📅 2020-yil 11-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 11 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 11 мая 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 11 May 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
фармойиши
Ўзбекистон Республикаси Президентининг «Халқаро молия институтлари ва хорижий ҳукумат молия ташкилотлари иштирокидаги лойиҳаларни тайёрлаш ва амалга ошириш самарадорлигини ошириш чора-тадбирлари тўғрисида» 2018 йил 16 июлдаги ПҚ-3857-сон қарорига мувофиқ, шунингдек, маҳаллий илмий-амалий ва инновацион лойиҳалар ҳамда ишланмаларни амалиётга жорий этиш, республикада илм-фан ва инновацион ривожланиш самарадорлигини ошириш ҳамда илм-фан ва ишлаб чиқаришда самарали интеграция яратиш, комплекс ривожлантиришнинг замонавий талабларини ҳисобга олган ҳолда инновацион инфратузилмани шакллантириш мақсадида:
1. Ўзбекистон Республикаси Инновацион ривожланиш вазирлиги, Инвестициялар ва ташқи савдо вазирлиги ҳамда Молия вазирлигининг таклифига кўра, «Илм-фанни тижоратлаштириш» лойиҳаси (кейинги ўринларда — лойиҳа) концепцияси ишлаб чиқилганлиги ва уни амалга оширишни молиялаштиришда иштирок этиш учун Жаҳон банки билан келишувга эришилганлиги;
лойиҳани тайёрлаш учун Ўзбекистон Республикаси ва Жаҳон банки ўртасида алоҳида имзоланадиган Бўнак келишуви (кейинги ўринларда — Бўнак келишуви) доирасида 1 924 минг АҚШ доллари кредит сифатида ажратилиши маъқулланганлиги маълумот учун қабул қилинсин.
2. Бўнак келишуви доирасида ажратиладиган кредит маблағларидан қуйидаги мақсадларда фойдаланилади:
илмий-тадқиқот ишлари ва инновацияларни халқаро бозорда тижоратлаштиришга хизмат қилувчи электрон портал ишлаб чиқиш;
лойиҳани амалга ошириш гуруҳини (кейинги ўринларда — ЛАОГ) тузиш ва унинг ходимлари меҳнатига ҳақ тўлаш, уларнинг малакасини ошириш ҳамда олиб бориладиган иш жараёнлари учун тартибли техник-иқтисодий асослар ишлаб чиқиш;
амалдаги илмий дастурлар, молиялаштириш механизмлари, илмий аудит ва техник экспертиза жараёнларини амалга ошириш ва бошқа масалалар.
3. Белгилаб қўйилсинки:
Ўзбекистон Республикаси Инновацион ривожланиш вазирлиги лойиҳани амалга ошириш, мониторинг қилиш, Жаҳон банкининг ажратилган кредитларидан самарали ва мақсадли фойдаланишни назорат қилувчи ижро этувчи орган (кейинги ўринларда — ижро этувчи орган) ҳисобланади;
лойиҳа доирасида амалга ошириладиган ишлар ва хизматларни мувофиқлаштиришни таъминлаш учун ижро этувчи орган ҳузурида умумий штат бирлиги 12 нафардан ошмаган ЛАОГ тузилади;
ЛАОГ ходимларига ҳақ тўлаш ва лойиҳани тайёрлаш бўйича бошқа харажатлар белгиланган тартибда Жаҳон банки кредитлари ҳисобидан қопланади.
4. Қуйидаги масалалар белгиланган тартибда амалга оширилади:
ЛАОГ тузилмаси ва штат жадвалини тасдиқлаш;
ЛАОГ раҳбари ва ходимларини лавозимига тайинлаш ва лавозимидан озод этиш;
лойиҳанинг мақсад ва вазифаларини бажариш, шунингдек, лойиҳанинг техник-иқтисодий асосини ишлаб чиқиш учун маҳаллий ва хорижий мутахассислар, экспертлар ҳамда олимларни шартнома асосида жалб қилиш.
5. Ўзбекистон Республикаси Инновацион ривожланиш вазирлиги Инвестициялар ва ташқи савдо вазирлиги билан биргаликда лойиҳани самарали амалга ошириш учун тайёргарликни ташкил этиш, Жаҳон банкининг розилиги асосида 50,0 млн АҚШ доллари миқдоридаги имтиёзли кредитларини жалб қилиш, лойиҳанинг техник-иқтисодий асосини ЛАОГ томонидан ишлаб чиқиш чораларини кўрсин.
Лойиҳа маблағлари тижоратлаштириш учун муҳим бўлган илмий-тадқиқот ишлари ҳамда инновацияларни молиялаштириш учун янги тизим яратиш мақсадида қуйидаги вазифаларга йўналтирилади:
Ўзбекистон олимлари томонидан халқаро стандартларга мувофиқ тадқиқотлар ўтказиш;
ички бозор ва экспорт бозорлари учун янги ёки такомиллаштирилган маҳсулотлар, технологиялар, шунингдек, жараёнларни ишлаб чиқиш учун йўналтирилган инновацион ва тижоратлаштиришга қаратилган илмий тадқиқот ишларини маҳаллий корхоналар билан ҳамкорликда қўллаб-қувватлаш;
илмий, инновацион ва тижоратлаштириш лойиҳаларини саралаб танлаш ва мониторингини амалга ошириш бўйича халқаро эксперт кенгаши ҳамда технологиялар трансфери офисини ташкил этиш;
коронавирус инфекцияси ва шу каби касалликларнинг олдини олиш ҳамда уларни даволаш каби илмий тадқиқотларни самарали олиб бориш учун республикадаги вирусология, микробиология, фармацевтика ва эпидемиология йўналишидаги илмий ташкилотларни модернизация қилиш, асбоб-ускуналар ва бутловчи материалларни сотиб олиш.
6. Белгилансинки:
тижорат банкларида ЛАОГ томонидан амалга оширилаётган лойиҳалар учун алоҳида депозит ҳисобварақлари очилади. Лойиҳаларни молиялаштириш учун очилган ҳисобварақлари ЛАОГнинг бошқа лойиҳалари бўйича мажбуриятларни қоплаш учун маблағларни ҳисобдан чиқаришга йўл қўйилмайди;
ижро этувчи орган ва ЛАОГ лойиҳани ўз вақтида ва сифатли амалга ошириш учун иштирок этувчи молиявий ташкилотлар (тижорат банклари, лизинг ва микрокредит ташкилотлари) билан биргаликда масъулдир.
7. Ўзбекистон Республикаси инновацион ривожланиш вазирига Ўзбекистон Республикаси Ҳукумати номидан лойиҳа доирасида Жаҳон банки билан ўзаро кредит шартномасини имзолашга рухсат берилсин.
8. Мазкур фармойишнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — Ўзбекистон Республикаси иқтисодий тараққиёт ва камбағалликни қисқартириш вазири Ж.А. Қўчқоров ҳамда Ўзбекистон Республикаси инновацион ривожланиш вазири И.Ю. Абдураҳмонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 11 май,
239-Ф-сон
Oʻzbekiston Respublikasi Vazirlar Mahkamasining
farmoyishi
Oʻzbekiston Respublikasi Prezidentining “Xalqaro moliya institutlari va xorijiy hukumat moliya tashkilotlari ishtirokidagi loyihalarni tayyorlash va amalga oshirish samaradorligini oshirish chora-tadbirlari toʻgʻrisida” 2018-yil 16-iyuldagi PQ-3857-son qaroriga muvofiq, shuningdek, mahalliy ilmiy-amaliy va innovatsion loyihalar hamda ishlanmalarni amaliyotga joriy etish, respublikada ilm-fan va innovatsion rivojlanish samaradorligini oshirish hamda ilm-fan va ishlab chiqarishda samarali integratsiya yaratish, kompleks rivojlantirishning zamonaviy talablarini hisobga olgan holda innovatsion infratuzilmani shakllantirish maqsadida:
1. Oʻzbekiston Respublikasi Innovatsion rivojlanish vazirligi, Investitsiyalar va tashqi savdo vazirligi hamda Moliya vazirligining taklifiga koʻra, “Ilm-fanni tijoratlashtirish” loyihasi (keyingi oʻrinlarda — loyiha) konsepsiyasi ishlab chiqilganligi va uni amalga oshirishni moliyalashtirishda ishtirok etish uchun Jahon banki bilan kelishuvga erishilganligi;
loyihani tayyorlash uchun Oʻzbekiston Respublikasi va Jahon banki oʻrtasida alohida imzolanadigan Boʻnak kelishuvi (keyingi oʻrinlarda — Boʻnak kelishuvi) doirasida 1 924 ming AQSh dollari kredit sifatida ajratilishi maʼqullanganligi maʼlumot uchun qabul qilinsin.
2. Boʻnak kelishuvi doirasida ajratiladigan kredit mablagʻlaridan quyidagi maqsadlarda foydalaniladi:
ilmiy-tadqiqot ishlari va innovatsiyalarni xalqaro bozorda tijoratlashtirishga xizmat qiluvchi elektron portal ishlab chiqish;
loyihani amalga oshirish guruhini (keyingi oʻrinlarda — LAOG) tuzish va uning xodimlari mehnatiga haq toʻlash, ularning malakasini oshirish hamda olib boriladigan ish jarayonlari uchun tartibli texnik-iqtisodiy asoslar ishlab chiqish;
amaldagi ilmiy dasturlar, moliyalashtirish mexanizmlari, ilmiy audit va texnik ekspertiza jarayonlarini amalga oshirish va boshqa masalalar.
3. Belgilab qoʻyilsinki:
Oʻzbekiston Respublikasi Innovatsion rivojlanish vazirligi loyihani amalga oshirish, monitoring qilish, Jahon bankining ajratilgan kreditlaridan samarali va maqsadli foydalanishni nazorat qiluvchi ijro etuvchi organ (keyingi oʻrinlarda — ijro etuvchi organ) hisoblanadi;
loyiha doirasida amalga oshiriladigan ishlar va xizmatlarni muvofiqlashtirishni taʼminlash uchun ijro etuvchi organ huzurida umumiy shtat birligi 12 nafardan oshmagan LAOG tuziladi;
LAOG xodimlariga haq toʻlash va loyihani tayyorlash boʻyicha boshqa xarajatlar belgilangan tartibda Jahon banki kreditlari hisobidan qoplanadi.
4. Quyidagi masalalar belgilangan tartibda amalga oshiriladi:
LAOG tuzilmasi va shtat jadvalini tasdiqlash;
LAOG rahbari va xodimlarini lavozimiga tayinlash va lavozimidan ozod etish;
loyihaning maqsad va vazifalarini bajarish, shuningdek, loyihaning texnik-iqtisodiy asosini ishlab chiqish uchun mahalliy va xorijiy mutaxassislar, ekspertlar hamda olimlarni shartnoma asosida jalb qilish.
5. Oʻzbekiston Respublikasi Innovatsion rivojlanish vazirligi Investitsiyalar va tashqi savdo vazirligi bilan birgalikda loyihani samarali amalga oshirish uchun tayyorgarlikni tashkil etish, Jahon bankining roziligi asosida 50,0 mln AQSh dollari miqdoridagi imtiyozli kreditlarini jalb qilish, loyihaning texnik-iqtisodiy asosini LAOG tomonidan ishlab chiqish choralarini koʻrsin.
Loyiha mablagʻlari tijoratlashtirish uchun muhim boʻlgan ilmiy-tadqiqot ishlari hamda innovatsiyalarni moliyalashtirish uchun yangi tizim yaratish maqsadida quyidagi vazifalarga yoʻnaltiriladi:
Oʻzbekiston olimlari tomonidan xalqaro standartlarga muvofiq tadqiqotlar oʻtkazish;
ichki bozor va eksport bozorlari uchun yangi yoki takomillashtirilgan mahsulotlar, texnologiyalar, shuningdek, jarayonlarni ishlab chiqish uchun yoʻnaltirilgan innovatsion va tijoratlashtirishga qaratilgan ilmiy tadqiqot ishlarini mahalliy korxonalar bilan hamkorlikda qoʻllab-quvvatlash;
ilmiy, innovatsion va tijoratlashtirish loyihalarini saralab tanlash va monitoringini amalga oshirish boʻyicha xalqaro ekspert kengashi hamda texnologiyalar transferi ofisini tashkil etish;
koronavirus infeksiyasi va shu kabi kasalliklarning oldini olish hamda ularni davolash kabi ilmiy tadqiqotlarni samarali olib borish uchun respublikadagi virusologiya, mikrobiologiya, farmatsevtika va epidemiologiya yoʻnalishidagi ilmiy tashkilotlarni modernizatsiya qilish, asbob-uskunalar va butlovchi materiallarni sotib olish.
6. Belgilansinki:
tijorat banklarida LAOG tomonidan amalga oshirilayotgan loyihalar uchun alohida depozit hisobvaraqlari ochiladi. Loyihalarni moliyalashtirish uchun ochilgan hisobvaraqlari LAOGning boshqa loyihalari boʻyicha majburiyatlarni qoplash uchun mablagʻlarni hisobdan chiqarishga yoʻl qoʻyilmaydi;
ijro etuvchi organ va LAOG loyihani oʻz vaqtida va sifatli amalga oshirish uchun ishtirok etuvchi moliyaviy tashkilotlar (tijorat banklari, lizing va mikrokredit tashkilotlari) bilan birgalikda masʼuldir.
7. Oʻzbekiston Respublikasi innovatsion rivojlanish vaziriga Oʻzbekiston Respublikasi Hukumati nomidan loyiha doirasida Jahon banki bilan oʻzaro kredit shartnomasini imzolashga ruxsat berilsin.
8. Mazkur farmoyishning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — Oʻzbekiston Respublikasi iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Oʻzbekiston Respublikasi innovatsion rivojlanish vaziri I.Y. Abdurahmonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 11-may,
239-F-son