📅 2020-yil 19-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 19 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 19 мая 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 19 May 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«Қўқон суперфосфат заводи» акциядорлик жамиятининг ишлаб чиқариш қувватларини янада модернизация қилиш, кенгайтириш ва янги турдаги маҳсулотларни ишлаб чиқаришни ташкил этиш» инвестиция лойиҳасини амалга ошириш чора-тадбирлари тўғрисида
Ўзбекистон Республикаси Президентининг «Кимё саноатини янада ислоҳ қилиш ва унинг инвестициявий жозибадорлигини ошириш чора-тадбирлари тўғрисида» 2019 йил 3 апрелдаги ПҚ-4265-сон қарори ижросини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Ҳукумати номидан Ўзбекистон Республикаси инвестициялар ва ташқи савдо вазирлиги томонидан «Indorama Holdings BV» (Нидерландия) компанияси билан «Қўқон суперфосфат заводи» акциядорлик жамиятининг ишлаб чиқариш қувватларини янада модернизация қилиш, кенгайтириш ва янги турдаги маҳсулотларни ишлаб чиқаришни ташкил этиш» лойиҳасини амалга ошириш (кейинги ўринларда — инвестиция лойиҳаси) юзасидан 2019 йилнинг 24 майида инвестиция келишуви имзоланганлиги маълумот учун қабул қилинсин.
2. Инвестиция келишувига мувофиқ «Indorama Holdings BV» «Қўқон супрефосфат заводи» АЖнинг устав фондидаги давлатнинг 70,54 фоиз ва «Ўзкимёсаноат» АЖнинг 25,0 фоиз улушларини 4,3 миллион АҚШ долларига қуйидаги инвестиция ва ижтимоий мажбуриятларни олган ҳолда сотиб олади:
инвестиция лойиҳасининг I босқичини молиялаштириш мақсадида ўз кафолати остида олинадиган кредитлар ва тўғридан-тўғри инвестициялар ҳисобидан камида 30 миллион АҚШ долларини жалб этиш;
мавжуд иш ўринлари ва «Қўқон суперфосфат заводи» АЖнинг фаолият турини сақлаб қолиш;
биринчи навбатда, республика қишлоқ хўжалиги маҳсулотлари ишлаб чиқарувчиларнинг фосфорли ўғитларга, шунингдек, янги кимёвий маҳсулотларга бўлган эҳтиёжларини қондириш;
I босқични муваффақиятли амалга ошириш натижаларига кўра II босқич доирасида камида 40 миллион АҚШ доллари миқдоридаги тўғридан-тўғри инвестцияларни жалб этиш;
суперфосфат ишлаб чиқариш қувватини 63 минг тонна 100 фоиз фойдали модда ҳисобида ошириш (I босқич) ва янги маҳсулотлар ишлаб чиқариш (II босқич).
3. Ўзбекистон Республикаси Инвестициялар ва ташқи савдо вазирлиги «Ўзкимёсаноат» АЖ билан биргаликда «Indorama Holdings BV» компанияси томонидан I-босқични амалга ошириш натижалари бўйича тақдим этилган мустақил аудиторлик ташкилотининг тегишли ҳисоботларидан келиб чиқиб, келгусида II-босқични амалга ошириш юзасидан таклифлар киритсин.
4. Ўзбекистон Республикаси Давлат активларини бошқариш агентлиги ва «Ўзкимёсаноат» АЖ инвестиция келишувида назарда тутилган шартларнинг I-босқичи мувоффақиятли амалга оширилгандан сўнг «Қўқон суперфосфат заводи» АЖ акцияларининг 95,54 фоизини тасарруф этиш ҳуқуқини «Indorama Holdings BV» компаниясига қонунчиликда белгиланган тартибда беришни таъминласин.
5. Ўзбекистон Республикаси Инвестициялар ва ташқи савдо вазирлиги манфаатдор вазирлик ва идоралар билан биргаликда:
инвестиция келишувига мувофиқ инвестор томонидан қабул қилинган мажбуриятларнинг сўзсиз бажарилиши юзасидан назорат ўрнатсин;
«Indorama Holdings BV» компаниясининг инвестиция ва ижтимоий мажбуриятлари бажарилишининг қабул қилиб олинишини Ўзбекистон Республикаси қонунчилиги ва инвестиция келишуви талабларига мувофиқ амалга оширилсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар, экспортни қўллаб-қувватлаш ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков ва «Ўзкимёсаноат» АЖ бошқаруви раиси в.б Ж.Т. Мирзамахмудов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 19 май,
296-сон
Oʻzbekiston Respublikasi Vazirlar Mahkamasining
qarori
“Qoʻqon superfosfat zavodi” aksiyadorlik jamiyatining ishlab chiqarish quvvatlarini yanada modernizatsiya qilish, kengaytirish va yangi turdagi mahsulotlarni ishlab chiqarishni tashkil etish” investitsiya loyihasini amalga oshirish chora-tadbirlari toʻgʻrisida
Oʻzbekiston Respublikasi Prezidentining “Kimyo sanoatini yanada isloh qilish va uning investitsiyaviy jozibadorligini oshirish chora-tadbirlari toʻgʻrisida” 2019-yil 3-apreldagi PQ-4265-son qarori ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Hukumati nomidan Oʻzbekiston Respublikasi investitsiyalar va tashqi savdo vazirligi tomonidan “Indorama Holdings BV” (Niderlandiya) kompaniyasi bilan “Qoʻqon superfosfat zavodi” aksiyadorlik jamiyatining ishlab chiqarish quvvatlarini yanada modernizatsiya qilish, kengaytirish va yangi turdagi mahsulotlarni ishlab chiqarishni tashkil etish” loyihasini amalga oshirish (keyingi oʻrinlarda — investitsiya loyihasi) yuzasidan 2019-yilning 24-mayida investitsiya kelishuvi imzolanganligi maʼlumot uchun qabul qilinsin.
2. Investitsiya kelishuviga muvofiq “Indorama Holdings BV” “Qoʻqon suprefosfat zavodi” AJning ustav fondidagi davlatning 70,54 foiz va “Oʻzkimyosanoat” AJning 25,0 foiz ulushlarini 4,3 million AQSh dollariga quyidagi investitsiya va ijtimoiy majburiyatlarni olgan holda sotib oladi:
investitsiya loyihasining I-bosqichini moliyalashtirish maqsadida oʻz kafolati ostida olinadigan kreditlar va toʻgʻridan toʻgʻri investitsiyalar hisobidan kamida 30 million AQSh dollarini jalb etish;
mavjud ish oʻrinlari va “Qoʻqon superfosfat zavodi” AJning faoliyat turini saqlab qolish;
birinchi navbatda, respublika qishloq xoʻjaligi mahsulotlari ishlab chiqaruvchilarning fosforli oʻgʻitlarga, shuningdek, yangi kimyoviy mahsulotlarga boʻlgan ehtiyojlarini qondirish;
I-bosqichni muvaffaqiyatli amalga oshirish natijalariga koʻra II-bosqich doirasida kamida 40 million AQSh dollari miqdoridagi toʻgʻridan toʻgʻri investsiyalarni jalb etish;
superfosfat ishlab chiqarish quvvatini 63 ming tonna 100 foiz foydali modda hisobida oshirish (I-bosqich) va yangi mahsulotlar ishlab chiqarish (II-bosqich).
3. Oʻzbekiston Respublikasi Investitsiyalar va tashqi savdo vazirligi “Oʻzkimyosanoat” AJ bilan birgalikda “Indorama Holdings BV” kompaniyasi tomonidan I-bosqichni amalga oshirish natijalari boʻyicha taqdim etilgan mustaqil auditorlik tashkilotining tegishli hisobotlaridan kelib chiqib, kelgusida II-bosqichni amalga oshirish yuzasidan takliflar kiritsin.
4. Oʻzbekiston Respublikasi Davlat aktivlarini boshqarish agentligi va “Oʻzkimyosanoat” AJ investitsiya kelishuvida nazarda tutilgan shartlarning I-bosqichi muvoffaqiyatli amalga oshirilgandan soʻng “Qoʻqon superfosfat zavodi” AJ aksiyalarining 95,54 foizini tasarruf etish huquqini “Indorama Holdings BV” kompaniyasiga qonunchilikda belgilangan tartibda berishni taʼminlasin.
5. Oʻzbekiston Respublikasi Investitsiyalar va tashqi savdo vazirligi manfaatdor vazirlik va idoralar bilan birgalikda:
investitsiya kelishuviga muvofiq investor tomonidan qabul qilingan majburiyatlarning soʻzsiz bajarilishi yuzasidan nazorat oʻrnatsin;
“Indorama Holdings BV” kompaniyasining investitsiya va ijtimoiy majburiyatlari bajarilishining qabul qilib olinishini Oʻzbekiston Respublikasi qonunchiligi va investitsiya kelishuvi talablariga muvofiq amalga oshirilsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar, eksportni qoʻllab-quvvatlash va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov va “Oʻzkimyosanoat” AJ boshqaruvi raisi v.b J.T. Mirzamaxmudov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 19-may,
296-son