📅 2019-yil 30-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 30 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 июня 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 30 June 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сирдарё вилоятида Бизнес-акселератор ўқув-амалий маркази фаолиятини ташкил этиш тўғрисида
Ёшларда муҳандислик кўникмаларини шакллантириш ва инновацион фаолиятга бўлган қизиқишни уйғотиш, уларни иш билан таъминлаш, шунингдек, ҳудуднинг ижтимоий ҳолатини яхшилаш мақсадида Вазирлар Маҳкамаси қарор қилади:
1. Ўзбекистон Республикаси Инновацион ривожланиш вазирлиги, Савдо-саноат палатаси ва Сирдарё вилояти ҳокимлигининг Ўзбекистон Республикаси Инновацион ривожланиш вазирлиги ҳузуридаги Инновацияларни жорий қилиш ва технологиялар трансфери миллий офиси муассислигида масъулияти чекланган жамият шаклида «Бизнес-акселератор ўқув-амалий маркази»ни (кейинги ўринларда — Марказ) ташкил этиш тўғрисидаги таклифига розилик берилсин.
2. Қуйидагилар Марказнинг асосий вазифалари этиб белгилансин:
юқори малакали мутахассисларни жалб қилиш ҳамда таълим жараёнига замонавий ахборот ва инновацион-педагогик технологияларни кенг жорий этиш орқали замонавий ахборот ва инновацион технологиялар бўйича ўқув курсларини ташкил этиш;
ёшларнинг индивидуал хусусиятларини ҳисобга олган ҳолда уларда мустақил тадқиқотчилик ва тадбиркорлик фаолияти кўникмаларини шакллантириш ва уни ривожлантириш, шунингдек, инновацион ишланмаларни рағбатлантириш;
ёшларда бизнес ғояларини шакллантириш, уни амалга ошириш ва юритиш қоидаларини ўргатиш, самарали бизнес режаларни ишлаб чиқиш кўникмаларини шакллантириш;
Сирдарё вилоятида кичик тадбиркорлик субъектларини ташкил этишга кўмаклашиш, уларга маркетинг билимларини ўргатиш ҳамда кичик тадбиркорлик фаолиятини амалга оширишда венчур фондларини жалб қилишда амалий ёрдам бериш;
ёш тадбиркорларга ўз бизнесини самарали йўлга қўйиш орқали қўшимча иш ўринларини яратишга кўмаклашиш;
ўқув курсларини тамомлаган ёшларга тадбиркорлик фаолиятини йўлга қўйиш учун инвесторларни жалб қилишга кўмаклашиш, уларнинг фаолиятини қўллаб-қувватлаш;
мактабгача таълим муассасалари тарбияланувчиларида ихтирочилик ва новаторлик ғояларини шакллантириш ва ривожлантириш;
юқори технологик маҳсулотлар ишлаб чиқариш, хизматлар кўрсатиш узлуксизлигини таъминлаш мақсадида илмий, илмий-тадқиқот, таълим ва ишлаб чиқариш ташкилотларини ўзаро интеграциясига кўмаклашиш.
3. Ўзбекистон Республикаси Олий ва ўрта махсус таълим вазирлиги Марказни жойлаштириш ва фаолиятини ташкил этиш учун Сирдарё вилояти, Сирдарё шаҳри, Ўзбекистон кўчаси, 86-уй манзилида жойлашган Сирдарё педагогика коллежига қарашли бўлган 1 ва 2-сон талабалар ётоқхонаси биноларини Инновацион ривожланиш вазирлиги ҳузуридаги Инновацион ишланмаларни жорий этиш илмий-амалий марказига оператив бошқарув ҳуқуқи асосида берсин.
4. Марказ фаолиятини молиялаштириш манбалари этиб қуйидагилар белгилансин:
шартнома асосида кўрсатиладиган хизматлардан олинадиган даромадлар;
халқаро молия ва бошқа институтлар кредитлари, хорижий ташкилотларнинг грантлари;
жисмоний ва юридик шахслар, шу жумладан Ўзбекистон Республикаси норезидентларининг ҳомийлик хайриялари;
қонунчилик ҳужжатларида тақиқланмаган бошқа манбалар.
Марказнинг хўжалик фаолиятидан тушадиган даромадларини ҳисобга олган ҳолда Инновацияларни жорий қилиш ва технологиялар трансфери миллий офисининг бюджетдан ташқари маблағлари.
5. Ўзбекистон Республикаси Инновацион ривожланиш вазирлиги икки ҳафта муддатда Марказнинг бино ва иншоотларини қурилиш ва қайта таъмирлаш бўйича асосланган ҳисоб-китобларни Сирдарё вилояти ҳокимлигига тегишли ишларни ташкил қилиш учун тақдим этсин.
6. Марказнинг бино ва иншоотларини қурилиш ва қайта таъмирлашда:
Сирдарё вилояти ҳокимлигининг қурилиш бўйича Ягона буюртмачи хизмати инжиниринг компанияси — буюртмачи;
«Mubina SA Nargiza» МЧЖ — пудратчи этиб белгилансин.
7. Белгилансинки, Марказ бино ва иншоотларини қурилиш, қайта таъмирлаш ва унинг моддий-техника базасини мустаҳкамлаш билан боғлиқ харажатлар қуйидаги манбалар ҳисобидан қопланади:
Инновацион ривожланиш ва новаторлик ғояларини қўллаб-қувватлаш жамғармаси маблағлари;
Ўзбекистон Республикаси Инновацион ривожланиш вазирлиги ҳузуридаги Инновацион ишланмаларни жорий этиш илмий-амалий марказининг бюджетдан ташқари маблағлари;
қонунчилик ҳужжатларида тақиқланмаган бошқа маблағлар.
Марказни зарур моддий-техника базаси билан, шунингдек, мактабгача таълим муассасалари тарбияланувчилари учун болалар инновацион технопаркини зарур жиҳозлар ва робототехника тўпламлари билан таъминлаш харажатлари Инновацион ривожланиш ва новаторлик ғояларини қўллаб-қувватлаш жамғармаси маблағлари ҳисобидан қопланади.
8. Ўзбекистон Республикаси Молия вазирлиги Инновацион ривожланиш вазирлиги ҳузуридаги Инновацион ишланмаларни жорий этиш илмий-амалий марказига битта енгил хизмат автомашинаси учун лимит ажратсин.
9. Ўзбекистон Республикаси Инновацион ривожланиш вазирлиги Марказ уставини бир ой муддатда белгиланган тартибда тасдиқланишини таъминласин.
10. Мазкур қарорнинг бажарилишини назорат қилиш Ўзбекистон Республикаси инновацион ривожланиш вазири И.Ю. Абдурахмонов зиммасига ва Вазирлар Маҳкамасининг Телекоммуникациялар, IT-технологиялар ва инновацион фаолиятни ривожлантириш, ахборот хавфсизлигини таъминлаш масалалари котибиятига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 30 июнь,
545-сон
Oʻzbekiston Respublikasi Vazirlar Mahkamasining
qarori
Sirdaryo viloyatida Biznes-akselerator oʻquv-amaliy markazi faoliyatini tashkil etish toʻgʻrisida
Yoshlarda muhandislik koʻnikmalarini shakllantirish va innovatsion faoliyatga boʻlgan qiziqishni uygʻotish, ularni ish bilan taʼminlash, shuningdek, hududning ijtimoiy holatini yaxshilash maqsadida Vazirlar Mahkamasi qaror qiladi:
1. Oʻzbekiston Respublikasi Innovatsion rivojlanish vazirligi, Savdo-sanoat palatasi va Sirdaryo viloyati hokimligining Oʻzbekiston Respublikasi Innovatsion rivojlanish vazirligi huzuridagi Innovatsiyalarni joriy qilish va texnologiyalar transferi milliy ofisi muassisligida masʼuliyati cheklangan jamiyat shaklida “Biznes-akselerator oʻquv-amaliy markazi”ni (keyingi oʻrinlarda — Markaz) tashkil etish toʻgʻrisidagi taklifiga rozilik berilsin.
2. Quyidagilar Markazning asosiy vazifalari etib belgilansin:
yuqori malakali mutaxassislarni jalb qilish hamda taʼlim jarayoniga zamonaviy axborot va innovatsion-pedagogik texnologiyalarni keng joriy etish orqali zamonaviy axborot va innovatsion texnologiyalar boʻyicha oʻquv kurslarini tashkil etish;
yoshlarning individual xususiyatlarini hisobga olgan holda ularda mustaqil tadqiqotchilik va tadbirkorlik faoliyati koʻnikmalarini shakllantirish va uni rivojlantirish, shuningdek, innovatsion ishlanmalarni ragʻbatlantirish;
yoshlarda biznes gʻoyalarini shakllantirish, uni amalga oshirish va yuritish qoidalarini oʻrgatish, samarali biznes rejalarni ishlab chiqish koʻnikmalarini shakllantirish;
Sirdaryo viloyatida kichik tadbirkorlik subyektlarini tashkil etishga koʻmaklashish, ularga marketing bilimlarini oʻrgatish hamda kichik tadbirkorlik faoliyatini amalga oshirishda venchur fondlarini jalb qilishda amaliy yordam berish;
yosh tadbirkorlarga oʻz biznesini samarali yoʻlga qoʻyish orqali qoʻshimcha ish oʻrinlarini yaratishga koʻmaklashish;
oʻquv kurslarini tamomlagan yoshlarga tadbirkorlik faoliyatini yoʻlga qoʻyish uchun investorlarni jalb qilishga koʻmaklashish, ularning faoliyatini qoʻllab-quvvatlash;
maktabgacha taʼlim muassasalari tarbiyalanuvchilarida ixtirochilik va novatorlik gʻoyalarini shakllantirish va rivojlantirish;
yuqori texnologik mahsulotlar ishlab chiqarish, xizmatlar koʻrsatish uzluksizligini taʼminlash maqsadida ilmiy, ilmiy-tadqiqot, taʼlim va ishlab chiqarish tashkilotlarini oʻzaro integratsiyasiga koʻmaklashish.
3. Oʻzbekiston Respublikasi Oliy va oʻrta maxsus taʼlim vazirligi Markazni joylashtirish va faoliyatini tashkil etish uchun Sirdaryo viloyati, Sirdaryo shahri, Oʻzbekiston koʻchasi, 86-uy manzilida joylashgan Sirdaryo pedagogika kollejiga qarashli boʻlgan 1 va 2-son talabalar yotoqxonasi binolarini Innovatsion rivojlanish vazirligi huzuridagi Innovatsion ishlanmalarni joriy etish ilmiy-amaliy markaziga operativ boshqaruv huquqi asosida bersin.
4. Markaz faoliyatini moliyalashtirish manbalari etib quyidagilar belgilansin:
shartnoma asosida koʻrsatiladigan xizmatlardan olinadigan daromadlar;
xalqaro moliya va boshqa institutlar kreditlari, xorijiy tashkilotlarning grantlari;
jismoniy va yuridik shaxslar, shu jumladan Oʻzbekiston Respublikasi norezidentlarining homiylik xayriyalari;
qonunchilik hujjatlarida taqiqlanmagan boshqa manbalar.
Markazning xoʻjalik faoliyatidan tushadigan daromadlarini hisobga olgan holda Innovatsiyalarni joriy qilish va texnologiyalar transferi milliy ofisining budjetdan tashqari mablagʻlari.
5. Oʻzbekiston Respublikasi Innovatsion rivojlanish vazirligi ikki hafta muddatda Markazning bino va inshootlarini qurilish va qayta taʼmirlash boʻyicha asoslangan hisob-kitoblarni Sirdaryo viloyati hokimligiga tegishli ishlarni tashkil qilish uchun taqdim etsin.
6. Markazning bino va inshootlarini qurilish va qayta taʼmirlashda:
Sirdaryo viloyati hokimligining qurilish boʻyicha Yagona buyurtmachi xizmati injiniring kompaniyasi — buyurtmachi;
“Mubina SA Nargiza” MChJ — pudratchi etib belgilansin.
7. Belgilansinki, Markaz bino va inshootlarini qurilish, qayta taʼmirlash va uning moddiy-texnika bazasini mustahkamlash bilan bogʻliq xarajatlar quyidagi manbalar hisobidan qoplanadi:
Innovatsion rivojlanish va novatorlik gʻoyalarini qoʻllab-quvvatlash jamgʻarmasi mablagʻlari;
Oʻzbekiston Respublikasi Innovatsion rivojlanish vazirligi huzuridagi Innovatsion ishlanmalarni joriy etish ilmiy-amaliy markazining budjetdan tashqari mablagʻlari;
qonunchilik hujjatlarida taqiqlanmagan boshqa mablagʻlar.
Markazni zarur moddiy-texnika bazasi bilan, shuningdek, maktabgacha taʼlim muassasalari tarbiyalanuvchilari uchun bolalar innovatsion texnoparkini zarur jihozlar va robototexnika toʻplamlari bilan taʼminlash xarajatlari Innovatsion rivojlanish va novatorlik gʻoyalarini qoʻllab-quvvatlash jamgʻarmasi mablagʻlari hisobidan qoplanadi.
8. Oʻzbekiston Respublikasi Moliya vazirligi Innovatsion rivojlanish vazirligi huzuridagi Innovatsion ishlanmalarni joriy etish ilmiy-amaliy markaziga bitta yengil xizmat avtomashinasi uchun limit ajratsin.
9. Oʻzbekiston Respublikasi Innovatsion rivojlanish vazirligi Markaz ustavini bir oy muddatda belgilangan tartibda tasdiqlanishini taʼminlasin.
10. Mazkur qarorning bajarilishini nazorat qilish Oʻzbekiston Respublikasi innovatsion rivojlanish vaziri I.Y. Abduraxmonov zimmasiga va Vazirlar Mahkamasining Telekommunikatsiyalar, IT-texnologiyalar va innovatsion faoliyatni rivojlantirish, axborot xavfsizligini taʼminlash masalalari kotibiyatiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 30-iyun,
545-son