📅 2020-yil 18-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 18 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 18 апреля 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 18 April 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент вилоятида «Invest Village» инвестиция лойиҳасини амалга ошириш чора-тадбирлари тўғрисида
Тошкент вилоятида қурилиш ва ободонлаштириш ишларини янада жадаллаштириш, тўғридан-тўғри хорижий инвестициялар ҳисобига чет эл инвесторлари учун қулай шарт-шароитларга эга бўлган замонавий шаҳарча ташкил этиш мақсадида Вазирлар Маҳкамаси қарор қилади:
1. Қуйидагилар:
Тошкент вилояти Қибрай тумани ҳокимининг 2013 йил 18 июлдаги 2280-сон қарор билан «Super Garden» МЧЖга Тошкент вилояти, Қибрай тумани, Тузел ҚФЙ, Тинчлик кўчасида мева, резовар мева етиштириш ва узумчиликни ривожлантириш учун 49 йилга 40 гектар қишлоқ хўжалигида фойдаланиладиган ер участкаси (кейинги ўринларда ер участкаси деб аталади) ажратилганлиги;
Ўзбекистон Республикаси Ер ресурслари, геодезия, катография ва давлат кадастри давлат қўмитаси ҳузуридаги «Ўздаверлойиҳа» институтининг «Super Garden» МЧЖга ажратилган ер участкасининг балл бонитети 53,2 баллга тенглиги тўғрисидаги хулосаси;
«Super Garden» МЧЖга ажратилган ер участкасида Туркиянинг «Toleza Tekstil Sanayi Iç ve Diş Tic. Ltd. Şti.» компанияси билан ҳамкорликда умумий қиймати 25 млн АҚШ долларилик, шундан 20 млн АҚШ доллари тўғридан-тўғри хорижий инвестиция ҳисобига «Invest Village» инвестиция лойиҳаси амалга оширилиши маълумот учун қабул қилинсин.
2. Тошкент вилояти ҳокимлиги, Ўзбекистон Республикаси Инвестициялар ва ташқи савдо вазирлиги, «Super Garden» МЧЖга ажратилган ер участкасида Туркиянинг «Toleza Tekstil Sanayi Iç ve Diş Tic. Ltd. Şti.» компанияси билан ҳамкорликда умумий қиймати 25 млн АҚШ долларилик хорижий инвестиция лойиҳасини амалга ошириш тўғрисидаги таклифига розилик берилсин.
3. Тошкент вилояти ҳокимлиги «Super Garden» МЧЖга ажратилган ер участкасида хорижий инвестиция ҳисобига замонавий «Invest Village» лойиҳасини амалга ошириш учун ер участкаси тоифасини аҳоли пунктларининг ерлари тоифасига ўзгартириш бўйича тегишли қарор қабул қилсин.
4. Белгилансинки, ер участкасида инвестиция лойиҳасини амалга ошириш учун:
Туркиянинг «Toleza Tekstil Sanayi Iç ve Diş Tic. Ltd. Şti.» компанияси томонидан 20 млн АҚШ доллари миқдорида тўғридан-тўғри хорижий инвестициялар жалб қилинади ва 100 та янги иш ўринлари ташкил этилади;
«Super Garden» МЧЖ томонидан 5 млн АҚШ доллари миқдоридаги маблағлар киритилади;
лойиҳа-смета ҳужжатлари асосида 2020-2021 йилларда инвестиция маблағлари тўлиқ ўзлаштирилади ва фойдаланишга топширилади;
инвестиция лойиҳасини амалга ошириш доирасида қуриладиган уй-жойларнинг 5 фоизи Тошкент вилояти ҳокимлигига берилади.
5. Тошкент вилояти ҳокимлиги:
«Toleza Tekstil Sanayi Iç ve Diş Tic. Ltd. Şti.» компанияси ҳамда «Super Garden» МЧЖ томонидан амалга ошириладиган инвестиция лойиҳасини белгиланган муддатда фойдаланишга топширилиши бўйича тизимли мониторинг олиб борсин;
инвестиция лойиҳалари белгиланган муддатларда амалга оширилмаган ва объектлар фойдаланишга топширилмаган тақдирда ажратилган ер майдонини белгиланган тартибда давлат захирасига қайтариш чораларини кўрсин.
6. Ўзбекистон Республикаси Қурилиш вазирлиги замонавий «Invest Village» лойиҳасини амалга ошириш бўйича ишлаб чиқилган лойиҳа-смета ҳужжатлари тегишли органларда экспертизадан ўтказилишини ва қурилаётган объектларда қурилиш-монтаж ишлари бажарилиши ҳамда шаҳарсозлик норма ва қоидаларига риоя этилиши устидан доимий давлат назорати олиб борилишини таъминласин.
7. Мазкур қарорнинг бажарилишини назорат қилиш Бош вазирининг инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков ва Тошкент вилояти ҳокими Р.К. Холматов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 18 апрель,
242-сон
Oʻzbekiston Respublikasi Vazirlar Mahkamasining
qarori
Toshkent viloyatida “Invest Village” investitsiya loyihasini amalga oshirish chora-tadbirlari toʻgʻrisida
Toshkent viloyatida qurilish va obodonlashtirish ishlarini yanada jadallashtirish, toʻgʻridan toʻgʻri xorijiy investitsiyalar hisobiga chet el investorlari uchun qulay shart-sharoitlarga ega boʻlgan zamonaviy shaharcha tashkil etish maqsadida Vazirlar Mahkamasi qaror qiladi:
1. Quyidagilar:
Toshkent viloyati Qibray tumani hokimining 2013-yil 18-iyuldagi 2280-son qaror bilan “Super Garden” MChJga Toshkent viloyati, Qibray tumani, Tuzel QFY, Tinchlik koʻchasida meva, rezovar meva yetishtirish va uzumchilikni rivojlantirish uchun 49 yilga 40 gektar qishloq xoʻjaligida foydalaniladigan yer uchastkasi (keyingi oʻrinlarda yer uchastkasi deb ataladi) ajratilganligi;
Oʻzbekiston Respublikasi Yer resurslari, geodeziya, katografiya va davlat kadastri davlat qoʻmitasi huzuridagi “Oʻzdaverloyiha” institutining “Super Garden” MChJga ajratilgan yer uchastkasining ball boniteti 53,2 ballga tengligi toʻgʻrisidagi xulosasi;
“Super Garden” MChJga ajratilgan yer uchastkasida Turkiyaning “Toleza Tekstil Sanayi Iç ve Diş Tic. Ltd. Şti.” kompaniyasi bilan hamkorlikda umumiy qiymati 25 mln AQSh dollarilik, shundan 20 mln AQSh dollari toʻgʻridan toʻgʻri xorijiy investitsiya hisobiga “Invest Village” investitsiya loyihasi amalga oshirilishi maʼlumot uchun qabul qilinsin.
2. Toshkent viloyati hokimligi, Oʻzbekiston Respublikasi Investitsiyalar va tashqi savdo vazirligi, “Super Garden” MChJga ajratilgan yer uchastkasida Turkiyaning “Toleza Tekstil Sanayi Iç ve Diş Tic. Ltd. Şti.” kompaniyasi bilan hamkorlikda umumiy qiymati 25 mln AQSh dollarilik xorijiy investitsiya loyihasini amalga oshirish toʻgʻrisidagi taklifiga rozilik berilsin.
3. Toshkent viloyati hokimligi “Super Garden” MChJga ajratilgan yer uchastkasida xorijiy investitsiya hisobiga zamonaviy “Invest Village” loyihasini amalga oshirish uchun yer uchastkasi toifasini aholi punktlarining yerlari toifasiga oʻzgartirish boʻyicha tegishli qaror qabul qilsin.
4. Belgilansinki, yer uchastkasida investitsiya loyihasini amalga oshirish uchun:
Turkiyaning “Toleza Tekstil Sanayi Iç ve Diş Tic. Ltd. Şti.” kompaniyasi tomonidan 20 mln AQSh dollari miqdorida toʻgʻridan toʻgʻri xorijiy investitsiyalar jalb qilinadi va 100 ta yangi ish oʻrinlari tashkil etiladi;
“Super Garden” MChJ tomonidan 5 mln AQSh dollari miqdoridagi mablagʻlar kiritiladi;
loyiha-smeta hujjatlari asosida 2020-2021-yillarda investitsiya mablagʻlari toʻliq oʻzlashtiriladi va foydalanishga topshiriladi;
investitsiya loyihasini amalga oshirish doirasida quriladigan uy-joylarning 5 foizi Toshkent viloyati hokimligiga beriladi.
5. Toshkent viloyati hokimligi:
“Toleza Tekstil Sanayi Iç ve Diş Tic. Ltd. Şti.” kompaniyasi hamda “Super Garden” MChJ tomonidan amalga oshiriladigan investitsiya loyihasini belgilangan muddatda foydalanishga topshirilishi boʻyicha tizimli monitoring olib borsin;
investitsiya loyihalari belgilangan muddatlarda amalga oshirilmagan va obyektlar foydalanishga topshirilmagan taqdirda ajratilgan yer maydonini belgilangan tartibda davlat zaxirasiga qaytarish choralarini koʻrsin.
6. Oʻzbekiston Respublikasi Qurilish vazirligi zamonaviy “Invest Village” loyihasini amalga oshirish boʻyicha ishlab chiqilgan loyiha-smeta hujjatlari tegishli organlarda ekspertizadan oʻtkazilishini va qurilayotgan obyektlarda qurilish-montaj ishlari bajarilishi hamda shaharsozlik norma va qoidalariga rioya etilishi ustidan doimiy davlat nazorati olib borilishini taʼminlasin.
7. Mazkur qarorning bajarilishini nazorat qilish Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov va Toshkent viloyati hokimi R.K. Xolmatov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 18-aprel,
242-son