📅 2019-yil 2-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 2 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 2 сентября 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 2 September 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
РЎЙХАТИ
Янгийўл тумани кичик саноат зонаси ҳудудини кенгайтириш чора-тадбирлари тўғрисида
Давлат мулки бўлган ва устав фондида давлат улуши мавжуд бўлган хўжалик жамиятларининг объектларидан самарали фойдаланиш, инвестицияларни жалб қилиш учун қулай шарт-шароитлар яратиш, янги рақобатбардош ишлаб чиқаришларни янада қўллаб-қувватлаш, уларни муҳандислик-коммуникация ва ишлаб чиқариш инфратузилмаси ташкил этилган алоҳида ҳудудларда жойлаштиришни таъминлаш ва шу асосда ишлаб чиқариш соҳасида янги иш ўринлари яратиш, аҳолининг бандлик ва фаровонлик даражасини ошириш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Президентининг «Тошкент вилоятида кичик саноат зоналарини ташкил этиш тўғрисида» 2017 йил 10 августдаги ПҚ-3194-сон қарорига асосан Тошкент вилоятининг шаҳар ва туманларида 17 та кичик саноат зоналари ташкил этилганлиги;
Вазирлар Маҳкамасининг «Тошкент вилоятида кичик саноат зоналарини кенгайтириш чора-тадбирлари тўғрисида» 2018 йил 8 августдаги 634-сон қарорига асосан Тошкент вилоятидаги 6 та кичик саноат зоналарининг ҳудуди кенгайтирилганлиги;
Тошкент вилоятидаги кичик саноат зоналарида амалга ошириладиган инвестиция лойиҳаларини молиялаштириш учун Ўзбекистон Республикаси Тикланиш ва тараққиёт жамғармаси томонидан 100 млн АҚШ доллари миқдорида кредит линиялари очилганлиги;
Тошкент вилоятидаги кичик саноат зоналарига умумий қиймати 1,2 трлн сўм бўлган 170 та инвестиция лойиҳалари жойлаштирилганлиги, шундан 55 та инвестиция лойиҳалари амалга оширилиши натижасида 144,2 млрд сўм инвестициялар ўзлаштирилиб, 841 та янги иш ўринлари ташкил этилганлиги, 115 та инвестиция лойиҳалари доирасида 1,2 трлн сўм инвестициялар жалб қилиниши натижасида 4 595 та янги иш ўринлари ташкил этилиши ҳамда инвестиция лойиҳаларини молиялаштириш учун Ўзбекистон Республикаси Тикланиш ва тараққиёт жамғармасининг 1,1 млн доллар маблағлари ўзлаштирилганлиги маълумот учун қабул қилинсин.
2. Тошкент вилояти ҳокимлиги, Ўзбекистон Республикаси Энергетика вазирлиги, Транспорт вазирлиги ҳузуридаги Автомобиль йўллари қўмитаси, «Ҳудудий электр тармоқлари» АЖ, «Ўзтрансгаз» АЖ, Ўзбекистон Республикаси Тикланиш ва тараққиёт жамғармаси ҳамда Иқтисодиёт ва саноат вазирлигининг эътибори Тошкент вилоятидаги кичик саноат зоналарини муҳандислик-коммуникация, ишлаб чиқариш инфратузилмаси билан таъминлаш ва инвестиция лойиҳаларини молиялаштириш бўйича ташкил этилган ишларнинг етарли эмаслигига қаратилсин.
3. Ўзбекистон Республикаси Давлат активларини бошқариш агентлиги, Иқтисодиёт ва саноат вазирлиги ҳамда Тошкент вилояти ҳокимлигининг Тошкент вилояти Янгийўл шаҳрида жойлашган давлат мулки объектлари ва устав фондида давлат улуши мавжуд бўлган хўжалик жамиятларининг фойдаланилмаётган ишлаб чиқариш майдонлари ва ер участкаларини (кейинги ўринларда объектлар деб аталади) иловага мувофиқ рўйхат бўйича Янгийўл тумани кичик саноат зонаси таркибига киритиш тўғрисидаги таклифларига розилик берилсин.
4. Тошкент вилояти ҳокимлиги, Ўзбекистон Республикаси Давлат активларини бошқариш агентлиги, Ер ресурслари, геодезия, картография ва давлат кадастри давлат қўмитаси хўжалик жамиятлари билан биргаликда объектларнинг чегараларини аниқлаштирган ҳолда Янгийўл шаҳар ҳокимлигига белгиланган муддатларда топширилишини таъминласин.
5. Белгилаб қўйилсинки:
объектлар Янгийўл шаҳар ҳокимлигига уларнинг балансида сақловчиларнинг бюджет ва бюджетдан ташқари жамғармалар олдидаги қарздорлигини бериладиган активларнинг қолдиқ (баланс) қиймати суммасига камайтириш, қарздорлик мавжуд бўлмаган ҳолларда — уларнинг кейинги солиқ тўловлари бўйича ҳисоб-китоб қилиш эвазига берилади;
объектларда тадбиркорлик субъектларини жойлаштириш ва уларнинг фаолияти ташкил қилиш Ўзбекистон Республикаси Президентининг «Тошкент вилоятида кичик саноат зоналарини ташкил этиш тўғрисида» 2017 йил 10 августдаги ПҚ-3194-сон қарори талаблари асосида амалга оширилади.
6. Ўзбекистон Республикаси Молия вазирлиги ва Давлат солиқ қўмитаси иловада келтирилган хўжалик жамиятларининг бюджет ва бюджетдан ташқари жамғармалар олдидаги қарздорликлари берилаётган объектларнинг қолдиқ (баланс) қиймати миқдорига камайтирилишини, қарздорлиги бўлмаган ҳолларда — уларнинг кейинги солиқ тўловлари бўйича ҳисоб-китоб қилинишини таъминласин.
7. Тошкент вилояти эркин иқтисодий зоналар ва кичик саноат зоналари маъмурий кенгаши Ўзбекистон Республикаси Иқтисодиёт ва саноат вазирлиги, Инвестициялар ва ташқи савдо вазирлиги, Савдо-саноат палатаси билан биргаликда белгиланган тартибда:
а) Тошкент вилояти иқтисодиётининг эҳтиёжлари, шунингдек, мавжуд минерал-хом ашё, қишлоқ хўжалиги ресурсларини ва инфратузилмани инобатга олган ҳолда Тошкент вилоятидаги кичик саноат зоналари ҳудудида импорт ўрнини босувчи ва экспортга йўналтирилган тайёр маҳсулотлар, материаллар ва бутловчи буюмлар турларини ишлаб чиқариш корхоналарини жойлаштириш бўйича аниқ таклифлар — «йўл хариталари»ни икки ой муддатда ишлаб чиқилишини ва тасдиқланишини;
б) Тошкент вилоятидаги кичик саноат зоналари ҳудудида:
ўзлаштириш учун таклиф қилинаётган импорт ўрнини босувчи ва экспортга йўналтирилган тайёр маҳсулотлар, материаллар ва бутловчи буюмлар турлари тўғрисидаги маълумотлар тадбиркорлик субъектларига етказилишини;
лойиҳаларни амалга ошириш учун тадбиркорлик субъектларини жалб этиш, улар билан тизимли ишлар олиб бориш, шунингдек, Тошкент вилоятидаги кичик саноат зоналари ҳудудида ишлаб чиқаришларни жойлаштириш бўйича инвестиция буюртманомалари сифатли ва ўз вақтида кўриб чиқилишини;
ишлаб чиқаришларни ташкил этиш бўйича инвестиция лойиҳаларининг бизнес-режаларини ишлаб чиқишда тадбиркорлик субъектларига кўмаклашишни таъминласин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари Э.М. Ганиев, Тошкент вилояти ҳокими в.б. Р.Қ. Холматов ва Ўзбекистон Республикаси Иқтисодиёт ва саноат вазири Б.А. Ходжаев зиммасига юклансин.
Вазирлар Маҳкамасининг 2019 йил 2 сентябрдаги 724-сон қарорига ИЛОВА
Тошкент вилояти Янгийўл тумани кичик саноат зонаси таркибига киритиладиган объектлар
Т/р Объект номи Бино-иншоот майдони, кв.м. * Ер майдони, га * Жойлашган ери Балансда сақловчи Идоравий мансублиги Топшириш муддати 1. «Биокимё» АЖнинг фойдаланилмаётган бино-иншоотлари ва ер майдони 34 991,8 8,0 Янгийўл шаҳри, Кимёгар кўчаси 1-уй «Биокимё» АЖ Давлат активларини бошқариш агентлиги 01.01.2020 йилга қадар 2. «Янгийўл ёғ-мой» АЖ ҳудудини оптималлаштиришдан бўшайдиган ер майдони ва бинолар 4 585,0 5,0 Янгийўл шаҳри, Самарқанд кўчаси 352-уй «Янгийўл ёғ-мой» АЖ Давлат активларини бошқариш агентлиги 01.01.2020 йилга қадар 3. «Янги сифат» МЧЖ бино-иншоотлари ва ер майдони 15 860,6 9,7 Янгийўл шаҳри, Бахт МФЙ, Самарқанд кўчаси, 34-уй «Янги сифат» МЧЖ «Ўзбекнефтгаз» АЖ 01.10.2019 йилга қадар
Ўзбекистон Республикасининг Бош вазири А. АРИПОВ
Тошкент ш.,
2019 йил 2 сентябрь,
724-сон
Oʻzbekiston Respublikasi Vazirlar Mahkamasining
qarori
ROʻYXATI
Yangiyoʻl tumani kichik sanoat zonasi hududini kengaytirish chora-tadbirlari toʻgʻrisida
Davlat mulki boʻlgan va ustav fondida davlat ulushi mavjud boʻlgan xoʻjalik jamiyatlarining obyektlaridan samarali foydalanish, investitsiyalarni jalb qilish uchun qulay shart-sharoitlar yaratish, yangi raqobatbardosh ishlab chiqarishlarni yanada qoʻllab-quvvatlash, ularni muhandislik-kommunikatsiya va ishlab chiqarish infratuzilmasi tashkil etilgan alohida hududlarda joylashtirishni taʼminlash va shu asosda ishlab chiqarish sohasida yangi ish oʻrinlari yaratish, aholining bandlik va farovonlik darajasini oshirish maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Prezidentining “Toshkent viloyatida kichik sanoat zonalarini tashkil etish toʻgʻrisida” 2017-yil 10-avgustdagi PQ-3194-son qaroriga asosan Toshkent viloyatining shahar va tumanlarida 17 ta kichik sanoat zonalari tashkil etilganligi;
Vazirlar Mahkamasining “Toshkent viloyatida kichik sanoat zonalarini kengaytirish chora-tadbirlari toʻgʻrisida” 2018-yil 8-avgustdagi 634-son qaroriga asosan Toshkent viloyatidagi 6 ta kichik sanoat zonalarining hududi kengaytirilganligi;
Toshkent viloyatidagi kichik sanoat zonalarida amalga oshiriladigan investitsiya loyihalarini moliyalashtirish uchun Oʻzbekiston Respublikasi Tiklanish va taraqqiyot jamgʻarmasi tomonidan 100 mln AQSh dollari miqdorida kredit liniyalari ochilganligi;
Toshkent viloyatidagi kichik sanoat zonalariga umumiy qiymati 1,2 trln soʻm boʻlgan 170 ta investitsiya loyihalari joylashtirilganligi, shundan 55 ta investitsiya loyihalari amalga oshirilishi natijasida 144,2 mlrd soʻm investitsiyalar oʻzlashtirilib, 841 ta yangi ish oʻrinlari tashkil etilganligi, 115 ta investitsiya loyihalari doirasida 1,2 trln soʻm investitsiyalar jalb qilinishi natijasida 4 595 ta yangi ish oʻrinlari tashkil etilishi hamda investitsiya loyihalarini moliyalashtirish uchun Oʻzbekiston Respublikasi Tiklanish va taraqqiyot jamgʻarmasining 1,1 mln dollar mablagʻlari oʻzlashtirilganligi maʼlumot uchun qabul qilinsin.
2. Toshkent viloyati hokimligi, Oʻzbekiston Respublikasi Energetika vazirligi, Transport vazirligi huzuridagi Avtomobil yoʻllari qoʻmitasi, “Hududiy elektr tarmoqlari” AJ, “Oʻztransgaz” AJ, Oʻzbekiston Respublikasi Tiklanish va taraqqiyot jamgʻarmasi hamda Iqtisodiyot va sanoat vazirligining eʼtibori Toshkent viloyatidagi kichik sanoat zonalarini muhandislik-kommunikatsiya, ishlab chiqarish infratuzilmasi bilan taʼminlash va investitsiya loyihalarini moliyalashtirish boʻyicha tashkil etilgan ishlarning yetarli emasligiga qaratilsin.
3. Oʻzbekiston Respublikasi Davlat aktivlarini boshqarish agentligi, Iqtisodiyot va sanoat vazirligi hamda Toshkent viloyati hokimligining Toshkent viloyati Yangiyoʻl shahrida joylashgan davlat mulki obyektlari va ustav fondida davlat ulushi mavjud boʻlgan xoʻjalik jamiyatlarining foydalanilmayotgan ishlab chiqarish maydonlari va yer uchastkalarini (keyingi oʻrinlarda obyektlar deb ataladi) ilovaga muvofiq roʻyxat boʻyicha Yangiyoʻl tumani kichik sanoat zonasi tarkibiga kiritish toʻgʻrisidagi takliflariga rozilik berilsin.
4. Toshkent viloyati hokimligi, Oʻzbekiston Respublikasi Davlat aktivlarini boshqarish agentligi, Yer resurslari, geodeziya, kartografiya va davlat kadastri davlat qoʻmitasi xoʻjalik jamiyatlari bilan birgalikda obyektlarning chegaralarini aniqlashtirgan holda Yangiyoʻl shahar hokimligiga belgilangan muddatlarda topshirilishini taʼminlasin.
5. Belgilab qoʻyilsinki:
obyektlar Yangiyoʻl shahar hokimligiga ularning balansida saqlovchilarning budjet va budjetdan tashqari jamgʻarmalar oldidagi qarzdorligini beriladigan aktivlarning qoldiq (balans) qiymati summasiga kamaytirish, qarzdorlik mavjud boʻlmagan hollarda — ularning keyingi soliq toʻlovlari boʻyicha hisob-kitob qilish evaziga beriladi;
obyektlarda tadbirkorlik subyektlarini joylashtirish va ularning faoliyati tashkil qilish Oʻzbekiston Respublikasi Prezidentining “Toshkent viloyatida kichik sanoat zonalarini tashkil etish toʻgʻrisida” 2017-yil 10-avgustdagi PQ-3194-son qarori talablari asosida amalga oshiriladi.
6. Oʻzbekiston Respublikasi Moliya vazirligi va Davlat soliq qoʻmitasi ilovada keltirilgan xoʻjalik jamiyatlarining budjet va budjetdan tashqari jamgʻarmalar oldidagi qarzdorliklari berilayotgan obyektlarning qoldiq (balans) qiymati miqdoriga kamaytirilishini, qarzdorligi boʻlmagan hollarda — ularning keyingi soliq toʻlovlari boʻyicha hisob-kitob qilinishini taʼminlasin.
7. Toshkent viloyati erkin iqtisodiy zonalar va kichik sanoat zonalari maʼmuriy kengashi Oʻzbekiston Respublikasi Iqtisodiyot va sanoat vazirligi, Investitsiyalar va tashqi savdo vazirligi, Savdo-sanoat palatasi bilan birgalikda belgilangan tartibda:
a) Toshkent viloyati iqtisodiyotining ehtiyojlari, shuningdek, mavjud mineral-xomashyo, qishloq xoʻjaligi resurslarini va infratuzilmani inobatga olgan holda Toshkent viloyatidagi kichik sanoat zonalari hududida import oʻrnini bosuvchi va eksportga yoʻnaltirilgan tayyor mahsulotlar, materiallar va butlovchi buyumlar turlarini ishlab chiqarish korxonalarini joylashtirish boʻyicha aniq takliflar — “yoʻl xaritalari”ni ikki oy muddatda ishlab chiqilishini va tasdiqlanishini;
b) Toshkent viloyatidagi kichik sanoat zonalari hududida:
oʻzlashtirish uchun taklif qilinayotgan import oʻrnini bosuvchi va eksportga yoʻnaltirilgan tayyor mahsulotlar, materiallar va butlovchi buyumlar turlari toʻgʻrisidagi maʼlumotlar tadbirkorlik subyektlariga yetkazilishini;
loyihalarni amalga oshirish uchun tadbirkorlik subyektlarini jalb etish, ular bilan tizimli ishlar olib borish, shuningdek, Toshkent viloyatidagi kichik sanoat zonalari hududida ishlab chiqarishlarni joylashtirish boʻyicha investitsiya buyurtmanomalari sifatli va oʻz vaqtida koʻrib chiqilishini;
ishlab chiqarishlarni tashkil etish boʻyicha investitsiya loyihalarining biznes-rejalarini ishlab chiqishda tadbirkorlik subyektlariga koʻmaklashishni taʼminlasin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari E.M. Ganiyev, Toshkent viloyati hokimi v.b. R.Q. Xolmatov va Oʻzbekiston Respublikasi Iqtisodiyot va sanoat vaziri B.A. Xodjayev zimmasiga yuklansin.
Vazirlar Mahkamasining 2019-yil 2-sentabrdagi 724-son qaroriga ILOVA
Toshkent viloyati Yangiyoʻl tumani kichik sanoat zonasi tarkibiga kiritiladigan obyektlar
T/r Obyekt nomi Bino-inshoot maydoni, kv.m. * Yer maydoni, ga * Joylashgan yeri Balansda saqlovchi Idoraviy mansubligi Topshirish muddati 1. “Biokimyo” AJning foydalanilmayotgan bino-inshootlari va yer maydoni 34 991,8 8,0 Yangiyoʻl shahri, Kimyogar koʻchasi 1-uy “Biokimyo” AJ Davlat aktivlarini boshqarish agentligi 01.01.2020-yilga qadar 2. “Yangiyoʻl yogʻ-moy” AJ hududini optimallashtirishdan boʻshaydigan yer maydoni va binolar 4 585,0 5,0 Yangiyoʻl shahri, Samarqand koʻchasi 352-uy “Yangiyoʻl yogʻ-moy” AJ Davlat aktivlarini boshqarish agentligi 01.01.2020-yilga qadar 3. “Yangi sifat” MChJ bino-inshootlari va yer maydoni 15 860,6 9,7 Yangiyoʻl shahri, Baxt MFY, Samarqand koʻchasi, 34-uy “Yangi sifat” MChJ “Oʻzbekneftgaz” AJ 01.10.2019-yilga qadar
Oʻzbekiston Respublikasining Bosh vaziri A. ARIPOV
Toshkent sh.,
2019-yil 2-sentabr,
724-son