📅 2019-yil 19-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 19 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 19 августа 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 19 August 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Ҳуқуқни муҳофаза қилувчи органлар, маҳаллий ижро этувчи ҳокимият органлари ва фуқароларнинг ўзини ўзи бошқариш органлари тизимида ҳуқуқий билимни ошириш бўйича қўшимча чора-тадбирлар тўғрисида
Ички ишлар органлари терговчиларининг малакасини ошириш тизимини такомиллаштириш, курсантларнинг (талабаларнинг) назарий билимни ҳуқуқни қўллаш амалиётига татбиқ этиш бўйича амалий кўникмаларини шакллантириш, шунингдек, туман (шаҳар) ҳокимлари ва фуқаролар йиғини раисларининг ҳуқуқий билимини ошириш борасидаги ишлар самарадорлигини янада кучайтириш мақсадида Вазирлар Маҳкамаси қарор қилади:
1. Ўзбекистон Республикаси Ички ишлар вазирлиги, Миллий гвардия ва Адлия вазирлигининг 2019/2020 ўқув йилидан бошлаб Ўзбекистон Республикаси Ички ишлар вазирлиги Академияси, Ўзбекистон Республикаси Жамоат хавфсизлиги университети ва Тошкент давлат юридик университетининг (кейинги ўринларда олий таълим муассасалари деб аталади) юқори натижалар қайд этган курсантлари (талабалари) ўқишнинг сўнгги босқичини бевосита амалиётда ўтказиши тартибини жорий этиш тўғрисидаги таклифларига розилик берилсин.
2. Ҳуқуқни муҳофаза қилувчи органлар олий таълим муассасаларининг юқори натижаларни қайд этган курсантлари (талабалари) ўқишнинг сўнгги босқичини бевосита амалиётда ўтказиши тартиби тўғрисидаги низом иловага мувофиқ тасдиқлансин.
3. Белгилансинки:
олий таълим муассасаларининг юқори натижалар қайд этган курсантлари (талабалари) тегишлилиги бўйича амалиёт ўташ учун ҳуқуқни муҳофаза қилувчи органлар ва бошқа давлат органларига, жумладан, суд, прокуратура, ички ишлар, миллий гвардия, адлия органлари ва адвокатура тузилмаларига тегишлича Ўзбекистон Республикаси Ички ишлар вазирлиги, Миллий гвардия ва Адлия вазирлиги томонидан бириктирилади;
бунда юқори натижалар қайд этган курсантларни (талабаларни) амалиёт ўташ учун амалиёт ўтказувчи органларга бириктириш уларнинг мутахассислиги (йўналиши) бўйича ташкил этилади;
олий таълим муассасаларининг юқори натижалар қайд этган курсантлари (талабалари) ўқишининг сўнгги босқичини бевосита амалиётда ўтказиш белгиланган ўқув юкламалари ҳажми доирасида ҳал этилади.
4. Ўзбекистон Республикаси Бош прокуратураси Академиясида юқори малакали амалиёт ходимлари, профессор ва ўқитувчилар ҳамда экспертларни жалб қилган ҳолда ички ишлар органлари терговчиларининг (кейинги ўринларда терговчилар деб аталади) малакасини ошириш тизими жорий этилсин.
5. Қуйидагилар ички ишлар органлари терговчиларининг малакасини ошириш тизимини жорий этишнинг асосий вазифалари этиб белгилансин:
дастлабки терговни амалга оширишда фуқароларнинг ҳуқуқлари, эркинликлари ва қонуний манфаатлари устунлигига, уларнинг шаъни ва қадр-қиммати ҳурмат қилинишига сўзсиз риоя қилиш кўникмасини мустаҳкамлаш;
терговчиларнинг билим ва малакасини оширишда инновацион техника ва воситалардан фойдаланиш ҳамда янги иш усулларини ўргатиш;
терговчиларнинг ўта мураккаб, шу жумладан, уюшган жиноий гуруҳлар ва уюшмалар томонидан содир этилган, ахборот технологияларидан фойдаланиб содир этилган жиноятларни фош этиш ва тергов қилиш бўйича малакасини ошириш.
6. Терговчиларнинг Ўзбекистон Республикаси Бош прокуратураси Академиясида малака ошириши хизматдан ажралмаган ҳолда амалга оширилади ҳамда ҳар йили ички ишлар органларининг эҳтиёжидан келиб чиққан ҳолда белгиланади.
7. Қуйидагилар:
Ўзбекистон Республикаси Президентининг «Фуқароларнинг ўзини ўзи бошқариш органлари ходимларининг малакасини ошриш бўйича ўқув курсларини ташкил этиш тўғрисида» 2013 йил 10 октябрдаги ПҚ-2050-сон қарорига мувофиқ Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузурида давлат таълим муассасаси шаклида фуқароларнинг ўзини ўзи бошқариш органлари ходимларининг малакасини ошириш бўйича ўқув курслари ташкил этилганлиги;
Ўзбекистон Республикаси Президентининг «Ўзбекистон Республикаси Президенти ҳузуридаги Давлат бошқаруви академиясининг ҳудудий филиалларини ташкил этиш тўғрисида» 2018 йил 6 августдаги ПҚ-3901-сон қарорига мувофиқ Ўзбекистон Республикаси Президенти ҳузуридаги Давлат бошқаруви академиясининг ҳудудий филиалларида жойлардаги давлат ва жамият бошқаруви соҳасидаги раҳбар кадрларнинг малакасини ошириш курслари ташкил этилганлиги маълумот учун қабул қилинсин.
8. Ўзбекистон Республикаси Президенти ҳузуридаги Давлат бошқаруви академияси ва Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши ҳокимлар ва фуқаролар йиғини раислари (оқсоқоллари) учун малака ошириш курсларининг таълим дастурларига ҳуқуқшуносликка оид ўқув соатлари ажратилишини таъминласин.
9. Ўзбекистон Республикаси Ички ишлар вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдухакимов ва Ўзбекистон Республикаси ички ишлар вазири П.Р. Бобожонов зиммасига юклансин.
Вазирлар Маҳкамасининг 2019 йил 19 августдаги 694-сон қарорига ИЛОВА
Ҳуқуқни муҳофаза қилувчи органлар олий таълим муассасаларининг юқори натижаларни қайд этган курсантлари (талабалари) ўқишнинг сўнгги босқичини бевосита амалиётда ўтказиши тартиби тўғрисида
1-боб. Умумий қоидалар
1. Ушбу Низом Ўзбекистон Республикаси Ички ишлар вазирлиги Академияси, Ўзбекистон Республикаси Жамоат хавфсизлиги университети ва Тошкент давлат юридик университетининг (кейинги ўринларда олий таълим муассасалари деб аталади) юқори натижалар қайд этган курсантлари (талабалари) ўқишнинг сўнгги босқичини бевосита амалиётда ўтказиши тартибини белгилайди.
2. Ушбу Низомда қуйидаги тушунчалардан фойдаланилади:
юқори натижалар қайд этган курсантлар (талабалар) — ўтган ўқув йиллари бўйича ўртача ўзлаштириш кўрсаткичи 80 фоиз ва ундан юқори бўлган курсантлар (талабалар) (кейинги ўринларда курсантлар (талабалар) деб аталади);
курсантлар (талабалар) амалиёти — олий таълим муассасаларининг юқори натижалар қайд этган курсантларининг (талабаларининг) амалиёт ўташ учун тегишлилиги бўйича ҳуқуқни муҳофаза қилувчи ва бошқа давлат органларида, шу жумладан, суд, прокуратура, ички ишлар, миллий гвардия, адлия органлари ва адвокатура тузилмаларида назарий билимини мустаҳкамлаш, амалий кўникма ва маҳоратини оширишга йўналтирилган фаолият;
амалиёт ўтказувчи орган — ўқишнинг сўнги босқичида курсантлар (талабалар) амалиёт олиб борадиган ҳуқуқни муҳофаза қилувчи ва бошқа давлат органи;
курсантларнинг (талабаларнинг) амалиёт органидаги фаолияти бўйича мураббий — қабул қилувчи органнинг курсантларни (талабаларни) амалий кўникмаларга ўргатиш ва уларнинг касбий фаолиятини мувофиқлаштириш масъулияти юкланган масъул ходими.
3. Курсантлар (талабалар) амалиёти уларнинг амалий кўникмаларини мустаҳкамлаш, норматив-ҳуқуқий ҳужжатларни амалиётда қўллаш бўйича касбий малакасини шакллантириш ва ошириш, келгусида хизмат фаолиятига тайёрлаш мақсадида ташкил этилади.
4. Курсантлар (талабалар) амалиётини ўтказиш жойи ва дастури ҳуқуқни муҳофаза қилувчи органлар томонидан олий таълим муассасаларининг хусусиятлари ҳамда назарий тайёргарлик даражаси инобатга олинган ҳолда белгиланади.
5. Курсантлар (талабалар) амалиёт ўташ даврида ўқув режаси бўйича белгиланган малакавий амалиётни ўташдан озод этилади.
6. Курсантларнинг (талабаларнинг) амалиёт ўташи уларни олий таълим муассасаларидаги таълим жараёни доирасидаги мажбуриятлардан озод этмайди ва улар ўқув жараёнида белгиланган назорат турларини тўлиқ бажариб боришлари шарт.
7. Олий таълим муассасаларининг юқори натижалар қайд этган курсантлари (талабалари) ўқишининг сўнгги босқичини бевосита амалиётда ўтказиш тартиби ушбу Низомга иловада келтирилган схемага мувофиқ амалга оширилади.
2-боб. Курсантлар (талабалар) амалиётини ташкил қилиш
8. Олий таълим муассасалари янги ўқув йили бошлангунга қадар ўқишнинг сўнгги босқичига ўтган курсантларнинг (талабаларнинг) ўртача ўзлаштириш кўрсаткичларини 100 баллик шкала асосида аниқлайди.
Бунда ўзлаштириш кўрсаткичи 5 баллик шкалада баҳоланадиган олий таълим муассасалари курсантларининг (талабаларининг) ўртача ўзлаштириш кўрсаткичлари Ўзбекистон Республикаси Олий ва ўрта махсус таълим вазирлиги томонидан белгиланадиган баҳолашни 5 баллик шкаладан 100 баллик шкалага ўтказиш жадвали асосида аниқланади.
9. Таълимнинг якунловчи босқичига қадар ўтган ўқув йиллари бўйича ўртача ўзлаштириш кўрсаткичи 80 фоиз ва ундан юқори бўлган курсантлар (талабалар) рўйхати олий таълим муассасалари хусусиятларидан келиб чиққан ҳолда амалиёт ўташ органига тақдим этилади.
10. Тошкент давлат юридик университетида юқори натижаларга эришган талабалар бевосита амалиётга уларнинг хоҳиш-истаклари инобатга олинган ҳолда юборилади.
Тошкент давлат юридик университетининг юқори натижаларга эришган талабаларини ўқишнинг якуний босқичини бевосита амалиётда ўтказиш бўйича уларнинг хоҳиш-истакларини аниқлаш мақсадида суҳбат ташкил қилинади.
Ўқишнинг якуний босқичини бевосита амалиётда ўтказиш учун юборилган Тошкент давлат юридик университети талабаларига уларнинг хоҳишларини инобатга олиб вакант лавозимлар мавжуд бўлган тақдирда, Ўзбекистон Республикаси Президентининг 2017 йил 19 январдаги ПҚ-2733-сон қарори билан тасдиқланган Давлат органлари ва ташкилотларининг юридик хизмати тўғрисидаги низомнинг 9-банди қоидалари татбиқ қилиниши мумкин.
11. Курсантлар (талабалар) амалиётини самарали ташкил этиш мақсадида уларга амалиёт ўташ органи томонидан мураббий бириктирилади.
Мураббий ўзига бириктирилган курсантлар (талабалар) амалиётини тўғри ташкил қилиш учун масъул ҳисобланади.
3-боб. Амалиёт органи ва мураббийларга ҳамда курсантлар (талабалар) амалиётига қўйиладиган талаблар
12. Амалиёт органи:
курсантлар (талабалар) амалиётини ташкил этиш тўғрисида қарор қабул қилади ҳамда уларнинг амалиёт ўташ дастурини тасдиқлайди;
курсантлар (талабалар) амалиётини самарали ва тўғри ташкил этиш учун зарур шарт-шароитларни яратиш чораларини кўради.
13. Мураббий:
курсантларга (талабаларга) хизмат (меҳнат) фаолияти ҳақида тушунтириш беради ва уларнинг амалий кўникмаларини шакллантириш чораларини кўради;
курсантларга (талабаларга) хавфсизлик чоралари ва амалиёт органининг ички тартиб-қоидалари тўғрисида йўриқнома беради;
курсантлар (талабалар) томонидан махфийлик тартибига риоя этилишини таъминлайди;
курсантлар (талабалар) амалиёти мониторингини олиб боради;
амалиёт органида хизмат фаолияти давомида юқори кўрсаткичларга эришган курсантларни (талабаларни) амалиёт ўтаган органда лавозимларга тайинлаш учун таклифлар киритади.
14. Курсантларни (талабаларни) амалиёт ўташ вақтида хизмат (меҳнат) фаолиятига боғлиқ бўлмаган вазифаларни бажаришга жалб этишга йўл қўйилмайди.
15. Курсантлар (талабалар) амалиёт ўташ давомида:
амалиёт ўташ вақтида амалиёт органи ходимлари учун белгиланган ички тартиб қоидаларига ва интизомга риоя этиши;
амалиёт ўташ дастурида назарда тутилган барча тадбирларни ўз вақтида, тўлиқ ва сифатли бажариши;
амалиёт органи ва мураббийларнинг қонуний талаб ва йўриқномаларига риоя этиши лозим.
16. Курсантлар (талабалар) амалиёт жараёнида хизмат (меҳнат) интизомини бузиш ҳолатларига йўл қўйган тақдирда, амалиёт ўташ тўхтатилади ва уларнинг амалиётни давом эттириш ёки эттирмаслик масаласи тегишлича Ўзбекистон Республикаси Ички ишлар вазирлиги, Адлия вазирлиги ва Миллий гвардия томонидан белгиланган тартибда кўриб чиқилади.
Курсантлар (талабалар) амалиётини тўхтатиш ва давом эттирмаслик тўғрисида қарор қабул қилинганда амалиёт органлари уларни олий таълим муассасаларига қайтариб юборади ҳамда бу ҳақда тегишли олий таълим муассасасига хабар юборади.
Олий таълим муассасалари томонидан амалиёт органларидан қайтариб юборилган курсантларга (талабаларга) нисбатан қонунчилик ҳужжатларида белгиланган тартибда тегишли чоралар кўрилади.
17. Курсантларга (талабаларга) амалиёт органида хизматни ўташ даврида мустақил равишда мураббийларнинг назоратисиз хизмат вазифаларини бажариш тақиқланади.
4-боб. Якунловчи қоидалар
18. Курсантлар (талабалар) учун амалиёт ўташ даврида қонунчилик ҳужжатларида белгиланган барча таъминот турлари сақлаб қолинади.
19. Курсантлар (талабалар) амалиёт ўташ органи томонидан белгиланган тартибда рағбатлантирилиши мумкин.
20. Амалиётда юқори натижаларга эришган курсантларга (талабаларга) бириктирилган мураббийлар рағбатлантирилиши, шу жумладан, уларга нисбатан қонунчилик ҳужжатларида белгиланган қўшимча устамалар тайинланиши мумкин.
21. Ушбу Низом талаблари бузилишида айбдор бўлган шахслар белгиланган тартибда жавоб берадилар.
Ҳуқуқни муҳофаза қилувчи органлар олий таълим муассасаларининг юқори натижаларни қайд этган курсантлари (талабалари) ўқишнинг сўнги босқичини бевосита амалиётда ўтказиши тартиби тўғрисидаги низомга ИЛОВА
Ҳуқуқни муҳофаза қилувчи органлар олий таълим муассасаларининг юқори натижаларни қайд этган курсантлари (талабалари) ўқишнинг сўнгги босқичини бевосита амалиётда ўтказиши
Ўзбекистон Республикасининг Бош вазири А. АРИПОВ
Тошкент ш.,
2019 йил 19 август,
694-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Huquqni muhofaza qiluvchi organlar, mahalliy ijro etuvchi hokimiyat organlari va fuqarolarning oʻzini oʻzi boshqarish organlari tizimida huquqiy bilimni oshirish boʻyicha qoʻshimcha chora-tadbirlar toʻgʻrisida
Ichki ishlar organlari tergovchilarining malakasini oshirish tizimini takomillashtirish, kursantlarning (talabalarning) nazariy bilimni huquqni qoʻllash amaliyotiga tatbiq etish boʻyicha amaliy koʻnikmalarini shakllantirish, shuningdek, tuman (shahar) hokimlari va fuqarolar yigʻini raislarining huquqiy bilimini oshirish borasidagi ishlar samaradorligini yanada kuchaytirish maqsadida Vazirlar Mahkamasi qaror qiladi:
1. Oʻzbekiston Respublikasi Ichki ishlar vazirligi, Milliy gvardiya va Adliya vazirligining 2019/2020 oʻquv yilidan boshlab Oʻzbekiston Respublikasi Ichki ishlar vazirligi Akademiyasi, Oʻzbekiston Respublikasi Jamoat xavfsizligi universiteti va Toshkent davlat yuridik universitetining (keyingi oʻrinlarda oliy taʼlim muassasalari deb ataladi) yuqori natijalar qayd etgan kursantlari (talabalari) oʻqishning soʻnggi bosqichini bevosita amaliyotda oʻtkazishi tartibini joriy etish toʻgʻrisidagi takliflariga rozilik berilsin.
2. Huquqni muhofaza qiluvchi organlar oliy taʼlim muassasalarining yuqori natijalarni qayd etgan kursantlari (talabalari) oʻqishning soʻnggi bosqichini bevosita amaliyotda oʻtkazishi tartibi toʻgʻrisidagi nizom ilovaga muvofiq tasdiqlansin.
3. Belgilansinki:
oliy taʼlim muassasalarining yuqori natijalar qayd etgan kursantlari (talabalari) tegishliligi boʻyicha amaliyot oʻtash uchun huquqni muhofaza qiluvchi organlar va boshqa davlat organlariga, jumladan, sud, prokuratura, ichki ishlar, milliy gvardiya, adliya organlari va advokatura tuzilmalariga tegishlicha Oʻzbekiston Respublikasi Ichki ishlar vazirligi, Milliy gvardiya va Adliya vazirligi tomonidan biriktiriladi;
bunda yuqori natijalar qayd etgan kursantlarni (talabalarni) amaliyot oʻtash uchun amaliyot oʻtkazuvchi organlarga biriktirish ularning mutaxassisligi (yoʻnalishi) boʻyicha tashkil etiladi;
oliy taʼlim muassasalarining yuqori natijalar qayd etgan kursantlari (talabalari) oʻqishining soʻnggi bosqichini bevosita amaliyotda oʻtkazish belgilangan oʻquv yuklamalari hajmi doirasida hal etiladi.
4. Oʻzbekiston Respublikasi Bosh prokuraturasi Akademiyasida yuqori malakali amaliyot xodimlari, professor va oʻqituvchilar hamda ekspertlarni jalb qilgan holda ichki ishlar organlari tergovchilarining (keyingi oʻrinlarda tergovchilar deb ataladi) malakasini oshirish tizimi joriy etilsin.
5. Quyidagilar ichki ishlar organlari tergovchilarining malakasini oshirish tizimini joriy etishning asosiy vazifalari etib belgilansin:
dastlabki tergovni amalga oshirishda fuqarolarning huquqlari, erkinliklari va qonuniy manfaatlari ustunligiga, ularning shaʼni va qadr-qimmati hurmat qilinishiga soʻzsiz rioya qilish koʻnikmasini mustahkamlash;
tergovchilarning bilim va malakasini oshirishda innovatsion texnika va vositalardan foydalanish hamda yangi ish usullarini oʻrgatish;
tergovchilarning oʻta murakkab, shu jumladan, uyushgan jinoiy guruhlar va uyushmalar tomonidan sodir etilgan, axborot texnologiyalaridan foydalanib sodir etilgan jinoyatlarni fosh etish va tergov qilish boʻyicha malakasini oshirish.
6. Tergovchilarning Oʻzbekiston Respublikasi Bosh prokuraturasi Akademiyasida malaka oshirishi xizmatdan ajralmagan holda amalga oshiriladi hamda har yili ichki ishlar organlarining ehtiyojidan kelib chiqqan holda belgilanadi.
7. Quyidagilar:
Oʻzbekiston Respublikasi Prezidentining “Fuqarolarning oʻzini oʻzi boshqarish organlari xodimlarining malakasini oshrish boʻyicha oʻquv kurslarini tashkil etish toʻgʻrisida” 2013-yil 10-oktabrdagi PQ-2050-son qaroriga muvofiq Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzurida davlat taʼlim muassasasi shaklida fuqarolarning oʻzini oʻzi boshqarish organlari xodimlarining malakasini oshirish boʻyicha oʻquv kurslari tashkil etilganligi;
Oʻzbekiston Respublikasi Prezidentining “Oʻzbekiston Respublikasi Prezidenti huzuridagi Davlat boshqaruvi akademiyasining hududiy filiallarini tashkil etish toʻgʻrisida” 2018-yil 6-avgustdagi PQ-3901-son qaroriga muvofiq Oʻzbekiston Respublikasi Prezidenti huzuridagi Davlat boshqaruvi akademiyasining hududiy filiallarida joylardagi davlat va jamiyat boshqaruvi sohasidagi rahbar kadrlarning malakasini oshirish kurslari tashkil etilganligi maʼlumot uchun qabul qilinsin.
8. Oʻzbekiston Respublikasi Prezidenti huzuridagi Davlat boshqaruvi akademiyasi va Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi hokimlar va fuqarolar yigʻini raislari (oqsoqollari) uchun malaka oshirish kurslarining taʼlim dasturlariga huquqshunoslikka oid oʻquv soatlari ajratilishini taʼminlasin.
9. Oʻzbekiston Respublikasi Ichki ishlar vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov va Oʻzbekiston Respublikasi ichki ishlar vaziri P.R. Bobojonov zimmasiga yuklansin.
Vazirlar Mahkamasining 2019-yil 19-avgustdagi 694-son qaroriga ILOVA
Huquqni muhofaza qiluvchi organlar oliy taʼlim muassasalarining yuqori natijalarni qayd etgan kursantlari (talabalari) oʻqishning soʻnggi bosqichini bevosita amaliyotda oʻtkazishi tartibi toʻgʻrisida
1-bob. Umumiy qoidalar
1. Ushbu Nizom Oʻzbekiston Respublikasi Ichki ishlar vazirligi Akademiyasi, Oʻzbekiston Respublikasi Jamoat xavfsizligi universiteti va Toshkent davlat yuridik universitetining (keyingi oʻrinlarda oliy taʼlim muassasalari deb ataladi) yuqori natijalar qayd etgan kursantlari (talabalari) oʻqishning soʻnggi bosqichini bevosita amaliyotda oʻtkazishi tartibini belgilaydi.
2. Ushbu Nizomda quyidagi tushunchalardan foydalaniladi:
yuqori natijalar qayd etgan kursantlar (talabalar) — oʻtgan oʻquv yillari boʻyicha oʻrtacha oʻzlashtirish koʻrsatkichi 80 foiz va undan yuqori boʻlgan kursantlar (talabalar) (keyingi oʻrinlarda kursantlar (talabalar) deb ataladi);
kursantlar (talabalar) amaliyoti — oliy taʼlim muassasalarining yuqori natijalar qayd etgan kursantlarining (talabalarining) amaliyot oʻtash uchun tegishliligi boʻyicha huquqni muhofaza qiluvchi va boshqa davlat organlarida, shu jumladan, sud, prokuratura, ichki ishlar, milliy gvardiya, adliya organlari va advokatura tuzilmalarida nazariy bilimini mustahkamlash, amaliy koʻnikma va mahoratini oshirishga yoʻnaltirilgan faoliyat;
amaliyot oʻtkazuvchi organ — oʻqishning soʻngi bosqichida kursantlar (talabalar) amaliyot olib boradigan huquqni muhofaza qiluvchi va boshqa davlat organi;
kursantlarning (talabalarning) amaliyot organidagi faoliyati boʻyicha murabbiy — qabul qiluvchi organning kursantlarni (talabalarni) amaliy koʻnikmalarga oʻrgatish va ularning kasbiy faoliyatini muvofiqlashtirish masʼuliyati yuklangan masʼul xodimi.
3. Kursantlar (talabalar) amaliyoti ularning amaliy koʻnikmalarini mustahkamlash, normativ-huquqiy hujjatlarni amaliyotda qoʻllash boʻyicha kasbiy malakasini shakllantirish va oshirish, kelgusida xizmat faoliyatiga tayyorlash maqsadida tashkil etiladi.
4. Kursantlar (talabalar) amaliyotini oʻtkazish joyi va dasturi huquqni muhofaza qiluvchi organlar tomonidan oliy taʼlim muassasalarining xususiyatlari hamda nazariy tayyorgarlik darajasi inobatga olingan holda belgilanadi.
5. Kursantlar (talabalar) amaliyot oʻtash davrida oʻquv rejasi boʻyicha belgilangan malakaviy amaliyotni oʻtashdan ozod etiladi.
6. Kursantlarning (talabalarning) amaliyot oʻtashi ularni oliy taʼlim muassasalaridagi taʼlim jarayoni doirasidagi majburiyatlardan ozod etmaydi va ular oʻquv jarayonida belgilangan nazorat turlarini toʻliq bajarib borishlari shart.
7. Oliy taʼlim muassasalarining yuqori natijalar qayd etgan kursantlari (talabalari) oʻqishining soʻnggi bosqichini bevosita amaliyotda oʻtkazish tartibi ushbu Nizomga ilovada keltirilgan sxemaga muvofiq amalga oshiriladi.
2-bob. Kursantlar (talabalar) amaliyotini tashkil qilish
8. Oliy taʼlim muassasalari yangi oʻquv yili boshlangunga qadar oʻqishning soʻnggi bosqichiga oʻtgan kursantlarning (talabalarning) oʻrtacha oʻzlashtirish koʻrsatkichlarini 100 ballik shkala asosida aniqlaydi.
Bunda oʻzlashtirish koʻrsatkichi 5 ballik shkalada baholanadigan oliy taʼlim muassasalari kursantlarining (talabalarining) oʻrtacha oʻzlashtirish koʻrsatkichlari Oʻzbekiston Respublikasi Oliy va oʻrta maxsus taʼlim vazirligi tomonidan belgilanadigan baholashni 5 ballik shkaladan 100 ballik shkalaga oʻtkazish jadvali asosida aniqlanadi.
9. Taʼlimning yakunlovchi bosqichiga qadar oʻtgan oʻquv yillari boʻyicha oʻrtacha oʻzlashtirish koʻrsatkichi 80 foiz va undan yuqori boʻlgan kursantlar (talabalar) roʻyxati oliy taʼlim muassasalari xususiyatlaridan kelib chiqqan holda amaliyot oʻtash organiga taqdim etiladi.
10. Toshkent davlat yuridik universitetida yuqori natijalarga erishgan talabalar bevosita amaliyotga ularning xohish-istaklari inobatga olingan holda yuboriladi.
Toshkent davlat yuridik universitetining yuqori natijalarga erishgan talabalarini oʻqishning yakuniy bosqichini bevosita amaliyotda oʻtkazish boʻyicha ularning xohish-istaklarini aniqlash maqsadida suhbat tashkil qilinadi.
Oʻqishning yakuniy bosqichini bevosita amaliyotda oʻtkazish uchun yuborilgan Toshkent davlat yuridik universiteti talabalariga ularning xohishlarini inobatga olib vakant lavozimlar mavjud boʻlgan taqdirda, Oʻzbekiston Respublikasi Prezidentining 2017-yil 19-yanvardagi PQ-2733-son qarori bilan tasdiqlangan Davlat organlari va tashkilotlarining yuridik xizmati toʻgʻrisidagi nizomning 9-bandi qoidalari tatbiq qilinishi mumkin.
11. Kursantlar (talabalar) amaliyotini samarali tashkil etish maqsadida ularga amaliyot oʻtash organi tomonidan murabbiy biriktiriladi.
Murabbiy oʻziga biriktirilgan kursantlar (talabalar) amaliyotini toʻgʻri tashkil qilish uchun masʼul hisoblanadi.
3-bob. Amaliyot organi va murabbiylarga hamda kursantlar (talabalar) amaliyotiga qoʻyiladigan talablar
12. Amaliyot organi:
kursantlar (talabalar) amaliyotini tashkil etish toʻgʻrisida qaror qabul qiladi hamda ularning amaliyot oʻtash dasturini tasdiqlaydi;
kursantlar (talabalar) amaliyotini samarali va toʻgʻri tashkil etish uchun zarur shart-sharoitlarni yaratish choralarini koʻradi.
13. Murabbiy:
kursantlarga (talabalarga) xizmat (mehnat) faoliyati haqida tushuntirish beradi va ularning amaliy koʻnikmalarini shakllantirish choralarini koʻradi;
kursantlarga (talabalarga) xavfsizlik choralari va amaliyot organining ichki tartib-qoidalari toʻgʻrisida yoʻriqnoma beradi;
kursantlar (talabalar) tomonidan maxfiylik tartibiga rioya etilishini taʼminlaydi;
kursantlar (talabalar) amaliyoti monitoringini olib boradi;
amaliyot organida xizmat faoliyati davomida yuqori koʻrsatkichlarga erishgan kursantlarni (talabalarni) amaliyot oʻtagan organda lavozimlarga tayinlash uchun takliflar kiritadi.
14. Kursantlarni (talabalarni) amaliyot oʻtash vaqtida xizmat (mehnat) faoliyatiga bogʻliq boʻlmagan vazifalarni bajarishga jalb etishga yoʻl qoʻyilmaydi.
15. Kursantlar (talabalar) amaliyot oʻtash davomida:
amaliyot oʻtash vaqtida amaliyot organi xodimlari uchun belgilangan ichki tartib qoidalariga va intizomga rioya etishi;
amaliyot oʻtash dasturida nazarda tutilgan barcha tadbirlarni oʻz vaqtida, toʻliq va sifatli bajarishi;
amaliyot organi va murabbiylarning qonuniy talab va yoʻriqnomalariga rioya etishi lozim.
16. Kursantlar (talabalar) amaliyot jarayonida xizmat (mehnat) intizomini buzish holatlariga yoʻl qoʻygan taqdirda, amaliyot oʻtash toʻxtatiladi va ularning amaliyotni davom ettirish yoki ettirmaslik masalasi tegishlicha Oʻzbekiston Respublikasi Ichki ishlar vazirligi, Adliya vazirligi va Milliy gvardiya tomonidan belgilangan tartibda koʻrib chiqiladi.
Kursantlar (talabalar) amaliyotini toʻxtatish va davom ettirmaslik toʻgʻrisida qaror qabul qilinganda amaliyot organlari ularni oliy taʼlim muassasalariga qaytarib yuboradi hamda bu haqda tegishli oliy taʼlim muassasasiga xabar yuboradi.
Oliy taʼlim muassasalari tomonidan amaliyot organlaridan qaytarib yuborilgan kursantlarga (talabalarga) nisbatan qonunchilik hujjatlarida belgilangan tartibda tegishli choralar koʻriladi.
17. Kursantlarga (talabalarga) amaliyot organida xizmatni oʻtash davrida mustaqil ravishda murabbiylarning nazoratisiz xizmat vazifalarini bajarish taqiqlanadi.
4-bob. Yakunlovchi qoidalar
18. Kursantlar (talabalar) uchun amaliyot oʻtash davrida qonunchilik hujjatlarida belgilangan barcha taʼminot turlari saqlab qolinadi.
19. Kursantlar (talabalar) amaliyot oʻtash organi tomonidan belgilangan tartibda ragʻbatlantirilishi mumkin.
20. Amaliyotda yuqori natijalarga erishgan kursantlarga (talabalarga) biriktirilgan murabbiylar ragʻbatlantirilishi, shu jumladan, ularga nisbatan qonunchilik hujjatlarida belgilangan qoʻshimcha ustamalar tayinlanishi mumkin.
21. Ushbu Nizom talablari buzilishida aybdor boʻlgan shaxslar belgilangan tartibda javob beradilar.
Huquqni muhofaza qiluvchi organlar oliy taʼlim muassasalarining yuqori natijalarni qayd etgan kursantlari (talabalari) oʻqishning soʻngi bosqichini bevosita amaliyotda oʻtkazishi tartibi toʻgʻrisidagi nizomga ILOVA
Huquqni muhofaza qiluvchi organlar oliy taʼlim muassasalarining yuqori natijalarni qayd etgan kursantlari (talabalari) oʻqishning soʻnggi bosqichini bevosita amaliyotda oʻtkazishi
Oʻzbekiston Respublikasining Bosh vaziri A. ARIPOV
Toshkent sh.,
2019-yil 19-avgust,
694-son