📅 2019-yil 28-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 28 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 28 ноября 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 28 November 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Давлат бошқарувида илғор давлат менежменти ва «ақлли» бошқарув принципларини босқичма-босқич жорий этишга доир қўшимча чора-тадбирлар тўғрисида
Ўзбекистон Республикаси Президентининг «2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Фаол инвестициялар ва ижтимоий ривожланиш йили»да амалга оширишга оид давлат дастури тўғрисида» 2019 йил 17 январдаги ПФ-5635-сон Фармони ижросини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Президенти ҳузуридаги Давлат бошқаруви академияси (кейинги ўринларда Академия деб аталади), Инновацион ривожланиш вазирлиги, Бандлик ва меҳнат муносабатлари вазирлиги, Ахборот технологиялари ва коммуникацияларини ривожлантириш вазирлигининг Корея Республикаси, Бирлашган Араб Амирликлари ва Россия Федерацияси давлат бошқаруви соҳасидаги илғор тажрибаси асосида:
давлат органлари ва ташкилотлари учун профессионал бошқарувчиларни тайёрлаш, қайта тайёрлаш ва малакасини ошириш тизимида масофавий таълим технологияларини ўз ичига олган давлат бошқарувида менежмент ва «ақлли» бошқарув принципларини босқичма-босқич жорий этиш;
давлат органлари ва ташкилотлари учун профессионал бошқарувчиларни тайёрлаш, қайта тайёрлаш ва малакасини ошириш тизимида масофавий таълим технологияларини жорий қилиш орқали «Бошқарув кадрлари портали»ни (кейинги ўринларда Портал деб аталади) яратиш ва уни 2020 йил 1 мартга қадар ишга тушириш тўғрисидаги таклифи маъқуллансин.
Бунда, Порталнинг техник ҳужжатларини «Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Электрон ҳукумат ва рақамли иқтисодиёт лойиҳаларини бошқариш маркази» ДУКдан белгиланган тартибда комплекс экспертизадан ўтказиш таъминлансин.
2. Қуйидагилар Порталнинг асосий вазифалари этиб белгилансин:
портал фойдаланувчиларининг ягона электрон базасини шакллантириш ва янгилаб бориш, шунингдек уларнинг касбий ва шахсий ўсишига кўмаклашувчи масофавий таълим технологияларини жорий этиш;
давлат органлари ва ташкилотлари учун профессионал бошқарувчиларни масофавий ўқитиш орқали уларни тайёрлаш, қайта тайёрлаш ва малакасини ошириш тизимини жорий қилиш;
портал фойдаланувчилари билим, кўникма ва компетенциялари, шунингдек уларнинг фаолияти натижаларига доимий равишда баҳо бериб бориш;
портал фойдаланувчиларига замонавий билимларни, ахборотларни доимий ва тизимли равишда етказиб бориш.
3. Белгилансинки:
Академия, Ўзбекистон Республикаси Инновацион ривожланиш вазирлиги ҳамда Ахборот технологиялари ва коммуникацияларини ривожлантириш вазирлиги Портални ишлаб чиқиш ва ишга тушириш билан боғлиқ ташкилий-техник чора-тадбирларни ўз вақтида ва сифатли амалга ошириш учун масъул ҳисобланади;
Портал ва унинг мобил иловасини яратиш ҳамда хизмат кўрсатилиши билан боғлиқ барча харажатлар Ўзбекистон Республикаси Инновацион ривожланиш вазирлигининг Инновацион ривожланиш ва новаторлик ғояларини қўллаб-қувватлаш жамғармаси маблағлари ҳисобидан молиялаштирилади.
4. Академия Ўзбекистон Республикаси Бандлик ва меҳнат муносабатлари вазирлиги ҳамда Тошкент вилояти ҳокимлиги билан биргаликда:
2019 йил 1 декабрдан бошлаб Тошкент вилояти Бўка тумани ва Ангрен шаҳрида тажриба-синов тариқасида раҳбар кадрлар фаолияти самарадорлигига доимий равишда баҳо бериб бориш тизимини жорий этсин ва ушбу тизимни 2020 йил 1 августга кадар амалга оширсин;
2020 йил 1 сентябрга кадар тажриба-синов якунлари бўйича уни кейинчалик бутун республика ҳудудида жорий этиш юзасидан таклифларни ишлаб чиқиб, Вазирлар Маҳкамасига киритсин.
5. Ўзбекистон Республикаси Адлия вазирлиги, Ўзбекистон Республикаси Президенти ҳузуридаги Лойиҳа бошқаруви миллий агентлиги ҳамда Савдо-саноат палатаси билан биргаликда 2020 йил 1 февралга қадар давлат органларининг «Халққа — кўмакчи, тадбиркорларга — бизнес ҳамкор» сифатида фаолият кўрсатишини кенгайтириш мақсадида махсус электрон платформани яратиш ва ишга туширишни таъминласин.
6. Академия икки ой муддатда:
давлат органлари ва ташкилотлари фаолиятини бевосита фуқаролар билан ишлашга ихтисослаштириш ва давлат органларининг «Халққа — кўмакчи, тадбиркорларга — бизнес ҳамкор» сифатида фаолият кўрсатишига хизмат қилувчи қисқа муддатли ўқув курсларини;
бошқарув кадрларини тайёрлаш, қайта тайёрлаш ва малакасини ошириш ўқув дастурларига илғор давлат менежменти, шу жумладан стратегик менежмент, риск менежменти ҳамда «ақлли» бошқарув принципларининг замонавий усулларини ўргатиш бўйича ўқув курсларини ташкил этиш чораларини кўрсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдухакимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 28 ноябрь,
959-сон
Oʻzbekiston Respublikasi Vazirlar Mahkamasining
qarori
Davlat boshqaruvida ilgʻor davlat menejmenti va “aqlli” boshqaruv prinsiplarini bosqichma-bosqich joriy etishga doir qoʻshimcha chora-tadbirlar toʻgʻrisida
Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid davlat dasturi toʻgʻrisida” 2019-yil 17-yanvardagi PF-5635-son Farmoni ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidenti huzuridagi Davlat boshqaruvi akademiyasi (keyingi oʻrinlarda Akademiya deb ataladi), Innovatsion rivojlanish vazirligi, Bandlik va mehnat munosabatlari vazirligi, Axborot texnologiyalari va kommunikatsiyalarini rivojlantirish vazirligining Koreya Respublikasi, Birlashgan Arab Amirliklari va Rossiya Federatsiyasi davlat boshqaruvi sohasidagi ilgʻor tajribasi asosida:
davlat organlari va tashkilotlari uchun professional boshqaruvchilarni tayyorlash, qayta tayyorlash va malakasini oshirish tizimida masofaviy taʼlim texnologiyalarini oʻz ichiga olgan davlat boshqaruvida menejment va “aqlli” boshqaruv prinsiplarini bosqichma-bosqich joriy etish;
davlat organlari va tashkilotlari uchun professional boshqaruvchilarni tayyorlash, qayta tayyorlash va malakasini oshirish tizimida masofaviy taʼlim texnologiyalarini joriy qilish orqali “Boshqaruv kadrlari portali”ni (keyingi oʻrinlarda Portal deb ataladi) yaratish va uni 2020-yil 1-martga qadar ishga tushirish toʻgʻrisidagi taklifi maʼqullansin.
Bunda, Portalning texnik hujjatlarini “Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Elektron hukumat va raqamli iqtisodiyot loyihalarini boshqarish markazi” DUKdan belgilangan tartibda kompleks ekspertizadan oʻtkazish taʼminlansin.
2. Quyidagilar Portalning asosiy vazifalari etib belgilansin:
portal foydalanuvchilarining yagona elektron bazasini shakllantirish va yangilab borish, shuningdek ularning kasbiy va shaxsiy oʻsishiga koʻmaklashuvchi masofaviy taʼlim texnologiyalarini joriy etish;
davlat organlari va tashkilotlari uchun professional boshqaruvchilarni masofaviy oʻqitish orqali ularni tayyorlash, qayta tayyorlash va malakasini oshirish tizimini joriy qilish;
portal foydalanuvchilari bilim, koʻnikma va kompetensiyalari, shuningdek ularning faoliyati natijalariga doimiy ravishda baho berib borish;
portal foydalanuvchilariga zamonaviy bilimlarni, axborotlarni doimiy va tizimli ravishda yetkazib borish.
3. Belgilansinki:
Akademiya, Oʻzbekiston Respublikasi Innovatsion rivojlanish vazirligi hamda Axborot texnologiyalari va kommunikatsiyalarini rivojlantirish vazirligi Portalni ishlab chiqish va ishga tushirish bilan bogʻliq tashkiliy-texnik chora-tadbirlarni oʻz vaqtida va sifatli amalga oshirish uchun masʼul hisoblanadi;
Portal va uning mobil ilovasini yaratish hamda xizmat koʻrsatilishi bilan bogʻliq barcha xarajatlar Oʻzbekiston Respublikasi Innovatsion rivojlanish vazirligining Innovatsion rivojlanish va novatorlik gʻoyalarini qoʻllab-quvvatlash jamgʻarmasi mablagʻlari hisobidan moliyalashtiriladi.
4. Akademiya Oʻzbekiston Respublikasi Bandlik va mehnat munosabatlari vazirligi hamda Toshkent viloyati hokimligi bilan birgalikda:
2019-yil 1-dekabrdan boshlab Toshkent viloyati Boʻka tumani va Angren shahrida tajriba-sinov tariqasida rahbar kadrlar faoliyati samaradorligiga doimiy ravishda baho berib borish tizimini joriy etsin va ushbu tizimni 2020-yil 1-avgustga kadar amalga oshirsin;
2020-yil 1-sentabrga kadar tajriba-sinov yakunlari boʻyicha uni keyinchalik butun respublika hududida joriy etish yuzasidan takliflarni ishlab chiqib, Vazirlar Mahkamasiga kiritsin.
5. Oʻzbekiston Respublikasi Adliya vazirligi, Oʻzbekiston Respublikasi Prezidenti huzuridagi Loyiha boshqaruvi milliy agentligi hamda Savdo-sanoat palatasi bilan birgalikda 2020-yil 1-fevralga qadar davlat organlarining “Xalqqa — koʻmakchi, tadbirkorlarga — biznes hamkor” sifatida faoliyat koʻrsatishini kengaytirish maqsadida maxsus elektron platformani yaratish va ishga tushirishni taʼminlasin.
6. Akademiya ikki oy muddatda:
davlat organlari va tashkilotlari faoliyatini bevosita fuqarolar bilan ishlashga ixtisoslashtirish va davlat organlarining “Xalqqa — koʻmakchi, tadbirkorlarga — biznes hamkor” sifatida faoliyat koʻrsatishiga xizmat qiluvchi qisqa muddatli oʻquv kurslarini;
boshqaruv kadrlarini tayyorlash, qayta tayyorlash va malakasini oshirish oʻquv dasturlariga ilgʻor davlat menejmenti, shu jumladan strategik menejment, risk menejmenti hamda “aqlli” boshqaruv prinsiplarining zamonaviy usullarini oʻrgatish boʻyicha oʻquv kurslarini tashkil etish choralarini koʻrsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 28-noyabr,
959-son