📅 2017-yil 15-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 15 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 15 декабря 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 15 December 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Чорвоқ сув омбори атрофини ободонлаштириш дирекциясини ташкил этиш тўғрисида
Чорвоқ сув омбори атрофида ободонлаштириш, янги ўрмонзорлар барпо этиш, йўл четларини кўкаламзорлаштириш ҳамда экологик ҳолатни яхшилаш ишларини амалга ошириш мақсадида Вазирлар Маҳкамаси қарор қилади:
1. Ўзбекистон Республикаси Ўрмон хўжалиги давлат қўмитаси, Иқтисодиёт вазирлиги ҳамда Тошкент вилояти ҳокимлигининг Угом-Чотқол Давлат миллий табиат боғи муассислигида давлат унитар корхонаси шаклидаги Чорвоқ сув омбори атрофини ободонлаштириш дирекциясини (кейинги ўринларда — Дирекция) ташкил этиш тўғрисидаги таклифига розилик берилсин.
2. Қуйидагилар Дирекциянинг асосий вазифалари этиб белгилансин:
ўзига тегишли ҳудудларни ободонлаштириш, кўкаламзорлаштириш, янги ўрмонзорлар, шу жумладан ёнгоқмевали дарахтзорлар барпо этиш ҳамда уларни қўриқлаш ва ҳимоя қилиш;
ўрмонни тиклаш ва иҳота ўрмонзорлари барпо этиш тадбирларини амалга ошириш;
қулай иқлим шароити яратиш мақсадида йўлларнинг икки четида замонавий архитектура-дизайн талабларига мос манзарали дарахт ва бута кўчатларини экиш;
самарасиз фойдаланилаётган ерларда террасалар ва терраса майдончалари қуриш йўли билан янги ўрмонзорлар барпо этиш орқали транспорт воситаларидан чиқадиган газларнинг экологияга таъсирини камайтириш;
маданий ўрмонзорларни юқори даражада кўкарувчанлигига эришиш учун ташкил этилган сув тўплаш ҳовузларидан ва томчилатиб сугориш тизимидан унумли фойдаланиш;
ободонлаштириш, кўкаламзорлаштириш ва уларни сақлаш бўйича лойиха — смета ҳужжатларини тайёрлаш;
тоғ қияликлари ва жарликларда эрозияга қарши дов-дарахтлар барпо этиш ишларини ташкил этиш;
ўрмонларни ёнғиндан асраш, ўзбошимчалик билан кесиш ва ўрмон тўғрисидаги бошқа қонун ҳужжатлари бузилишини олдини олиш, ўрмонларни ўрмон зараркунанда ва касалликларидан ҳимоя қилишни таъминлаш, ўрмонни муҳофаза қилишни такомиллаштириш тадбирларини амалга ошириш ҳамда бу борада тарғибот-ташвиқот ишларини олиб бориш;
ўрмонларнинг санитария ҳолатини яхшилаш мақсадида касалланган дов-дарахтларни парваришлаш учун кесиш ва кесишдан кейинги тозалаш ишларини олиб бориш;
ўрмон ерларининг мелиоратив ҳолатини янада яхшилаш тадбирларини амалга ошириш;
манзарали ва мевали дарахтлар уруғини тайёрлаш, кўчатини етиштириш ишларини янада ривожлантириш.
3. «Чорвоқ сув омбори атрофини ободонлаштириш дирекцияси» Давлат унитар корхонасининг тузилмаси 1-иловага мувофиқ тасдиқлансин.
4. Белгилаб кўйилсинки:
Дирекция директори Угом-Чотқол Давлат миллий табиат боғи бошлиғи тавсиясига кўра, Ўзбекистон Республйкаси Ўрмон хўжалиги давлат қўмитаси раиси томонидан лавозимга тайинланади ва лавозимдан озод этилади;
Дирекция директори лавозими бўйича Угом-Чотқол Давлат миллий табиат боғи бошлиғи ўринбосарига тенглаштирилади.
5. Ўзбекистон Республикаси Ўрмон хўжалиги давлат қўмитаси «Ўзавтосаноат» Акциядорлик жамияти ва «Ўзагротехсаноатхолдинг» Акциядорлик жамияти билан биргаликда қонун ҳужжатларида белгиланган тартибда Чорвоқ сув омбори атрофини ободонлаштириш учун талаб этиладиган техника ва транспорт воситалари ҳамда тиркамаларни Дирекция ҳамда Бурчмулла давлат ўрмон хўжалигига 2-иловага мувофиқ етказиб бериш чораларини кўрсинлар.
6. Ўсимликлар карантини ва ҳимояси агентлигига Дирекция буюртмасига асосан ҳудуддаги мевали, манзарали дарахтзорлар ва буталарда аниқланган касаллик ҳамда зараркунандаларга қарши белгиланган тартибда ишлов бериб бориш вазифаси юклансин.
7. Ўзбекистон Республикаси Молия вазирлиги, Иқгисодиёт вазирлиги билан биргаликда ҳар йили Ўзбекистон Республикаси Ўрмон хўжалиги давлат қўмитасининг асосланган ҳисоб китоблари бўйича Дирекция фаолиятини юритишда талаб қилинадиган автомобиль бензини ва дизель ёнилгиси сотиб олиш учун маблағ ажратилишини назарда тутсин.
8. Чорвоқ сув омбори атрофи ҳамда «Қайнарсой қароргоҳи» давлат муассасаси ҳудудини ва унга олиб борувчи автомобиль йўлининг икки четида кўкаламзорлаштириш ва ободонлаштириш ишлари бўйича:
Дирекция — буюртмачи;
«Яшиллойиҳа» лойиҳалаш институти» давлат муассасаси — бош лойиҳачи;
Бурчмулла ўрмон хўжалиги — пудратчи ташкилот этиб белгилансин.
9. Қуйидагилар Дирекциянинг жорий фаолияти ва Чорвоқ сув омбори атрофи ҳамда «Қайнарсой қароргоҳи» давлат муассасаси ҳудудини ва унга олиб борувчи автомобиль йўлининг икки четида кўкаламзорлаштириш ва ободонлаштириш тадбирларини молиялаштириш манбаи этиб белгилансин:
Тошкент вилояти маҳаллий бюджети;
тадбиркорлик фаолиятидан олинадиган даромадлар, хорижий хукуматлар ва донорлик ташкилотларининг грантлари, шунингдек ҳомийлик хайриялари ва қонун ҳужжатларида тақиқланмаган бошқа манбалар.
10. Тошкент вилояти ҳокимлиги кўкаламзорлаштириш ва ободонлаштириш тадбирларига ажратиладиган маҳаллий бюджет маблағларининг самарали ва мақсадли ишлатилиши юзасидан доимий мониторинг олиб борсин.
11. Ўзбекистон Республикаси Ўрмон хўжалиги давлат қўмитаси бир ой муддатда:
Дирекция Устави ва штатлар жадвали тасдиқланишини;
Дирекциянинг Угом-Чотқол Давлат миллий табиат боғи маъмурий биносига текин фойдаланиш ҳуқуқи асосида жойлаштирилишини таъминласин;
Чорвоқ сув омбори атрофини кўкаламзорлаштириш ва ободонлаштириш бўйича чора-тадбирлар режасини ишлаб чиқиб, тасдиқласин ва уни амалга оширши чораларини кўрсин.
12. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — Қишлоқ ва сув хўжалиги вазири З.Т. Мирзаев ва Ўрмон хўжалиги давлат қўмитаси раиси Н.Ж. Бакиров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2017 йил 15 декабрь,
986-сон
Oʻzbekiston Respublikasi Vazirlar Mahkamasining
qarori
Chorvoq suv ombori atrofini obodonlashtirish direksiyasini tashkil etish toʻgʻrisida
Chorvoq suv ombori atrofida obodonlashtirish, yangi oʻrmonzorlar barpo etish, yoʻl chetlarini koʻkalamzorlashtirish hamda ekologik holatni yaxshilash ishlarini amalga oshirish maqsadida Vazirlar Mahkamasi qaror qiladi:
1. Oʻzbekiston Respublikasi Oʻrmon xoʻjaligi davlat qoʻmitasi, Iqtisodiyot vazirligi hamda Toshkent viloyati hokimligining Ugom-Chotqol Davlat milliy tabiat bogʻi muassisligida davlat unitar korxonasi shaklidagi Chorvoq suv ombori atrofini obodonlashtirish direksiyasini (keyingi oʻrinlarda — Direksiya) tashkil etish toʻgʻrisidagi taklifiga rozilik berilsin.
2. Quyidagilar Direksiyaning asosiy vazifalari etib belgilansin:
oʻziga tegishli hududlarni obodonlashtirish, koʻkalamzorlashtirish, yangi oʻrmonzorlar, shu jumladan yongoqmevali daraxtzorlar barpo etish hamda ularni qoʻriqlash va himoya qilish;
oʻrmonni tiklash va ihota oʻrmonzorlari barpo etish tadbirlarini amalga oshirish;
qulay iqlim sharoiti yaratish maqsadida yoʻllarning ikki chetida zamonaviy arxitektura-dizayn talablariga mos manzarali daraxt va buta koʻchatlarini ekish;
samarasiz foydalanilayotgan yerlarda terrasalar va terrasa maydonchalari qurish yoʻli bilan yangi oʻrmonzorlar barpo etish orqali transport vositalaridan chiqadigan gazlarning ekologiyaga taʼsirini kamaytirish;
madaniy oʻrmonzorlarni yuqori darajada koʻkaruvchanligiga erishish uchun tashkil etilgan suv toʻplash hovuzlaridan va tomchilatib sugorish tizimidan unumli foydalanish;
obodonlashtirish, koʻkalamzorlashtirish va ularni saqlash boʻyicha loyixa — smeta hujjatlarini tayyorlash;
togʻ qiyaliklari va jarliklarda eroziyaga qarshi dov-daraxtlar barpo etish ishlarini tashkil etish;
oʻrmonlarni yongʻindan asrash, oʻzboshimchalik bilan kesish va oʻrmon toʻgʻrisidagi boshqa qonun hujjatlari buzilishini oldini olish, oʻrmonlarni oʻrmon zararkunanda va kasalliklaridan himoya qilishni taʼminlash, oʻrmonni muhofaza qilishni takomillashtirish tadbirlarini amalga oshirish hamda bu borada targʻibot-tashviqot ishlarini olib borish;
oʻrmonlarning sanitariya holatini yaxshilash maqsadida kasallangan dov-daraxtlarni parvarishlash uchun kesish va kesishdan keyingi tozalash ishlarini olib borish;
oʻrmon yerlarining meliorativ holatini yanada yaxshilash tadbirlarini amalga oshirish;
manzarali va mevali daraxtlar urugʻini tayyorlash, koʻchatini yetishtirish ishlarini yanada rivojlantirish.
3. “Chorvoq suv ombori atrofini obodonlashtirish direksiyasi” Davlat unitar korxonasining tuzilmasi 1-ilovaga muvofiq tasdiqlansin.
4. Belgilab koʻyilsinki:
Direksiya direktori Ugom-Chotqol Davlat milliy tabiat bogʻi boshligʻi tavsiyasiga koʻra, Oʻzbekiston Respublykasi Oʻrmon xoʻjaligi davlat qoʻmitasi raisi tomonidan lavozimga tayinlanadi va lavozimdan ozod etiladi;
Direksiya direktori lavozimi boʻyicha Ugom-Chotqol Davlat milliy tabiat bogʻi boshligʻi oʻrinbosariga tenglashtiriladi.
5. Oʻzbekiston Respublikasi Oʻrmon xoʻjaligi davlat qoʻmitasi “Oʻzavtosanoat” Aksiyadorlik jamiyati va “Oʻzagrotexsanoatxolding” Aksiyadorlik jamiyati bilan birgalikda qonun hujjatlarida belgilangan tartibda Chorvoq suv ombori atrofini obodonlashtirish uchun talab etiladigan texnika va transport vositalari hamda tirkamalarni Direksiya hamda Burchmulla davlat oʻrmon xoʻjaligiga 2-ilovaga muvofiq yetkazib berish choralarini koʻrsinlar.
6. Oʻsimliklar karantini va himoyasi agentligiga Direksiya buyurtmasiga asosan hududdagi mevali, manzarali daraxtzorlar va butalarda aniqlangan kasallik hamda zararkunandalarga qarshi belgilangan tartibda ishlov berib borish vazifasi yuklansin.
7. Oʻzbekiston Respublikasi Moliya vazirligi, Iqgisodiyot vazirligi bilan birgalikda har yili Oʻzbekiston Respublikasi Oʻrmon xoʻjaligi davlat qoʻmitasining asoslangan hisob kitoblari boʻyicha Direksiya faoliyatini yuritishda talab qilinadigan avtomobil benzini va dizel yonilgisi sotib olish uchun mablagʻ ajratilishini nazarda tutsin.
8. Chorvoq suv ombori atrofi hamda “Qaynarsoy qarorgohi” davlat muassasasi hududini va unga olib boruvchi avtomobil yoʻlining ikki chetida koʻkalamzorlashtirish va obodonlashtirish ishlari boʻyicha:
Direksiya — buyurtmachi;
“Yashilloyiha” loyihalash instituti” davlat muassasasi — bosh loyihachi;
Burchmulla oʻrmon xoʻjaligi — pudratchi tashkilot etib belgilansin.
9. Quyidagilar Direksiyaning joriy faoliyati va Chorvoq suv ombori atrofi hamda “Qaynarsoy qarorgohi” davlat muassasasi hududini va unga olib boruvchi avtomobil yoʻlining ikki chetida koʻkalamzorlashtirish va obodonlashtirish tadbirlarini moliyalashtirish manbai etib belgilansin:
Toshkent viloyati mahalliy budjeti;
tadbirkorlik faoliyatidan olinadigan daromadlar, xorijiy xukumatlar va donorlik tashkilotlarining grantlari, shuningdek homiylik xayriyalari va qonun hujjatlarida taqiqlanmagan boshqa manbalar.
10. Toshkent viloyati hokimligi koʻkalamzorlashtirish va obodonlashtirish tadbirlariga ajratiladigan mahalliy budjet mablagʻlarining samarali va maqsadli ishlatilishi yuzasidan doimiy monitoring olib borsin.
11. Oʻzbekiston Respublikasi Oʻrmon xoʻjaligi davlat qoʻmitasi bir oy muddatda:
Direksiya Ustavi va shtatlar jadvali tasdiqlanishini;
Direksiyaning Ugom-Chotqol Davlat milliy tabiat bogʻi maʼmuriy binosiga tekin foydalanish huquqi asosida joylashtirilishini taʼminlasin;
Chorvoq suv ombori atrofini koʻkalamzorlashtirish va obodonlashtirish boʻyicha chora-tadbirlar rejasini ishlab chiqib, tasdiqlasin va uni amalga oshirshi choralarini koʻrsin.
12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Qishloq va suv xoʻjaligi vaziri Z.T. Mirzayev va Oʻrmon xoʻjaligi davlat qoʻmitasi raisi N.J. Bakirov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 15-dekabr,
986-son