📅 2019-yil 6-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 6 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 декабря 2019 г. · Постановления Кабинета Министров
Официальный текст. Официальный документ. Редакционные примечания не включены.
📅 6 December 2019 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
МАНЗИЛЛИ РЎЙХАТИ
ТАРКИБИ
Наманган вилоятининг Поп ва Мингбулоқ туманларида фойдаланишдан чиққан ерларни фойдаланишга киритишни давлат-хусусий шериклик асосида ташкил этиш чора-тадбирлари тўғрисида
Ўзбекистон Республикаси Президентининг «Қишлоқ хўжалигида ер ва сув ресурсларидан самарали фойдаланиш чора-тадбирлари тўғрисида» 2019 йил 17 июндаги ПФ-5742-сон Фармонига мувофиқ ҳамда қишлоқ хўжалигида таркибий ислоҳотларни янада чуқурлаштириш, соҳага тўғридан-тўғри инвестициялар жалб этишни рағбатлантириш, қишлоқ хўжалигида давлат-хусусий шерикликни ривожлантириш, Наманган вилоятининг Поп ва Мингбулоқ туманларида фойдаланишдан чиқиб кетган суғориладиган, фойдаланилмаётган бўз ва яйлов, шунингдек, ўрмон фонди ерларини фойдаланишга киритиш ва улардан самарали фойдаланишни синов тариқасида давлат-хусусий шериклик асосида ташкил этиш мақсадида Вазирлар Маҳкамаси қарор қилади:
1. Наманган вилоятининг Поп ва Мингбулоқ туманлари қишлоқ хўжалигида қайта тикланадиган ва фойдаланишга киритиладиган ер майдонларининг манзилли рўйхати 1-иловага мувофиқ тасдиқлансин.
2. Ўзбекистон Республикаси Қишлоқ хўжалиги вазирлигига Молия вазирлиги, Сув хўжалиги вазирлиги, Ер ресурслари, геодезия, картография ва давлат кадастри давлат қўмитаси, Давлат геология ва минерал ресурслар қўмитаси ва Наманган вилояти ҳокимлиги билан келишган ҳолда 1-иловадаги манзилли рўйхатга, заруратга кўра, ўзгартиришлар киритиш ҳуқуқи берилсин.
3. Белгилансинки:
Ўзбекистон Республикаси Қишлоқ хўжалиги вазирлиги лойиҳа бўйича давлат шериги;
Наманган вилояти ҳокимлиги «Ягона буюртмачи хизмати» инжиниринг компанияси — лойиҳа буюртмачиси ҳисобланади.
4. Наманган вилояти ҳокимлиги Ўзбекистон Республикаси Қишлоқ хўжалиги вазирлиги билан биргаликда:
қайта тикланадиган ва фойдаланишга киритиладиган ер майдонларида яратиладиган зарур инфратузилма объектларини лойиҳалаштириш бўйича бир ой муддатда белгиланган тартибда танлов эълон қилинишини;
лойиҳалар рўйхати шакллантирилишини таъминласин.
5. Ўзбекистон Республикаси Қишлоқ хўжалиги вазирлиги, Сув хўжалиги вазирлиги, Ер ресурслари, геодезия, картография ва давлат кадастри давлат қўмитаси мазкур қарорга 1-иловада қайд этилган ер майдонларида яратиладиган инфратузилма объектларининг лойиҳаларини ишлаб чиқишни тендер асосида ташкил этишда лойиҳа буюртмачисига кўмаклашсин.
6. Ўзбекистон Республикаси Қишлоқ хўжалиги вазирлиги Молия вазирлиги ҳузуридаги Давлат-хусусий шерикликни ривожлантириш агентлиги (кейинги ўринларда Агентлик деб аталади) билан биргаликда:
қишлоқ хўжалигида фойдаланишдан чиқиб кетган суғориладиган, фойдаланилмаётган бўз ерларни ва яйловларни, шунингдек, ўрмон фонди ерларини фойдаланишга киритиш ва улардан самарали фойдаланишда давлат-хусусий шериклик лойиҳасининг концепциясини ишлаб чиқсин ва икки ой муддатда қонун ҳужжатларида белгиланган тартибда тасдиқласин;
ўз расмий веб-сайтларида давлат-хусусий шериклик лойиҳаси концепциясини тайёрлаш жараёнида хусусий шериклар тендер ўтказиш орқали танлаб олиниши ҳақидаги маълумотларни жойлаштирсин.
7. Белгилаб қўйилсинки:
давлат-хусусий шериклик тўғрисидаги битим Ўзбекистон Республикаси Қишлоқ хўжалиги вазирлиги томонидан ўтказиладиган тендер натижаларига кўра тузилади;
лойиҳани амалга ошириш доирасида давлат-хусусий шериклик тўғрисидаги битим тузган хусусий шерикка Ўзбекистон Республикаси Президентининг «Қишлоқ хўжалигида ер ва сув ресурсларидан самарали фойдаланиш чора-тадбирлари тўғрисида» 2019 йил 17 июндаги ПФ-5742-сон Фармонида белгиланган имтиёзлар берилади;
лойиҳа доирасида қурилган, барпо этилган, реконструкция қилинган давлат-хусусий шериклик лойиҳасини рўёбга чиқариш доирасида амалга ошириладиган сув, энергетика, транспорт ва бошқа зарур инфратузилма объектлари давлат-хусусий шериклик объектлари ҳисобланади, давлат-хусусий шериклик тўғрисидаги битимнинг амал қилиш муддати тугагандан кейин ушбу объектлар давлат шеригига қайтарилади.
8. Қуйидагилар давлат-хусусий шериклик шартлари асосида Наманган вилоятининг Поп ва Мингбулоқ туманларида фойдаланишдан чиққан ерларни фойдаланишга киритиш лойиҳаларини молиялаштириш манбалари этиб белгилансин:
хусусий шерикнинг маблағлари;
халқаро молия институтлари маблағлари;
қонун ҳужжатларида тақиқланмаган бошқа манбалар.
9. Наманган вилоятининг Поп ва Мингбулоқ туманларида давлат-хусусий шериклик тўғрисидаги битимни тузиш ҳуқуқи бўйича тендер ғолибини аниқлаш комиссияси (кейинги ўринларда комиссия деб аталади) таркиби 2-иловага мувофиқ тасдиқлансин.
10. Комиссияга:
қишлоқ хўжалигида фойдаланишдан чиқиб кетган суғориладиган, фойдаланилмаётган бўз ерларни ва яйловларни, шунингдек, ўрмон фонди ерларини фойдаланишга киритиш ва улардан самарали фойдаланишни давлат-хусусий шериклик шартлари асосида ташкил этиш тўғрисидаги лойиҳаларни кўриб чиқиш, маъқуллаш, рад қилиш ёки қайта ишлаш ҳақида қарорлар қабул қилиш;
давлат-хусусий шериклик тўғрисидаги битим лойиҳасини ва зарур ҳужжатлар тўпламини кўриб чиқиш учун Агентликка тақдим этиш;
лойиҳанинг барча молиявий ва иқтисодий тавсифлари киритилган ҳолда уни амалга ошириш ҳақида тегишли қарор қабул қилиш;
белгиланган тартибда танлов ҳужжатларини ишлаб чиқиш, танловни ташкил этиш ва ўтказиш ҳамда унинг якунлари бўйича хусусий шерик билан тегишли давлат-хусусий шериклик тўғрисида битим тузилишини ташкил этиш вазифалари юклансин.
Комиссия давлат-хусусий шериклик тўғрисидаги битимларни тузиш ҳуқуқини берувчи тендерни ўтказишда тендер мезонлари талабларига қатъий риоя этилишини таъминласин.
11. Наманган вилояти ҳокимлиги мазкур қарорга 1-иловада назарда тутилган ер майдонлари комиссия қарорига кўра ғолиб деб топилган хусусий шерикларга қонун ҳужжатларида белгиланган тартибда фойдаланиш учун ажратилишини таъминласин.
12. Ўзбекистон Республикаси Қишлоқ хўжалиги вазирлиги Наманган вилоятининг Поп ва Мингбулоқ туманларида давлат-хусусий шериклик лойиҳасини амалга ошириш натижасида фойдаланишга киритилган ер майдонларининг доимий мониторингини олиб борсин.
13. Белгилансинки, давлат-хусусий шериклик асосида амалга ошириладиган лойиҳалар ташаббускорлари томонидан инвестиция мажбуриятлари бажарилмаганда, ажратилган ер участкаларидан оқилона фойдаланилмаганда ёхуд тупроқ унумдорлигининг пасайишига, кимёвий ва радиоактив ифлосланишига, атроф-муҳитнинг бузилишига, республика ҳудудида карантин объектларининг пайдо бўлишига ёки тарқалишига олиб келувчи усуллардан фойдаланилганда ер участкасининг ижара шартномаси қонун ҳужжатлари талабларига мувофиқ бекор қилинади.
14. Қорақалпоғистон Республикаси Вазирлар Кенгаши, вилоятлар ҳокимликлари қишлоқ хўжалигида фойдаланишдан чиқиб кетган суғориладиган, фойдаланилмаётган бўз ерларни ва яйловларни, шунингдек, ўрмон фонди ерларини фойдаланишга киритиш ва улардан самарали фойдаланишни давлат-хусусий шериклик асосида ташкил этишга ҳамда тўғридан-тўғри хусусий ва хорижий инвестицияларни киритишга хоҳиши бўлган инвесторларни фаол жалб қилиш бўйича зарур ташкилий-амалий чораларни кўрсинлар.
15. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича маслаҳатчиси А.Д. Вахабов ва Ўзбекистон Республикаси қишлоқ хўжалиги вазири Ж.А. Ходжаев ҳамда Наманган вилояти ҳокими Х.Х. Бозаров зиммасига юклансин.
Вазирлар Маҳкамасининг 2019 йил 6 декабрдаги 972-сон қарорига 1-ИЛОВА
Наманган вилоятининг Поп ва Минбулоқ туманлари қишлоқ хўжалигида қайта тикланадиган ва фойдаланишга киритиладиган ер майдонларининг
Т/р Ҳудудлар номи Контурлар сони Фойдаланишга киритиладиган ер майдони, гектар Поп тумани 1. Поп-яккатут 50 150,4 2. Водий массиви 15 426,2 3. Чодак массиви 105 1762,7 4. Навбахор массиви 37 155,9 5. Найман массиви 12 70,9 6. Қўштепа массиви 9 101,3 7. Ш. Мирсултонова массиви 11 122,1 8. Дўстлик массиви 19 387,7 9. Машъал массиви 8 62,2 10. Ўзбекистон массиви 26 197,6 11. Ғурумсарой массиви 22 549,1 12. Чоркесар массиви 18 1177,8 13. Поп ихтисослашган давлат ўрмон хўжалиги 144 2000,7 Туман бўйича жами: 7164,6 Мингбулоқ тумани 1. Гулистон массиви 82 379,5 2. Навоий массиви 125 465,4 3. Истиқбол массиви 9 47,4 4. Фарғона массиви 15 94,3 Туман бўйича жами: 986,6 Жами: 8151,2
Вазирлар Маҳкамасининг 2019 йил 6 декабрдаги 972-сон қарорига 2-ИЛОВА
Наманган вилоятининг Поп ва Мингбулоқ туманларида давлат-хусусий шериклик тўғрисидаги битимни тузиш ҳуқуқи бўйича тендер ғолибини аниқлаш учун тендер комиссиясининг аъзолари
1. Ходжаев Ж. Қишлоқ хўжалиги вазири ( комиссия раиси) 2. Рўзибоев Б. Сув хўжалиги вазирининг биринчи ўринбосари 3. Турсунов Ё. Молия вазирининг ўринбосари 5. Кадирходжаев А. Давлат геология ва минерал ресурслар қўмитаси раисининг биринчи ўринбосари 6. Каримов И. Экология ва атроф-муҳитни муҳофаза қилиш давлат қўмитаси раисининг биринчи ўринбосари 7. Рўзметов М. Ер ресурслари, геодезия, картография ва давлат кадастри давлат қўмитаси раисининг ўринбосари 8. Хакимов О. Ўрмон хўжалиги давлат қўмитаси раисининг биринчи ўринбосари 9. Холжигитов Ғ. Молия вазирлиги ҳузуридаги Давлат-хусусий шерикликни ривожлантириш агентлиги директори 10. Рапиқов Т. Наманган вилояти ҳокимининг қишлоқ ва сув хўжалиги масалалари бўйича ўринбосари 11. Джакупов М. Инвестициялар ва ташқи савдо вазирлиги Лойиҳаларнинг техник иқтисодий асосларини баҳолаш ва танлов савдоларини мувофиқлаштириш бошқармаси бошлиғи
Ўзбекистон Республикасининг Бош вазири А. АРИПОВ
Тошкент ш.,
2019 йил 6 декабрь,
972-сон
Oʻzbekiston Respublikasi Vazirlar Mahkamasining
qarori
MANZILLI ROʻYXATI
TARKIBI
Namangan viloyatining Pop va Mingbuloq tumanlarida foydalanishdan chiqqan yerlarni foydalanishga kiritishni davlat-xususiy sheriklik asosida tashkil etish chora-tadbirlari toʻgʻrisida
Oʻzbekiston Respublikasi Prezidentining “Qishloq xoʻjaligida yer va suv resurslaridan samarali foydalanish chora-tadbirlari toʻgʻrisida” 2019-yil 17-iyundagi PF-5742-son Farmoniga muvofiq hamda qishloq xoʻjaligida tarkibiy islohotlarni yanada chuqurlashtirish, sohaga toʻgʻridan-toʻgʻri investitsiyalar jalb etishni ragʻbatlantirish, qishloq xoʻjaligida davlat-xususiy sheriklikni rivojlantirish, Namangan viloyatining Pop va Mingbuloq tumanlarida foydalanishdan chiqib ketgan sugʻoriladigan, foydalanilmayotgan boʻz va yaylov, shuningdek, oʻrmon fondi yerlarini foydalanishga kiritish va ulardan samarali foydalanishni sinov tariqasida davlat-xususiy sheriklik asosida tashkil etish maqsadida Vazirlar Mahkamasi qaror qiladi:
1. Namangan viloyatining Pop va Mingbuloq tumanlari qishloq xoʻjaligida qayta tiklanadigan va foydalanishga kiritiladigan yer maydonlarining manzilli roʻyxati 1-ilovaga muvofiq tasdiqlansin.
2. Oʻzbekiston Respublikasi Qishloq xoʻjaligi vazirligiga Moliya vazirligi, Suv xoʻjaligi vazirligi, Yer resurslari, geodeziya, kartografiya va davlat kadastri davlat qoʻmitasi, Davlat geologiya va mineral resurslar qoʻmitasi va Namangan viloyati hokimligi bilan kelishgan holda 1-ilovadagi manzilli roʻyxatga, zaruratga koʻra, oʻzgartirishlar kiritish huquqi berilsin.
3. Belgilansinki:
Oʻzbekiston Respublikasi Qishloq xoʻjaligi vazirligi loyiha boʻyicha davlat sherigi;
Namangan viloyati hokimligi “Yagona buyurtmachi xizmati” injiniring kompaniyasi — loyiha buyurtmachisi hisoblanadi.
4. Namangan viloyati hokimligi Oʻzbekiston Respublikasi Qishloq xoʻjaligi vazirligi bilan birgalikda:
qayta tiklanadigan va foydalanishga kiritiladigan yer maydonlarida yaratiladigan zarur infratuzilma obyektlarini loyihalashtirish boʻyicha bir oy muddatda belgilangan tartibda tanlov eʼlon qilinishini;
loyihalar roʻyxati shakllantirilishini taʼminlasin.
5. Oʻzbekiston Respublikasi Qishloq xoʻjaligi vazirligi, Suv xoʻjaligi vazirligi, Yer resurslari, geodeziya, kartografiya va davlat kadastri davlat qoʻmitasi mazkur qarorga 1-ilovada qayd etilgan yer maydonlarida yaratiladigan infratuzilma obyektlarining loyihalarini ishlab chiqishni tender asosida tashkil etishda loyiha buyurtmachisiga koʻmaklashsin.
6. Oʻzbekiston Respublikasi Qishloq xoʻjaligi vazirligi Moliya vazirligi huzuridagi Davlat-xususiy sheriklikni rivojlantirish agentligi (keyingi oʻrinlarda Agentlik deb ataladi) bilan birgalikda:
qishloq xoʻjaligida foydalanishdan chiqib ketgan sugʻoriladigan, foydalanilmayotgan boʻz yerlarni va yaylovlarni, shuningdek, oʻrmon fondi yerlarini foydalanishga kiritish va ulardan samarali foydalanishda davlat-xususiy sheriklik loyihasining konsepsiyasini ishlab chiqsin va ikki oy muddatda qonun hujjatlarida belgilangan tartibda tasdiqlasin;
oʻz rasmiy veb-saytlarida davlat-xususiy sheriklik loyihasi konsepsiyasini tayyorlash jarayonida xususiy sheriklar tender oʻtkazish orqali tanlab olinishi haqidagi maʼlumotlarni joylashtirsin.
7. Belgilab qoʻyilsinki:
davlat-xususiy sheriklik toʻgʻrisidagi bitim Oʻzbekiston Respublikasi Qishloq xoʻjaligi vazirligi tomonidan oʻtkaziladigan tender natijalariga koʻra tuziladi;
loyihani amalga oshirish doirasida davlat-xususiy sheriklik toʻgʻrisidagi bitim tuzgan xususiy sherikka Oʻzbekiston Respublikasi Prezidentining “Qishloq xoʻjaligida yer va suv resurslaridan samarali foydalanish chora-tadbirlari toʻgʻrisida” 2019-yil 17-iyundagi PF-5742-son Farmonida belgilangan imtiyozlar beriladi;
loyiha doirasida qurilgan, barpo etilgan, rekonstruksiya qilingan davlat-xususiy sheriklik loyihasini roʻyobga chiqarish doirasida amalga oshiriladigan suv, energetika, transport va boshqa zarur infratuzilma obyektlari davlat-xususiy sheriklik obyektlari hisoblanadi, davlat-xususiy sheriklik toʻgʻrisidagi bitimning amal qilish muddati tugagandan keyin ushbu obyektlar davlat sherigiga qaytariladi.
8. Quyidagilar davlat-xususiy sheriklik shartlari asosida Namangan viloyatining Pop va Mingbuloq tumanlarida foydalanishdan chiqqan yerlarni foydalanishga kiritish loyihalarini moliyalashtirish manbalari etib belgilansin:
xususiy sherikning mablagʻlari;
xalqaro moliya institutlari mablagʻlari;
qonun hujjatlarida taqiqlanmagan boshqa manbalar.
9. Namangan viloyatining Pop va Mingbuloq tumanlarida davlat-xususiy sheriklik toʻgʻrisidagi bitimni tuzish huquqi boʻyicha tender gʻolibini aniqlash komissiyasi (keyingi oʻrinlarda komissiya deb ataladi) tarkibi 2-ilovaga muvofiq tasdiqlansin.
10. Komissiyaga:
qishloq xoʻjaligida foydalanishdan chiqib ketgan sugʻoriladigan, foydalanilmayotgan boʻz yerlarni va yaylovlarni, shuningdek, oʻrmon fondi yerlarini foydalanishga kiritish va ulardan samarali foydalanishni davlat-xususiy sheriklik shartlari asosida tashkil etish toʻgʻrisidagi loyihalarni koʻrib chiqish, maʼqullash, rad qilish yoki qayta ishlash haqida qarorlar qabul qilish;
davlat-xususiy sheriklik toʻgʻrisidagi bitim loyihasini va zarur hujjatlar toʻplamini koʻrib chiqish uchun Agentlikka taqdim etish;
loyihaning barcha moliyaviy va iqtisodiy tavsiflari kiritilgan holda uni amalga oshirish haqida tegishli qaror qabul qilish;
belgilangan tartibda tanlov hujjatlarini ishlab chiqish, tanlovni tashkil etish va oʻtkazish hamda uning yakunlari boʻyicha xususiy sherik bilan tegishli davlat-xususiy sheriklik toʻgʻrisida bitim tuzilishini tashkil etish vazifalari yuklansin.
Komissiya davlat-xususiy sheriklik toʻgʻrisidagi bitimlarni tuzish huquqini beruvchi tenderni oʻtkazishda tender mezonlari talablariga qatʼiy rioya etilishini taʼminlasin.
11. Namangan viloyati hokimligi mazkur qarorga 1-ilovada nazarda tutilgan yer maydonlari komissiya qaroriga koʻra gʻolib deb topilgan xususiy sheriklarga qonun hujjatlarida belgilangan tartibda foydalanish uchun ajratilishini taʼminlasin.
12. Oʻzbekiston Respublikasi Qishloq xoʻjaligi vazirligi Namangan viloyatining Pop va Mingbuloq tumanlarida davlat-xususiy sheriklik loyihasini amalga oshirish natijasida foydalanishga kiritilgan yer maydonlarining doimiy monitoringini olib borsin.
13. Belgilansinki, davlat-xususiy sheriklik asosida amalga oshiriladigan loyihalar tashabbuskorlari tomonidan investitsiya majburiyatlari bajarilmaganda, ajratilgan yer uchastkalaridan oqilona foydalanilmaganda yoxud tuproq unumdorligining pasayishiga, kimyoviy va radioaktiv ifloslanishiga, atrof-muhitning buzilishiga, respublika hududida karantin obyektlarining paydo boʻlishiga yoki tarqalishiga olib keluvchi usullardan foydalanilganda yer uchastkasining ijara shartnomasi qonun hujjatlari talablariga muvofiq bekor qilinadi.
14. Qoraqalpogʻiston Respublikasi Vazirlar Kengashi, viloyatlar hokimliklari qishloq xoʻjaligida foydalanishdan chiqib ketgan sugʻoriladigan, foydalanilmayotgan boʻz yerlarni va yaylovlarni, shuningdek, oʻrmon fondi yerlarini foydalanishga kiritish va ulardan samarali foydalanishni davlat-xususiy sheriklik asosida tashkil etishga hamda toʻgʻridan-toʻgʻri xususiy va xorijiy investitsiyalarni kiritishga xohishi boʻlgan investorlarni faol jalb qilish boʻyicha zarur tashkiliy-amaliy choralarni koʻrsinlar.
15. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha maslahatchisi A.D. Vaxabov va Oʻzbekiston Respublikasi qishloq xoʻjaligi vaziri J.A. Xodjayev hamda Namangan viloyati hokimi X.X. Bozarov zimmasiga yuklansin.
Vazirlar Mahkamasining 2019-yil 6-dekabrdagi 972-son qaroriga 1-ILOVA
Namangan viloyatining Pop va Minbuloq tumanlari qishloq xoʻjaligida qayta tiklanadigan va foydalanishga kiritiladigan yer maydonlarining
T/r Hududlar nomi Konturlar soni Foydalanishga kiritiladigan yer maydoni, gektar Pop tumani 1. Pop-yakkatut 50 150,4 2. Vodiy massivi 15 426,2 3. Chodak massivi 105 1762,7 4. Navbaxor massivi 37 155,9 5. Nayman massivi 12 70,9 6. Qoʻshtepa massivi 9 101,3 7. Sh. Mirsultonova massivi 11 122,1 8. Doʻstlik massivi 19 387,7 9. Mashʼal massivi 8 62,2 10. Oʻzbekiston massivi 26 197,6 11. Gʻurumsaroy massivi 22 549,1 12. Chorkesar massivi 18 1177,8 13. Pop ixtisoslashgan davlat oʻrmon xoʻjaligi 144 2000,7 Tuman boʻyicha jami: 7164,6 Mingbuloq tumani 1. Guliston massivi 82 379,5 2. Navoiy massivi 125 465,4 3. Istiqbol massivi 9 47,4 4. Fargʻona massivi 15 94,3 Tuman boʻyicha jami: 986,6 Jami: 8151,2
Vazirlar Mahkamasining 2019-yil 6-dekabrdagi 972-son qaroriga 2-ILOVA
Namangan viloyatining Pop va Mingbuloq tumanlarida davlat-xususiy sheriklik toʻgʻrisidagi bitimni tuzish huquqi boʻyicha tender gʻolibini aniqlash uchun tender komissiyasining aʼzolari
1. Xodjayev J. Qishloq xoʻjaligi vaziri ( komissiya raisi) 2. Roʻziboyev B. Suv xoʻjaligi vazirining birinchi oʻrinbosari 3. Tursunov Yo. Moliya vazirining oʻrinbosari 5. Kadirxodjayev A. Davlat geologiya va mineral resurslar qoʻmitasi raisining birinchi oʻrinbosari 6. Karimov I. Ekologiya va atrof-muhitni muhofaza qilish davlat qoʻmitasi raisining birinchi oʻrinbosari 7. Roʻzmetov M. Yer resurslari, geodeziya, kartografiya va davlat kadastri davlat qoʻmitasi raisining oʻrinbosari 8. Xakimov O. Oʻrmon xoʻjaligi davlat qoʻmitasi raisining birinchi oʻrinbosari 9. Xoljigitov Gʻ. Moliya vazirligi huzuridagi Davlat-xususiy sheriklikni rivojlantirish agentligi direktori 10. Rapiqov T. Namangan viloyati hokimining qishloq va suv xoʻjaligi masalalari boʻyicha oʻrinbosari 11. Djakupov M. Investitsiyalar va tashqi savdo vazirligi Loyihalarning texnik iqtisodiy asoslarini baholash va tanlov savdolarini muvofiqlashtirish boshqarmasi boshligʻi
Oʻzbekiston Respublikasining Bosh vaziri A. ARIPOV
Toshkent sh.,
2019-yil 6-dekabr,
972-son