📅 2020-yil 6-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 6 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 января 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 6 January 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Радиотерапия ва позитрон-эмиссионли томография марказини ташкил этиш тўғрисида
Ўзбекистон Республикаси Президентининг « 2017 — 2021 йилларда Ўзбекистон Республикасида онкология хизматини янада ривожлантириш ва аҳолига онкологик ёрдам кўрсатишни такомиллаштириш чора-тадбирлари тўғрисида » 2017 йил 4 апрелдаги ПҚ-2866-сон ҳамда « Хусусий тиббиёт ташкилотларини ривожлантириш бўйича қўшимча шарт-шароитларни яратиш тўғрисида » 2017 йил 29 декабрдаги ПҚ-3450-сон қарорларига мувофиқ Вазирлар Маҳкамаси қарор қилади:
1. Ўзбекистон Республикаси Соғлиқни сақлаш вазирлиги, Инвестициялар ва ташқи савдо вазирлиги ҳамда Тошкент шаҳар ҳокимлигининг чет эл инвестицияси иштирокида «Tek grup saglik hizmetleri» МЧЖнинг Тошкент шаҳрида радиотерапия ва позитрон-эмиссионли томография марказини (кейинги ўринларда марказ деб аталади) ташкил этиш тўғрисидаги таклифи маъқуллансин.
2. Тошкент шаҳар ҳокимлиги, Ўзбекистон Республикаси Ер ресурслари, геодезия, картография ва давлат кадастри давлат қўмитаси, Соғлиқни сақлаш вазирлиги билан биргаликда бир хафта муддатда «Tek grup saglik hizmetleri» МЧЖга инвестициявий ва ижтимоий мажбуриятлар белгиланган ҳолда марказни қуриш учун Тошкент шаҳар, Олмазор тумани, Шифокорлар кўчаси, 2-уйда жойлашган Тошкент тиббиёт академиясининг Кўп тармоқли клиникасига тегишли ер участкасининг Н 34 (геомаълумот нуқта) ҳудудидан доимий фойдаланиш учун 0,60 га ер участкаси ажратилишини таъминласин.
3. Тошкент шаҳар ҳокимлиги бир ой муддатда белгиланган тартибда зарур бўлган коммуникация тармоқлари йўналиши ва жойлашишини ўзгартириш ҳамда ажратилган ер участкаси чегарасига қадар етказиб бериш чораларини кўрсин.
4. «Tek grup saglik hizmetleri» МЧЖ:
марказни қуриш ҳамда жиҳозлаш ишлари учун 7,5 млн. АҚШ доллари миқдоридаги тўғридан-тўғри хорижий инвестиция маблағларини жалб этиш;
марказни бир йил муддатда фойдаланишга топшириш ҳамда 20 тадан кам бўлмаган иш ўрнини яратиш;
радиотерапия ва позитрон-эмиссионли томография йўналишида 2020 йил давомида 5 нафар тиббиёт ходимларини ўз ҳисобидан чет давлатларга малака ошириш курсларига ўқишга юбориш;
марказ ташкил этилгандан 8 йил давомида онкологик касалликларга чалинган беморларнинг (имтиёзли тоифадаги шахслар) уч нафарига ҳар ойда тўла равишда радиотерапия усулида даволаш ҳамда уч нафар беморни позитрон-эмиссионли томография текширувидан бепул ўтказиш бўйича инвестициявий ва ижтимоий мажбуриятларни олганлиги маълумот учун қабул қилинсин.
5. Белгилансинки, «Tek grup saglik hizmetleri» МЧЖ томонидан олинган инвестициявий ва ижтимоий мажбуриятлар бажарилмаган ёки лозим даражада бажарилмаган тақдирда, ер участкасига бўлган ҳуқуқ унинг харажатлари қопланмаган ҳолда бекор қилинади.
6. Ўзбекистон Республикаси Соғлиқни сақлаш вазирлиги марказ ишга тушишидан аввал чет эл инвестицияси иштирокидаги «Tek grup saglik hizmetleri» МЧЖ билан амал қилиш муддати 8 йил бўлган ижтимоий ҳимояга муҳтож фуқароларни бепул радиотерапия бўйича даволаш ва позитрон-эмиссионли томография текширувидан ўтказиш тартиби ва ҳажмини белгиловчи шартнома имзоланишини таъминласин.
7. Ўзбекистон Республикаси Қурилиш вазирлиги лойиҳа доирасида амалга ошириладиган қурилиш-монтаж ишлари сифати юзасидан белгиланган тартибда назорат ўрнатсин..
8. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдухакимов ва Ўзбекистон Республикаси соғлиқни сақлаш вазири А.К. Шадманов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 6 январь,
5-сон
Oʻzbekiston Respublikasi Vazirlar Mahkamasining
qarori
Radioterapiya va pozitron-emissionli tomografiya markazini tashkil etish toʻgʻrisida
Oʻzbekiston Respublikasi Prezidentining “ 2017 — 2021-yillarda Oʻzbekiston Respublikasida onkologiya xizmatini yanada rivojlantirish va aholiga onkologik yordam koʻrsatishni takomillashtirish chora-tadbirlari toʻgʻrisida ” 2017-yil 4-apreldagi PQ-2866-son hamda “ Xususiy tibbiyot tashkilotlarini rivojlantirish boʻyicha qoʻshimcha shart-sharoitlarni yaratish toʻgʻrisida ” 2017-yil 29-dekabrdagi PQ-3450-son qarorlariga muvofiq Vazirlar Mahkamasi qaror qiladi:
1. Oʻzbekiston Respublikasi Sogʻliqni saqlash vazirligi, Investitsiyalar va tashqi savdo vazirligi hamda Toshkent shahar hokimligining chet el investitsiyasi ishtirokida “Tek grup saglik hizmetleri” MChJning Toshkent shahrida radioterapiya va pozitron-emissionli tomografiya markazini (keyingi oʻrinlarda markaz deb ataladi) tashkil etish toʻgʻrisidagi taklifi maʼqullansin.
2. Toshkent shahar hokimligi, Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Sogʻliqni saqlash vazirligi bilan birgalikda bir xafta muddatda “Tek grup saglik hizmetleri” MChJga investitsiyaviy va ijtimoiy majburiyatlar belgilangan holda markazni qurish uchun Toshkent shahar, Olmazor tumani, Shifokorlar koʻchasi, 2-uyda joylashgan Toshkent tibbiyot akademiyasining Koʻp tarmoqli klinikasiga tegishli yer uchastkasining N 34 (geomaʼlumot nuqta) hududidan doimiy foydalanish uchun 0,60 ga yer uchastkasi ajratilishini taʼminlasin.
3. Toshkent shahar hokimligi bir oy muddatda belgilangan tartibda zarur boʻlgan kommunikatsiya tarmoqlari yoʻnalishi va joylashishini oʻzgartirish hamda ajratilgan yer uchastkasi chegarasiga qadar yetkazib berish choralarini koʻrsin.
4. “Tek grup saglik hizmetleri” MChJ:
markazni qurish hamda jihozlash ishlari uchun 7,5 mln. AQSh dollari miqdoridagi toʻgʻridan toʻgʻri xorijiy investitsiya mablagʻlarini jalb etish;
markazni bir yil muddatda foydalanishga topshirish hamda 20 tadan kam boʻlmagan ish oʻrnini yaratish;
radioterapiya va pozitron-emissionli tomografiya yoʻnalishida 2020-yil davomida 5 nafar tibbiyot xodimlarini oʻz hisobidan chet davlatlarga malaka oshirish kurslariga oʻqishga yuborish;
markaz tashkil etilgandan 8 yil davomida onkologik kasalliklarga chalingan bemorlarning (imtiyozli toifadagi shaxslar) uch nafariga har oyda toʻla ravishda radioterapiya usulida davolash hamda uch nafar bemorni pozitron-emissionli tomografiya tekshiruvidan bepul oʻtkazish boʻyicha investitsiyaviy va ijtimoiy majburiyatlarni olganligi maʼlumot uchun qabul qilinsin.
5. Belgilansinki, “Tek grup saglik hizmetleri” MChJ tomonidan olingan investitsiyaviy va ijtimoiy majburiyatlar bajarilmagan yoki lozim darajada bajarilmagan taqdirda, yer uchastkasiga boʻlgan huquq uning xarajatlari qoplanmagan holda bekor qilinadi.
6. Oʻzbekiston Respublikasi Sogʻliqni saqlash vazirligi markaz ishga tushishidan avval chet el investitsiyasi ishtirokidagi “Tek grup saglik hizmetleri” MChJ bilan amal qilish muddati 8 yil boʻlgan ijtimoiy himoyaga muhtoj fuqarolarni bepul radioterapiya boʻyicha davolash va pozitron-emissionli tomografiya tekshiruvidan oʻtkazish tartibi va hajmini belgilovchi shartnoma imzolanishini taʼminlasin.
7. Oʻzbekiston Respublikasi Qurilish vazirligi loyiha doirasida amalga oshiriladigan qurilish-montaj ishlari sifati yuzasidan belgilangan tartibda nazorat oʻrnatsin..
8. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov va Oʻzbekiston Respublikasi sogʻliqni saqlash vaziri A.K. Shadmanov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 6-yanvar,
5-son