📅 2020-yil 28-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 28 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 28 мая 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 28 May 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
фармойиши
РЎЙХАТИ
ХАРАЖАТЛАР СМЕТАСИ
Ўзбекистон Республикаси Президентининг топшириғига асосан Қирғизистон Республикасига коронавирус инфекцияси (COVID-19) тарқалишини бартараф этиш учун зарур бўлган озиқ-овқат маҳсулотлари ва тиббий буюмлар билан таъминлашда амалий ёрдам кўрсатиш мақсадида:
1. Қирғизистон Республикасига озиқ-овқат маҳсулотлари ва тиббий буюмлар шаклидаги инсонпарварлик ёрдами 1-иловага мувофиқ рўйхат бўйича юборилсин.
2. «Ўздонмаҳсулот» АКнинг «Қўрғонтепа дон маҳсулотлари» АЖ инсонпарварлик ёрдами юкини шакллантириш пункти (кейинги ўринларда — шакллантириш пункти) ва юк жўнатувчи этиб белгилансин.
3. Ўзбекистон Республикаси Фавқулодда вазиятлар вазирлиги инсонпарварлик юки етказиб берилиши учун масъул этиб белгилансин.
4. «Ўзбекистон темир йўллари» АЖ «Ўздонмаҳсулот» АКнинг «Қўрғонтепа дон маҳсулотлари» АЖ ҳамда «Ўзкимёсаноат» АЖнинг «Навоиазот» АЖ буюртмаларига асосан керакли миқдордаги вагонларни ажратсин ва инсонпарварлик ёрдами юкининг белгиланган манзилга (Қирғизистон Республикаси, Ўш шаҳри) етказиб берилишини таъминласин.
5. Белгилансинки:
инсонпарварлик ёрдами юкининг таннархи, уни қадоқлаш, шакллантириш пунктига ҳамда белгиланган манзилга етказиб бериш билан боғлиқ харажатлар 2-иловага мувофиқ Ўзбекистон Республикаси Вазирлар Маҳкамасининг захира жамғармаси маблағлари ҳисобига;
инсонпарварлик ёрдами юкини ташиш билан боғлиқ транспорт харажатлари ва тарифлар «Ўзбекистон темир йўллари» АЖнинг асосий фаолиятидан тушадиган маблағлар ҳисобига қопланади.
6. Ўзбекистон Республикаси Ташқи ишлар вазирлиги Ўзбекистон томонининг инсонпарварлик ёрдами кўрсатиш нияти тўғрисида Қирғизистон Республикаси Ташқи ишлар вазирлигини белгиланган тартибда хабардор қилсин, шунингдек, инсонпарварлик юки етказиб бериладиган пунктни ва уни топшириш билан боғлиқ бошқа ташкилий масалаларни келишсин.
7. Ўзбекистон Республикаси Молия вазирлиги ҳамда Вазирлар Маҳкамаси ҳузуридаги Давлат захираларини бошқариш қўмитаси ушбу фармойишга мувофиқ давлат захираларидан чиқарилган моддий бойликларнинг ўрни белгиланган тартибда тўлдирилишини назарда тутсин.
8. Ўзбекистон Республикаси Ташқи ишлар вазирлиги, Ички ишлар вазирлиги, Давлат божхона қўмитаси, Давлат хавфсизлик хизматининг Чегара қўшинлари инсонпарварлик юкининг етказилиши ва топширилишида иштирок этадиган Ўзбекистон Республикаси вакилларига чиқиш ҳужжатлари тезкор расмийлаштирилишини ҳамда инсонпарварлик юки Ўзбекистон Республикаси Давлат чегарасидан тўсиқларсиз ўтказилишини таъминласинлар.
9. Ўзбекистон Республикаси Давлат божхона қўмитаси ва Вазирлар Маҳкамаси ҳузуридаги Ўсимликлар карантини давлат инспекцияси жўнатилаётган юкнинг божхона декларацияси ҳамда карантин назорати ва фитосанитария гувоҳномалари бепул расмийлаштирилишини таъминласинлар.
10. Ўзбекистон Республикаси Миллий телерадиокомпанияси, Ўзбекистон Миллий ахборот агентлиги ва «Дунё» ахборот агентлиги Қирғизистон Республикасига инсонпарварлик ёрдами кўрсатиш бўйича ишлар оммавий ахборот воситаларида, шу жумладан, электрон оммавий ахборот воситаларида кенг ёритилишини таъминласинлар.
11. Мазкур фармойишнинг бажарилишини назорат қилиш Ўзбекистон Республикаси Бош вазирнинг маслаҳатчиси — Саноат ва унинг базавий тармоқларини ҳамда кооперация алоқаларини ривожлантириш масалалари департаменти бошлиғи ва Ўзбекистон Республикаси Фавқулодда вазиятлар вазирининг биринчи ўринбосари А.Х. Қўлдошев зиммасига юклансин.
Вазирлар Маҳкамасининг 2020 йил 28 майдаги 274-Ф-сон фармойишига 1-ИЛОВА
Қирғизистон Республикасига инсонпарварлик ёрдами сифатида юбориладиган озиқ-овқат маҳсулотлари ва тиббий буюмлар
Т/р Ташкилот номи Маҳсулот номи Ўлчов бирлиги Миқдори 1. «Ўздонмаҳсулот» АК ун * тонна 1 000,0 2. «Ўзкимёсаноат» АЖ суюқ натрий гипохлориди тонна 60,0 3. Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмитаси бир маротабалик қўлқоплар (стерилланган) дона 5 000,0 4. «Маданият текстиль кўп тармоқли» МЧЖ бир маротабалик бош кийимли ҳимоя комбинезони (1-даражали) дона 2 500,0 5. «Ўзтўқимачиликсаноат» уюшмаси бир маротабалик тиббий юз ниқоби дона 5 000
Вазирлар Маҳкамасининг 2020 йил 28 майдаги 274-Ф-сон фармойишига 2-ИЛОВА
Қирғизистон Республикасига инсонпарварлик ёрдами юкининг таннархи, уни қадоқлаш, шакллантириш пунктига ҳамда белгиланган манзилга етказиб бериш билан боғлиқ
Т/р Ташкилот номи ва харажатлар тури Дастлабки ҳисоб-китоблар Суммаси * 1. «Ўздонмаҳсулот» АК 2 487 789 000,0 сўм 1.1 Ун маҳсулотининг шакллантириш пунктига етказиб бериш харажатлари билан биргаликдаги нархи ** 1 000 000,0 кг х 2 487,789 сўм 2 487 789 000,0 сўм 2. «Ўзкимёсаноат» АЖ 91 200 000,0 сўм 2.1 Суюқ натрий гипохлоридининг шакллантириш пунктига етказиб бериш харажатлари билан биргаликдаги нархи 60,0 тонна х 1 520 000,0 сўм 91 200 000,0 сўм 3. «Маданият текстиль кўп тармоқли» МЧЖ 116 645 000,0 сўм 3.1 Бир маротабалик бош кийимли ҳимоя комбинезонининг шакллантириш пунктига етказиб бериш харажатлари билан биргаликдаги нархи 2 500 дона х 46 658,0 сўм 116 645 000,0 сўм 4. «Ўзтўқимачиликсаноат» уюшмаси 11 250 000,0 сўм 4.1 Бир маротабалик тиббий юз ниқобларининг шакллантириш пунктига етказиб бериш харажатлари билан биргаликдаги нархи 5 000 дона х 2 250,0 сўм 11 250 000,0 сўм 5 «Қўрғонтепа дон маҳсулотлари» АЖ 10 706,0 АҚШ доллари 5.1 «Ўзбекистон темир йўллари» АЖнинг «Oʻzbektemiryoʻlekspeditsiya» УК билан шартномаси асосида Қирғизистон Республикаси ҳудудида темир йўл орқали юк ташиш харажатлари 1 060,0 тн х 10,1 АҚШ доллари 10 706,0 АҚШ доллари Жами: 2 706 884 000,0 сўм 10 706,0 АҚШ доллари
Ўзбекистон Республикасининг Бош вазири А. АРИПОВ
Тошкент ш.,
2020 йил 28 май,
274-Ф-сон
Oʻzbekiston Respublikasi Vazirlar Mahkamasining
farmoyishi
ROʻYXATI
XARAJATLAR SMETASI
Oʻzbekiston Respublikasi Prezidentining topshirigʻiga asosan Qirgʻiziston Respublikasiga koronavirus infeksiyasi (COVID-19) tarqalishini bartaraf etish uchun zarur boʻlgan oziq-ovqat mahsulotlari va tibbiy buyumlar bilan taʼminlashda amaliy yordam koʻrsatish maqsadida:
1. Qirgʻiziston Respublikasiga oziq-ovqat mahsulotlari va tibbiy buyumlar shaklidagi insonparvarlik yordami 1-ilovaga muvofiq roʻyxat boʻyicha yuborilsin.
2. “Oʻzdonmahsulot” AKning “Qoʻrgʻontepa don mahsulotlari” AJ insonparvarlik yordami yukini shakllantirish punkti (keyingi oʻrinlarda — shakllantirish punkti) va yuk joʻnatuvchi etib belgilansin.
3. Oʻzbekiston Respublikasi Favqulodda vaziyatlar vazirligi insonparvarlik yuki yetkazib berilishi uchun masʼul etib belgilansin.
4. “Oʻzbekiston temir yoʻllari” AJ “Oʻzdonmahsulot” AKning “Qoʻrgʻontepa don mahsulotlari” AJ hamda “Oʻzkimyosanoat” AJning “Navoiazot” AJ buyurtmalariga asosan kerakli miqdordagi vagonlarni ajratsin va insonparvarlik yordami yukining belgilangan manzilga (Qirgʻiziston Respublikasi, Oʻsh shahri) yetkazib berilishini taʼminlasin.
5. Belgilansinki:
insonparvarlik yordami yukining tannarxi, uni qadoqlash, shakllantirish punktiga hamda belgilangan manzilga yetkazib berish bilan bogʻliq xarajatlar 2-ilovaga muvofiq Oʻzbekiston Respublikasi Vazirlar Mahkamasining zaxira jamgʻarmasi mablagʻlari hisobiga;
insonparvarlik yordami yukini tashish bilan bogʻliq transport xarajatlari va tariflar “Oʻzbekiston temir yoʻllari” AJning asosiy faoliyatidan tushadigan mablagʻlar hisobiga qoplanadi.
6. Oʻzbekiston Respublikasi Tashqi ishlar vazirligi Oʻzbekiston tomonining insonparvarlik yordami koʻrsatish niyati toʻgʻrisida Qirgʻiziston Respublikasi Tashqi ishlar vazirligini belgilangan tartibda xabardor qilsin, shuningdek, insonparvarlik yuki yetkazib beriladigan punktni va uni topshirish bilan bogʻliq boshqa tashkiliy masalalarni kelishsin.
7. Oʻzbekiston Respublikasi Moliya vazirligi hamda Vazirlar Mahkamasi huzuridagi Davlat zaxiralarini boshqarish qoʻmitasi ushbu farmoyishga muvofiq davlat zaxiralaridan chiqarilgan moddiy boyliklarning oʻrni belgilangan tartibda toʻldirilishini nazarda tutsin.
8. Oʻzbekiston Respublikasi Tashqi ishlar vazirligi, Ichki ishlar vazirligi, Davlat bojxona qoʻmitasi, Davlat xavfsizlik xizmatining Chegara qoʻshinlari insonparvarlik yukining yetkazilishi va topshirilishida ishtirok etadigan Oʻzbekiston Respublikasi vakillariga chiqish hujjatlari tezkor rasmiylashtirilishini hamda insonparvarlik yuki Oʻzbekiston Respublikasi Davlat chegarasidan toʻsiqlarsiz oʻtkazilishini taʼminlasinlar.
9. Oʻzbekiston Respublikasi Davlat bojxona qoʻmitasi va Vazirlar Mahkamasi huzuridagi Oʻsimliklar karantini davlat inspeksiyasi joʻnatilayotgan yukning bojxona deklaratsiyasi hamda karantin nazorati va fitosanitariya guvohnomalari bepul rasmiylashtirilishini taʼminlasinlar.
10. Oʻzbekiston Respublikasi Milliy teleradiokompaniyasi, Oʻzbekiston Milliy axborot agentligi va “Dunyo” axborot agentligi Qirgʻiziston Respublikasiga insonparvarlik yordami koʻrsatish boʻyicha ishlar ommaviy axborot vositalarida, shu jumladan, elektron ommaviy axborot vositalarida keng yoritilishini taʼminlasinlar.
11. Mazkur farmoyishning bajarilishini nazorat qilish Oʻzbekiston Respublikasi Bosh vazirning maslahatchisi — Sanoat va uning bazaviy tarmoqlarini hamda kooperatsiya aloqalarini rivojlantirish masalalari departamenti boshligʻi va Oʻzbekiston Respublikasi Favqulodda vaziyatlar vazirining birinchi oʻrinbosari A.X. Qoʻldoshev zimmasiga yuklansin.
Vazirlar Mahkamasining 2020-yil 28-maydagi 274-F-son farmoyishiga 1-ILOVA
Qirgʻiziston Respublikasiga insonparvarlik yordami sifatida yuboriladigan oziq-ovqat mahsulotlari va tibbiy buyumlar
T/r Tashkilot nomi Mahsulot nomi Oʻlchov birligi Miqdori 1. “Oʻzdonmahsulot” AK un * tonna 1 000,0 2. “Oʻzkimyosanoat” AJ suyuq natriy gipoxloridi tonna 60,0 3. Oʻzbekiston Respublikasi Vazirlar Mahkamasi huzuridagi Davlat zaxiralarini boshqarish qoʻmitasi bir marotabalik qoʻlqoplar (sterillangan) dona 5 000,0 4. “Madaniyat tekstil koʻp tarmoqli” MChJ bir marotabalik bosh kiyimli himoya kombinezoni (1-darajali) dona 2 500,0 5. “Oʻztoʻqimachiliksanoat” uyushmasi bir marotabalik tibbiy yuz niqobi dona 5 000
Vazirlar Mahkamasining 2020-yil 28-maydagi 274-F-son farmoyishiga 2-ILOVA
Qirgʻiziston Respublikasiga insonparvarlik yordami yukining tannarxi, uni qadoqlash, shakllantirish punktiga hamda belgilangan manzilga yetkazib berish bilan bogʻliq
T/r Tashkilot nomi va xarajatlar turi Dastlabki hisob-kitoblar Summasi * 1. “Oʻzdonmahsulot” AK 2 487 789 000,0 soʻm 1.1 Un mahsulotining shakllantirish punktiga yetkazib berish xarajatlari bilan birgalikdagi narxi ** 1 000 000,0 kg x 2 487,789 soʻm 2 487 789 000,0 soʻm 2. “Oʻzkimyosanoat” AJ 91 200 000,0 soʻm 2.1 Suyuq natriy gipoxloridining shakllantirish punktiga yetkazib berish xarajatlari bilan birgalikdagi narxi 60,0 tonna x 1 520 000,0 soʻm 91 200 000,0 soʻm 3. “Madaniyat tekstil koʻp tarmoqli” MChJ 116 645 000,0 soʻm 3.1 Bir marotabalik bosh kiyimli himoya kombinezonining shakllantirish punktiga yetkazib berish xarajatlari bilan birgalikdagi narxi 2 500 dona x 46 658,0 soʻm 116 645 000,0 soʻm 4. “Oʻztoʻqimachiliksanoat” uyushmasi 11 250 000,0 soʻm 4.1 Bir marotabalik tibbiy yuz niqoblarining shakllantirish punktiga yetkazib berish xarajatlari bilan birgalikdagi narxi 5 000 dona x 2 250,0 soʻm 11 250 000,0 soʻm 5 “Qoʻrgʻontepa don mahsulotlari” AJ 10 706,0 AQSh dollari 5.1 “Oʻzbekiston temir yoʻllari” AJning “Oʻzbektemiryoʻlekspeditsiya” UK bilan shartnomasi asosida Qirgʻiziston Respublikasi hududida temir yoʻl orqali yuk tashish xarajatlari 1 060,0 tn x 10,1 AQSh dollari 10 706,0 AQSh dollari Jami: 2 706 884 000,0 soʻm 10 706,0 AQSh dollari
Oʻzbekiston Respublikasining Bosh vaziri A. ARIPOV
Toshkent sh.,
2020-yil 28-may,
274-F-son