📅 2019-yil 4-oktabr · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2019 йил 4 октябрь · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 4 октября 2019 г. · Постановления Президента
Официальный текст. Официальный документ. Редакционные примечания не включены.
📅 4 October 2019 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
ТАРКИБИ
ДАСТУРИ
Ўзбекистон Республикасининг «Давлат тили ҳақида»ги Қонуни қабул қилинганининг ўттиз йиллигини кенг нишонлаш тўғрисида
Дунёдаги қадимий ва бой тиллардан бири бўлган ўзбек тили халқимиз учун миллий ўзлик ва мустақил давлатчилик тимсоли, бебаҳо маънавий бойлик, мамлакатимизнинг сиёсий-ижтимоий, маънавий-маърифий тараққиётида ғоят муҳим ўрин эгаллаб келаётган буюк қадриятдир.
2019 йил 21 октябрь куни Ўзбекистон Республикасининг «Давлат тили ҳақида»ги Қонуни қабул қилинганига ўттиз йил тўлади. Мазкур тарихий ҳужжатга биноан ўтган йиллар давомида она тилимиз мустаҳкам ҳуқуқий асос ва юксак мақомга эга бўлди. Ҳозирги кунда ўзбек тили ҳаётимизнинг барча жабҳаларида — давлат ва жамият бошқаруви, давлатлараро муносабатлар, илм-фан, таълим-тарбия, тиббиёт, маданият ва санъат соҳаларида фаол қўлланилмоқда, халқаро минбарлардан баралла янграмоқда.
Ўзбекистон тараққиётининг бугунги янги босқичи — миллий юксалиш даври талабларидан келиб чиқиб, она тилимизнинг жамиятдаги ўрни ва нуфузини ошириш бўйича кенг кўламли ишлар амалга оширилмоқда. Хусусан, сўнгги йилларда Алишер Навоий номидаги Тошкент давлат ўзбек тили ва адабиёти университетининг ташкил этилгани она тилимизнинг тарихий илдизларини чуқур ўрганиш, уни илмий асосда ҳар томонлама ривожлантириш ва қўлланиш доирасини кенгайтириш, филолог кадрлар тайёрлаш борасидаги ишларни янги поғонага кўтарди.
Ҳудудларда атоқли аллома ва адибларимиз номлари билан аталган ижод мактабларининг барпо этилиши бу йўлдаги яна бир муҳим қадам бўлди.
Ватанимиз мустақиллигининг маънавий асосларини мустаҳкамлаш, халқимиз, аввало ёш авлодни миллий қадриятларимизга муҳаббат ва садоқат руҳида тарбиялашда ўзбек тилининг аҳамияти тобора ортиб бораётганини ҳисобга олиб ҳамда Ўзбекистон Республикасининг «Давлат тили ҳақида»ги Қонуни қабул қилинганининг ўттиз йиллигини муносиб нишонлаш мақсадида:
1. Ўзбекистон Республикаси Маданият вазирлиги, Халқ таълими вазирлиги, Олий ва ўрта махсус таълим вазирлиги, Ўзбекистон Ёзувчилар уюшмаси, Журналистлар ижодий уюшмаси, Республика Маънавият ва маърифат маркази, Ўзбекистон ёшлар иттифоқи ва жамоатчилик вакилларининг жорий йилнинг октябрь ойида Ўзбекистон Республикасининг «Давлат тили ҳақида»ги Қонуни қабул қилинганининг ўттиз йиллигини мамлакатимизда кенг нишонлаш тўғрисидаги таклифлари маъқуллансин.
2. Қуйидагилар:
Ўзбекистон Республикасининг «Давлат тили ҳақида»ги Қонуни қабул қилинганининг ўттиз йиллигига тайёргарлик кўриш ва уни ўтказиш бўйича ташкилий қўмита таркиби 1-иловага ;
Ўзбекистон Республикасининг «Давлат тили ҳақида»ги Қонуни қабул қилинганининг ўттиз йиллиги муносабати билан ўтказиладиган оммавий маънавий-маърифий чора-тадбирлар дастури (кейинги ўринларда Дастур деб аталади) 2-иловага мувофиқ тасдиқлансин.
3. Ташкилий қўмита (А. Арипов):
Қорақалпоғистон Республикаси Жўқорғи Кенгеси, вилоятлар ва Тошкент шаҳар ҳокимликлари ҳамда мутасадди вазирлик ва идоралар билан биргаликда Дастурда назарда тутилган тадбирларнинг пухта тайёргарлик асосида, юқори савияда ўтказилишини таъминласин;
Қорақалпоғистон Республикаси, вилоятлар, Тошкент шаҳридаги барча шаҳар ва туманларда байрам тадбирларини ташкил этсин;
умумтаълим мактаблари ўқувчилари ўртасида ўзбек тили мавзусида иншолар танловини ўтказсин;
мамлакатимиздаги театрлар ва кинотеатрларда, маданият саройларида буюк алломаларимиз ҳақидаги спектакллар, бадиий ва ҳужжатли фильмлар намойишини ташкил этсин;
«Ўзбек тили тараққиёти ва халқаро ҳамкорлик масалалари» мавзусида халқаро илмий-амалий конференция ҳамда «Ўзбек тилшунослигининг долзарб масалалари» мавзусида республика конференциясини ўтказсин;
ўзбек адабий тилининг асосчиси, буюк мутафаккир шоиримиз Алишер Навоийга Тошкент шаҳридаги Миллий боғда, шунингдек, вилоят ва шаҳарларда ўрнатилган ҳайкаллар пойига гул қўйиш маросимини уюштирсин;
мамлакатимизнинг хориждаги элчихоналари ва дипломатик ваколатхоналарида ўзбек тилига бағишланган байрам тадбирларини ўтказсин ва «Ўзбек тилининг дўстлари» клубларини тузсин;
мамлакатимизда янгитдан ташкил этилиб, фаолият кўрсатаётган Муҳаммад Ризо Огаҳий, Исҳоқхон Ибрат, Абдулла Қодирий, Ҳамид Олимжон ва Зулфия, Ибройим Юсупов, Эркин Воҳидов, Абдулла Орипов, Ҳалима Худойбердиева, Муҳаммад Юсуф номидаги ижод мактабларида она тилига бағишланган маънавий-маърифий тадбирларни ўтказсин;
ҳудудларда тил байрамига бағишланган адабий-маърифий кечалар ҳамда янги китоблар тақдимотини амалга оширсин;
21 октябрь куни Қорақалпоғистон Республикаси, вилоятлар ва Тошкент шаҳридаги санъат саройларида Ўзбекистон Республикасининг «Давлат тили ҳақида»ги Қонуни қабул қилинганининг ўттиз йиллигига бағишланган тантанали байрам тадбирларини ташкил этсин.
4. Белгилаб қўйилсинки, Ўзбекистон Республикасининг «Давлат тили ҳақида»ги Қонуни қабул қилинганининг ўттиз йиллигини нишонлашга тайёргарлик кўриш ва ўтказиш билан боғлиқ харажатлар Қорақалпоғистон Республикасининг республика бюджети, вилоятлар ва Тошкент шаҳри маҳаллий бюджетлари даромадларининг орттириб бажарилган қисмидан, шунингдек, ҳомийлик хайриялари ҳисобидан қопланади.
5. Ўзбекистон Миллий ахборот агентлиги, Ўзбекистон миллий телерадиокомпанияси ва бошқа оммавий ахборот воситаларига Ўзбекистон Республикасининг «Давлат тили ҳақида»ги Қонуни қабул қилинганининг ўттиз йиллигини нишонлаш билан боғлиқ тадбирларни кенг ёритиш тавсия этилсин.
6. Мазкур қарорнинг ижросини назорат қилиш Ўзбекистон Республикаси Бош вазири А.Н. Арипов, Ўзбекистон Республикаси Президенти Администрацияси раҳбари З.Ш. Низомиддинов зиммасига юклансин.
Ўзбекистон Республикаси Президентининг 2019 йил 4 октябрдаги ПҚ-4479-сонли қарорига 1-ИЛОВА
Ўзбекистон Республикасининг «Давлат тили ҳақида»ги қонуни қабул қилинганининг 30 йиллигига тайёргарлик кўриш ва уни ўтказиш бўйича ташкилий қўмита
А. Арипов — Ўзбекистон Республикаси Бош вазири, Ташкилий қўмита раиси А. Абдувахитов — Ўзбекистон Республикаси Президентининг Маслаҳатчиси Х. Султонов — Ўзбекистон Республикаси Президентининг Маслаҳатчиси — Спичрайтери Б. Сайфуллаев — Ўзбекистон Республикаси Маданият вазири М. Маджидов — Олий ва ўрта махсус таълим вазири Ш. Шерматов — Халқ таълими вазири Б. Қурбонов — Мудофаа вазири П. Бобожонов — Ички ишлар вазири А. Шадманов — Соғлиқни сақлаш вазири Ш. Садиков — Ахборот технологиялари ва коммуникацияларини ривожлантириш вазири С. Саидов — Ўзбекистон Ёзувчилар уюшмаси раиси С. Ҳакимов — Ўзбекистон Журналистлари ижодий уюшмаси раиси М. Ҳожиматов — Республика Маънавият ва маърифат маркази раҳбари А. Хаджаев — Ўзбекистон миллий телерадиокомпанияси раиси вазифасини бажарувчи Ф. Абдухолиқов — «Ўзбеккино» Миллий агентлиги директори А. Кўчимов — Ўзбекистон Миллий ахборот агентлиги раиси Р. Қурбанов — Миллатлараро муносабатлар ва хорижий мамлакатлар билан дўстлик алоқалари қўмитаси раиси К. Алламжанов — Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги директори вазифасини бажарувчи А. Жумабоев — Ўзбекистон ёшлар иттифоқи Марказий кенгаши раисининг биринчи ўринбосари Ш. Жавлонов — Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши раисининг биринчи ўринбосари Н. Маҳмудов — Ўзбекистон Республикаси Фанлар академияси Ўзбек тили, адабиёти ва фольклори институти директори Ш. Сирожиддинов — Алишер Навоий номидаги Тошкент давлат ўзбек тили ва адабиёти университети ректори Лавозимига кўра — Қорақалпоғистон Республикаси Жўқорғи Кенгеси Раиси, вилоятлар ва Тошкент шаҳар ҳокимлари
Ўзбекистон Республикаси Президентининг 2019 йил 4 октябрдаги ПҚ-4479-сонли қарорига 2-ИЛОВА
Ўзбекистон Республикасининг «Давлат тили ҳақида»ги қонуни қабул қилинганининг ўттиз йиллиги муносабати билан ўтказиладиган оммавий маънавий-маърифий чора-тадбирлар
Т/р Чора-тадбир номи Амалга ошириш механизми Муддати Масъуллар 1. Тошкент шаҳридаги Миллий боғда, шунингдек, вилоятларда буюк мутафаккир ва шоир, ўзбек адабий тилининг асосчиси Алишер Навоий ҳайкали пойига гул қўйиш маросимларини ташкил қилиш. 1. Алишер Навоий ҳайкаллари ўрнатилган ҳудудларни ободонлаштириш. 2. Алишер Навоий ҳайкали пойига гул қўйиш маросимини ўтказиш. 21 октябрь Вилоятлар ва Тошкент шаҳар ҳокимликлари, Ёшлар иттифоқи, Олий ва ўрта махсус таълим вазирлиги, Халқ таълими вазирлиги, Ёзувчилар уюшмаси 2. Тошкент шаҳридаги Алишер Навоий номидаги Ўзбекистон давлат академик катта театри, Қорақалпоғистон Республикаси ҳамда барча вилоятлар марказидаги санъат саройларида Ўзбекистон Республикасининг «Давлат тили ҳақида»ги қонуни қабул қилинганининг ўттиз йиллиги га бағишланган тантанали байрам тадбирини ташкил этиш. 1. Байрам тадбири сценарийсини ишлаб чиқиш ва тадбирни ўтказиш бўйича ташкилий ишларни амалга ошириш. 2. Байрам тадбирига маданият ва санъат намояндалари, ижодкорлар, ёшлар, кенг жамоатчилик вакилларини жалб этиш. 3. Тадбирни юқори савияда ўтказиш. 21 октябрь Маданият вазирлиги, Тошкент шаҳар ҳокимлиги, Ёзувчилар уюшмаси, Республика Маънавият ва маърифат маркази 3. Ўзбекистон Фанлар академияси Ўзбек тили, адабиёти ва фольклори институтида «Ўзбек тилшунослигининг долзарб масалалари» мавзусида республика конференциясини ўтказиш. 1. Ташкилий қўмита тузиш, харажатлар сметасини тасдиқлаш. 2. Конференция материалларини чоп этиш. 3. Конференцияни ўтказиш ва унинг резолюциясини қабул қилиш. 18 октябрга қадар 18 октябрь ЎзФА, Олий ва ўрта махсус таълим вазирлиги, Ёзувчилар уюшмаси 4. Алишер Навоий номидаги Тошкент давлат ўзбек тили ва адабиёти университетида АҚШ, Россия, Хитой, Туркия, Озарбайжон, Қозоғистон, Қирғизистон, Афғонистон, Ҳиндистон каби давлатлардан келадиган таниқли олимлар иштирокида «Ўзбек тили тараққиёти ва халқаро ҳамкорлик масалалари» мавзусида халқаро илмий-амалий конференция ўтказиш. 1. Ташкилий қўмита тузилиб, харажатлар сметасини тасдиқлаш. 2. Хорижлик меҳмонларга таклифномалар юбориш. 3. Конференция материалларини чоп этиш. 4. Конференцияни ўтказиш ва унинг резолюциясини қабул қилиш. 29 октябрь Олий ва ўрта махсус таълим вазирлиги, ЎзФА, Ёзувчилар уюшмаси, Республика Маънавият ва маърифат маркази, Ташқи ишлар вазирлиги 5. Таниқли олимлар, ижодкорлар, ҳуқуқшунослар ва жамоатчилик вакиллари иштирокида мамлакатимизда давлат тилини ривожлантириш масалаларига бағишланган «Ҳаракатлар стратегияси ва миллий тил ривожи» мавзусида илмий-маърифий семинарни ташкил қилиш. 1. Ишчи гуруҳини ташкил этиш ва семинар режасини ишлаб чиқиш. 2. Семинарни ташкил этиш ва ўтказиш юзасидан ташкилий чора-тадбирларни амалга ошириш. 3. Семинарни юқори савияда ўтказиш. 19 октябрь «Юксалиш» умуммиллий ҳаракати, Ёзувчилар уюшмаси, Республика Маънавият ва маърифат маркази, Олий ва ўрта махсус таълим вазирлиги, ЎзФА 6. Ёзувчилар уюшмасида тил байрамига бағишланган адабий-маърифий кеча ҳамда янги китоблар тақдимотини ўтказиш. 1. Тадбир дастурини ишлаб чиқиш ва анжуманни юқори савияда ўтказиш. 2. Уюшма зали фойесида янги нашр этилган китоблар кўргазмасини ташкил этиш. 3. Тадбирни оммавий ахборот воситаларида ва ижтимоий тармоқларда кенг ёритиш. 25 октябрь Ёзувчилар уюшмаси, Республика Маънавият ва маърифат маркази, Тошкент давлат ўзбек тили ва адабиёти университети, Ахборот ва оммавий коммуникациялар агентлиги, Ўзбекистон журналистлари ижодий уюшмаси 7. Қорақалпоғистон Республикаси, вилоятлар ва Тошкент шаҳридаги умумтаълим мактаблари ўқувчилари ўртасида ўзбек тили мавзусида иншолар танловини ўтказиш, танловнинг туман, шаҳар босқичлари 1-ўрин соҳибларини компьютер жамланмаси, 2-ўрин соҳибларини ноутбук, 3-ўрин соҳибларини планшет ёки мобиль телефон билан мукофотлаш. 1. Танловларни ўтказиш режаси ва низомини ишлаб чиқиш. 2. Танловларнинг мактаб, туман (шаҳар) босқичларини ўтказиш, ғолибларни аниқлаш. 3. Қорақалпоғистон Республикаси, вилоятлар ҳамда Тошкент шаҳар босқичлари ғолибларини тил байрамига бағишланган байрам тадбирларида кенг жамоатчилик иштирокида тантанали тақдирлаш. 5 — 10 октябрь 10 — 20 октябрь 21 октябрь Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Халқ таълими вазирлиги 8. Республика театрлари ва кинотеатрларида буюк алломаларимиз сиймолари акс эттирилган спектакллар, бадиий ва ҳужжатли фильмлар намойишларини ташкил қилиш. 1. Спектакллар ва фильмлар намойишлари режасини ишлаб чиқиш. 2. Спектакллар ва фильмлар намойишларини юқори савияда ўтказиш ва уларга ўқувчи-талабалар, жамоатчилик вакилларини кенг жалб қилиш. 3. Тадбирларни оммавий ахборот воситаларида кенг ёритиш. 15 — 21 октябрь Маданият вазирлиги, «Ўзбеккино» МА, Олий ва ўрта махсус таълим вазирлиги, Халқ таълими вазирлиги, Ўзбекистон Ёшлар иттифоқи, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, ЎзА, МТРК, ЭОАВМА 9. «Давлат тили ҳақида»ги қонун қабул қилинганининг ўттиз йиллиги муносабати билан барча мобил компаниялар абонентларига «21октябрь куни ўзбек тилига давлат тили мақоми берилганига ўттиз йил тўлди» табрик матнлари битилган СМС хабарномалар юборишни ташкил қилиш. 1. СМС хабарлар матнларини тайёрлаш ва тасдиқлаш. 2. Режа асосида барча мобил компаниялар абонентларига СМС хабарлар матнини юбориш. 21 октябрь Ахборот технологиялари ва коммуникацияларини ривожлантириш вазирлиги, Ўзбекистон Ёшлар иттифоқи, Республика Маънавият ва маърифат маркази 10. «Тил бор экан, миллат барҳаёт» мавзусида она тилимизни улуғловчи тасвирий тарғибот материаллари, ихчам видеороликлар тайёрлаб, уларни республикамизнинг барча марказий кўчаларидаги панноларга жойлаштириш ҳамда LED экранлар орқали намойиш қилиш. 1. Турли йўналишларда баннерлар ҳамда видеороликлар тайёрлаш. 2. Баннер ва видеороликларни ҳудудлар марказларидаги LED экранларга, панноларга жойлаштириш. 15 — 21 октябрь Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, «Тасвирий ойина» ижодий уюшмаси, Республика Маънавият ва маърифат маркази, МТРК 11. Мамлакатимизнинг хориждаги дипломатик ваколатхоналарида ўзбек тилига бағишланган байрам тадбирларини ўтказиш ва улар қошида «Ўзбек тили дўстлари» клубларини ташкил этиш. 1. Байрамни ташкил этиш ва унга хорижда истиқомат қилаётган юртдошларимиз, хорижлик меҳмонларни таклиф қилиш. 2. «Ўзбек тили дўстлари» клубларини ташкил этиш чораларини кўриш. 21 октябрь Ташқи ишлар вазирлиги 12. Таълим бошқа тилда олиб бориладиган давлат таълим муасса?аларида «Ўзбекистон — умумий уйимиз» шиори остида мамлакатимизда яшаётган барча миллат ва элатларнинг тилларини ривожлантириш бўйича яратилаётган шароит ва имкониятларни кенг тарғиб этувчи маданий-маърифий тадбирлар ўтказиш. 1. Тадбирлар режасини ишлаб чиқиш. 2. Тадбирларни режа асосида амалга ошириш. 3. Тадбирларни оммавий ахборот воситаларида ёритиш. 15 — 21 октябрь Олий ва ўрта махсус таълим вазирлиги, Халқ таълими вазирлиги, Мактабгача таълим вазирлиги, Республика Маънавият ва маърифат маркази, «Маҳалла» жамоат фонди, Ўзбекистон Ёшлар иттифоқи 13. Мамлакатимиздаги барча олий ва ўрта махсус таълим муассасалари, ўрта мактаблар, маҳаллалар ва ҳарбий қисмларда таниқли олимлар, ижодкорлар, маънавият тарғиботчилари ҳамда санъаткорлар иштирокида оммавий тадбирлар, давра суҳбатлари ва адабий кечалар ташкил этиш. 1. Тадбирлар режасини ишлаб чиқиб, тасдиқлаш. 2. Тадбирларда иштирок этадиган олимлар, ижодкорлар, маънавият тарғиботчилари ва санъаткорлар рўйхатларини тузиш. 3. Жойларда тадбирларни юқори савияда ўтказиш ва оммавий ахборот воситаларида кенг ёритиш. 5 октябрь 7 октябрь 15 — 21 октябрь Олий ва ўрта махсус таълим вазирлиги, Халқ таълими вазирлиги, Маданият вазирлиги, Мудофаа вазирлиги, Ички ишлар вазирлиги, Миллий гвардия, Ўзбекистон ёшлар иттифоқи, Ёзувчилар уюшмаси, Республика Маънавият ва маърифат маркази, Қорақалпоғистон Республикаси Вазирлар кенгаши, вилоятлар ва Тошкент шаҳар ҳокимликлари 14. «Тилини асраган — элини асрайди» мавзусида ҳарбий қисмларда, ҳарбий билим юртларида, ҳуқуқ-тартибот идораларида она тилига бағишланган маънавий-маърифий тадбирлар уюштириш. 1. Тадбирлар режасини ишлаб чиқиш ва тасдиқлаш. 2. Тадбирларни режа асосида амалга ошириш. 3. Тадбирларни оммавий ахборот воситалари орқали ёритиш. 15 — 21 октябрь Мудофаа,Фавқулодда вазиятлар, Ички ишлар вазирликлари,Миллий гвардия, Давлат хавфсизлиги хизмати, Бош прокуратура, Давлат божхона қўмитаси 15. Президент мактаблари, ижод мактаблари, ихтисослаштирилган мактаблар ҳамда Темурбеклар мактабларида Ёзувчилар уюшмаси томонидан «Биринчи китобим» лойиҳасида чоп этилган китоблар тақдимотини ўтказиш ва ушбу мактаблар кутубхоналарига 100 донадан китоблар совға қилиш. 1. Тадбирлар дастурини ишлаб чиқиш ва ўтказиш. 2. Тадбирларни оммавий ахборот воситаларида ва ижтимоий тармоқларда кенг ёритиш. 15 — 21 октябрь Президент, ижод ва ихтисослаштирилган мактабларни ривожлантириш агентлиги, Мудофаа вазирлиги, Миллий гвардия, Ёзувчилар уюшмаси 16. Теле ва радиоканаллар, сайтларда мамлакатимизда фаолият юритаётган хорижлик мутахассислар, талабалар, фуқаролар, сайёҳларнинг ўзбек тилидаги байрам табрикларини бериб бориш. 1. Мамлакатимизда фаолият юритаётган, яшаётган хорижлик мутахассислар, талабалар, фуқаролар, сайёҳларнинг ўзбек тилидаги байрам табрикларини ёзиб олиш. 2. Теле ва радиоканаллар орқали табрикларни бериб бориш. 15 — 21 октябрь МТРК, Ахборот ва оммавий коммуникациялар агентлиги,ЎзА, ЭОАВМА, «Дунё» АА, «UzReport» АА, Ташқи ишлар вазирлиги 17. Хорижда истиқомат қилаётган ўзбек тили мутахассислари, таржимонлар, ўзбек тили ва адабиёти ихлосмандлари билан она тилимизнинг халқаро нуфузи, жозибадорлиги ва имкониятлари ҳақида суҳбатлар ташкил этиш ва оммавий ахборот воситаларида ёритиш. 1. Хорижлик мутахассислар, таржимонлар, ўзбек тили ва адабиёти ихлосмандлари билан суҳбатлар ташкил этиш. 2. Суҳбатларни оммавий ахборот воситаларида ёритиб бориш. 15 — 21 октябрь МТРК, Ахборот ва оммавий коммуникациялар агентлиги, ЎзА, ЭОАВМА, «Дунё» АА, «UzReport» АА, Ташқи ишлар вазирлиги, газеталар ва журналлар 18. «Давлат ?или ҳақида»ги қонун қабул қилинганининг ўттиз йиллиги муносабати билан ҳудудларда ўтказилаётган оммавий байрам тадбирларини кенг ёритиш мақсадида телемарафонлар ташкил этиш. 1. Ишчи гуруҳини шакллантириш ҳамда телемарафонларни ўтказиш тартибини ишлаб чиқиш . 2. Иштирокчилар ва объектлар рўйхатини шакллантириш. 3. Телемарафонни юқори савияда ташкил этиш. 21 октябрь МТРК, ЭОАВМА, «UzReport»АА, Республика Маънавият ва маърифат маркази, Олий ва ўрта махсус таълим вазирлиги, Халқ таълими вазирлиги, ЎзФА, Ўзбекистон Ёшлар иттифоқи, Ёзувчилар уюшмаси 19. Интернет сайтлари ва ижтимоий тармоқларда #ona_tilim_faxrim хештеги остида миллий тилни улуғловчи ҳикматли сўзлар, фикрлар, мулоҳазалар, шеърлар, мақоллар, маталлар, қисқа ҳикоялар каби матнларнинг оммавий тарзда жойлаштирилишини ташкил этиш. 1. Матнларни тайёрлаш. 2. Матнларни интернет сайтлари ва ижтимоий тармоқларда жойлаштириш. 15 — 21 октябрь Ўзбекистон Ёшлар иттифоқи, Ахборот ва оммавий коммуникациялар агентлиги, Республика Маънавият ва маърифат маркази, Олий ва ўрта махсус таълим вазирлиги, Халқ таълими вазирлиги, ЎзФА 20. Шаҳар ва туманлар марказлари, аҳоли гавжум масканларда ўзбек тилини улуғловчи ҳикматли сўзлар, шеърий сатрлар акс эттирилган тасвирий тарғибот воситаларини жойлаштириш. Ўзбек тилини улуғловчи ҳикматли сўзлар, шеърий сатрлар акс эттирилган тасвирий тарғибот воситаларини тайёрлаш ва белгиланган масканларга жойлаштириш. 15 — 21 октябрь Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, «Тасвирий ойина» ижодий уюшмаси 21. «Давлат тили ҳақида»ги қонуннинг мазмун-моҳиятини ўзида акс эттирган видеороликлар яратиш ва уларни барча оммавий ахборот воситалари, ижтимоий тармоқлар, аэропорт ва вокзаллардаги мониторлар орқали кенг тарғиб этиш. Видеороликларни барча телеканаллар, оммавий ахборот воситалари, ижтимоий тармоқлар ҳамда поезд, самолёт, метро бекатларидаги экранлар орқали намойишини ташкил этиш. 15 — 30 октябрь МТРК, Ахборот ва оммавий коммуникациялар агентлиги, ЭОАВМА,ЎзА, Республика Маънавият ва маърифат маркази, Олий ва ўрта махсус таълим вазирлиги, Халқ таълими вазирлиги, ЎзФА, Транспорт вазирлиги, Ўзбекистон ёшлар иттифоқи 22. Оммавий ахборот воситаларида, интернет сайтлари ва ижтимоий тармоқларда кенг жамоатчиликнинг давлат тилига бўлган эътибори ва муҳаббатини янада кучайтириш, давлат тилининг ҳаётимиздаги ўрни ва аҳамиятини оширишга бағишланган туркум кўрсатувлар, эшиттиришлар, мақола ва шеърлар бериб бориш. 1. Тил байрамига бағишланган кўрсатув ва эшиттиришлар, мақолалар тайёрлаш режаларини ишлаб чиқиш. 2. Мавзуга бағишланган кўрсатув ва эшиттиришлар, мақолалар, шеърларни оммавий ахборот воситаларида кенг ёритиш. Доимий МТРК, Ахборот ва оммавий коммуникациялар агентлиги, ЎзА, Ўзбекистон журналистлари ижодий уюшмаси, ЭОАВМА, Ёзувчилар уюшмаси
Ўзбекистон Республикаси Президенти Ш. МИРЗИЁЕВ
Тошкент ш.,
2019 йил 4 октябрь,
ПҚ-4479-сон
Oʻzbekiston Respublikasi Prezidentining
Qarori
TARKIBI
DASTURI
Oʻzbekiston Respublikasining “Davlat tili haqida”gi Qonuni qabul qilinganining oʻttiz yilligini keng nishonlash toʻgʻrisida
Dunyodagi qadimiy va boy tillardan biri boʻlgan oʻzbek tili xalqimiz uchun milliy oʻzlik va mustaqil davlatchilik timsoli, bebaho maʼnaviy boylik, mamlakatimizning siyosiy-ijtimoiy, maʼnaviy-maʼrifiy taraqqiyotida gʻoyat muhim oʻrin egallab kelayotgan buyuk qadriyatdir.
2019-yil 21-oktabr kuni Oʻzbekiston Respublikasining “Davlat tili haqida”gi Qonuni qabul qilinganiga oʻttiz yil toʻladi. Mazkur tarixiy hujjatga binoan oʻtgan yillar davomida ona tilimiz mustahkam huquqiy asos va yuksak maqomga ega boʻldi. Hozirgi kunda oʻzbek tili hayotimizning barcha jabhalarida — davlat va jamiyat boshqaruvi, davlatlararo munosabatlar, ilm-fan, taʼlim-tarbiya, tibbiyot, madaniyat va sanʼat sohalarida faol qoʻllanilmoqda, xalqaro minbarlardan baralla yangramoqda.
Oʻzbekiston taraqqiyotining bugungi yangi bosqichi — milliy yuksalish davri talablaridan kelib chiqib, ona tilimizning jamiyatdagi oʻrni va nufuzini oshirish boʻyicha keng koʻlamli ishlar amalga oshirilmoqda. Xususan, soʻnggi yillarda Alisher Navoiy nomidagi Toshkent davlat oʻzbek tili va adabiyoti universitetining tashkil etilgani ona tilimizning tarixiy ildizlarini chuqur oʻrganish, uni ilmiy asosda har tomonlama rivojlantirish va qoʻllanish doirasini kengaytirish, filolog kadrlar tayyorlash borasidagi ishlarni yangi pogʻonaga koʻtardi.
Hududlarda atoqli alloma va adiblarimiz nomlari bilan atalgan ijod maktablarining barpo etilishi bu yoʻldagi yana bir muhim qadam boʻldi.
Vatanimiz mustaqilligining maʼnaviy asoslarini mustahkamlash, xalqimiz, avvalo yosh avlodni milliy qadriyatlarimizga muhabbat va sadoqat ruhida tarbiyalashda oʻzbek tilining ahamiyati tobora ortib borayotganini hisobga olib hamda Oʻzbekiston Respublikasining “Davlat tili haqida”gi Qonuni qabul qilinganining oʻttiz yilligini munosib nishonlash maqsadida:
1. Oʻzbekiston Respublikasi Madaniyat vazirligi, Xalq taʼlimi vazirligi, Oliy va oʻrta maxsus taʼlim vazirligi, Oʻzbekiston Yozuvchilar uyushmasi, Jurnalistlar ijodiy uyushmasi, Respublika Maʼnaviyat va maʼrifat markazi, Oʻzbekiston yoshlar ittifoqi va jamoatchilik vakillarining joriy yilning oktabr oyida Oʻzbekiston Respublikasining “Davlat tili haqida”gi Qonuni qabul qilinganining oʻttiz yilligini mamlakatimizda keng nishonlash toʻgʻrisidagi takliflari maʼqullansin.
2. Quyidagilar:
Oʻzbekiston Respublikasining “Davlat tili haqida”gi Qonuni qabul qilinganining oʻttiz yilligiga tayyorgarlik koʻrish va uni oʻtkazish boʻyicha tashkiliy qoʻmita tarkibi 1-ilovaga ;
Oʻzbekiston Respublikasining “Davlat tili haqida”gi Qonuni qabul qilinganining oʻttiz yilligi munosabati bilan oʻtkaziladigan ommaviy maʼnaviy-maʼrifiy chora-tadbirlar dasturi (keyingi oʻrinlarda Dastur deb ataladi) 2-ilovaga muvofiq tasdiqlansin.
3. Tashkiliy qoʻmita (A. Aripov):
Qoraqalpogʻiston Respublikasi Joʻqorgʻi Kengesi, viloyatlar va Toshkent shahar hokimliklari hamda mutasaddi vazirlik va idoralar bilan birgalikda Dasturda nazarda tutilgan tadbirlarning puxta tayyorgarlik asosida, yuqori saviyada oʻtkazilishini taʼminlasin;
Qoraqalpogʻiston Respublikasi, viloyatlar, Toshkent shahridagi barcha shahar va tumanlarda bayram tadbirlarini tashkil etsin;
umumtaʼlim maktablari oʻquvchilari oʻrtasida oʻzbek tili mavzusida insholar tanlovini oʻtkazsin;
mamlakatimizdagi teatrlar va kinoteatrlarda, madaniyat saroylarida buyuk allomalarimiz haqidagi spektakllar, badiiy va hujjatli filmlar namoyishini tashkil etsin;
“Oʻzbek tili taraqqiyoti va xalqaro hamkorlik masalalari” mavzusida xalqaro ilmiy-amaliy konferensiya hamda “Oʻzbek tilshunosligining dolzarb masalalari” mavzusida respublika konferensiyasini oʻtkazsin;
oʻzbek adabiy tilining asoschisi, buyuk mutafakkir shoirimiz Alisher Navoiyga Toshkent shahridagi Milliy bogʻda, shuningdek, viloyat va shaharlarda oʻrnatilgan haykallar poyiga gul qoʻyish marosimini uyushtirsin;
mamlakatimizning xorijdagi elchixonalari va diplomatik vakolatxonalarida oʻzbek tiliga bagʻishlangan bayram tadbirlarini oʻtkazsin va “Oʻzbek tilining doʻstlari” klublarini tuzsin;
mamlakatimizda yangitdan tashkil etilib, faoliyat koʻrsatayotgan Muhammad Rizo Ogahiy, Isʼhoqxon Ibrat, Abdulla Qodiriy, Hamid Olimjon va Zulfiya, Ibroyim Yusupov, Erkin Vohidov, Abdulla Oripov, Halima Xudoyberdiyeva, Muhammad Yusuf nomidagi ijod maktablarida ona tiliga bagʻishlangan maʼnaviy-maʼrifiy tadbirlarni oʻtkazsin;
hududlarda til bayramiga bagʻishlangan adabiy-maʼrifiy kechalar hamda yangi kitoblar taqdimotini amalga oshirsin;
21-oktabr kuni Qoraqalpogʻiston Respublikasi, viloyatlar va Toshkent shahridagi sanʼat saroylarida Oʻzbekiston Respublikasining “Davlat tili haqida”gi Qonuni qabul qilinganining oʻttiz yilligiga bagʻishlangan tantanali bayram tadbirlarini tashkil etsin.
4. Belgilab qoʻyilsinki, Oʻzbekiston Respublikasining “Davlat tili haqida”gi Qonuni qabul qilinganining oʻttiz yilligini nishonlashga tayyorgarlik koʻrish va oʻtkazish bilan bogʻliq xarajatlar Qoraqalpogʻiston Respublikasining respublika budjeti, viloyatlar va Toshkent shahri mahalliy budjetlari daromadlarining orttirib bajarilgan qismidan, shuningdek, homiylik xayriyalari hisobidan qoplanadi.
5. Oʻzbekiston Milliy axborot agentligi, Oʻzbekiston milliy teleradiokompaniyasi va boshqa ommaviy axborot vositalariga Oʻzbekiston Respublikasining “Davlat tili haqida”gi Qonuni qabul qilinganining oʻttiz yilligini nishonlash bilan bogʻliq tadbirlarni keng yoritish tavsiya etilsin.
6. Mazkur qarorning ijrosini nazorat qilish Oʻzbekiston Respublikasi Bosh vaziri A.N. Aripov, Oʻzbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.
Oʻzbekiston Respublikasi Prezidentining 2019-yil 4-oktabrdagi PQ-4479-sonli qaroriga 1-ILOVA
Oʻzbekiston Respublikasining “Davlat tili haqida”gi qonuni qabul qilinganining 30 yilligiga tayyorgarlik koʻrish va uni oʻtkazish boʻyicha tashkiliy qoʻmita
A. Aripov — Oʻzbekiston Respublikasi Bosh vaziri, Tashkiliy qoʻmita raisi A. Abduvaxitov — Oʻzbekiston Respublikasi Prezidentining Maslahatchisi X. Sultonov — Oʻzbekiston Respublikasi Prezidentining Maslahatchisi — Spichrayteri B. Sayfullayev — Oʻzbekiston Respublikasi Madaniyat vaziri M. Madjidov — Oliy va oʻrta maxsus taʼlim vaziri Sh. Shermatov — Xalq taʼlimi vaziri B. Qurbonov — Mudofaa vaziri P. Bobojonov — Ichki ishlar vaziri A. Shadmanov — Sogʻliqni saqlash vaziri Sh. Sadikov — Axborot texnologiyalari va kommunikatsiyalarini rivojlantirish vaziri S. Saidov — Oʻzbekiston Yozuvchilar uyushmasi raisi S. Hakimov — Oʻzbekiston Jurnalistlari ijodiy uyushmasi raisi M. Hojimatov — Respublika Maʼnaviyat va maʼrifat markazi rahbari A. Xadjayev — Oʻzbekiston milliy teleradiokompaniyasi raisi vazifasini bajaruvchi F. Abduxoliqov — “Oʻzbekkino” Milliy agentligi direktori A. Koʻchimov — Oʻzbekiston Milliy axborot agentligi raisi R. Qurbanov — Millatlararo munosabatlar va xorijiy mamlakatlar bilan doʻstlik aloqalari qoʻmitasi raisi K. Allamjanov — Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi direktori vazifasini bajaruvchi A. Jumaboyev — Oʻzbekiston yoshlar ittifoqi Markaziy kengashi raisining birinchi oʻrinbosari Sh. Javlonov — Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi raisining birinchi oʻrinbosari N. Mahmudov — Oʻzbekiston Respublikasi Fanlar akademiyasi Oʻzbek tili, adabiyoti va folklori instituti direktori Sh. Sirojiddinov — Alisher Navoiy nomidagi Toshkent davlat oʻzbek tili va adabiyoti universiteti rektori Lavozimiga koʻra — Qoraqalpogʻiston Respublikasi Joʻqorgʻi Kengesi Raisi, viloyatlar va Toshkent shahar hokimlari
Oʻzbekiston Respublikasi Prezidentining 2019-yil 4-oktabrdagi PQ-4479-sonli qaroriga 2-ILOVA
Oʻzbekiston Respublikasining “Davlat tili haqida”gi qonuni qabul qilinganining oʻttiz yilligi munosabati bilan oʻtkaziladigan ommaviy maʼnaviy-maʼrifiy chora-tadbirlar
T/r Chora-tadbir nomi Amalga oshirish mexanizmi Muddati Masʼullar 1. Toshkent shahridagi Milliy bogʻda, shuningdek, viloyatlarda buyuk mutafakkir va shoir, oʻzbek adabiy tilining asoschisi Alisher Navoiy haykali poyiga gul qoʻyish marosimlarini tashkil qilish. 1. Alisher Navoiy haykallari oʻrnatilgan hududlarni obodonlashtirish. 2. Alisher Navoiy haykali poyiga gul qoʻyish marosimini oʻtkazish. 21-oktabr Viloyatlar va Toshkent shahar hokimliklari, Yoshlar ittifoqi, Oliy va oʻrta maxsus taʼlim vazirligi, Xalq taʼlimi vazirligi, Yozuvchilar uyushmasi 2. Toshkent shahridagi Alisher Navoiy nomidagi Oʻzbekiston davlat akademik katta teatri, Qoraqalpogʻiston Respublikasi hamda barcha viloyatlar markazidagi sanʼat saroylarida Oʻzbekiston Respublikasining “Davlat tili haqida”gi qonuni qabul qilinganining oʻttiz yilligi ga bagʻishlangan tantanali bayram tadbirini tashkil etish. 1. Bayram tadbiri ssenariysini ishlab chiqish va tadbirni oʻtkazish boʻyicha tashkiliy ishlarni amalga oshirish. 2. Bayram tadbiriga madaniyat va sanʼat namoyandalari, ijodkorlar, yoshlar, keng jamoatchilik vakillarini jalb etish. 3. Tadbirni yuqori saviyada oʻtkazish. 21-oktabr Madaniyat vazirligi, Toshkent shahar hokimligi, Yozuvchilar uyushmasi, Respublika Maʼnaviyat va maʼrifat markazi 3. Oʻzbekiston Fanlar akademiyasi Oʻzbek tili, adabiyoti va folklori institutida “Oʻzbek tilshunosligining dolzarb masalalari” mavzusida respublika konferensiyasini oʻtkazish. 1. Tashkiliy qoʻmita tuzish, xarajatlar smetasini tasdiqlash. 2. Konferensiya materiallarini chop etish. 3. Konferensiyani oʻtkazish va uning rezolyutsiyasini qabul qilish. 18-oktabrga qadar 18-oktabr OʻzFA, Oliy va oʻrta maxsus taʼlim vazirligi, Yozuvchilar uyushmasi 4. Alisher Navoiy nomidagi Toshkent davlat oʻzbek tili va adabiyoti universitetida AQSH, Rossiya, Xitoy, Turkiya, Ozarbayjon, Qozogʻiston, Qirgʻiziston, Afgʻoniston, Hindiston kabi davlatlardan keladigan taniqli olimlar ishtirokida “Oʻzbek tili taraqqiyoti va xalqaro hamkorlik masalalari” mavzusida xalqaro ilmiy-amaliy konferensiya oʻtkazish. 1. Tashkiliy qoʻmita tuzilib, xarajatlar smetasini tasdiqlash. 2. Xorijlik mehmonlarga taklifnomalar yuborish. 3. Konferensiya materiallarini chop etish. 4. Konferensiyani oʻtkazish va uning rezolyutsiyasini qabul qilish. 29-oktabr Oliy va oʻrta maxsus taʼlim vazirligi, OʻzFA, Yozuvchilar uyushmasi, Respublika Maʼnaviyat va maʼrifat markazi, Tashqi ishlar vazirligi 5. Taniqli olimlar, ijodkorlar, huquqshunoslar va jamoatchilik vakillari ishtirokida mamlakatimizda davlat tilini rivojlantirish masalalariga bagʻishlangan “Harakatlar strategiyasi va milliy til rivoji” mavzusida ilmiy-maʼrifiy seminarni tashkil qilish. 1. Ishchi guruhini tashkil etish va seminar rejasini ishlab chiqish. 2. Seminarni tashkil etish va oʻtkazish yuzasidan tashkiliy chora-tadbirlarni amalga oshirish. 3. Seminarni yuqori saviyada oʻtkazish. 19-oktabr “Yuksalish” umummilliy harakati, Yozuvchilar uyushmasi, Respublika Maʼnaviyat va maʼrifat markazi, Oliy va oʻrta maxsus taʼlim vazirligi, OʻzFA 6. Yozuvchilar uyushmasida til bayramiga bagʻishlangan adabiy-maʼrifiy kecha hamda yangi kitoblar taqdimotini oʻtkazish. 1. Tadbir dasturini ishlab chiqish va anjumanni yuqori saviyada oʻtkazish. 2. Uyushma zali foyesida yangi nashr etilgan kitoblar koʻrgazmasini tashkil etish. 3. Tadbirni ommaviy axborot vositalarida va ijtimoiy tarmoqlarda keng yoritish. 25-oktabr Yozuvchilar uyushmasi, Respublika Maʼnaviyat va maʼrifat markazi, Toshkent davlat oʻzbek tili va adabiyoti universiteti, Axborot va ommaviy kommunikatsiyalar agentligi, Oʻzbekiston jurnalistlari ijodiy uyushmasi 7. Qoraqalpogʻiston Respublikasi, viloyatlar va Toshkent shahridagi umumtaʼlim maktablari oʻquvchilari oʻrtasida oʻzbek tili mavzusida insholar tanlovini oʻtkazish, tanlovning tuman, shahar bosqichlari 1-oʻrin sohiblarini kompyuter jamlanmasi, 2-oʻrin sohiblarini noutbuk, 3-oʻrin sohiblarini planshet yoki mobil telefon bilan mukofotlash. 1. Tanlovlarni oʻtkazish rejasi va nizomini ishlab chiqish. 2. Tanlovlarning maktab, tuman (shahar) bosqichlarini oʻtkazish, gʻoliblarni aniqlash. 3. Qoraqalpogʻiston Respublikasi, viloyatlar hamda Toshkent shahar bosqichlari gʻoliblarini til bayramiga bagʻishlangan bayram tadbirlarida keng jamoatchilik ishtirokida tantanali taqdirlash. 5 — 10-oktabr 10 — 20-oktabr 21-oktabr Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Xalq taʼlimi vazirligi 8. Respublika teatrlari va kinoteatrlarida buyuk allomalarimiz siymolari aks ettirilgan spektakllar, badiiy va hujjatli filmlar namoyishlarini tashkil qilish. 1. Spektakllar va filmlar namoyishlari rejasini ishlab chiqish. 2. Spektakllar va filmlar namoyishlarini yuqori saviyada oʻtkazish va ularga oʻquvchi-talabalar, jamoatchilik vakillarini keng jalb qilish. 3. Tadbirlarni ommaviy axborot vositalarida keng yoritish. 15 — 21-oktabr Madaniyat vazirligi, “Oʻzbekkino” MA, Oliy va oʻrta maxsus taʼlim vazirligi, Xalq taʼlimi vazirligi, Oʻzbekiston Yoshlar ittifoqi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, OʻzA, MTRK, EOAVMA 9. “Davlat tili haqida”gi qonun qabul qilinganining oʻttiz yilligi munosabati bilan barcha mobil kompaniyalar abonentlariga “21oktabr kuni oʻzbek tiliga davlat tili maqomi berilganiga oʻttiz yil toʻldi” tabrik matnlari bitilgan SMS xabarnomalar yuborishni tashkil qilish. 1. SMS xabarlar matnlarini tayyorlash va tasdiqlash. 2. Reja asosida barcha mobil kompaniyalar abonentlariga SMS xabarlar matnini yuborish. 21-oktabr Axborot texnologiyalari va kommunikatsiyalarini rivojlantirish vazirligi, Oʻzbekiston Yoshlar ittifoqi, Respublika Maʼnaviyat va maʼrifat markazi 10. “Til bor ekan, millat barhayot” mavzusida ona tilimizni ulugʻlovchi tasviriy targʻibot materiallari, ixcham videoroliklar tayyorlab, ularni respublikamizning barcha markaziy koʻchalaridagi pannolarga joylashtirish hamda LED ekranlar orqali namoyish qilish. 1. Turli yoʻnalishlarda bannerlar hamda videoroliklar tayyorlash. 2. Banner va videoroliklarni hududlar markazlaridagi LED ekranlarga, pannolarga joylashtirish. 15 — 21-oktabr Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, “Tasviriy oyina” ijodiy uyushmasi, Respublika Maʼnaviyat va maʼrifat markazi, MTRK 11. Mamlakatimizning xorijdagi diplomatik vakolatxonalarida oʻzbek tiliga bagʻishlangan bayram tadbirlarini oʻtkazish va ular qoshida “Oʻzbek tili doʻstlari” klublarini tashkil etish. 1. Bayramni tashkil etish va unga xorijda istiqomat qilayotgan yurtdoshlarimiz, xorijlik mehmonlarni taklif qilish. 2. “Oʻzbek tili doʻstlari” klublarini tashkil etish choralarini koʻrish. 21-oktabr Tashqi ishlar vazirligi 12. Taʼlim boshqa tilda olib boriladigan davlat taʼlim muassa?alarida “Oʻzbekiston — umumiy uyimiz” shiori ostida mamlakatimizda yashayotgan barcha millat va elatlarning tillarini rivojlantirish boʻyicha yaratilayotgan sharoit va imkoniyatlarni keng targʻib etuvchi madaniy-maʼrifiy tadbirlar oʻtkazish. 1. Tadbirlar rejasini ishlab chiqish. 2. Tadbirlarni reja asosida amalga oshirish. 3. Tadbirlarni ommaviy axborot vositalarida yoritish. 15 — 21-oktabr Oliy va oʻrta maxsus taʼlim vazirligi, Xalq taʼlimi vazirligi, Maktabgacha taʼlim vazirligi, Respublika Maʼnaviyat va maʼrifat markazi, “Mahalla” jamoat fondi, Oʻzbekiston Yoshlar ittifoqi 13. Mamlakatimizdagi barcha oliy va oʻrta maxsus taʼlim muassasalari, oʻrta maktablar, mahallalar va harbiy qismlarda taniqli olimlar, ijodkorlar, maʼnaviyat targʻibotchilari hamda sanʼatkorlar ishtirokida ommaviy tadbirlar, davra suhbatlari va adabiy kechalar tashkil etish. 1. Tadbirlar rejasini ishlab chiqib, tasdiqlash. 2. Tadbirlarda ishtirok etadigan olimlar, ijodkorlar, maʼnaviyat targʻibotchilari va sanʼatkorlar roʻyxatlarini tuzish. 3. Joylarda tadbirlarni yuqori saviyada oʻtkazish va ommaviy axborot vositalarida keng yoritish. 5-oktabr 7-oktabr 15 — 21-oktabr Oliy va oʻrta maxsus taʼlim vazirligi, Xalq taʼlimi vazirligi, Madaniyat vazirligi, Mudofaa vazirligi, Ichki ishlar vazirligi, Milliy gvardiya, Oʻzbekiston yoshlar ittifoqi, Yozuvchilar uyushmasi, Respublika Maʼnaviyat va maʼrifat markazi, Qoraqalpogʻiston Respublikasi Vazirlar kengashi, viloyatlar va Toshkent shahar hokimliklari 14. “Tilini asragan — elini asraydi” mavzusida harbiy qismlarda, harbiy bilim yurtlarida, huquq-tartibot idoralarida ona tiliga bagʻishlangan maʼnaviy-maʼrifiy tadbirlar uyushtirish. 1. Tadbirlar rejasini ishlab chiqish va tasdiqlash. 2. Tadbirlarni reja asosida amalga oshirish. 3. Tadbirlarni ommaviy axborot vositalari orqali yoritish. 15 — 21-oktabr Mudofaa,Favqulodda vaziyatlar, Ichki ishlar vazirliklari,Milliy gvardiya, Davlat xavfsizligi xizmati, Bosh prokuratura, Davlat bojxona qoʻmitasi 15. Prezident maktablari, ijod maktablari, ixtisoslashtirilgan maktablar hamda Temurbeklar maktablarida Yozuvchilar uyushmasi tomonidan “Birinchi kitobim” loyihasida chop etilgan kitoblar taqdimotini oʻtkazish va ushbu maktablar kutubxonalariga 100 donadan kitoblar sovgʻa qilish. 1. Tadbirlar dasturini ishlab chiqish va oʻtkazish. 2. Tadbirlarni ommaviy axborot vositalarida va ijtimoiy tarmoqlarda keng yoritish. 15 — 21-oktabr Prezident, ijod va ixtisoslashtirilgan maktablarni rivojlantirish agentligi, Mudofaa vazirligi, Milliy gvardiya, Yozuvchilar uyushmasi 16. Tele va radiokanallar, saytlarda mamlakatimizda faoliyat yuritayotgan xorijlik mutaxassislar, talabalar, fuqarolar, sayyohlarning oʻzbek tilidagi bayram tabriklarini berib borish. 1. Mamlakatimizda faoliyat yuritayotgan, yashayotgan xorijlik mutaxassislar, talabalar, fuqarolar, sayyohlarning oʻzbek tilidagi bayram tabriklarini yozib olish. 2. Tele va radiokanallar orqali tabriklarni berib borish. 15 — 21-oktabr MTRK, Axborot va ommaviy kommunikatsiyalar agentligi,OʻzA, EOAVMA, “Dunyo” AA, “UzReport” AA, Tashqi ishlar vazirligi 17. Xorijda istiqomat qilayotgan oʻzbek tili mutaxassislari, tarjimonlar, oʻzbek tili va adabiyoti ixlosmandlari bilan ona tilimizning xalqaro nufuzi, jozibadorligi va imkoniyatlari haqida suhbatlar tashkil etish va ommaviy axborot vositalarida yoritish. 1. Xorijlik mutaxassislar, tarjimonlar, oʻzbek tili va adabiyoti ixlosmandlari bilan suhbatlar tashkil etish. 2. Suhbatlarni ommaviy axborot vositalarida yoritib borish. 15 — 21-oktabr MTRK, Axborot va ommaviy kommunikatsiyalar agentligi, OʻzA, EOAVMA, “Dunyo” AA, “UzReport” AA, Tashqi ishlar vazirligi, gazetalar va jurnallar 18. “Davlat ?ili haqida”gi qonun qabul qilinganining oʻttiz yilligi munosabati bilan hududlarda oʻtkazilayotgan ommaviy bayram tadbirlarini keng yoritish maqsadida telemarafonlar tashkil etish. 1. Ishchi guruhini shakllantirish hamda telemarafonlarni oʻtkazish tartibini ishlab chiqish . 2. Ishtirokchilar va obyektlar roʻyxatini shakllantirish. 3. Telemarafonni yuqori saviyada tashkil etish. 21-oktabr MTRK, EOAVMA, “UzReport”AA, Respublika Maʼnaviyat va maʼrifat markazi, Oliy va oʻrta maxsus taʼlim vazirligi, Xalq taʼlimi vazirligi, OʻzFA, Oʻzbekiston Yoshlar ittifoqi, Yozuvchilar uyushmasi 19. Internet saytlari va ijtimoiy tarmoqlarda #ona_tilim_faxrim xeshtegi ostida milliy tilni ulugʻlovchi hikmatli soʻzlar, fikrlar, mulohazalar, sheʼrlar, maqollar, matallar, qisqa hikoyalar kabi matnlarning ommaviy tarzda joylashtirilishini tashkil etish. 1. Matnlarni tayyorlash. 2. Matnlarni internet saytlari va ijtimoiy tarmoqlarda joylashtirish. 15 — 21-oktabr Oʻzbekiston Yoshlar ittifoqi, Axborot va ommaviy kommunikatsiyalar agentligi, Respublika Maʼnaviyat va maʼrifat markazi, Oliy va oʻrta maxsus taʼlim vazirligi, Xalq taʼlimi vazirligi, OʻzFA 20. Shahar va tumanlar markazlari, aholi gavjum maskanlarda oʻzbek tilini ulugʻlovchi hikmatli soʻzlar, sheʼriy satrlar aks ettirilgan tasviriy targʻibot vositalarini joylashtirish. Oʻzbek tilini ulugʻlovchi hikmatli soʻzlar, sheʼriy satrlar aks ettirilgan tasviriy targʻibot vositalarini tayyorlash va belgilangan maskanlarga joylashtirish. 15 — 21-oktabr Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, “Tasviriy oyina” ijodiy uyushmasi 21. “Davlat tili haqida”gi qonunning mazmun-mohiyatini oʻzida aks ettirgan videoroliklar yaratish va ularni barcha ommaviy axborot vositalari, ijtimoiy tarmoqlar, aeroport va vokzallardagi monitorlar orqali keng targʻib etish. Videoroliklarni barcha telekanallar, ommaviy axborot vositalari, ijtimoiy tarmoqlar hamda poyezd, samolyot, metro bekatlaridagi ekranlar orqali namoyishini tashkil etish. 15 — 30-oktabr MTRK, Axborot va ommaviy kommunikatsiyalar agentligi, EOAVMA,OʻzA, Respublika Maʼnaviyat va maʼrifat markazi, Oliy va oʻrta maxsus taʼlim vazirligi, Xalq taʼlimi vazirligi, OʻzFA, Transport vazirligi, Oʻzbekiston yoshlar ittifoqi 22. Ommaviy axborot vositalarida, internet saytlari va ijtimoiy tarmoqlarda keng jamoatchilikning davlat tiliga boʻlgan eʼtibori va muhabbatini yanada kuchaytirish, davlat tilining hayotimizdagi oʻrni va ahamiyatini oshirishga bagʻishlangan turkum koʻrsatuvlar, eshittirishlar, maqola va sheʼrlar berib borish. 1. Til bayramiga bagʻishlangan koʻrsatuv va eshittirishlar, maqolalar tayyorlash rejalarini ishlab chiqish. 2. Mavzuga bagʻishlangan koʻrsatuv va eshittirishlar, maqolalar, sheʼrlarni ommaviy axborot vositalarida keng yoritish. Doimiy MTRK, Axborot va ommaviy kommunikatsiyalar agentligi, OʻzA, Oʻzbekiston jurnalistlari ijodiy uyushmasi, EOAVMA, Yozuvchilar uyushmasi
Oʻzbekiston Respublikasi Prezidenti Sh. MIRZIYOYEV
Toshkent sh.,
2019-yil 4-oktabr,
PQ-4479-son
Президента Республики Узбекистан
Постановление
О широком праздновании тридцатилетия принятия Закона Республики Узбекистан «О государственном языке»
Узбекский язык как один из древних и богатых языков мира является символом национального самосознания инезависимой государственности нашего народа, его бесценным духовным богатством и великой ценностью, имеющихчрезвычайно важное значение в общественно-политическом и духовно-просветительском развитии страны.
21 октября 2019 года исполняется тридцать лет со дня принятия Закона Республики Узбекистан «О государственном языке». На основе этого исторического документаза прошедшие годынаш родной язык обрел прочную правовую базу и высокий статус.
Сегодня узбекский язык активно используетсяво всех сферах нашей жизни — государственном и общественном управлении, межгосударственных отношениях, науке, образовании и воспитании, медицине, культуре и искусстве, громко звучит с международных трибун.
Исходя из требований сегодняшнего нового этапа развития Узбекистана — периода национального развития, проводится широко масштабная работа по повышению роли и авторитета нашего родного языка в обществе.
В частности, создание в последние годы Ташкентского государственного университета узбекского языка и литературы имени Алишера Навои расширило рамки глубокого изучения исторических корней нашего родного языка, его всестороннего развития на научной основе и области применения, подняло на новый уровень деятельность по подготовке филологических кадров.
Создание в регионах творческих школ, названных именами наших выдающихся ученых илитераторов стало еще одним важным шагом в данном направлении.
Принимая во внимание все возрастающее значение узбекского языка в укреплении духовных основ независимости нашей Родины, воспитании народа,прежде всего молодого поколения в духе любви и преданности национальным ценностям, а также с целью достойного празднования тридцатилетия принятия Закона Республики Узбекистан «О государственном языке»:
1. Одобрить предложения Министерства культуры, Министерства народного образования, Министерства высшего и среднего специального образования Республики Узбекистан, Союза писателей Узбекистана, Творческого союза журналистов Узбекистана, Республиканского центра духовности и просветительства, Союза молодежи Узбекистана и представителей общественности о широком праздновании в нашей стране в октябре текущего года тридцатилетия принятия Закона Республики Узбекистан «О государственном языке».
2. Утвердить:
состав Организационного комитета по подготовке и проведению тридцатилетия принятия Закона Республики Узбекистан «О государственном языке» согласно приложению № 1 * ;
Программу массовых духовно-просветительских мероприятий,проводимых в связи с тридцатилетием принятия Закона Республики Узбекистан «О государственном языке» (далее — Программа) согласно приложению № 2 * .
3. Организационному комитету (А. Арипов):
совместно с Жокаргы Кенесом Республики Каракалпакстан, хокимиятами областей и города Ташкента, а также ответственными министерствами и ведомствами обеспечить проведение на высоком уровне мероприятий, предусмотренных Программой на основе их тщательной подготовки;
организовать праздничные мероприятия во всех городах и районах Республики Каракалпакстан, областей и города Ташкента;
провести среди учащихся общеобразовательных школ конкурс сочинений на тему узбекского языка;
обеспечить показ в театрах и кинотеатрах, дворцах культуры страны спектаклей, художественных и документальных фильмов о наших великих ученых;
провести международную научно-практическую конференцию на тему «Вопросы развития узбекского языка и международного сотрудничества» и республиканскую конференцию на тему «Актуальные вопросы узбекского языковедения»;
организовать церемонии возложения цветов к подножию памятников основателю узбекского литературного языка, нашему великому поэту и мыслителю Алишеру Навои, установленных в Национальном парке города Ташкента, а также в областях и городах;
провести праздничные мероприятия, посвященные узбекскому языку и создать клубы «Друзья узбекского языка» в посольствах и дипломатических представительствах нашей страны за рубежом;
провести духовно-просветительские мероприятия, посвященные родному языку во вновь созданных, действующих в нашей стране творческих школах имени Мухаммада Ризо Агахи, Исхокхона Ибрата, Абдуллы Кадыри, Хамида Алимджана и Зульфии, Ибройима Юсупова, Эркина Вахидова, Абдуллы Арипова, Халимы Худойбердыевой, Мухаммада Юсуфа;
провести в регионах литературно-просветительские вечера и презентации новых книг, посвященные празднику языка;
организовать 21 октября во дворцах искусств Республики Каракалпакстан, областей и города Ташкенте проведение торжественных праздничных мероприятий, посвященных тридцатилетию принятия Закона Республики Узбекистан «О государственном языке».
4. Установить, что расходы, связанные с подготовкой и проведением празднования тридцатилетия принятия Закона Республики Узбекистан «О государственном языке» покрываются из перевыполненой части доходов республиканского бюджета Республики Каракалпакстан, местных бюджетов областей и города Ташкента, а также за счет благотворительных пожертвований.
5. Рекомендовать Национальному информационному агентству Узбекистана, Национальной телерадиокомпании Узбекистана и другим средствам массовой информации широкое освещение мероприятий, связанных с празднованием тридцатилетия принятия Закона Республики Узбекистан «О государственном языке».
6. Контроль за исполнением настоящего постановления возложить на Премьер-министра Республики Узбекистан А.Н. Арипова и руководителя Администрации Президента Республики Узбекистан З.Ш. Низомиддинова.
Президент Республики Узбекистан Ш. МИРЗИЁЕВ
г. Ташкент,
4 октября 2019 г.,
№ ПП-4479