📅 2020-yil 6-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 6 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 мая 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 6 May 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сурхондарё вилоятида тадбиркорликни қўллаб-қувватлаш орқали саноатни янада ривожлантиришга доир қўшимча чора-тадбирлар тўғрисида
Сурхондарё вилоятида саноат ишлаб чиқариш салоҳиятини янада ривожлантириш, янги иш ўринларини ташкил қилиш ҳамда мавжуд ишлаб чиқариш майдонларидан самарали фойдаланиш мақсадида Вазирлар Маҳкамаси қарор қилади:
1. Сурхондарё вилояти ҳокимлиги ва Ўзбекистон Республикаси Давлат активларини бошқариш агентлигининг Сурхондарё вилояти, Қумқўрғон туманида жойлашган «Қумқўрғон таъмирлаш механика заводи» масъулияти чекланган жамиятининг устав фондидаги 25 фоиз давлат улушини (кейинги ўринларда — давлат улуши) «Сурхон Комбинат» масъулияти чекланган жамиятига (кейинги ўринларда — «Сурхон Комбинат» МЧЖ) инвестиция ва ижтимоий мажбуриятларни қабул қилиш шарти билан тўғридан-тўғри шартнома тузиш орқали «ноль» харид қийматида сотиш тўғрисидаги таклифига розилик берилсин.
2. Белгилансинки, «Сурхон Комбинат» МЧЖга қуйидаги инвестиция ва ижтимоий мажбуриятларни бажариш юкланади:
икки йил давомида камида 35,0 млрд сўм миқдорида инвестициялар киритган ҳолда, ип-калавани бўяш, трикотаж, мато, сочиқ ишлаб чиқариш фаолиятини ташкил этиш;
камида 300 та янги иш ўринларини яратиш.
3. Ўзбекистон Республикаси Давлат активларини бошқариш агентлиги Сурхондарё вилояти ҳокимлиги билан биргаликда:
бир ой муддатда ушбу қарорнинг 2-бандида кўрсатилган шартларда «Сурхон Комбинат» МЧЖ билан давлат улушини «нол» харид қийматида сотиш бўйича олди-сотди шартномаси тузилишини;
«Сурхон Комбинат» МЧЖ томонидан қабул қилинадиган инвестициявий ва ижтимоий мажбуриятлар бажарилиши юзасидан мониторинг олиб борилишини таъминласинлар.
4. Қуйидагилар:
Ўзбекистон Республикаси Вазирлар Маҳкамасининг «2017-2018 йилларда Сурхондарё вилоятида саноат, қишлоқ хўжалиги ва хизмат кўрсатиш лойиҳаларининг кўрсаткичларини тасдиқлаш тўғрисида» 2017 йил 5 апрелдаги 182-сон қарорининг 10-бандида Сурхондарё вилояти, Термиз шаҳри, Ибн Сино кўчасида жойлашган қурилиши тугалланмаган темир йўл шифохонасининг маъмурий ва қоровулхона биносига 2018 йилнинг иккинчи чораги якунига қадар 16,0 млрд сўм инвестиция киритиш орқали объектда замонавий электротехника воситалари, шу жумладан телевизорлар ишлаб чиқаришни ташкил этиш ҳамда 80 та янги иш ўринлари яратиш шарти билан уларнинг «Термиз канцелярия моллари» МЧЖга «ноль» харид қийматда сотилиши белгиланганлиги;
мазкур қарор талабларидан келиб чиқиб, Давлат активларини бошқариш агентлигининг Сурхондарё вилояти ҳудудий бошқармаси ва «Термиз канцелярия моллари» МЧЖ ўртасида ҳамда Термиз шаҳар ҳокимлиги иштирокида 2017 йил 10 апрелда 350-сон олди-сотди шартномаси тузилганлиги;
«Термиз канцелярия моллари» МЧЖ томонидан бугунги кунда объектда замонавий технологиялар асосида тайёр трикотаж маҳсулотлари ишлаб чиқариш лойиҳаси амалга оширилаётганлиги маълумот учун қабул қилинсин.
5. Ўзбекистон Республикаси Вазирлар Маҳкамасининг 2017 йил 5 апрелдаги 182-сон қарорининг 10-банди иккинчи хатбошиси қуйидаги таҳрирда баён этилсин:
«Бунда объектда замонавий технологиялар асосида тайёр трикотаж маҳсулотлари ишлаб чиқариш лойиҳасини 2020 йилнинг иккинчи чорагида ишга тушириш белгилаб қўйилсин».
6. Вазирлар Маҳкамасининг «Паст рентабелли ва фаолият юритмаётган ташкилотларни жадал реализация қилиш ва тугатиш чора-тадбирлари тўғрисида» 2019 йил 24 сентябрдаги 800-сон қарорига 1-илованинг 49-позицияси ўз кучини йўқотган деб ҳисоблансин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодий тараққиёт ва камбағалликни қисқартириш вазири Ж.А. Қўчқоров, Давлат активларини бошқариш агентлиги директори С.Х. Бекенов ҳамда Сурхондарё вилояти ҳокими Т.А. Боболов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 6 май,
266-сон
Oʻzbekiston Respublikasi Vazirlar Mahkamasining
qarori
Surxondaryo viloyatida tadbirkorlikni qoʻllab-quvvatlash orqali sanoatni yanada rivojlantirishga doir qoʻshimcha chora-tadbirlar toʻgʻrisida
Surxondaryo viloyatida sanoat ishlab chiqarish salohiyatini yanada rivojlantirish, yangi ish oʻrinlarini tashkil qilish hamda mavjud ishlab chiqarish maydonlaridan samarali foydalanish maqsadida Vazirlar Mahkamasi qaror qiladi:
1. Surxondaryo viloyati hokimligi va Oʻzbekiston Respublikasi Davlat aktivlarini boshqarish agentligining Surxondaryo viloyati, Qumqoʻrgʻon tumanida joylashgan “Qumqoʻrgʻon taʼmirlash mexanika zavodi” masʼuliyati cheklangan jamiyatining ustav fondidagi 25 foiz davlat ulushini (keyingi oʻrinlarda — davlat ulushi) “Surxon Kombinat” masʼuliyati cheklangan jamiyatiga (keyingi oʻrinlarda — “Surxon Kombinat” MChJ) investitsiya va ijtimoiy majburiyatlarni qabul qilish sharti bilan toʻgʻridan toʻgʻri shartnoma tuzish orqali “nol” xarid qiymatida sotish toʻgʻrisidagi taklifiga rozilik berilsin.
2. Belgilansinki, “Surxon Kombinat” MChJga quyidagi investitsiya va ijtimoiy majburiyatlarni bajarish yuklanadi:
ikki yil davomida kamida 35,0 mlrd soʻm miqdorida investitsiyalar kiritgan holda, ip-kalavani boʻyash, trikotaj, mato, sochiq ishlab chiqarish faoliyatini tashkil etish;
kamida 300 ta yangi ish oʻrinlarini yaratish.
3. Oʻzbekiston Respublikasi Davlat aktivlarini boshqarish agentligi Surxondaryo viloyati hokimligi bilan birgalikda:
bir oy muddatda ushbu qarorning 2-bandida koʻrsatilgan shartlarda “Surxon Kombinat” MChJ bilan davlat ulushini “nol” xarid qiymatida sotish boʻyicha oldi-sotdi shartnomasi tuzilishini;
“Surxon Kombinat” MChJ tomonidan qabul qilinadigan investitsiyaviy va ijtimoiy majburiyatlar bajarilishi yuzasidan monitoring olib borilishini taʼminlasinlar.
4. Quyidagilar:
Oʻzbekiston Respublikasi Vazirlar Mahkamasining “2017-2018-yillarda Surxondaryo viloyatida sanoat, qishloq xoʻjaligi va xizmat koʻrsatish loyihalarining koʻrsatkichlarini tasdiqlash toʻgʻrisida” 2017-yil 5-apreldagi 182-son qarorining 10-bandida Surxondaryo viloyati, Termiz shahri, Ibn Sino koʻchasida joylashgan qurilishi tugallanmagan temir yoʻl shifoxonasining maʼmuriy va qorovulxona binosiga 2018-yilning ikkinchi choragi yakuniga qadar 16,0 mlrd soʻm investitsiya kiritish orqali obyektda zamonaviy elektrotexnika vositalari, shu jumladan televizorlar ishlab chiqarishni tashkil etish hamda 80 ta yangi ish oʻrinlari yaratish sharti bilan ularning “Termiz kanselyariya mollari” MChJga “nol” xarid qiymatda sotilishi belgilanganligi;
mazkur qaror talablaridan kelib chiqib, Davlat aktivlarini boshqarish agentligining Surxondaryo viloyati hududiy boshqarmasi va “Termiz kanselyariya mollari” MChJ oʻrtasida hamda Termiz shahar hokimligi ishtirokida 2017-yil 10-aprelda 350-son oldi-sotdi shartnomasi tuzilganligi;
“Termiz kanselyariya mollari” MChJ tomonidan bugungi kunda obyektda zamonaviy texnologiyalar asosida tayyor trikotaj mahsulotlari ishlab chiqarish loyihasi amalga oshirilayotganligi maʼlumot uchun qabul qilinsin.
5. Oʻzbekiston Respublikasi Vazirlar Mahkamasining 2017-yil 5-apreldagi 182-son qarorining 10-bandi ikkinchi xatboshisi quyidagi tahrirda bayon etilsin:
“Bunda obyektda zamonaviy texnologiyalar asosida tayyor trikotaj mahsulotlari ishlab chiqarish loyihasini 2020-yilning ikkinchi choragida ishga tushirish belgilab qoʻyilsin”.
6. Vazirlar Mahkamasining “Past rentabelli va faoliyat yuritmayotgan tashkilotlarni jadal realizatsiya qilish va tugatish chora-tadbirlari toʻgʻrisida” 2019-yil 24-sentabrdagi 800-son qaroriga 1-ilovaning 49-pozitsiyasi oʻz kuchini yoʻqotgan deb hisoblansin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov, Davlat aktivlarini boshqarish agentligi direktori S.X. Bekenov hamda Surxondaryo viloyati hokimi T.A. Bobolov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 6-may,
266-son