📅 2020-yil 30-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 30 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 января 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 30 January 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«Ўзбекинвест» экспорт-импорт миллий суғурта компаниясининг фаолиятини янада такомиллаштириш чора-тадбирлари тўғрисида
Ўзбекистон Республикаси Президентининг «Экспорт фаолиятини молиялаштириш ва суғурта ҳимояси механизмларини кенгайтириш чора-тадбирлари тўғрисида» 2019 йил 24 майдаги ПҚ-4337-сон қарорини бажариш мақсадида Вазирлар Маҳкамаси қарор қилади:
1. Ўзбекистон Республикаси Молия вазирлиги, Давлат активларини бошқариш агентлиги, Ташқи иқтисодий фаолият миллий банки, Инвестициялар ва ташқи савдо вазирлигининг:
«Ўзбекинвест» экспорт-импорт миллий суғурта компаниясини «Ўзбекинвест» экспорт-импорт суғурта компанияси» акциядорлик жамияти (кейинги ўринларда «Ўзбекинвест» ЭИСК» АЖ деб аталади) этиб қайта ташкил этиш;
«Ўзбекинвест» ЭИСК» АЖ устав капиталидаги давлат акциялари (улушлари) пакети бўйича акциядор ҳуқуқини Ўзбекистон Республикаси Инвестициялар ва ташқи савдо вазирлигига ўтказиш тўғрисидаги таклифларига розилик берилсин.
2. «Ўзбекинвест» ЭИСК» АЖнинг асосий вазифалари қуйидагилар эканлиги маълумот учун қабул қилинсин:
экспортни суғурта билан қўллаб-қувватлаш бўйича комплекс хизматларни, шу жумладан харидорнинг кредити, қисқа муддатли дебиторлик қарзи, етказиб берувчининг кредити, тасдиқланган аккредитив, экспортчининг айланма маблағларини тўлдириш учун берилган кредит, экспорт факторингини ва экспортни суғурта билан қўллаб-қувватлашнинг бошқа инструментларини тақдим этиш;
хорижий ва маҳаллий инвесторлар томонидан Ўзбекистон Республикаси иқтисодиётига киритиладиган тўғридан-тўғри ва портфель инвестицияларнинг комплекс суғурта ҳимоясини таъминлаш;
Ўзбекистон Республикасининг суғурта фаолияти тўғрисидаги қонунчилигига мувофиқ бошқа суғурталаш турларини амалга ошириш;
хорижий мамлакатларнинг экспорт-кредит агентликлари, суғурта ва қайта суғурта компаниялари билан тижорат ва сиёсий хатарларни суғурталаш бўйича ҳамкорлик ўрнатиш;
халқаро, хорижий ва маҳаллий суғурта ташкилотлари билан ҳамкорликни ривожлантириш, биргаликда суғурта ва қайта суғурта операцияларини амалга ошириш.
3. Белгилансинки:
«Ўзбекинвест» ЭИСК» АЖ устав капитали қайта ташкил этилаётган «Ўзбекинвест» экспорт-импорт миллий суғурта компанияси мол-мулкининг қолдиқ қийматини ўтказиш ҳисобига шакллантирилади;
«Ўзбекинвест» ЭИСК» АЖ устав капиталидаги давлат акциялари пакетига бўлган ҳуқуқларини рўйхатдан ўтказиш ва уларни сақлаш билан боғлиқ харажатлар Ўзбекистон Республикаси Инвестициялар ва ташқи савдо вазирлигининг маблағлари ҳисобидан амалга оширилади.
4. Ўзбекистон Республикаси Инвестициялар ва ташқи савдо вазирлиги бир ой муддатда:
«Ўзбекинвест» ЭИСК» АЖнинг узоқ муддатга мўлжалланган ривожлантириш стратегиясини тасдиқласин;
«Ўзбекинвест» ЭИСК» АЖнинг устави ишлаб чиқилишини ва тасдиқланишини, шунингдек, унинг давлат рўйхатидан ўтказилишини таъминласин.
5. «Ўзбекинвест» ЭИСК» АЖга белгиланган тартибда хорижий банкларда жорий ҳисобварақларини очиш ва банк депозитлари бўйича тўловларни амалга ошириш учун улар бўйича операциялар ўтказиш, суғурта тўловлари, суғурта ва инвестиция фаолияти билан боғлиқ бошқа операцияларни амалга оширишга рухсат берилсин.
6. «Ўзбекинвест» ЭИСК» АЖ ижро органида раҳбар ва раҳбар ўринбосари лавозимларига номзодларни кўрсатиш Ўзбекистон Республикаси Вазирлар Маҳкамасининг «Давлат активларини бошқариш тизимини янада такомиллаштириш чора-тадбирлари тўғрисида» 2019 йил 26 апрелдаги 356-сон қарорига мувофиқ амалга оширилиши маълумот учун қабул қилинсин.
7. Ўзбекистон Республикаси Инвестициялар ва ташқи савдо вазирлиги Адлия вазирлиги, бошқа манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
8. Ўзбекистон Республикаси Ҳукуматининг иловага мувофиқ баъзи қарорлари ўз кучини йўқотган деб ҳисоблансин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари ҳамда Ўзбекистон Республикаси инвестициялар ва ташқи савдо вазири С.У. Умурзоқов зиммасига юклансин.
Вазирлар Маҳкамасининг 2020 йил 30 январдаги 46-сон қарорига ИЛОВА
Ўзбекистон Республикаси Ҳукуматининг ўз кучини йўқотган деб эътироф этилаётган айрим қарорлари
1. Вазирлар Маҳкамасининг «Ўзбекинвест» экспорт-импорт миллий суғурта компанияси фаолиятини ташкил этиш масалалари тўғрисида» 1997 йил 28 февралдаги 113-сон қарори (Ўзбекистон Республикаси ҚТ, 1997 й., 2-сон, 8-модда).
2. Вазирлар Маҳкамасининг «Суғурта хизматлари бозорини янада ривожлантириш чора-тадбирлари тўғрисида» 2002 йил 27 ноябрдаги 413-сон қарорига 3-илованинг 7-банди (Ўзбекистон Республикаси ҚТ, 2002 й., 11-сон, 72-модда).
4. Вазирлар Маҳкамасининг «Ўзбекистон Республикаси ҳукуматининг айрим қарорларига ўзгартиришлар киритиш тўғрисида» 2017 йил 14 июлдаги 499-сон қарорига (Ўзбекистон Республикаси Президентининг «Ташқи савдо соҳасида бошқарув тизимини такомиллаштириш чора-тадбирлари тўғрисида» 2017 йил 13 апрелдаги ПФ-5012-сон фармони ва Ўзбекистон Республикаси Президентининг «Ўзбекистон Республикаси ташқи савдо вазирлиги фаолиятини ташкил этиш чора-тадбирлари тўғрисида» 2017 йил 13 апрелдаги ПФ-2887-сон қарори) илованинг 6-банди (Ўзбекистон Республикаси ҚТ, 2017 й., 7-сон, 146-модда).
Ўзбекистон Республикасининг Бош вазири А. АРИПОВ
Тошкент ш.,
2020 йил 30 январь,
46-сон
Oʻzbekiston Respublikasi Vazirlar Mahkamasining
qarori
“Oʻzbekinvest” eksport-import milliy sugʻurta kompaniyasining faoliyatini yanada takomillashtirish chora-tadbirlari toʻgʻrisida
Oʻzbekiston Respublikasi Prezidentining “Eksport faoliyatini moliyalashtirish va sugʻurta himoyasi mexanizmlarini kengaytirish chora-tadbirlari toʻgʻrisida” 2019-yil 24-maydagi PQ-4337-son qarorini bajarish maqsadida Vazirlar Mahkamasi qaror qiladi:
1. Oʻzbekiston Respublikasi Moliya vazirligi, Davlat aktivlarini boshqarish agentligi, Tashqi iqtisodiy faoliyat milliy banki, Investitsiyalar va tashqi savdo vazirligining:
“Oʻzbekinvest” eksport-import milliy sugʻurta kompaniyasini “Oʻzbekinvest” eksport-import sugʻurta kompaniyasi” aksiyadorlik jamiyati (keyingi oʻrinlarda “Oʻzbekinvest” EISK” AJ deb ataladi) etib qayta tashkil etish;
“Oʻzbekinvest” EISK” AJ ustav kapitalidagi davlat aksiyalari (ulushlari) paketi boʻyicha aksiyador huquqini Oʻzbekiston Respublikasi Investitsiyalar va tashqi savdo vazirligiga oʻtkazish toʻgʻrisidagi takliflariga rozilik berilsin.
2. “Oʻzbekinvest” EISK” AJning asosiy vazifalari quyidagilar ekanligi maʼlumot uchun qabul qilinsin:
eksportni sugʻurta bilan qoʻllab-quvvatlash boʻyicha kompleks xizmatlarni, shu jumladan xaridorning krediti, qisqa muddatli debitorlik qarzi, yetkazib beruvchining krediti, tasdiqlangan akkreditiv, eksportchining aylanma mablagʻlarini toʻldirish uchun berilgan kredit, eksport faktoringini va eksportni sugʻurta bilan qoʻllab-quvvatlashning boshqa instrumentlarini taqdim etish;
xorijiy va mahalliy investorlar tomonidan Oʻzbekiston Respublikasi iqtisodiyotiga kiritiladigan toʻgʻridan toʻgʻri va portfel investitsiyalarning kompleks sugʻurta himoyasini taʼminlash;
Oʻzbekiston Respublikasining sugʻurta faoliyati toʻgʻrisidagi qonunchiligiga muvofiq boshqa sugʻurtalash turlarini amalga oshirish;
xorijiy mamlakatlarning eksport-kredit agentliklari, sugʻurta va qayta sugʻurta kompaniyalari bilan tijorat va siyosiy xatarlarni sugʻurtalash boʻyicha hamkorlik oʻrnatish;
xalqaro, xorijiy va mahalliy sugʻurta tashkilotlari bilan hamkorlikni rivojlantirish, birgalikda sugʻurta va qayta sugʻurta operatsiyalarini amalga oshirish.
3. Belgilansinki:
“Oʻzbekinvest” EISK” AJ ustav kapitali qayta tashkil etilayotgan “Oʻzbekinvest” eksport-import milliy sugʻurta kompaniyasi mol-mulkining qoldiq qiymatini oʻtkazish hisobiga shakllantiriladi;
“Oʻzbekinvest” EISK” AJ ustav kapitalidagi davlat aksiyalari paketiga boʻlgan huquqlarini roʻyxatdan oʻtkazish va ularni saqlash bilan bogʻliq xarajatlar Oʻzbekiston Respublikasi Investitsiyalar va tashqi savdo vazirligining mablagʻlari hisobidan amalga oshiriladi.
4. Oʻzbekiston Respublikasi Investitsiyalar va tashqi savdo vazirligi bir oy muddatda:
“Oʻzbekinvest” EISK” AJning uzoq muddatga moʻljallangan rivojlantirish strategiyasini tasdiqlasin;
“Oʻzbekinvest” EISK” AJning ustavi ishlab chiqilishini va tasdiqlanishini, shuningdek, uning davlat roʻyxatidan oʻtkazilishini taʼminlasin.
5. “Oʻzbekinvest” EISK” AJga belgilangan tartibda xorijiy banklarda joriy hisobvaraqlarini ochish va bank depozitlari boʻyicha toʻlovlarni amalga oshirish uchun ular boʻyicha operatsiyalar oʻtkazish, sugʻurta toʻlovlari, sugʻurta va investitsiya faoliyati bilan bogʻliq boshqa operatsiyalarni amalga oshirishga ruxsat berilsin.
6. “Oʻzbekinvest” EISK” AJ ijro organida rahbar va rahbar oʻrinbosari lavozimlariga nomzodlarni koʻrsatish Oʻzbekiston Respublikasi Vazirlar Mahkamasining “Davlat aktivlarini boshqarish tizimini yanada takomillashtirish chora-tadbirlari toʻgʻrisida” 2019-yil 26-apreldagi 356-son qaroriga muvofiq amalga oshirilishi maʼlumot uchun qabul qilinsin.
7. Oʻzbekiston Respublikasi Investitsiyalar va tashqi savdo vazirligi Adliya vazirligi, boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
8. Oʻzbekiston Respublikasi Hukumatining ilovaga muvofiq baʼzi qarorlari oʻz kuchini yoʻqotgan deb hisoblansin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari hamda Oʻzbekiston Respublikasi investitsiyalar va tashqi savdo vaziri S.U. Umurzoqov zimmasiga yuklansin.
Vazirlar Mahkamasining 2020-yil 30-yanvardagi 46-son qaroriga ILOVA
Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan ayrim qarorlari
1. Vazirlar Mahkamasining “Oʻzbekinvest” eksport-import milliy sugʻurta kompaniyasi faoliyatini tashkil etish masalalari toʻgʻrisida” 1997-yil 28-fevraldagi 113-son qarori (Oʻzbekiston Respublikasi QT, 1997-y., 2-son, 8-modda).
2. Vazirlar Mahkamasining “Sugʻurta xizmatlari bozorini yanada rivojlantirish chora-tadbirlari toʻgʻrisida” 2002-yil 27-noyabrdagi 413-son qaroriga 3-ilovaning 7-bandi (Oʻzbekiston Respublikasi QT, 2002-y., 11-son, 72-modda).
4. Vazirlar Mahkamasining “Oʻzbekiston Respublikasi hukumatining ayrim qarorlariga oʻzgartirishlar kiritish toʻgʻrisida” 2017-yil 14-iyuldagi 499-son qaroriga (Oʻzbekiston Respublikasi Prezidentining “Tashqi savdo sohasida boshqaruv tizimini takomillashtirish chora-tadbirlari toʻgʻrisida” 2017-yil 13-apreldagi PF-5012-son farmoni va Oʻzbekiston Respublikasi Prezidentining “Oʻzbekiston Respublikasi tashqi savdo vazirligi faoliyatini tashkil etish chora-tadbirlari toʻgʻrisida” 2017-yil 13-apreldagi PF-2887-son qarori) ilovaning 6-bandi (Oʻzbekiston Respublikasi QT, 2017-y., 7-son, 146-modda).
Oʻzbekiston Respublikasining Bosh vaziri A. ARIPOV
Toshkent sh.,
2020-yil 30-yanvar,
46-son