📅 2019-yil 9-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 9 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 9 августа 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 9 August 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Бухоро вилояти Қоракўл туманида «Халқаро математика мактаби»ни ташкил этиш тўғрисида
Мамлакатимизда истиқболли ёшларни қўллаб-қувватлаш, улғайиб келаётган ёш авлодни илмга кенг жалб қилиш ва интеллектуал салоҳиятини ошириш, математика фани учун бўлғуси кадрлар тайёрлаш ишларини мувофиқлаштириш, шунингдек, халқаро майдонда мамлакатимизнинг нуфузини янада юксалтириш учун иқтидорли ёшларни аниқлаш ва юқори малакали кадрлар тайёрлашнинг узлуксиз тизимини янада такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Халқ таълими вазирлиги, Олий ва ўрта махсус таълим вазирлиги ҳамда Бухоро вилояти ҳокимлигининг:
Бухоро вилояти, Қоракўл тумани, Улуғбек кўчаси, 1-уй манзилида жойлашган 1-сон ихтисослаштирилган давлат умумтаълим мактаб-интернатига «халқаро математика мактаби» (кейинги ўринларда халқаро мактаб деб аталади) мақомини бериш;
Бухоро вилояти, Қоракўл тумани, Улуғбек кўчаси, 5-уй манзилида жойлашган Қоракўл саноат ва транспорт касб-ҳунар коллежининг бино ва иншоотларини тегишли ҳудуди билан биргаликда халқаро мактабга оператив бошқарув ҳуқуқи асосида бепул бериш тўғрисидаги таклифларига розилик берилсин.
Белгилаб қўйилсинки, Қоракўл саноат ва транспорт касб-ҳунар коллежининг ўқувчилари ўқишни битиргунларига қадар халқаро мактаб биноларида ўқув жараёнини давом эттирадилар.
2. Қуйидагилар халқаро мактабнинг асосий вазифалари этиб белгилансин:
умумий ўрта таълимнинг давлат таълим стандартлари асосида замонавий ахборот технологияларидан кенг фойдаланган ҳолда аниқ ва табиий фанлар, шунингдек, чет тилларининг чуқур ўқитилишини ташкил этиш;
ўқувчиларнинг ижодий салоҳиятини намоён қилиш ва фаоллаштириш;
ҳар бир ўқувчининг индивидуал хусусиятларини ҳисобга олган ҳолда мустақил тадқиқотчилик фаолияти кўникмаларини шакллантириш ва ривожлантириш;
юқори касб маҳоратига эга бўлган маҳаллий ва хорижий мамлакатлардан тажрибали ўқитувчиларни жалб қилиш;
иқтидор ва истеъдодни аниқлаш ҳамда камол топтириш бўйича ўқувчиларни республика ва халқаро фан олимпиадалари, танловлар ва бошқа тадбирларда қатнашишга тайёрлаш.
3. Белгилаб қўйилсинки:
2019-2020 ўқув йилидан бошлаб халқаро мактабнинг 7-синфига 90 нафар ўқувчи қабул қилинади;
Ўзбекистон Республикаси Халқ таълими вазирлигига халқаро мактабнинг моддий-техника базасидан, педагог кадрларнинг салоҳияти ҳамда эҳтиёждан келиб чиққан ҳолда кейинги йилларда ўқувчиларни қабул қилиш квоталарига ўзгартириш киритиш ҳуқуқи берилади;
халқаро мактабда хорижий мамлакатлар фуқаролари ҳисобланган, математика фанига қизиқувчи иқтидорли ўқувчилар шартнома асосида таълим олишига имконият яратилади;
халқаро мактабда ўқувчиларга янада чуқурроқ билим бериш, хорижий мамлакатларнинг илғор тажрибаси ва ўқитиш методикасини татбиқ этиш учун хорижий мамлакатлардан ўқитувчиларни ишга қабул қилишга рухсат берилади;
2019-2020 ўқув йилидан бошлаб халқаро мактаб директори, ўринбосарлари ва ўқитувчиларига бюджет маблағлари ҳисобига 100 фоиз қўшимча устама ҳақ тўланади;
Вазирлар Маҳкамасининг «Айрим фанлар чуқур ўрганиладиган давлат ихтисослаштирилган умумтаълим муассасалари фаолиятини такомиллаштириш тўғрисида» 2008 йил 7 августдаги 173-сон қарори билан айрим фанлар чуқур ўрганиладиган давлат ихтисослаштирилган таълим муассасалари раҳбар ва педагог ходимлари учун белгиланган устамалар халқаро мактаб ходимларига нисбатан татбиқ этилмайди.
4. Ўзбекистон Республикаси Олий ва ўрта махсус таълим вазирлиги Халқ таълими вазирлиги билан биргаликда халқаро мактабга олий таълим муассасаларини тамомлаган иқтидорли педагог кадрларни жалб этилишини таъминласин.
5. Ўзбекистон Республикаси Халқ таълими вазирлиги:
Бухоро вилояти ҳокимлиги ва Ўзбекистон Республикаси Молия вазирлиги билан биргаликда 2019-2020 ўқув йилидан бошлаб халқаро мактабнинг моддий-техника базасини мустаҳкамлаш мақсадида уни ётоқхона, ошхона, кутубхона, фаоллар зали ва ўқув-лаборатория жиҳозлари ҳамда компьютер техникаси, ўқув-методик мажмуалар, ўқитувчилар учун методик қўлланмалар ва бадиий адабиётлар билан таъминлаш чораларини кўрсин;
Вазирлар Маҳкамаси ҳузуридаги Давлат тест маркази билан биргаликда 2019-2020 ўқув йилидан бошлаб мактаб-интернатга иқтидорли ўқувчиларни ижодий танлов асосида саралаб олиш мақсадида математика ва чет тили фанларидан тест синови ҳамда психологик-педагогик диагностика ўтказсин;
икки ой муддатда халқаро мактабнинг устави тасдиқланишини ва белгиланган тартибда давлат рўйхатидан ўтказилишини таъминласин.
6. Бухоро вилояти ҳокимлиги Ўзбекистон Республикаси Олий ва ўрта махсус таълим вазирлиги ҳамда Халқ таълими вазирлиги билан биргаликда бир ой муддатда Қоракўл саноат ва транспорт касб-ҳунар коллежининг бино ва иншоотлари тегишли ҳудуди билан биргаликда оператив бошқарув ҳуқуқи асосида моддий-техник воситалари, ўқув жиҳозлари ва бошқа мол-мулкидан фойдаланиш учун белгиланган тартибда топширилиши ва қабул қилинишини таъминласин.
7. Ўзбекистон Республикаси Инвестициялар ва ташқи савдо вазирлиги Халқ таълими вазирлиги ва бошқа манфаатдор вазирликлар ва идоралар билан биргаликда Ўзбекистон Республикасининг 2020 йилга мўлжалланган Инвестиция дастурига халқаро мактаб биносини капитал таъмирлаш, 200 ўринли ётоқхона ва 50 ўринли меҳмонхона биносини қуриш ҳамда жиҳозлаш ишлари киритилишини таъминласин.
8. Халқаро мактабнинг бино ва иншоотларини қуриш ва таъмирлаш бўйича:
Бухоро вилояти ҳокимлигининг «Ягона буюртмачи хизмати» инжиниринг компанияси — буюртмачи этиб белгилансин;
бош лойиҳачи ва бош пудратчи ташкилотлар белгиланган тартибда тендер (танлов) савдолари натижасида аниқлансин.
9. Бухоро вилояти ҳокимлиги 2020 йил 1 февралга қадар буюртмачи, бош лойиҳачи ташкилот билан биргаликда объектнинг лойиҳа-смета ҳужжатлари ишлаб чиқилишини ва ваколатли экспертиза органларидан белгиланган тартибда экспертиза хулосалари олинишини таъминласин.
Ўзбекистон Республикаси Қурилиш вазирлиги объектда олиб бориладиган қурилиш-монтаж ишлари сифати юзасидан белгиланган тартибда давлат архитектура-қурилиш назоратини ўрнатсин.
10. Ўзбекистон Республикаси Молия вазирлиги 2019-2020 ўқув йилидан бошлаб Ўзбекистон Республикаси Давлат бюджети параметрларида «Таълим» соҳасига ажратилган маблағлар доирасида халқаро мактабнинг таъминоти учун зарур маблағларни назарда тутсин.
11. Ўзбекистон Миллий ахборот агентлиги ҳамда Ўзбекистон миллий телерадиокомпаниясига мазкур қарорнинг мақсад ва вазифаларини оммавий ахборот воситаларида кенг кўламда ёритиш тавсия этилсин.
12. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдухакимов, Ўзбекистон Республикаси халқ таълими вазири Ш.Х. Шерматов ва Бухоро вилояти ҳокими Ў.И. Барноев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 9 август,
654-сон
Oʻzbekiston Respublikasi Vazirlar Mahkamasining
qarori
Buxoro viloyati Qorakoʻl tumanida “Xalqaro matematika maktabi”ni tashkil etish toʻgʻrisida
Mamlakatimizda istiqbolli yoshlarni qoʻllab-quvvatlash, ulgʻayib kelayotgan yosh avlodni ilmga keng jalb qilish va intellektual salohiyatini oshirish, matematika fani uchun boʻlgʻusi kadrlar tayyorlash ishlarini muvofiqlashtirish, shuningdek, xalqaro maydonda mamlakatimizning nufuzini yanada yuksaltirish uchun iqtidorli yoshlarni aniqlash va yuqori malakali kadrlar tayyorlashning uzluksiz tizimini yanada takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi hamda Buxoro viloyati hokimligining:
Buxoro viloyati, Qorakoʻl tumani, Ulugʻbek koʻchasi, 1-uy manzilida joylashgan 1-son ixtisoslashtirilgan davlat umumtaʼlim maktab-internatiga “xalqaro matematika maktabi” (keyingi oʻrinlarda xalqaro maktab deb ataladi) maqomini berish;
Buxoro viloyati, Qorakoʻl tumani, Ulugʻbek koʻchasi, 5-uy manzilida joylashgan Qorakoʻl sanoat va transport kasb-hunar kollejining bino va inshootlarini tegishli hududi bilan birgalikda xalqaro maktabga operativ boshqaruv huquqi asosida bepul berish toʻgʻrisidagi takliflariga rozilik berilsin.
Belgilab qoʻyilsinki, Qorakoʻl sanoat va transport kasb-hunar kollejining oʻquvchilari oʻqishni bitirgunlariga qadar xalqaro maktab binolarida oʻquv jarayonini davom ettiradilar.
2. Quyidagilar xalqaro maktabning asosiy vazifalari etib belgilansin:
umumiy oʻrta taʼlimning davlat taʼlim standartlari asosida zamonaviy axborot texnologiyalaridan keng foydalangan holda aniq va tabiiy fanlar, shuningdek, chet tillarining chuqur oʻqitilishini tashkil etish;
oʻquvchilarning ijodiy salohiyatini namoyon qilish va faollashtirish;
har bir oʻquvchining individual xususiyatlarini hisobga olgan holda mustaqil tadqiqotchilik faoliyati koʻnikmalarini shakllantirish va rivojlantirish;
yuqori kasb mahoratiga ega boʻlgan mahalliy va xorijiy mamlakatlardan tajribali oʻqituvchilarni jalb qilish;
iqtidor va isteʼdodni aniqlash hamda kamol toptirish boʻyicha oʻquvchilarni respublika va xalqaro fan olimpiadalari, tanlovlar va boshqa tadbirlarda qatnashishga tayyorlash.
3. Belgilab qoʻyilsinki:
2019-2020 oʻquv yilidan boshlab xalqaro maktabning 7-sinfiga 90 nafar oʻquvchi qabul qilinadi;
Oʻzbekiston Respublikasi Xalq taʼlimi vazirligiga xalqaro maktabning moddiy-texnika bazasidan, pedagog kadrlarning salohiyati hamda ehtiyojdan kelib chiqqan holda keyingi yillarda oʻquvchilarni qabul qilish kvotalariga oʻzgartirish kiritish huquqi beriladi;
xalqaro maktabda xorijiy mamlakatlar fuqarolari hisoblangan, matematika faniga qiziquvchi iqtidorli oʻquvchilar shartnoma asosida taʼlim olishiga imkoniyat yaratiladi;
xalqaro maktabda oʻquvchilarga yanada chuqurroq bilim berish, xorijiy mamlakatlarning ilgʻor tajribasi va oʻqitish metodikasini tatbiq etish uchun xorijiy mamlakatlardan oʻqituvchilarni ishga qabul qilishga ruxsat beriladi;
2019-2020 oʻquv yilidan boshlab xalqaro maktab direktori, oʻrinbosarlari va oʻqituvchilariga budjet mablagʻlari hisobiga 100 foiz qoʻshimcha ustama haq toʻlanadi;
Vazirlar Mahkamasining “Ayrim fanlar chuqur oʻrganiladigan davlat ixtisoslashtirilgan umumtaʼlim muassasalari faoliyatini takomillashtirish toʻgʻrisida” 2008-yil 7-avgustdagi 173-son qarori bilan ayrim fanlar chuqur oʻrganiladigan davlat ixtisoslashtirilgan taʼlim muassasalari rahbar va pedagog xodimlari uchun belgilangan ustamalar xalqaro maktab xodimlariga nisbatan tatbiq etilmaydi.
4. Oʻzbekiston Respublikasi Oliy va oʻrta maxsus taʼlim vazirligi Xalq taʼlimi vazirligi bilan birgalikda xalqaro maktabga oliy taʼlim muassasalarini tamomlagan iqtidorli pedagog kadrlarni jalb etilishini taʼminlasin.
5. Oʻzbekiston Respublikasi Xalq taʼlimi vazirligi:
Buxoro viloyati hokimligi va Oʻzbekiston Respublikasi Moliya vazirligi bilan birgalikda 2019-2020 oʻquv yilidan boshlab xalqaro maktabning moddiy-texnika bazasini mustahkamlash maqsadida uni yotoqxona, oshxona, kutubxona, faollar zali va oʻquv-laboratoriya jihozlari hamda kompyuter texnikasi, oʻquv-metodik majmualar, oʻqituvchilar uchun metodik qoʻllanmalar va badiiy adabiyotlar bilan taʼminlash choralarini koʻrsin;
Vazirlar Mahkamasi huzuridagi Davlat test markazi bilan birgalikda 2019-2020 oʻquv yilidan boshlab maktab-internatga iqtidorli oʻquvchilarni ijodiy tanlov asosida saralab olish maqsadida matematika va chet tili fanlaridan test sinovi hamda psixologik-pedagogik diagnostika oʻtkazsin;
ikki oy muddatda xalqaro maktabning ustavi tasdiqlanishini va belgilangan tartibda davlat roʻyxatidan oʻtkazilishini taʼminlasin.
6. Buxoro viloyati hokimligi Oʻzbekiston Respublikasi Oliy va oʻrta maxsus taʼlim vazirligi hamda Xalq taʼlimi vazirligi bilan birgalikda bir oy muddatda Qorakoʻl sanoat va transport kasb-hunar kollejining bino va inshootlari tegishli hududi bilan birgalikda operativ boshqaruv huquqi asosida moddiy-texnik vositalari, oʻquv jihozlari va boshqa mol-mulkidan foydalanish uchun belgilangan tartibda topshirilishi va qabul qilinishini taʼminlasin.
7. Oʻzbekiston Respublikasi Investitsiyalar va tashqi savdo vazirligi Xalq taʼlimi vazirligi va boshqa manfaatdor vazirliklar va idoralar bilan birgalikda Oʻzbekiston Respublikasining 2020-yilga moʻljallangan Investitsiya dasturiga xalqaro maktab binosini kapital taʼmirlash, 200 oʻrinli yotoqxona va 50 oʻrinli mehmonxona binosini qurish hamda jihozlash ishlari kiritilishini taʼminlasin.
8. Xalqaro maktabning bino va inshootlarini qurish va taʼmirlash boʻyicha:
Buxoro viloyati hokimligining “Yagona buyurtmachi xizmati” injiniring kompaniyasi — buyurtmachi etib belgilansin;
bosh loyihachi va bosh pudratchi tashkilotlar belgilangan tartibda tender (tanlov) savdolari natijasida aniqlansin.
9. Buxoro viloyati hokimligi 2020-yil 1-fevralga qadar buyurtmachi, bosh loyihachi tashkilot bilan birgalikda obyektning loyiha-smeta hujjatlari ishlab chiqilishini va vakolatli ekspertiza organlaridan belgilangan tartibda ekspertiza xulosalari olinishini taʼminlasin.
Oʻzbekiston Respublikasi Qurilish vazirligi obyektda olib boriladigan qurilish-montaj ishlari sifati yuzasidan belgilangan tartibda davlat arxitektura-qurilish nazoratini oʻrnatsin.
10. Oʻzbekiston Respublikasi Moliya vazirligi 2019-2020 oʻquv yilidan boshlab Oʻzbekiston Respublikasi Davlat budjeti parametrlarida “Taʼlim” sohasiga ajratilgan mablagʻlar doirasida xalqaro maktabning taʼminoti uchun zarur mablagʻlarni nazarda tutsin.
11. Oʻzbekiston Milliy axborot agentligi hamda Oʻzbekiston milliy teleradiokompaniyasiga mazkur qarorning maqsad va vazifalarini ommaviy axborot vositalarida keng koʻlamda yoritish tavsiya etilsin.
12. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov, Oʻzbekiston Respublikasi xalq taʼlimi vaziri Sh.X. Shermatov va Buxoro viloyati hokimi Oʻ.I. Barnoyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 9-avgust,
654-son