oʻtkazilishi rejalashtirilgan tadbirlarda ishtiroki doirasida respublikaning turizm salohiyatini namoyish etadigan zarur reklama-axborot materiallari bilan taʼminlasin;
xalqaro kinofestivallar va kinokoʻrgazmalarda Oʻzbekiston Respublikasi kino turizmi jozibadorligini targʻib qilishga bagʻishlangan tadbirlarni tashkil etishda “Oʻzbekkino” Milliy agentligi bilan hamkorlik qilsin.
8. Oʻzbekiston Respublikasi Davlat bojxona qoʻmitasi xorijiy kinokompaniyalarning Oʻzbekiston Respublikasi hududida filmlarni kino va videotasvirga olish ishlari uchun vaqtincha olib kiriladigan kinotexnika uskunalari, rekvizitlar va jihozlarni belgilangan tartibda tezkorlik bilan bojxona rasmiylashtiruvidan oʻtkazishda amaliy yordam koʻrsatsin.
9. “Ipak yoʻli” aksiyadorlik innovatsion tijorat banki tomonidan “Oʻzbekkino” Milliy agentligining har bir kinoloyiha boʻyicha xorijiy kinokompaniyalar Oʻzbekiston Respublikasi hududida filmlarni kino va videotasvirga olish ishlari uchun kiritadigan valyuta mablagʻlari uchun alohida bank hisobvaraqlarini ochish, shuningdek, ushbu mablagʻlarni milliy valyutaga ayirboshlash boʻyicha imtiyozli xizmatlar koʻrsatishi inobatga olinsin.
11. Mazkur qarorning bajarilishini nazorat qilish “Oʻzbekkino” Milliy agentligi bosh direktori F.Sh. Zokirov zimmasiga va Vazirlar Mahkamasining Yoshlar siyosati, madaniyat, maʼnaviyat, ommaviy axborot vositalari, ijodiy va jamoat tashkilotlari masalalari kotibiyatiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 14-iyun,
499-son