📅 2020-yil 11-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 11 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 11 мая 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 11 May 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«Ўзкимёсаноат» АЖ таркибидаги корхоналарнинг молиявий ҳолатини соғломлаштириш ва тўлов қобилиятини мустаҳкамлашга доир қўшимча чора-тадбирлар тўғрисида
«Ўзкимёсаноат» АЖ таркибига кирувчи «Фарғонаазот» АЖнинг ишлаб чиқариш қувватларини модернизация қилиш ва кенгайтириш, молиявий ҳолатини соғломлаштириш орқали жамиятнинг инвестициявий жозибадорлигини янада ошириш мақсадида Вазирлар Маҳкамаси қаpop қилади:
1. Қуйидагилар:
а) 2001 — 2003 йилларда Ўзбекистон Республикаси давлат кафолатлари остида «Ўзбекистон Республикаси Ташқи иқтисодий фаолият миллий банки» АЖ (кейинги ўринларда — Ўзмиллийбанк) кредитларини жалб этган ҳолда Ўзбекистон Республикаси Вазирлар Маҳкамасининг:
«Фарғона «Азот» ишлаб чиқариш бирлашмасида натрий хлорат ва магний хлорат дефолианти ишлаб чиқаришларини реконструкция қилиш чора-тадбирлари тўғрисида» 1999 йил 28 январдаги 41-сон қарорига мувофиқ йилига 20 минг тонна натрий хлорат ва 11,8 минг тонна магний хлорат дефолианти ишлаб чиқариш қувватига эга бўлган ишлаб чиқаришлар реконструкция қилинганлиги;
«Фарғона «Азот» ишлаб чиқариш бирлашмасида концентрацияланмаган азот кислотаси ва аммиакли селитра ишлаб чиқаришлари қурилишини тугаллаш чора-тадбирлари тўғрисида» 1999 йил 30 октябрдаги 484-сон қарорига мувофиқ йилига 360 минг тонна концентрацияланмаган азот кислотаси ва 450 минг тонна аммиакли селитра ишлаб чиқариш қувватига эга бўлган ишлаб чиқаришлар қурилиши амалга оширилганлиги;
б) «Фарғонаазот» АЖда ишлаб чиқариладиган маҳсулотларга талабнинг мавсумийлиги, молиявий-иқтисодий ҳолатга салбий таъсир кўрсатган бошқа омиллар ҳисобига Ўзмиллийбанк томонидан ажратилган кредитлардан умумий қарздорлик суммаси 2020 йилнинг 1 январь ҳолатига кўра 35,8 млн долларни, шундан: асосий карз — 3,3 млн доллар, фоизлар — 32,5 млн долларни ташкил этганлиги;
Ўзмиллийбанк ва «Ўзкимёсаноат» АЖ томонидан мазкур қарздорликни миллий валютага ўзгартирган ҳолда тўлов муддатини 2022 йилнинг декабрь ойига қадар узайтиришни кўзда тутган ҳолда кредит шартномалари шартларига ўзгартириш киритиш тўғрисида таклиф киритилганлиги маълумот учун қабул қилинсин.
2. «Ўзкимёсаноат» АЖ ва Ўзмиллийбанкнинг:
«Фарғонаазот» АЖ инвестиция лойиҳаларини молиялаштириш учун Ўзмиллийбанк томонидан хорижий валютада ажратилган кредит суммасини қайтариш муддатини 2022 йил декабрга қадар узайтириш ва белгиланган тартибда расмийлаштириш;
Ўзмиллийбанкка «Фарғонаазот» АЖнинг инвестиция лойиҳаларини молиялаштириш учун ажратилган кредит қолдиқларини миллий валютага конвертация қилиш ҳамда улар бўйича фоиз ставкаларини Ўзбекистон Республикаси Марказий банкининг қайта молиялаштириш ставкаси даражасида белгилаш тўғрисидаги таклифларига розилик берилсин.
3. Ўзбекистон Республикаси Молия вазирлиги мазкур қарор талабларидан келиб чиқиб, «Ўзкимёсаноат» АЖ ва «Фарғонаазот» АЖ томонидан кредит мажбуриятларининг бажарилиши юзасидан Ўзмиллийбанкка берилган давлат кафолатларини қайта расмийлаштирсин.
4. «Ўзкимёсаноат» АЖ Ўзбекистон Республикаси Иқтисодий тараққиёт ва камбағалликни қисқартириш вазирлиги билан биргаликда бир ой муддатда «Фарғонаазот» АЖ молиявий ҳолатини соғломлаштириш ва тўлов қобилиятини мустаҳкамлаш, шунингдек, натрий хлорат, магний хлорат дефолианти, концентрацияланмаган азот кислотаси ва аммиакли селитра ишлаб чиқаришлари қувватларидан самарали фойдаланган ҳолда Ўзмиллийбанк олдидаги кредит қарздорлигини ўз вақтида ва тўлиқ сўндиришнинг қўшимча чора-тадбирларини ишлаб чиқиб, уларнинг белгиланган муддатларда амалга оширилишини таъминласин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — Ўзбекистон Республикаси иқтисодий тараққиёт ва камбағалликни қисқартириш вазири Ж.А. Қўчқоров, Ўзбекистон Республикаси Молия вазири Т.А. Ишметов ва «Ўзбекистон Республикаси Ташқи иқтисодий фаолият миллий банки» АЖ раиси А.К. Мирсоатов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 11 май,
276-сон
Oʻzbekiston Respublikasi Vazirlar Mahkamasining
qarori
“Oʻzkimyosanoat” AJ tarkibidagi korxonalarning moliyaviy holatini sogʻlomlashtirish va toʻlov qobiliyatini mustahkamlashga doir qoʻshimcha chora-tadbirlar toʻgʻrisida
“Oʻzkimyosanoat” AJ tarkibiga kiruvchi “Fargʻonaazot” AJning ishlab chiqarish quvvatlarini modernizatsiya qilish va kengaytirish, moliyaviy holatini sogʻlomlashtirish orqali jamiyatning investitsiyaviy jozibadorligini yanada oshirish maqsadida Vazirlar Mahkamasi qarop qiladi:
1. Quyidagilar:
a) 2001 — 2003-yillarda Oʻzbekiston Respublikasi davlat kafolatlari ostida “Oʻzbekiston Respublikasi Tashqi iqtisodiy faoliyat milliy banki” AJ (keyingi oʻrinlarda — Oʻzmilliybank) kreditlarini jalb etgan holda Oʻzbekiston Respublikasi Vazirlar Mahkamasining:
“Fargʻona “Azot” ishlab chiqarish birlashmasida natriy xlorat va magniy xlorat defolianti ishlab chiqarishlarini rekonstruksiya qilish chora-tadbirlari toʻgʻrisida” 1999-yil 28-yanvardagi 41-son qaroriga muvofiq yiliga 20 ming tonna natriy xlorat va 11,8 ming tonna magniy xlorat defolianti ishlab chiqarish quvvatiga ega boʻlgan ishlab chiqarishlar rekonstruksiya qilinganligi;
“Fargʻona “Azot” ishlab chiqarish birlashmasida konsentratsiyalanmagan azot kislotasi va ammiakli selitra ishlab chiqarishlari qurilishini tugallash chora-tadbirlari toʻgʻrisida” 1999-yil 30-oktabrdagi 484-son qaroriga muvofiq yiliga 360 ming tonna konsentratsiyalanmagan azot kislotasi va 450 ming tonna ammiakli selitra ishlab chiqarish quvvatiga ega boʻlgan ishlab chiqarishlar qurilishi amalga oshirilganligi;
b) “Fargʻonaazot” AJda ishlab chiqariladigan mahsulotlarga talabning mavsumiyligi, moliyaviy-iqtisodiy holatga salbiy taʼsir koʻrsatgan boshqa omillar hisobiga Oʻzmilliybank tomonidan ajratilgan kreditlardan umumiy qarzdorlik summasi 2020-yilning 1-yanvar holatiga koʻra 35,8 mln dollarni, shundan: asosiy karz — 3,3 mln dollar, foizlar — 32,5 mln dollarni tashkil etganligi;
Oʻzmilliybank va “Oʻzkimyosanoat” AJ tomonidan mazkur qarzdorlikni milliy valyutaga oʻzgartirgan holda toʻlov muddatini 2022-yilning dekabr oyiga qadar uzaytirishni koʻzda tutgan holda kredit shartnomalari shartlariga oʻzgartirish kiritish toʻgʻrisida taklif kiritilganligi maʼlumot uchun qabul qilinsin.
2. “Oʻzkimyosanoat” AJ va Oʻzmilliybankning:
“Fargʻonaazot” AJ investitsiya loyihalarini moliyalashtirish uchun Oʻzmilliybank tomonidan xorijiy valyutada ajratilgan kredit summasini qaytarish muddatini 2022-yil dekabrga qadar uzaytirish va belgilangan tartibda rasmiylashtirish;
Oʻzmilliybankka “Fargʻonaazot” AJning investitsiya loyihalarini moliyalashtirish uchun ajratilgan kredit qoldiqlarini milliy valyutaga konvertatsiya qilish hamda ular boʻyicha foiz stavkalarini Oʻzbekiston Respublikasi Markaziy bankining qayta moliyalashtirish stavkasi darajasida belgilash toʻgʻrisidagi takliflariga rozilik berilsin.
3. Oʻzbekiston Respublikasi Moliya vazirligi mazkur qaror talablaridan kelib chiqib, “Oʻzkimyosanoat” AJ va “Fargʻonaazot” AJ tomonidan kredit majburiyatlarining bajarilishi yuzasidan Oʻzmilliybankka berilgan davlat kafolatlarini qayta rasmiylashtirsin.
4. “Oʻzkimyosanoat” AJ Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi bilan birgalikda bir oy muddatda “Fargʻonaazot” AJ moliyaviy holatini sogʻlomlashtirish va toʻlov qobiliyatini mustahkamlash, shuningdek, natriy xlorat, magniy xlorat defolianti, konsentratsiyalanmagan azot kislotasi va ammiakli selitra ishlab chiqarishlari quvvatlaridan samarali foydalangan holda Oʻzmilliybank oldidagi kredit qarzdorligini oʻz vaqtida va toʻliq soʻndirishning qoʻshimcha chora-tadbirlarini ishlab chiqib, ularning belgilangan muddatlarda amalga oshirilishini taʼminlasin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — Oʻzbekiston Respublikasi iqtisodiy taraqqiyot va kambagʻallikni qisqartirish vaziri J.A. Qoʻchqorov, Oʻzbekiston Respublikasi Moliya vaziri T.A. Ishmetov va “Oʻzbekiston Respublikasi Tashqi iqtisodiy faoliyat milliy banki” AJ raisi A.K. Mirsoatov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 11-may,
276-son