UzbekAI

Ўзбекистон Республикаси Вазирлар Маҳкамасининг

қарори

Ўзбекистон Республикасининг божхона ҳудудига олиб кириладиган товарлар ва транспорт воситаларини расмийлаштиришда божхона тартиботларини такомиллаштириш тўғрисида

Автомобиль, темир йўл ва ҳаво транспорти орқали Ўзбекистон Республикасининг божхона ҳудудига олиб кириладиган товарлар ва транспорт воситаларини расмийлаштиришда божхона назорати самарадорлигини таъминлаш, божхона тартиботларини соддалаштириш, шунингдек, вақтни ҳамда молиявий харажатларни қисқартириш мақсадида Вазирлар Маҳкамаси қарор қилади:

1. Шундай тартиб ўрнатилсинки, унга мувофиқ:

қонунчиликка мувофиқ ваколатли органлар томонидан белгиланган тартибда бериладиган мувофиқлик сертификати, санитария-эпидемиология хулосаси, экологик сертификат мавжуд бўлиш талаб этиладиган товарларни «Ягона ойна» божхона ахборот тизимида уларнинг берилиши тасдиқланган тақдирда, Ўзбекистон Республикаси ҳудудига импорт қилишга рухсат берилади;

аввал дастлабки божхона декларацияси тақдим этилган товарларни эркин муомалага чиқариш божхона юк декларацияси рўйхатдан ўтказилган пайтдан бошлаб уч соат ичида амалга оширилади, бунда хавфларни бошқаришнинг автоматлаштирилган тизими томонидан хавф аниқланган ҳолатлар бундан мустасно.

2. Вазирлар Маҳкамасининг «Ўзбекистон Республикасининг божхона ҳудудига келадиган товарлар ва транспорт воситаларини расмийлаштиришда божхона тартиботларини соддалаштиришга доир чора-тадбирлар тўғрисида» 2018 йил 25 сентябрдаги 762-сон қарорининг 2-банди қуйидаги таҳрирда баён этилсин:

«2. Белгилаб қўйилсинки, ташувчилар ёхуд товар эгалари ёки товарга нисбатан ваколатларга эга бўлган шахслар ҳаво ва темир йўл транспортида ташиладиган товарлар ва транспорт воситалари, шу жумладан йўловчилар ва уларнинг багажлари тўғрисида дастлабки электрон тарзда олдиндан ахборотни божхона органларининг ахборот тизимига бутунжаҳон Интернет тармоғи орқали:

автомобиль транспортининг Ўзбекистон Республикаси божхона чегараси орқали ўтишидан бир соат олдин;

темир йўл транспортининг Ўзбекистон Республикаси божхона чегарасига етиб келишидан бир соат олдин;

узоқ йўналишни амалга оширишда — ҳаво транспортининг Ўзбекистон Республикаси божхона ҳудудига учиб келишидан икки соат олдин;

қисқа йўналишни амалга оширишда — ҳаво транспортининг учиш вақтида юбориши шарт.».

3. «Ўзбекистон темир йўллари» АЖ уч ой муддатда қўшни давлатларнинг темир йўл маъмуриятлари билан икки томонлама шартномалар имзоланиши ва тегишли маълумотлар билан тезкор алмашиш ишларини ташкил этсин.

4. Ўзбекистон Республикаси Ташқи ишлар вазирлиги Ўзбекистон Республикаси ҳудудидаги хорижий дипломатик ва уларга тенглаштирилган ваколатхоналар ва консуллик муассасаларини ушбу қарор қоидалари тўғрисида хабардор қилинсин.

5. Ўзбекистон Республикаси Давлат божхона қўмитаси:

миллий ва хорижий ташувчиларга ёки бошқа манфаатдор шахсларга божхона органларининг ахборот тизимига товар ва транспорт воситалари тўғрисидаги дастлабки электрон маълумотларни мустақил равишда тақдим этиш имконини яратсин;

уч ой муддатда Ўзбекистон Республикасининг божхона ҳудудига олиб киришга мўлжалланган товарлар ва транспорт воситалари тўғрисидаги дастлабки электрон маълумотларни тақдим этиш, улардан фойдаланиш ва рўйхатдан ўтказиш тартибини ишлаб чиқсин;

манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

6. Мазкур қарор расмий эълон қилинган кундан эътиборан уч ой ўтгач кучга киради.

7. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари Э.М. Ганиев ва Ўзбекистон Республикаси Давлат божхона қўмитаси Раиси М.Б. Азимов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2019 йил 31 декабрь,

1057-сон

(Қонун ҳужжатлари маълумотлари миллий базаси, 01.01.2020 й., 09/20/1057/4261-сон)

Oʻzbekiston Respublikasi Vazirlar Mahkamasining

qarori

Oʻzbekiston Respublikasining bojxona hududiga olib kiriladigan tovarlar va transport vositalarini rasmiylashtirishda bojxona tartibotlarini takomillashtirish toʻgʻrisida

Avtomobil, temir yoʻl va havo transporti orqali Oʻzbekiston Respublikasining bojxona hududiga olib kiriladigan tovarlar va transport vositalarini rasmiylashtirishda bojxona nazorati samaradorligini taʼminlash, bojxona tartibotlarini soddalashtirish, shuningdek, vaqtni hamda moliyaviy xarajatlarni qisqartirish maqsadida Vazirlar Mahkamasi qaror qiladi:

1. Shunday tartib oʻrnatilsinki, unga muvofiq:

qonunchilikka muvofiq vakolatli organlar tomonidan belgilangan tartibda beriladigan muvofiqlik sertifikati, sanitariya-epidemiologiya xulosasi, ekologik sertifikat mavjud boʻlish talab etiladigan tovarlarni “Yagona oyna” bojxona axborot tizimida ularning berilishi tasdiqlangan taqdirda, Oʻzbekiston Respublikasi hududiga import qilishga ruxsat beriladi;

avval dastlabki bojxona deklaratsiyasi taqdim etilgan tovarlarni erkin muomalaga chiqarish bojxona yuk deklaratsiyasi roʻyxatdan oʻtkazilgan paytdan boshlab uch soat ichida amalga oshiriladi, bunda xavflarni boshqarishning avtomatlashtirilgan tizimi tomonidan xavf aniqlangan holatlar bundan mustasno.

2. Vazirlar Mahkamasining “Oʻzbekiston Respublikasining bojxona hududiga keladigan tovarlar va transport vositalarini rasmiylashtirishda bojxona tartibotlarini soddalashtirishga doir chora-tadbirlar toʻgʻrisida” 2018-yil 25-sentabrdagi 762-son qarorining 2-bandi quyidagi tahrirda bayon etilsin:

“2. Belgilab qoʻyilsinki, tashuvchilar yoxud tovar egalari yoki tovarga nisbatan vakolatlarga ega boʻlgan shaxslar havo va temir yoʻl transportida tashiladigan tovarlar va transport vositalari, shu jumladan yoʻlovchilar va ularning bagajlari toʻgʻrisida dastlabki elektron tarzda oldindan axborotni bojxona organlarining axborot tizimiga butunjahon Internet tarmogʻi orqali:

avtomobil transportining Oʻzbekiston Respublikasi bojxona chegarasi orqali oʻtishidan bir soat oldin;

temir yoʻl transportining Oʻzbekiston Respublikasi bojxona chegarasiga yetib kelishidan bir soat oldin;

uzoq yoʻnalishni amalga oshirishda — havo transportining Oʻzbekiston Respublikasi bojxona hududiga uchib kelishidan ikki soat oldin;

qisqa yoʻnalishni amalga oshirishda — havo transportining uchish vaqtida yuborishi shart.”.

3. “Oʻzbekiston temir yoʻllari” AJ uch oy muddatda qoʻshni davlatlarning temir yoʻl maʼmuriyatlari bilan ikki tomonlama shartnomalar imzolanishi va tegishli maʼlumotlar bilan tezkor almashish ishlarini tashkil etsin.

4. Oʻzbekiston Respublikasi Tashqi ishlar vazirligi Oʻzbekiston Respublikasi hududidagi xorijiy diplomatik va ularga tenglashtirilgan vakolatxonalar va konsullik muassasalarini ushbu qaror qoidalari toʻgʻrisida xabardor qilinsin.

5. Oʻzbekiston Respublikasi Davlat bojxona qoʻmitasi:

milliy va xorijiy tashuvchilarga yoki boshqa manfaatdor shaxslarga bojxona organlarining axborot tizimiga tovar va transport vositalari toʻgʻrisidagi dastlabki elektron maʼlumotlarni mustaqil ravishda taqdim etish imkonini yaratsin;

uch oy muddatda Oʻzbekiston Respublikasining bojxona hududiga olib kirishga moʻljallangan tovarlar va transport vositalari toʻgʻrisidagi dastlabki elektron maʼlumotlarni taqdim etish, ulardan foydalanish va roʻyxatdan oʻtkazish tartibini ishlab chiqsin;

manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qaror rasmiy eʼlon qilingan kundan eʼtiboran uch oy oʻtgach kuchga kiradi.

7. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari E.M. Ganiyev va Oʻzbekiston Respublikasi Davlat bojxona qoʻmitasi Raisi M.B. Azimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 31-dekabr,

1057-son

(Qonun hujjatlari maʼlumotlari milliy bazasi, 01.01.2020-y., 09/20/1057/4261-son)