📅 2019-yil 4-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 4 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 4 октября 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 4 October 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Савдони молиялаштириш халқаро ислом корпорацияси маблағларидан самарали фойдаланиш чора-тадбирлари тўғрисида
Қишлоқ хўжалигида таркибий ислоҳотларни янада чуқурлаштириш, тўғридан-тўғри инвестицияларни жалб қилишни рағбатлантириш, пахта хом ашёси етиштиришнинг самарали усулларини жорий қилиш, уни қайта ишлаш ва тайёрлаш, шу жумладан чуқур қайта ишлаш асосида ишлаб чиқаришни ташкил этиш мақсадида Вазирлар Маҳкамаси қарор қилади:
1. Ўзбекистон Республикаси Молия вазирлигининг:
Савдони молиялаштириш халқаро ислом корпорацияси билан пахта хом ашёсини етиштириш харажатларини ва якуний ҳисоб-китобларни молиялаштириш учун 14 ойгача бўлган муддатга йиллик LIBOR+1,4 фоизгача фоиз ставкасида 100 миллион АҚШ долларигача миқдордаги кредитни 2 та транш орқали ажратиш бўйича келишувга эришилганлиги;
Вазирлар Маҳкамасининг «Қишлоқ хўжалигида бозор механизмларини кенг жорий этиш чора-тадбирлари тўғрисида» 2018 йил 28 февралдаги 149-сон қарорига мувофиқ пахта хом ашёсини етиштириш харажатларини молиялаштириш миллий валютада йиллик 5 фоиз ставкада, шу жумладан банкнинг 1,5 фоиз миқдоридаги маржаси билан ажратилиши белгиланганлиги маълумот учун қабул қилинсин.
2. Ўзбекистон Республикаси Молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси:
Ўзбекистон Республикаси Молия вазирлиги ва Савдони молиялаштириш халқаро ислом корпорацияси ўртасида тузиладиган шартнома шартларига мувофиқ бир марталик тўловларни белгиланган муддатларда тўлаб берилишини;
пахта хом ашёсини етишириш харажатларини ва якуний ҳисоб-китобларни молиялаштириш учун жалб қилинаётган 100 миллион АҚШ долларигача миқдордаги кредит бўйича барча харажатларни, шу жумладан валюта курслари ўртасидаги ва фоиз тўловларида юзага келадиган зарарларни жамғарма харажатларига олиб борилишини ҳамда жалб қилинган кредитнинг белгиланган муддатларда қайтарилишини;
жалб қилинаётган 100 миллион АҚШ долларигача бўлган миқдордаги кредитни миллий валютага конвертация қилган ҳолда, пахта хом ашёси етиштириш харажатларини ва якуний ҳисоб-китоблар миллий валютада молиялаштирилишини таъминласин.
3. Ўзбекистон Республикаси молия вазири ўринбосари О. Исаковга Ўзбекистон Республикаси ва Савдони молиялаштириш халқаро ислом корпорацияси ўртасида тузиладиган «Пахта хом ашёсини етиштириш харажатларини ва якуний ҳисоб-китобларни молиялаштириш» лойиҳаси бўйича «Murabaha» молиявий битимини Ўзбекистон Республикаси номидан имзолаш ваколати берилсин.
Мазкур лойиҳа доирасида Савдони молиялаштириш халқаро ислом корпорацияси ва Ўзбекистон Республикаси Молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси ўртасида тузиладиган агентлик битимини имзолаш ваколати жамғарма директорига берилсин.
4. Ўзбекистон Республикаси Адлия вазирлиги Ўзбекистон Республикаси ва Савдони молиялаштириш халқаро ислом корпорацияси ўртасида тузиладиган «Пахта хом ашёсини етиштириш харажатларини ва якуний ҳисоб-китобларни молиялаштириш» лойиҳаси доирасида «Murabaha» молиявий битими ва агентлик битимига белгиланган тартибда юридик хулоса беришни таъминласин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — молия вазири Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 4 октябрь,
845-сон
Oʻzbekiston Respublikasi Vazirlar Mahkamasining
qarori
Savdoni moliyalashtirish xalqaro islom korporatsiyasi mablagʻlaridan samarali foydalanish chora-tadbirlari toʻgʻrisida
Qishloq xoʻjaligida tarkibiy islohotlarni yanada chuqurlashtirish, toʻgʻridan toʻgʻri investitsiyalarni jalb qilishni ragʻbatlantirish, paxta xomashyosi yetishtirishning samarali usullarini joriy qilish, uni qayta ishlash va tayyorlash, shu jumladan chuqur qayta ishlash asosida ishlab chiqarishni tashkil etish maqsadida Vazirlar Mahkamasi qaror qiladi:
1. Oʻzbekiston Respublikasi Moliya vazirligining:
Savdoni moliyalashtirish xalqaro islom korporatsiyasi bilan paxta xomashyosini yetishtirish xarajatlarini va yakuniy hisob-kitoblarni moliyalashtirish uchun 14 oygacha boʻlgan muddatga yillik LIBOR+1,4 foizgacha foiz stavkasida 100 million AQSh dollarigacha miqdordagi kreditni 2 ta transh orqali ajratish boʻyicha kelishuvga erishilganligi;
Vazirlar Mahkamasining “Qishloq xoʻjaligida bozor mexanizmlarini keng joriy etish chora-tadbirlari toʻgʻrisida” 2018-yil 28-fevraldagi 149-son qaroriga muvofiq paxta xomashyosini yetishtirish xarajatlarini moliyalashtirish milliy valyutada yillik 5 foiz stavkada, shu jumladan bankning 1,5 foiz miqdoridagi marjasi bilan ajratilishi belgilanganligi maʼlumot uchun qabul qilinsin.
2. Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi:
Oʻzbekiston Respublikasi Moliya vazirligi va Savdoni moliyalashtirish xalqaro islom korporatsiyasi oʻrtasida tuziladigan shartnoma shartlariga muvofiq bir martalik toʻlovlarni belgilangan muddatlarda toʻlab berilishini;
paxta xomashyosini yetishirish xarajatlarini va yakuniy hisob-kitoblarni moliyalashtirish uchun jalb qilinayotgan 100 million AQSh dollarigacha miqdordagi kredit boʻyicha barcha xarajatlarni, shu jumladan valyuta kurslari oʻrtasidagi va foiz toʻlovlarida yuzaga keladigan zararlarni jamgʻarma xarajatlariga olib borilishini hamda jalb qilingan kreditning belgilangan muddatlarda qaytarilishini;
jalb qilinayotgan 100 million AQSh dollarigacha boʻlgan miqdordagi kreditni milliy valyutaga konvertatsiya qilgan holda, paxta xomashyosi yetishtirish xarajatlarini va yakuniy hisob-kitoblar milliy valyutada moliyalashtirilishini taʼminlasin.
3. Oʻzbekiston Respublikasi moliya vaziri oʻrinbosari O. Isakovga Oʻzbekiston Respublikasi va Savdoni moliyalashtirish xalqaro islom korporatsiyasi oʻrtasida tuziladigan “Paxta xomashyosini yetishtirish xarajatlarini va yakuniy hisob-kitoblarni moliyalashtirish” loyihasi boʻyicha “Murabaha” moliyaviy bitimini Oʻzbekiston Respublikasi nomidan imzolash vakolati berilsin.
Mazkur loyiha doirasida Savdoni moliyalashtirish xalqaro islom korporatsiyasi va Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi oʻrtasida tuziladigan agentlik bitimini imzolash vakolati jamgʻarma direktoriga berilsin.
4. Oʻzbekiston Respublikasi Adliya vazirligi Oʻzbekiston Respublikasi va Savdoni moliyalashtirish xalqaro islom korporatsiyasi oʻrtasida tuziladigan “Paxta xomashyosini yetishtirish xarajatlarini va yakuniy hisob-kitoblarni moliyalashtirish” loyihasi doirasida “Murabaha” moliyaviy bitimi va agentlik bitimiga belgilangan tartibda yuridik xulosa berishni taʼminlasin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 4-oktabr,
845-son