📅 2019-yil 25-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 25 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 25 ноября 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 25 November 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Фарғона вилоятида интенсив технологияларга асосланган боғ ва токзорлар барпо этиш лойиҳасини амалга оширишга доир чора-тадбирлар тўғрисида
Қишлоқ хўжалиги ишлаб чиқаришига замонавий бозор муносабатларининг татбиқ этилишини таъминлаш, 2019-2020 йилларда Фарғона вилоятининг Ўзбекистон, Олтиариқ ва Қува туманларида, шунингдек, Қувасой шаҳрида интенсив технологияларга асосланган, экспортбоп навли боғ ва токзорлар барпо этиш лойиҳасини самарали амалга оширишни таъминлаш мақсадида Вазирлар Маҳкамаси қарор қилади:
1. Ўзбекистон Республикаси Қишлоқ хўжалиги вазирлиги, Иқтисодиёт ва саноат вазирлиги, Давлат активларини бошқариш агентлиги, Ўзбекистон фермер, деҳқон хўжаликлари ва томорқа ер эгалари кенгаши, Фарғона вилояти ҳокимлиги ҳамда лойиҳани амалга оширишда иштирок этадиган маҳаллий оператор — «Green control» масъулияти чекланган жамиятининг:
2019-2020 йилларда Фарғона вилоятининг Ўзбекистон, Олтиариқ, Қува, Қўштепа туманларида, шунингдек, Қувасой шаҳрида 2000 гектар ер майдонида дастлабки қиймати 38,6 млн. АҚШ долларига тенг бўлган интенсив технологияларга асосланган, экспортбоп навли боғ ва токзорларни тажриба тариқасида акциядорлик жамияти орқали барпо этиш;
лойиҳани амалга ошириш учун Фарғона вилояти Фарғона шаҳрида акциядорлик жамияти шаклидаги тадбиркорлик субъектини таъсис этиш;
акциядорлик жамияти устав капиталини Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлигига — 13 фоиз, Фарғона вилояти ҳокимлигига — 2 фоиз, маҳаллий ва хорижий инвесторларга — 85 фоиз миқдорида тақсимлаш тўғрисидаги таклифлари маъқуллансин.
2. Фарғона вилояти ҳокимлиги лойиҳани амалга ошириш учун зарур бўлган ер майдонини бир ой муддатда белгиланган тартибда ажратилишини таъминласин.
3. Белгилансинки, Ўзбекистон Республикаси Қишлоқ хўжалиги вазирлиги, Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлиги ҳамда Боғдорчилик ва иссиқхона хўжалигини ривожлантириш агентлигининг акциядорлик жамиятининг устав капиталидаги улушлари қуйидаги манбалар ҳисобидан шакллантирилади:
Ўзбекистон Республикаси Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлигининг Узум етиштирувчилар ва вино тайёрловчиларни қўллаб-қувватлаш жамғармаси маблағлари;
Ўзбекистон Республикаси Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлиги қошидаги Боғдорчилик ва иссиқхона хўжалигини ривожлантириш жамғармаси маблағлари.
4. Ўзбекистон Республикаси Қишлоқ хўжалиги вазирлигига:
ҳамда Фарғона вилояти ҳокимлигига истисно тариқасида, акциядорлик жамиятининг устав капиталидаги давлат пакетлари бўйича акциядор ҳуқуқларини амалга ошириш;
Ўзбекистон Республикасининг йирик шаҳарларида лойиҳа тақдимотларини ўтказиш, аҳоли ва тадбиркорлик субъектларининг бўш турган маблағларини лойиҳани амалга оширишга жалб этиш, маблағлардан мақсадли ва самарали ишлатилиши таъминлаш мақсадида аудиторлик ва консалтинг хизматлари кўрсатувчи дунёнинг «катта тўртлиги»га кирган компаниялардан бирини жалб этиш ҳуқуқи берилсин.
5. Ўзбекистон Республикаси Қишлоқ хўжалиги вазирлиги Иқтисодиёт ва саноат вазирлиги, Ўзбекистон фермер, деҳқон хўжаликлари ва томорқа ер эгалари кенгаши билан биргаликда интенсив технологияларга асосланган боғ ва токзорларни акциядорлик жамияти орқали барпо этиш натижаларига кўра, 2020 йил 1 декабрга қадар мазкур лойиҳани республиканинг бошқа ҳудудларига татбиқ этиш тўғрисида асослантирилган таклифларни Вазирлар Маҳкамасига киритсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича маслаҳатчиси А.Д. Вахабов ва Ўзбекистон Республикаси қишлоқ хўжалиги вазири Ж.А. Ходжаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 25 ноябрь,
950-сон
Oʻzbekiston Respublikasi Vazirlar Mahkamasining
qarori
Fargʻona viloyatida intensiv texnologiyalarga asoslangan bogʻ va tokzorlar barpo etish loyihasini amalga oshirishga doir chora-tadbirlar toʻgʻrisida
Qishloq xoʻjaligi ishlab chiqarishiga zamonaviy bozor munosabatlarining tatbiq etilishini taʼminlash, 2019-2020-yillarda Fargʻona viloyatining Oʻzbekiston, Oltiariq va Quva tumanlarida, shuningdek, Quvasoy shahrida intensiv texnologiyalarga asoslangan, eksportbop navli bogʻ va tokzorlar barpo etish loyihasini samarali amalga oshirishni taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Qishloq xoʻjaligi vazirligi, Iqtisodiyot va sanoat vazirligi, Davlat aktivlarini boshqarish agentligi, Oʻzbekiston fermer, dehqon xoʻjaliklari va tomorqa yer egalari kengashi, Fargʻona viloyati hokimligi hamda loyihani amalga oshirishda ishtirok etadigan mahalliy operator — “Green control” masʼuliyati cheklangan jamiyatining:
2019-2020-yillarda Fargʻona viloyatining Oʻzbekiston, Oltiariq, Quva, Qoʻshtepa tumanlarida, shuningdek, Quvasoy shahrida 2000 gektar yer maydonida dastlabki qiymati 38,6 mln. AQSh dollariga teng boʻlgan intensiv texnologiyalarga asoslangan, eksportbop navli bogʻ va tokzorlarni tajriba tariqasida aksiyadorlik jamiyati orqali barpo etish;
loyihani amalga oshirish uchun Fargʻona viloyati Fargʻona shahrida aksiyadorlik jamiyati shaklidagi tadbirkorlik subyektini taʼsis etish;
aksiyadorlik jamiyati ustav kapitalini Qishloq xoʻjaligi vazirligi huzuridagi Bogʻdorchilik va issiqxona xoʻjaligini rivojlantirish agentligiga — 13 foiz, Fargʻona viloyati hokimligiga — 2 foiz, mahalliy va xorijiy investorlarga — 85 foiz miqdorida taqsimlash toʻgʻrisidagi takliflari maʼqullansin.
2. Fargʻona viloyati hokimligi loyihani amalga oshirish uchun zarur boʻlgan yer maydonini bir oy muddatda belgilangan tartibda ajratilishini taʼminlasin.
3. Belgilansinki, Oʻzbekiston Respublikasi Qishloq xoʻjaligi vazirligi, Qishloq xoʻjaligi vazirligi huzuridagi Uzumchilik va vinochilikni rivojlantirish agentligi hamda Bogʻdorchilik va issiqxona xoʻjaligini rivojlantirish agentligining aksiyadorlik jamiyatining ustav kapitalidagi ulushlari quyidagi manbalar hisobidan shakllantiriladi:
Oʻzbekiston Respublikasi Qishloq xoʻjaligi vazirligi huzuridagi Uzumchilik va vinochilikni rivojlantirish agentligining Uzum yetishtiruvchilar va vino tayyorlovchilarni qoʻllab-quvvatlash jamgʻarmasi mablagʻlari;
Oʻzbekiston Respublikasi Qishloq xoʻjaligi vazirligi huzuridagi Bogʻdorchilik va issiqxona xoʻjaligini rivojlantirish agentligi qoshidagi Bogʻdorchilik va issiqxona xoʻjaligini rivojlantirish jamgʻarmasi mablagʻlari.
4. Oʻzbekiston Respublikasi Qishloq xoʻjaligi vazirligiga:
hamda Fargʻona viloyati hokimligiga istisno tariqasida, aksiyadorlik jamiyatining ustav kapitalidagi davlat paketlari boʻyicha aksiyador huquqlarini amalga oshirish;
Oʻzbekiston Respublikasining yirik shaharlarida loyiha taqdimotlarini oʻtkazish, aholi va tadbirkorlik subyektlarining boʻsh turgan mablagʻlarini loyihani amalga oshirishga jalb etish, mablagʻlardan maqsadli va samarali ishlatilishi taʼminlash maqsadida auditorlik va konsalting xizmatlari koʻrsatuvchi dunyoning “katta toʻrtligi”ga kirgan kompaniyalardan birini jalb etish huquqi berilsin.
5. Oʻzbekiston Respublikasi Qishloq xoʻjaligi vazirligi Iqtisodiyot va sanoat vazirligi, Oʻzbekiston fermer, dehqon xoʻjaliklari va tomorqa yer egalari kengashi bilan birgalikda intensiv texnologiyalarga asoslangan bogʻ va tokzorlarni aksiyadorlik jamiyati orqali barpo etish natijalariga koʻra, 2020-yil 1-dekabrga qadar mazkur loyihani respublikaning boshqa hududlariga tatbiq etish toʻgʻrisida asoslantirilgan takliflarni Vazirlar Mahkamasiga kiritsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha maslahatchisi A.D. Vaxabov va Oʻzbekiston Respublikasi qishloq xoʻjaligi vaziri J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 25-noyabr,
950-son