📅 2020-yil 30-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 30 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 января 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 30 January 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ингичка толали пахта етиштиришни самарали ташкил қилиш, янги навларни кўпайтириш ва рағбатлантириш механизмини жорий этиш тўғрисида
Ҳудудларнинг тупроқ-иқлим шароитларини инобатга олган ҳолда ингичка толали ғўзанинг тола сифати юқори бўлган, касаллик ва зараркунандаларга чидамли, тезпишар, серҳосил навларини яратиш, уларнинг экин майдонларини кенгайтириш, янги ва истиқболли навлари уруғларини кўпайтириш ҳамда етиштириш агротехнологияларини ишлаб чиқишни рағбатлантириш механизмини жорий этиш мақсадида Вазирлар Маҳкамаси қарор қилади:
1. Ўзбекистон Республикаси Қишлоқ хўжалиги вазирлиги, Иқтисодиёт ва саноат вазирлиги, Молия вазирлиги ва «Ўзтўқимачиликсаноат» уюшмасининг:
2020 йил ҳосилидан бошлаб Сурхондарё, Қашқадарё, Бухоро ва Навоий вилоятларида ингичка толали ғўза навларини жойлаштириш ва етиштиришни кенг йўлга қўйиш;
ингичка толали ғўзанинг “истиқболли нав” сифатида экиб келинаётган навларини уларнинг ишлаб чиқаришдаги кўрсаткичларидан келиб чиққан ҳолда Ўзбекистон Республикаси ҳудудида экиш учун тавсия қилинган қишлоқ хўжалиги экинларининг давлат реестрига (кейинги ўринларда давлат реестри деб аталади) киритиш;
Сурхондарё вилоятида 40 минг гектар майдонда ингичка толали ғўза навларини илмий асосланган ҳолда жойлаштириш;
Қашқадарё вилоятида 6 500 гектар, Бухоро вилоятида 5 000 гектар, Навоий вилоятида 1 000 гектар майдонга ингичка толали ғўза навларини жойлаштириш ва кенг ишлаб чиқариш синовини олиб бориш, ижобий натижалар олинган тақдирда етиштирилган пахта ҳосилини қайта ишлаш учун замонавий технологиялар билан жиҳозланган қайта ишлаш корхоналарини ташкил этиш тўғрисидаги таклифлари маъқуллансин.
2. Ўзбекистон Республикаси Қишлоқ хўжалиги вазирлиги ва Вазирлар Маҳкамаси ҳузуридаги Агросаноат мажмуи устидан назорат қилиш инспекциясига ҳар йилги талабдан келиб чиққан ҳолда:
дастлабки элита-уруғчилик хўжаликларида кўпайтирилаётган ингичка толали ғўзанинг эртапишар, тола ҳосилдорлиги ва сифати юқори бўлган навларининг оригинал уруғларини изчил кўпайтириш ҳамда янги ва истиқболли навлар орасидан энг яхшиларини танлаб бориш. Бунда экиш учун тавсия қилинаётган ингичка толали ғўза навларининг нав тозалигига алоҳида эътибор қаратиш;
республика ҳудудларининг тупроқ-иқлим шароитига мос, эртапишар, тола ҳосилдорлиги ва сифати юқори бўлган ингичка толали ғўза навларидан етарли миқдорда уруғлик материалларини тайёрлаш;
уруғликларни етиштириш схемаларининг технологик талабларига мувофиқ ингичка толали ғўза навларининг сифатли уруғлик пахта хомашёсини ва чигитларини ишлаб чиқариш вазифалари юклансин.
3. Ўзбекистон Республикаси Қишлоқ хўжалиги вазирлиги Инновацион ривожланиш вазирлиги билан биргаликда икки ой муддатда Пахта селекцияси, уруғчилиги ва етиштириш агротехнологиялари илмий-тадқиқот институтида «Ингичка толали ғўза навлари селекцияси ва уруғчилиги» лабораториясини ташкил этсин ва унинг фаолиятини йўлга қўйсин.
4. Ўзбекистон Республикаси Инновацион ривожланиш вазирлиги, Фанлар академияси, Қишлоқ хўжалиги вазирлиги ҳузуридаги Қишлоқ хўжалиги ва озиқ-овқат таъминоти илмий-ишлаб чиқариш маркази бир ой муддатда ингичка толали ғўза навлари генетикаси, селекцияси, уруғчилиги ва етиштириш агротехнологияларини ва ингичка толали пахта хомашёсини тозалаш ускуналарини такомиллаштириш бўйича давлат илмий дастурлари грант танловларини ўтказсин ва танлов ғолиби бўлган илмий лойиҳаларнинг 2020 йилдан бошлаб молиялаштирилишини таъминласин.
5. Ўзбекистон Республикаси Қишлоқ хўжалиги вазирлиги, «Ўзтўқимачиликсаноат» уюшмаси бир ой муддатда пахта-тўқимачилик ишлаб чиқаришлари ва кластерлар билан илмий-тадқиқот институтлари ўртасида илмий ва амалий ҳамкорлик қилиш бўйича шартнома тузиш механизмини ишлаб чиқсин ва жорий этсин.
6. Ўзбекистон Республикаси Қишлоқ хўжалиги вазирлиги Инновацион ривожланиш вазирлиги билан биргаликда республикада яратилган ғўза навлари оригинаторлари тизимидаги дастлабки элита уруғчилик хўжаликлари ҳамда ингичка толали ғўзанинг давлат реестрига киритилган ва истиқболли навлари уруғларини кўпайтириш билан шуғулланувчи элита уруғчилик хўжаликларининг фаолияти самарадорлигини ошириш ва уларнинг лабораторияларини замонавий асбоб-ускунлар билан жиҳозлаш чора-тадбирларини кўрсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг Аграр ва озиқ – овқат соҳаларини ривожлантириш масалалари бўйича маслаҳатчиси А.Д. Вахабов ва Ўзбекистон Республикаси қишлоқ хўжалиги вазири Ж.А. Ходжаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 30 январь,
47-сон
Oʻzbekiston Respublikasi Vazirlar Mahkamasining
qarori
Ingichka tolali paxta yetishtirishni samarali tashkil qilish, yangi navlarni koʻpaytirish va ragʻbatlantirish mexanizmini joriy etish toʻgʻrisida
Hududlarning tuproq-iqlim sharoitlarini inobatga olgan holda ingichka tolali gʻoʻzaning tola sifati yuqori boʻlgan, kasallik va zararkunandalarga chidamli, tezpishar, serhosil navlarini yaratish, ularning ekin maydonlarini kengaytirish, yangi va istiqbolli navlari urugʻlarini koʻpaytirish hamda yetishtirish agrotexnologiyalarini ishlab chiqishni ragʻbatlantirish mexanizmini joriy etish maqsadida Vazirlar Mahkamasi qaror qiladi:
1. Oʻzbekiston Respublikasi Qishloq xoʻjaligi vazirligi, Iqtisodiyot va sanoat vazirligi, Moliya vazirligi va “Oʻztoʻqimachiliksanoat” uyushmasining:
2020-yil hosilidan boshlab Surxondaryo, Qashqadaryo, Buxoro va Navoiy viloyatlarida ingichka tolali gʻoʻza navlarini joylashtirish va yetishtirishni keng yoʻlga qoʻyish;
ingichka tolali gʻoʻzaning “istiqbolli nav” sifatida ekib kelinayotgan navlarini ularning ishlab chiqarishdagi koʻrsatkichlaridan kelib chiqqan holda Oʻzbekiston Respublikasi hududida ekish uchun tavsiya qilingan qishloq xoʻjaligi ekinlarining davlat reyestriga (keyingi oʻrinlarda davlat reyestri deb ataladi) kiritish;
Surxondaryo viloyatida 40 ming gektar maydonda ingichka tolali gʻoʻza navlarini ilmiy asoslangan holda joylashtirish;
Qashqadaryo viloyatida 6 500 gektar, Buxoro viloyatida 5 000 gektar, Navoiy viloyatida 1 000 gektar maydonga ingichka tolali gʻoʻza navlarini joylashtirish va keng ishlab chiqarish sinovini olib borish, ijobiy natijalar olingan taqdirda yetishtirilgan paxta hosilini qayta ishlash uchun zamonaviy texnologiyalar bilan jihozlangan qayta ishlash korxonalarini tashkil etish toʻgʻrisidagi takliflari maʼqullansin.
2. Oʻzbekiston Respublikasi Qishloq xoʻjaligi vazirligi va Vazirlar Mahkamasi huzuridagi Agrosanoat majmui ustidan nazorat qilish inspeksiyasiga har yilgi talabdan kelib chiqqan holda:
dastlabki elita-urugʻchilik xoʻjaliklarida koʻpaytirilayotgan ingichka tolali gʻoʻzaning ertapishar, tola hosildorligi va sifati yuqori boʻlgan navlarining original urugʻlarini izchil koʻpaytirish hamda yangi va istiqbolli navlar orasidan eng yaxshilarini tanlab borish. Bunda ekish uchun tavsiya qilinayotgan ingichka tolali gʻoʻza navlarining nav tozaligiga alohida eʼtibor qaratish;
respublika hududlarining tuproq-iqlim sharoitiga mos, ertapishar, tola hosildorligi va sifati yuqori boʻlgan ingichka tolali gʻoʻza navlaridan yetarli miqdorda urugʻlik materiallarini tayyorlash;
urugʻliklarni yetishtirish sxemalarining texnologik talablariga muvofiq ingichka tolali gʻoʻza navlarining sifatli urugʻlik paxta xomashyosini va chigitlarini ishlab chiqarish vazifalari yuklansin.
3. Oʻzbekiston Respublikasi Qishloq xoʻjaligi vazirligi Innovatsion rivojlanish vazirligi bilan birgalikda ikki oy muddatda Paxta seleksiyasi, urugʻchiligi va yetishtirish agrotexnologiyalari ilmiy-tadqiqot institutida “Ingichka tolali gʻoʻza navlari seleksiyasi va urugʻchiligi” laboratoriyasini tashkil etsin va uning faoliyatini yoʻlga qoʻysin.
4. Oʻzbekiston Respublikasi Innovatsion rivojlanish vazirligi, Fanlar akademiyasi, Qishloq xoʻjaligi vazirligi huzuridagi Qishloq xoʻjaligi va oziq-ovqat taʼminoti ilmiy-ishlab chiqarish markazi bir oy muddatda ingichka tolali gʻoʻza navlari genetikasi, seleksiyasi, urugʻchiligi va yetishtirish agrotexnologiyalarini va ingichka tolali paxta xomashyosini tozalash uskunalarini takomillashtirish boʻyicha davlat ilmiy dasturlari grant tanlovlarini oʻtkazsin va tanlov gʻolibi boʻlgan ilmiy loyihalarning 2020-yildan boshlab moliyalashtirilishini taʼminlasin.
5. Oʻzbekiston Respublikasi Qishloq xoʻjaligi vazirligi, “Oʻztoʻqimachiliksanoat” uyushmasi bir oy muddatda paxta-toʻqimachilik ishlab chiqarishlari va klasterlar bilan ilmiy-tadqiqot institutlari oʻrtasida ilmiy va amaliy hamkorlik qilish boʻyicha shartnoma tuzish mexanizmini ishlab chiqsin va joriy etsin.
6. Oʻzbekiston Respublikasi Qishloq xoʻjaligi vazirligi Innovatsion rivojlanish vazirligi bilan birgalikda respublikada yaratilgan gʻoʻza navlari originatorlari tizimidagi dastlabki elita urugʻchilik xoʻjaliklari hamda ingichka tolali gʻoʻzaning davlat reyestriga kiritilgan va istiqbolli navlari urugʻlarini koʻpaytirish bilan shugʻullanuvchi elita urugʻchilik xoʻjaliklarining faoliyati samaradorligini oshirish va ularning laboratoriyalarini zamonaviy asbob-uskunlar bilan jihozlash chora-tadbirlarini koʻrsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining Agrar va oziq – ovqat sohalarini rivojlantirish masalalari boʻyicha maslahatchisi A.D. Vaxabov va Oʻzbekiston Respublikasi qishloq xoʻjaligi vaziri J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 30-yanvar,
47-son