📅 2019-yil 20-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 20 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 июня 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 20 June 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент шаҳрида Аджу университетини ташкил этиш бўйича қўшимча чора-тадбирлар тўғрисида
Ўзбекистон Республикаси Президентининг «Тошкент шаҳрида Аджу университетини ташкил этиш тўғрисида» 2018 йил 30 ноябрдаги ПҚ-4041-сон қарорига мувофиқ Тошкент шаҳрида Аджу университетининг фаолиятини самарали ташкил этиш ҳамда қулай шарт-шароитлар яратиш мақсадида Вазирлар Маҳкамаси қарор қилади:
1. Ўзбекистон Республикаси Олий ва ўрта махсус таълим вазирлиги ва Аджу университети (Корея Республикаси) ўртасида Аджу университети таълим дастурларини жорий этиш тўғрисида Келишув имзоланганлиги маълумот учун қабул қилинсин.
2. Ўзбекистон Республикаси Молия вазирлиги Вазирлар Маҳкамасининг захира жамғармаси маблағлари ҳисобига Тошкент шаҳрида Аджу университетини ташкил этишда Аджу университетига (Корея Республикаси) дастлабки маслаҳат ишларини бажариш учун тўловни амалга ошириш мақсадида Олий ва ўрта махсус таълим вазирлигига 2,1 млн АҚШ долларига тенг миқдорда конвертация харажатларини инобатга олган ҳолда Ўзбекистон Республикаси Марказий банкининг курси бўйича маблағ ажратсин.
Белгилансинки, Аджу университетига (Корея Республикаси) ўтказиб бериладиган 2,1 млн АҚШ долларига тенг миқдордаги маблағ солиқ солиш объекти ҳисобланмайди.
3. Ўзбекистон Республикаси Олий ва ўрта махсус таълим вазирлиги Аджу университети (Корея Республикаси) билан имзоланган таълим дастурларини жорий этиш тўғрисидаги Келишувга мувофиқ Аджу университети (Корея Республикаси) томонидан тақдим этиладиган харажатлар режасига асосан тўловни амалга оширсин.
4. Тошкент шаҳар, Яшнобод тумани, Асалобод кўчаси, 113-уйда жойлашган Яшнобод темир йўл касб-ҳунар коллежи ҳамда Тошкент шаҳар, Яшнобод тумани, Асалобод кўчаси, 113 А-уйда жойлашган Яшнобод қурилиш касб-ҳунар коллежининг бино ва иншоотлари тегишли ҳудудлари билан биргаликда (кейинги ўринларда объект деб аталади) Ўзбекистон Республикаси Олий ва ўрта махсус таълим вазирлигига оператив бошқариш ҳуқуқи асосида берилсин, кейинчалик ушбу жойда Тошкент шаҳридаги Аджу университети белгиланган тартибда текин фойдаланиш ҳуқуқи билан жойлаштирилсин.
Белгилаб қўйилсинки, Яшнобод темир йўл касб-ҳунар коллежи ҳамда Яшнобод қурилиш касб-ҳунар коллежининг ўқувчилари ўқишини битиришларига кадар тегишлича юқорида кўрсатилган объектда ўқув жараёнини давом эттирадилар.
5. Объектни реконструкция қилиш, капитал таъмирлаш ҳамда жиҳозлаш ишлари бўйича:
Ўзбекистон Республикаси Олий ва ўрта махсус таълим вазирлиги ҳузуридаги «Ягона буюртмачи хизмати» инжиниринг компанияси — буюртмачи этиб;
истисно тариқасида, тендер савдоларини ўтказмасдан, энг мақбул таклифлар танлови асосида танлаб олинадиган ташкилотлар бош лойиҳачи ҳамда бош пудратчи (етарлича машина ва механизмлар билан таъминланган, соҳа бўйича зарур кўрувчи-муҳандисларга ва объектлар қурилишида катта тажрибага эга бўлган, молиявий барқарор ташкилотлар орасидан) этиб белгилансин.
6. Ўзбекистон Республикаси Инвестициялар ва ташқи савдо вазирлиги Олий ва ўрта махсус таълим вазирлиги билан биргаликда:
объектнинг лойиҳа-смета ҳужжатларини ишлаб чиқиш ҳамда қурилиш-таъмирлаш ва жиҳозлаш ишларини бошлаш учун маблағларни 2019 йил Инвестиция дастури доирасида олий таълим муассасаларини қуриш, реконструкция қилиш ва капитал таъмирлаш учун назарда тутилган марказлаштирилган капитал қўйилма маблағларини қайта тақсимлаш ҳисобидан йўналтирсин;
2020 — 2022 йилларга мўлжалланган Ўзбекистон Республикаси Инвестиция дастурини шакллантиришда тасдиқланган лойиҳа-смета ҳужжатларига мувофиқ объектни реконструкция қилиш, капитал таъмирлаш ва жиҳозлаш лойиҳалари ушбу дастурларга белгиланган тартибда киритилишини назарда тутсин.
7. Ўзбекистон Республикаси Олий ва ўрта махсус таълим вазирлиги Бандлик ва меҳнат муносабатлари вазирлиги билан биргаликда Яшнобод темир йўл касб-ҳунар коллежи ҳамда Яшнобод қурилиш касб-ҳунар коллежининг ишдан бўшаётган ходимларини ишга жойлаштириш чораларини кўрсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — молия вазири Ж.А. Қўчқоров, Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдухакимов ҳамда олий ва ўрта махсус таълим вазири И.У. Маджидов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 20 июнь,
518-сон
Oʻzbekiston Respublikasi Vazirlar Mahkamasining
qarori
Toshkent shahrida Adju universitetini tashkil etish boʻyicha qoʻshimcha chora-tadbirlar toʻgʻrisida
Oʻzbekiston Respublikasi Prezidentining “Toshkent shahrida Adju universitetini tashkil etish toʻgʻrisida” 2018-yil 30-noyabrdagi PQ-4041-son qaroriga muvofiq Toshkent shahrida Adju universitetining faoliyatini samarali tashkil etish hamda qulay shart-sharoitlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Oliy va oʻrta maxsus taʼlim vazirligi va Adju universiteti (Koreya Respublikasi) oʻrtasida Adju universiteti taʼlim dasturlarini joriy etish toʻgʻrisida Kelishuv imzolanganligi maʼlumot uchun qabul qilinsin.
2. Oʻzbekiston Respublikasi Moliya vazirligi Vazirlar Mahkamasining zaxira jamgʻarmasi mablagʻlari hisobiga Toshkent shahrida Adju universitetini tashkil etishda Adju universitetiga (Koreya Respublikasi) dastlabki maslahat ishlarini bajarish uchun toʻlovni amalga oshirish maqsadida Oliy va oʻrta maxsus taʼlim vazirligiga 2,1 mln AQSh dollariga teng miqdorda konvertatsiya xarajatlarini inobatga olgan holda Oʻzbekiston Respublikasi Markaziy bankining kursi boʻyicha mablagʻ ajratsin.
Belgilansinki, Adju universitetiga (Koreya Respublikasi) oʻtkazib beriladigan 2,1 mln AQSh dollariga teng miqdordagi mablagʻ soliq solish obyekti hisoblanmaydi.
3. Oʻzbekiston Respublikasi Oliy va oʻrta maxsus taʼlim vazirligi Adju universiteti (Koreya Respublikasi) bilan imzolangan taʼlim dasturlarini joriy etish toʻgʻrisidagi Kelishuvga muvofiq Adju universiteti (Koreya Respublikasi) tomonidan taqdim etiladigan xarajatlar rejasiga asosan toʻlovni amalga oshirsin.
4. Toshkent shahar, Yashnobod tumani, Asalobod koʻchasi, 113-uyda joylashgan Yashnobod temir yoʻl kasb-hunar kolleji hamda Toshkent shahar, Yashnobod tumani, Asalobod koʻchasi, 113 A-uyda joylashgan Yashnobod qurilish kasb-hunar kollejining bino va inshootlari tegishli hududlari bilan birgalikda (keyingi oʻrinlarda obyekt deb ataladi) Oʻzbekiston Respublikasi Oliy va oʻrta maxsus taʼlim vazirligiga operativ boshqarish huquqi asosida berilsin, keyinchalik ushbu joyda Toshkent shahridagi Adju universiteti belgilangan tartibda tekin foydalanish huquqi bilan joylashtirilsin.
Belgilab qoʻyilsinki, Yashnobod temir yoʻl kasb-hunar kolleji hamda Yashnobod qurilish kasb-hunar kollejining oʻquvchilari oʻqishini bitirishlariga kadar tegishlicha yuqorida koʻrsatilgan obyektda oʻquv jarayonini davom ettiradilar.
5. Obyektni rekonstruksiya qilish, kapital taʼmirlash hamda jihozlash ishlari boʻyicha:
Oʻzbekiston Respublikasi Oliy va oʻrta maxsus taʼlim vazirligi huzuridagi “Yagona buyurtmachi xizmati” injiniring kompaniyasi — buyurtmachi etib;
istisno tariqasida, tender savdolarini oʻtkazmasdan, eng maqbul takliflar tanlovi asosida tanlab olinadigan tashkilotlar bosh loyihachi hamda bosh pudratchi (yetarlicha mashina va mexanizmlar bilan taʼminlangan, soha boʻyicha zarur koʻruvchi-muhandislarga va obyektlar qurilishida katta tajribaga ega boʻlgan, moliyaviy barqaror tashkilotlar orasidan) etib belgilansin.
6. Oʻzbekiston Respublikasi Investitsiyalar va tashqi savdo vazirligi Oliy va oʻrta maxsus taʼlim vazirligi bilan birgalikda:
obyektning loyiha-smeta hujjatlarini ishlab chiqish hamda qurilish-taʼmirlash va jihozlash ishlarini boshlash uchun mablagʻlarni 2019-yil Investitsiya dasturi doirasida oliy taʼlim muassasalarini qurish, rekonstruksiya qilish va kapital taʼmirlash uchun nazarda tutilgan markazlashtirilgan kapital qoʻyilma mablagʻlarini qayta taqsimlash hisobidan yoʻnaltirsin;
2020 — 2022-yillarga moʻljallangan Oʻzbekiston Respublikasi Investitsiya dasturini shakllantirishda tasdiqlangan loyiha-smeta hujjatlariga muvofiq obyektni rekonstruksiya qilish, kapital taʼmirlash va jihozlash loyihalari ushbu dasturlarga belgilangan tartibda kiritilishini nazarda tutsin.
7. Oʻzbekiston Respublikasi Oliy va oʻrta maxsus taʼlim vazirligi Bandlik va mehnat munosabatlari vazirligi bilan birgalikda Yashnobod temir yoʻl kasb-hunar kolleji hamda Yashnobod qurilish kasb-hunar kollejining ishdan boʻshayotgan xodimlarini ishga joylashtirish choralarini koʻrsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov, Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov hamda oliy va oʻrta maxsus taʼlim vaziri I.U. Madjidov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 20-iyun,
518-son