📅 2020-yil 11-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 11 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 11 мая 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 11 May 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
фармойиш
Сўнгги йилларда республика нефть-газ тармоғида корпоратив бошқарув тизимини такомиллаштириш, ишлаб чиқариш қувватларини, шу жумладан магистрал газ-транспорт тизимини модернизация қилиш ва технологик янгилашга қаратилган кенг кўламли ислоҳотлар амалга оширилмоқда.
Республика магистрал газ-транспорт тизимидаги жисмонан ва маънан эскирган газ қувурлари участкалари, компрессор станцияларининг газ хайдаш агрегатларини янгилаш ва модернизация қилиш ҳамда тизимни 2030 йилгача ривожлантириш дастурининг бош режасини (Gas Master Plan) хорижий молиявий институтлар билан биргаликда 2020 йил сентябрь ойигача ишлаб чиқиш бўйича ҳамкорликда ишлар олиб борилмоқда.
Газ-транспорт тизимида фаолият юритаётган корхоналарнинг мавжуд қувватлари ва ресурсларидан фойдаланиш самарадорлигини ошириш, уларнинг корпоратив бошқарув тизимини такомиллаштириш мақсадида:
1. Қуйидагилар:
а) «Ўзбекнефтгаз» миллий холдинг компанияси ва Хитой Миллий Нефтгаз Корпорацияси ўртасида «Ўзбекистон-Хитой» газ қувурини қуриш ва фойдаланиш тамойиллари тўғрисида 2007 йил 31 июлда имзоланган Битимга мувофиқ томонларнинг 50 фоиздан тенг улушларда иштирок этиши асосида «Asia Trans Gas» МЧЖ қўшма корхонаси (кейинги ўринларда — қўшма корхона) ташкил этилганлиги;
б) қўшма корхона томонидан:
умумий узунлиги 1 587 км бўлган «Ўзбекистон-Хитой» газ қувурининг биринчи ва иккинчи тармоғи 2010 йилда, учинчи тармоғи 2012 йилда қуриб ишга туширилганлиги;
2010 — 2019 йиллар давомида газ қувури орқали шарқий йўналишда — Хитой Халқ Республикасига жами 291,5 млрд куб м 2 ортиқ табиий газ узатилганлиги;
в) Ўзбекистан Республикаси Президентининг «Аҳоли ва иқтисодиётни энергия ресурслари билан барқарор таъминлаш, нефть-газ тармоғини молиявий соғломлаштириш ва унинг бошқарув тизимини такомиллаштириш чора-тадбирлари тўғрисида» 2019 йил 9 июлдаги ПҚ-4388-сон қарорига мувофиқ «Ўзтрансгаз» акциядорлик жамиятига:
табиий газни кейинчалик ягона оператор сифатида етказиб бериш, жумладан экспорт ва импорт қилиш учун газ қазиб олувчи ва қайта ишловчи ташкилотлар, шу жумладан маҳсулот тақсимотига оид битимлар асосида фаолият юритувчи қўшма корхоналар ва хорижий компаниялардан харид қилиш;
тўғридан-тўғри шартномалар асосида магистрал газ қувурига уланган истеъмолчиларга, шунингдек, «Ҳудудгазтаъминот» АЖ билан комиссия шартномалари асосида газ тақсимлаш тармоқларига уланган истеъмолчиларга табиий газни сотиш функциялари юкланганлиги маълумот учун қабул қилинсин.
2. Ўзбекистон Республикаси Энергетика вазирлиги ва Давлат активларини бошқариш агентлигининг қўшма корхона устав капиталидаги «Ўзбекнефтгаз» АЖга тегишли бўлган 50 фоиз миқдоридаги улушини «Ўзтрансгаз» АЖнинг устав капиталига бериш орқали «Ўзбекнефтгаз» АЖни қўшма корхона таъсисчилари сафидан чиқариш тўғрисидаги таклифига розилик берилсин.
3. Нефть ва газ тармоғи ташкилотларининг коронавирус пандемияси даврида молиявий барқарорлигини таъминлаш ҳамда қўшма корхона устав капиталидаги тегишли улушни «Ўзбекнефтгаз» АЖ ва «Ўзтрансгаз» АЖ ўртасида топширилиши-қабул қилинишида вужудга келиши мумкин бўлган мажбурий тўловлар юкини мақбуллаштириш мақсадида, истисно тариқасида, ушбу улушни «Ўзтрансгаз» АЖ устав капиталига ўтаазилиши бепул асосда амалга оширилиши белгилаб қўйилсин.
4. Ўзбекистон Республикаси Давлат активларини бошқариш агентлиги, «Ўзбекнефтгаз» АЖ ва «Ўзтрансгаз» АЖ белгиланган тартибда ушбу фармойишнинг 2-бандида назарда тутилган қўшма корхона устав капиталидаги тегишли улушни томонлар ўртасида топширилиши-қабул қилинишини ҳамда ушбу масала билан боғлиқ тегишли бошқарув органларининг қарорлари қабул қилинишини таъминласинлар.
5. Ўзбекистон Республикаси Энергетика вазирлиги «Ўзбекнефтгаз» АЖ ва «Ўзтрансгаз» АЖ билан биргаликда ушбу фармойиш талабларидан келиб чиққан холда, «Ўзбекистон Республикаси Ҳукумати билан Хитой Халқ Республикаси Ҳукумати ўртасида 2007 йил 30 апрелда тузилган «Ўзбекистон-Хитой» газ-қувурини қуриш ва фойдаланиш тамойиллари тўғрисида»ги Битимга тегишли ўзгартиришлар киритилишини ўрнатилган тартибда таъминлаш чораларини кўрсин.
6. Мазкур фармойишнинг ижросини назорат қилиш Ўзбекистон Республикаси энергетика вазири А.С. Султанов ва Ўзбекистон Республикаси Давлат активларини бошқариш агентлиги директори С.Х. Бекенов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 11 май,
240-Ф-сон
Oʻzbekiston Respublikasi Vazirlar Mahkamasining
farmoyish
Soʻnggi yillarda respublika neft-gaz tarmogʻida korporativ boshqaruv tizimini takomillashtirish, ishlab chiqarish quvvatlarini, shu jumladan magistral gaz-transport tizimini modernizatsiya qilish va texnologik yangilashga qaratilgan keng koʻlamli islohotlar amalga oshirilmoqda.
Respublika magistral gaz-transport tizimidagi jismonan va maʼnan eskirgan gaz quvurlari uchastkalari, kompressor stansiyalarining gaz xaydash agregatlarini yangilash va modernizatsiya qilish hamda tizimni 2030-yilgacha rivojlantirish dasturining bosh rejasini (Gas Master Plan) xorijiy moliyaviy institutlar bilan birgalikda 2020-yil sentyabr oyigacha ishlab chiqish boʻyicha hamkorlikda ishlar olib borilmoqda.
Gaz-transport tizimida faoliyat yuritayotgan korxonalarning mavjud quvvatlari va resurslaridan foydalanish samaradorligini oshirish, ularning korporativ boshqaruv tizimini takomillashtirish maqsadida:
1. Quyidagilar:
a) “Oʻzbekneftgaz” milliy xolding kompaniyasi va Xitoy Milliy Neftgaz Korporatsiyasi oʻrtasida “Oʻzbekiston-Xitoy” gaz quvurini qurish va foydalanish tamoyillari toʻgʻrisida 2007-yil 31-iyulda imzolangan Bitimga muvofiq tomonlarning 50 foizdan teng ulushlarda ishtirok etishi asosida “Asia Trans Gas” MChJ qoʻshma korxonasi (keyingi oʻrinlarda — qoʻshma korxona) tashkil etilganligi;
b) qoʻshma korxona tomonidan:
umumiy uzunligi 1 587 km boʻlgan “Oʻzbekiston-Xitoy” gaz quvurining birinchi va ikkinchi tarmogʻi 2010-yilda, uchinchi tarmogʻi 2012-yilda qurib ishga tushirilganligi;
2010 — 2019-yillar davomida gaz quvuri orqali sharqiy yoʻnalishda — Xitoy Xalq Respublikasiga jami 291,5 mlrd kub m 2 ortiq tabiiy gaz uzatilganligi;
v) Oʻzbekistan Respublikasi Prezidentining “Aholi va iqtisodiyotni energiya resurslari bilan barqaror taʼminlash, neft-gaz tarmogʻini moliyaviy sogʻlomlashtirish va uning boshqaruv tizimini takomillashtirish chora-tadbirlari toʻgʻrisida” 2019-yil 9-iyuldagi PQ-4388-son qaroriga muvofiq “Oʻztransgaz” aksiyadorlik jamiyatiga:
tabiiy gazni keyinchalik yagona operator sifatida yetkazib berish, jumladan eksport va import qilish uchun gaz qazib oluvchi va qayta ishlovchi tashkilotlar, shu jumladan mahsulot taqsimotiga oid bitimlar asosida faoliyat yurituvchi qoʻshma korxonalar va xorijiy kompaniyalardan xarid qilish;
toʻgʻridan toʻgʻri shartnomalar asosida magistral gaz quvuriga ulangan isteʼmolchilarga, shuningdek, “Hududgaztaʼminot” AJ bilan komissiya shartnomalari asosida gaz taqsimlash tarmoqlariga ulangan isteʼmolchilarga tabiiy gazni sotish funksiyalari yuklanganligi maʼlumot uchun qabul qilinsin.
2. Oʻzbekiston Respublikasi Energetika vazirligi va Davlat aktivlarini boshqarish agentligining qoʻshma korxona ustav kapitalidagi “Oʻzbekneftgaz” AJga tegishli boʻlgan 50 foiz miqdoridagi ulushini “Oʻztransgaz” AJning ustav kapitaliga berish orqali “Oʻzbekneftgaz” AJni qoʻshma korxona taʼsischilari safidan chiqarish toʻgʻrisidagi taklifiga rozilik berilsin.
3. Neft va gaz tarmogʻi tashkilotlarining koronavirus pandemiyasi davrida moliyaviy barqarorligini taʼminlash hamda qoʻshma korxona ustav kapitalidagi tegishli ulushni “Oʻzbekneftgaz” AJ va “Oʻztransgaz” AJ oʻrtasida topshirilishi-qabul qilinishida vujudga kelishi mumkin boʻlgan majburiy toʻlovlar yukini maqbullashtirish maqsadida, istisno tariqasida, ushbu ulushni “Oʻztransgaz” AJ ustav kapitaliga oʻtaazilishi bepul asosda amalga oshirilishi belgilab qoʻyilsin.
4. Oʻzbekiston Respublikasi Davlat aktivlarini boshqarish agentligi, “Oʻzbekneftgaz” AJ va “Oʻztransgaz” AJ belgilangan tartibda ushbu farmoyishning 2-bandida nazarda tutilgan qoʻshma korxona ustav kapitalidagi tegishli ulushni tomonlar oʻrtasida topshirilishi-qabul qilinishini hamda ushbu masala bilan bogʻliq tegishli boshqaruv organlarining qarorlari qabul qilinishini taʼminlasinlar.
5. Oʻzbekiston Respublikasi Energetika vazirligi “Oʻzbekneftgaz” AJ va “Oʻztransgaz” AJ bilan birgalikda ushbu farmoyish talablaridan kelib chiqqan xolda, “Oʻzbekiston Respublikasi Hukumati bilan Xitoy Xalq Respublikasi Hukumati oʻrtasida 2007-yil 30-aprelda tuzilgan “Oʻzbekiston-Xitoy” gaz-quvurini qurish va foydalanish tamoyillari toʻgʻrisida”gi Bitimga tegishli oʻzgartirishlar kiritilishini oʻrnatilgan tartibda taʼminlash choralarini koʻrsin.
6. Mazkur farmoyishning ijrosini nazorat qilish Oʻzbekiston Respublikasi energetika vaziri A.S. Sultanov va Oʻzbekiston Respublikasi Davlat aktivlarini boshqarish agentligi direktori S.X. Bekenov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 11-may,
240-F-son