📅 2019-yil 21-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 21 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 21 сентября 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 21 September 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Республикаси Давлат геология ва минерал ресурслар қўмитаси тизимидаги «Сурхонгеология» давлат корхонаси фаолиятини ташкил этиш чора-тадбирлари тўғрисида
Сурхондарё вилояти минерал-хом ашё базасини жадал ривожлантириш, фойдали қазилмаларнинг янги конларини тезкор аниқлаш ва шу орқали ҳудудда янги ишлаб чиқариш объектларини ташкил этиш ҳамда вилоятда бажарилаётган геология-қидирув ишлари самарадорлигини ошириш мақсадида Вазирлар Маҳкамаси қарор қилади:
1. Ўзбекистон Республикаси Давлат геология ва минерал ресурслар қўмитаси ҳамда Сурхондарё вилояти ҳокимлигининг Ўзбекистон Республикаси Давлат геология ва минерал ресурслар қўмитаси тизимидаги «Ҳисоргеология» давлат корхонасининг Сурхондарё дала геология-қидирув экспедицияси негизида «Сурхонгеология» давлат корхонасини ташкил этиш тўғрисидаги таклифига розилик берилсин.
2. Қуйидагилар «Сурхонгеология» давлат корхонасининг асосий вазифалари ва фаолиятининг йўналишлари этиб белгилансин:
Сурхондарё вилояти минерал-хом ашё базасини жадал ривожлантириш, ҳудудда фойдали қазилмаларнинг янги турларини ва уларнинг саноатбоп конларини аниқлаш ҳамда янги ишлаб чиқариш объектларини ташкил этиш учун замин яратиш;
ҳудуднинг минерал-хом ашё базасини ривожлантириш ва кўпайтириш бўйича узоқ, ўрта муддатли ва йиллик давлат дастурларини ишлаб чиқиш ва амалга ошириш, бунда геология-қидирув ишларининг самарали бажарилишини таъминлаш;
геология-қидирув ишларини бажаришда замонавий техника ва технологияларни, жаҳонда эътироф этилган илғор услубларни, шу жумладан ахборот-коммуникация технологияларини кенг жорий этиш;
маҳаллий кадрларни тайёрлаш, уларнинг малакасини мунтазам равишда ошириш, замонавий билим олишлари ва тажриба орттиришлари учун кенг имкониятлар ва зарур шарт-шароитлар яратиш, меҳнатни рағбатлантиришнинг самарали механизмларини жорий қилиш.
3. Белгилаб қўйилсинки, «Сурхонгеология» давлат корхонасини сақлаш, ходимларнинг меҳнатига ҳақ тўлаш харажатлари, шунингдек, корхонанинг моддий-техник базасини ривожлантиришни молиялаштириш минерал-хом ашё базасини ривожлантириш ва кўпайтириш йиллик давлат дастурлари доирасида ажратиладиган Ўзбекистон Республикаси Давлат бюджети ва Ўзбекистон Республикаси Давлат геология ва минерал ресурслар қўмитасининг махсус ҳисоб рақамлари маблағлари, хўжалик шартномаларидан олинган даромадлар ҳамда қонун ҳужжатларида тақиқланмаган бошқа манбалар ҳисобига амалга оширилади.
4. Ўзбекистон Республикаси Давлат геология ва минерал ресурслар қўмитаси бир ой муддатда:
«Сурхонгеология» давлат корхонасининг ушбу қарорнинг 2-бандида белгиланган фаолияти йўналишлари ва асосий вазифалари самарали бажарилишини таъминлашга йўналтирилган уставини ва бошқарув ходимларининг чекланган сони 12 нафардан иборат тузилмасини ишлаб чиқсин ва тасдиқласин;
«Сурхонгеология» давлат корхонасининг белгиланган тартибда давлат рўйхатидан ўтказилишини ва кейинчалик унинг самарали фаолиятини таъминласин;
«Ҳисоргеология» давлат корхонасининг Сурхондарё дала геология-қидирув экспедицияси объектларида фойдаланилаётган асосий воситалар ва товар-моддий бойликларини «Сурхонгеология» давлат корхонасига оператив бошқариш ҳуқуқи билан ўтказилишини таъминласин.
5. «Сурхонгеология» давлат корхонаси томонидан жорий йилда геология-қидирув ишлари 2019 йилги минерал-хом ашё базасини ривожлантириш ва кўпайтириш давлат дастурида назарда тутилган Сурхондарё вилоятида амалга ошириладиган лойиҳалар доирасида бажарилиши белгилаб қўйилсин.
6. Ўзбекистон Республикаси Давлат активларини бошқариш агентлиги Сурхондарё вилояти ҳокимлиги билан биргаликда бир ой муддатда «Сурхонгеология» давлат корхонаси маъмурий ва ишлаб чиқариш биноларини жойлаштириш учун Сурхондарё вилояти, Бойсун тумани ва унга яқин ҳудуддаги мавжуд бўш турган бино-иншоотлар ажратилишини таъминласин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — молия вазири Ж.А. Қўчқаров ва Ўзбекистон Республикаси Давлат геология ва минерал ресурслар қўмитаси раиси Б.Ф. Исламов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 21 сентябрь,
791-сон
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Davlat geologiya va mineral resurslar qoʻmitasi tizimidagi “Surxongeologiya” davlat korxonasi faoliyatini tashkil etish chora-tadbirlari toʻgʻrisida
Surxondaryo viloyati mineral-xom ashyo bazasini jadal rivojlantirish, foydali qazilmalarning yangi konlarini tezkor aniqlash va shu orqali hududda yangi ishlab chiqarish obyektlarini tashkil etish hamda viloyatda bajarilayotgan geologiya-qidiruv ishlari samaradorligini oshirish maqsadida Vazirlar Mahkamasi qaror qiladi:
1. Oʻzbekiston Respublikasi Davlat geologiya va mineral resurslar qoʻmitasi hamda Surxondaryo viloyati hokimligining Oʻzbekiston Respublikasi Davlat geologiya va mineral resurslar qoʻmitasi tizimidagi “Hisorgeologiya” davlat korxonasining Surxondaryo dala geologiya-qidiruv ekspeditsiyasi negizida “Surxongeologiya” davlat korxonasini tashkil etish toʻgʻrisidagi taklifiga rozilik berilsin.
2. Quyidagilar “Surxongeologiya” davlat korxonasining asosiy vazifalari va faoliyatining yoʻnalishlari etib belgilansin:
Surxondaryo viloyati mineral-xom ashyo bazasini jadal rivojlantirish, hududda foydali qazilmalarning yangi turlarini va ularning sanoatbop konlarini aniqlash hamda yangi ishlab chiqarish obyektlarini tashkil etish uchun zamin yaratish;
hududning mineral-xom ashyo bazasini rivojlantirish va koʻpaytirish boʻyicha uzoq, oʻrta muddatli va yillik davlat dasturlarini ishlab chiqish va amalga oshirish, bunda geologiya-qidiruv ishlarining samarali bajarilishini taʼminlash;
geologiya-qidiruv ishlarini bajarishda zamonaviy texnika va texnologiyalarni, jahonda eʼtirof etilgan ilgʻor uslublarni, shu jumladan axborot-kommunikatsiya texnologiyalarini keng joriy etish;
mahalliy kadrlarni tayyorlash, ularning malakasini muntazam ravishda oshirish, zamonaviy bilim olishlari va tajriba orttirishlari uchun keng imkoniyatlar va zarur shart-sharoitlar yaratish, mehnatni ragʻbatlantirishning samarali mexanizmlarini joriy qilish.
3. Belgilab qoʻyilsinki, “Surxongeologiya” davlat korxonasini saqlash, xodimlarning mehnatiga haq toʻlash xarajatlari, shuningdek, korxonaning moddiy-texnik bazasini rivojlantirishni moliyalashtirish mineral-xom ashyo bazasini rivojlantirish va koʻpaytirish yillik davlat dasturlari doirasida ajratiladigan Oʻzbekiston Respublikasi Davlat budjeti va Oʻzbekiston Respublikasi Davlat geologiya va mineral resurslar qoʻmitasining maxsus hisob raqamlari mablagʻlari, xoʻjalik shartnomalaridan olingan daromadlar hamda qonun hujjatlarida taqiqlanmagan boshqa manbalar hisobiga amalga oshiriladi.
4. Oʻzbekiston Respublikasi Davlat geologiya va mineral resurslar qoʻmitasi bir oy muddatda:
“Surxongeologiya” davlat korxonasining ushbu qarorning 2-bandida belgilangan faoliyati yoʻnalishlari va asosiy vazifalari samarali bajarilishini taʼminlashga yoʻnaltirilgan ustavini va boshqaruv xodimlarining cheklangan soni 12 nafardan iborat tuzilmasini ishlab chiqsin va tasdiqlasin;
“Surxongeologiya” davlat korxonasining belgilangan tartibda davlat roʻyxatidan oʻtkazilishini va keyinchalik uning samarali faoliyatini taʼminlasin;
“Hisorgeologiya” davlat korxonasining Surxondaryo dala geologiya-qidiruv ekspeditsiyasi obyektlarida foydalanilayotgan asosiy vositalar va tovar-moddiy boyliklarini “Surxongeologiya” davlat korxonasiga operativ boshqarish huquqi bilan oʻtkazilishini taʼminlasin.
5. “Surxongeologiya” davlat korxonasi tomonidan joriy yilda geologiya-qidiruv ishlari 2019-yilgi mineral-xom ashyo bazasini rivojlantirish va koʻpaytirish davlat dasturida nazarda tutilgan Surxondaryo viloyatida amalga oshiriladigan loyihalar doirasida bajarilishi belgilab qoʻyilsin.
6. Oʻzbekiston Respublikasi Davlat aktivlarini boshqarish agentligi Surxondaryo viloyati hokimligi bilan birgalikda bir oy muddatda “Surxongeologiya” davlat korxonasi maʼmuriy va ishlab chiqarish binolarini joylashtirish uchun Surxondaryo viloyati, Boysun tumani va unga yaqin hududdagi mavjud boʻsh turgan bino-inshootlar ajratilishini taʼminlasin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqarov va Oʻzbekiston Respublikasi Davlat geologiya va mineral resurslar qoʻmitasi raisi B.F. Islamov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 21-sentabr,
791-son