📅 2020-yil 6-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 6 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 мая 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 6 May 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Самарқанд шаҳрида амалга оширилаётган кенг кўламли бунёдкорлик ва ободонлаштириш ишларини жадаллаштириш чора-тадбирлари тўғрисида
Самарқанд вилоятида муҳандислик-коммуникация инфратузилмасини яхшилаш, ҳудудларни ободонлаштириш, автомобиль йўлларини таъмирлаш, Самарқанд шаҳрининг бош режасига киритилган ўзгартиришлар натижасида қўшимча тадбирларнинг молиялаштириш манбасини белгилаш ҳамда амалга оширилаётган бунёдкорлик ва ободонлаштириш ишларини янада жадаллаштириш мақсадида Вазирлар Маҳкамаси қарор қилади:
1. Қуйидагилар:
а) Вазирлар Маҳкамасининг «2022 йилда Самарқанд шаҳрида Шанхай Ҳамкорлик Ташкилотининг навбатдаги Саммитини ўтказишга тайёргарлик ишларини молиявий қўллаб-қувватлаш тўғрисида» 2019 йил 18 сентябрдаги 783-сон қарорига асосан Самарқанд вилояти ҳокимлиги ҳузуридаги Самарқанд вилоятини ободонлаштириш ва фаровонлигини ошириш жамғармасига Ўзбекистон Республикаси Тикланиш ва тараққиёт жамғармасининг (кейинги ўринларда — жамғарма) 25 млн АҚШ долларига тенг эквивалентда кредити ажратилганлиги;
жамғармадан жалб қилинган кредитни қоплаш ва хизмат кўрсатиш билан боглиқ харажатлар Самарқанд вилояти маҳаллий бюджетининг қўшимча манбалари ҳамда қонунчилик ҳужжатларида тақиқланмаган бошка манбалар ҳисобидан амалга оширилиши белгиланганлиги;
б) Самарқанд вилоятини ободонлаштириш ва фаровонлигини ошириш жамғармасига ажратилган кредит ҳисобидан:
умумий фойдаланишдаги автомобиль йўлларини қуриш ва таъмирлаш ишларига — 106,7 млрд сўм;
сув таъминоти ва оқова сув тизими объектларини таъмирлаш ишларига — 88,8 млрд сўм;
Самарқанд шаҳар ички йўлларини қуриш ва таъмирлаш ишларига — 32,7 млрд сўм йўналтирилганлиги маълумот учун қабул қилинсин.
2. Ўзбекистон Республикаси Иқтисодий тараққиёт ва камбағалликни қисқартириш вазирлиги, Молия вазирлиги бир ой муддатда жамғармадан ажратилган кредитни қоплаш мақсадида ушбу маблағларнинг умумий фойдаланишдаги автомобиль йўллари ҳамда сув таъминоти ва оқова сув тизими объектларини қуриш ва таъмирлаш учун сарфланган 195,5 млрд сўм миқдордаги қисмини 2020 — 2022 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасида иқтисод қилинган ва мақбуллаштирилган маблағлар ҳисобидан жамғармага тўлаб берилишини таъминласин.
3. Белгилаб қўйилсинки, Самарқанд вилоятини ободонлаштириш ва фаровонлигини ошириш жамғармасига ажратилган кредит ҳисобидан:
умумий фойдаланишдаги автомобиль йўллари ҳамда Самарқанд шаҳар ички йўлларини қуриш ва таъмирлаш ишлари бўйича тасдиқланган лойиҳа-смета ҳужжатлари асосида бажарилган ишлар — Самарқанд вилояти ҳокимлиги томонидан;
сув таъминоти ва оқова сув тизими объектларини таъмирлаш бўйича ишлари бўйича тасдиқланган лойиҳа-смета ҳужжатлари асосида бажарилган ишлар — «Ўзсувтаъминот» акциядорлик жамияти томонидан қабул қилиб олинади.
4. Самарқанд вилоятида муҳандислик-коммуникация инфратузилмасини яхшилаш борасидаги ишларни сифатли ташкил этиш ҳамда ажратилган маблағлардан самарали фойдаланиш мақсадида:
Самарқанд вилояти ҳокими Э.О. Турдимов — жамғармадан ажратилган кредитнинг мақсадли сарфланиши ва ўз вақтида қайтарилишини таъминлаш юзасидан;
Ўзбекистон Республикаси уй-жой коммунал хизмат кўрсатиш вазири М.Х. Салиев — ичимлик суви ва оқова сув тизими объектларини қуриш ва таъмирлаш ишларининг ўз вақтида ва сифатли бажарилиши юзасидан;
Ўзбекистон Республикаси транспорт вазири ўринбосари — Автомобиль йўллари қўмитаси раиси вазифасини бажарувчи А.Абдувалиев — умумий фойдаланишдаги автомобиль йўллари ҳамда Самарқанд шаҳар ички йўлларини қуриш ва таъмирлаш ишларининг ўз вақтида ва сифатли бажарилиши юзасидан шахсан жавобгар эканлиги белгилаб қўйилсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари А.Ж. Раматов, Бош вазирнинг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ва Самарқанд вилояти ҳокими Э.О. Турдимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 6 май,
268-сон
Oʻzbekiston Respublikasi Vazirlar Mahkamasining
qarori
Samarqand shahrida amalga oshirilayotgan keng koʻlamli bunyodkorlik va obodonlashtirish ishlarini jadallashtirish chora-tadbirlari toʻgʻrisida
Samarqand viloyatida muhandislik-kommunikatsiya infratuzilmasini yaxshilash, hududlarni obodonlashtirish, avtomobil yoʻllarini taʼmirlash, Samarqand shahrining bosh rejasiga kiritilgan oʻzgartirishlar natijasida qoʻshimcha tadbirlarning moliyalashtirish manbasini belgilash hamda amalga oshirilayotgan bunyodkorlik va obodonlashtirish ishlarini yanada jadallashtirish maqsadida Vazirlar Mahkamasi qaror qiladi:
1. Quyidagilar:
a) Vazirlar Mahkamasining “2022-yilda Samarqand shahrida Shanxay Hamkorlik Tashkilotining navbatdagi Sammitini oʻtkazishga tayyorgarlik ishlarini moliyaviy qoʻllab-quvvatlash toʻgʻrisida” 2019-yil 18-sentabrdagi 783-son qaroriga asosan Samarqand viloyati hokimligi huzuridagi Samarqand viloyatini obodonlashtirish va farovonligini oshirish jamgʻarmasiga Oʻzbekiston Respublikasi Tiklanish va taraqqiyot jamgʻarmasining (keyingi oʻrinlarda — jamgʻarma) 25 mln AQSh dollariga teng ekvivalentda krediti ajratilganligi;
jamgʻarmadan jalb qilingan kreditni qoplash va xizmat koʻrsatish bilan bogliq xarajatlar Samarqand viloyati mahalliy budjetining qoʻshimcha manbalari hamda qonunchilik hujjatlarida taqiqlanmagan boshka manbalar hisobidan amalga oshirilishi belgilanganligi;
b) Samarqand viloyatini obodonlashtirish va farovonligini oshirish jamgʻarmasiga ajratilgan kredit hisobidan:
umumiy foydalanishdagi avtomobil yoʻllarini qurish va taʼmirlash ishlariga — 106,7 mlrd soʻm;
suv taʼminoti va oqova suv tizimi obyektlarini taʼmirlash ishlariga — 88,8 mlrd soʻm;
Samarqand shahar ichki yoʻllarini qurish va taʼmirlash ishlariga — 32,7 mlrd soʻm yoʻnaltirilganligi maʼlumot uchun qabul qilinsin.
2. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Moliya vazirligi bir oy muddatda jamgʻarmadan ajratilgan kreditni qoplash maqsadida ushbu mablagʻlarning umumiy foydalanishdagi avtomobil yoʻllari hamda suv taʼminoti va oqova suv tizimi obyektlarini qurish va taʼmirlash uchun sarflangan 195,5 mlrd soʻm miqdordagi qismini 2020 — 2022-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida iqtisod qilingan va maqbullashtirilgan mablagʻlar hisobidan jamgʻarmaga toʻlab berilishini taʼminlasin.
3. Belgilab qoʻyilsinki, Samarqand viloyatini obodonlashtirish va farovonligini oshirish jamgʻarmasiga ajratilgan kredit hisobidan:
umumiy foydalanishdagi avtomobil yoʻllari hamda Samarqand shahar ichki yoʻllarini qurish va taʼmirlash ishlari boʻyicha tasdiqlangan loyiha-smeta hujjatlari asosida bajarilgan ishlar — Samarqand viloyati hokimligi tomonidan;
suv taʼminoti va oqova suv tizimi obyektlarini taʼmirlash boʻyicha ishlari boʻyicha tasdiqlangan loyiha-smeta hujjatlari asosida bajarilgan ishlar — “Oʻzsuvtaʼminot” aksiyadorlik jamiyati tomonidan qabul qilib olinadi.
4. Samarqand viloyatida muhandislik-kommunikatsiya infratuzilmasini yaxshilash borasidagi ishlarni sifatli tashkil etish hamda ajratilgan mablagʻlardan samarali foydalanish maqsadida:
Samarqand viloyati hokimi E.O. Turdimov — jamgʻarmadan ajratilgan kreditning maqsadli sarflanishi va oʻz vaqtida qaytarilishini taʼminlash yuzasidan;
Oʻzbekiston Respublikasi uy-joy kommunal xizmat koʻrsatish vaziri M.X. Saliyev — ichimlik suvi va oqova suv tizimi obyektlarini qurish va taʼmirlash ishlarining oʻz vaqtida va sifatli bajarilishi yuzasidan;
Oʻzbekiston Respublikasi transport vaziri oʻrinbosari — Avtomobil yoʻllari qoʻmitasi raisi vazifasini bajaruvchi A.Abduvaliyev — umumiy foydalanishdagi avtomobil yoʻllari hamda Samarqand shahar ichki yoʻllarini qurish va taʼmirlash ishlarining oʻz vaqtida va sifatli bajarilishi yuzasidan shaxsan javobgar ekanligi belgilab qoʻyilsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov, Bosh vazirning moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov va Samarqand viloyati hokimi E.O. Turdimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 6-may,
268-son