UzbekAI

Ўзбекистон Республикаси Вазирлар Маҳкамасининг

қарори

2017 — 2019 йилларда Тошкент вилоятининг Олмалиқ шаҳрини комплекс ривожлантириш чора-тадбирлари тўғрисида

Тошкент вилоятининг Олмалиқ шаҳрини комплекс ривожлантириш, бунда шаҳарнинг табиий хом ашёси, ишлаб чиқариш ва меҳнат салоҳиятидан оқилона фойдаланиш, саноат, хизмат кўрсатишни янада ривожлантириш орқали шаҳар бюджетининг даромадлар базасини кенгайтириш, муҳандислик-коммуникация, ишлаб чиқариш ва ижтимоий инфратузилмасини такомиллаштириш ҳамда аҳоли бандлиги, даромади ва турмуш даражасини изчил ошириш мақсадида Вазирлар Маҳкамаси қарор қилади:

1. Қуйидагиларни ўз ичига олувчи 2017 — 2019 йилларда Тошкент вилоятининг Олмалиқ шаҳрини комплекс ривожлантириш дастури (кейинги ўринларда Дастур деб аталади) тасдиқлансин:

Дастурнинг мақсадли параметрлари 1-иловага ҳамда унинг молиялаштириш манбалари 1а-иловага мувофиқ;

озиқ-овқат ва ноозиқ-овқат истеъмол товарлари, шунингдек қурилиш материаллари ишлаб чиқариш бўйича ишлаб чиқариш қувватларини янгидан барпо этиш, модернизациялаш, техник ва технологик жиҳатдан янгилаш бўйича инвестиция лойиҳаларининг манзилли рўйхати 2-иловага мувофиқ;

хизматлар кўрсатиш соҳаси ва сервис инфратузилмасини ривожлантириш бўйича амалга ошириладиган лойиҳаларнинг манзилли рўйхати 3-иловага мувофиқ;

қишлоқ хўжалиги маҳсулотларини етиштириш ва қайта ишлашни ривожлантириш бўйича амалга ошириладиган лойиҳаларнинг манзилли рўйҳати 4-иловага мувофиқ;

ишлаб чиқариш ва муҳандислик-коммуникация тармоқларини янада ривожлантириш чора-тадбирлари 5-иловага мувофиқ;

ижтимоий инфратузилмани янада ривожлантириш чора-тадбирлари 6-иловага мувофиқ;

аввал хусусийлаштирилган объектлардан самарали фойдаланиш чора-тадбирлари 7-иловага мувофиқ;

Тошкент вилояти Олмалиқ шаҳрини қуриш ва реконструкция қилиш чора-тадбирлари 8-иловага мувофиқ.

2. Тошкент вилояти ҳокимлиги манфаатдор давлат ва хўжалик бошқаруви органлари, тижорат банклари ва лойиҳа ташаббускорлари билан биргаликда:

Дастурдаги кўрсаткичлардан келиб чиққан ҳолда тармоқ жадвалларини бир ой муддатда ишлаб чиқсинлар ва тасдиқласинлар;

йўл-транспорт, муҳандислик-коммуникация ва ижтимоий инфратузилма объектларини қуриш, реконструкция қилиш ва мукаммал таъмирлаш бўйича назарда тутилган ишларнинг тасдиқланган параметрларга қатъий мувофиқ равишда жадал бажарилишини таъминлаш юзасидан зарур чоралар кўрсинлар.

3. 2017 — 2019 йилларда Тошкент вилоятининг Олмалиқ шаҳрини комплекс ривожлантириш дастури параметрлари бажарилишини таъминлаш бўйича давлат ва хўжалик бошқаруви органлари, тижорат банклари ҳамда маҳаллий ижроия ҳокимияти органлари фаолиятини мувофиқлаштириш бўйича республика ишчи гуруҳи таркиби 9-иловага мувофиқ тасдиқлансин.

Республика ишчи гуруҳи (А.Ж. Раматов):

давлат ва хўжалик бошқаруви органлари, тижорат банклари, маҳаллий ижроия ҳокимияти органлари томонидан Дастурда назарда тутилган чора-тадбирларнинг белгиланган муддатларда амалга оширилишини таҳлил қилиб борсин ва мувофиқлаштирсин;

барча параметрлар бўйича Дастур бажарилиши мониторинги олиб борилишини ташкил этсин ва ҳар ойда тизимли равишда муаммоли масалаларни кўриб чиқсин, уларни ҳал этиш юзасидан тезкор ва амалий чоралар кўрсин.

4. Республика ишчи гуруҳига, зарурат бўлганда, тайёрланган ва белгиланган тартибда келишилган лойиҳа ҳужжатлари мавжуд бўлган тақдирда, Дастурга тегишли ўзгартириш ва қўшимчалар киритиш ҳуқуқи берилсин.

5. Ўзбекистон Республикаси Иқтисодиёт вазирлиги, Молия вазирлиги, Инвестициялар бўйича давлат қўмитаси ҳар йилги Ўзбекистон Республикасининг Инвестиция дастурини шакллантиришда, молиялаштириш ҳажмлари ва манбааларини аниқлаштирган ҳолда, ушбу қарорга мувофиқ амалга оширилиши назарда тутилган инвестиция лойиҳаларини белгиланган тартибда киритиб борилишини таъминласинлар.

6. Тошкент вилояти ҳокимлиги Ўзбекистон Республикаси Давлат архитектура ва қурилиш қўмитаси, Ер ресурслари, геодезия, картография ва давлат кадастри давлат қўмитаси, Иқтисодиёт вазирлиги билан биргаликда бир ой муддатда Олмалиқ шаҳрида янги конлар ўзлаштирилиши, аҳоли сонининг ўсиб боришини ҳисобга олиб, 2035 йилгача мўлжалланган бош режага кўра Олмалиқ шаҳрининг маъмурий ҳудудини 2,6 минг гектардан 3,5 минг гектарга етказиш бўйича аниқ таклифлар ишлаб чиқсин ва белгиланган тартибда Ўзбекистон Республикаси Вазирлар Маҳкамасига киритсин.

7. Тошкент вилояти ҳокимлиги Ўзбекистон Республикаси Давлат солиқ қўмитаси билан биргаликда бир ой муддатда Олмалиқ шаҳридаги «Ойдин» деҳқон бозори ва буюм бозорининг капитал реконструкция қилиш, қўшимча бино ва замонавий савдо расталари барпо этиш юзасидан аниқ таклифлар ишлаб чиқиб, Ўзбекистон Республикаси Вазирлар Маҳкамасига белгиланган тартибда киритсин.

8. Тижорат банкларига Дастурга киритилган инвестиция лойиҳаларини молиялаштириш, республикада ишлаб чиқарилмайдиган асбоб-ускуналар ва уларга бутловчи буюмларни харид қилиш учун белгиланган тартибда кредитлар, шу жумладан чет эл валютасидаги кредитлар ажратиш тавсия этилсин.

9. Тошкент вилояти ҳокимлиги ҳар чорак якуни бўйича Дастур тадбирларини ўз вақтида ва сифатли бажарилиши юзасидан лойиҳа ташаббускорлари фаолиятининг натижадорлигини вилоят ва шаҳар фаоллари йиғилишларида кўриб чиқсин ҳамда амалга оширилган ишлар тўғрисида Ўзбекистон Республикаси Вазирлар Маҳкамасига ахборот тақдим этсин.

10. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов, Тошкент вилояти ҳокими Ш.Х. Бабаев ва Олмалиқ шаҳар ҳокими М.М. Миркасимов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2017 йил 24 октябрь,

871-сон

Oʻzbekiston Respublikasi Vazirlar Mahkamasining

qarori

2017 — 2019-yillarda Toshkent viloyatining Olmaliq shahrini kompleks rivojlantirish chora-tadbirlari toʻgʻrisida

Toshkent viloyatining Olmaliq shahrini kompleks rivojlantirish, bunda shaharning tabiiy xom ashyosi, ishlab chiqarish va mehnat salohiyatidan oqilona foydalanish, sanoat, xizmat koʻrsatishni yanada rivojlantirish orqali shahar budjetining daromadlar bazasini kengaytirish, muhandislik-kommunikatsiya, ishlab chiqarish va ijtimoiy infratuzilmasini takomillashtirish hamda aholi bandligi, daromadi va turmush darajasini izchil oshirish maqsadida Vazirlar Mahkamasi qaror qiladi:

1. Quyidagilarni oʻz ichiga oluvchi 2017 — 2019-yillarda Toshkent viloyatining Olmaliq shahrini kompleks rivojlantirish dasturi (keyingi oʻrinlarda Dastur deb ataladi) tasdiqlansin:

Dasturning maqsadli parametrlari 1-ilovaga hamda uning moliyalashtirish manbalari 1a-ilovaga muvofiq;

oziq-ovqat va nooziq-ovqat isteʼmol tovarlari, shuningdek qurilish materiallari ishlab chiqarish boʻyicha ishlab chiqarish quvvatlarini yangidan barpo etish, modernizatsiyalash, texnik va texnologik jihatdan yangilash boʻyicha investitsiya loyihalarining manzilli roʻyxati 2-ilovaga muvofiq;

xizmatlar koʻrsatish sohasi va servis infratuzilmasini rivojlantirish boʻyicha amalga oshiriladigan loyihalarning manzilli roʻyxati 3-ilovaga muvofiq;

qishloq xoʻjaligi mahsulotlarini yetishtirish va qayta ishlashni rivojlantirish boʻyicha amalga oshiriladigan loyihalarning manzilli roʻyhati 4-ilovaga muvofiq;

ishlab chiqarish va muhandislik-kommunikatsiya tarmoqlarini yanada rivojlantirish chora-tadbirlari 5-ilovaga muvofiq;

ijtimoiy infratuzilmani yanada rivojlantirish chora-tadbirlari 6-ilovaga muvofiq;

avval xususiylashtirilgan obyektlardan samarali foydalanish chora-tadbirlari 7-ilovaga muvofiq;

Toshkent viloyati Olmaliq shahrini qurish va rekonstruksiya qilish chora-tadbirlari 8-ilovaga muvofiq.

2. Toshkent viloyati hokimligi manfaatdor davlat va xoʻjalik boshqaruvi organlari, tijorat banklari va loyiha tashabbuskorlari bilan birgalikda:

Dasturdagi koʻrsatkichlardan kelib chiqqan holda tarmoq jadvallarini bir oy muddatda ishlab chiqsinlar va tasdiqlasinlar;

yoʻl-transport, muhandislik-kommunikatsiya va ijtimoiy infratuzilma obyektlarini qurish, rekonstruksiya qilish va mukammal taʼmirlash boʻyicha nazarda tutilgan ishlarning tasdiqlangan parametrlarga qatʼiy muvofiq ravishda jadal bajarilishini taʼminlash yuzasidan zarur choralar koʻrsinlar.

3. 2017 — 2019-yillarda Toshkent viloyatining Olmaliq shahrini kompleks rivojlantirish dasturi parametrlari bajarilishini taʼminlash boʻyicha davlat va xoʻjalik boshqaruvi organlari, tijorat banklari hamda mahalliy ijroiya hokimiyati organlari faoliyatini muvofiqlashtirish boʻyicha respublika ishchi guruhi tarkibi 9-ilovaga muvofiq tasdiqlansin.

Respublika ishchi guruhi (A.J. Ramatov):

davlat va xoʻjalik boshqaruvi organlari, tijorat banklari, mahalliy ijroiya hokimiyati organlari tomonidan Dasturda nazarda tutilgan chora-tadbirlarning belgilangan muddatlarda amalga oshirilishini tahlil qilib borsin va muvofiqlashtirsin;

barcha parametrlar boʻyicha Dastur bajarilishi monitoringi olib borilishini tashkil etsin va har oyda tizimli ravishda muammoli masalalarni koʻrib chiqsin, ularni hal etish yuzasidan tezkor va amaliy choralar koʻrsin.

4. Respublika ishchi guruhiga, zarurat boʻlganda, tayyorlangan va belgilangan tartibda kelishilgan loyiha hujjatlari mavjud boʻlgan taqdirda, Dasturga tegishli oʻzgartirish va qoʻshimchalar kiritish huquqi berilsin.

5. Oʻzbekiston Respublikasi Iqtisodiyot vazirligi, Moliya vazirligi, Investitsiyalar boʻyicha davlat qoʻmitasi har yilgi Oʻzbekiston Respublikasining Investitsiya dasturini shakllantirishda, moliyalashtirish hajmlari va manbaalarini aniqlashtirgan holda, ushbu qarorga muvofiq amalga oshirilishi nazarda tutilgan investitsiya loyihalarini belgilangan tartibda kiritib borilishini taʼminlasinlar.

6. Toshkent viloyati hokimligi Oʻzbekiston Respublikasi Davlat arxitektura va qurilish qoʻmitasi, Yer resurslari, geodeziya, kartografiya va davlat kadastri davlat qoʻmitasi, Iqtisodiyot vazirligi bilan birgalikda bir oy muddatda Olmaliq shahrida yangi konlar oʻzlashtirilishi, aholi sonining oʻsib borishini hisobga olib, 2035-yilgacha moʻljallangan bosh rejaga koʻra Olmaliq shahrining maʼmuriy hududini 2,6 ming gektardan 3,5 ming gektarga yetkazish boʻyicha aniq takliflar ishlab chiqsin va belgilangan tartibda Oʻzbekiston Respublikasi Vazirlar Mahkamasiga kiritsin.

7. Toshkent viloyati hokimligi Oʻzbekiston Respublikasi Davlat soliq qoʻmitasi bilan birgalikda bir oy muddatda Olmaliq shahridagi “Oydin” dehqon bozori va buyum bozorining kapital rekonstruksiya qilish, qoʻshimcha bino va zamonaviy savdo rastalari barpo etish yuzasidan aniq takliflar ishlab chiqib, Oʻzbekiston Respublikasi Vazirlar Mahkamasiga belgilangan tartibda kiritsin.

8. Tijorat banklariga Dasturga kiritilgan investitsiya loyihalarini moliyalashtirish, respublikada ishlab chiqarilmaydigan asbob-uskunalar va ularga butlovchi buyumlarni xarid qilish uchun belgilangan tartibda kreditlar, shu jumladan chet el valyutasidagi kreditlar ajratish tavsiya etilsin.

9. Toshkent viloyati hokimligi har chorak yakuni boʻyicha Dastur tadbirlarini oʻz vaqtida va sifatli bajarilishi yuzasidan loyiha tashabbuskorlari faoliyatining natijadorligini viloyat va shahar faollari yigʻilishlarida koʻrib chiqsin hamda amalga oshirilgan ishlar toʻgʻrisida Oʻzbekiston Respublikasi Vazirlar Mahkamasiga axborot taqdim etsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Toshkent viloyati hokimi Sh.X. Babayev va Olmaliq shahar hokimi M.M. Mirkasimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 24-oktabr,

871-son