📅 2019-yil 6-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 6 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 сентября 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 6 September 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Аҳолига ҳуқуқий ахборотни етказиш ва юридик ёрдам кўрсатиш тизимини янада такомиллаштириш чора-тадбирлари тўғрисида
Аҳолининг ҳуқуқий онги ва ҳуқуқий маданиятини юксалтиришга доир ишлар самарадорлигини янада ошириш, жамиятда фуқароларнинг ҳуқуқий саводхонлик даражасини ошириш, аҳолига бепул юридик ёрдам кўрсатиш тизимини янада такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Адлия вазирлиги томонидан «Advice.uz» (e-maslahat.uz) ҳуқуқий ахборот портали ишга туширилганлиги, мазкур портал орқали Ўзбекистон Республикаси фуқаролари, чет эл фуқаролари ва фуқаролиги бўлмаган шахслар (кейинги ўринларда фуқаролар деб аталади) онлайн режимда бепул ҳуқуқий маслаҳат олишлари учун имконият яратилганлиги маълумот учун қабул қилинсин.
2. Ўзбекистон Республикаси Адлия вазирлиги ва «Юксалиш» умуммиллий ҳаракатининг қуйидаги таклифларига розилик берилсин:
а) «Мадад» — муассаса шаклидаги нодавлат нотижорат ташкилоти (кейинги ўринларда Муассаса деб аталади) ҳамда унинг Қорақалпоғистон Республикаси, вилоятлар ва Тошкент шаҳар ҳудудий бўлинмаларини (кейинги ўринларда ҳудудий бўлинмалар деб аталади), шунингдек, туман (шаҳар)ларда уларнинг ҳуқуқий маслаҳат бюроларини (кейинги ўринларда ҳуқуқий маслаҳат бюролари деб аталади) ташкил этиш;
б) Қуйидагиларни Муассасанинг асосий вазифалари сифатида белгилаш:
фуқароларга ҳуқуқий масалалар бўйича шу жумладан, онлайн маслаҳатлар ва тушунтиришлар бериш йўли билан бирламчи бепул юридик ёрдам кўрсатиш;
фуқароларнинг ҳуқуқий билимларини ижтимоий-сиёсий ўзгаришлар билан уйғун равишда ошириб бориш ишларига кўнгиллиларни сафарбар этиш;
фуқаролар томонидан ҳуқуқий маслаҳат беришга оид сўровларни таҳлил қилиб бориш, таҳлил натижасига кўра ҳуқуқни қўллаш амалиёти ва амалдаги қонунчиликни такомиллаштириш юзасидан таклифлар ишлаб чиқиш;
аҳолининг ҳуқуқий онги ва ҳуқуқий маданиятини юксалтиришда инновацион усулларни, хорижий давлатларнинг бу борадаги ижобий тажрибаларини татбиқ этиш;
«Advice.uz» (e-maslahat.uz) ҳуқуқий ахборот порталининг мунтазам равишда юритилиши ва янгилаб борилишини таъминлаш.
3. Белгилансинки, Муассаса ва унинг ҳудудий бўлинмалари фаолиятини молиялаштириш:
давлат субсидияси, шунингдек давлат ижтимоий буюртмаси доирасида Ўзбекистон Республикаси Адлия вазирлиги, бошқа давлат органлари ва ташкилотларининг шартнома асосида Муассасага тўғридан-тўғри ажратиладиган бюджетдан ташқари маблағлари;
муассислар ва ташаббускорлар томонидан ажратиладиган маблағлар;
юридик ва жисмоний шахсларнинг ҳомийлик хайриялари;
халқаро молия институтлари ва хорижий ҳукумат молия ташкилотларининг молиявий маблағлари;
қонунчиликда тақиқланмаган бошқа манбалар ҳисобидан молиялаштирилади.
Адлия вазирлиги Муассасага ҳар йили ўзининг бюджетдан ташқари маблағларидан давлат ижтимоий буюртмаси учун ажратиладиган маблағлар миқдорини ва улардан фойдаланиш тартибини мустақил белгилайди.
4. Муассасанинг марказий аппарати Тошкент шаҳар, Сайилгоҳ кўчаси 5-уйда, ҳудудий бўлинмалари ва ҳуқуқий маслаҳат бюролари заруратга кўра, тегишли ҳудудий адлия органлари ёки туман (шаҳар) Давлат хизматлари марказлари биноларига текин фойдаланиш ҳуқуқи асосида жойлаштирилсин.
5. Муассасанинг марказий аппарати, ҳудудий бўлинмалари ва ҳуқуқий маслаҳат бюроларини компьютер техникаси ва бошқа зарур жиҳозлар билан таъминлаш, уларни ва улар жойлашган биноларни сақлаш (коммунал хизматлар, жорий таъмирлаш ва бошқалар) билан боғлиқ харажатлар адлия органларининг бюджетдан ташқари маблағлари ва бошқа манбалар ҳисобидан молиялаштирилади.
6. Ўзбекистон Миллий телерадиокомпаниясига Адлия вазирлиги билан биргаликда «Advice.uz» (e-maslahat.uz) ҳуқуқий ахборот портали ҳамда «Мадад» — муассаса шаклидаги нодавлат нотижорат ташкилотининг бепул ҳуқуқий маслаҳат бериш фаолиятини оммавий ахборот воситаларида кенг ёритиш тавсия этилсин.
7. Ўзбекистон Республикаси Адлия вазирлигининг «Адолат» ҳуқуқий ахборот маркази» ва «Адлия органлари ва муассасаларида ахборот-коммуникация технологияларини ривожлантириш маркази» давлат унитар корхоналарини давлат муассасалари шаклида қайта ташкил этиш тўғрисидаги таклифи маъқуллансин.
9. Қуйидагилар:
б) «Адлия органлари ва муассасаларида ахборот-коммуникация технологияларини ривожлантириш маркази» давлат муассасасининг асосий вазифалари этиб белгилансин:
Ўзбекистон Республикаси Қонунчилик маълумотлари миллий базаси, «Нотариус» автоматлаштирилган тизими, «Advice.uz» (e-maslahat.uz) ҳуқуқий ахборот портали ва вазирлик томонидан яратилган бошқа ахборот тизимлари фаолиятини кузатиб бориш, серверларга, телекоммуникация тармоқларига техник хизмат кўрсатиш ҳамда ахборот хавфсизлигини таъминлаш;
Ўзбекистон Республикаси Адлия вазирлиги тизимида «Электрон ҳукумат» ахборот тизимлари доирасидаги лойиҳаларни амалга ошириш;
адлия органлари ва муассасаларининг барча тузилмалари фаолиятининг самарадорлигини оширишга йўналтирилган замонавий ахборот-коммуникация технологияларини кенг жорий этиш;
адлия органлари ва муассасаларида ахборотлаштириш соҳасида таҳлиллар ўтказиш ва таклифлар ишлаб чиқиш.
10. Белгилансинки:
а) 2019 йил 10 сентябрдан бошлаб «Адолат» ҳуқуқий ахборот маркази» давлат муассасаси томонидан «Ўзбекистон Республикаси қонунчилик тўплами», «Ўзбекистон Республикасининг халқаро шартномалар тўплами» (кейинги ўринларда расмий нашрлар деб аталади) аутсорсинг асосида нашр этилади;
б) «Адолат» миллий ҳуқуқий ахборот маркази» ва «Адлия органлари ва муассасаларида ахборот-коммуникация технологияларини ривожлантириш маркази» давлат муассасаларига Ўзбекистон Республикаси адлия вазири томонидан лавозимга тайинланадиган ва лавозимдан озод қилинадиган директорлар раҳбарлик қилади;
в) «Адолат» ҳуқуқий ахборот маркази» ва «Адлия органлари ва муассасаларида ахборот-коммуникация технологияларини ривожлантириш маркази» давлат муассасалари ходимларига Ўзбекистон Республикаси Вазирлар Маҳкамасининг 1997 йил 3 июлдаги 339-сон қарорида белгиланган давлат хизматчилари лавозим маошларига устама ҳақи қўлланилади, шунингдек, аввалги иш жойида узоқ йиллик хизмати учун берилган устама ва қўшимча тўловлар, махсус ва даражали унвонлар сақлаб қолинади;
г) қуйидагилар «Адолат» ҳуқуқий ахборот маркази» ва «Адлия органлари ва муассасаларида ахборот-коммуникация технологияларини ривожлантириш маркази» давлат муассасалари фаолиятини молиялаштириш манбалари ҳисобланади:
Адлия органлари ва муассасаларини ривожлантириш бюджетдан ташқари жамғармаси, шунингдек адлия органлари ва муассасаларининг бошқа бюджетдан ташқари маблағлари;
халқаро институтлар ва ташкилотлар, юридик ва жисмоний шахсларнинг грантлари ва ҳомийлик хайриялари;
қонунчилик ҳужжатларида тақиқланмаган бошқа манбалар.
11. Ўзбекистон Республикаси Адлия вазирлиги:
2020 йил 1 июлга қадар Ўзбекистон Республикаси Қонун ҳужжатлари маълумотлари миллий базасини модернизация қилсин, жумладан, бунда «ақлли» излаш функцияси назарда тутилсин;
расмий нашрларни чоп этиш ва реализация қилиш жараёнида уларнинг таннархини арзонлаштириш чораларини кўрсин;
икки ой муддатда «Адолат» ҳуқуқий ахборот маркази» ва «Адлия органлари ва муассасаларида ахборот-коммуникация технологияларини ривожлантириш маркази» давлат муассасаларининг уставларини тасдиқласин.
12. Ўзбекистон Республикаси Адлия вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
13. Мазкур қарорнинг бажарилишини назорат қилиш Ўзбекистон Республикаси адлия вазири Р.К. Давлетов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 6 сентябрь,
741-сон
Oʻzbekiston Respublikasi Vazirlar Mahkamasining
qarori
Aholiga huquqiy axborotni yetkazish va yuridik yordam koʻrsatish tizimini yanada takomillashtirish chora-tadbirlari toʻgʻrisida
Aholining huquqiy ongi va huquqiy madaniyatini yuksaltirishga doir ishlar samaradorligini yanada oshirish, jamiyatda fuqarolarning huquqiy savodxonlik darajasini oshirish, aholiga bepul yuridik yordam koʻrsatish tizimini yanada takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Adliya vazirligi tomonidan “Advice.uz” (e-maslahat.uz) huquqiy axborot portali ishga tushirilganligi, mazkur portal orqali Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslar (keyingi oʻrinlarda fuqarolar deb ataladi) onlayn rejimda bepul huquqiy maslahat olishlari uchun imkoniyat yaratilganligi maʼlumot uchun qabul qilinsin.
2. Oʻzbekiston Respublikasi Adliya vazirligi va “Yuksalish” umummilliy harakatining quyidagi takliflariga rozilik berilsin:
a) “Madad” — muassasa shaklidagi nodavlat notijorat tashkiloti (keyingi oʻrinlarda Muassasa deb ataladi) hamda uning Qoraqalpogʻiston Respublikasi, viloyatlar va Toshkent shahar hududiy boʻlinmalarini (keyingi oʻrinlarda hududiy boʻlinmalar deb ataladi), shuningdek, tuman (shahar)larda ularning huquqiy maslahat byurolarini (keyingi oʻrinlarda huquqiy maslahat byurolari deb ataladi) tashkil etish;
b) Quyidagilarni Muassasaning asosiy vazifalari sifatida belgilash:
fuqarolarga huquqiy masalalar boʻyicha shu jumladan, onlayn maslahatlar va tushuntirishlar berish yoʻli bilan birlamchi bepul yuridik yordam koʻrsatish;
fuqarolarning huquqiy bilimlarini ijtimoiy-siyosiy oʻzgarishlar bilan uygʻun ravishda oshirib borish ishlariga koʻngillilarni safarbar etish;
fuqarolar tomonidan huquqiy maslahat berishga oid soʻrovlarni tahlil qilib borish, tahlil natijasiga koʻra huquqni qoʻllash amaliyoti va amaldagi qonunchilikni takomillashtirish yuzasidan takliflar ishlab chiqish;
aholining huquqiy ongi va huquqiy madaniyatini yuksaltirishda innovatsion usullarni, xorijiy davlatlarning bu boradagi ijobiy tajribalarini tatbiq etish;
“Advice.uz” (e-maslahat.uz) huquqiy axborot portalining muntazam ravishda yuritilishi va yangilab borilishini taʼminlash.
3. Belgilansinki, Muassasa va uning hududiy boʻlinmalari faoliyatini moliyalashtirish:
davlat subsidiyasi, shuningdek davlat ijtimoiy buyurtmasi doirasida Oʻzbekiston Respublikasi Adliya vazirligi, boshqa davlat organlari va tashkilotlarining shartnoma asosida Muassasaga toʻgʻridan-toʻgʻri ajratiladigan budjetdan tashqari mablagʻlari;
muassislar va tashabbuskorlar tomonidan ajratiladigan mablagʻlar;
yuridik va jismoniy shaxslarning homiylik xayriyalari;
xalqaro moliya institutlari va xorijiy hukumat moliya tashkilotlarining moliyaviy mablagʻlari;
qonunchilikda taqiqlanmagan boshqa manbalar hisobidan moliyalashtiriladi.
Adliya vazirligi Muassasaga har yili oʻzining budjetdan tashqari mablagʻlaridan davlat ijtimoiy buyurtmasi uchun ajratiladigan mablagʻlar miqdorini va ulardan foydalanish tartibini mustaqil belgilaydi.
4. Muassasaning markaziy apparati Toshkent shahar, Sayilgoh koʻchasi 5-uyda, hududiy boʻlinmalari va huquqiy maslahat byurolari zaruratga koʻra, tegishli hududiy adliya organlari yoki tuman (shahar) Davlat xizmatlari markazlari binolariga tekin foydalanish huquqi asosida joylashtirilsin.
5. Muassasaning markaziy apparati, hududiy boʻlinmalari va huquqiy maslahat byurolarini kompyuter texnikasi va boshqa zarur jihozlar bilan taʼminlash, ularni va ular joylashgan binolarni saqlash (kommunal xizmatlar, joriy taʼmirlash va boshqalar) bilan bogʻliq xarajatlar adliya organlarining budjetdan tashqari mablagʻlari va boshqa manbalar hisobidan moliyalashtiriladi.
6. Oʻzbekiston Milliy teleradiokompaniyasiga Adliya vazirligi bilan birgalikda “Advice.uz” (e-maslahat.uz) huquqiy axborot portali hamda “Madad” — muassasa shaklidagi nodavlat notijorat tashkilotining bepul huquqiy maslahat berish faoliyatini ommaviy axborot vositalarida keng yoritish tavsiya etilsin.
7. Oʻzbekiston Respublikasi Adliya vazirligining “Adolat” huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat unitar korxonalarini davlat muassasalari shaklida qayta tashkil etish toʻgʻrisidagi taklifi maʼqullansin.
9. Quyidagilar:
b) “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasasining asosiy vazifalari etib belgilansin:
Oʻzbekiston Respublikasi Qonunchilik maʼlumotlari milliy bazasi, “Notarius” avtomatlashtirilgan tizimi, “Advice.uz” (e-maslahat.uz) huquqiy axborot portali va vazirlik tomonidan yaratilgan boshqa axborot tizimlari faoliyatini kuzatib borish, serverlarga, telekommunikatsiya tarmoqlariga texnik xizmat koʻrsatish hamda axborot xavfsizligini taʼminlash;
Oʻzbekiston Respublikasi Adliya vazirligi tizimida “Elektron hukumat” axborot tizimlari doirasidagi loyihalarni amalga oshirish;
adliya organlari va muassasalarining barcha tuzilmalari faoliyatining samaradorligini oshirishga yoʻnaltirilgan zamonaviy axborot-kommunikatsiya texnologiyalarini keng joriy etish;
adliya organlari va muassasalarida axborotlashtirish sohasida tahlillar oʻtkazish va takliflar ishlab chiqish.
10. Belgilansinki:
a) 2019-yil 10-sentabrdan boshlab “Adolat” huquqiy axborot markazi” davlat muassasasi tomonidan “Oʻzbekiston Respublikasi qonunchilik toʻplami”, “Oʻzbekiston Respublikasining xalqaro shartnomalar toʻplami” (keyingi oʻrinlarda rasmiy nashrlar deb ataladi) autsorsing asosida nashr etiladi;
b) “Adolat” milliy huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasalariga Oʻzbekiston Respublikasi adliya vaziri tomonidan lavozimga tayinlanadigan va lavozimdan ozod qilinadigan direktorlar rahbarlik qiladi;
v) “Adolat” huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasalari xodimlariga Oʻzbekiston Respublikasi Vazirlar Mahkamasining 1997-yil 3-iyuldagi 339-son qarorida belgilangan davlat xizmatchilari lavozim maoshlariga ustama haqi qoʻllaniladi, shuningdek, avvalgi ish joyida uzoq yillik xizmati uchun berilgan ustama va qoʻshimcha toʻlovlar, maxsus va darajali unvonlar saqlab qolinadi;
g) quyidagilar “Adolat” huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasalari faoliyatini moliyalashtirish manbalari hisoblanadi:
Adliya organlari va muassasalarini rivojlantirish budjetdan tashqari jamgʻarmasi, shuningdek adliya organlari va muassasalarining boshqa budjetdan tashqari mablagʻlari;
xalqaro institutlar va tashkilotlar, yuridik va jismoniy shaxslarning grantlari va homiylik xayriyalari;
qonunchilik hujjatlarida taqiqlanmagan boshqa manbalar.
11. Oʻzbekiston Respublikasi Adliya vazirligi:
2020-yil 1-iyulga qadar Oʻzbekiston Respublikasi Qonun hujjatlari maʼlumotlari milliy bazasini modernizatsiya qilsin, jumladan, bunda “aqlli” izlash funksiyasi nazarda tutilsin;
rasmiy nashrlarni chop etish va realizatsiya qilish jarayonida ularning tannarxini arzonlashtirish choralarini koʻrsin;
ikki oy muddatda “Adolat” huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasalarining ustavlarini tasdiqlasin.
12. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
13. Mazkur qarorning bajarilishini nazorat qilish Oʻzbekiston Respublikasi adliya vaziri R.K. Davletov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 6-sentabr,
741-son