📅 2020-yil 19-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 19 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 19 марта 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 19 March 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сирдарё вилоятида ихтисослаштирилган савдо-логистика терминалини ташкил этиш чора-тадбирлари тўғрисида
Сирдарё вилоятининг транспорт ва логистика инфратузилмасини замонавий талабларга мувофиқ такомиллаштириш, тадбиркорлик субъектлари ўртасидаги кооперация алоқаларини янада кенгайтириш, юк ташиш ҳажмини ошириш, шу жумладан товарларни ўз вақтида ва узлуксиз етказиб бериш, шунингдек, ҳудуднинг йўл-транспорт инфратузилмасидан самарали фойдаланиш учун қулай шарт-шароитлар яратиш мақсадида Вазирлар Маҳкамаси қарор қилади:
1. Ўзбекистон Республикаси Иқтисодиёт ва саноат вазирлиги, Давлат божхона қўмитаси, Сирдарё вилояти ҳокимлиги ва «Xinjiang Guorui Economic & Trade Co., LTD» компанияси (Хитой Халқ Республикаси) (кейинги ўринларда инвестор деб аталади) ўртасида музокаралар ўтказилиб:
2020 — 2024 йилларда 25,0 млн АҚШ доллари миқдорида тўғридан-тўғри хорижий инвестицияларни жалб қилиш ҳисобига Сирдарё вилоятида металл, ёғоч ва ёғоч маҳсулотларини сақлаш, уларга ишлов бериш ва тарқатиш бўйича ихтисослаштирилган савдо-логистика терминалини (кейинги ўринларда савдо-логистика терминали деб аталади) ташкил этиш бўйича келишувга эришилгани;
савдо-логистика терминалини қуриш мақсадида «Sirdaryo savdo logistika markazi» унитар корхонаси ташкил этилгани маълумот учун қабул қилинсин.
2. Ўзбекистон Республикаси Иқтисодиёт ва саноат вазирлиги, Давлат божхона қўмитаси, Сирдарё вилояти ҳокимлигининг савдо-логистика терминалини қуриш учун «Sirdaryo savdo logistika markazi» унитар корхонасига Сирдарё вилоятининг Сайхунобод туманидаги «Фаровон» МФЙ ҳудудида қишлоқ хўжалигига мўлжалланмаган ер участкасини, истисно тариқасида, тўғридан-тўғри ажратиш ҳақидаги таклифига розилик берилсин.
3. Белгилаб қўйилсинки, инвестор савдо-логистика терминали лойиҳасини амалга ошириш доирасида қуйидаги инвестициявий ва ижтимоий мажбуриятларни ўз зиммасига олади:
2020 — 2024 йилларда — 25,0 млн АҚШ доллари миқдорида инвестиция киритиш;
камида 200 та янги иш ўринлари ташкил этиш;
лойиҳа-қидирув ишларига хорижий лойиҳалаш ташкилотларини жалб қилиш орқали лойиҳа ҳужжатларини ишлаб чиқиш.
4. Ўзбекистон Республикаси Иқтисодиёт ва саноат вазирлиги, Давлат божхона қўмитаси ва Сирдарё вилояти ҳокимлиги бир ой муддатда мазкур қарорнинг 3-бандида белгиланган шартларда инвестор билан тўрт томонлама инвестиция шартномаси тузилишини ҳамда қабул қилинган инвестиция ва ижтимоий мажбуриятлар бажарилиши юзасидан мониторинг юритилишини таъминласин.
Бунда мазкур қарорнинг 3-бандида белгиланган шартлар инвестор томонидан тўлиқ равишда бажарилмаган тақдирда ер участкасидан доимий фойдаланиш ҳуқуқи бекор қилиниши белгилаб қўйилсин.
5. Белгилансинки:
Ўзбекистон Республикси Давлат божхона қўмитаси, Соғлиқни сақлаш вазирлиги, Ветеринария ва чорвачиликни ривожлантириш давлат қўмитаси, Экология ва атроф муҳитни муҳофаза қилиш давлат қўмитаси, «Ўзстандарт» агентлиги ва «Ўздавкарантин» инспекцияси бўлинмалари терминал ҳудудида бепул жойлаштирилади;
савдо-логистика терминалида божхона, экспресс-лаборатория, фитосанитария, ветеринария, санитария-эпидемиология, экологик назорат ўтказиш ва мувофиқликни баҳолаш ҳамда бошқа давлат хизматлари «ягона дарча» тамойили асосида кўрсатилади;
савдо-логистика терминалида давлат ва тижорат хизматлари, шу жумладан халқаро логистика хизматлари кўрсатилади.
6. Ўзбекистон Республикаси Транспорт вазирлиги «Ўзбекистон темир йўлари» АЖ билан биргаликда Тошкент темир йўл узелида юклар тирбандлигининг олдини олиш мақсадида темир йўл орқали республика ҳудудига келаётган металл, ёғоч ва бошқа маҳсулотларни юклаш ҳамда туширишни амалга ошириш учун терминал ҳудудида шарт-шароитлар яратиш чораларини кўрсин.
7. Ўзбекистон Республикаси Уй-жой коммунал хизмат кўрсатиш вазирлиги, Ахборот технологиялари ва коммуникацияларини ривожлантириш вазирлиги, Транспорт вазирлиги ҳузуридаги Автомобиль йўллари қўмитаси, «Ҳудудий электр тармоқлари» АЖ, «Ҳудудгазтаъминот» АЖ, «Ўзбекистон темир йўллари» АЖ, Сирдарё вилояти ҳокимлиги билан биргаликда инвесторнинг ўз маблағлари ҳисобидан терминал ҳудудигача транспорт ва муҳандислик-коммуникация инфратузилмаси билан таъминлаш чораларини кўрсин.
8. Ўзбекистон Республикаси Транспорт вазирлиги Қурилиш вазирлиги, Давлат божхона қўмитаси ҳамда Сирдарё вилояти ҳокимлиги билан биргаликда:
савдо-логистика терминали қурилиши бўйича техник топшириқларнинг ишлаб чиқилиши, мувофиқлаштирилиши ва тасдиқланишини таъминласин;
лойиҳа-смета ҳужжатлари белгиланган тартибда ишлаб чиқилишини, экспертизадан ўтказилишини, қурилиш-монтаж ишларини бажариш чораларини кўрсин.
9. Ўзбекистон Республикаси Бандлик ва меҳнат муносабатлари вазирлиги инвесторнинг буюртманомалари бўйича савдо-логистика терминалини ташкил қилишда иштирок этадиган хорижий мутахассисларни республикага жалб этиш учун белгиланган тартибда рухсатномалар берилишини (муддати узайтирилишини), шунингдек, кўрсатиб ўтилган фуқароларнинг Ўзбекистон Республикаси ҳудудида меҳнат фаолияти ҳуқуқига тасдиқномалар берилишини (муддати узайтирилишини) таъминласин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари А.Ж. Раматов, Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари-иқтисодиёт ва саноат вазири Д.А. Кучкаров ҳамда Сирдарё вилояти ҳокими Ғ.Ғ. Мирзаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 19 март,
173-сон
Oʻzbekiston Respublikasi Vazirlar Mahkamasining
qarori
Sirdaryo viloyatida ixtisoslashtirilgan savdo-logistika terminalini tashkil etish chora-tadbirlari toʻgʻrisida
Sirdaryo viloyatining transport va logistika infratuzilmasini zamonaviy talablarga muvofiq takomillashtirish, tadbirkorlik subyektlari oʻrtasidagi kooperatsiya aloqalarini yanada kengaytirish, yuk tashish hajmini oshirish, shu jumladan tovarlarni oʻz vaqtida va uzluksiz yetkazib berish, shuningdek, hududning yoʻl-transport infratuzilmasidan samarali foydalanish uchun qulay shart-sharoitlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Iqtisodiyot va sanoat vazirligi, Davlat bojxona qoʻmitasi, Sirdaryo viloyati hokimligi va “Xinjiang Guorui Economic & Trade Co., LTD” kompaniyasi (Xitoy Xalq Respublikasi) (keyingi oʻrinlarda investor deb ataladi) oʻrtasida muzokaralar oʻtkazilib:
2020 — 2024-yillarda 25,0 mln AQSh dollari miqdorida toʻgʻridan toʻgʻri xorijiy investitsiyalarni jalb qilish hisobiga Sirdaryo viloyatida metall, yogʻoch va yogʻoch mahsulotlarini saqlash, ularga ishlov berish va tarqatish boʻyicha ixtisoslashtirilgan savdo-logistika terminalini (keyingi oʻrinlarda savdo-logistika terminali deb ataladi) tashkil etish boʻyicha kelishuvga erishilgani;
savdo-logistika terminalini qurish maqsadida “Sirdaryo savdo logistika markazi” unitar korxonasi tashkil etilgani maʼlumot uchun qabul qilinsin.
2. Oʻzbekiston Respublikasi Iqtisodiyot va sanoat vazirligi, Davlat bojxona qoʻmitasi, Sirdaryo viloyati hokimligining savdo-logistika terminalini qurish uchun “Sirdaryo savdo logistika markazi” unitar korxonasiga Sirdaryo viloyatining Sayxunobod tumanidagi “Farovon” MFY hududida qishloq xoʻjaligiga moʻljallanmagan yer uchastkasini, istisno tariqasida, toʻgʻridan toʻgʻri ajratish haqidagi taklifiga rozilik berilsin.
3. Belgilab qoʻyilsinki, investor savdo-logistika terminali loyihasini amalga oshirish doirasida quyidagi investitsiyaviy va ijtimoiy majburiyatlarni oʻz zimmasiga oladi:
2020 — 2024-yillarda — 25,0 mln AQSh dollari miqdorida investitsiya kiritish;
kamida 200 ta yangi ish oʻrinlari tashkil etish;
loyiha-qidiruv ishlariga xorijiy loyihalash tashkilotlarini jalb qilish orqali loyiha hujjatlarini ishlab chiqish.
4. Oʻzbekiston Respublikasi Iqtisodiyot va sanoat vazirligi, Davlat bojxona qoʻmitasi va Sirdaryo viloyati hokimligi bir oy muddatda mazkur qarorning 3-bandida belgilangan shartlarda investor bilan toʻrt tomonlama investitsiya shartnomasi tuzilishini hamda qabul qilingan investitsiya va ijtimoiy majburiyatlar bajarilishi yuzasidan monitoring yuritilishini taʼminlasin.
Bunda mazkur qarorning 3-bandida belgilangan shartlar investor tomonidan toʻliq ravishda bajarilmagan taqdirda yer uchastkasidan doimiy foydalanish huquqi bekor qilinishi belgilab qoʻyilsin.
5. Belgilansinki:
Oʻzbekiston Respubliksi Davlat bojxona qoʻmitasi, Sogʻliqni saqlash vazirligi, Veterinariya va chorvachilikni rivojlantirish davlat qoʻmitasi, Ekologiya va atrof muhitni muhofaza qilish davlat qoʻmitasi, “Oʻzstandart” agentligi va “Oʻzdavkarantin” inspeksiyasi boʻlinmalari terminal hududida bepul joylashtiriladi;
savdo-logistika terminalida bojxona, ekspress-laboratoriya, fitosanitariya, veterinariya, sanitariya-epidemiologiya, ekologik nazorat oʻtkazish va muvofiqlikni baholash hamda boshqa davlat xizmatlari “yagona darcha” tamoyili asosida koʻrsatiladi;
savdo-logistika terminalida davlat va tijorat xizmatlari, shu jumladan xalqaro logistika xizmatlari koʻrsatiladi.
6. Oʻzbekiston Respublikasi Transport vazirligi “Oʻzbekiston temir yoʻlari” AJ bilan birgalikda Toshkent temir yoʻl uzelida yuklar tirbandligining oldini olish maqsadida temir yoʻl orqali respublika hududiga kelayotgan metall, yogʻoch va boshqa mahsulotlarni yuklash hamda tushirishni amalga oshirish uchun terminal hududida shart-sharoitlar yaratish choralarini koʻrsin.
7. Oʻzbekiston Respublikasi Uy-joy kommunal xizmat koʻrsatish vazirligi, Axborot texnologiyalari va kommunikatsiyalarini rivojlantirish vazirligi, Transport vazirligi huzuridagi Avtomobil yoʻllari qoʻmitasi, “Hududiy elektr tarmoqlari” AJ, “Hududgaztaʼminot” AJ, “Oʻzbekiston temir yoʻllari” AJ, Sirdaryo viloyati hokimligi bilan birgalikda investorning oʻz mablagʻlari hisobidan terminal hududigacha transport va muhandislik-kommunikatsiya infratuzilmasi bilan taʼminlash choralarini koʻrsin.
8. Oʻzbekiston Respublikasi Transport vazirligi Qurilish vazirligi, Davlat bojxona qoʻmitasi hamda Sirdaryo viloyati hokimligi bilan birgalikda:
savdo-logistika terminali qurilishi boʻyicha texnik topshiriqlarning ishlab chiqilishi, muvofiqlashtirilishi va tasdiqlanishini taʼminlasin;
loyiha-smeta hujjatlari belgilangan tartibda ishlab chiqilishini, ekspertizadan oʻtkazilishini, qurilish-montaj ishlarini bajarish choralarini koʻrsin.
9. Oʻzbekiston Respublikasi Bandlik va mehnat munosabatlari vazirligi investorning buyurtmanomalari boʻyicha savdo-logistika terminalini tashkil qilishda ishtirok etadigan xorijiy mutaxassislarni respublikaga jalb etish uchun belgilangan tartibda ruxsatnomalar berilishini (muddati uzaytirilishini), shuningdek, koʻrsatib oʻtilgan fuqarolarning Oʻzbekiston Respublikasi hududida mehnat faoliyati huquqiga tasdiqnomalar berilishini (muddati uzaytirilishini) taʼminlasin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov, Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari-iqtisodiyot va sanoat vaziri D.A. Kuchkarov hamda Sirdaryo viloyati hokimi Gʻ.Gʻ. Mirzayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 19-mart,
173-son