📅 2020-yil 3-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 3 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 января 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 3 January 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
РЎЙХАТИ
Ўзбекистон Миллий ахборот агентлиги фаолиятини қўллаб-қувватлаш тўғрисида
Ўзбекистон Республикаси Президентининг «Ўзбекистон Миллий ахборот агентлиги фаолиятини янада такомиллаштириш чора-тадбирлари тўғрисида» 2019 йил 2 декабрдаги ПҚ-4541-сон қарори ижросини таъминлаш мақсадида Вазирлар Маҳкамаси қарор қилади:
1. Ўзбекистон Миллий ахборот агентлиги (кейинги ўринларда ЎзА деб аталади) тўғрисида низом 1-иловага мувофиқ тасдиқлансин.
2. Ўзбекистон Республикаси Молия вазирлиги:
Қорақалпоғистон ахборот агентлиги ҳамда ЎзАнинг вилоятлардаги минтақавий мухбирлик пунктлари учун 1 тадан енгил автотранспорт воситаси харид қилиш учун маблағ ажратсин;
Ўзбекистон Миллий ахборот агентлигига 22 та, шу жумладан, 3 та шахсий бириктирилган, 7 та навбатчи ва 12 та минтақавий мухбирлик пунктларига бириктирилган енгил автотранспорт воситасини, Қорақалпоғистон ахборот агентлигига 1 та навбатчи хизмат енгил автотранспорт воситасини сақлаш учун лимит ажратсин.
3. Ўзбекистон Республикаси Ҳукуматининг айрим қарорлари 2-иловага мувофиқ ўз кучини йўқотган деб ҳисоблансин.
4. Вазирликлар ва идоралар ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсинлар.
5. Ушбу қарорнинг бажарилишини назорат қилиш Ўзбекистон Миллий ахборот агентлиги бош директори А. Кўчимов зиммасига ҳамда Вазирлар Маҳкамасининг Ёшлар сиёсати, маданият, маънавият, оммавий ахборот воситалари, ижодий ва жамоат ташкилотлари масалалари котибиятига юклансин.
Вазирлар Маҳкамасининг 2020 йил 3 январдаги 1-сон қарорига 1-ИЛОВА
Ўзбекистон Миллий ахборот агентлиги тўғрисида
1-боб. Умумий қоидалар
1. Ушбу Низом Ўзбекистон Миллий ахборот агентлигининг (кейинги ўринларда ЎзА деб аталади) мақоми, асосий вазифалари, функциялари, ҳуқуқлари, жавобгарлиги, фаолиятини ташкил этиш ва ҳисобот бериш тартибини, шунингдек, раҳбарларининг функционал вазифалари ва масъулиятини белгилайди.
2. ЎзА мамлакатимизнинг ички ва ташқи сиёсатини, жамиятимизда кечаётган ижтимоий-иқтисодий ўзгаришлар ва янгиланишларни, амалга оширилаётган туб ислоҳотларнинг моҳияти, аҳамияти ва самараларини оммавий ахборот воситаларида холис, изчил ва Ўзбекистон Республикасининг миллий манфаатлари нуқтаи назаридан ёритадиган расмий давлат ахборот агентлиги ҳисобланади.
ЎзА ўз фаолияти тўғрисида Ўзбекистон Республикаси Вазирлар Маҳкамасига ҳисобот беради.
3. ЎзА ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, шунингдек, ушбу Низомга ва бошқа қонунчилик ҳужжатларига амал қилади.
4. ЎзА юридик шахс ҳисобланади, Ўзбекистон Республикасининг Давлат герби тасвири туширилган ва ўз номи давлат тилида ёзилган муҳр ва бланкаларга, мустақил балансга, Ўзбекистон Республикаси Молия вазирлигининг Ғазначилигида шахсий ғазна ҳисоб варақларига, банк ҳисоб рақамларига, шу жумладан, хорижий валютадаги банк ҳисоб рақамларига эга бўлади.
5. ЎзАнинг расмий номланиши:
а) давлат тилида:
тўлиқ номи — Ўзбекистон Миллий ахборот агентлиги, қисқартирилган номи — ЎзА;
б) рус тилида:
тўлиқ номи — Национальное информационное агентство Узбекистана, қисқартирилган номи — УзА;
в) инглиз тилида:
тўлиқ номи — Uzbekistan National News Agency, қисқартирилган номи — UzA.
6. ЎзА жойлашган жой (почта манзили): Тошкент шаҳар, Миробод тумани, Буюк Турон кўчаси 42-уй, 100000.
2-боб. ЎзАнинг тузилмаси
7. ЎзА тизимига:
марказий аппарат;
Қорақалпоғистон ахборот агентлиги (кейинги ўринларда ҚАА деб аталади);
ЎзАнинг вилоятлардаги минтақавий мухбирлик пунктлари киради.
3-боб. ЎзА ва ҚААнинг вазифалари ва функциялари
1-§. ЎзАнинг вазифалари ва функциялари
8. Қуйидагилар ЎзАнинг асосий вазифалари ва фаолият йўналишлари ҳисобланади:
юртимизнинг ижтимоий-сиёсий ҳаётига оид расмий маълумотларни излаш, олиш, қайта ишлаш ҳамда ахборот, ахборот-таҳлилий, таҳлилий-танқидий материаллар тайёрлаш ва тарқатиш;
Ўзбекистон Республикасининг қонунлари, Ўзбекистон Республикаси Президентининг қарорлари, расмий баёнотлари ва маърузаларини, шунингдек, Ўзбекистон Республикаси Олий Мажлиси палаталари ва Ҳукуматининг қарорлари ва уларнинг фаолиятига оид ахборотларни мунтазам ёритиб бориш;
республиканинг ички ва ташқи сиёсатини, мамлакатимизда амалга оширилаётган кенг миқёсли ислоҳотларни, жамиятимизда кечаётган ижтимоий-сиёсий ва социал-иқтисодий ўзгаришлар ва янгиланишларни тезкор ёритиш;
жамоатчиликнинг катта қизиқишини уйғотаётган воқеаларнинг моҳияти бўйича фуқароларда холис фикрни шакллантириш ҳамда маълумотлардан бузғунчи ва бошқа ғайриқонуний мақсадларда фойдаланиш имкониятини бартараф этиш учун аҳолини бундай ҳодисалар ҳақида ўз вақтида хабардор қилиб бориш;
ахборот хуружлари ва мафкуравий таҳдидларнинг олдини олишга қаратилган чораларни амалга оширишда давлат органлари ва уларнинг ахборот хизматлари билан узвий ҳамкорлик қилиш ва улардан тизимли равишда статистик, таҳлилий ва бошқа турдаги маълумотларни олиш;
бошқа оммавий ахборот воситалари, жисмоний ва юридик шахслар фойдаланиши учун юртимизнинг ижтимоий, иқтисодий, сиёсий, тарихий ва маданий ривожланишига оид маълумотлар (ахборот, фото ва видеоматериаллар) базасини шакллантириш;
ўқувчилар учун қулай ва қизиқарли шаклда Ўзбекистон халқининг ўзига хос маданияти, урф-одатлари, миллий қадриятлари, мамлакатнинг кўп йиллик тарихи ва илм-фан ривожига қўшган ҳиссасини намойиш этишга қаратилган ижтимоий лойиҳаларни амалга ошириш;
юртимизда юз бераётган ўзгаришларни дунёга кенг тарқатиш, жаҳонда содир бўлаётган воқеа-ҳодисалар ҳақида мамлакатимиз аҳолисига тезкор ахборот етказиб бериш, хориждаги ахборот агентликлари ва бошқа оммавий ахборот воситалари, медиа-тузилмалар билан ҳамкорликни ривожлантириш.
9. ЎзА ўзига юкланган вазифаларга мувофиқ қуйидаги функцияларни амалга оширади:
1) юртимизнинг ижтимоий-сиёсий ҳаётига оид расмий маълумотларни излаш, олиш, қайта ишлаш ҳамда ахборот, ахборот-таҳлилий, таҳлилий-танқидий материаллар тайёрлаш ва тарқатиш соҳасида:
Ўзбекистон Республикасининг ички ва ташқи сиёсатини, мамлакатимизда амалга оширилаётган кенг миқёсли ислоҳотларни, жамиятимизда кечаётган ижтимоий-иқтисодий ўзгаришлар ва янгиланишлар самараларини ЎзА расмий веб-сайтида ҳамда оммавий ахборот воситаларида кенг ёритади;
қонунчилик ҳужжатлари ва қонунчилик ҳужжатлари лойиҳаларига нисбатан жамоатчиликда тўғри ва соғлом фикрни шакллантириш мақсадида замонавий ахборот-коммуникация технологиялари, жумладан, Интернет жаҳон ахборот тармоғи имкониятларидан кенг ва самарали фойдаланади;
аҳолини ва дунё ҳамжамиятини Ўзбекистон Республикасида содир бўлаётган воқеа-ҳодисалардан тезкор ва холисона хабардор қилади.
2) Ўзбекистон Республикаси қонунлари, Ўзбекистон Республикаси Президентининг қарорлари, расмий баёнотлари ва маърузаларини, шунингдек, Ўзбекистон Республикаси Олий Мажлиси палаталари ва Ҳукуматининг қарорлари ва уларнинг фаолиятига оид ахборотларни мунтазам ёритиб бориш соҳасида:
Ўзбекистон Республикаси қонунлари, Ўзбекистон Республикаси Олий Мажлиси палаталарининг қарорлари, Ўзбекистон Президентининг фармонлари, қарорлари, фармойишлари, расмий баёнотлари, нутқлари ва маърузаларини Интернет жаҳон ахборот тармоғидаги ЎзА расмий веб-сайтида эълон қилади, белгиланган оммавий ахборот воситаларига етказади;
Ўзбекистон Республикаси Олий Мажлиси палаталари ва Вазирлар Маҳкамаси билан бевосита ҳамкорлик асосида норматив-ҳуқуқий ҳужжатлар лойиҳалари тўғрисидаги маълумотларни йиғади ва уни кенг оммага тақдим этади;
Ўзбекистон Республикаси Президентининг хорижий мамлакатларга ташрифларини, ташрифдан кўзланаётган мақсад ҳамда кутилаётган натижалар ҳақидаги ахборотни оммавий ахборот воситалари, веб-ресурслар орқали аҳолига етказади;
Ўзбекистон Республикаси Президентининг республика ҳудудларига амалга оширадиган ташрифларини ўз расмий веб-сайти орқали онлайн тарзда ёритади.
3) Республиканинг ички ва ташқи сиёсатини, мамлакатимизда амалга оширилаётган кенг миқёсли ислоҳотларни, жамиятимизда кечаётган ижтимоий-сиёсий ва социал-иқтисодий ўзгаришлар ва янгиланишларни тезкор ёритиш соҳасида:
давлат органлари фаолияти, мамлакат ички ва ташқи сиёсати ҳақида ахборот тарқатиш орқали фуқароларнинг давлат органлари фаолияти, мамлакат ички ва ташқи сиёсати ҳақида ахборот олиш ҳуқуқларини таъминлайди.
4) Жамоатчиликнинг катта қизиқишини уйғотаётган воқеаларнинг моҳияти бўйича фуқароларда холис фикрни шакллантириш ҳамда маълумотлардан бузғунчи ва бошқа ғайриқонуний мақсадларда фойдаланиш имкониятини бартараф этиш учун аҳолини бундай ҳодисалар ҳақида ўз вақтида хабардор қилиб бориш соҳасида:
Ўзбекистонда юз бераётган ўзгаришлар ҳақида ўзининг Интернет жаҳон ахборот тармоғидаги расмий веб-сайти орқали бутун дунёга ахборот тарқатади;
дунёда содир бўлаётган воқеа-ҳодисалар ҳақидаги ахборотни тезкорлик билан ўзининг расмий веб-сайтига жойлаштириш орқали бундай ахборотни аҳолига етказиб беради;
жаҳонда юз бераётган воқеа-ҳодисалар ҳақида аниқ маълумотлар олиш, хориж оммавий ахборот воситаларига мамлакатимиз тўғрисида ишончли ахборот етказиш мақсадида хорижнинг етакчи ахборот агентликлари, оммавий ахборот воситалари, медиа тузилмалари билан ҳамкорлик қилади;
давлатлараро ва ҳукуматлараро шартномалар лойиҳаларини тайёрлашда қатнашади, ахборот алмашишни амалга оширади, ахборот соҳасида халқаро идоралараро шартномаларни белгиланган тартибда тузади.
5) Ахборот хуружлари ва мафкуравий таҳдидларнинг олдини олишга қаратилган чораларни амалга оширишда давлат органлари ва уларнинг ахборот хизматлари билан узвий ҳамкорлик қилиш ва улардан тизимли равишда статистик, таҳлилий ва бошқа турдаги маълумотларни олиш соҳасида:
оммавий ахборот воситаларида тўғри ва ҳаққоний ахборот тарқатиш орқали ахборот соҳасидаги хатар ва таҳдидларга қарши ўз вақтида ва муносиб курашади;
жамиятда бирор-бир воқеа, ҳодиса, ижтимоий сиёсий жараёнлар ва бошқа масалалар тўғрисида нотўғри ёки нохолис ахборот тарқатилганда бу ҳақида ҳаққоний, далилларга асосланган, холис ахборот тарқатиш орқали жамиятда миш-миш, таҳлика юзага келишининг олдини олади;
жамоатчиликнинг катта қизиқишини уйғотган воқеаларнинг моҳияти бўйича фуқароларда холис фикрни шакллантириш ҳамда нотўғри маълумотлардан бузғунчи ва бошқа ғайриқонуний мақсадларда фойдаланиш имкониятини бартараф этиш учун аҳолини бундай ҳодисалар ҳақида ўз вақтида хабардор қилади.
6) Бошқа оммавий ахборот воситалари, жисмоний ва юридик шахслар фойдаланиши учун юртимизнинг ижтимоий, иқтисодий, сиёсий, тарихий ва маданий ривожланишига оид маълумотлар (ахборот, фото ва видеоматериаллар) базасини шакллантириш соҳасида;
юртимизда рўй бераётган ижтимоий, иқтисодий, сиёсий, тарихий, маданий жараёнларга доир материаллар, мақолалар, фотоматериаллар, видеолавҳалар тайёрлайди, уларни расмий веб-сайт орқали жаҳон ҳамжамиятига тақдим этади;
оммавий ахборот воситалари ва интернет тармоғи орқали узатилган барча материалларнинг электрон базасини шакллантиради;
мазкур материаллардан оммавий ахборот воситалари, жисмоний ва юридик шахслар эркин фойдаланиши учун шароит яратади.
7) Ўқувчилар учун қулай ва қизиқарли шаклда Ўзбекистон халқининг ўзига хос маданияти, урф-одатлари, миллий қадриятлари, мамлакатнинг кўп йиллик тарихи ва илм-фан ривожига қўшган ҳиссасини намойиш этишга қаратилган ижтимоий лойиҳаларни амалга ошириш соҳасида:
Республика миқёсида амалга ошириладиган, тарихимиз ва миллий қадриятларимизни жаҳон ҳамжамиятига танитишга хизмат қиладиган ижтимоий лойиҳалар тўғрисидаги ахборотни оммавий ахборот воситалари ва интернет тармоғи орқали тарқатишни бевосита амалга оширади;
мазкур лойиҳалар жараёнини ёритиб боради ҳамда иштирок этади.
8) Юртимизда юз бераётган ўзгаришларни дунёга кенг тарқатиш, жаҳонда содир бўлаётган воқеа-ҳодисалар ҳақида мамлакатимиз аҳолисига тезкор ахборот етказиб бериш, хориждаги ахборот агентликлари ва бошқа оммавий ахборот воситалари, медиа-тузилмалар билан ҳамкорликни ривожлантириш соҳасида:
Ўзбекистон Республикасининг ички ва ташқи сиёсати, амалга оширилаётган кенг миқёсли ислоҳотлар, ижтимоий-иқтисодий ўзгаришлар ва янгиланишлар ҳақида матнли, аудио ва видеоматериаллар тайёрлайди ҳамда уларни белгиланган тартибда оммавий ахборот воситаларига тарқатади;
мамлакатимизда олиб борилаётган ислоҳотлар, улардан кўзланган эзгу мақсадлар моҳиятини очиб берадиган матнли, аудио ва видеоматериалларни ўз расмий веб-сайтида эълон қилиб боради.
2-§. ҚААнинг вазифалари ва функциялари
10. Қуйидагилар ҚААнинг асосий вазифалари ва фаолияти йўналишлари ҳисобланади:
Ўзбекистон Республикаси қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари, фармойишлари, расмий баёнотлари, нутқ ва маърузаларини, Вазирлар Маҳкамасининг қарорлари ва фармойишларини, Қорақалпоғистон Республикаси Жўқорғи Кенгеси ва Вазирлар Кенгаши қабул қилган ҳужжатларни, уларнинг фаолиятига, шунингдек, мамлакатимиз ижтимоий-сиёсий ҳаётига оид ахборотни тарқатиш;
фуқароларнинг Қорақалпоғистон Республикаси Жўқорғи Кенгеси ва Вазирлар Кенгаши ҳамда бошқа давлат органлари фаолияти ҳақида ахборот олиш ҳуқуқларини таъминлаш;
ахборот хуружлари ва мафкуравий таҳдидларнинг олдини олишга қаратилган чораларни амалга оширишда давлат органлари ва уларнинг ахборот хизматлари билан яқиндан ҳамкорлик қилиш.
11. ҚАА ўзига юкланган вазифаларга мувофиқ қуйидаги функцияларни амалга оширади:
1) Ўзбекистон Республикаси қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари, фармойишлари, расмий баёнотлари, нутқ ва маърузаларини, Вазирлар Маҳкамасининг қарорлари ва фармойишларини, Қорақалпоғистон Республикаси Жўқорғи Кенгеси ва Вазирлар Кенгаши қабул қилган ҳужжатларни, уларнинг фаолиятига, шунингдек, мамлакатимиз ижтимоий-сиёсий ҳаётига оид ахборотни тарқатиш соҳасида:
Ўзбекистон Республикаси қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари, фармойишлари, расмий баёнотлари, нутқ ва маърузаларини, Вазирлар Маҳкамасининг қарорлари ва фармойишларини, Қорақалпоғистон Республикаси Жўқорғи Кенгеси ва Вазирлар Кенгаши қабул қилган ҳужжатларни ўз расмий веб-сайтида эълон қилади, белгиланган тартибда оммавий ахборот воситаларига етказади;
Ўзбекистон Республикаси ва Қорақалпоғистон Республикаси ижтимоий-сиёсий ҳаётида рўй бераётган ўзгаришлар ҳақида ахборотни, ижтимоий ҳаётнинг барча соҳаларидаги янгиликларни қорақалпоқ ва бошқа тилларда тайёрлайди ва ўз расмий веб-сайтида эълон қилади, белгиланган тартибда оммавий ахборот воситаларига етказиб беради;
Қорақалпоғистон Республикаси Жўқорғи Кенгеси ва Вазирлар Кенгаши фаолияти ҳақида матнли, аудио ва видеоматериаллар тайёрлайди, уларни ўз расмий веб-сайтида эълон қилади ҳамда белгиланган тартибда оммавий ахборот воситаларига етказиб беради.
2) Фуқароларнинг Қорақалпоғистон Республикаси Жўқорғи Кенгеси ва Вазирлар Кенгаши ҳамда бошқа давлат органлари фаолияти ҳақида ахборот олиш ҳуқуқларини таъминлаш соҳасида:
Қорақалпоғистон Республикаси Жўқорғи Кенгеси ва Вазирлар Кенгаши ҳамда бошқа давлат органлари фаолияти тўғрисида аҳолига мунтазам равишда ишончли маълумотларни етказиб туради;
ўз расмий веб-сайтида давлат органлари фаолияти тўғрисидаги маълумотлар доимий янгиланиб борилишини таъминлайди;
давлат органлари фаолияти, мамлакат ички ва ташқи сиёсати ҳақида ахборот тарқатиш орқали фуқароларнинг давлат органлари фаолияти, мамлакат ички ва ташқи сиёсати ҳақида ахборот олиш ҳуқуқларини таъминлайди.
3) Ахборот хуружлари ва мафкуравий таҳдидларнинг олдини олишга қаратилган чораларни амалга оширишда давлат органлари ва уларнинг ахборот хизматлари билан яқиндан ҳамкорлик қилиш соҳасида:
жамиятда қизғин муҳокамаларга сабаб бўлаётган воқеаларнинг моҳияти бўйича фуқароларда холис фикрни шакллантириш ҳамда нотўғри маълумотлардан бузғунчи ва бошқа ғайриқонуний мақсадларда фойдаланиш имкониятини бартараф этиш учун аҳолини бундай ҳодисалар ҳақида ўз вақтида хабардор қилади;
холис, ишончли ахборот тарқатиш орқали ахборот хуружлари ва мафкуравий таҳдидларнинг олдини олишга қаратилган чораларни амалга оширади;
кенг оммага ишончли маълумот тарқатиш мақсадида давлат органлари раҳбарлари ва ахборот хизматлари билан ҳамкорлик ўрнатади.
4-боб. ЎзАнинг ҳуқуқлари ва жавобгарлиги
12. ЎзА ўзига юкланган вазифалар ва функцияларни бажариш учун қуйидаги ҳуқуқларга эга:
ўз ваколатларига кирадиган масалаларни ҳал қилиш учун давлат органларидан ва бошқа ташкилотлардан белгиланган тартибда маълумотларни сўраб олиш;
расмий ва бошқа ахборотни тўплаш ҳамда уларни қонунчилик ҳужжатларида белгиланган тартибда Ўзбекистон Республикасида ва хорижий оммавий ахборот воситаларида тарқатиш;
ўзига юкланган вазифалар ва функцияларни бажариш билан боғлиқ норматив-ҳуқуқий ҳужжатлар лойиҳалари ва бошқа ҳужжатларни белгиланган тартибда Ўзбекистон Республикаси Президенти Администрацияси ҳамда Вазирлар Маҳкамасига тақдим этиш;
давлат статистика органларидан зарур статистик маълумотларни бепул асосда олиш;
ўз ваколатига кирадиган масалалар бўйича Вазирлар Маҳкамасига ва давлат органларига белгиланган тартибда таклифлар киритиш;
барча турдаги ахборотни тўплаш, қайта ишлаш ва тарқатиш масалалари юзасидан халқаро алоқаларни амалга ошириш, хорижий ахборот агентликлари билан тажриба алмашиш;
вилоятларда минтақавий мухбирлик пунктларини ташкил этиш, қайта ташкил этиш ва тугатиш;
бошқа ахборот агентликлари, жумладан, хорижий ахборот агентликлари, оммавий ахборот воситалари, медиа-тузилмалар, ахборот марказлари билан ахборот алмашиш тўғрисида, ишлаб чиқариш ва бошқа соҳаларда ҳамкорлик қилишга оид шартномалар тузиш;
буюртмачиларга сотиладиган ахборот ва хизматлар (матнли, фото, аудио ва видео материаллар, хизматлар) нархлари ва тарифларини белгилаш;
ЎзАга юклатилган вазифаларни бажариш доирасида давлат органлари ва бошқа ташкилотлар, нодавлат нотижорат ташкилотлари, илмий-текшириш институтлари, илмий ва таълим муассасалари, шунингдек, халқаро ташкилотлар ва хорижий компанияларнинг юқори малакали ходимларини жалб қилиш;
ЎзА биносидаги вақтинча фойдаланилмаётган хоналарни жисмоний ва юридик шахсларга белгиланган тартибда ижара шартномаси асосида фойдаланишга бериш;
босма оммавий ахборот воситаларини таъсис этиш;
матн тузиш, матнни таҳрир қилиш, фото, аудио, видеохизматлар, таржима ва бошқа пуллик хизматлар кўрсатиш;
ЎзА ва унинг тизимидаги таркибий бўлинмалар ва ташкилотларнинг моддий-техника базасини яхшилаш чора-тадбирларини кўриш.
ЎзА қонунчилик ҳужжатларига мувофиқ бошқа ҳуқуқларга ҳам эга бўлиши мумкин.
13. ЎзА:
ўз фаолияти бўйича Ўзбекистон Республикаси Вазирлар Маҳкамасига белгиланган тартибда ҳисоботлар тақдим этиш;
ҚАА фаолиятини мувофиқлаштириш;
ўзига юкланган вазифаларнинг самарали амалга оширилиши учун жавоб беради.
14. ҚАА ўзига юкланган вазифалар ва функцияларни бажариш учун қуйидаги ҳуқуқларга эга:
Қорақалпоғистон Республикаси Вазирлар Кенгаши, давлат органларининг ҳудудий бўлимлари, шунингдек, бошқа ташкилотлардан ўзига юкланган вазифаларни сифатли бажариш учун зарур бўлган ахборот материалларини сўраб олиш, уларни қайта ишлаш ва тарқатиш;
жисмоний ва юридик шахсларга матн тузиш, матнни таҳрир қилиш, фото, аудио, видеохизматлар, таржима ва бошқа пуллик хизматлар кўрсатиш;
ахборот-таҳлилий материаллар тайёрлаш ҳамда ўзига юкланган бошқа вазифаларни бажариш учун давлат органлари, шунингдек, илмий ташкилотларнинг юқори малакали мутахассисларини жалб қилиш.
15. ҚАА:
ўз фаолияти бўйича ЎзАга ҳамда Қорақалпоғистон Республикаси Вазирлар Кенгашига белгиланган тартибда ҳисобот тақдим этиш;
ўзига юкланган вазифаларнинг самарали амалга оширилиши учун масъулдир.
5-боб. ЎзА раҳбарларининг функционал мажбуриятлари
16. ЎзА ва ҚАА раҳбарлари зиммасига қуйидаги функционал мажбуриятлар юкланади:
1. ЎзА бош директори:
а) ЎзА ва Қорақалпоғистон ахборот агентлиги тузилмаси штатлар сонига ходимларнинг белгиланган умумий чекланган сони ва меҳнатга ҳақ тўлаш фонди доирасида ўзгартиришлар киритади;
б) ЎзАнинг бюджетдан ташқари маблағлари ҳисобидан:
давлат органлари, нодавлат нотижорат ташкилотлари, илмий-тадқиқот муассасалари, етакчи халқаро ташкилотлар ва хорижий компанияларнинг юқори малакали ходимларини, шунингдек, маҳаллий ва хорижий мутахассисларни маслаҳатчи сифатида жалб этади;
ижодий танловлар ўтказади, танлов иштирокчи ва ғолибларини мукофотлайди, шунингдек, ЎзАнинг ходими бўлмаган фаол муаллифларни рағбатлантиради;
ЎзА моддий-техника базасини мустаҳкамлаш, агентлик ходимларини моддий рағбатлантириш, шу жумладан уларга устамалар тўлаш бўйича чора-тадбирларни амалга оширади;
зарур ҳолларда, минтақавий мухбирлик пунктларида қўшимча штат бирликларини жорий этади;
қонунчилик ҳужжатларига мувофиқ бошқа ваколатларни ҳам амалга оширади.
в) ЎзА бош директорининг ўринбосарлари:
Ўзбекистон Республикаси Президенти Администрацияси ва Вазирлар Маҳкамасининг тегишли бўлинмалари билан ахборот тарқатиш соҳаларини ривожлантириш, норматив-ҳуқуқий ҳужжатлар лойиҳаларини сифатли тайёрлаш юзасидан ҳамкорлик қилади;
ЎзА бош директорининг топшириғига биноан ахборот тарқатиш соҳаларини ривожлантириш бўйича устувор вазифалар ва дастурлар бажарилишини мувофиқлаштиради;
ЎзАнинг тасдиқланган тузилмасига мувофиқ тегишли бўлинмаларни бевосита бошқаришни амалга оширади;
бош директор ўринбосарлари номенклатурасига кирадиган ЎзАнинг марказий аппарати, бош муҳаррирлари, бошқармалари ва хизматлари бошлиқлари лавозимларига номзодларни белгиланган тартибда тасдиқлаш учун киритади;
бош директор ўринбосарлари номенклатурасига кирадиган тузилмаларнинг таркибий бўлинмалари бошлиқларини қайта тайёрлаш ва малакасини ошириш, рағбатлантириш ва интизомий жазо чораларини қўллаш юзасидан таклифлар киритади;
мутасадди бўлинмаларда кадрлар захирасини шакллантириш бўйича тизимли асосда ишларни ташкил қилади;
қонунчилик ҳужжатларига мувофиқ бошқа ваколатларни ҳам амалга оширади.
г) ҚАА директори:
юклатилган вазифалар ва функцияларга мувофиқ ҚАА фаолиятини, шу жумладан, бош муҳаррир, бўлим бошлиқлари ва мутахассислар ишини ташкил қилади;
ҚААнинг ахборот тарқатиш, таржима фаолияти соҳалари ривожланиши ҳолатини баҳолайди ва ЎзА раҳбариятига уларнинг истиқболдаги ривожланиши юзасидан аниқ таклифлар ва амалга ошириш механизмларини киритади;
қонунчилик ҳужжатларига мувофиқ бошқа ваколатларни ҳам амалга оширади.
д) ЎзА бош муҳаррири, бошқарма ва хизмат бошлиғи:
тасдиқланган низом доирасида аниқ йўналишлардаги вазифаларининг сифатли ва ўз вақтида бажарилишини таъминлайди;
ўзи масъул бўлган таҳририят, бошқарма, хизматнинг фаолияти ҳолатини сифатли баҳолаб, истиқболда ривожланиши бўйича ЎзА раҳбариятига аниқ таклифлар ва уларни амалга ошириш механизмларини киритади, ходимларнинг лавозим йўриқномаларида белгиланган вазифаларни бажарилишини назорат қилади.
6-боб. ЎзА раҳбарларининг жавобгарлиги
17. ЎзА бош директори:
ушбу Низом ва бошқа қонунчилик ҳужжатлари билан ўзига юкланган вазифаларни сифатли ва ўз вақтида бажариш, шунингдек, ЎзА фаолиятидаги камчиликларни бартараф этиш бўйича аниқ чора-тадбирлар кўради;
ЎзА, унинг таркибий ва ҳудудий бўлинмаларида ижро интизомига қатъий риоя қилиниши учун жавоб беради.
18. ЎзА бош директорининг ўринбосарлари:
тегишли йўналишлар бўйича бажариладиган топшириқларнинг самарадорлиги ва ўз вақтида ижро этилиши учун;
мутасадди таҳририятлар, бошқарма ва хизматлар, бўлимлар фаолияти барқарор ривожланишини таъминлаш бўйича амалга оширилаётган чора-тадбирларнинг натижадорлиги ва самарадорлиги учун жавоб беради.
19. ҚАА директори:
қонунчилик ҳужжатлари, ЎзА ва Қорақалпоғистон Республикаси Вазирлар Кенгаши раҳбарларининг топшириқлари, шунингдек, ўзига юклатилган вазифалар ва функцияларнинг ўз вақтида ҳамда сифатли бажарилиши юзасидан таъсирчан назоратни амалга ошириш;
ҚААнинг ахборот тарқатиш фаолиятини ривожлантириш бўйича белгиланган вазифаларнинг сифатли ва ўз вақтида бажарилишини таъминлаш учун жавоб беради.
7-боб. ЎзА фаолиятини ташкил қилиш
20. ЎзАга Ўзбекистон Республикаси Вазирлар Маҳкамаси томонидан лавозимга тайинланадиган ва лавозимдан озод этиладиган бош директор бошчилик қилади.
Бош директор Ўзбекистон Республикаси Вазирлар Маҳкамаси томонидан лавозимга тайинланадиган ва лавозимдан озод этиладиган икки нафар ўринбосарга, шу жумладан, бир нафар биринчи ўринбосарга эга бўлади.
21. ҚАА директори Қорақалпоғистон Республикаси Вазирлар Кенгаши билан келишган ҳолда ЎзА бош директори томонидан лавозимга тайинланади ва лавозимдан озод этилади.
22. ЎзА ҳузурида унинг фаолиятини тизимли йўлга қўйиш ҳамда давлат органлари ва нодавлат ташкилотлар билан самарали ҳамкорликни ўрнатиш бўйича маслаҳат кенгаши (кейинги ўринларда — Маслаҳат кенгаши) тузилади.
Қуйидагилар Маслаҳат кенгашининг асосий вазифалари этиб белгиланади:
ЎзА фаолияти ҳақида кенг жамоатчилик фикрини таҳлил қилган ҳолда унинг самарадорлигини янада ошириш ҳамда агентликнинг ахборот маконидаги ўрни ва ролини кучайтириш бўйича таклифлар ишлаб чиқиш;
ЎзА фаолиятининг ривожланиш даражасини ўрганиш, агентликка методик тавсиялар бериш, унинг ишида юзага келадиган муаммо ва камчиликларни бартараф этишга кўмаклашиш;
давлат органлари ва фуқаролик жамияти институтлари, шу жумладан оммавий ахборот воситалари билан ўзаро ҳамкорлик қилиш режаларини белгилаш, тадбирларни ташкил этиш ва ўтказишда амалий ёрдам кўрсатиш;
халқаро ва хорижий ахборот агентликлари, хорижий мамлакатлар оммавий ахборот воситалари билан ҳамкорлик дастурларининг ишлаб чиқилиши ва амалга оширилишига кўмаклашиш ва улар ижросини мунтазам равишда муҳокама қилиб бориш.
23. Маслаҳат кенгаши ўз фаолиятини жамоатчилик асосида олиб борадиган, доимий фаолият юритувчи коллегиал орган ҳисобланади.
Маслаҳат кенгашига ЎзА бош директори раҳбарлик қилади ҳамда унинг таркиби оммавий ахборот воситалари соҳасидаги ташкилотлар раҳбарлари ва мутахассислари, шунингдек, мустақил экспертлардан шакллантирилади.
Маслаҳат кенгаши таркибининг учдан бир қисми ҳар 2 йилда янгиланиб борилади.
Маслаҳат кенгаши таркиби бош директор томонидан тасдиқланади.
Маслаҳат кенгаши фаолиятининг тартиби бош директор томонидан тасдиқланадиган низом билан белгиланади.
8-боб. ЎзА ҳамда унинг ходимлари фаолияти самарадорлиги ва натижадорлигини баҳолаш мезонлари ва иш индикаторлари
24. ЎзА фаолиятининг самарадорлиги ва натижадорлиги мунтазам баҳоланади.
25. ЎзАнинг фаолияти самарадорлиги ва натижадорлигига берилган баҳолар Ўзбекистон Республикасининг Бош вазири томонидан тасдиқланадиган ЎзАнинг фаолияти самарадорлиги ва натижадорлигини баҳолаш мезонлари ва иш индикаторларига асосланади.
26. ЎзАнинг фаолияти самарадорлиги ва натижадорлигини баҳолаш якунлари бўйича:
ЎзА раҳбарлари ва ходимларини рағбатлантириш (мукофотлаш) ёки интизомий жавобгарликка тортиш;
ЎзАнинг фаолиятида аниқланган камчиликларни бартараф этиш ва унинг фаолиятини янада такомиллаштириш чора-тадбирлари кўрилади.
ЎзА унинг раҳбарлари ва ходимлари фаолиятининг самарадорлиги ва натижадорлигини баҳолаш тизими тартиби ва методикасини ишлаб чиқади.
9-боб. ЎзА ва ҚАА фаолиятини молиялаштириш ва ходимларини моддий рағбатлантириш
27. ЎзА ва ҚАА фаолиятини молиялаштириш ва улар ходимларини моддий рағбатлантириш:
Ўзбекистон Республикаси Давлат бюджети маблағлари;
ЎзА ва ҚААнинг ўз маблағлари;
қонунчилик ҳужжатларида тақиқланмаган бошқа манбалар ҳисобига амалга оширилади.
28. ЎзА ва ҚАА бюджет муассасалари учун белгиланган тартибда ўзларининг бюджет ва бюджетдан ташқари даромадлар ва харажатлар сметалари ҳамда штат жадвалларини шакллантиради ва ҳисоботини юритади.
29. ЎзА ва ҚААнинг ходимлари меҳнатига ҳақ тўлаш ЎзА томонидан Ўзбекистон Республикаси Бандлик ва меҳнат муносабатлари вазирлиги ҳамда Молия вазирлиги билан келишган ҳолда ЎзА ва ҚАА ходимларининг меҳнатига ҳақ тўлаш бўйича тасдиқланадиган разрядлар ва штатларга асосан амалга оширилади.
30. ЎзА ва ҚАА ходимларига:
бир ойлик иш ҳақи фондини йўналтирган ҳолда моддий ёрдам кўрсатиш;
бюджет муассасалари учун белгиланган меҳнат ҳақи йиллик фондининг 15 фоизи миқдорида ходимларни моддий рағбатлантириш махсус фонди;
давлат хизматчилари учун белгиланган тартибда лавозим маошларига 20 фоиз миқдоридаги устама ҳақ сақлаб қолинади.
Бунда 20 фоиз миқдоридаги устама татбиқ этиладиган ЎзА ва ҚАА штат лавозимлари Ўзбекистон Республикаси Бандлик ва меҳнат муносабатлари вазирлиги ҳамда Молия вазирлиги билан келишилади ва ЎзА томонидан тасдиқланади.
31. ЎзА ва ҚААнинг ўз маблағлари ҳақиқий тушумлари йил якунлари бўйича бюджетдан ташқари маблағларига оид даромад ва харажатлар сметасида назарда тутилган прогноз кўрсаткичларидан юқори бўлган ҳолларда, маблағларнинг ушбу қисми қуйидаги тартибда тақсимланади:
даромаднинг 50 фоизи ЎзА ва ҚААнинг тасарруфида қолади (шундан 50 фоизидан кўп бўлмаган қисми ходимларни ижтимоий ҳимоялаш ва моддий рағбатлантиришга ва 50 фоиздан кам бўлмаган қисми моддий-техник базани мустаҳкамлашга сарфланади);
қолган 50 фоизи кейинги йилда ЎзА ва ҚААни сақлаш харажатларини молиялаштириш мақсадлари учун белгиланган тартибда йўналтирилади. Бунда тегишли молия йилида ЎзА ва ҚААга бюджетдан ажратиш назарда тутилган прогноз маблағлар ушбу суммага камайтирилади.
10-боб. ЎзАнинг ҳисобот бериши
32. ЎзА ҳар йили Ўзбекистон Республикаси Вазирлар Маҳкамасига ЎзА фаолияти натижалари тўғрисида ҳисобот беради.
33. Ўзбекистон Республикаси Вазирлар Маҳкамасининг тегишли таркибий бўлинмалари раҳбарлари ЎзА раҳбарларининг уларга юкланган вазифаларни самарали бажариши бўйича фаолиятининг доимий мониторингини олиб боради, ЎзА фаолиятини холисона баҳолайди.
34. Мониторинг ва баҳолаш якунлари бўйича ЎзАнинг алоҳида ўрнак кўрсатган раҳбарлари, мансабдор шахслари ва ходимлари рағбатлантирилади ёхуд йўл қўйилган жиддий камчиликлар учун эгаллаб турган лавозимидан озод қилишгача жавобгарликка тортилади.
11-боб. Якунловчи қоида
35. ЎзАни қайта ташкил этиш ва тугатиш қонунчилик ҳужжатларида белгиланган тартибда амалга оширилади.
Вазирлар Маҳкамасининг 2020 йил 3 январдаги 1-сон қарорига 2-ИЛОВА
Ўзбекистон Республикаси Ҳукуматининг ўз кучини йўқотаётган айрим қарорлари
1. Ўзбекистон Республикаси Президенти ҳузуридаги Вазирлар Маҳкамасининг «Ўзбекистон Миллий ахборот агентлиги (ЎзА) тўғрисида» 1992 йил 21 апрелдаги 202-сон қарори (Ўзбекистон Республикаси ҚТ, 1992 й., 4-сон, 12-модда).
3. Вазирлар Маҳкамасининг «Ўзбекистон Республикаси Ҳукуматининг вазирликлар, давлат қўмиталари ва идоралар тўғрисидаги низомларни тасдиқлаш бўйича айрим қарорларига ўзгартириш ва қўшимчалар киритиш ҳақида» 2010 йил 5 июндаги 108-сон қарорига (Ўзбекистон Республикаси ҚТ, 2010 й., 6-сон, 27-модда) илованинг 3-банди .
4. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикаси Президентининг «Давлат ва хўжалик бошқаруви органлари тузилмасини янада такомиллаштириш ва бошқарув ходимлари сонини оптималлаштириш чора-тадбирлари тўғрисида» 2015 йил 18 декабрдаги ПҚ-2450-сон қарори)» 2016 йил 5 майдаги 140-сон қарори (Ўзбекистон Республикаси ҚТ, 2016 й., 5-сон, 37-модда).
5. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг «Бандлик соҳасида давлат сиёсатини янада такомиллаштириш ва меҳнат органлари фаолияти самарадорлигини тубдан ошириш чора-тадбирлари тўғрисида» 2017 йил 24 майдаги ПФ-5052-сон Фармони, Ўзбекистон Республикаси Президентининг «Ўзбекистон Республикаси Бандлик ва меҳнат муносабатлари вазирлиги фаолиятини ташкил этиш чора-тадбирлари тўғрисида» 2017 йил 24 майдаги ПҚ-3001-сон қарори)» 2017 йил 8 сентябрдаги 703-сон қарорига (Ўзбекистон Республикаси ҚТ, 2017 й., 9-сон, 198-модда) илованинг 1-банди .
Ўзбекистон Республикасининг Бош вазири А. АРИПОВ
Тошкент ш.,
2020 йил 3 январь,
1-сон
Oʻzbekiston Respublikasi Vazirlar Mahkamasining
qarori
NIZOM
ROʻYXATI
Oʻzbekiston Milliy axborot agentligi faoliyatini qoʻllab-quvvatlash toʻgʻrisida
Oʻzbekiston Respublikasi Prezidentining “Oʻzbekiston Milliy axborot agentligi faoliyatini yanada takomillashtirish chora-tadbirlari toʻgʻrisida” 2019-yil 2-dekabrdagi PQ-4541-son qarori ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Milliy axborot agentligi (keyingi oʻrinlarda OʻzA deb ataladi) toʻgʻrisida nizom 1-ilovaga muvofiq tasdiqlansin.
2. Oʻzbekiston Respublikasi Moliya vazirligi:
Qoraqalpogʻiston axborot agentligi hamda OʻzAning viloyatlardagi mintaqaviy muxbirlik punktlari uchun 1 tadan yengil avtotransport vositasi xarid qilish uchun mablagʻ ajratsin;
Oʻzbekiston Milliy axborot agentligiga 22 ta, shu jumladan, 3 ta shaxsiy biriktirilgan, 7 ta navbatchi va 12 ta mintaqaviy muxbirlik punktlariga biriktirilgan yengil avtotransport vositasini, Qoraqalpogʻiston axborot agentligiga 1 ta navbatchi xizmat yengil avtotransport vositasini saqlash uchun limit ajratsin.
3. Oʻzbekiston Respublikasi Hukumatining ayrim qarorlari 2-ilovaga muvofiq oʻz kuchini yoʻqotgan deb hisoblansin.
4. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.
5. Ushbu qarorning bajarilishini nazorat qilish Oʻzbekiston Milliy axborot agentligi bosh direktori A. Koʻchimov zimmasiga hamda Vazirlar Mahkamasining Yoshlar siyosati, madaniyat, maʼnaviyat, ommaviy axborot vositalari, ijodiy va jamoat tashkilotlari masalalari kotibiyatiga yuklansin.
Vazirlar Mahkamasining 2020-yil 3-yanvardagi 1-son qaroriga 1-ILOVA
Oʻzbekiston Milliy axborot agentligi toʻgʻrisida
1-bob. Umumiy qoidalar
1. Ushbu Nizom Oʻzbekiston Milliy axborot agentligining (keyingi oʻrinlarda OʻzA deb ataladi) maqomi, asosiy vazifalari, funksiyalari, huquqlari, javobgarligi, faoliyatini tashkil etish va hisobot berish tartibini, shuningdek, rahbarlarining funksional vazifalari va masʼuliyatini belgilaydi.
2. OʻzA mamlakatimizning ichki va tashqi siyosatini, jamiyatimizda kechayotgan ijtimoiy-iqtisodiy oʻzgarishlar va yangilanishlarni, amalga oshirilayotgan tub islohotlarning mohiyati, ahamiyati va samaralarini ommaviy axborot vositalarida xolis, izchil va Oʻzbekiston Respublikasining milliy manfaatlari nuqtai nazaridan yoritadigan rasmiy davlat axborot agentligi hisoblanadi.
OʻzA oʻz faoliyati toʻgʻrisida Oʻzbekiston Respublikasi Vazirlar Mahkamasiga hisobot beradi.
3. OʻzA oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonunchilik hujjatlariga amal qiladi.
4. OʻzA yuridik shaxs hisoblanadi, Oʻzbekiston Respublikasining Davlat gerbi tasviri tushirilgan va oʻz nomi davlat tilida yozilgan muhr va blankalarga, mustaqil balansga, Oʻzbekiston Respublikasi Moliya vazirligining Gʻaznachiligida shaxsiy gʻazna hisob varaqlariga, bank hisob raqamlariga, shu jumladan, xorijiy valyutadagi bank hisob raqamlariga ega boʻladi.
5. OʻzAning rasmiy nomlanishi:
a) davlat tilida:
toʻliq nomi — Oʻzbekiston Milliy axborot agentligi, qisqartirilgan nomi — OʻzA;
b) rus tilida:
toʻliq nomi — Natsionalnoye informatsionnoye agentstvo Uzbekistana, qisqartirilgan nomi — UzA;
v) ingliz tilida:
toʻliq nomi — Uzbekistan National News Agency, qisqartirilgan nomi — UzA.
6. OʻzA joylashgan joy (pochta manzili): Toshkent shahar, Mirobod tumani, Buyuk Turon koʻchasi 42-uy, 100000.
2-bob. OʻzAning tuzilmasi
7. OʻzA tizimiga:
markaziy apparat;
Qoraqalpogʻiston axborot agentligi (keyingi oʻrinlarda QAA deb ataladi);
OʻzAning viloyatlardagi mintaqaviy muxbirlik punktlari kiradi.
3-bob. OʻzA va QAAning vazifalari va funksiyalari
1-§. OʻzAning vazifalari va funksiyalari
8. Quyidagilar OʻzAning asosiy vazifalari va faoliyat yoʻnalishlari hisoblanadi:
yurtimizning ijtimoiy-siyosiy hayotiga oid rasmiy maʼlumotlarni izlash, olish, qayta ishlash hamda axborot, axborot-tahliliy, tahliliy-tanqidiy materiallar tayyorlash va tarqatish;
Oʻzbekiston Respublikasining qonunlari, Oʻzbekiston Respublikasi Prezidentining qarorlari, rasmiy bayonotlari va maʼruzalarini, shuningdek, Oʻzbekiston Respublikasi Oliy Majlisi palatalari va Hukumatining qarorlari va ularning faoliyatiga oid axborotlarni muntazam yoritib borish;
respublikaning ichki va tashqi siyosatini, mamlakatimizda amalga oshirilayotgan keng miqyosli islohotlarni, jamiyatimizda kechayotgan ijtimoiy-siyosiy va sotsial-iqtisodiy oʻzgarishlar va yangilanishlarni tezkor yoritish;
jamoatchilikning katta qiziqishini uygʻotayotgan voqealarning mohiyati boʻyicha fuqarolarda xolis fikrni shakllantirish hamda maʼlumotlardan buzgʻunchi va boshqa gʻayriqonuniy maqsadlarda foydalanish imkoniyatini bartaraf etish uchun aholini bunday hodisalar haqida oʻz vaqtida xabardor qilib borish;
axborot xurujlari va mafkuraviy tahdidlarning oldini olishga qaratilgan choralarni amalga oshirishda davlat organlari va ularning axborot xizmatlari bilan uzviy hamkorlik qilish va ulardan tizimli ravishda statistik, tahliliy va boshqa turdagi maʼlumotlarni olish;
boshqa ommaviy axborot vositalari, jismoniy va yuridik shaxslar foydalanishi uchun yurtimizning ijtimoiy, iqtisodiy, siyosiy, tarixiy va madaniy rivojlanishiga oid maʼlumotlar (axborot, foto va videomateriallar) bazasini shakllantirish;
oʻquvchilar uchun qulay va qiziqarli shaklda Oʻzbekiston xalqining oʻziga xos madaniyati, urf-odatlari, milliy qadriyatlari, mamlakatning koʻp yillik tarixi va ilm-fan rivojiga qoʻshgan hissasini namoyish etishga qaratilgan ijtimoiy loyihalarni amalga oshirish;
yurtimizda yuz berayotgan oʻzgarishlarni dunyoga keng tarqatish, jahonda sodir boʻlayotgan voqea-hodisalar haqida mamlakatimiz aholisiga tezkor axborot yetkazib berish, xorijdagi axborot agentliklari va boshqa ommaviy axborot vositalari, media-tuzilmalar bilan hamkorlikni rivojlantirish.
9. OʻzA oʻziga yuklangan vazifalarga muvofiq quyidagi funksiyalarni amalga oshiradi:
1) yurtimizning ijtimoiy-siyosiy hayotiga oid rasmiy maʼlumotlarni izlash, olish, qayta ishlash hamda axborot, axborot-tahliliy, tahliliy-tanqidiy materiallar tayyorlash va tarqatish sohasida:
Oʻzbekiston Respublikasining ichki va tashqi siyosatini, mamlakatimizda amalga oshirilayotgan keng miqyosli islohotlarni, jamiyatimizda kechayotgan ijtimoiy-iqtisodiy oʻzgarishlar va yangilanishlar samaralarini OʻzA rasmiy veb-saytida hamda ommaviy axborot vositalarida keng yoritadi;
qonunchilik hujjatlari va qonunchilik hujjatlari loyihalariga nisbatan jamoatchilikda toʻgʻri va sogʻlom fikrni shakllantirish maqsadida zamonaviy axborot-kommunikatsiya texnologiyalari, jumladan, Internet jahon axborot tarmogʻi imkoniyatlaridan keng va samarali foydalanadi;
aholini va dunyo hamjamiyatini Oʻzbekiston Respublikasida sodir boʻlayotgan voqea-hodisalardan tezkor va xolisona xabardor qiladi.
2) Oʻzbekiston Respublikasi qonunlari, Oʻzbekiston Respublikasi Prezidentining qarorlari, rasmiy bayonotlari va maʼruzalarini, shuningdek, Oʻzbekiston Respublikasi Oliy Majlisi palatalari va Hukumatining qarorlari va ularning faoliyatiga oid axborotlarni muntazam yoritib borish sohasida:
Oʻzbekiston Respublikasi qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Prezidentining farmonlari, qarorlari, farmoyishlari, rasmiy bayonotlari, nutqlari va maʼruzalarini Internet jahon axborot tarmogʻidagi OʻzA rasmiy veb-saytida eʼlon qiladi, belgilangan ommaviy axborot vositalariga yetkazadi;
Oʻzbekiston Respublikasi Oliy Majlisi palatalari va Vazirlar Mahkamasi bilan bevosita hamkorlik asosida normativ-huquqiy hujjatlar loyihalari toʻgʻrisidagi maʼlumotlarni yigʻadi va uni keng ommaga taqdim etadi;
Oʻzbekiston Respublikasi Prezidentining xorijiy mamlakatlarga tashriflarini, tashrifdan koʻzlanayotgan maqsad hamda kutilayotgan natijalar haqidagi axborotni ommaviy axborot vositalari, veb-resurslar orqali aholiga yetkazadi;
Oʻzbekiston Respublikasi Prezidentining respublika hududlariga amalga oshiradigan tashriflarini oʻz rasmiy veb-sayti orqali onlayn tarzda yoritadi.
3) Respublikaning ichki va tashqi siyosatini, mamlakatimizda amalga oshirilayotgan keng miqyosli islohotlarni, jamiyatimizda kechayotgan ijtimoiy-siyosiy va sotsial-iqtisodiy oʻzgarishlar va yangilanishlarni tezkor yoritish sohasida:
davlat organlari faoliyati, mamlakat ichki va tashqi siyosati haqida axborot tarqatish orqali fuqarolarning davlat organlari faoliyati, mamlakat ichki va tashqi siyosati haqida axborot olish huquqlarini taʼminlaydi.
4) Jamoatchilikning katta qiziqishini uygʻotayotgan voqealarning mohiyati boʻyicha fuqarolarda xolis fikrni shakllantirish hamda maʼlumotlardan buzgʻunchi va boshqa gʻayriqonuniy maqsadlarda foydalanish imkoniyatini bartaraf etish uchun aholini bunday hodisalar haqida oʻz vaqtida xabardor qilib borish sohasida:
Oʻzbekistonda yuz berayotgan oʻzgarishlar haqida oʻzining Internet jahon axborot tarmogʻidagi rasmiy veb-sayti orqali butun dunyoga axborot tarqatadi;
dunyoda sodir boʻlayotgan voqea-hodisalar haqidagi axborotni tezkorlik bilan oʻzining rasmiy veb-saytiga joylashtirish orqali bunday axborotni aholiga yetkazib beradi;
jahonda yuz berayotgan voqea-hodisalar haqida aniq maʼlumotlar olish, xorij ommaviy axborot vositalariga mamlakatimiz toʻgʻrisida ishonchli axborot yetkazish maqsadida xorijning yetakchi axborot agentliklari, ommaviy axborot vositalari, media tuzilmalari bilan hamkorlik qiladi;
davlatlararo va hukumatlararo shartnomalar loyihalarini tayyorlashda qatnashadi, axborot almashishni amalga oshiradi, axborot sohasida xalqaro idoralararo shartnomalarni belgilangan tartibda tuzadi.
5) Axborot xurujlari va mafkuraviy tahdidlarning oldini olishga qaratilgan choralarni amalga oshirishda davlat organlari va ularning axborot xizmatlari bilan uzviy hamkorlik qilish va ulardan tizimli ravishda statistik, tahliliy va boshqa turdagi maʼlumotlarni olish sohasida:
ommaviy axborot vositalarida toʻgʻri va haqqoniy axborot tarqatish orqali axborot sohasidagi xatar va tahdidlarga qarshi oʻz vaqtida va munosib kurashadi;
jamiyatda biror-bir voqea, hodisa, ijtimoiy siyosiy jarayonlar va boshqa masalalar toʻgʻrisida notoʻgʻri yoki noxolis axborot tarqatilganda bu haqida haqqoniy, dalillarga asoslangan, xolis axborot tarqatish orqali jamiyatda mish-mish, tahlika yuzaga kelishining oldini oladi;
jamoatchilikning katta qiziqishini uygʻotgan voqealarning mohiyati boʻyicha fuqarolarda xolis fikrni shakllantirish hamda notoʻgʻri maʼlumotlardan buzgʻunchi va boshqa gʻayriqonuniy maqsadlarda foydalanish imkoniyatini bartaraf etish uchun aholini bunday hodisalar haqida oʻz vaqtida xabardor qiladi.
6) Boshqa ommaviy axborot vositalari, jismoniy va yuridik shaxslar foydalanishi uchun yurtimizning ijtimoiy, iqtisodiy, siyosiy, tarixiy va madaniy rivojlanishiga oid maʼlumotlar (axborot, foto va videomateriallar) bazasini shakllantirish sohasida;
yurtimizda roʻy berayotgan ijtimoiy, iqtisodiy, siyosiy, tarixiy, madaniy jarayonlarga doir materiallar, maqolalar, fotomateriallar, videolavhalar tayyorlaydi, ularni rasmiy veb-sayt orqali jahon hamjamiyatiga taqdim etadi;
ommaviy axborot vositalari va internet tarmogʻi orqali uzatilgan barcha materiallarning elektron bazasini shakllantiradi;
mazkur materiallardan ommaviy axborot vositalari, jismoniy va yuridik shaxslar erkin foydalanishi uchun sharoit yaratadi.
7) Oʻquvchilar uchun qulay va qiziqarli shaklda Oʻzbekiston xalqining oʻziga xos madaniyati, urf-odatlari, milliy qadriyatlari, mamlakatning koʻp yillik tarixi va ilm-fan rivojiga qoʻshgan hissasini namoyish etishga qaratilgan ijtimoiy loyihalarni amalga oshirish sohasida:
Respublika miqyosida amalga oshiriladigan, tariximiz va milliy qadriyatlarimizni jahon hamjamiyatiga tanitishga xizmat qiladigan ijtimoiy loyihalar toʻgʻrisidagi axborotni ommaviy axborot vositalari va internet tarmogʻi orqali tarqatishni bevosita amalga oshiradi;
mazkur loyihalar jarayonini yoritib boradi hamda ishtirok etadi.
8) Yurtimizda yuz berayotgan oʻzgarishlarni dunyoga keng tarqatish, jahonda sodir boʻlayotgan voqea-hodisalar haqida mamlakatimiz aholisiga tezkor axborot yetkazib berish, xorijdagi axborot agentliklari va boshqa ommaviy axborot vositalari, media-tuzilmalar bilan hamkorlikni rivojlantirish sohasida:
Oʻzbekiston Respublikasining ichki va tashqi siyosati, amalga oshirilayotgan keng miqyosli islohotlar, ijtimoiy-iqtisodiy oʻzgarishlar va yangilanishlar haqida matnli, audio va videomateriallar tayyorlaydi hamda ularni belgilangan tartibda ommaviy axborot vositalariga tarqatadi;
mamlakatimizda olib borilayotgan islohotlar, ulardan koʻzlangan ezgu maqsadlar mohiyatini ochib beradigan matnli, audio va videomateriallarni oʻz rasmiy veb-saytida eʼlon qilib boradi.
2-§. QAAning vazifalari va funksiyalari
10. Quyidagilar QAAning asosiy vazifalari va faoliyati yoʻnalishlari hisoblanadi:
Oʻzbekiston Respublikasi qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari, farmoyishlari, rasmiy bayonotlari, nutq va maʼruzalarini, Vazirlar Mahkamasining qarorlari va farmoyishlarini, Qoraqalpogʻiston Respublikasi Joʻqorgʻi Kengesi va Vazirlar Kengashi qabul qilgan hujjatlarni, ularning faoliyatiga, shuningdek, mamlakatimiz ijtimoiy-siyosiy hayotiga oid axborotni tarqatish;
fuqarolarning Qoraqalpogʻiston Respublikasi Joʻqorgʻi Kengesi va Vazirlar Kengashi hamda boshqa davlat organlari faoliyati haqida axborot olish huquqlarini taʼminlash;
axborot xurujlari va mafkuraviy tahdidlarning oldini olishga qaratilgan choralarni amalga oshirishda davlat organlari va ularning axborot xizmatlari bilan yaqindan hamkorlik qilish.
11. QAA oʻziga yuklangan vazifalarga muvofiq quyidagi funksiyalarni amalga oshiradi:
1) Oʻzbekiston Respublikasi qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari, farmoyishlari, rasmiy bayonotlari, nutq va maʼruzalarini, Vazirlar Mahkamasining qarorlari va farmoyishlarini, Qoraqalpogʻiston Respublikasi Joʻqorgʻi Kengesi va Vazirlar Kengashi qabul qilgan hujjatlarni, ularning faoliyatiga, shuningdek, mamlakatimiz ijtimoiy-siyosiy hayotiga oid axborotni tarqatish sohasida:
Oʻzbekiston Respublikasi qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari, farmoyishlari, rasmiy bayonotlari, nutq va maʼruzalarini, Vazirlar Mahkamasining qarorlari va farmoyishlarini, Qoraqalpogʻiston Respublikasi Joʻqorgʻi Kengesi va Vazirlar Kengashi qabul qilgan hujjatlarni oʻz rasmiy veb-saytida eʼlon qiladi, belgilangan tartibda ommaviy axborot vositalariga yetkazadi;
Oʻzbekiston Respublikasi va Qoraqalpogʻiston Respublikasi ijtimoiy-siyosiy hayotida roʻy berayotgan oʻzgarishlar haqida axborotni, ijtimoiy hayotning barcha sohalaridagi yangiliklarni qoraqalpoq va boshqa tillarda tayyorlaydi va oʻz rasmiy veb-saytida eʼlon qiladi, belgilangan tartibda ommaviy axborot vositalariga yetkazib beradi;
Qoraqalpogʻiston Respublikasi Joʻqorgʻi Kengesi va Vazirlar Kengashi faoliyati haqida matnli, audio va videomateriallar tayyorlaydi, ularni oʻz rasmiy veb-saytida eʼlon qiladi hamda belgilangan tartibda ommaviy axborot vositalariga yetkazib beradi.
2) Fuqarolarning Qoraqalpogʻiston Respublikasi Joʻqorgʻi Kengesi va Vazirlar Kengashi hamda boshqa davlat organlari faoliyati haqida axborot olish huquqlarini taʼminlash sohasida:
Qoraqalpogʻiston Respublikasi Joʻqorgʻi Kengesi va Vazirlar Kengashi hamda boshqa davlat organlari faoliyati toʻgʻrisida aholiga muntazam ravishda ishonchli maʼlumotlarni yetkazib turadi;
oʻz rasmiy veb-saytida davlat organlari faoliyati toʻgʻrisidagi maʼlumotlar doimiy yangilanib borilishini taʼminlaydi;
davlat organlari faoliyati, mamlakat ichki va tashqi siyosati haqida axborot tarqatish orqali fuqarolarning davlat organlari faoliyati, mamlakat ichki va tashqi siyosati haqida axborot olish huquqlarini taʼminlaydi.
3) Axborot xurujlari va mafkuraviy tahdidlarning oldini olishga qaratilgan choralarni amalga oshirishda davlat organlari va ularning axborot xizmatlari bilan yaqindan hamkorlik qilish sohasida:
jamiyatda qizgʻin muhokamalarga sabab boʻlayotgan voqealarning mohiyati boʻyicha fuqarolarda xolis fikrni shakllantirish hamda notoʻgʻri maʼlumotlardan buzgʻunchi va boshqa gʻayriqonuniy maqsadlarda foydalanish imkoniyatini bartaraf etish uchun aholini bunday hodisalar haqida oʻz vaqtida xabardor qiladi;
xolis, ishonchli axborot tarqatish orqali axborot xurujlari va mafkuraviy tahdidlarning oldini olishga qaratilgan choralarni amalga oshiradi;
keng ommaga ishonchli maʼlumot tarqatish maqsadida davlat organlari rahbarlari va axborot xizmatlari bilan hamkorlik oʻrnatadi.
4-bob. OʻzAning huquqlari va javobgarligi
12. OʻzA oʻziga yuklangan vazifalar va funksiyalarni bajarish uchun quyidagi huquqlarga ega:
oʻz vakolatlariga kiradigan masalalarni hal qilish uchun davlat organlaridan va boshqa tashkilotlardan belgilangan tartibda maʼlumotlarni soʻrab olish;
rasmiy va boshqa axborotni toʻplash hamda ularni qonunchilik hujjatlarida belgilangan tartibda Oʻzbekiston Respublikasida va xorijiy ommaviy axborot vositalarida tarqatish;
oʻziga yuklangan vazifalar va funksiyalarni bajarish bilan bogʻliq normativ-huquqiy hujjatlar loyihalari va boshqa hujjatlarni belgilangan tartibda Oʻzbekiston Respublikasi Prezidenti Administratsiyasi hamda Vazirlar Mahkamasiga taqdim etish;
davlat statistika organlaridan zarur statistik maʼlumotlarni bepul asosda olish;
oʻz vakolatiga kiradigan masalalar boʻyicha Vazirlar Mahkamasiga va davlat organlariga belgilangan tartibda takliflar kiritish;
barcha turdagi axborotni toʻplash, qayta ishlash va tarqatish masalalari yuzasidan xalqaro aloqalarni amalga oshirish, xorijiy axborot agentliklari bilan tajriba almashish;
viloyatlarda mintaqaviy muxbirlik punktlarini tashkil etish, qayta tashkil etish va tugatish;
boshqa axborot agentliklari, jumladan, xorijiy axborot agentliklari, ommaviy axborot vositalari, media-tuzilmalar, axborot markazlari bilan axborot almashish toʻgʻrisida, ishlab chiqarish va boshqa sohalarda hamkorlik qilishga oid shartnomalar tuzish;
buyurtmachilarga sotiladigan axborot va xizmatlar (matnli, foto, audio va video materiallar, xizmatlar) narxlari va tariflarini belgilash;
OʻzAga yuklatilgan vazifalarni bajarish doirasida davlat organlari va boshqa tashkilotlar, nodavlat notijorat tashkilotlari, ilmiy-tekshirish institutlari, ilmiy va taʼlim muassasalari, shuningdek, xalqaro tashkilotlar va xorijiy kompaniyalarning yuqori malakali xodimlarini jalb qilish;
OʻzA binosidagi vaqtincha foydalanilmayotgan xonalarni jismoniy va yuridik shaxslarga belgilangan tartibda ijara shartnomasi asosida foydalanishga berish;
bosma ommaviy axborot vositalarini taʼsis etish;
matn tuzish, matnni tahrir qilish, foto, audio, videoxizmatlar, tarjima va boshqa pullik xizmatlar koʻrsatish;
OʻzA va uning tizimidagi tarkibiy boʻlinmalar va tashkilotlarning moddiy-texnika bazasini yaxshilash chora-tadbirlarini koʻrish.
OʻzA qonunchilik hujjatlariga muvofiq boshqa huquqlarga ham ega boʻlishi mumkin.
13. OʻzA:
oʻz faoliyati boʻyicha Oʻzbekiston Respublikasi Vazirlar Mahkamasiga belgilangan tartibda hisobotlar taqdim etish;
QAA faoliyatini muvofiqlashtirish;
oʻziga yuklangan vazifalarning samarali amalga oshirilishi uchun javob beradi.
14. QAA oʻziga yuklangan vazifalar va funksiyalarni bajarish uchun quyidagi huquqlarga ega:
Qoraqalpogʻiston Respublikasi Vazirlar Kengashi, davlat organlarining hududiy boʻlimlari, shuningdek, boshqa tashkilotlardan oʻziga yuklangan vazifalarni sifatli bajarish uchun zarur boʻlgan axborot materiallarini soʻrab olish, ularni qayta ishlash va tarqatish;
jismoniy va yuridik shaxslarga matn tuzish, matnni tahrir qilish, foto, audio, videoxizmatlar, tarjima va boshqa pullik xizmatlar koʻrsatish;
axborot-tahliliy materiallar tayyorlash hamda oʻziga yuklangan boshqa vazifalarni bajarish uchun davlat organlari, shuningdek, ilmiy tashkilotlarning yuqori malakali mutaxassislarini jalb qilish.
15. QAA:
oʻz faoliyati boʻyicha OʻzAga hamda Qoraqalpogʻiston Respublikasi Vazirlar Kengashiga belgilangan tartibda hisobot taqdim etish;
oʻziga yuklangan vazifalarning samarali amalga oshirilishi uchun masʼuldir.
5-bob. OʻzA rahbarlarining funksional majburiyatlari
16. OʻzA va QAA rahbarlari zimmasiga quyidagi funksional majburiyatlar yuklanadi:
1. OʻzA bosh direktori:
a) OʻzA va Qoraqalpogʻiston axborot agentligi tuzilmasi shtatlar soniga xodimlarning belgilangan umumiy cheklangan soni va mehnatga haq toʻlash fondi doirasida oʻzgartirishlar kiritadi;
b) OʻzAning budjetdan tashqari mablagʻlari hisobidan:
davlat organlari, nodavlat notijorat tashkilotlari, ilmiy-tadqiqot muassasalari, yetakchi xalqaro tashkilotlar va xorijiy kompaniyalarning yuqori malakali xodimlarini, shuningdek, mahalliy va xorijiy mutaxassislarni maslahatchi sifatida jalb etadi;
ijodiy tanlovlar oʻtkazadi, tanlov ishtirokchi va gʻoliblarini mukofotlaydi, shuningdek, OʻzAning xodimi boʻlmagan faol mualliflarni ragʻbatlantiradi;
OʻzA moddiy-texnika bazasini mustahkamlash, agentlik xodimlarini moddiy ragʻbatlantirish, shu jumladan ularga ustamalar toʻlash boʻyicha chora-tadbirlarni amalga oshiradi;
zarur hollarda, mintaqaviy muxbirlik punktlarida qoʻshimcha shtat birliklarini joriy etadi;
qonunchilik hujjatlariga muvofiq boshqa vakolatlarni ham amalga oshiradi.
v) OʻzA bosh direktorining oʻrinbosarlari:
Oʻzbekiston Respublikasi Prezidenti Administratsiyasi va Vazirlar Mahkamasining tegishli boʻlinmalari bilan axborot tarqatish sohalarini rivojlantirish, normativ-huquqiy hujjatlar loyihalarini sifatli tayyorlash yuzasidan hamkorlik qiladi;
OʻzA bosh direktorining topshirigʻiga binoan axborot tarqatish sohalarini rivojlantirish boʻyicha ustuvor vazifalar va dasturlar bajarilishini muvofiqlashtiradi;
OʻzAning tasdiqlangan tuzilmasiga muvofiq tegishli boʻlinmalarni bevosita boshqarishni amalga oshiradi;
bosh direktor oʻrinbosarlari nomenklaturasiga kiradigan OʻzAning markaziy apparati, bosh muharrirlari, boshqarmalari va xizmatlari boshliqlari lavozimlariga nomzodlarni belgilangan tartibda tasdiqlash uchun kiritadi;
bosh direktor oʻrinbosarlari nomenklaturasiga kiradigan tuzilmalarning tarkibiy boʻlinmalari boshliqlarini qayta tayyorlash va malakasini oshirish, ragʻbatlantirish va intizomiy jazo choralarini qoʻllash yuzasidan takliflar kiritadi;
mutasaddi boʻlinmalarda kadrlar zaxirasini shakllantirish boʻyicha tizimli asosda ishlarni tashkil qiladi;
qonunchilik hujjatlariga muvofiq boshqa vakolatlarni ham amalga oshiradi.
g) QAA direktori:
yuklatilgan vazifalar va funksiyalarga muvofiq QAA faoliyatini, shu jumladan, bosh muharrir, boʻlim boshliqlari va mutaxassislar ishini tashkil qiladi;
QAAning axborot tarqatish, tarjima faoliyati sohalari rivojlanishi holatini baholaydi va OʻzA rahbariyatiga ularning istiqboldagi rivojlanishi yuzasidan aniq takliflar va amalga oshirish mexanizmlarini kiritadi;
qonunchilik hujjatlariga muvofiq boshqa vakolatlarni ham amalga oshiradi.
d) OʻzA bosh muharriri, boshqarma va xizmat boshligʻi:
tasdiqlangan nizom doirasida aniq yoʻnalishlardagi vazifalarining sifatli va oʻz vaqtida bajarilishini taʼminlaydi;
oʻzi masʼul boʻlgan tahririyat, boshqarma, xizmatning faoliyati holatini sifatli baholab, istiqbolda rivojlanishi boʻyicha OʻzA rahbariyatiga aniq takliflar va ularni amalga oshirish mexanizmlarini kiritadi, xodimlarning lavozim yoʻriqnomalarida belgilangan vazifalarni bajarilishini nazorat qiladi.
6-bob. OʻzA rahbarlarining javobgarligi
17. OʻzA bosh direktori:
ushbu Nizom va boshqa qonunchilik hujjatlari bilan oʻziga yuklangan vazifalarni sifatli va oʻz vaqtida bajarish, shuningdek, OʻzA faoliyatidagi kamchiliklarni bartaraf etish boʻyicha aniq chora-tadbirlar koʻradi;
OʻzA, uning tarkibiy va hududiy boʻlinmalarida ijro intizomiga qatʼiy rioya qilinishi uchun javob beradi.
18. OʻzA bosh direktorining oʻrinbosarlari:
tegishli yoʻnalishlar boʻyicha bajariladigan topshiriqlarning samaradorligi va oʻz vaqtida ijro etilishi uchun;
mutasaddi tahririyatlar, boshqarma va xizmatlar, boʻlimlar faoliyati barqaror rivojlanishini taʼminlash boʻyicha amalga oshirilayotgan chora-tadbirlarning natijadorligi va samaradorligi uchun javob beradi.
19. QAA direktori:
qonunchilik hujjatlari, OʻzA va Qoraqalpogʻiston Respublikasi Vazirlar Kengashi rahbarlarining topshiriqlari, shuningdek, oʻziga yuklatilgan vazifalar va funksiyalarning oʻz vaqtida hamda sifatli bajarilishi yuzasidan taʼsirchan nazoratni amalga oshirish;
QAAning axborot tarqatish faoliyatini rivojlantirish boʻyicha belgilangan vazifalarning sifatli va oʻz vaqtida bajarilishini taʼminlash uchun javob beradi.
7-bob. OʻzA faoliyatini tashkil qilish
20. OʻzAga Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod etiladigan bosh direktor boshchilik qiladi.
Bosh direktor Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod etiladigan ikki nafar oʻrinbosarga, shu jumladan, bir nafar birinchi oʻrinbosarga ega boʻladi.
21. QAA direktori Qoraqalpogʻiston Respublikasi Vazirlar Kengashi bilan kelishgan holda OʻzA bosh direktori tomonidan lavozimga tayinlanadi va lavozimdan ozod etiladi.
22. OʻzA huzurida uning faoliyatini tizimli yoʻlga qoʻyish hamda davlat organlari va nodavlat tashkilotlar bilan samarali hamkorlikni oʻrnatish boʻyicha maslahat kengashi (keyingi oʻrinlarda — Maslahat kengashi) tuziladi.
Quyidagilar Maslahat kengashining asosiy vazifalari etib belgilanadi:
OʻzA faoliyati haqida keng jamoatchilik fikrini tahlil qilgan holda uning samaradorligini yanada oshirish hamda agentlikning axborot makonidagi oʻrni va rolini kuchaytirish boʻyicha takliflar ishlab chiqish;
OʻzA faoliyatining rivojlanish darajasini oʻrganish, agentlikka metodik tavsiyalar berish, uning ishida yuzaga keladigan muammo va kamchiliklarni bartaraf etishga koʻmaklashish;
davlat organlari va fuqarolik jamiyati institutlari, shu jumladan ommaviy axborot vositalari bilan oʻzaro hamkorlik qilish rejalarini belgilash, tadbirlarni tashkil etish va oʻtkazishda amaliy yordam koʻrsatish;
xalqaro va xorijiy axborot agentliklari, xorijiy mamlakatlar ommaviy axborot vositalari bilan hamkorlik dasturlarining ishlab chiqilishi va amalga oshirilishiga koʻmaklashish va ular ijrosini muntazam ravishda muhokama qilib borish.
23. Maslahat kengashi oʻz faoliyatini jamoatchilik asosida olib boradigan, doimiy faoliyat yurituvchi kollegial organ hisoblanadi.
Maslahat kengashiga OʻzA bosh direktori rahbarlik qiladi hamda uning tarkibi ommaviy axborot vositalari sohasidagi tashkilotlar rahbarlari va mutaxassislari, shuningdek, mustaqil ekspertlardan shakllantiriladi.
Maslahat kengashi tarkibining uchdan bir qismi har 2 yilda yangilanib boriladi.
Maslahat kengashi tarkibi bosh direktor tomonidan tasdiqlanadi.
Maslahat kengashi faoliyatining tartibi bosh direktor tomonidan tasdiqlanadigan nizom bilan belgilanadi.
8-bob. OʻzA hamda uning xodimlari faoliyati samaradorligi va natijadorligini baholash mezonlari va ish indikatorlari
24. OʻzA faoliyatining samaradorligi va natijadorligi muntazam baholanadi.
25. OʻzAning faoliyati samaradorligi va natijadorligiga berilgan baholar Oʻzbekiston Respublikasining Bosh vaziri tomonidan tasdiqlanadigan OʻzAning faoliyati samaradorligi va natijadorligini baholash mezonlari va ish indikatorlariga asoslanadi.
26. OʻzAning faoliyati samaradorligi va natijadorligini baholash yakunlari boʻyicha:
OʻzA rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;
OʻzAning faoliyatida aniqlangan kamchiliklarni bartaraf etish va uning faoliyatini yanada takomillashtirish chora-tadbirlari koʻriladi.
OʻzA uning rahbarlari va xodimlari faoliyatining samaradorligi va natijadorligini baholash tizimi tartibi va metodikasini ishlab chiqadi.
9-bob. OʻzA va QAA faoliyatini moliyalashtirish va xodimlarini moddiy ragʻbatlantirish
27. OʻzA va QAA faoliyatini moliyalashtirish va ular xodimlarini moddiy ragʻbatlantirish:
Oʻzbekiston Respublikasi Davlat budjeti mablagʻlari;
OʻzA va QAAning oʻz mablagʻlari;
qonunchilik hujjatlarida taqiqlanmagan boshqa manbalar hisobiga amalga oshiriladi.
28. OʻzA va QAA budjet muassasalari uchun belgilangan tartibda oʻzlarining budjet va budjetdan tashqari daromadlar va xarajatlar smetalari hamda shtat jadvallarini shakllantiradi va hisobotini yuritadi.
29. OʻzA va QAAning xodimlari mehnatiga haq toʻlash OʻzA tomonidan Oʻzbekiston Respublikasi Bandlik va mehnat munosabatlari vazirligi hamda Moliya vazirligi bilan kelishgan holda OʻzA va QAA xodimlarining mehnatiga haq toʻlash boʻyicha tasdiqlanadigan razryadlar va shtatlarga asosan amalga oshiriladi.
30. OʻzA va QAA xodimlariga:
bir oylik ish haqi fondini yoʻnaltirgan holda moddiy yordam koʻrsatish;
budjet muassasalari uchun belgilangan mehnat haqi yillik fondining 15 foizi miqdorida xodimlarni moddiy ragʻbatlantirish maxsus fondi;
davlat xizmatchilari uchun belgilangan tartibda lavozim maoshlariga 20 foiz miqdoridagi ustama haq saqlab qolinadi.
Bunda 20 foiz miqdoridagi ustama tatbiq etiladigan OʻzA va QAA shtat lavozimlari Oʻzbekiston Respublikasi Bandlik va mehnat munosabatlari vazirligi hamda Moliya vazirligi bilan kelishiladi va OʻzA tomonidan tasdiqlanadi.
31. OʻzA va QAAning oʻz mablagʻlari haqiqiy tushumlari yil yakunlari boʻyicha budjetdan tashqari mablagʻlariga oid daromad va xarajatlar smetasida nazarda tutilgan prognoz koʻrsatkichlaridan yuqori boʻlgan hollarda, mablagʻlarning ushbu qismi quyidagi tartibda taqsimlanadi:
daromadning 50 foizi OʻzA va QAAning tasarrufida qoladi (shundan 50 foizidan koʻp boʻlmagan qismi xodimlarni ijtimoiy himoyalash va moddiy ragʻbatlantirishga va 50 foizdan kam boʻlmagan qismi moddiy-texnik bazani mustahkamlashga sarflanadi);
qolgan 50 foizi keyingi yilda OʻzA va QAAni saqlash xarajatlarini moliyalashtirish maqsadlari uchun belgilangan tartibda yoʻnaltiriladi. Bunda tegishli moliya yilida OʻzA va QAAga budjetdan ajratish nazarda tutilgan prognoz mablagʻlar ushbu summaga kamaytiriladi.
10-bob. OʻzAning hisobot berishi
32. OʻzA har yili Oʻzbekiston Respublikasi Vazirlar Mahkamasiga OʻzA faoliyati natijalari toʻgʻrisida hisobot beradi.
33. Oʻzbekiston Respublikasi Vazirlar Mahkamasining tegishli tarkibiy boʻlinmalari rahbarlari OʻzA rahbarlarining ularga yuklangan vazifalarni samarali bajarishi boʻyicha faoliyatining doimiy monitoringini olib boradi, OʻzA faoliyatini xolisona baholaydi.
34. Monitoring va baholash yakunlari boʻyicha OʻzAning alohida oʻrnak koʻrsatgan rahbarlari, mansabdor shaxslari va xodimlari ragʻbatlantiriladi yoxud yoʻl qoʻyilgan jiddiy kamchiliklar uchun egallab turgan lavozimidan ozod qilishgacha javobgarlikka tortiladi.
11-bob. Yakunlovchi qoida
35. OʻzAni qayta tashkil etish va tugatish qonunchilik hujjatlarida belgilangan tartibda amalga oshiriladi.
Vazirlar Mahkamasining 2020-yil 3-yanvardagi 1-son qaroriga 2-ILOVA
Oʻzbekiston Respublikasi Hukumatining oʻz kuchini yoʻqotayotgan ayrim qarorlari
1. Oʻzbekiston Respublikasi Prezidenti huzuridagi Vazirlar Mahkamasining “Oʻzbekiston Milliy axborot agentligi (OʻzA) toʻgʻrisida” 1992-yil 21-apreldagi 202-son qarori (Oʻzbekiston Respublikasi QT, 1992-y., 4-son, 12-modda).
3. Vazirlar Mahkamasining “Oʻzbekiston Respublikasi Hukumatining vazirliklar, davlat qoʻmitalari va idoralar toʻgʻrisidagi nizomlarni tasdiqlash boʻyicha ayrim qarorlariga oʻzgartirish va qoʻshimchalar kiritish haqida” 2010-yil 5-iyundagi 108-son qaroriga (Oʻzbekiston Respublikasi QT, 2010-y., 6-son, 27-modda) ilovaning 3-bandi .
4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Davlat va xoʻjalik boshqaruvi organlari tuzilmasini yanada takomillashtirish va boshqaruv xodimlari sonini optimallashtirish chora-tadbirlari toʻgʻrisida” 2015-yil 18-dekabrdagi PQ-2450-son qarori)” 2016-yil 5-maydagi 140-son qarori (Oʻzbekiston Respublikasi QT, 2016-y., 5-son, 37-modda).
5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Bandlik sohasida davlat siyosatini yanada takomillashtirish va mehnat organlari faoliyati samaradorligini tubdan oshirish chora-tadbirlari toʻgʻrisida” 2017-yil 24-maydagi PF-5052-son Farmoni, Oʻzbekiston Respublikasi Prezidentining “Oʻzbekiston Respublikasi Bandlik va mehnat munosabatlari vazirligi faoliyatini tashkil etish chora-tadbirlari toʻgʻrisida” 2017-yil 24-maydagi PQ-3001-son qarori)” 2017-yil 8-sentabrdagi 703-son qaroriga (Oʻzbekiston Respublikasi QT, 2017-y., 9-son, 198-modda) ilovaning 1-bandi .
Oʻzbekiston Respublikasining Bosh vaziri A. ARIPOV
Toshkent sh.,
2020-yil 3-yanvar,
1-son