UzbekAI

Ўзбекистон Республикаси Вазирлар Маҳкамасининг

қарори

РЎЙХАТИ

ВАҚТИНЧАЛИК НИЗОМ

ТАРКИБИ

Ўзбекистон Республикаси Соғлиқни сақлаш вазирлигининг тиббиёт ташкилотларини молиялаштириш тизимини янада такомиллаштириш чора-тадбирлари тўғрисида

Ўзбекистон Республикаси Президентининг «Ўзбекистон Республикасининг суғурта бозорини ислоҳ қилиш ва унинг жадал ривожланишини таъминлаш чора-тадбирлари тўғрисида» 2019 йил 2 августдаги ПҚ-4412-сон қарори ижросини таъминлаш ва Ўзбекистон Республикаси Соғлиқни сақлаш вазирлиги тизимидаги тиббиёт ташкилотларини молиялаштириш тизимини янада такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Давлат бюджети маблағлари ҳисобидан жон бошига ва «ҳар бир даволанган ҳолат учун» молиялаштириш механизми тажриба-синов тарзида жорий этиладиган Сирдарё вилояти тиббиёт ташкилотларининг рўйхати 1-иловага мувофиқ тасдиқлансин.

2. Қуйидагилар:

Ўзбекистон Республикаси Соғлиқни сақлаш вазирлиги тизимидаги тиббиёт ташкилотларини «ҳар бир даволанган ҳолат учун» Ўзбекистон Республикаси Давлат бюджети маблағлари ҳисобидан молиялаштириш тартиби тўғрисидаги вақтинчалик низом 2-иловага мувофиқ;

Ўзбекистон Республикаси Соғлиқни сақлаш вазирлиги тизимидаги бирламчи тиббий-санитария ёрдами муассасаларини Ўзбекистон Республикаси Давлат бюджети маблағлари ҳисобидан жон бошига молиялаштириш тартиби тўғрисидаги вақтинчалик низом 3-иловага мувофиқ тасдиқлансин.

3. Ўзбекистон Республикаси Соғлиқни сақлаш вазирлиги Молия вазирлиги билан биргаликда бир ой муддатда:

Сирдарё вилояти соғлиқни сақлаш бошқармаси тузилмасида Сирдарё вилояти «соғлиқни сақлаш» тизимидаги муассасаларнинг штатлари доирасида 7 кишидан иборат тиббий хизматлар бўйича давлат харидлари тўғрисидаги шартномаларни тузиш ва бажарилган ишларни қабул қилиш бўлимини ташкил этсин;

молиялаштиришнинг янги механизмларига ўтаётган тиббиёт ташкилотлари учун cтационар ва амбулатор шароитда беморларни даволаш харажатларини алоҳида ҳисобга олиш мақсадида мавжуд электрон бухгалтерия ҳисоби ва ҳисобот дастурларини такомиллаштириш чораларини кўрсин.

4. Ўзбекистон Республикаси Соғлиқни сақлаш вазирлиги тасдиқланган тиббий ёрдам сифати стандартларига мувофиқ ордерлар ва йўлланмалар бериш, тиббий ёрдам кўрсатиш тўғрилиги устидан назоратни, шунингдек, молиялаштиришнинг янги механизмини жорий этиш бўйича тажриба-синов ўтказиш натижаларининг тизимли мониторинги ва таҳлилини таъминласин.

5. Ўзбекистон Республикаси Соғлиқни сақлаш вазирлиги Молия вазирлиги, Иқтисодиёт ва саноат вазирлиги ҳамда Ўзбекистон Республикаси Инновацион соғлиқни сақлаш миллий палатаси билан биргаликда 2020 йил 1 декабргача бўлган муддатда тажрибани амалга оширишнинг оралиқ якунлари бўйича ахборотни, шунингдек, тажриба-синов натижаларига кўра амалдаги қонун ҳужжатларига ўзгартириш ва қўшимчалар тўғрисида Ўзбекистон Республикаси Вазирлар Маҳкамасига таклифлар киритсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Ж.А. Қўчқоров ва А.А. Абдухакимов, Ўзбекистон Республикаси соғлиқни сақлаш вазири А.К. Шадманов зиммасига юклансин.

Вазирлар Маҳкамасининг 2020 йил 10 январдаги 19-сон қарорига 1-ИЛОВА

Ўзбекистон Республикаси Давлат бюджети маблағлари ҳисобидан жон бошига ва «ҳар бир даволанган ҳолат учун» молиялаштириш механизми тажриба-синов тарзида жорий этиладиган Сирдарё вилояти тиббиёт ташкилотларининг

Т/р Тиббиёт ташкилоти номи 2020 йил 1 апрелдан 1 . Вилоят кўп тармоқли тиббиёт маркази 2 . Вилоят кўз диспансери 3 . Вилоят наркология диспансери 4 . Вилоят кардиология диспансери 5 . Вилоят тери-таносил диспансери 6 . Вилоят ўсма касалликлар диспансери 7 . Вилоят эндокринология диспансери 8 . Вилоят юқумли касалликлар шифохонаси 2020 йил 1 июлдан 1 . Гулистон шаҳар тиббиёт бирлашмаси 2 . Ширин шаҳар тиббиёт бирлашмаси 3 . Янгиер шаҳар тиббиёт бирлашмаси 4 . Боёвут туман тиббиёт бирлашмаси 5 . Гулистон шаҳар тиббиёт бирлашмаси 6 . Мирзаобод туман тиббиёт бирлашмаси 7 . Оқ олтин туман тиббиёт бирлашмаси 8 . Сардоба туман тиббиёт бирлашмаси 9 . Сайхунобод туман тиббиёт бирлашмаси 10 . Сирдарё туман тиббиёт бирлашмаси 11 . Ховос туман тиббиёт бирлашмаси 12 . Вилоят болалар кўп тармоқли тиббиёт маркази 13 . Республика шошилинч тиббий ёрдам илмий марказининг Сирдарё филиали 14 . Вилоят перинатал маркази

Вазирлар Маҳкамасининг 2020 йил 10 январдаги 19-сон қарорига 2-ИЛОВА

1-боб. Умумий қоидалар

1. Ушбу вақтинчалик низом (кейинги ўринларда Низом деб аталади) Сирдарё вилоятининг тиббиёт ташкилотларини Сирдарё вилояти молия бошқармаси, Сирдарё вилояти соғлиқни сақлаш бошқармаси (кейинги ўринларда ваколатли органлар деб аталади) ва тиббиёт ташкилоти ўртасида давлат харидлари тўғрисидаги шартнома (кейинги ўринларда шартнома деб аталади) тузиш орқали клиник-харажат гуруҳлари асосида ҳар бир даволанган ҳолат учун Ўзбекистон Республикаси Давлат бюджети маблағлари ҳисобидан молиялаштириш тартибини белгилайди.

2. Мазкур Низом «ҳар бир даволанган ҳолат учун» молиялаштириш тизимига тажриба-синов тарзида ўтаётган Сирдарё вилоятининг тиббиёт ташкилотларига нисбатан қўлланилади.

3. Ушбу Низомда қуйидаги асосий тушунчалар қўлланилади:

ҳар бир даволанган ҳолат — клиник хизмат кўрсатиш якунланган ҳолат бўлиб, мижозга ташҳис қўйиш ва даволашнинг тасдиқланган баённомаларига мувофиқ тиббиёт ташкилотида бўлган вақтда кўрсатилган тиббий хизматларни ўз ичига олади ёки мазкур босқичда тиббий хизмат кўрсатишнинг муайян якуний натижасига эришилиши туфайли хизмат кўрсатишнинг якунланиши;

клиник-харажат гуруҳлари (КХГ) — бир хил ва ўхшаш клиник вазиятлар бўйича нисбатан тенг ресурс сарфлайдиган ва қийматга эга бўлган тиббий хизматлар тўплами;

ҳар бир даволанган ҳолат учун базавий тариф — мижозга тиббий хизмат кўрсатиш учун базавий харажатларнинг меъёри бўлиб, КХГ асосида бир даволанган ҳолат учун хизматлар қиймати ҳисоб-китобидан келиб чиқиб белгиланади;

давлат харидлари тўғрисидаги шартнома — мижозга тиббий хизмат кўрсатиш учун ваколатли органлар (давлат буюртмачиси) ва тиббиёт ташкилотлари (давлат харидлари ижрочиси) ўртасида Давлат бюджети ва/ёки давлат мақсадли жамғармалари бюджетлари маблағлари ҳисобига тузиладиган битим;

мураккаблик индекси — КХГ бўйича ҳар бир даволанган ҳолат учун ўрта ҳисобдаги базавий тариф қийматидан оғишиш коэффициенти бўлиб, тиббий хизмат кўрсатиш усулига ва уни кўрсатишга сарфланадиган харажатларга боғлиқ бўлади;

тиббий-иқтисодий экспертиза — тиббиёт ташкилоти томонидан тўловга тақдим этилган ҳисобварақлардаги кўрсатилган тиббий хизматлар ҳажмининг асослилигини эксперт баҳолаш.

2-боб. Молиялаштиришнинг прогноз ҳажмини аниқлаш ва шартномаларни тузиш тартиби

4. Молия йилида тиббиёт ташкилотига бир шартнома доирасида ажратилган маблағлар ҳажмини ҳисоб-китоб қилиш учун Ўзбекистон Республикаси Соғлиқни сақлаш вазирлиги Молия вазирлиги билан биргаликда ҳар йили 1 февралгача қуйидагиларни тасдиқлайди:

ҳар бир даволанган ҳолат учун базавий тариф ва мураккаблик индекслари;

стационар тиббий ёрдам олиши режалаштирилган мижозлар сони.

5. «Ҳар бир даволанган ҳолат учун» базавий тарифни ва мураккаблик индексини ҳисоб-китоб қилиш тартиби Ўзбекистон Республикаси Соғлиқни сақлаш вазирлиги томонидан Молия вазирлиги билан келишилган ҳолда белгиланади.

6. Тиббиёт ташкилоти билан «ҳар бир даволанган ҳолат учун» шартнома Ўзбекистон Республикаси Давлат бюджети маблағлари ҳисобидан тегишли тиббиёт ташкилотлари учун ажратилган маблағлар доирасида тузилади.

7. Ваколатли органлар ва тиббиёт ташкилоти ўртасида «ҳар бир даволанган ҳолат учун» бўйича кўрсатилган хизматлар ҳақи ўзаро тузилган шартномага мувофиқ тўланади.

8. Соғлиқни сақлашни бошқариш органлари молия органлари билан биргаликда тиббиёт ташкилотлари бюджетларини ҳисоблаб чиқади, шартномалар лойиҳаларини тайёрлайди ва улар билан шартнома имзолангандан кейин уч кун ичида тиббиёт ташкилотларига етказади.

9. Молия йилида шартномага мувофиқ даволанган ҳолатлар ҳақини тўлаш учун маблағлар ҳажми қуйидаги формула бўйича аниқланади:

МҲ = N х БТ, бунда,

МҲ — муайян молия йили учун шартнома бўйича маблағлар ҳажми;

N — молия йилидаги барча режалаштирилган даволанган ҳолатлар сони;

БТ — ҳар бир даволанган ҳолат учун тасдиқланган базавий тариф. Бунда базавий тариф тиббиёт ташкилотини сақлаб туриш учун зарур бўлган маблағлардан шакллантирилади. Асосий воситаларни харид қилиш, капитал қурилиш ва таъмирлаш харажатлари базавий тариф таркибига кирмайди.

10. Тиббиёт ташкилотининг даромадлари ва харажатлари сметалари ваколатли органлар билан тузилган шартномада кўрсатилган маблағ ва бошқа даромадлар кўзда тутилган ҳолда тузилади.

11. Тиббиёт ташкилотлари ажратилган бюджет маблағлари ва ўз даромадлари доирасида мустақил равишда:

келгуси йил учун даромадлар ва харажатлар сметасини ишлаб чиқади ва тасдиқлайди;

муассаса ходимлари меҳнатига ҳақ тўлаш ва уларни моддий рағбатлантириш тўғрисидаги низомни ишлаб чиқади ва тасдиқлайди;

кутилаётган даромадлар доирасида ходимлар сонини мустақил белгилайди, такомиллаштирилган тариф сеткаси бўйича базавий лавозим маошларидан, шунингдек, устама ва қўшимчалардан келиб чиққан ҳолда штат жадвалини тасдиқлайди.

12. «Ҳар бир даволанган ҳолат учун» молиялаштириш тизимига тажриба-синов тарзида ўтаётган Сирдарё вилоятининг тиббиёт ташкилотлари учун амалдаги намунавий штат нормативлари тавсиявий хусусиятга эга.

3-боб. Кўрсатилган тиббий хизматлар учун тиббиёт ташкилотлари харажатларини тўлаш тартиби

13. Ўзбекистон Республикаси Давлат бюджети маблағлари хисобидан тиббиёт ташкилотлари томонидан кўрсатилган хизматларга ҳақ тўлаш ваколатли органлар билан тузилган шартномада назарда тутилган маблағнинг 1/12 қисмини қуйидаги кетма-кетликда харажатлар моддаларига бўлмаган ҳолда алоҳида сатр билан амалга оширилади:

ҳар ойнинг 5 санасигача бўлган муддатда режалаштирилган маблағнинг 70 фоизи миқдорида тиббиёт ташкилотининг харажатларини қоплаш учун олдиндан тўлов;

қолган 30 фоиз маблағ кейинги ойнинг 15 санасигача шартнома шартларига кўра бажарилган дастлабки ҳисобот ҳужжатлари асосида амалга оширилади.

14. Тиббиёт ташкилотлари ҳар чоракда аввалги чорак учун дастлабки ҳисоб ҳужжатлари асосида тиббий ёрдам кўрсатилиши бўйича беморлар реестрини шаклантиради, ўзаро ҳисоб-китобларни якунлаш учун шакллантирилган ҳужжатлар асосида таққослама далолатнома тузади, улар тиббий хизматлар ҳақини тўлаш учун ҳисобварақ-фактура билан бирга ҳисобот давридан кейинги ойнинг 10 санасигача ваколатли органларга тақдим этилади.

15. Тиббиёт ташкилотлари томонидан шартномада белгиланган мажбуриятларнинг тўлиқ бажарилмаслиги натижасида олдиндан тўлов сифатида тўланган маблағ кейинги хисобот чорагида назарда тутилган маблағ хисобидан камайтириш орқали ушлаб қолинади.

Бунда шартномада белгиланган муддатдаги ҳажмдан ортиқ кўрсатилган хизматлар учун тўловни тўлашга шартнома доирасида аввалги даврда бажарилмаган ҳажмлар ҳисобига йўл қўйилади.

16. Тиббиёт ташкилоти томонидан шартнома бўйича қабул қилинган мажбуриятлар тўлиқ ҳажмда бажарилганда, ҳисобот даври якунида шахсий ғазна ҳисобварағида қолган бюджет маблағлари бюджетга қайтарилмайди. Ушбу маблағлар тиббиёт ташкилотини ривожлантириш ва ходимларни рағбатлантириш учун ишлатилади.

17. Шартномада кўрсатилган тиббий хизматларнинг ҳажми ва қиймати ёки бошқа омилларнинг таъсири натижасида ўзгартириш ва қўшимчалар киритиш тарафларнинг келишувига асосан амалга оширилади.

4-боб. Тиббий-иқтисодий экспертиза

18. Тиббий иқтисодий ҳужжатларнинг тўғри шакллантирилганлигини назорат қилиш Ўзбекистон Республикаси Соғлиқни сақлаш вазирлиги ва унинг ҳудудий бошқармалари томонидан тиббий-иқтисодий экспертизадан ўтказиш орқали амалга оширилади.

19. Тиббий-иқтисодий экспертиза қуйидаги параметрлар бўйича бирламчи тиббий ҳужжатлар асосида ҳар чоракда ўтказилади:

даволанган беморлар реестрининг тўғри тўлдирилганлиги;

мижозни тиббиёт ташкилотига жойлаштиришнинг асослилиги;

мижозни даволашда ташҳис қўйиш ва даволаш сифати стандартларига риоя этилганлиги;

тиббий хизматлар ҳақини тўлаш учун тақдим этилган ҳисобварақ-фактурадаги суммаларнинг даволанган беморлар реестридаги суммаларга мувофиқлиги.

20. Тиббий ёрдам кўрсатишда ташҳис қўйиш ва даволаш сифатига доир белгиланган стандартларга мос келмаган ҳолатлар аниқланган тақдирда, тиббий-иқтисодий экспертиза натижалари белгиланган тартибда расмийлаштирилади ва ваколатли шахслар томонидан имзоланади.

21. Тиббий-иқтисодий экспертиза натижаларига кўра тиббий хизмат ҳажмларини сунъий ошириб кўрсатиш ҳолатлари аниқланганда, ортиқча тўланган маблағлар кейинги тўловларда ушлаб қолинади.

22. Тиббий-иқтисодий экспертиза ҳужжатларининг ҳаққонийлиги устидан назорат ваколатли органлар томонидан амалга оширилади.

5-боб. Якунловчи қоидалар

23. Ўзбекистон Республикаси Соғлиқни сақлаш вазирлиги ва Молия вазирлиги «ҳар бир даволанган ҳолат учун» молиялаштириш тизимига тажриба-синов тарзида ўтаётган Сирдарё вилоятининг тиббиёт ташкилотлари фаолиятида вужудга келадиган масалаларни ўзаро ҳамкорликда тартибга солиш ваколатига эга.

24. Ушбу Низом талабларига риоя қилмаганлиги учун мансабдор шахслар Ўзбекистон Республикаси қонунчилик ҳужжатларида белгиланган тартибда жавоб беради.

Вазирлар Маҳкамасининг 2020 йил 10 январдаги 19-сон қарорига 3-ИЛОВА

1-боб. Умумий қоидалар

1. Ушбу Вақтинчалик низом (кейинги ўринларда Низом деб аталади) Сирдарё вилоятидаги қишлоқ врачлик пунктлари, қишлоқ ва шаҳар оилавий поликлиникалари, шунингдек, марказий кўп тармоқли поликлиникаларни (кейинги ўринларда бирламчи бўғин муассасалари деб аталади) бир киши ҳисобига харажатлар нормативидан келиб чиқиб, шартномалар асосида молиялаштириш тартибини белгилайди.

2. Мазкур Низом жон бошига молиялаштириш тизимига ўтаётган Сирдарё вилоятининг бирламчи бўғин ташкилотларига нисбатан қўлланилади.

3. Ушбу Низомда қуйидаги асосий тушунчалар қўлланилади:

давлат харидлари тўғрисидаги шартнома — аҳолига тиббий хизмат кўрсатиш учун бир тарафдан ваколатли органлар (давлат буюртмачиси) ва бошқа тарафдан тиббиёт ташкилотлари (давлат харидлари ижрочиси) ўртасида Давлат бюджети ва/ёки давлат мақсадли жамғармалари бюджетлари маблағлари ҳисобига келишилган ҳажмларда ёзма шаклда тузиладиган битим;

тузатиш коэффициенти — маълум бир муҳим омилларни (аҳоли жинси ва ёши ҳамда зичлиги) ҳисобга олган ҳолда, базавий харажатлар меъёрини тузатиш учун ишлатиладиган коеффициентлар;

бириктирилган аҳоли — белгиланган тартибда бирламчи бўғин муассасасида тиббий хизмат олиш учун рўйхатдан ўтган аҳоли;

базавий харажатларнинг меъёри (аҳоли жон бошига молиялаштириш) — Ўзбекистон Республикасининг ҳудудида бир фуқарога бирламчи тиббий-санитария ёрдами муассасаларида тиббий хизмат кўрсатиш учун харажатларнинг ягона стандарти, ушбу муассасаларнинг йил давомида хизматларнинг барча ҳажмлари учун тўлов миқдорини аниқлашда фойдаланилади.

4. Бирламчи бўғин муассасаларида Ўзбекистон Республикаси Давлат бюджети маблағлари ҳисобига тиббий ёрдам кўрсатиш амалдаги қонунчилик ҳужжатларига мувофиқ амалга оширилади.

2-боб. Бирламчи тиббий-санитария ёрдами муассасаларига аҳолини бириктириш тартиби

5. Аҳоли бирламчи бўғин муассасаларига тегишли туман (шаҳар) тиббиёт бирлашмалари раҳбарининг буйруғи билан бириктирилади.

6. Бирламчи бўғин муассасаларига бириктирилган аҳоли сони ва таркиби бўйича ахборот тегишли туман (шаҳар) тиббиёт бирлашмалари раҳбари томонидан тузилади, аҳолининг умумий сони эса ҳудудий статистика органи (туман/шаҳар) раҳбари томонидан тасдиқланади.

7. Бириктириш режалаштирилган давр бошида бирламчи бўғин муассасалари томонидан хизмат кўрсатиладиган участкалар асосида 1-иловага мувофиқ шакл бўйича амалга оширилади.

3-боб. Бирламчи бўғин муассасалари бюджетини аниқлаш

8. Бирламчи бўғин муассасаларининг бюджети базавий харажатларнинг меъёри асосида режалаштирилади.

9. Ҳар бир бирламчи бўғин муассасасини йиллик молиялаштириш ҳажми базавий харажатларнинг меъёри ва бирламчи бўғин муассасасига бириктирилган аҳоли сони ҳисоб-китобидан келиб чиқиб, қуйидаги формула бўйича тузатиш коэффициентларидан фойдаланилган ҳолда аниқланади:

МЙҲ = ХБМ режа х БАС х ҲТК, бунда:

МЙҲ — режалаштирилган йилда ҳудуд бирламчи бўғин муассасаларини йиллик молиялаштириш ҳажми;

ХБМ режа — режалаштирилган йилдаги базавий харажатларнинг меъёри;

БАС — режалаштирилган йил бошида бирламчи бўғин муассасасига бириктирилган ҳудуддаги аҳоли сони;

ҲТК — алоҳида ҳудудларда бирламчи бўғин муассасаларини молиялаштириш имкониятини ҳисобга оладиган ҳудудий тузатиш коэффициенти.

Бориш қийин бўлган ҳудудлар рўйхатлари ва мураккаб географик шароитларда ишлаш учун қўшимча ҳақларнинг аниқ миқдорлари қонунчилик ҳужжатларида белгиланади.

10. Базавий харажатларнинг меъёрини аниқлашда бирламчи бўғин муассасаларининг имтиёзли рецептлар бўйича бериладиган дори-дармонлар, шунингдек, капитал таъмирлаш ва қурилиш ҳамда қиммат баҳо ускуналарни харид қилиш харажатлари назарда тутилмайди.

11. Бирламчи бўғин муассасаларини сақлаб туриш учун харажатлар ҳар ойда ўртача тахминан йиллик бюджетнинг 12 дан бир қисми миқдорида айрим тиббий хизмат турларига бўлган эҳтиёжлар мавсумий ўзгариши ҳисобга олинган ҳолда молиялаштирилади. Ҳар ой учун молиялаштиришнинг прогноз ҳажмлари тарафлар ўртасида тузиладиган шартномаларда белгиланади. Бирламчи бўғин муассасалари вафот этган, ҳисобдан чиқарилган ва янги бириктирилган аҳолини ҳисобга олган ҳолда, бириктирилган аҳоли ҳақида ҳар чоракда соғлиқни сақлашни бошқариш органларини ва молия органларини хабардор қилади.

12. Алоҳида бирламчи бўғин муассасасини молиялаштиришнинг йиллик ҳажми базавий харажатларнинг меъёри ҳисоб-китоби ва бирламчи бўғин муассасаларига бириктирилган аҳоли сонидан келиб чиқиб, тузатиш коэффициентларидан (аҳоли жинси ва ёши ҳамда зичлиги) фойдаланган ҳолда аниқланади.

13. Йилллик маблағлар ҳажми базавий харажатларнинг меъёри белгиланган тартибда иш ҳақларини ошиши ҳамда коммунал хизматларнинг тарифларини ўзгариши ҳисобига қайта кўриб чиқилиши мумкин.

14. Сирдарё вилояти соғлиқни сақлаш бошқармаси ҳудудий молия бошқармаси билан келишилган ҳолда, бирламчи бўғин муассасалари бюджетларини ҳисоблаб чиқади ҳамда туман (шаҳар) молия органларига белгиланган тартибда етказади.

15. Бирламчи бўғин муассасалари ажратилган бюджет маблағлари ва ўз даромадлари доирасида мустақил равишда:

келгуси йил учун даромадлар ва харажатлар сметасини ишлаб чиқади ва тасдиқлайди;

Тажриба доирасидаги тиббиёт ташкилотлари учун амалдаги намунавий штат нормативлари тавсиявий хусусиятга эга.

4-боб. Кўрсатилган хизматлар учун бирламчи бўғин муассасалари харажатлари ҳақини тўлаш тартиби

16. Бирламчи бўғин муассасаларининг тиббий хизмат ҳақи ҳар ойда (харажатлар гуруҳини ажратмай) тасдиқланган харажатлар сметаларига мувофиқ, шунингдек, 2-иловага мувофиқ шартномада белгиланган келишилган тиббий ёрдам ҳажмлари қиймати доирасида тўланади.

17. Тиббий хизматлар узлуксиз кўрсатилишини ва жорий харажатлар қопланишини таъминлаш мақсадида бирламчи бўғин муассасаларига бюджет маблағлари ҳар ойда икки босқичда, бошқа харажатлар таркибида харажатлар моддалари бўйича алоҳида сатрда, тегишли шахсий ғазна ҳисобварақларига ўтказган ҳолда қуйидаги тартибда ажратилади:

ҳар ойнинг 5 санасигача бўлган муддатда бирламчи бўғин муассасаларига ойлик режали бюджетдан ажратиладиган маблағлар режалаштирилган суммасининг 85 фоизи миқдорида олдиндан тўлов ўтказилади (иш ҳақи ва унга тенглаштирилган тўловлар, ягона ижтимоий тўлов тўлаш, дори-дармонлар харид қилиш ва бошқа харажатлар учун);

қолган 15 фоизи чорак якунлангандан сўнг кейинги ойнинг 15 санасигача бирламчи бўғин муассасаларининг қонунчилик ҳужжатларида белгиланган фаолиятининг самарадорлик кўрсаткичларини тасдиқлайдиган ҳужжатлар ҳаққонийлиги текширилгандан сўнг амалга оширилади.

18. Бирламчи бўғин муассасалари фаолиятининг самарадорлиги Марказий туман (шаҳар) кўп тармоқли поликлиникалари, шаҳар ва қишлоқ оилавий поликлиникалари, қишлоқ врачлик пунктлари ҳамда врачлар ва ўрта тиббиёт ходимлари фаолияти самарадорлигини рейтинг баҳолаш тартиби тўғрисида низомга мувофиқ белгиланади. Тақдим этилган маълумотлар ҳаққонийлигини назорат қилиш Ўзбекистон Республикаси Соғлиқни сақлаш вазирлиги ва соғлиқни сақлаш ҳудудий бошқарув органлари томонидан амалга оширилади.

19. Ҳар бир бирламчи бўғин муассасасини шартномага мувофиқ унинг учун режалаштирилган бюджет доирасида амалда молиялаштириш ҳажми бириктирилган аҳолига кўрсатилган хизматлар ҳажми ва сифатига боғлиқ, бироқ тасдиқланган харажатлар сметаси ҳажмининг 85 фоизидан кам бўлиши мумкин эмас.

20. Шартнома бўйича қабул қилинган мажбуриятлар тўлиқ ҳажмда якунлангач, ҳисобот даври охирида (чорак, йил) шахсий ғазна ҳисобварағида қолган бюджет маблағлари бирламчи бўғин муассасалари томонидан бюджетга қайтарилмайди. Ушбу маблағлар тиббиёт ташкилотини ривожлантириш ва ходимларни рағбатлантириш учун ишлатилади.

5-боб. Якунловчи қоидалар

21. Ўзбекистон Республикаси Соғлиқни сақлаш вазирлиги ва Молия вазирлиги жон бошига молиялаштириш тизимига тажриба-синов тарзида ўтаётган Сирдарё вилоятининг тиббиёт ташкилотлари фаолиятида вужудга келадиган масалаларни ўзаро ҳамкорликда тартибга солиш ваколатига эга.

22. Ушбу Низом талабларига риоя қилмаганлиги учун мансабдор шахслар Ўзбекистон Республикаси қонунчилик ҳужжатларида белгиланган тартибда жавоб беради.

Бирламчи тиббий-санитария ёрдами муассасаларини Ўзбекистон Республикаси Давлат бюджети маблағлари ҳисобидан жон бошига молиялаштириш тартиби тўғрисидаги вақтинчалик низомга 1-ИЛОВА

20__ йил 1 январдаги ҳолатга кўра туман (шаҳар) аҳолисининг

Т/р Поликлиникалар номи Бириктирилган аҳоли, жами (сони) Шу жумладан: 0 — 12 ой 13 ой — 18 ёш 18 ёш ва ундан катта аҳоли Жами Шу жумладан: 18 — 49 ёшли аёллар Шаҳар (туман) бўйича жами Шаҳар (туман) соғлиқни сақлаш органи раҳбари ______________________________ Ф.И.О. ва имзо Шаҳар (туман) статистика бўлими бошлиғи ______________________________ Ф.И.О. ва имзо

Ўзбекистон Республикасининг Бош вазири А. АРИПОВ

Тошкент ш.,

2020 йил 10 январь,

19-сон

(Қонун ҳужжатлари маълумотлари миллий базаси, 11.01.2020 й., 09/20/19/0047-сон; Қонунчилик маълумотлари миллий базаси, 23.11.2021 й., 09/21/705/1082-сон; 05.04.2022 й., 09/22/153/0266-сон )

lex.uz

Oʻzbekiston Respublikasi Vazirlar Mahkamasining

qarori

ROʻYXATI

VAQTINCHALIK NIZOM

TARKIBI

Oʻzbekiston Respublikasi Sogʻliqni saqlash vazirligining tibbiyot tashkilotlarini moliyalashtirish tizimini yanada takomillashtirish chora-tadbirlari toʻgʻrisida

Oʻzbekiston Respublikasi Prezidentining “Oʻzbekiston Respublikasining sugʻurta bozorini isloh qilish va uning jadal rivojlanishini taʼminlash chora-tadbirlari toʻgʻrisida” 2019-yil 2-avgustdagi PQ-4412-son qarori ijrosini taʼminlash va Oʻzbekiston Respublikasi Sogʻliqni saqlash vazirligi tizimidagi tibbiyot tashkilotlarini moliyalashtirish tizimini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat budjeti mablagʻlari hisobidan jon boshiga va “har bir davolangan holat uchun” moliyalashtirish mexanizmi tajriba-sinov tarzida joriy etiladigan Sirdaryo viloyati tibbiyot tashkilotlarining roʻyxati 1-ilovaga muvofiq tasdiqlansin.

2. Quyidagilar:

Oʻzbekiston Respublikasi Sogʻliqni saqlash vazirligi tizimidagi tibbiyot tashkilotlarini “har bir davolangan holat uchun” Oʻzbekiston Respublikasi Davlat budjeti mablagʻlari hisobidan moliyalashtirish tartibi toʻgʻrisidagi vaqtinchalik nizom 2-ilovaga muvofiq;

Oʻzbekiston Respublikasi Sogʻliqni saqlash vazirligi tizimidagi birlamchi tibbiy-sanitariya yordami muassasalarini Oʻzbekiston Respublikasi Davlat budjeti mablagʻlari hisobidan jon boshiga moliyalashtirish tartibi toʻgʻrisidagi vaqtinchalik nizom 3-ilovaga muvofiq tasdiqlansin.

3. Oʻzbekiston Respublikasi Sogʻliqni saqlash vazirligi Moliya vazirligi bilan birgalikda bir oy muddatda:

Sirdaryo viloyati sogʻliqni saqlash boshqarmasi tuzilmasida Sirdaryo viloyati “sogʻliqni saqlash” tizimidagi muassasalarning shtatlari doirasida 7 kishidan iborat tibbiy xizmatlar boʻyicha davlat xaridlari toʻgʻrisidagi shartnomalarni tuzish va bajarilgan ishlarni qabul qilish boʻlimini tashkil etsin;

moliyalashtirishning yangi mexanizmlariga oʻtayotgan tibbiyot tashkilotlari uchun ctatsionar va ambulator sharoitda bemorlarni davolash xarajatlarini alohida hisobga olish maqsadida mavjud elektron buxgalteriya hisobi va hisobot dasturlarini takomillashtirish choralarini koʻrsin.

4. Oʻzbekiston Respublikasi Sogʻliqni saqlash vazirligi tasdiqlangan tibbiy yordam sifati standartlariga muvofiq orderlar va yoʻllanmalar berish, tibbiy yordam koʻrsatish toʻgʻriligi ustidan nazoratni, shuningdek, moliyalashtirishning yangi mexanizmini joriy etish boʻyicha tajriba-sinov oʻtkazish natijalarining tizimli monitoringi va tahlilini taʼminlasin.

5. Oʻzbekiston Respublikasi Sogʻliqni saqlash vazirligi Moliya vazirligi, Iqtisodiyot va sanoat vazirligi hamda Oʻzbekiston Respublikasi Innovatsion sogʻliqni saqlash milliy palatasi bilan birgalikda 2020-yil 1-dekabrgacha boʻlgan muddatda tajribani amalga oshirishning oraliq yakunlari boʻyicha axborotni, shuningdek, tajriba-sinov natijalariga koʻra amaldagi qonun hujjatlariga oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va A.A. Abduxakimov, Oʻzbekiston Respublikasi sogʻliqni saqlash vaziri A.K. Shadmanov zimmasiga yuklansin.

Vazirlar Mahkamasining 2020-yil 10-yanvardagi 19-son qaroriga 1-ILOVA

Oʻzbekiston Respublikasi Davlat budjeti mablagʻlari hisobidan jon boshiga va “har bir davolangan holat uchun” moliyalashtirish mexanizmi tajriba-sinov tarzida joriy etiladigan Sirdaryo viloyati tibbiyot tashkilotlarining

T/r Tibbiyot tashkiloti nomi 2020-yil 1-apreldan 1 . Viloyat koʻp tarmoqli tibbiyot markazi 2 . Viloyat koʻz dispanseri 3 . Viloyat narkologiya dispanseri 4 . Viloyat kardiologiya dispanseri 5 . Viloyat teri-tanosil dispanseri 6 . Viloyat oʻsma kasalliklar dispanseri 7 . Viloyat endokrinologiya dispanseri 8 . Viloyat yuqumli kasalliklar shifoxonasi 2020-yil 1-iyuldan 1 . Guliston shahar tibbiyot birlashmasi 2 . Shirin shahar tibbiyot birlashmasi 3 . Yangiyer shahar tibbiyot birlashmasi 4 . Boyovut tuman tibbiyot birlashmasi 5 . Guliston shahar tibbiyot birlashmasi 6 . Mirzaobod tuman tibbiyot birlashmasi 7 . Oq oltin tuman tibbiyot birlashmasi 8 . Sardoba tuman tibbiyot birlashmasi 9 . Sayxunobod tuman tibbiyot birlashmasi 10 . Sirdaryo tuman tibbiyot birlashmasi 11 . Xovos tuman tibbiyot birlashmasi 12 . Viloyat bolalar koʻp tarmoqli tibbiyot markazi 13 . Respublika shoshilinch tibbiy yordam ilmiy markazining Sirdaryo filiali 14 . Viloyat perinatal markazi

Vazirlar Mahkamasining 2020-yil 10-yanvardagi 19-son qaroriga 2-ILOVA

1-bob. Umumiy qoidalar

1. Ushbu vaqtinchalik nizom (keyingi oʻrinlarda Nizom deb ataladi) Sirdaryo viloyatining tibbiyot tashkilotlarini Sirdaryo viloyati moliya boshqarmasi, Sirdaryo viloyati sogʻliqni saqlash boshqarmasi (keyingi oʻrinlarda vakolatli organlar deb ataladi) va tibbiyot tashkiloti oʻrtasida davlat xaridlari toʻgʻrisidagi shartnoma (keyingi oʻrinlarda shartnoma deb ataladi) tuzish orqali klinik-xarajat guruhlari asosida har bir davolangan holat uchun Oʻzbekiston Respublikasi Davlat budjeti mablagʻlari hisobidan moliyalashtirish tartibini belgilaydi.

2. Mazkur Nizom “har bir davolangan holat uchun” moliyalashtirish tizimiga tajriba-sinov tarzida oʻtayotgan Sirdaryo viloyatining tibbiyot tashkilotlariga nisbatan qoʻllaniladi.

3. Ushbu Nizomda quyidagi asosiy tushunchalar qoʻllaniladi:

har bir davolangan holat — klinik xizmat koʻrsatish yakunlangan holat boʻlib, mijozga tashhis qoʻyish va davolashning tasdiqlangan bayonnomalariga muvofiq tibbiyot tashkilotida boʻlgan vaqtda koʻrsatilgan tibbiy xizmatlarni oʻz ichiga oladi yoki mazkur bosqichda tibbiy xizmat koʻrsatishning muayyan yakuniy natijasiga erishilishi tufayli xizmat koʻrsatishning yakunlanishi;

klinik-xarajat guruhlari (KXG) — bir xil va oʻxshash klinik vaziyatlar boʻyicha nisbatan teng resurs sarflaydigan va qiymatga ega boʻlgan tibbiy xizmatlar toʻplami;

har bir davolangan holat uchun bazaviy tarif — mijozga tibbiy xizmat koʻrsatish uchun bazaviy xarajatlarning meʼyori boʻlib, KXG asosida bir davolangan holat uchun xizmatlar qiymati hisob-kitobidan kelib chiqib belgilanadi;

davlat xaridlari toʻgʻrisidagi shartnoma — mijozga tibbiy xizmat koʻrsatish uchun vakolatli organlar (davlat buyurtmachisi) va tibbiyot tashkilotlari (davlat xaridlari ijrochisi) oʻrtasida Davlat budjeti va/yoki davlat maqsadli jamgʻarmalari budjetlari mablagʻlari hisobiga tuziladigan bitim;

murakkablik indeksi — KXG boʻyicha har bir davolangan holat uchun oʻrta hisobdagi bazaviy tarif qiymatidan ogʻishish koeffitsiyenti boʻlib, tibbiy xizmat koʻrsatish usuliga va uni koʻrsatishga sarflanadigan xarajatlarga bogʻliq boʻladi;

tibbiy-iqtisodiy ekspertiza — tibbiyot tashkiloti tomonidan toʻlovga taqdim etilgan hisobvaraqlardagi koʻrsatilgan tibbiy xizmatlar hajmining asosliligini ekspert baholash.

2-bob. Moliyalashtirishning prognoz hajmini aniqlash va shartnomalarni tuzish tartibi

4. Moliya yilida tibbiyot tashkilotiga bir shartnoma doirasida ajratilgan mablagʻlar hajmini hisob-kitob qilish uchun Oʻzbekiston Respublikasi Sogʻliqni saqlash vazirligi Moliya vazirligi bilan birgalikda har yili 1-fevralgacha quyidagilarni tasdiqlaydi:

har bir davolangan holat uchun bazaviy tarif va murakkablik indekslari;

statsionar tibbiy yordam olishi rejalashtirilgan mijozlar soni.

5. “Har bir davolangan holat uchun” bazaviy tarifni va murakkablik indeksini hisob-kitob qilish tartibi Oʻzbekiston Respublikasi Sogʻliqni saqlash vazirligi tomonidan Moliya vazirligi bilan kelishilgan holda belgilanadi.

6. Tibbiyot tashkiloti bilan “har bir davolangan holat uchun” shartnoma Oʻzbekiston Respublikasi Davlat budjeti mablagʻlari hisobidan tegishli tibbiyot tashkilotlari uchun ajratilgan mablagʻlar doirasida tuziladi.

7. Vakolatli organlar va tibbiyot tashkiloti oʻrtasida “har bir davolangan holat uchun” boʻyicha koʻrsatilgan xizmatlar haqi oʻzaro tuzilgan shartnomaga muvofiq toʻlanadi.

8. Sogʻliqni saqlashni boshqarish organlari moliya organlari bilan birgalikda tibbiyot tashkilotlari budjetlarini hisoblab chiqadi, shartnomalar loyihalarini tayyorlaydi va ular bilan shartnoma imzolangandan keyin uch kun ichida tibbiyot tashkilotlariga yetkazadi.

9. Moliya yilida shartnomaga muvofiq davolangan holatlar haqini toʻlash uchun mablagʻlar hajmi quyidagi formula boʻyicha aniqlanadi:

MH = N x BT, bunda,

MH — muayyan moliya yili uchun shartnoma boʻyicha mablagʻlar hajmi;

N — moliya yilidagi barcha rejalashtirilgan davolangan holatlar soni;

BT — har bir davolangan holat uchun tasdiqlangan bazaviy tarif. Bunda bazaviy tarif tibbiyot tashkilotini saqlab turish uchun zarur boʻlgan mablagʻlardan shakllantiriladi. Asosiy vositalarni xarid qilish, kapital qurilish va taʼmirlash xarajatlari bazaviy tarif tarkibiga kirmaydi.

10. Tibbiyot tashkilotining daromadlari va xarajatlari smetalari vakolatli organlar bilan tuzilgan shartnomada koʻrsatilgan mablagʻ va boshqa daromadlar koʻzda tutilgan holda tuziladi.

11. Tibbiyot tashkilotlari ajratilgan budjet mablagʻlari va oʻz daromadlari doirasida mustaqil ravishda:

kelgusi yil uchun daromadlar va xarajatlar smetasini ishlab chiqadi va tasdiqlaydi;

muassasa xodimlari mehnatiga haq toʻlash va ularni moddiy ragʻbatlantirish toʻgʻrisidagi nizomni ishlab chiqadi va tasdiqlaydi;

kutilayotgan daromadlar doirasida xodimlar sonini mustaqil belgilaydi, takomillashtirilgan tarif setkasi boʻyicha bazaviy lavozim maoshlaridan, shuningdek, ustama va qoʻshimchalardan kelib chiqqan holda shtat jadvalini tasdiqlaydi.

12. “Har bir davolangan holat uchun” moliyalashtirish tizimiga tajriba-sinov tarzida oʻtayotgan Sirdaryo viloyatining tibbiyot tashkilotlari uchun amaldagi namunaviy shtat normativlari tavsiyaviy xususiyatga ega.

3-bob. Koʻrsatilgan tibbiy xizmatlar uchun tibbiyot tashkilotlari xarajatlarini toʻlash tartibi

13. Oʻzbekiston Respublikasi Davlat budjeti mablagʻlari xisobidan tibbiyot tashkilotlari tomonidan koʻrsatilgan xizmatlarga haq toʻlash vakolatli organlar bilan tuzilgan shartnomada nazarda tutilgan mablagʻning 1/12 qismini quyidagi ketma-ketlikda xarajatlar moddalariga boʻlmagan holda alohida satr bilan amalga oshiriladi:

har oyning 5 sanasigacha boʻlgan muddatda rejalashtirilgan mablagʻning 70 foizi miqdorida tibbiyot tashkilotining xarajatlarini qoplash uchun oldindan toʻlov;

qolgan 30 foiz mablagʻ keyingi oyning 15 sanasigacha shartnoma shartlariga koʻra bajarilgan dastlabki hisobot hujjatlari asosida amalga oshiriladi.

14. Tibbiyot tashkilotlari har chorakda avvalgi chorak uchun dastlabki hisob hujjatlari asosida tibbiy yordam koʻrsatilishi boʻyicha bemorlar reyestrini shaklantiradi, oʻzaro hisob-kitoblarni yakunlash uchun shakllantirilgan hujjatlar asosida taqqoslama dalolatnoma tuzadi, ular tibbiy xizmatlar haqini toʻlash uchun hisobvaraq-faktura bilan birga hisobot davridan keyingi oyning 10 sanasigacha vakolatli organlarga taqdim etiladi.

15. Tibbiyot tashkilotlari tomonidan shartnomada belgilangan majburiyatlarning toʻliq bajarilmasligi natijasida oldindan toʻlov sifatida toʻlangan mablagʻ keyingi xisobot choragida nazarda tutilgan mablagʻ xisobidan kamaytirish orqali ushlab qolinadi.

Bunda shartnomada belgilangan muddatdagi hajmdan ortiq koʻrsatilgan xizmatlar uchun toʻlovni toʻlashga shartnoma doirasida avvalgi davrda bajarilmagan hajmlar hisobiga yoʻl qoʻyiladi.

16. Tibbiyot tashkiloti tomonidan shartnoma boʻyicha qabul qilingan majburiyatlar toʻliq hajmda bajarilganda, hisobot davri yakunida shaxsiy gʻazna hisobvaragʻida qolgan budjet mablagʻlari budjetga qaytarilmaydi. Ushbu mablagʻlar tibbiyot tashkilotini rivojlantirish va xodimlarni ragʻbatlantirish uchun ishlatiladi.

17. Shartnomada koʻrsatilgan tibbiy xizmatlarning hajmi va qiymati yoki boshqa omillarning taʼsiri natijasida oʻzgartirish va qoʻshimchalar kiritish taraflarning kelishuviga asosan amalga oshiriladi.

4-bob. Tibbiy-iqtisodiy ekspertiza

18. Tibbiy iqtisodiy hujjatlarning toʻgʻri shakllantirilganligini nazorat qilish Oʻzbekiston Respublikasi Sogʻliqni saqlash vazirligi va uning hududiy boshqarmalari tomonidan tibbiy-iqtisodiy ekspertizadan oʻtkazish orqali amalga oshiriladi.

19. Tibbiy-iqtisodiy ekspertiza quyidagi parametrlar boʻyicha birlamchi tibbiy hujjatlar asosida har chorakda oʻtkaziladi:

davolangan bemorlar reyestrining toʻgʻri toʻldirilganligi;

mijozni tibbiyot tashkilotiga joylashtirishning asosliligi;

mijozni davolashda tashhis qoʻyish va davolash sifati standartlariga rioya etilganligi;

tibbiy xizmatlar haqini toʻlash uchun taqdim etilgan hisobvaraq-fakturadagi summalarning davolangan bemorlar reyestridagi summalarga muvofiqligi.

20. Tibbiy yordam koʻrsatishda tashhis qoʻyish va davolash sifatiga doir belgilangan standartlarga mos kelmagan holatlar aniqlangan taqdirda, tibbiy-iqtisodiy ekspertiza natijalari belgilangan tartibda rasmiylashtiriladi va vakolatli shaxslar tomonidan imzolanadi.

21. Tibbiy-iqtisodiy ekspertiza natijalariga koʻra tibbiy xizmat hajmlarini sunʼiy oshirib koʻrsatish holatlari aniqlanganda, ortiqcha toʻlangan mablagʻlar keyingi toʻlovlarda ushlab qolinadi.

22. Tibbiy-iqtisodiy ekspertiza hujjatlarining haqqoniyligi ustidan nazorat vakolatli organlar tomonidan amalga oshiriladi.

5-bob. Yakunlovchi qoidalar

23. Oʻzbekiston Respublikasi Sogʻliqni saqlash vazirligi va Moliya vazirligi “har bir davolangan holat uchun” moliyalashtirish tizimiga tajriba-sinov tarzida oʻtayotgan Sirdaryo viloyatining tibbiyot tashkilotlari faoliyatida vujudga keladigan masalalarni oʻzaro hamkorlikda tartibga solish vakolatiga ega.

24. Ushbu Nizom talablariga rioya qilmaganligi uchun mansabdor shaxslar Oʻzbekiston Respublikasi qonunchilik hujjatlarida belgilangan tartibda javob beradi.

Vazirlar Mahkamasining 2020-yil 10-yanvardagi 19-son qaroriga 3-ILOVA

1-bob. Umumiy qoidalar

1. Ushbu Vaqtinchalik nizom (keyingi oʻrinlarda Nizom deb ataladi) Sirdaryo viloyatidagi qishloq vrachlik punktlari, qishloq va shahar oilaviy poliklinikalari, shuningdek, markaziy koʻp tarmoqli poliklinikalarni (keyingi oʻrinlarda birlamchi boʻgʻin muassasalari deb ataladi) bir kishi hisobiga xarajatlar normatividan kelib chiqib, shartnomalar asosida moliyalashtirish tartibini belgilaydi.

2. Mazkur Nizom jon boshiga moliyalashtirish tizimiga oʻtayotgan Sirdaryo viloyatining birlamchi boʻgʻin tashkilotlariga nisbatan qoʻllaniladi.

3. Ushbu Nizomda quyidagi asosiy tushunchalar qoʻllaniladi:

davlat xaridlari toʻgʻrisidagi shartnoma — aholiga tibbiy xizmat koʻrsatish uchun bir tarafdan vakolatli organlar (davlat buyurtmachisi) va boshqa tarafdan tibbiyot tashkilotlari (davlat xaridlari ijrochisi) oʻrtasida Davlat budjeti va/yoki davlat maqsadli jamgʻarmalari budjetlari mablagʻlari hisobiga kelishilgan hajmlarda yozma shaklda tuziladigan bitim;

tuzatish koeffitsiyenti — maʼlum bir muhim omillarni (aholi jinsi va yoshi hamda zichligi) hisobga olgan holda, bazaviy xarajatlar meʼyorini tuzatish uchun ishlatiladigan koyeffitsiyentlar;

biriktirilgan aholi — belgilangan tartibda birlamchi boʻgʻin muassasasida tibbiy xizmat olish uchun roʻyxatdan oʻtgan aholi;

bazaviy xarajatlarning meʼyori (aholi jon boshiga moliyalashtirish) — Oʻzbekiston Respublikasining hududida bir fuqaroga birlamchi tibbiy-sanitariya yordami muassasalarida tibbiy xizmat koʻrsatish uchun xarajatlarning yagona standarti, ushbu muassasalarning yil davomida xizmatlarning barcha hajmlari uchun toʻlov miqdorini aniqlashda foydalaniladi.

4. Birlamchi boʻgʻin muassasalarida Oʻzbekiston Respublikasi Davlat budjeti mablagʻlari hisobiga tibbiy yordam koʻrsatish amaldagi qonunchilik hujjatlariga muvofiq amalga oshiriladi.

2-bob. Birlamchi tibbiy-sanitariya yordami muassasalariga aholini biriktirish tartibi

5. Aholi birlamchi boʻgʻin muassasalariga tegishli tuman (shahar) tibbiyot birlashmalari rahbarining buyrugʻi bilan biriktiriladi.

6. Birlamchi boʻgʻin muassasalariga biriktirilgan aholi soni va tarkibi boʻyicha axborot tegishli tuman (shahar) tibbiyot birlashmalari rahbari tomonidan tuziladi, aholining umumiy soni esa hududiy statistika organi (tuman/shahar) rahbari tomonidan tasdiqlanadi.

7. Biriktirish rejalashtirilgan davr boshida birlamchi boʻgʻin muassasalari tomonidan xizmat koʻrsatiladigan uchastkalar asosida 1-ilovaga muvofiq shakl boʻyicha amalga oshiriladi.

3-bob. Birlamchi boʻgʻin muassasalari budjetini aniqlash

8. Birlamchi boʻgʻin muassasalarining budjeti bazaviy xarajatlarning meʼyori asosida rejalashtiriladi.

9. Har bir birlamchi boʻgʻin muassasasini yillik moliyalashtirish hajmi bazaviy xarajatlarning meʼyori va birlamchi boʻgʻin muassasasiga biriktirilgan aholi soni hisob-kitobidan kelib chiqib, quyidagi formula boʻyicha tuzatish koeffitsiyentlaridan foydalanilgan holda aniqlanadi:

MYH = XBM reja x BAS x HTK, bunda:

MYH — rejalashtirilgan yilda hudud birlamchi boʻgʻin muassasalarini yillik moliyalashtirish hajmi;

XBM reja — rejalashtirilgan yildagi bazaviy xarajatlarning meʼyori;

BAS — rejalashtirilgan yil boshida birlamchi boʻgʻin muassasasiga biriktirilgan hududdagi aholi soni;

HTK — alohida hududlarda birlamchi boʻgʻin muassasalarini moliyalashtirish imkoniyatini hisobga oladigan hududiy tuzatish koeffitsiyenti.

Borish qiyin boʻlgan hududlar roʻyxatlari va murakkab geografik sharoitlarda ishlash uchun qoʻshimcha haqlarning aniq miqdorlari qonunchilik hujjatlarida belgilanadi.

10. Bazaviy xarajatlarning meʼyorini aniqlashda birlamchi boʻgʻin muassasalarining imtiyozli retseptlar boʻyicha beriladigan dori-darmonlar, shuningdek, kapital taʼmirlash va qurilish hamda qimmat baho uskunalarni xarid qilish xarajatlari nazarda tutilmaydi.

11. Birlamchi boʻgʻin muassasalarini saqlab turish uchun xarajatlar har oyda oʻrtacha taxminan yillik budjetning 12 dan bir qismi miqdorida ayrim tibbiy xizmat turlariga boʻlgan ehtiyojlar mavsumiy oʻzgarishi hisobga olingan holda moliyalashtiriladi. Har oy uchun moliyalashtirishning prognoz hajmlari taraflar oʻrtasida tuziladigan shartnomalarda belgilanadi. Birlamchi boʻgʻin muassasalari vafot etgan, hisobdan chiqarilgan va yangi biriktirilgan aholini hisobga olgan holda, biriktirilgan aholi haqida har chorakda sogʻliqni saqlashni boshqarish organlarini va moliya organlarini xabardor qiladi.

12. Alohida birlamchi boʻgʻin muassasasini moliyalashtirishning yillik hajmi bazaviy xarajatlarning meʼyori hisob-kitobi va birlamchi boʻgʻin muassasalariga biriktirilgan aholi sonidan kelib chiqib, tuzatish koeffitsiyentlaridan (aholi jinsi va yoshi hamda zichligi) foydalangan holda aniqlanadi.

13. Yilllik mablagʻlar hajmi bazaviy xarajatlarning meʼyori belgilangan tartibda ish haqlarini oshishi hamda kommunal xizmatlarning tariflarini oʻzgarishi hisobiga qayta koʻrib chiqilishi mumkin.

14. Sirdaryo viloyati sogʻliqni saqlash boshqarmasi hududiy moliya boshqarmasi bilan kelishilgan holda, birlamchi boʻgʻin muassasalari budjetlarini hisoblab chiqadi hamda tuman (shahar) moliya organlariga belgilangan tartibda yetkazadi.

15. Birlamchi boʻgʻin muassasalari ajratilgan budjet mablagʻlari va oʻz daromadlari doirasida mustaqil ravishda:

kelgusi yil uchun daromadlar va xarajatlar smetasini ishlab chiqadi va tasdiqlaydi;

muassasa xodimlari mehnatiga haq toʻlash va ularni moddiy ragʻbatlantirish toʻgʻrisidagi nizomni ishlab chiqadi va tasdiqlaydi;

Tajriba doirasidagi tibbiyot tashkilotlari uchun amaldagi namunaviy shtat normativlari tavsiyaviy xususiyatga ega.

4-bob. Koʻrsatilgan xizmatlar uchun birlamchi boʻgʻin muassasalari xarajatlari haqini toʻlash tartibi

16. Birlamchi boʻgʻin muassasalarining tibbiy xizmat haqi har oyda (xarajatlar guruhini ajratmay) tasdiqlangan xarajatlar smetalariga muvofiq, shuningdek, 2-ilovaga muvofiq shartnomada belgilangan kelishilgan tibbiy yordam hajmlari qiymati doirasida toʻlanadi.

17. Tibbiy xizmatlar uzluksiz koʻrsatilishini va joriy xarajatlar qoplanishini taʼminlash maqsadida birlamchi boʻgʻin muassasalariga budjet mablagʻlari har oyda ikki bosqichda, boshqa xarajatlar tarkibida xarajatlar moddalari boʻyicha alohida satrda, tegishli shaxsiy gʻazna hisobvaraqlariga oʻtkazgan holda quyidagi tartibda ajratiladi:

har oyning 5 sanasigacha boʻlgan muddatda birlamchi boʻgʻin muassasalariga oylik rejali budjetdan ajratiladigan mablagʻlar rejalashtirilgan summasining 85 foizi miqdorida oldindan toʻlov oʻtkaziladi (ish haqi va unga tenglashtirilgan toʻlovlar, yagona ijtimoiy toʻlov toʻlash, dori-darmonlar xarid qilish va boshqa xarajatlar uchun);

qolgan 15 foizi chorak yakunlangandan soʻng keyingi oyning 15 sanasigacha birlamchi boʻgʻin muassasalarining qonunchilik hujjatlarida belgilangan faoliyatining samaradorlik koʻrsatkichlarini tasdiqlaydigan hujjatlar haqqoniyligi tekshirilgandan soʻng amalga oshiriladi.

18. Birlamchi boʻgʻin muassasalari faoliyatining samaradorligi Markaziy tuman (shahar) koʻp tarmoqli poliklinikalari, shahar va qishloq oilaviy poliklinikalari, qishloq vrachlik punktlari hamda vrachlar va oʻrta tibbiyot xodimlari faoliyati samaradorligini reyting baholash tartibi toʻgʻrisida nizomga muvofiq belgilanadi. Taqdim etilgan maʼlumotlar haqqoniyligini nazorat qilish Oʻzbekiston Respublikasi Sogʻliqni saqlash vazirligi va sogʻliqni saqlash hududiy boshqaruv organlari tomonidan amalga oshiriladi.

19. Har bir birlamchi boʻgʻin muassasasini shartnomaga muvofiq uning uchun rejalashtirilgan budjet doirasida amalda moliyalashtirish hajmi biriktirilgan aholiga koʻrsatilgan xizmatlar hajmi va sifatiga bogʻliq, biroq tasdiqlangan xarajatlar smetasi hajmining 85 foizidan kam boʻlishi mumkin emas.

20. Shartnoma boʻyicha qabul qilingan majburiyatlar toʻliq hajmda yakunlangach, hisobot davri oxirida (chorak, yil) shaxsiy gʻazna hisobvaragʻida qolgan budjet mablagʻlari birlamchi boʻgʻin muassasalari tomonidan budjetga qaytarilmaydi. Ushbu mablagʻlar tibbiyot tashkilotini rivojlantirish va xodimlarni ragʻbatlantirish uchun ishlatiladi.

5-bob. Yakunlovchi qoidalar

21. Oʻzbekiston Respublikasi Sogʻliqni saqlash vazirligi va Moliya vazirligi jon boshiga moliyalashtirish tizimiga tajriba-sinov tarzida oʻtayotgan Sirdaryo viloyatining tibbiyot tashkilotlari faoliyatida vujudga keladigan masalalarni oʻzaro hamkorlikda tartibga solish vakolatiga ega.

22. Ushbu Nizom talablariga rioya qilmaganligi uchun mansabdor shaxslar Oʻzbekiston Respublikasi qonunchilik hujjatlarida belgilangan tartibda javob beradi.

Birlamchi tibbiy-sanitariya yordami muassasalarini Oʻzbekiston Respublikasi Davlat budjeti mablagʻlari hisobidan jon boshiga moliyalashtirish tartibi toʻgʻrisidagi vaqtinchalik nizomga 1-ILOVA

20__ yil 1-yanvardagi holatga koʻra tuman (shahar) aholisining

T/r Poliklinikalar nomi Biriktirilgan aholi, jami (soni) Shu jumladan: 0 — 12 oy 13 oy — 18 yosh 18 yosh va undan katta aholi Jami Shu jumladan: 18 — 49 yoshli ayollar Shahar (tuman) boʻyicha jami Shahar (tuman) sogʻliqni saqlash organi rahbari ______________________________ F.I.O. va imzo Shahar (tuman) statistika boʻlimi boshligʻi ______________________________ F.I.O. va imzo

Oʻzbekiston Respublikasining Bosh vaziri A. ARIPOV

Toshkent sh.,

2020-yil 10-yanvar,

19-son

(Qonun hujjatlari maʼlumotlari milliy bazasi, 11.01.2020-y., 09/20/19/0047-son; Qonunchilik maʼlumotlari milliy bazasi, 23.11.2021-y., 09/21/705/1082-son; 05.04.2022-y., 09/22/153/0266-son )

lex.uz