📅 2020-yil 10-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 10 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 10 января 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 10 January 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТАРКИБИ
НИЗОМ
РЕЕСТРИ
Ўзбекистон Республикаси заргарлик саноатининг замонавий ускуна, технологиялари ва заргарлик буюмлари «Uzbek Jewellery Fair-2020» биринчи халқаро кўргазма-савдосини ташкил этиш ва ўтказиш чора-тадбирлари тўғрисида
Ўзбекистон Республикаси Президентининг «Ўзбекистон Республикасида заргарлик тармоғини жадал ривожлантириш чора-тадбирлари тўғрисида» 2019 йил 18 майдаги ПФ-5721-сон Фармонига мувофиқ, шунингдек, маҳаллий ва етакчи хорижий ташкилотлар томонидан ишлаб чиқарилаётган юқори самарали илғор технология ва ускуналар билан танишиш, ўзаро манфаатли ҳамкорлик қилиш учун халқаро ва минтақавий майдон яратилишига кўмаклашиш, миллий заргарлик буюмларини сотиш, заргарлик саноати буюмларининг ишлаб чиқарувчилари, етказиб берувчилари ва истеъмолчилари билан ўзаро технология ва маълумотлар алмашиш мақсадида Вазирлар Маҳкамаси қарор қилади:
1. «Ўзбекзаргарсаноати» уюшмаси, Ўзбекистон Республикаси Туризмни ривожлантириш давлат қўмитаси, Савдо-саноат палатасининг:
2020 йил май ойининг 8 — 10 кунлари Тошкент шаҳрида «Ёшлар ижод саройи» кўргазмалар майдони базасида Ўзбекистон Республикаси заргарлик саноатининг замонавий ускуна, технологиялари ва заргарлик буюмлари «Uzbek Jewellery Fair-2020» биринчи халқаро кўргазма-савдосини (кейинги ўринларда кўргазма деб аталади) ўтказиш;
2020 йилдан бошлаб доимий равишда ҳар йили май ойи биринчи ҳафтасининг жума кунидан якшанба кунигача Ўзбекистон Республикаси заргарлик саноатининг замонавий ускуна, технологиялари ва заргарлик буюмлари «Uzbek Jewellery Fair» халқаро кўргазма-савдосини ўтказиш;
туризм соҳасидаги тадбиркорлик субъектлари орасида Ўзбекистон Республикаси заргарлик саноатининг замонавий ускуна, технологиялари ва заргарлик буюмлари «Uzbek Jewellery Fair» халқаро кўргазма-савдосини тарғиб қилиш;
кўргазмани ташкил қилиш бўйича харажатларни «Ўзбекзаргарсаноати» уюшмаси қошидаги Заргарлик соҳасини ривожлантириш жамғармаси маблағлари ва қонунчилик ҳужжатларида тақиқланмаган бошқа маблағлар ҳисобидан қоплаш бўйича таклифларига розилик берилсин.
2. Қуйидагилар:
Ўзбекистон Республикаси заргарлик саноатининг замонавий ускуна, технологиялари ва заргарлик буюмлари «Uzbek Jewellery Fair» халқаро кўргазма-савдосини ўтказиш бўйича ташкилий қўмита таркиби 1-иловага мувофиқ;
Қимматбаҳо металлардан ва қимматбаҳо тошлардан тайёрланган заргарлик буюмларини кўргазмаларда, кўргазма-савдоларда, ярмаркаларда юридик шахслар ва якка тартибдаги тадбиркорлар томонидан сотишнинг соддалаштирилган тартиби тўғрисидаги низом 2-иловага мувофиқ тасдиқлансин.
3. «Ўзбекзаргарсаноати» уюшмаси ва Савдо-саноат палатаси Ўзбекистон Республикаси Туризмни ривожлантириш давлат қўмитаси ва Транспорт вазирлиги билан биргаликда туристик ахборот марказларида, аэропортларда, автобус ҳамда темир йўл вокзалларида маҳаллий технология ва ускуналар, айниқса, заргарлик соҳаси буюмлари каталоглари тарқатилишини таъминласин.
4. Ўзбекистон Республикаси Ташқи ишлар вазирлиги, Ўзбекистон Республикаси Инвестициялар ва ташқи савдо вазирлиги, «Ўзбекзаргарсаноати» уюшмаси:
Ўзбекистон Савдо-саноат палатаси билан биргаликда замонавий ускуна ҳамда технологиялар, шунингдек, заргарлик саноати буюмларининг етакчи жаҳон ва маҳаллий ишлаб чиқарувчиларини ўтказиладиган кўргазмаларда қатнашишга жалб этиш бўйича фаол реклама-ахборот кампаниялари ва ташкилий ишларни амалга оширсин;
хорижий давлатларнинг заргарлик тармоғида ўтказиладиган халқаро тадбирларнинг ҳар йилги жадвалига Ўзбекистон Республикаси заргарлик саноатининг замонавий ускуна, технологиялари ва заргарлик буюмлари «Uzbek Jewellery Fair» халқаро кўргазма-савдосини киритиш чораларини кўрсин.
5. «Ўзбекзаргарсаноати» уюшмаси манфаатдор вазирликлар ва идоралар билан биргаликда:
кўргазма доирасида республика ҳудудига олиб кириладиган товарларнинг рўйхати шакллантирилишини ва ушбу рўйхатда уларнинг номи, ўлчов бирлиги, қиймати, ТИФ ТН коди ҳамда олиб кирувчининг реквизитлари кўрсатилишини;
рўйхатда кўрсатилган товарларни Ўзбекистон Республикаси божхона ҳудудига олиб кириш ва олиб чиқишда идентификация қилинишини;
кўргазма иштирокчилари ўртасида шартнома асосида тарқатиш мақсадида, замонавий технология ва ускуналарни, шунингдек, заргарлик саноати буюмларининг батафсил каталоги чоп этилишини;
кўргазмага ташриф буюрувчилар учун ахборот-маълумот буклетлари ва бошқа тарқатма материаллари тайёрланишини таъминласин.
6. Ўзбекистон Республикаси Давлат божхона қўмитаси кўргазма товарларининг белгиланган тартибда тезкор расмийлаштирилишини таъминласин.
7. Ўзбекистон Республикаси Марказий банкига Ўзбекистон Республикаси заргарлик саноатининг замонавий ускуна, технологиялари ва заргарлик буюмлари «Uzbek Jewellery Fair» халқаро кўргазма-савдосини ташкил этиш ва ўтказиш доирасида Ўзбекистон Республикаси Марказий банкининг эсдалик тангаларини сотиш нуқталарини ташкил этиш тавсия этилсин.
8. Кўргазма иштирокчиларига ташриф буюрувчилар ўртасида ўз маҳсулотларини сотишга рухсат берилсин.
9. Ўзбекистон Республикаси Ташқи ишлар вазирлиги, Иқтисодиёт ва саноат вазирлиги, Инвестициялар ва ташқи савдо вазирлиги ҳамда «Ўзбекзаргарсаноати» уюшмасининг буюртманомалари бўйича кўргазманинг хорижий иштирокчиларига кириш визалари консуллик ва ҳақиқий харажатларнинг ўрнини қоплаш ҳисобидан йиғимларни ундирмаган ҳолда расмийлаштирилишини таъминласин.
10. Ўзбекистон Республикаси Ички ишлар вазирлиги:
«Ўзбекзаргарсаноати» уюшмасининг буюртманомасига биноан кўргазманинг хорижий иштирокчиларига, давлат божи ундирмасдан, кўп марталик визаларни расмийлаштириш, бериш ва муддатини узайтиришни, шунингдек, вақтинча турган жойи бўйича рўйхатга олиш ва унинг муддатини узайтиришни;
Ўзбекистон Республикаси Миллий гвардияси билан биргаликда кўргазма ўтказиладиган жойларда жамоат тартиби сақланишини таъминласин.
11. Ўзбекистон Республикаси Фавқулодда вазиятлар вазирлиги кўргазма ўтказиладиган жойларда ёнғин хавфсизлигини тўлов ундирмасдан таъминласин.
12. «Uzbekistan Airways» АЖ, «Uzbekistan Airports» АЖ тўлов ундирмасдан:
кўргазма иштирокчиларини И. Каримов номидаги Тошкент халқаро аэропортида кутиб олиш ва кузатиб қўйишни ташкил этиш штаби фаолиятини мувофиқлаштириш, бунда штабни зарур миқдорда ташкилий техника ва алоқа воситалари билан жиҳозлаш, шунингдек, аэропортда кўргазма иштирокчиларига транспорт хизмати кўрсатишни назарда тутишни;
кўргазмалар юкларини И. Каримов номидаги Тошкент халқаро аэропортида белгиланган тартибда ташиш, ишлаш ва сақлашни;
И. Каримов номидаги Тошкент халқаро аэропорти биноси хоналарини кўргазмага бағишланган стендлар билан жиҳозлашни таъминласинлар.
13. «Ўзбекистон темир йўллари» АЖ «Ўзбекзаргарсаноати» уюшмаси буюртманомасига биноан, кўргазмага олиб келинаётган юкларни ташиш, белгиланган манзилга етказиб бериш ҳамда вагонларнинг йиғимлар ундирмасдан ўз вақтида берилишини таъминласин.
14. Ўзбекистон Миллий телерадиокомпанияси, Ўзбекистон Миллий ахборот агентлигига кўргазмага тайёргарлик кўриш ва уни ўтказиш жараёнини оммавий ахборот воситаларида кенг ёритиш тавсия этилсин.
15. Мазкур қарорнинг бажарилишини назорат қилиш Ўзбекистон Республикаси иқтисодиёт ва саноат вазири Б.А. Хўжаев ва «Ўзбекзаргарсаноати» уюшмаси раиси Д.Н. Саматов зиммасига юклансин.
Вазирлар Маҳкамасининг 2020 йил 10 январдаги 17-сон қарорига 1-ИЛОВА
Ўзбекистон Республикаси заргарлик саноатининг замонавий ускуна, технологиялари ва заргарлик буюмлари «Uzbek Jewellery Fair-2020» халқаро кўргазма-савдосини ўтказиш бўйича ташкилий қўмита
Б.А. Хўжаев — иқтисодиёт ва саноат вазири, Ташкилий қўмита раҳбари Д.Н. Саматов — «Ўзбекзаргарсаноати» уюшмаси раиси , Ташкилий қўмита раҳбари ўринбосари И.Т. Неъматов — ташқи ишлар вазирининг биринчи ўринбосари М.О. Салиев — Давлат божхона қўмитаси раисининг ўринбосари Х.А. Шакиров — Тошкент шаҳар ҳокимининг биринчи ўринбосари А.Д. Хаджаев — Ўзбекистон миллий телерадиокомпанияси раиси в.б.
Вазирлар Маҳкамасининг 2020 йил 10 январдаги 17-сон қарорига 2-ИЛОВА
Қимматбаҳо металлардан ва қимматбаҳо тошлардан тайёрланган заргарлик буюмларини кўргазмаларда, кўргазма-савдоларда, ярмаркаларда юридик шахслар ва якка тартибдаги тадбиркорлар томонидан сотишнинг соддалаштирилган тартиби тўғрисида
1. Мазкур Низом Ўзбекистон Республикаси ҳудудида ўтказиладиган кўргазмаларда, кўргазма-савдоларда, ярмаркаларда (кейинги ўринларда кўргазма деб аталади) қимматбаҳо металлардан ва қимматбаҳо тошлардан тайёрланган заргарлик ва бошқа буюмларини, шунингдек, буюмларга бириктирилмаган қирраланган қимматбаҳо тошларни (кейинги ўринларда заргарлик буюмлари деб аталади) сотиш тартибини белгилайди.
2. Мазкур Низомда қуйидаги асосий тушунчалардан фойдаланилган:
кўргазма ташкилотчиси — кўргазмалар, кўргазма-савдолар, ярмаркаларни ташкиллаштириш ва ўтказиш бўйича фаолиятни амалга оширувчи юридик шахс ёки якка тартибдаги тадбиркор;
кўргазма иштирокчиси — кўргазмада иштирок этиш учун ариза берган ва кўргазма иштирокчилари таркибига киритилган юридик шахс ёки якка тартибдаги тадбиркор, шунингдек, Ўзбекистон Республикаси норезидентлари (шу жумладан Ўзбекистон Республикаси ҳудудида тадбиркорлик субъекти сифатида рўйхатдан ўтмаган хорижий давлатлар фуқаролари ва хорижий компаниялар вакиллари).
3. Кўргазма стендларини қуриш ва қўшимча кўргазма ускуналари ҳамда шу билан боғлиқ хизматлар кўрсатиш кўргазма ташкилотчиси томонидан шартнома асосида амалга оширилади.
4. Ўзбекистон Республикаси ҳудудида рўйхатдан ўтган юридик шахслар ёки якка тартибдаги тадбиркорлар — тадбиркорлик субъектлари кўргазмаларда заргарлик буюмларини давлат солиқ хизмати идораларида рўйхатдан ўтган назорат-касса машиналари, тўлов терминалларини қўллаган ёки мажбурий равишда билет, талон, чек ёки уларга тенглаштирилган бошқа ҳужжатларни берган ҳолда сотадилар.
Кўргазмаларнинг Ўзбекистон Республикаси ҳудудида тадбиркорлик субъекти сифатида рўйхатдан ўтмаган хорижий иштирокчилари заргарлик буюмларини кўргазма-савдода Ўзбекистон Республикаси миллий валютасида нақдга, кейинчалик сотишдан тушган миллий валюта маблағларини кўргазмада сотилган заргарлик буюмлари савдосидан олинганлигини тасдиқловчи ҳужжатлар тақдим этилган тақдирда, валюта айирбошлаш пунктларида нақд хорижий валютага конвертация қилиш имконияти билан сотадилар.
5. Ўзбекистон Республикаси резидентлари ёки норезидентлари томонидан кўргазмада сотиш учун хориждан олиб кириладиган заргарлик буюмлари, уларнинг пробасини тасдиқловчи ишлаб чиқарувчи давлатнинг асиллик даражаси тамғалари изларига эга бўлиши керак.
6. Кўргазма ташкилотчиси мазкур Низомнинг иловасига мувофиқ шаклда кўргазма иштирокчиларининг реестрини юритиши зарур.
7. Кўргазма иштирокчиси кўргазмага ташриф буюрувчиларга қуйидаги маълумотларни давлат, инглиз ҳамда рус тилларида етказиши шарт:
юридик шахс — ўзининг номи (фирманинг номи), жойлашган жойи (почта манзили);
якка тартибдаги тадбиркор — фамилияси, исми, отасининг исми, давлат рўйхати ва уни рўйхатдан ўтказиш жойи (давлат)да рўйхатдан ўтказган идоранинг номи.
Қайд этилган маълумотлар кўргазма иштирокчисининг кўргазма стендига жойлаштирилади.
8. Кўргазмага қўйилган барча буюмлар ишлаб чиқарувчи ташкилотнинг ёрлиғига, улар мавжуд бўлмаган ҳолларда, заргарлик буюмларини Ўзбекистон Республикаси ҳудудига олиб киришда — кўргазма иштирокчиси ёрлиғига эга бўлиши керак. Ёрлиқларда қуйидаги маълумотлар кўрсатилиши шарт:
ишлаб чиқарувчи ташкилот номи ёки ишлаб чиқарувчи давлат номи (заргарлик буюмлари Ўзбекистон Республикаси ҳудудига ёрлиқсиз олиб кирилганда);
буюмнинг номи;
металл номи, пробаси;
буюмнинг граммлардаги массаси (кумушдан ясалган шахсий тақинчоқлар бундан мустасно);
қўшимча номи (қўшимчага эга буюмлар учун);
тавсифлари (қимматбаҳо тошлардан тайёрланган қўшимчалар учун);
буюмнинг рақами (қимматбаҳо тошлардан тайёрланган қўшимчалар учун);
буюмнинг қиймати.
Ўзбекистон Республикасига ёрлиқсиз олиб кирилган, импорт қилинган заргарлик буюмлари, шунингдек, агар у ишлаб чиқарувчи ташкилот ёрлиғида кўрсатилмаган бўлса, артикули мавжуд бўлмаслигига йўл қўйилади.
Кумушдан ясалган буюмлар ёрлиғида ишлаб чиқарувчи ташкилот (ишлаб чиқарувчи давлат) пробаси номи кўрсатилган ҳолда маркировкалашга йўл қўйилади.
Ёрлиқдаги буюмнинг массаси олтиндан ясалган буюмлар учун — 0,01 g ҳамда кумушдан ясалган буюмлар учун — 0,1 g аниқликда тасвирланган бўлиши шарт.
9. Ишлов берилмаган кўринишдаги, шунингдек, буюмларга бириктирилган қимматбаҳо тошлар кўргазмада фақатгина экспонат сифатида тақдим этилиши мумкин.
10. Қимматбаҳо тошлар тегишли (сертификатлар, диагностик хулосалар ва бошқа) ҳужжатларга эга бўлиши шарт, бунда уларда геммологик тавсифлар кўрсатилиб, уларнинг ҳақиқийлиги тасдиқланиши зарур.
Қимматбаҳо тошларнинг ҳақиқийлигини тасдиқловчи сертификатлар, диагностик хулосалар ва бошқа ҳужжатларда кўрсатилган маълумотлар кўргазмага ташриф буюрувчилар эътибори учун етказилиши шарт.
11. Қирраланган қимматбаҳо тошларни сотиш фақатгина ҳар бир тош ёки сотиладиган тошларнинг тўплами учун сертификат ва индивидуал қадоқ мавжуд бўлганда амалга оширилади.
12. Харидорга заргарлик буюмлари билан бирга товар ва сотувчининг номи, артикули, пробаси, оғирлиги, бир грамм учун қиймати, қимматбаҳо тошнинг тури ва тавсифи, товарнинг қиймати ва сотилган санаси, бевосита товарни сотган шахснинг имзоси кўрсатилган чек, харид қилинган қирраланган қимматбаҳо тошлар учун эса қўшимча равишда сертификат берилади.
13. Кўргазмаларда заргарлик буюмларини реализация қилиш фақатгина кўргазма иши якунлангандан сўнг қўриқлаш хизматига топшириладиган, кўчма объектларнинг хоналари (заллари)да амага оширилади. Кўргазма ташкилотчиси ва иштирокчиси буюмларнинг сақланиши учун кўргазма ташкилотчиси ва иштирокчиси ўртасида тузиладиган шартномага мувофиқ жавоб берадилар.
Кўргазма иштирокчилари заргарлик буюмларини транспортда ташишда уларнинг сақланиши учун шахсан жавоб берадилар.
Қимматбаҳо металлардан ва қимматбаҳо тошлардан тайёрланган заргарлик буюмларини кўргазмаларда, кўргазма-савдоларда, ярмаркаларда юридик шахслар ва якка тартибдаги тадбиркорлар томонидан сотишнинг соддалаштирилган тартиби тўғрисидаги низомга ИЛОВА
Кўргазма иштирокчиларининг
Т/р Юридик шахснинг номи ёки якка тартибдаги тадбиркорнинг фамилияси, исми, отасининг исми Юридик манзили ёки якка тартибдаги тадбиркорнинг яшаш жойи Давлат рўйхатидан ўтганлиги тўғрисида маълумотлар Телефон рақами Лицензия рақами ваберилган санаси , унинг амал қилиш муддати Лицензия берган идоранинг номи Лицензияланган фаолият тури Давлат асиллик даражасини белгилаш палатаси нинг квитанция рақами ва санаси 1 2 3 …
Ўзбекистон Республикасининг Бош вазири А. АРИПОВ
Тошкент ш.,
2020 йил 10 январь,
17-сон
Oʻzbekiston Respublikasi Vazirlar Mahkamasining
qarori
TARKIBI
NIZOM
REYESTRI
Oʻzbekiston Respublikasi zargarlik sanoatining zamonaviy uskuna, texnologiyalari va zargarlik buyumlari “Uzbek Jewellery Fair-2020” birinchi xalqaro koʻrgazma-savdosini tashkil etish va oʻtkazish chora-tadbirlari toʻgʻrisida
Oʻzbekiston Respublikasi Prezidentining “Oʻzbekiston Respublikasida zargarlik tarmogʻini jadal rivojlantirish chora-tadbirlari toʻgʻrisida” 2019-yil 18-maydagi PF-5721-son Farmoniga muvofiq, shuningdek, mahalliy va yetakchi xorijiy tashkilotlar tomonidan ishlab chiqarilayotgan yuqori samarali ilgʻor texnologiya va uskunalar bilan tanishish, oʻzaro manfaatli hamkorlik qilish uchun xalqaro va mintaqaviy maydon yaratilishiga koʻmaklashish, milliy zargarlik buyumlarini sotish, zargarlik sanoati buyumlarining ishlab chiqaruvchilari, yetkazib beruvchilari va isteʼmolchilari bilan oʻzaro texnologiya va maʼlumotlar almashish maqsadida Vazirlar Mahkamasi qaror qiladi:
1. “Oʻzbekzargarsanoati” uyushmasi, Oʻzbekiston Respublikasi Turizmni rivojlantirish davlat qoʻmitasi, Savdo-sanoat palatasining:
2020-yil may oyining 8 — 10 kunlari Toshkent shahrida “Yoshlar ijod saroyi” koʻrgazmalar maydoni bazasida Oʻzbekiston Respublikasi zargarlik sanoatining zamonaviy uskuna, texnologiyalari va zargarlik buyumlari “Uzbek Jewellery Fair-2020” birinchi xalqaro koʻrgazma-savdosini (keyingi oʻrinlarda koʻrgazma deb ataladi) oʻtkazish;
2020-yildan boshlab doimiy ravishda har yili may oyi birinchi haftasining juma kunidan yakshanba kunigacha Oʻzbekiston Respublikasi zargarlik sanoatining zamonaviy uskuna, texnologiyalari va zargarlik buyumlari “Uzbek Jewellery Fair” xalqaro koʻrgazma-savdosini oʻtkazish;
turizm sohasidagi tadbirkorlik subyektlari orasida Oʻzbekiston Respublikasi zargarlik sanoatining zamonaviy uskuna, texnologiyalari va zargarlik buyumlari “Uzbek Jewellery Fair” xalqaro koʻrgazma-savdosini targʻib qilish;
koʻrgazmani tashkil qilish boʻyicha xarajatlarni “Oʻzbekzargarsanoati” uyushmasi qoshidagi Zargarlik sohasini rivojlantirish jamgʻarmasi mablagʻlari va qonunchilik hujjatlarida taqiqlanmagan boshqa mablagʻlar hisobidan qoplash boʻyicha takliflariga rozilik berilsin.
2. Quyidagilar:
Oʻzbekiston Respublikasi zargarlik sanoatining zamonaviy uskuna, texnologiyalari va zargarlik buyumlari “Uzbek Jewellery Fair” xalqaro koʻrgazma-savdosini oʻtkazish boʻyicha tashkiliy qoʻmita tarkibi 1-ilovaga muvofiq;
Qimmatbaho metallardan va qimmatbaho toshlardan tayyorlangan zargarlik buyumlarini koʻrgazmalarda, koʻrgazma-savdolarda, yarmarkalarda yuridik shaxslar va yakka tartibdagi tadbirkorlar tomonidan sotishning soddalashtirilgan tartibi toʻgʻrisidagi nizom 2-ilovaga muvofiq tasdiqlansin.
3. “Oʻzbekzargarsanoati” uyushmasi va Savdo-sanoat palatasi Oʻzbekiston Respublikasi Turizmni rivojlantirish davlat qoʻmitasi va Transport vazirligi bilan birgalikda turistik axborot markazlarida, aeroportlarda, avtobus hamda temir yoʻl vokzallarida mahalliy texnologiya va uskunalar, ayniqsa, zargarlik sohasi buyumlari kataloglari tarqatilishini taʼminlasin.
4. Oʻzbekiston Respublikasi Tashqi ishlar vazirligi, Oʻzbekiston Respublikasi Investitsiyalar va tashqi savdo vazirligi, “Oʻzbekzargarsanoati” uyushmasi:
Oʻzbekiston Savdo-sanoat palatasi bilan birgalikda zamonaviy uskuna hamda texnologiyalar, shuningdek, zargarlik sanoati buyumlarining yetakchi jahon va mahalliy ishlab chiqaruvchilarini oʻtkaziladigan koʻrgazmalarda qatnashishga jalb etish boʻyicha faol reklama-axborot kampaniyalari va tashkiliy ishlarni amalga oshirsin;
xorijiy davlatlarning zargarlik tarmogʻida oʻtkaziladigan xalqaro tadbirlarning har yilgi jadvaliga Oʻzbekiston Respublikasi zargarlik sanoatining zamonaviy uskuna, texnologiyalari va zargarlik buyumlari “Uzbek Jewellery Fair” xalqaro koʻrgazma-savdosini kiritish choralarini koʻrsin.
5. “Oʻzbekzargarsanoati” uyushmasi manfaatdor vazirliklar va idoralar bilan birgalikda:
koʻrgazma doirasida respublika hududiga olib kiriladigan tovarlarning roʻyxati shakllantirilishini va ushbu roʻyxatda ularning nomi, oʻlchov birligi, qiymati, TIF TN kodi hamda olib kiruvchining rekvizitlari koʻrsatilishini;
roʻyxatda koʻrsatilgan tovarlarni Oʻzbekiston Respublikasi bojxona hududiga olib kirish va olib chiqishda identifikatsiya qilinishini;
koʻrgazma ishtirokchilari oʻrtasida shartnoma asosida tarqatish maqsadida, zamonaviy texnologiya va uskunalarni, shuningdek, zargarlik sanoati buyumlarining batafsil katalogi chop etilishini;
koʻrgazmaga tashrif buyuruvchilar uchun axborot-maʼlumot bukletlari va boshqa tarqatma materiallari tayyorlanishini taʼminlasin.
6. Oʻzbekiston Respublikasi Davlat bojxona qoʻmitasi koʻrgazma tovarlarining belgilangan tartibda tezkor rasmiylashtirilishini taʼminlasin.
7. Oʻzbekiston Respublikasi Markaziy bankiga Oʻzbekiston Respublikasi zargarlik sanoatining zamonaviy uskuna, texnologiyalari va zargarlik buyumlari “Uzbek Jewellery Fair” xalqaro koʻrgazma-savdosini tashkil etish va oʻtkazish doirasida Oʻzbekiston Respublikasi Markaziy bankining esdalik tangalarini sotish nuqtalarini tashkil etish tavsiya etilsin.
8. Koʻrgazma ishtirokchilariga tashrif buyuruvchilar oʻrtasida oʻz mahsulotlarini sotishga ruxsat berilsin.
9. Oʻzbekiston Respublikasi Tashqi ishlar vazirligi, Iqtisodiyot va sanoat vazirligi, Investitsiyalar va tashqi savdo vazirligi hamda “Oʻzbekzargarsanoati” uyushmasining buyurtmanomalari boʻyicha koʻrgazmaning xorijiy ishtirokchilariga kirish vizalari konsullik va haqiqiy xarajatlarning oʻrnini qoplash hisobidan yigʻimlarni undirmagan holda rasmiylashtirilishini taʼminlasin.
10. Oʻzbekiston Respublikasi Ichki ishlar vazirligi:
“Oʻzbekzargarsanoati” uyushmasining buyurtmanomasiga binoan koʻrgazmaning xorijiy ishtirokchilariga, davlat boji undirmasdan, koʻp martalik vizalarni rasmiylashtirish, berish va muddatini uzaytirishni, shuningdek, vaqtincha turgan joyi boʻyicha roʻyxatga olish va uning muddatini uzaytirishni;
Oʻzbekiston Respublikasi Milliy gvardiyasi bilan birgalikda koʻrgazma oʻtkaziladigan joylarda jamoat tartibi saqlanishini taʼminlasin.
11. Oʻzbekiston Respublikasi Favqulodda vaziyatlar vazirligi koʻrgazma oʻtkaziladigan joylarda yongʻin xavfsizligini toʻlov undirmasdan taʼminlasin.
12. “Uzbekistan Airways” AJ, “Uzbekistan Airports” AJ toʻlov undirmasdan:
koʻrgazma ishtirokchilarini I. Karimov nomidagi Toshkent xalqaro aeroportida kutib olish va kuzatib qoʻyishni tashkil etish shtabi faoliyatini muvofiqlashtirish, bunda shtabni zarur miqdorda tashkiliy texnika va aloqa vositalari bilan jihozlash, shuningdek, aeroportda koʻrgazma ishtirokchilariga transport xizmati koʻrsatishni nazarda tutishni;
koʻrgazmalar yuklarini I. Karimov nomidagi Toshkent xalqaro aeroportida belgilangan tartibda tashish, ishlash va saqlashni;
I. Karimov nomidagi Toshkent xalqaro aeroporti binosi xonalarini koʻrgazmaga bagʻishlangan stendlar bilan jihozlashni taʼminlasinlar.
13. “Oʻzbekiston temir yoʻllari” AJ “Oʻzbekzargarsanoati” uyushmasi buyurtmanomasiga binoan, koʻrgazmaga olib kelinayotgan yuklarni tashish, belgilangan manzilga yetkazib berish hamda vagonlarning yigʻimlar undirmasdan oʻz vaqtida berilishini taʼminlasin.
14. Oʻzbekiston Milliy teleradiokompaniyasi, Oʻzbekiston Milliy axborot agentligiga koʻrgazmaga tayyorgarlik koʻrish va uni oʻtkazish jarayonini ommaviy axborot vositalarida keng yoritish tavsiya etilsin.
15. Mazkur qarorning bajarilishini nazorat qilish Oʻzbekiston Respublikasi iqtisodiyot va sanoat vaziri B.A. Xoʻjayev va “Oʻzbekzargarsanoati” uyushmasi raisi D.N. Samatov zimmasiga yuklansin.
Vazirlar Mahkamasining 2020-yil 10-yanvardagi 17-son qaroriga 1-ILOVA
Oʻzbekiston Respublikasi zargarlik sanoatining zamonaviy uskuna, texnologiyalari va zargarlik buyumlari “Uzbek Jewellery Fair-2020” xalqaro koʻrgazma-savdosini oʻtkazish boʻyicha tashkiliy qoʻmita
B.A. Xoʻjayev — iqtisodiyot va sanoat vaziri, Tashkiliy qoʻmita rahbari D.N. Samatov — “Oʻzbekzargarsanoati” uyushmasi raisi , Tashkiliy qoʻmita rahbari oʻrinbosari I.T. Neʼmatov — tashqi ishlar vazirining birinchi oʻrinbosari M.O. Saliyev — Davlat bojxona qoʻmitasi raisining oʻrinbosari X.A. Shakirov — Toshkent shahar hokimining birinchi oʻrinbosari A.D. Xadjayev — Oʻzbekiston milliy teleradiokompaniyasi raisi v.b.
Vazirlar Mahkamasining 2020-yil 10-yanvardagi 17-son qaroriga 2-ILOVA
Qimmatbaho metallardan va qimmatbaho toshlardan tayyorlangan zargarlik buyumlarini koʻrgazmalarda, koʻrgazma-savdolarda, yarmarkalarda yuridik shaxslar va yakka tartibdagi tadbirkorlar tomonidan sotishning soddalashtirilgan tartibi toʻgʻrisida
1. Mazkur Nizom Oʻzbekiston Respublikasi hududida oʻtkaziladigan koʻrgazmalarda, koʻrgazma-savdolarda, yarmarkalarda (keyingi oʻrinlarda koʻrgazma deb ataladi) qimmatbaho metallardan va qimmatbaho toshlardan tayyorlangan zargarlik va boshqa buyumlarini, shuningdek, buyumlarga biriktirilmagan qirralangan qimmatbaho toshlarni (keyingi oʻrinlarda zargarlik buyumlari deb ataladi) sotish tartibini belgilaydi.
2. Mazkur Nizomda quyidagi asosiy tushunchalardan foydalanilgan:
koʻrgazma tashkilotchisi — koʻrgazmalar, koʻrgazma-savdolar, yarmarkalarni tashkillashtirish va oʻtkazish boʻyicha faoliyatni amalga oshiruvchi yuridik shaxs yoki yakka tartibdagi tadbirkor;
koʻrgazma ishtirokchisi — koʻrgazmada ishtirok etish uchun ariza bergan va koʻrgazma ishtirokchilari tarkibiga kiritilgan yuridik shaxs yoki yakka tartibdagi tadbirkor, shuningdek, Oʻzbekiston Respublikasi norezidentlari (shu jumladan Oʻzbekiston Respublikasi hududida tadbirkorlik subyekti sifatida roʻyxatdan oʻtmagan xorijiy davlatlar fuqarolari va xorijiy kompaniyalar vakillari).
3. Koʻrgazma stendlarini qurish va qoʻshimcha koʻrgazma uskunalari hamda shu bilan bogʻliq xizmatlar koʻrsatish koʻrgazma tashkilotchisi tomonidan shartnoma asosida amalga oshiriladi.
4. Oʻzbekiston Respublikasi hududida roʻyxatdan oʻtgan yuridik shaxslar yoki yakka tartibdagi tadbirkorlar — tadbirkorlik subyektlari koʻrgazmalarda zargarlik buyumlarini davlat soliq xizmati idoralarida roʻyxatdan oʻtgan nazorat-kassa mashinalari, toʻlov terminallarini qoʻllagan yoki majburiy ravishda bilet, talon, chek yoki ularga tenglashtirilgan boshqa hujjatlarni bergan holda sotadilar.
Koʻrgazmalarning Oʻzbekiston Respublikasi hududida tadbirkorlik subyekti sifatida roʻyxatdan oʻtmagan xorijiy ishtirokchilari zargarlik buyumlarini koʻrgazma-savdoda Oʻzbekiston Respublikasi milliy valyutasida naqdga, keyinchalik sotishdan tushgan milliy valyuta mablagʻlarini koʻrgazmada sotilgan zargarlik buyumlari savdosidan olinganligini tasdiqlovchi hujjatlar taqdim etilgan taqdirda, valyuta ayirboshlash punktlarida naqd xorijiy valyutaga konvertatsiya qilish imkoniyati bilan sotadilar.
5. Oʻzbekiston Respublikasi rezidentlari yoki norezidentlari tomonidan koʻrgazmada sotish uchun xorijdan olib kiriladigan zargarlik buyumlari, ularning probasini tasdiqlovchi ishlab chiqaruvchi davlatning asillik darajasi tamgʻalari izlariga ega boʻlishi kerak.
6. Koʻrgazma tashkilotchisi mazkur Nizomning ilovasiga muvofiq shaklda koʻrgazma ishtirokchilarining reyestrini yuritishi zarur.
7. Koʻrgazma ishtirokchisi koʻrgazmaga tashrif buyuruvchilarga quyidagi maʼlumotlarni davlat, ingliz hamda rus tillarida yetkazishi shart:
yuridik shaxs — oʻzining nomi (firmaning nomi), joylashgan joyi (pochta manzili);
yakka tartibdagi tadbirkor — familiyasi, ismi, otasining ismi, davlat roʻyxati va uni roʻyxatdan oʻtkazish joyi (davlat)da roʻyxatdan oʻtkazgan idoraning nomi.
Qayd etilgan maʼlumotlar koʻrgazma ishtirokchisining koʻrgazma stendiga joylashtiriladi.
8. Koʻrgazmaga qoʻyilgan barcha buyumlar ishlab chiqaruvchi tashkilotning yorligʻiga, ular mavjud boʻlmagan hollarda, zargarlik buyumlarini Oʻzbekiston Respublikasi hududiga olib kirishda — koʻrgazma ishtirokchisi yorligʻiga ega boʻlishi kerak. Yorliqlarda quyidagi maʼlumotlar koʻrsatilishi shart:
ishlab chiqaruvchi tashkilot nomi yoki ishlab chiqaruvchi davlat nomi (zargarlik buyumlari Oʻzbekiston Respublikasi hududiga yorliqsiz olib kirilganda);
buyumning nomi;
metall nomi, probasi;
buyumning grammlardagi massasi (kumushdan yasalgan shaxsiy taqinchoqlar bundan mustasno);
qoʻshimcha nomi (qoʻshimchaga ega buyumlar uchun);
tavsiflari (qimmatbaho toshlardan tayyorlangan qoʻshimchalar uchun);
buyumning raqami (qimmatbaho toshlardan tayyorlangan qoʻshimchalar uchun);
buyumning qiymati.
Oʻzbekiston Respublikasiga yorliqsiz olib kirilgan, import qilingan zargarlik buyumlari, shuningdek, agar u ishlab chiqaruvchi tashkilot yorligʻida koʻrsatilmagan boʻlsa, artikuli mavjud boʻlmasligiga yoʻl qoʻyiladi.
Kumushdan yasalgan buyumlar yorligʻida ishlab chiqaruvchi tashkilot (ishlab chiqaruvchi davlat) probasi nomi koʻrsatilgan holda markirovkalashga yoʻl qoʻyiladi.
Yorliqdagi buyumning massasi oltindan yasalgan buyumlar uchun — 0,01 g hamda kumushdan yasalgan buyumlar uchun — 0,1 g aniqlikda tasvirlangan boʻlishi shart.
9. Ishlov berilmagan koʻrinishdagi, shuningdek, buyumlarga biriktirilgan qimmatbaho toshlar koʻrgazmada faqatgina eksponat sifatida taqdim etilishi mumkin.
10. Qimmatbaho toshlar tegishli (sertifikatlar, diagnostik xulosalar va boshqa) hujjatlarga ega boʻlishi shart, bunda ularda gemmologik tavsiflar koʻrsatilib, ularning haqiqiyligi tasdiqlanishi zarur.
Qimmatbaho toshlarning haqiqiyligini tasdiqlovchi sertifikatlar, diagnostik xulosalar va boshqa hujjatlarda koʻrsatilgan maʼlumotlar koʻrgazmaga tashrif buyuruvchilar eʼtibori uchun yetkazilishi shart.
11. Qirralangan qimmatbaho toshlarni sotish faqatgina har bir tosh yoki sotiladigan toshlarning toʻplami uchun sertifikat va individual qadoq mavjud boʻlganda amalga oshiriladi.
12. Xaridorga zargarlik buyumlari bilan birga tovar va sotuvchining nomi, artikuli, probasi, ogʻirligi, bir gramm uchun qiymati, qimmatbaho toshning turi va tavsifi, tovarning qiymati va sotilgan sanasi, bevosita tovarni sotgan shaxsning imzosi koʻrsatilgan chek, xarid qilingan qirralangan qimmatbaho toshlar uchun esa qoʻshimcha ravishda sertifikat beriladi.
13. Koʻrgazmalarda zargarlik buyumlarini realizatsiya qilish faqatgina koʻrgazma ishi yakunlangandan soʻng qoʻriqlash xizmatiga topshiriladigan, koʻchma obyektlarning xonalari (zallari)da amaga oshiriladi. Koʻrgazma tashkilotchisi va ishtirokchisi buyumlarning saqlanishi uchun koʻrgazma tashkilotchisi va ishtirokchisi oʻrtasida tuziladigan shartnomaga muvofiq javob beradilar.
Koʻrgazma ishtirokchilari zargarlik buyumlarini transportda tashishda ularning saqlanishi uchun shaxsan javob beradilar.
Qimmatbaho metallardan va qimmatbaho toshlardan tayyorlangan zargarlik buyumlarini koʻrgazmalarda, koʻrgazma-savdolarda, yarmarkalarda yuridik shaxslar va yakka tartibdagi tadbirkorlar tomonidan sotishning soddalashtirilgan tartibi toʻgʻrisidagi nizomga ILOVA
Koʻrgazma ishtirokchilarining
T/r Yuridik shaxsning nomi yoki yakka tartibdagi tadbirkorning familiyasi, ismi, otasining ismi Yuridik manzili yoki yakka tartibdagi tadbirkorning yashash joyi Davlat roʻyxatidan oʻtganligi toʻgʻrisida maʼlumotlar Telefon raqami Litsenziya raqami vaberilgan sanasi , uning amal qilish muddati Litsenziya bergan idoraning nomi Litsenziyalangan faoliyat turi Davlat asillik darajasini belgilash palatasi ning kvitansiya raqami va sanasi 1 2 3 …
Oʻzbekiston Respublikasining Bosh vaziri A. ARIPOV
Toshkent sh.,
2020-yil 10-yanvar,
17-son