📅 2019-yil 22-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 22 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 22 июля 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 22 July 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон касаба уюшмалари федерациясининг моддий-техник базасини мустаҳкамлаш тўғрисида
Ўзбекистон касаба уюшмалари федерациясининг моддий-техник базасини мустаҳкамлаш ва Наманган вилоятини ижтимоий-иқтисодий ривожлантириш, аҳолининг турмуш даражасини яхшилаш ҳамда соғломлаштириш тизимини янада такомиллаштириш мақсадида Вазирлар Маҳкамаси қарор қилади:
1. Ўзбекистон касаба уюшмалари федерацияси, Миллий олимпия қўмитаси, Ўзбекистон Республикаси Давлат активларини бошқариш агентлиги ва Наманган вилояти ҳокимлигининг Наманган вилояти, Чортоқ туманидаги Ўзбекистон касаба уюшмалари федерацияси «Чортоқ санаторийси» масъулияти чекланган жамияти ҳудудида жойлашган Ўзбекистон Миллий олимпия қўмитасига беғараз муддатсиз фойдаланиш ҳуқуқи асосида берилган спорт ўйинлари бўйича олимпия тайёргарлиги маркази (собиқ сержантларни тайёрлаш мактаби) давлат мулки объектлари ҳисобланган бино ва иншоотларини (кейинги ўринларда объект деб аталади) Ўзбекистон касаба уюшмалари федерациясига текин фойдаланиш ҳуқуқи асосида бериш тўғрисидаги таклифи маъқуллансин.
Ўзбекистон касаба уюшмалари федерациясига объектни кейинчалик «Чортоқ санаторийси» масъулияти чекланган жамияти ҳамда бошқа жисмоний ва юридик шахсларга мақсадли фойдаланиш ва хўжалик фаолияти юритиш учун, истисно тариқасида, текин фойдаланиш ҳуқуқи асосида беришга рухсат берилсин.
2. Ўзбекистон Миллий олимпия қўмитаси объектни бир ой муддатда белгиланган тартибда топширсин, Ўзбекистон касаба уюшмалари федерацияси қабул қилиб олсин ҳамда ундан самарали фойдаланишни ташкил қилсин.
3. Объектни реконструкция қилиш, ётоқхона ва даволаш бинолари қуриш, замонавий жиҳозлаш ҳамда унинг ҳудудини ободонлаштириш ва кўкаламзорлаштириш ишларини бажариш бўйича:
Ўзбекистон касаба уюшмалари федерацияси кенгашининг Капитал қурилиш бошқармаси — буюртмачи этиб белгилансин;
бош лойиҳа ва бош пудратчи ташкилот белгиланган тартибда тендер (танлов) савдолари натижасида аниқлансин.
4. Ўзбекистон касаба уюшмалари федерациясига 2022 йил 1 январга қадар Ўзбекистон Республикаси Президентининг «Ўзбекистон Республикасининг 2019 йилги асосий макроиқтисодий кўрсаткичлари прогнози ва Давлат бюджети параметрлари ҳамда 2020-2021 йилларга бюджет мўлжаллари тўғрисида» 2018 йил 26 декабрдаги ПҚ-4086-сон қарорига асосан ягона солиқ тўловларидан Ўзбекистон касаба уюшмалари федерациясига ажратилаётган маблағлар ҳамда қонун ҳужжатлари билан тақиқланмаган бошқа манбалар ҳисобидан объектда қурилиш, реконструкция қилиш, таъмирлаш ва жиҳозлаш ишларини амалга ошириш ҳамда объектни фойдаланишга топшириш тавсия этилсин.
5. «Ҳудудий электр тармоқлари» акциядорлик жамияти ва «Ўзтрансгаз» акциядорлик жамиятининг ўз маблағлари ҳисобидан лойиҳа қувватларига мувофиқ объектда муҳандислик-коммуникация тармоқларини белгиланган тартибда ўтказиш тўғрисидаги таклифи маъқуллансин.
6. Ўзбекистон Республикаси Транспорт вазирлиги ҳузуридаги Автомобиль йўллари қўмитаси ўз маблағлари ҳисобидан Наманган вилояти, Чортоқ тумани марказидан объектгача бўлган масофадаги йўлни таъмирлаш ишларини амалга оширсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдуҳакимов зиммасига ҳамда Вазирлар Маҳкамасининг Ёшлар сиёсати, маданият, маънавият, оммавий ахборот воситалари, ижодий ва жамоат ташкилотлари масалалари котибиятига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 22 июль,
615-сон
Oʻzbekiston Respublikasi Vazirlar Mahkamasining
qarori
Oʻzbekiston kasaba uyushmalari federatsiyasining moddiy-texnik bazasini mustahkamlash toʻgʻrisida
Oʻzbekiston kasaba uyushmalari federatsiyasining moddiy-texnik bazasini mustahkamlash va Namangan viloyatini ijtimoiy-iqtisodiy rivojlantirish, aholining turmush darajasini yaxshilash hamda sogʻlomlashtirish tizimini yanada takomillashtirish maqsadida Vazirlar Mahkamasi qaror qiladi:
1. Oʻzbekiston kasaba uyushmalari federatsiyasi, Milliy olimpiya qoʻmitasi, Oʻzbekiston Respublikasi Davlat aktivlarini boshqarish agentligi va Namangan viloyati hokimligining Namangan viloyati, Chortoq tumanidagi Oʻzbekiston kasaba uyushmalari federatsiyasi “Chortoq sanatoriysi” masʼuliyati cheklangan jamiyati hududida joylashgan Oʻzbekiston Milliy olimpiya qoʻmitasiga begʻaraz muddatsiz foydalanish huquqi asosida berilgan sport oʻyinlari boʻyicha olimpiya tayyorgarligi markazi (sobiq serjantlarni tayyorlash maktabi) davlat mulki obyektlari hisoblangan bino va inshootlarini (keyingi oʻrinlarda obyekt deb ataladi) Oʻzbekiston kasaba uyushmalari federatsiyasiga tekin foydalanish huquqi asosida berish toʻgʻrisidagi taklifi maʼqullansin.
Oʻzbekiston kasaba uyushmalari federatsiyasiga obyektni keyinchalik “Chortoq sanatoriysi” masʼuliyati cheklangan jamiyati hamda boshqa jismoniy va yuridik shaxslarga maqsadli foydalanish va xoʻjalik faoliyati yuritish uchun, istisno tariqasida, tekin foydalanish huquqi asosida berishga ruxsat berilsin.
2. Oʻzbekiston Milliy olimpiya qoʻmitasi obyektni bir oy muddatda belgilangan tartibda topshirsin, Oʻzbekiston kasaba uyushmalari federatsiyasi qabul qilib olsin hamda undan samarali foydalanishni tashkil qilsin.
3. Obyektni rekonstruksiya qilish, yotoqxona va davolash binolari qurish, zamonaviy jihozlash hamda uning hududini obodonlashtirish va koʻkalamzorlashtirish ishlarini bajarish boʻyicha:
Oʻzbekiston kasaba uyushmalari federatsiyasi kengashining Kapital qurilish boshqarmasi — buyurtmachi etib belgilansin;
bosh loyiha va bosh pudratchi tashkilot belgilangan tartibda tender (tanlov) savdolari natijasida aniqlansin.
4. Oʻzbekiston kasaba uyushmalari federatsiyasiga 2022-yil 1-yanvarga qadar Oʻzbekiston Respublikasi Prezidentining “Oʻzbekiston Respublikasining 2019-yilgi asosiy makroiqtisodiy koʻrsatkichlari prognozi va Davlat budjeti parametrlari hamda 2020-2021-yillarga budjet moʻljallari toʻgʻrisida” 2018-yil 26-dekabrdagi PQ-4086-son qaroriga asosan yagona soliq toʻlovlaridan Oʻzbekiston kasaba uyushmalari federatsiyasiga ajratilayotgan mablagʻlar hamda qonun hujjatlari bilan taqiqlanmagan boshqa manbalar hisobidan obyektda qurilish, rekonstruksiya qilish, taʼmirlash va jihozlash ishlarini amalga oshirish hamda obyektni foydalanishga topshirish tavsiya etilsin.
5. “Hududiy elektr tarmoqlari” aksiyadorlik jamiyati va “Oʻztransgaz” aksiyadorlik jamiyatining oʻz mablagʻlari hisobidan loyiha quvvatlariga muvofiq obyektda muhandislik-kommunikatsiya tarmoqlarini belgilangan tartibda oʻtkazish toʻgʻrisidagi taklifi maʼqullansin.
6. Oʻzbekiston Respublikasi Transport vazirligi huzuridagi Avtomobil yoʻllari qoʻmitasi oʻz mablagʻlari hisobidan Namangan viloyati, Chortoq tumani markazidan obyektgacha boʻlgan masofadagi yoʻlni taʼmirlash ishlarini amalga oshirsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduhakimov zimmasiga hamda Vazirlar Mahkamasining Yoshlar siyosati, madaniyat, maʼnaviyat, ommaviy axborot vositalari, ijodiy va jamoat tashkilotlari masalalari kotibiyatiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 22-iyul,
615-son