UzbekAI

Ўзбекистон Республикаси Вазирлар Маҳкамасининг

Фармойиши

ТАРКИБИ

Жорий йилнинг 18 декабрь куни сурункали ёғингарчилик оқибатида Тошкент метрополитени Юнусобод йўналишининг қурилаётган қисмида тупроқ кўчиши содир бўлган.

Юзага келган ҳолатни бартараф этиш мақсадида Ўзбекистон Республикаси Фавқулодда вазиятлар вазирлиги, Соғлиқни сақлаш вазирлиги, Ички ишлар вазирлиги, Тошкент шаҳар ҳокимлиги куч ва воситалари сафарбар қилинган.

Ўзбекистон Республикаси Президенти Ш.М. Мирзиёевнинг топшириғига мувофиқ содир бўлган ҳодисани келиб чиқиш сабаблари ва оқибатларини ўрганиш ва уни зудлик билан бартараф қилиш мақсадида:

1. Тошкент метрополитени Юнусобод йўналишининг қурилаётган қисмида содир бўлган ҳодиса сабабларини ўрганиш, оқибатларини бартараф этиш ҳамда келгусида шу каби ҳолатларни олдини олиш бўйича иловага мувофиқ Ҳукумат комиссияси (кейинги ўринларда Ҳукумат комиссияси деб аталади) ташкил этилсин.

2. Ҳукумат комиссияси (А.Ж. Раматов):

содир бўлган ҳодиса сабабларини ва оқибатларини жойида батафсил ўргансин;

зарур куч ва воситаларни жалб қилган ҳолда ҳодиса оқибатларини зудлик билан бартараф этилишини таъминласин;

ҳодиса оқибатида жабрланганлар ва уларнинг оила аъзоларига тиббий, ижтимоий ва моддий ёрдам кўрсатсин;

келгусида шу каби ҳолатларни олдини олиш бўйича комплекс чора-тадбирларни белгиласин ва ижросини қатъий назоратга олсин;

кунлик амалга оширилаётган ишлар юзасидан Вазирлар Маҳкамасига ахборот киритиб борсин;

ўрганиш натижалари юзасидан тегишли хулоса тайёрласин ва Ўзбекистон Республикаси Бош вазирига тақдим этсин.

3. Қуйидагиларга:

Ўзбекистон Республикаси Саноат хавфсизлиги давлат қўмитаси раиси вазифасини бажарувчиси Б.В. Гулямов зиммасига — Тошкент метрополитенининг ер усти ва ер ости метро йўналишлари қурилишида саноат хавфсизлиги талабларига риоя этилиши юзасидан;

Ўзбекистон Республикаси қурилиш вазири Б.И. Закиров зиммасига — Тошкент метрополитенининг ер усти ва ер ости метро йўналишлари қурилиши жараёнида қурилиш-монтаж ишлари қатъиян тасдиқланган лойиҳа ҳужжатлари асосида амалга оширилиши устидан доимий назорат ўрнатиш юзасидан шахсий масъулият юклансин.

4. Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги, Ўзбекистон миллий телерадиокомпанияси, Ўзбекистон Миллий ахборот агентлигига содир бўлган ҳодиса ҳамда унинг оқибатларини бартараф этиш юзасидан олиб борилаётган ишлар тўғрисида аҳолини хабардор қилиш мақсадида Ҳукумат комиссияси ишини кенг ёритиб бориш тавсия этилсин.

5. Мазкур фармойишнинг бажарилишини назорат қилишни ўз зиммамда қолдираман.

Вазирлар Маҳкамасининг 2019 йил 18 декабрдаги 1058-Ф-сон фармойишига ИЛОВА

Тошкент метрополитени Юнусобод йўналишининг қурилаётган қисмида содир бўлган ҳодиса сабабларини ўрганиш, оқибатларини бартараф этиш хамда келгусида шу каби ҳолатларни олдини олиш бўйича Ҳукумат комиссияси

1. А.Ж. Раматов — Ўзбекистон Республикаси Бош вазирининг биринчи ўринбосари — транспорт вазири, комиссия раиси 2. Б.И. Закиров — қурилиш вазири 3. Б.В. Гулямов — саноат хавфсизлиги давлат қўмитаси раиси вазифасини бажарувчиси 4. П.Р. Бобожонов — ички ишлар вазири 5. А.Х. Қўлдошев — фавқулодда вазиятлар вазирининг биринчи ўринбосари 6. А.Қ. Шадманов — соғлиқни сақлаш вазири 7. И.Р. Махкамов — транспорт вазирининг биринчи ўринбосари 8. Т.А. Ишметов — молия вазирининг биринчи ўринбосари 9. Б.Ф. Исламов — давлат геология ва минерал ресурслар қўмитаси раиси 10. Б.Э. Нишанов — Вазирлар Маҳкамаси ҳузуридаги Гидрометеорология хизмати маркази бош директорининг биринчи ўринбосари 11. Д.Н. Сатторов — «Ўзстандарт» агентлиги бош директори 12. Х.Н. Хасилов — «Ўзбекистон темир йўллари» АЖ бошқаруви раиси 13. А.А. Закиров — «Тошкентметропроект» МЧЖ раҳбари 14. Д.А. Хидоятов — Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари 15. Ш.А. Абидов — Ўзбекистон Республикаси Вазирлар Маҳкамаси котибияти мудири, комиссия котиби

Ўзбекистон Республикасининг Бош вазири А. АРИПОВ

Тошкент ш.,

2019 йил 18 декабрь,

1058-Ф-сон

lex.uz

Oʻzbekiston Respublikasi Vazirlar Mahkamasining

Farmoyishi

TARKIBI

Joriy yilning 18-dekabr kuni surunkali yogʻingarchilik oqibatida Toshkent metropoliteni Yunusobod yoʻnalishining qurilayotgan qismida tuproq koʻchishi sodir boʻlgan.

Yuzaga kelgan holatni bartaraf etish maqsadida Oʻzbekiston Respublikasi Favqulodda vaziyatlar vazirligi, Sogʻliqni saqlash vazirligi, Ichki ishlar vazirligi, Toshkent shahar hokimligi kuch va vositalari safarbar qilingan.

Oʻzbekiston Respublikasi Prezidenti Sh.M. Mirziyoyevning topshirigʻiga muvofiq sodir boʻlgan hodisani kelib chiqish sabablari va oqibatlarini oʻrganish va uni zudlik bilan bartaraf qilish maqsadida:

1. Toshkent metropoliteni Yunusobod yoʻnalishining qurilayotgan qismida sodir boʻlgan hodisa sabablarini oʻrganish, oqibatlarini bartaraf etish hamda kelgusida shu kabi holatlarni oldini olish boʻyicha ilovaga muvofiq Hukumat komissiyasi (keyingi oʻrinlarda Hukumat komissiyasi deb ataladi) tashkil etilsin.

2. Hukumat komissiyasi (A.J. Ramatov):

sodir boʻlgan hodisa sabablarini va oqibatlarini joyida batafsil oʻrgansin;

zarur kuch va vositalarni jalb qilgan holda hodisa oqibatlarini zudlik bilan bartaraf etilishini taʼminlasin;

hodisa oqibatida jabrlanganlar va ularning oila aʼzolariga tibbiy, ijtimoiy va moddiy yordam koʻrsatsin;

kelgusida shu kabi holatlarni oldini olish boʻyicha kompleks chora-tadbirlarni belgilasin va ijrosini qatʼiy nazoratga olsin;

kunlik amalga oshirilayotgan ishlar yuzasidan Vazirlar Mahkamasiga axborot kiritib borsin;

oʻrganish natijalari yuzasidan tegishli xulosa tayyorlasin va Oʻzbekiston Respublikasi Bosh vaziriga taqdim etsin.

3. Quyidagilarga:

Oʻzbekiston Respublikasi Sanoat xavfsizligi davlat qoʻmitasi raisi vazifasini bajaruvchisi B.V. Gulyamov zimmasiga — Toshkent metropolitenining yer usti va yer osti metro yoʻnalishlari qurilishida sanoat xavfsizligi talablariga rioya etilishi yuzasidan;

Oʻzbekiston Respublikasi qurilish vaziri B.I. Zakirov zimmasiga — Toshkent metropolitenining yer usti va yer osti metro yoʻnalishlari qurilishi jarayonida qurilish-montaj ishlari qatʼiyan tasdiqlangan loyiha hujjatlari asosida amalga oshirilishi ustidan doimiy nazorat oʻrnatish yuzasidan shaxsiy masʼuliyat yuklansin.

4. Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi, Oʻzbekiston milliy teleradiokompaniyasi, Oʻzbekiston Milliy axborot agentligiga sodir boʻlgan hodisa hamda uning oqibatlarini bartaraf etish yuzasidan olib borilayotgan ishlar toʻgʻrisida aholini xabardor qilish maqsadida Hukumat komissiyasi ishini keng yoritib borish tavsiya etilsin.

5. Mazkur farmoyishning bajarilishini nazorat qilishni oʻz zimmamda qoldiraman.

Vazirlar Mahkamasining 2019-yil 18-dekabrdagi 1058-F-son farmoyishiga ILOVA

Toshkent metropoliteni Yunusobod yoʻnalishining qurilayotgan qismida sodir boʻlgan hodisa sabablarini oʻrganish, oqibatlarini bartaraf etish xamda kelgusida shu kabi holatlarni oldini olish boʻyicha Hukumat komissiyasi

1. A.J. Ramatov — Oʻzbekiston Respublikasi Bosh vazirining birinchi oʻrinbosari — transport vaziri, komissiya raisi 2. B.I. Zakirov — qurilish vaziri 3. B.V. Gulyamov — sanoat xavfsizligi davlat qoʻmitasi raisi vazifasini bajaruvchisi 4. P.R. Bobojonov — ichki ishlar vaziri 5. A.X. Qoʻldoshev — favqulodda vaziyatlar vazirining birinchi oʻrinbosari 6. A.Q. Shadmanov — sogʻliqni saqlash vaziri 7. I.R. Maxkamov — transport vazirining birinchi oʻrinbosari 8. T.A. Ishmetov — moliya vazirining birinchi oʻrinbosari 9. B.F. Islamov — davlat geologiya va mineral resurslar qoʻmitasi raisi 10. B.E. Nishanov — Vazirlar Mahkamasi huzuridagi Gidrometeorologiya xizmati markazi bosh direktorining birinchi oʻrinbosari 11. D.N. Sattorov — “Oʻzstandart” agentligi bosh direktori 12. X.N. Xasilov — “Oʻzbekiston temir yoʻllari” AJ boshqaruvi raisi 13. A.A. Zakirov — “Toshkentmetroproyekt” MChJ rahbari 14. D.A. Xidoyatov — Toshkent shahar hokimining arxitektura, kapital qurilish va kommunikatsiyalarni rivojlantirish masalalari boʻyicha birinchi oʻrinbosari 15. Sh.A. Abidov — Oʻzbekiston Respublikasi Vazirlar Mahkamasi kotibiyati mudiri, komissiya kotibi

Oʻzbekiston Respublikasining Bosh vaziri A. ARIPOV

Toshkent sh.,

2019-yil 18-dekabr,

1058-F-son

lex.uz