📅 2020-yil 8-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 8 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 8 мая 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 8 May 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
фармойиши
Қорақалпоғистон Республикаси, Бухоро ва Хоразм вилоятларида аҳолининг яшаш шароитини янада яхшилаш, экологик ҳолатни соғломлаштириш, Бухоро, Нукус, Хива ва Урганч шаҳарларини шамол таъсиридан ҳимоялаш, тупроқ эрозиясининг олдини олиш, қумлар кўчишини бартараф этиш ҳамда минтақада мўътадил микроиқлим шароитини яратиш мақсадида:
1. Ўзбекистон Республикаси Ўрмон хўжалиги давлат қўмитаси, Фавқулодда вазиятлар вазирлиги, Экология ва атроф-муҳитни муҳофаза қилиш давлат қўмитаси, Қорақалпоғистон Республикаси Вазирлар Кенгаши, Бухоро ва Хоразм вилоятлари ҳокимликларининг Бухоро, Нукус, Хива ва Урганч шаҳарлари атрофида 2020-2021 йилларда жами 30 км масофада «яшил белбоғ» — ҳимоя дарахтзорлари (кейинги ўринларда — «яшил белбоғ») барпо этиш тўғрисидаги таклифига розилик берилсин.
2. Қорақалпоғистон Республикаси Вазирлар Кенгаши, Бухоро ва Хоразм вилоятлари ҳокимликлари Ўзбекистон Республикаси Ер ресурслари, геодезия, картография ва давлат кадастри давлат қўмитаси ҳамда Ўрмон хўжалиги давлат қўмитаси билан биргаликда ер майдонлари танланилишини ва лойиҳа-смета ҳужжатлари ишлаб чиқилишини, шунингдек, Бухоро, Нукус, Хива ва Урганч шаҳарлари атрофида 2020-2021 йилларда жами 30 км масофада «яшил белбоғ» барпо этилишини ҳамда ушбу ишларнинг ўз вақтида молиялаштирилишини таъминласин.
3. Қуйидагилар 2020-2021 йиллар давомида «яшил белбоғ» барпо этиш билан боғлиқ ишларни молиялаштириш манбалари этиб белгилансин:
Ўзбекистон Республикаси Экология ва атроф-муҳитни муҳофаза қилиш давлат қўмитасининг Экология, атроф-муҳитни муҳофаза қилиш ва чиқиндилар билан боғлиқ ишларни амалга ошириш жамғармаси маблағлари;
Ўзбекистон Республикаси Ўрмон хўжалиги давлат қўмитасининг Ўрмон хўжалигини ривожлантириш жамғармаси маблағлари;
Қорақалпоғистон Республикаси, Бухоро ва Хоразм вилоятлари маҳаллий бюджетларида белгиланган прогноз кўрсаткичларининг орттириб бажарилган қисми ҳисобидаги маблағлари;
юридик ва жисмоний шахсларнинг, шу жумладан Ўзбекистон Республикаси норезидентларининг ҳомийлик хайриялари;
халқаро молия институтлари ва донор ташкилотлар маблағлари;
қонун ҳужжатларида тақиқланмаган бошқа манбалар.
4. Ўзбекистон Республикаси Ўрмон хўжалиги давлат қўмитаси Қорақалпоғистон Республикаси Вазирлар Кенгаши, Бухоро ва Хоразм вилоятлари ҳокимликлари билан биргаликда Бухоро, Нукус, Хива ва Урганч шаҳарлари атрофида «яшил белбоғ» барпо этишга оид лойиҳалар бўйича:
бир ой муддатда лойиҳа-смета ҳужжатлари ишлаб чиқилишини;
икки ой муддатда экспертизадан ўтказиш, бош пудрат ташкилотларини тендер савдолари асосида аниқлаш ҳамда тегишли шартномаларни расмийлаштириш ишларини якунласин.
5. Қорақалпоғистон Республикаси Вазирлар Кенгаши, Бухоро ва Хоразм вилоятлари ҳокимликлари Ўзбекистон Республикаси Экология ва атроф-муҳитни муҳофаза қилиш давлат қўмитаси билан биргаликда «яшил белбоғ» барпо этилган ҳудудлардаги дарахтзорларга шикаст етказиш, уларни пайҳон қилишдан сақлаш, парваришлаш ҳамда касаллик ва зараркунандаларга қарши курашиш ишларини самарали ташкил этсин.
6. Белгилансинки:
пудратчи ташкилотлар «яшил белбоғ» барпо этиб, далолатнома асосида ер эгаларига топширади;
Ўзбекистон Республикаси Ўрмон хўжалиги давлат қўмитаси «яшил белбоғ» барпо этишда ҳудудларнинг иқлим шароитларига мос, манзарали дарахт-бута ўсимликларининг кўчатлари етказиб берилишини таъминлайди.
7. Мазкур фармойишнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ў.И. Барноев, Ўрмон хўжалиги давлат қўмитаси раиси Н.Ж. Бакиров, Қорақалпоғистон Республикаси Вазирлар Кенгаши Раиси Қ.Р. Сариев, Бухоро вилояти ҳокими вазифасини бажарувчи К.Ж. Камолов ҳамда Хоразм вилояти ҳокими Ф.Ў. Эрманов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 8 май,
238-Ф-сон
Oʻzbekiston Respublikasi Vazirlar Mahkamasining
farmoyishi
Qoraqalpogʻiston Respublikasi, Buxoro va Xorazm viloyatlarida aholining yashash sharoitini yanada yaxshilash, ekologik holatni sogʻlomlashtirish, Buxoro, Nukus, Xiva va Urganch shaharlarini shamol taʼsiridan himoyalash, tuproq eroziyasining oldini olish, qumlar koʻchishini bartaraf etish hamda mintaqada moʻtadil mikroiqlim sharoitini yaratish maqsadida:
1. Oʻzbekiston Respublikasi Oʻrmon xoʻjaligi davlat qoʻmitasi, Favqulodda vaziyatlar vazirligi, Ekologiya va atrof-muhitni muhofaza qilish davlat qoʻmitasi, Qoraqalpogʻiston Respublikasi Vazirlar Kengashi, Buxoro va Xorazm viloyatlari hokimliklarining Buxoro, Nukus, Xiva va Urganch shaharlari atrofida 2020-2021-yillarda jami 30 km masofada “yashil belbogʻ” — himoya daraxtzorlari (keyingi oʻrinlarda — “yashil belbogʻ”) barpo etish toʻgʻrisidagi taklifiga rozilik berilsin.
2. Qoraqalpogʻiston Respublikasi Vazirlar Kengashi, Buxoro va Xorazm viloyatlari hokimliklari Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi hamda Oʻrmon xoʻjaligi davlat qoʻmitasi bilan birgalikda yer maydonlari tanlanilishini va loyiha-smeta hujjatlari ishlab chiqilishini, shuningdek, Buxoro, Nukus, Xiva va Urganch shaharlari atrofida 2020-2021-yillarda jami 30 km masofada “yashil belbogʻ” barpo etilishini hamda ushbu ishlarning oʻz vaqtida moliyalashtirilishini taʼminlasin.
3. Quyidagilar 2020-2021-yillar davomida “yashil belbogʻ” barpo etish bilan bogʻliq ishlarni moliyalashtirish manbalari etib belgilansin:
Oʻzbekiston Respublikasi Ekologiya va atrof-muhitni muhofaza qilish davlat qoʻmitasining Ekologiya, atrof-muhitni muhofaza qilish va chiqindilar bilan bogʻliq ishlarni amalga oshirish jamgʻarmasi mablagʻlari;
Oʻzbekiston Respublikasi Oʻrmon xoʻjaligi davlat qoʻmitasining Oʻrmon xoʻjaligini rivojlantirish jamgʻarmasi mablagʻlari;
Qoraqalpogʻiston Respublikasi, Buxoro va Xorazm viloyatlari mahalliy budjetlarida belgilangan prognoz koʻrsatkichlarining orttirib bajarilgan qismi hisobidagi mablagʻlari;
yuridik va jismoniy shaxslarning, shu jumladan Oʻzbekiston Respublikasi norezidentlarining homiylik xayriyalari;
xalqaro moliya institutlari va donor tashkilotlar mablagʻlari;
qonun hujjatlarida taqiqlanmagan boshqa manbalar.
4. Oʻzbekiston Respublikasi Oʻrmon xoʻjaligi davlat qoʻmitasi Qoraqalpogʻiston Respublikasi Vazirlar Kengashi, Buxoro va Xorazm viloyatlari hokimliklari bilan birgalikda Buxoro, Nukus, Xiva va Urganch shaharlari atrofida “yashil belbogʻ” barpo etishga oid loyihalar boʻyicha:
bir oy muddatda loyiha-smeta hujjatlari ishlab chiqilishini;
ikki oy muddatda ekspertizadan oʻtkazish, bosh pudrat tashkilotlarini tender savdolari asosida aniqlash hamda tegishli shartnomalarni rasmiylashtirish ishlarini yakunlasin.
5. Qoraqalpogʻiston Respublikasi Vazirlar Kengashi, Buxoro va Xorazm viloyatlari hokimliklari Oʻzbekiston Respublikasi Ekologiya va atrof-muhitni muhofaza qilish davlat qoʻmitasi bilan birgalikda “yashil belbogʻ” barpo etilgan hududlardagi daraxtzorlarga shikast yetkazish, ularni payhon qilishdan saqlash, parvarishlash hamda kasallik va zararkunandalarga qarshi kurashish ishlarini samarali tashkil etsin.
6. Belgilansinki:
pudratchi tashkilotlar “yashil belbogʻ” barpo etib, dalolatnoma asosida yer egalariga topshiradi;
Oʻzbekiston Respublikasi Oʻrmon xoʻjaligi davlat qoʻmitasi “yashil belbogʻ” barpo etishda hududlarning iqlim sharoitlariga mos, manzarali daraxt-buta oʻsimliklarining koʻchatlari yetkazib berilishini taʼminlaydi.
7. Mazkur farmoyishning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Oʻ.I. Barnoyev, Oʻrmon xoʻjaligi davlat qoʻmitasi raisi N.J. Bakirov, Qoraqalpogʻiston Respublikasi Vazirlar Kengashi Raisi Q.R. Sariyev, Buxoro viloyati hokimi vazifasini bajaruvchi K.J. Kamolov hamda Xorazm viloyati hokimi F.Oʻ. Ermanov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 8-may,
238-F-son