📅 2020-yil 15-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 15 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 15 июня 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 15 June 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
РЎЙХАТИ
Хусусийлаштириш жараёнларини такомиллаштириш бўйича қўшимча чора-тадбирлар тўғрисида
Давлат активларини бошқариш ва хусусийлаштиришда халқаро тажрибага асосланган замонавий ёндашувларни кенг жорий этиш орқали инвестициявий лойиҳаларни амалга ошириш мақсадида Вазирлар Маҳкамаси қарор қилади:
1. Ўзбекистон Республикаси Давлат активларини бошқариш агентлиги (кейинги ўринларда — Агентлик) ва Молия вазирлигининг давлат иштирокидаги корхоналарнинг инвестициявий жозибадорлигини таъминлаш учун сотишдан олдин тайёргарлик ишларини амалга ошириш ва салоҳиятли инвесторларга сотиш орқали хусусийлаштиришнинг муваффақиятли натижаларини таъминлаш бўйича Агентлик муассислигида акциядорлик жамияти шаклида «UzAssets» инвестиция компаниясини ташкил этиш тўғрисидаги таклифига розилик берилсин.
2. Қуйидагилар «UzAssets» инвестиция компаниясининг асосий вазифалари этиб белгилансин:
давлат акция пакети (улуши) устав капиталига берилган корхоналарни (кейинги ўринларда — корхоналар) сотишдан олдин тайёрлаш, шу жумладан уларнинг инвестициявий жозибадорлигини ошириш, бу борада самарали механизмларни жорий этиш бўйича хорижий, халқаро институтлар ва компаниялар билан самарали ҳамкорликни ташкил этиш;
корхоналар фаолиятини комплекс таҳлил қилиш (due diligence), жумладан, инвестициявий таҳлил қилиш, «бенчмаркинг» усулида таққослаш орқали ривожланиш прогноз кўрсаткичларини белгилаш;
корхоналарнинг даромадлилик нормасини халқаро амалиётдаги мезонлар (IRR, NPV, EBITDA ва бошқалар) асосида таҳлил қилиш;
устав капиталига берилган акция пакетларини (улушларини) самарали бошқариш, корхоналарни ички ва ташқи бозорларда рақобатбардош корхоналарга айлантириш;
салоҳиятли инвесторларнинг рўйхатини (short-list) шакллантириш;
инвестиция воситачиларини жалб этган ҳолда, «Road Show» дастурларини ишлаб чиқиш ва мақсадли аудиториялар учун тақдимотлар ўтказиб борилишини ташкил этиш;
иқтисодиёт тармоқларини узоқ муддатли ривожлантириш мақсадларидан келиб чиқиб, устав капиталига берилган активларни салоҳиятли инвесторларга сотиш орқали барқарор ва муваффақиятли хусусийлаштиришни таъминлаш.
3. «UzAssets» инвестиция компаниясининг:
устав капитали Ўзбекистон Республикаси Давлат активларини бошқариш агентлиги ҳузуридаги бюджетдан ташқари Давлат активларини бошқариш, трансформация ва хусусийлаштириш жамғармаси ҳисобидан 20,0 млрд сўм миқдоридаги пул маблағлари ҳамда ушбу қарорга иловага мувофиқ корхоналарнинг давлат акция пакетлари (улушлари) номинал қийматида бериш ҳисобига шакллантирилади;
устав капиталига кейинчалик ўтказиладиган ва хусусийлаштирилиши белгиланган давлат акция пакетлари (улушлари) номинал қийматда Ўзбекистон Республикаси Вазирлар Маҳкамасининг қарори асосида амалга оширилади;
Кузатув кенгаши таркибига Агентлик директори киритилган ҳолда, унинг таркиби камида 50 фоиз аъзолари юқори малакали, халқаро тажрибага эга бўлган мутахассислардан иборат бўлади;
устав капиталига берилган давлат акция пакетлари (улушлари) унинг Кузатув кенгаши қарорига асосан бозор конъюнктурасидан келиб чиққан ҳолда, халқаро амалиётда кенг қўлланадиган тартибларга мувофиқ сотилади;
ижро органининг раҳбарини тайинлаш тўғрисидаги қарор хорижий менежерлар ҳам иштирок этиши мумкин бўлган танлов асосида қабул қилинади;
соф фойдаси унинг Кузатув кенгаши томонидан тасдиқланган сақлаш харажатлари, жумладан, корхоналарни сотишдан олдинги тайёрлаш билан боғлиқ харажатларни чегирган ҳолда тўлалигича Агентликка ўтказилади ҳамда давлат активларини хусусийлаштиришдан тушган маблағлар сифатида белгиланган тартибда тақсимланади.
4. Агентлик бир ой муддатда «UzAssets» инвестиция компаниясини белгиланган тартибда давлат рўйхатидан ўтказиш ва жойлаштириш чораларини кўрсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ва Ўзбекистон Республикаси Давлат активларини бошқариш агентлиги директори С.Х. Бекенов зиммасига юклансин.
Вазирлар Маҳкамасининнг 2020 йил 15 июндаги 381-сон қарорига ИЛОВА
«UzAssets» инвестиция компанияси устав капиталига давлат акция пакетлари (улушлари) номинал қийматда бериладиган корхоналар
Т/Р Корхона номи Давлат улуши (%) * Хўжалик жамияти улуши (%) ** 1. «Кварц» АЖ 89,8 — 2. «Қизилқумцемент» АЖ 86,9 — 3. «Урганч шароб» АЖ 53,9 — 4. «Ўзбекистон шампани» АЖ 51,0 — 5. «Ўзгеорангмет ЛИТИ» ДУК 100,0 — 6. «Ўзшаҳарсозлик ЛИТИ» ДУК 100,0 — 8. «Кафолат суғурта компанияси» АЖ 66,5 — 9. «Олмазор кичик саноат зонаси» АЖ 73,7 7,7 10. «Шаҳрисабз юлдузи» ДУК 100,0 —
Ўзбекистон Республикасининг Бош вазири А. АРИПОВ
Тошкент ш.,
2020 йил 15 июнь,
381-сон
Oʻzbekiston Respublikasi Vazirlar Mahkamasining
qarori
ROʻYXATI
Xususiylashtirish jarayonlarini takomillashtirish boʻyicha qoʻshimcha chora-tadbirlar toʻgʻrisida
Davlat aktivlarini boshqarish va xususiylashtirishda xalqaro tajribaga asoslangan zamonaviy yondashuvlarni keng joriy etish orqali investitsiyaviy loyihalarni amalga oshirish maqsadida Vazirlar Mahkamasi qaror qiladi:
1. Oʻzbekiston Respublikasi Davlat aktivlarini boshqarish agentligi (keyingi oʻrinlarda — Agentlik) va Moliya vazirligining davlat ishtirokidagi korxonalarning investitsiyaviy jozibadorligini taʼminlash uchun sotishdan oldin tayyorgarlik ishlarini amalga oshirish va salohiyatli investorlarga sotish orqali xususiylashtirishning muvaffaqiyatli natijalarini taʼminlash boʻyicha Agentlik muassisligida aksiyadorlik jamiyati shaklida “UzAssets” investitsiya kompaniyasini tashkil etish toʻgʻrisidagi taklifiga rozilik berilsin.
2. Quyidagilar “UzAssets” investitsiya kompaniyasining asosiy vazifalari etib belgilansin:
davlat aksiya paketi (ulushi) ustav kapitaliga berilgan korxonalarni (keyingi oʻrinlarda — korxonalar) sotishdan oldin tayyorlash, shu jumladan ularning investitsiyaviy jozibadorligini oshirish, bu borada samarali mexanizmlarni joriy etish boʻyicha xorijiy, xalqaro institutlar va kompaniyalar bilan samarali hamkorlikni tashkil etish;
korxonalar faoliyatini kompleks tahlil qilish (due diligence), jumladan, investitsiyaviy tahlil qilish, “benchmarking” usulida taqqoslash orqali rivojlanish prognoz koʻrsatkichlarini belgilash;
korxonalarning daromadlilik normasini xalqaro amaliyotdagi mezonlar (IRR, NPV, EBITDA va boshqalar) asosida tahlil qilish;
ustav kapitaliga berilgan aksiya paketlarini (ulushlarini) samarali boshqarish, korxonalarni ichki va tashqi bozorlarda raqobatbardosh korxonalarga aylantirish;
salohiyatli investorlarning roʻyxatini (short-list) shakllantirish;
investitsiya vositachilarini jalb etgan holda, “Road Show” dasturlarini ishlab chiqish va maqsadli auditoriyalar uchun taqdimotlar oʻtkazib borilishini tashkil etish;
iqtisodiyot tarmoqlarini uzoq muddatli rivojlantirish maqsadlaridan kelib chiqib, ustav kapitaliga berilgan aktivlarni salohiyatli investorlarga sotish orqali barqaror va muvaffaqiyatli xususiylashtirishni taʼminlash.
3. “UzAssets” investitsiya kompaniyasining:
ustav kapitali Oʻzbekiston Respublikasi Davlat aktivlarini boshqarish agentligi huzuridagi budjetdan tashqari Davlat aktivlarini boshqarish, transformatsiya va xususiylashtirish jamgʻarmasi hisobidan 20,0 mlrd soʻm miqdoridagi pul mablagʻlari hamda ushbu qarorga ilovaga muvofiq korxonalarning davlat aksiya paketlari (ulushlari) nominal qiymatida berish hisobiga shakllantiriladi;
ustav kapitaliga keyinchalik oʻtkaziladigan va xususiylashtirilishi belgilangan davlat aksiya paketlari (ulushlari) nominal qiymatda Oʻzbekiston Respublikasi Vazirlar Mahkamasining qarori asosida amalga oshiriladi;
Kuzatuv kengashi tarkibiga Agentlik direktori kiritilgan holda, uning tarkibi kamida 50 foiz aʼzolari yuqori malakali, xalqaro tajribaga ega boʻlgan mutaxassislardan iborat boʻladi;
ustav kapitaliga berilgan davlat aksiya paketlari (ulushlari) uning Kuzatuv kengashi qaroriga asosan bozor konyunkturasidan kelib chiqqan holda, xalqaro amaliyotda keng qoʻllanadigan tartiblarga muvofiq sotiladi;
ijro organining rahbarini tayinlash toʻgʻrisidagi qaror xorijiy menejerlar ham ishtirok etishi mumkin boʻlgan tanlov asosida qabul qilinadi;
sof foydasi uning Kuzatuv kengashi tomonidan tasdiqlangan saqlash xarajatlari, jumladan, korxonalarni sotishdan oldingi tayyorlash bilan bogʻliq xarajatlarni chegirgan holda toʻlaligicha Agentlikka oʻtkaziladi hamda davlat aktivlarini xususiylashtirishdan tushgan mablagʻlar sifatida belgilangan tartibda taqsimlanadi.
4. Agentlik bir oy muddatda “UzAssets” investitsiya kompaniyasini belgilangan tartibda davlat roʻyxatidan oʻtkazish va joylashtirish choralarini koʻrsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov va Oʻzbekiston Respublikasi Davlat aktivlarini boshqarish agentligi direktori S.X. Bekenov zimmasiga yuklansin.
Vazirlar Mahkamasininng 2020-yil 15-iyundagi 381-son qaroriga ILOVA
“UzAssets” investitsiya kompaniyasi ustav kapitaliga davlat aksiya paketlari (ulushlari) nominal qiymatda beriladigan korxonalar
T/R Korxona nomi Davlat ulushi (%) * Xoʻjalik jamiyati ulushi (%) ** 1. “Kvars” AJ 89,8 — 2. “Qizilqumsement” AJ 86,9 — 3. “Urganch sharob” AJ 53,9 — 4. “Oʻzbekiston shampani” AJ 51,0 — 5. “Oʻzgeorangmet LITI” DUK 100,0 — 6. “Oʻzshaharsozlik LITI” DUK 100,0 — 8. “Kafolat sugʻurta kompaniyasi” AJ 66,5 — 9. “Olmazor kichik sanoat zonasi” AJ 73,7 7,7 10. “Shahrisabz yulduzi” DUK 100,0 —
Oʻzbekiston Respublikasining Bosh vaziri A. ARIPOV
Toshkent sh.,
2020-yil 15-iyun,
381-son