📅 2019-yil 25-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 25 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 25 июня 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 25 June 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
низом
СХЕМАСИ
РЎЙХАТИ
Ўзаро ҳисоб-китоблар тизимида электрон шаклдаги ҳисобварақ-фактуралардан фойдаланишни такомиллаштириш чора-тадбирлари тўғрисида
Ўзбекистон Республикаси Президентининг «Давлат солиқ хизмати органлари фаолиятини тубдан такомиллаштириш чора-тадбирлари тўғрисида» 2018 йил 26 июндаги ПҚ-3802-сон қарорига мувофиқ хўжалик юритувчи субъектлар томонидан электрон ҳисобварақ-фактуралардан фойдаланишни жорий этиш мақсадида Вазирлар Маҳкамаси қарор қилади:
1. Вазирлар Маҳкамасининг «Солиқ маъмуриятчилигида замонавий ахборот-коммуникация технологияларини қўллашни кенгайтириш чора-тадбирлари тўғрисида» 2018 йил 6 октябрдаги 807-сон қарорининг ижроси юзасидан хўжалик юритувчи субъектлар томонидан ҳисобварақ-фактураларни электрон шаклда расмийлаштириш тизимини жорий этиш бўйича Тошкент вилоятининг Чирчиқ шаҳри, Навоий ва Сирдарё вилоятлари ҳудудида тажриба ўтказилганлиги маълумот учун қабул қилинсин.
2. Ўзбекистон Республикаси Давлат солиқ қўмитаси, Молия вазирлиги ҳамда Ахборот технологиялари ва коммуникацияларини ривожлантириш вазирлигининг:
республика ҳудудида 2019 йил 1 июлдан бошлаб ихтиёрий равишда, 2020 йил 1 январдан бошлаб барча хўжалик юритувчи субъектлар учун ҳисобварақ-фактураларни электрон шаклда расмийлаштириш, сақлаш ва ҳисобини юритиш тизимини мажбурий тартибда жорий этиш;
Давлат солиқ қўмитаси ҳузуридаги «Янги технологиялар» илмий ахборот маркази» давлат унитар корхонасини электрон ҳисобварақ-фактураларни марказлаштирилган ҳолда сақлаш, операторлараро узатиш ва ҳисобини юритиш бўйича ваколатли роуминг оператори этиб белгилаш тўғрисидаги таклифларига розилик берилсин.
3. Қуйидагилар:
Ўзаро ҳисоб-китоблар тизимида электрон шаклдаги ҳисобварақ-фактуралардан фойдаланиш тартиби тўғрисидаги низом 1-иловага мувофиқ;
Ўзбекистон Республикаси Давлат солиқ қўмитасининг интеграциялаштирилган ягона ахборот-ресурс базасининг ҳисоблаш қувватини кенгайтириш учун зарур сервер ва телекоммуникация қурилмалари рўйхати 2-иловага мувофиқ тасдиқлансин.
4. Ўзбекистон Республикаси Молия вазирлиги 2-иловада кўрсатилган қурилмаларни харид қилиш билан боғлиқ маблағларни Ўзбекистон Республикаси Вазирлар Маҳкамасининг захира жамғармаси ҳисобидан молиялаштирсин.
5. Ўзбекистон Республикаси Давлат солиқ қўмитаси Ўзбекистон Миллий ахборот агентлиги, Ўзбекистон Миллий телерадиокомпанияси, Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги билан биргаликда мазкур қарорнинг мазмун-моҳиятини оммавий ахборот воситаларида мунтазам ва кенг ёритсин.
6. Ўзбекистон Республикаси Давлат солиқ қўмитаси манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — молия вазири Ж.А. Қўчқоров ва Ўзбекистон Республикаси Давлат солиқ қўмитасининг раиси Б.А. Мусаев зиммасига юклансин.
Вазирлар Маҳкамасининг 2019 йил 25 июндаги 522-сон қарорига 1-ИЛОВА
Ўзаро ҳисоб-китоблар тизимида электрон шаклдаги ҳисобварақ-фактуралардан фойдаланиш тартиби тўғрисида
1-боб. Умумий қоидалар
1. Ушбу Низом электрон ҳисобварақ-фактура айланиш тизимида товарларни (ишлар, хизматларни) сотувчи ва сотиб олувчи юридик ва жисмоний шахслар, роуминг оператори, операторлар ва ваколатли давлат органларининг электрон ҳисобварақ-фактураларни тақдим этиш, қабул қилиш, сақлаш ва улардан фойдаланиш доирасидаги ўзаро муносабатлари тартибини белгилайди.
2. Ушбу Низомда қуйидаги тушунчалар қўлланилади:
электрон ҳисобварақ-фактура (кейинги ўринларда ЭҲФ деб аталади) — товарларни (ишлар, хизматларни) реализация қилиш ва сотиб олишни тасдиқлайдиган, ЭҲФ айланиш тизими операторлари орқали тақдим этиладиган ва қабул қилинадиган, қонунчилик ҳужжатларига мувофиқ белгиланган шаклларда расмийлаштирилган электрон ҳужжат;
электрон ҳисобварақ-фактура айланиш тизими оператори (кейинги ўринларда оператор деб аталади) — қонунчилик ҳужжатларида ва ушбу Низомда белгиланган талабларни бажарган ЭҲФларнинг айланиши ва уларни сақлаш фаолияти билан шуғулланишга рухсат этилган юридик шахс мақомига эга ахборот воситачиси;
роуминг оператори — ЭҲФларнинг марказлаштирилган ҳолда сақланиши, операторлараро узатилиши ва ҳисоби юритилишини таъминлайдиган юридик шахс;
электрон ҳисобварақ-фактура идентификатори — ЭҲФни масофадан идентификация қилиш имконини берувчи роуминг операторининг ахборот тизими томонидан автоматик равишда белгиланадиган ЭҲФнинг ўзига хос рақами;
электрон ҳисобварақ-фактура айланиш тизимининг иштирокчилари (кейинги ўринларда иштирокчилар деб аталади) — ЭҲФ айланиш тизимида товарларни (ишлар, хизматларни) сотувчи ва сотиб олувчи юридик ва жисмоний шахслар, шунингдек, товар-транспорт юк хати субъектлари;
QR-код — тасдиқланган ЭҲФга бириктириладиган ва ҳужжат қоғоз шаклида чоп этилганда кўрсатиладиган, мобил иловалар ва дастурий маҳсулотлар орқали ўқиш (сканерлаш) вақтида ЭҲФ ҳақида барча маълумотларга ҳавола бўладиган махсус график код.
3. Ушбу Низом талаблари:
йўловчилар ташишни йўл чипталари билан расмийлаштиришга (шу жумладан авиа ва темир йўлларда);
товарлар (ишлар, хизматлар) нақд пулда реализация қилинган ҳолларда сотиб олувчига фискал хотирали назорат-касса машинаси чеки, терминал чеки, квитанция беришга;
товарларнинг экспорт-импорт тарзида етказиб берилишини расмийлаштиришга;
қабул қилиб олиш-топшириш далолатномаси расмийлаштириладиган молиявий ижара (шу жумладан лизинг) шартномаси бўйича мол-мулкни топширишга, Ўзбекистон Республикаси Солиқ кодекси 204-моддасининг саккизинчи қисмига мувофиқ қўшилган қиймат солиғини тўлаш мажбуриятлари юзага келадиган ҳоллар бундан мустасно. Бунда тегишли ҳужжатлар (молиявий ижара шартномасининг таркибий қисми бўлган ижара (лизинг) тўловлари жадвали; ҳисобварақ; ижарага (лизингга) олувчига ижара (лизинг) тўловларини тўлаш учун юборилган ёзма билдириш ва шу кабилар) билан расмийлаштирилган ҳар бир ижара (лизинг) тўловига ҳисобварақ-фактура ёзилмайди;
банк операцияларини мижознинг шахсий ҳисобварағидан кўчирма бериш орқали расмийлаштиришга татбиқ этилмайди.
4. ЭҲФларни юбориш ва қабул қилиш телекоммуникация алоқа каналлари орқали операторларнинг ахборот тизимлари ёрдамида амалга оширилади.
ЭҲФлар алмашинуви электрон рақамли имзолар билан тасдиқлаш орқали амалга оширилади.
5. ЭҲФларни шакллантириш, юбориш, тасдиқлаш ва сақлаш бўйича хизматлар кўрсатиш, шунингдек, хўжалик юритувчи субъект ва оператор ўртасида тузилган шартнома (оммавий оферта) асосида амалга оширилади.
2-боб. Операторларнинг вазифалари ва мажбуриятлари
6. Қуйидагилар операторнинг вазифалари ҳисобланади:
ўз ахборот тизимини роуминг операторининг ахборот тизимига боғлаш;
ЭҲФларга хизмат кўрсатувчи дастурий-аппарат мажмуасининг узлуксиз ишлашини таъминлаш, шунингдек, иштирокчилар учун доимий фойдаланиш имкониятини яратиш;
ўз тизими орқали роуминг оператори томонидан ишлаб чиқилган форматдаги ЭҲФларни юбориш.
ЭҲФга оид фақат ID рақами, сотувчи, харидор, сана ва вақти тўғрисидаги маълумотларни ўзида сақлаш ҳамда тўлиқ маълумотларни Роуминг операторига узатиш.
7. Операторнинг дастурий-аппарат мажмуаларини сертификатлаш қонунчилик ҳужжатларида белгиланган тартибда амалга оширилади.
8. Оператор:
телекоммуникация тармоқларидан фойдаланиш ва уларга хизмат кўрсатиш бўйича фаолиятни амалга ошириш учун лицензияга;
ЭҲФларни сақлаш учун сертификатланган аппарат воситалари ўрнатилган эгалик ёки ижара ҳуқуқи асосида Ўзбекистон Республикаси ҳудудида жойлашган кўчмас мулк объектларига (бинолар, иншоотлар, хоналарга);
ЭҲФларни шакллантириш, юбориш, қабул қилиш ва сақлаш имкониятини берадиган ахборот тизимига;
call-марказига ва ахборот технологиялари, молия, солиқ ёки бухгалтерия соҳаларида олий маълумот ҳамда камида 3 йиллик иш тажрибасига эга бўлган камида бир нафар мутахассисга эга бўлиши лозим.
Оператор ушбу бандда белгиланган талаблар тўлиқ бажарилгандан кейин ўз фаолиятини амалга ошириши мумкин.
9. Оператор ўзининг маълумотлар базасида иштирокчиларнинг шахсий маълумотлари ҳимоя қилиниши ҳамда ЭҲФлар конфиденциаллигини таъминлаши шарт, қонунчилик ҳужжатларида белгиланган ҳолатлар бундан мустасно.
3-боб. Роуминг операторининг вазифалари
10. Қуйидагилар роуминг операторининг вазифаларни ҳисобланади:
ЭҲФларнинг операторлар ўртасида алмашиниши, марказлаштирилган ҳолда сақланиши, ҳисоби юритилиши, Ўзбекистон Республикаси Давлат солиқ қўмитасининг ахборот тизимларига узатилишини ҳамда дастурий-аппарат мажмуасининг узлуксиз ва хавфсиз ишлашини таъминлаш;
ЭҲФ айланиш тизими доирасида операторлар билан ўзаро муносабатларни тартибга соладиган шартномада роуминг оператори томонидан операторнинг ахборот тизимига боғланиш учун берилган рўйхатга олиш маълумотларини (оператор идентификатори, логин ва паролни) кўрсатиш;
иштирокчиларнинг шахсий маълумотлари ҳимоя қилинишини ҳамда тасдиқланган ЭҲФларнинг камида 10 йил давомида сақланишини таъминлаш;
ЭҲФнинг ҳаққонийлигини QR-код орқали текшириш имконини берадиган, уланган барча операторлар тўғрисидаги маълумотлар ҳамда операторлар билан маълумотлар алмашиш техник протоколи жойлаштирилган глобал интернет тармоғидаги расмий веб-сайтни юритиш;
қонунчилик ҳужжатларида белгиланган тартибда ваколатли органларнинг ёзма сўровига асосан сақланаётган маълумотлар тўғрисида ахборот бериш;
операторларда ЭҲФ га оид фақат ID рақами, сотувчи, харидор, сана ва вақт тўғрисидаги маълумотлар сақланишини назорат қилиш ҳамда ўз ахборот тизимида ЭҲФ га оид тўлиқ маълумотлар сақланишини таъминлаш.
4-боб. Электрон ҳисобварақ-фактура айланиш тизими иштирокчиларининг ҳуқуқ ва мажбуриятлари
11. Иштирокчилар қуйидаги ҳуқуқларга эга:
ўз хоҳишига кўра операторни эркин танлаш;
ЭҲФ айланиш тизимида ҳисобварақ-фактураларни шакллантириш йўли билан товарларни (ишлар, хизматларни) реализация ёки харид қилиш;
ЭҲФ айланиш тизимидан фойдаланиш бўйича тегишли йўриқномалар билан танишиш ва амалий ёрдамлар олиш;
ЭҲФ айланиш тизимидаги носозликлар бўйича хизмат кўрсатувчи операторга мурожаат қилиш.
12. Иштирокчилар қуйидагиларга мажбур:
ЭҲФ айланиш тизими орқали товарларни (ишлар, хизматларни) реализация қилишда рақобат ва истеъмолчиларнинг ҳуқуқларини ҳимоя қилиш тўғрисидаги қонунчилик ҳужжатлари талабларига риоя этиш;
операторнинг оммавий офертасида кўрсатилган шартларни бажариш;
ЭҲФлар ва электрон хабарларни операторга сақлаш учун топшириш;
ЭҲФ айланиш тизимида иштирок этиш мақсадида ишлаб турган ахборот ресурсларида ЭҲФларни жойлаштириш;
қонунчилик ҳужжатларига мувофиқ ЭҲФларнинг сақланишини таъминлаш;
электрон тижорат соҳасидаги стандартлар, норма ва қоидаларга риоя этиш.
5-боб. Электрон ҳисобварақ-фактураларни расмийлаштириш тартиби
13. ЭҲФларни шакллантириш, юбориш, тасдиқлаш ва улардан фойдаланиш тартиби ушбу Низомга иловага мувофиқ схемага асосан амалга оширилади, товар-моддий бойликлар юклаб жўнатиш билан бир вақтда реализация қилинганда расмийлаштириладиган ЭҲФ бундан мустасно.
13 1 . Товар-моддий бойликлар юклаб жўнатиш билан бир вақтда реализация қилинганда, электрон ҳисобварақ-фактура электрон товар-транспорт юк хати билан бирлаштирилган ҳолда расмийлаштирилиши мумкин.
14. Товарларни (ишлар, хизматларни) сотувчи томонидан махсус дастурий маҳсулот орқали ЭҲФ шакллантирилади ҳамда сотиб олувчи тўғрисидаги маълумотлар кўрсатилган ҳолда электрон рақамли имзо билан тасдиқланиб оператор орқали роуминг операторига юборилади.
15. Келиб тушган ЭҲФ роуминг оператори томонидан ушбу Низом талабларига мувофиқлиги текширилиб, сотиб олувчига унинг оператори орқали етказилади ва ЭҲФ махсус дастурий маҳсулотда «етказилган» мақомига ўтказилади.
Қуйидаги ҳолатлар мавжуд бўлганда, роуминг оператори томонидан ЭҲФ қабул қилинмайди ва ҳужжат келиб тушган кундан кечиктирмасдан тегишли оператор орқали уни шакллантирган товарларни (ишлар, хизматларни) сотувчига қайтаради:
ЭҲФни расмийлаштиришда мазкур низом талабларига амал қилинмаган бўлса;
ЭҲФга маълумотлар ва реквизитлар тўлиқ киритилмаган ёки хатолар билан тўлдирилган бўлса;
ҳақиқий бўлмаган электрон рақамли имзодан фойдаланган ҳолларда;
солиқ текширувини ўтказаётган солиқ органидан товар-моддий бойликлар инвентаризациядан ўтказилиши муносабати билан маълум бир муддатга расмийлаштириладиган электрон ҳисобварақ-фактураларни қабул қилиш ва етказиш функцияларини вақтинча тўхтатиб туриш зарурияти вужудга келганлиги тўғрисида мурожаат келиб тушган бўлса.
16. Келиб тушган ЭҲФ сотиб олувчи томонидан электрон рақамли имзо билан тасдиқланади ёки сабаби кўрсатилган ҳолда рад этилади. Бунда ЭҲФ «етказилган»дан «рад этилган» мақомига ўзгаради.
17. Сотиб олувчи тасдиқлаган ЭҲФ оператор томонидан роуминг оператори орқали товарларни (ишлар, хизматларни) сотувчига юборилади. Бунда ЭҲФ мақоми автоматик равишда «етказилган»дан «тасдиқланган» мақомига ўзгаради. Шу пайтдан бошлаб ЭҲФ икки томонлама тасдиқланган ҳисобланади ва роуминг оператори томонидан ЭҲФга QR-код бириктирилади.
18. Товарларни (ишлар, хизматларни) тадбиркорлик фаолияти билан шуғулланмайдиган жисмоний шахсларга реализация қилишда товарларни (ишлар, хизматларни) сотувчи томонидан шакллантирилган ЭҲФ унинг электрон рақамли имзоси билан бир томонлама тасдиқланади.
19. Мазкур бобда қайд этилган жараёнлар роуминг оператори ва операторлар томонидан автоматлаштирилган тарзда ва реал вақт режимида амалга оширилади.
6-боб. Якунловчи қоидалар
20. Ваколатли давлат органлари ушбу Низом талабларига риоя этилиши юзасидан қонунчилик ҳужжатларига мувофиқ назоратни амалга оширадилар.
21. Ушбу Низом талабларини бузган шахслар қонунчилик ҳужжатларида белгиланган тартибда жавоб берадилар.
Ўзаро ҳисоб-китоблар тизимида электрон шаклдаги ҳисобварақ-фактуралардан фойдаланиш тартиби тўғрисидаги низомга ИЛОВА
Электрон ҳисобварақ-фактураларни шакллантириш, юбориш, тасдиқлаш ва улардан фойдаланиш
Босқичлар Субъектлар Тадбирлар Ижро муддати 1-босқич Товарларни (ишлар, хизматларни) сотувчи ЭҲФни шакллантириш ҳамда сотиб олувчи тўғрисидаги маълумотлар кўрсатилган ҳолда электрон рақамли имзо билан тасдиқланиб оператор орқали роуминг операторига юбориш. Реал вақт режимида 2-босқич Роуминг оператори 1. Келиб тушган ЭҲФ ушбу Низом талабларига мувофиқлиги текширилиб, сотиб олувчига унинг оператори орқали етказиш; 2. Тўлдирилишида хатолар ёки камчиликлар мавжудлиги аниқланган ЭҲФ қабул қилмасдан тегишли оператор орқали уни шакллантирган товарларни (ишлар, хизматларни) етказиб берувчига қайтариш. Реал вақт режимида 3-босқич Товарларни (ишлар, хизматларни) сотиб олувчи Келиб тушган ЭҲФни электрон рақамли имзо билан тасдиқлаш ёки сабаби кўрсатилган ҳолда рад этиш. Ихтиёрий муддатда 4-босқич Электрон ҳисобварақ-фактура айланиш тизими оператори Товарларни сотиб олувчи тасдиқлаган ЭҲФни роуминг оператори орқали товарларни етказиб берувчига юбориш. ЭҲФ товарларни сотиб олувчи томонидан тасдиқлангандан кейин р еал вақт режимида 5-босқич Роуминг оператори ЭҲФ товарларни сотиб олувчи томонидан тасдиқлангандан кейин унга QR-код бириктириш. Реал вақт режимида
Вазирлар Маҳкамасининг 2019 йил 25 июндаги 522-сон қарорига 2-ИЛОВА
Давлат солиқ қўмитасининг интеграциялаштирилган ягона ахборот-ресурс базасининг ҳисоблаш қувватини кенгайтириш учун зарур сервер ва телекоммуникация қурилмалари
АҚШ долларида Қурилма номи Минимал техник талаблар Нархи Сони (дона) Умумий қиймати Сервер қурилмалари Base Server (3 years warranty) inc: Processor — 2.4-3.7 GНz 20-core with 27.5 MB L3 Cache; 16x16GB Single Rank x4 DDR4-2666 CAS-19-19-19 Registered Smart Memory Kit; 2x6.4TB SAS 12G Mixed Use SFF (2.5in) SC 3yr Wty Digitally Signed Firmware SSD; Ethernet 2x10Gb 2-port 535T Adapter; 4x1600W Power Supply. 68 275,0 16 1 094 400,0 Тармоқ қурилмалари Network Switch (3 years warranty) — 8qty , inc: 48 1G/10GBase-T and 4 QSFP+-ports; dual hot-pluggable power supplies; 2x650W AC Power Supply; 2xНV Fan Tray. 40G QSFP+ LC LR4 SM Transceiver 10 km — 6qty; QSFP+ 4x10G SFP+ 3m DAC Cable — 10qty; 650W AC Power Supply — 1qty 288 306,0 1 288 306,0 Ахборотлар хавфсизлигини таъминлаш қурилмалари Threat-focused next-generation firewall bundle -(2qty), inc: Interfaces: 8 GE copper; Expansion slot — 1 interface card; Throughput: Stateful inspection throughput — 2 Gbps; (3DES/AES) VP N throughput — 300 Mbps; Application Control (AVC)- 1,100 Mbps; Application Control (AVC) and IPS — 650 Mbps; Maximum concurrent sessions — 500,000; Maximum N ew Connections per second — 20,000; IPsec site-to-site VP N peers — 750; Users/nodes: Unlimited; Нigh availability: Active/Active and Active/Standby. IPS and URL 3YR Subs — 2 qty 48 575,2 1 48 575,0 Дисплей қурилмаси Professional Series 46» Direct-Lit LED Display — 9qty; FUSIO N ™ 3 x 3 Micro-Adjustable Large Bolt-Down Freestanding Video Wall — 1qty; UTP 5e cat. patch cord, 3m — 10qty; PDU with control function (type SНT) with 6xSchuko Sockets and 1xSchuko plug — 2qty; C-DPM/DPM-10 DisplayPort (M) to DisplayPort (M) Cable, 3m — 8qty; C-DPM/НM-10 DisplayPort (M) to НDMI (M) Cable, 3m, for Mini PC — 1qty; Mini PC — 1qty, inc: Enterprise Licensed 64-bit OS; Quad-core processor with 6Mb L3 cache, 14-nm process; RAM 8 GB; 256 GB SSD storage; Integrated Graphic Card (Core Speed 350 — 1150 (Boost) MНz, Memory Bus Width 64/128 Bit). Fixed Port Web Managed Ethernet Switch — 1qty 41 530,0 1 41 530,0 Жами: 1 470 811,0
Ўзбекистон Республикасининг Бош вазири А. АРИПОВ
Тошкент ш.,
2019 йил 25 июнь,
522-сон
Oʻzbekiston Respublikasi Vazirlar Mahkamasining
qarori
nizom
SXEMASI
ROʻYXATI
Oʻzaro hisob-kitoblar tizimida elektron shakldagi hisobvaraq-fakturalardan foydalanishni takomillashtirish chora-tadbirlari toʻgʻrisida
Oʻzbekiston Respublikasi Prezidentining “Davlat soliq xizmati organlari faoliyatini tubdan takomillashtirish chora-tadbirlari toʻgʻrisida” 2018-yil 26-iyundagi PQ-3802-son qaroriga muvofiq xoʻjalik yurituvchi subyektlar tomonidan elektron hisobvaraq-fakturalardan foydalanishni joriy etish maqsadida Vazirlar Mahkamasi qaror qiladi:
1. Vazirlar Mahkamasining “Soliq maʼmuriyatchiligida zamonaviy axborot-kommunikatsiya texnologiyalarini qoʻllashni kengaytirish chora-tadbirlari toʻgʻrisida” 2018-yil 6-oktabrdagi 807-son qarorining ijrosi yuzasidan xoʻjalik yurituvchi subyektlar tomonidan hisobvaraq-fakturalarni elektron shaklda rasmiylashtirish tizimini joriy etish boʻyicha Toshkent viloyatining Chirchiq shahri, Navoiy va Sirdaryo viloyatlari hududida tajriba oʻtkazilganligi maʼlumot uchun qabul qilinsin.
2. Oʻzbekiston Respublikasi Davlat soliq qoʻmitasi, Moliya vazirligi hamda Axborot texnologiyalari va kommunikatsiyalarini rivojlantirish vazirligining:
respublika hududida 2019-yil 1-iyuldan boshlab ixtiyoriy ravishda, 2020-yil 1-yanvardan boshlab barcha xoʻjalik yurituvchi subyektlar uchun hisobvaraq-fakturalarni elektron shaklda rasmiylashtirish, saqlash va hisobini yuritish tizimini majburiy tartibda joriy etish;
Davlat soliq qoʻmitasi huzuridagi “Yangi texnologiyalar” ilmiy axborot markazi” davlat unitar korxonasini elektron hisobvaraq-fakturalarni markazlashtirilgan holda saqlash, operatorlararo uzatish va hisobini yuritish boʻyicha vakolatli rouming operatori etib belgilash toʻgʻrisidagi takliflariga rozilik berilsin.
3. Quyidagilar:
Oʻzaro hisob-kitoblar tizimida elektron shakldagi hisobvaraq-fakturalardan foydalanish tartibi toʻgʻrisidagi nizom 1-ilovaga muvofiq;
Oʻzbekiston Respublikasi Davlat soliq qoʻmitasining integratsiyalashtirilgan yagona axborot-resurs bazasining hisoblash quvvatini kengaytirish uchun zarur server va telekommunikatsiya qurilmalari roʻyxati 2-ilovaga muvofiq tasdiqlansin.
4. Oʻzbekiston Respublikasi Moliya vazirligi 2-ilovada koʻrsatilgan qurilmalarni xarid qilish bilan bogʻliq mablagʻlarni Oʻzbekiston Respublikasi Vazirlar Mahkamasining zaxira jamgʻarmasi hisobidan moliyalashtirsin.
5. Oʻzbekiston Respublikasi Davlat soliq qoʻmitasi Oʻzbekiston Milliy axborot agentligi, Oʻzbekiston Milliy teleradiokompaniyasi, Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi bilan birgalikda mazkur qarorning mazmun-mohiyatini ommaviy axborot vositalarida muntazam va keng yoritsin.
6. Oʻzbekiston Respublikasi Davlat soliq qoʻmitasi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Oʻzbekiston Respublikasi Davlat soliq qoʻmitasining raisi B.A. Musayev zimmasiga yuklansin.
Vazirlar Mahkamasining 2019-yil 25-iyundagi 522-son qaroriga 1-ILOVA
Oʻzaro hisob-kitoblar tizimida elektron shakldagi hisobvaraq-fakturalardan foydalanish tartibi toʻgʻrisida
1-bob. Umumiy qoidalar
1. Ushbu Nizom elektron hisobvaraq-faktura aylanish tizimida tovarlarni (ishlar, xizmatlarni) sotuvchi va sotib oluvchi yuridik va jismoniy shaxslar, rouming operatori, operatorlar va vakolatli davlat organlarining elektron hisobvaraq-fakturalarni taqdim etish, qabul qilish, saqlash va ulardan foydalanish doirasidagi oʻzaro munosabatlari tartibini belgilaydi.
2. Ushbu Nizomda quyidagi tushunchalar qoʻllaniladi:
elektron hisobvaraq-faktura (keyingi oʻrinlarda EHF deb ataladi) — tovarlarni (ishlar, xizmatlarni) realizatsiya qilish va sotib olishni tasdiqlaydigan, EHF aylanish tizimi operatorlari orqali taqdim etiladigan va qabul qilinadigan, qonunchilik hujjatlariga muvofiq belgilangan shakllarda rasmiylashtirilgan elektron hujjat;
elektron hisobvaraq-faktura aylanish tizimi operatori (keyingi oʻrinlarda operator deb ataladi) — qonunchilik hujjatlarida va ushbu Nizomda belgilangan talablarni bajargan EHFlarning aylanishi va ularni saqlash faoliyati bilan shugʻullanishga ruxsat etilgan yuridik shaxs maqomiga ega axborot vositachisi;
rouming operatori — EHFlarning markazlashtirilgan holda saqlanishi, operatorlararo uzatilishi va hisobi yuritilishini taʼminlaydigan yuridik shaxs;
elektron hisobvaraq-faktura identifikatori — EHFni masofadan identifikatsiya qilish imkonini beruvchi rouming operatorining axborot tizimi tomonidan avtomatik ravishda belgilanadigan EHFning oʻziga xos raqami;
elektron hisobvaraq-faktura aylanish tizimining ishtirokchilari (keyingi oʻrinlarda ishtirokchilar deb ataladi) — EHF aylanish tizimida tovarlarni (ishlar, xizmatlarni) sotuvchi va sotib oluvchi yuridik va jismoniy shaxslar, shuningdek, tovar-transport yuk xati subyektlari;
QR-kod — tasdiqlangan EHFga biriktiriladigan va hujjat qogʻoz shaklida chop etilganda koʻrsatiladigan, mobil ilovalar va dasturiy mahsulotlar orqali oʻqish (skanerlash) vaqtida EHF haqida barcha maʼlumotlarga havola boʻladigan maxsus grafik kod.
3. Ushbu Nizom talablari:
yoʻlovchilar tashishni yoʻl chiptalari bilan rasmiylashtirishga (shu jumladan avia va temir yoʻllarda);
tovarlar (ishlar, xizmatlar) naqd pulda realizatsiya qilingan hollarda sotib oluvchiga fiskal xotirali nazorat-kassa mashinasi cheki, terminal cheki, kvitansiya berishga;
tovarlarning eksport-import tarzida yetkazib berilishini rasmiylashtirishga;
qabul qilib olish-topshirish dalolatnomasi rasmiylashtiriladigan moliyaviy ijara (shu jumladan lizing) shartnomasi boʻyicha mol-mulkni topshirishga, Oʻzbekiston Respublikasi Soliq kodeksi 204-moddasining sakkizinchi qismiga muvofiq qoʻshilgan qiymat soligʻini toʻlash majburiyatlari yuzaga keladigan hollar bundan mustasno. Bunda tegishli hujjatlar (moliyaviy ijara shartnomasining tarkibiy qismi boʻlgan ijara (lizing) toʻlovlari jadvali; hisobvaraq; ijaraga (lizingga) oluvchiga ijara (lizing) toʻlovlarini toʻlash uchun yuborilgan yozma bildirish va shu kabilar) bilan rasmiylashtirilgan har bir ijara (lizing) toʻloviga hisobvaraq-faktura yozilmaydi;
bank operatsiyalarini mijozning shaxsiy hisobvaragʻidan koʻchirma berish orqali rasmiylashtirishga tatbiq etilmaydi.
4. EHFlarni yuborish va qabul qilish telekommunikatsiya aloqa kanallari orqali operatorlarning axborot tizimlari yordamida amalga oshiriladi.
EHFlar almashinuvi elektron raqamli imzolar bilan tasdiqlash orqali amalga oshiriladi.
5. EHFlarni shakllantirish, yuborish, tasdiqlash va saqlash boʻyicha xizmatlar koʻrsatish, shuningdek, xoʻjalik yurituvchi subyekt va operator oʻrtasida tuzilgan shartnoma (ommaviy oferta) asosida amalga oshiriladi.
2-bob. Operatorlarning vazifalari va majburiyatlari
6. Quyidagilar operatorning vazifalari hisoblanadi:
oʻz axborot tizimini rouming operatorining axborot tizimiga bogʻlash;
EHFlarga xizmat koʻrsatuvchi dasturiy-apparat majmuasining uzluksiz ishlashini taʼminlash, shuningdek, ishtirokchilar uchun doimiy foydalanish imkoniyatini yaratish;
oʻz tizimi orqali rouming operatori tomonidan ishlab chiqilgan formatdagi EHFlarni yuborish.
EHFga oid faqat ID raqami, sotuvchi, xaridor, sana va vaqti toʻgʻrisidagi maʼlumotlarni oʻzida saqlash hamda toʻliq maʼlumotlarni Rouming operatoriga uzatish.
7. Operatorning dasturiy-apparat majmualarini sertifikatlash qonunchilik hujjatlarida belgilangan tartibda amalga oshiriladi.
8. Operator:
telekommunikatsiya tarmoqlaridan foydalanish va ularga xizmat koʻrsatish boʻyicha faoliyatni amalga oshirish uchun litsenziyaga;
EHFlarni saqlash uchun sertifikatlangan apparat vositalari oʻrnatilgan egalik yoki ijara huquqi asosida Oʻzbekiston Respublikasi hududida joylashgan koʻchmas mulk obyektlariga (binolar, inshootlar, xonalarga);
EHFlarni shakllantirish, yuborish, qabul qilish va saqlash imkoniyatini beradigan axborot tizimiga;
call-markaziga va axborot texnologiyalari, moliya, soliq yoki buxgalteriya sohalarida oliy maʼlumot hamda kamida 3 yillik ish tajribasiga ega boʻlgan kamida bir nafar mutaxassisga ega boʻlishi lozim.
Operator ushbu bandda belgilangan talablar toʻliq bajarilgandan keyin oʻz faoliyatini amalga oshirishi mumkin.
9. Operator oʻzining maʼlumotlar bazasida ishtirokchilarning shaxsiy maʼlumotlari himoya qilinishi hamda EHFlar konfidensialligini taʼminlashi shart, qonunchilik hujjatlarida belgilangan holatlar bundan mustasno.
3-bob. Rouming operatorining vazifalari
10. Quyidagilar rouming operatorining vazifalarni hisoblanadi:
EHFlarning operatorlar oʻrtasida almashinishi, markazlashtirilgan holda saqlanishi, hisobi yuritilishi, Oʻzbekiston Respublikasi Davlat soliq qoʻmitasining axborot tizimlariga uzatilishini hamda dasturiy-apparat majmuasining uzluksiz va xavfsiz ishlashini taʼminlash;
EHF aylanish tizimi doirasida operatorlar bilan oʻzaro munosabatlarni tartibga soladigan shartnomada rouming operatori tomonidan operatorning axborot tizimiga bogʻlanish uchun berilgan roʻyxatga olish maʼlumotlarini (operator identifikatori, login va parolni) koʻrsatish;
ishtirokchilarning shaxsiy maʼlumotlari himoya qilinishini hamda tasdiqlangan EHFlarning kamida 10 yil davomida saqlanishini taʼminlash;
EHFning haqqoniyligini QR-kod orqali tekshirish imkonini beradigan, ulangan barcha operatorlar toʻgʻrisidagi maʼlumotlar hamda operatorlar bilan maʼlumotlar almashish texnik protokoli joylashtirilgan global internet tarmogʻidagi rasmiy veb-saytni yuritish;
qonunchilik hujjatlarida belgilangan tartibda vakolatli organlarning yozma soʻroviga asosan saqlanayotgan maʼlumotlar toʻgʻrisida axborot berish;
operatorlarda EHF ga oid faqat ID raqami, sotuvchi, xaridor, sana va vaqt toʻgʻrisidagi maʼlumotlar saqlanishini nazorat qilish hamda oʻz axborot tizimida EHF ga oid toʻliq maʼlumotlar saqlanishini taʼminlash.
4-bob. Elektron hisobvaraq-faktura aylanish tizimi ishtirokchilarining huquq va majburiyatlari
11. Ishtirokchilar quyidagi huquqlarga ega:
oʻz xohishiga koʻra operatorni erkin tanlash;
EHF aylanish tizimida hisobvaraq-fakturalarni shakllantirish yoʻli bilan tovarlarni (ishlar, xizmatlarni) realizatsiya yoki xarid qilish;
EHF aylanish tizimidan foydalanish boʻyicha tegishli yoʻriqnomalar bilan tanishish va amaliy yordamlar olish;
EHF aylanish tizimidagi nosozliklar boʻyicha xizmat koʻrsatuvchi operatorga murojaat qilish.
12. Ishtirokchilar quyidagilarga majbur:
EHF aylanish tizimi orqali tovarlarni (ishlar, xizmatlarni) realizatsiya qilishda raqobat va isteʼmolchilarning huquqlarini himoya qilish toʻgʻrisidagi qonunchilik hujjatlari talablariga rioya etish;
operatorning ommaviy ofertasida koʻrsatilgan shartlarni bajarish;
EHFlar va elektron xabarlarni operatorga saqlash uchun topshirish;
EHF aylanish tizimida ishtirok etish maqsadida ishlab turgan axborot resurslarida EHFlarni joylashtirish;
qonunchilik hujjatlariga muvofiq EHFlarning saqlanishini taʼminlash;
elektron tijorat sohasidagi standartlar, norma va qoidalarga rioya etish.
5-bob. Elektron hisobvaraq-fakturalarni rasmiylashtirish tartibi
13. EHFlarni shakllantirish, yuborish, tasdiqlash va ulardan foydalanish tartibi ushbu Nizomga ilovaga muvofiq sxemaga asosan amalga oshiriladi, tovar-moddiy boyliklar yuklab joʻnatish bilan bir vaqtda realizatsiya qilinganda rasmiylashtiriladigan EHF bundan mustasno.
13 1 . Tovar-moddiy boyliklar yuklab joʻnatish bilan bir vaqtda realizatsiya qilinganda, elektron hisobvaraq-faktura elektron tovar-transport yuk xati bilan birlashtirilgan holda rasmiylashtirilishi mumkin.
14. Tovarlarni (ishlar, xizmatlarni) sotuvchi tomonidan maxsus dasturiy mahsulot orqali EHF shakllantiriladi hamda sotib oluvchi toʻgʻrisidagi maʼlumotlar koʻrsatilgan holda elektron raqamli imzo bilan tasdiqlanib operator orqali rouming operatoriga yuboriladi.
15. Kelib tushgan EHF rouming operatori tomonidan ushbu Nizom talablariga muvofiqligi tekshirilib, sotib oluvchiga uning operatori orqali yetkaziladi va EHF maxsus dasturiy mahsulotda “yetkazilgan” maqomiga oʻtkaziladi.
Quyidagi holatlar mavjud boʻlganda, rouming operatori tomonidan EHF qabul qilinmaydi va hujjat kelib tushgan kundan kechiktirmasdan tegishli operator orqali uni shakllantirgan tovarlarni (ishlar, xizmatlarni) sotuvchiga qaytaradi:
EHFni rasmiylashtirishda mazkur nizom talablariga amal qilinmagan boʻlsa;
EHFga maʼlumotlar va rekvizitlar toʻliq kiritilmagan yoki xatolar bilan toʻldirilgan boʻlsa;
haqiqiy boʻlmagan elektron raqamli imzodan foydalangan hollarda;
soliq tekshiruvini oʻtkazayotgan soliq organidan tovar-moddiy boyliklar inventarizatsiyadan oʻtkazilishi munosabati bilan maʼlum bir muddatga rasmiylashtiriladigan elektron hisobvaraq-fakturalarni qabul qilish va yetkazish funksiyalarini vaqtincha toʻxtatib turish zaruriyati vujudga kelganligi toʻgʻrisida murojaat kelib tushgan boʻlsa.
16. Kelib tushgan EHF sotib oluvchi tomonidan elektron raqamli imzo bilan tasdiqlanadi yoki sababi koʻrsatilgan holda rad etiladi. Bunda EHF “yetkazilgan”dan “rad etilgan” maqomiga oʻzgaradi.
17. Sotib oluvchi tasdiqlagan EHF operator tomonidan rouming operatori orqali tovarlarni (ishlar, xizmatlarni) sotuvchiga yuboriladi. Bunda EHF maqomi avtomatik ravishda “yetkazilgan”dan “tasdiqlangan” maqomiga oʻzgaradi. Shu paytdan boshlab EHF ikki tomonlama tasdiqlangan hisoblanadi va rouming operatori tomonidan EHFga QR-kod biriktiriladi.
18. Tovarlarni (ishlar, xizmatlarni) tadbirkorlik faoliyati bilan shugʻullanmaydigan jismoniy shaxslarga realizatsiya qilishda tovarlarni (ishlar, xizmatlarni) sotuvchi tomonidan shakllantirilgan EHF uning elektron raqamli imzosi bilan bir tomonlama tasdiqlanadi.
19. Mazkur bobda qayd etilgan jarayonlar rouming operatori va operatorlar tomonidan avtomatlashtirilgan tarzda va real vaqt rejimida amalga oshiriladi.
6-bob. Yakunlovchi qoidalar
20. Vakolatli davlat organlari ushbu Nizom talablariga rioya etilishi yuzasidan qonunchilik hujjatlariga muvofiq nazoratni amalga oshiradilar.
21. Ushbu Nizom talablarini buzgan shaxslar qonunchilik hujjatlarida belgilangan tartibda javob beradilar.
Oʻzaro hisob-kitoblar tizimida elektron shakldagi hisobvaraq-fakturalardan foydalanish tartibi toʻgʻrisidagi nizomga ILOVA
Elektron hisobvaraq-fakturalarni shakllantirish, yuborish, tasdiqlash va ulardan foydalanish
Bosqichlar Subyektlar Tadbirlar Ijro muddati 1-bosqich Tovarlarni (ishlar, xizmatlarni) sotuvchi EHFni shakllantirish hamda sotib oluvchi toʻgʻrisidagi maʼlumotlar koʻrsatilgan holda elektron raqamli imzo bilan tasdiqlanib operator orqali rouming operatoriga yuborish. Real vaqt rejimida 2-bosqich Rouming operatori 1. Kelib tushgan EHF ushbu Nizom talablariga muvofiqligi tekshirilib, sotib oluvchiga uning operatori orqali yetkazish; 2. Toʻldirilishida xatolar yoki kamchiliklar mavjudligi aniqlangan EHF qabul qilmasdan tegishli operator orqali uni shakllantirgan tovarlarni (ishlar, xizmatlarni) yetkazib beruvchiga qaytarish. Real vaqt rejimida 3-bosqich Tovarlarni (ishlar, xizmatlarni) sotib oluvchi Kelib tushgan EHFni elektron raqamli imzo bilan tasdiqlash yoki sababi koʻrsatilgan holda rad etish. Ixtiyoriy muddatda 4-bosqich Elektron hisobvaraq-faktura aylanish tizimi operatori Tovarlarni sotib oluvchi tasdiqlagan EHFni rouming operatori orqali tovarlarni yetkazib beruvchiga yuborish. EHF tovarlarni sotib oluvchi tomonidan tasdiqlangandan keyin r yeal vaqt rejimida 5-bosqich Rouming operatori EHF tovarlarni sotib oluvchi tomonidan tasdiqlangandan keyin unga QR-kod biriktirish. Real vaqt rejimida
Vazirlar Mahkamasining 2019-yil 25-iyundagi 522-son qaroriga 2-ILOVA
Davlat soliq qoʻmitasining integratsiyalashtirilgan yagona axborot-resurs bazasining hisoblash quvvatini kengaytirish uchun zarur server va telekommunikatsiya qurilmalari
AQSH dollarida Qurilma nomi Minimal texnik talablar Narxi Soni (dona) Umumiy qiymati Server qurilmalari Base Server (3 years warranty) inc: Processor — 2.4-3.7 GNz 20-core with 27.5 MB L3 Cache; 16x16GB Single Rank x4 DDR4-2666 CAS-19-19-19 Registered Smart Memory Kit; 2x6.4TB SAS 12G Mixed Use SFF (2.5in) SC 3yr Wty Digitally Signed Firmware SSD; Ethernet 2x10Gb 2-port 535T Adapter; 4x1600W Power Supply. 68 275,0 16 1 094 400,0 Tarmoq qurilmalari Network Switch (3 years warranty) — 8qty , inc: 48 1G/10GBase-T and 4 QSFP+-ports; dual hot-pluggable power supplies; 2x650W AC Power Supply; 2xNV Fan Tray. 40G QSFP+ LC LR4 SM Transceiver 10 km — 6qty; QSFP+ 4x10G SFP+ 3m DAC Cable — 10qty; 650W AC Power Supply — 1qty 288 306,0 1 288 306,0 Axborotlar xavfsizligini taʼminlash qurilmalari Threat-focused next-generation firewall bundle -(2qty), inc: Interfaces: 8 GE copper; Expansion slot — 1 interface card; Throughput: Stateful inspection throughput — 2 Gbps; (3DES/AES) VP N throughput — 300 Mbps; Application Control (AVC)- 1,100 Mbps; Application Control (AVC) and IPS — 650 Mbps; Maximum concurrent sessions — 500,000; Maximum N ew Connections per second — 20,000; IPsec site-to-site VP N peers — 750; Users/nodes: Unlimited; Nigh availability: Active/Active and Active/Standby. IPS and URL 3YR Subs — 2 qty 48 575,2 1 48 575,0 Displey qurilmasi Professional Series 46” Direct-Lit LED Display — 9qty; FUSIO N ™ 3 x 3 Micro-Adjustable Large Bolt-Down Freestanding Video Wall — 1qty; UTP 5e cat. patch cord, 3m — 10qty; PDU with control function (type SNT) with 6xSchuko Sockets and 1xSchuko plug — 2qty; C-DPM/DPM-10 DisplayPort (M) to DisplayPort (M) Cable, 3m — 8qty; C-DPM/NM-10 DisplayPort (M) to NDMI (M) Cable, 3m, for Mini PC — 1qty; Mini PC — 1qty, inc: Enterprise Licensed 64-bit OS; Quad-core processor with 6Mb L3 cache, 14-nm process; RAM 8 GB; 256 GB SSD storage; Integrated Graphic Card (Core Speed 350 — 1150 (Boost) MNz, Memory Bus Width 64/128 Bit). Fixed Port Web Managed Ethernet Switch — 1qty 41 530,0 1 41 530,0 Jami: 1 470 811,0
Oʻzbekiston Respublikasining Bosh vaziri A. ARIPOV
Toshkent sh.,
2019-yil 25-iyun,
522-son