📅 2020-yil 14-iyul · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 14 июль · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 14 июля 2020 г. · Постановления Президента
Официальный текст. Официальный документ. Редакционные примечания не включены.
📅 14 July 2020 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
«Ҳар бир оила — тадбиркор» дастурини ҳамда Наманган вилоятидаги кичик саноат зоналарини ривожлантиришни молиялаштиришга доир қўшимча чора-тадбирлар тўғрисида
Коронавирус пандемияси шароитида ижтимоий аҳволи ва турмуш шароити оғирлашган оилаларнинг бандлигини таъминлаш орқали уларга даромад манбаини яратиш ҳамда Наманган вилоятидаги кичик саноат зоналарини ривожлантиришни молиявий ресурслар билан таъминлаш мақсадида:
1. Ўзбекистон Республикаси Иқтисодий тараққиёт ва камбағалликни қисқартириш вазирлиги ҳамда Молия вазирлигининг Тикланиш ва тараққиёт жамғармасидан (кейинги ўринларда — Жамғарма):
а) «Ҳар бир оила — тадбиркор» дастури учун қўшимча равишда 98 миллион АҚШ доллари эквивалентидаги маблағларни:
«Агробанк» АТБга — 40 миллион АҚШ доллари эквивалентида;
АТ Халқ банкига — 30 миллион АҚШ доллари эквивалентида;
«Микрокредитбанк» АТБга — 28 миллион АҚШ доллари эквивалентида;
б) микромолиявий хизматлар кўрсатувчи ташкилотлар ҳамда нодавлат нотижорат ташкилотларига ёшлар ва хотин-қизларни кичик тадбиркорликка жалб қилиш лойиҳаларини қўллаб-қувватлашга — 2 миллион АҚШ доллари эквивалентида;
в) Наманган вилоятидаги кичик саноат зоналари фаолиятини янада ривожлантириш учун Наманган вилояти ҳокимлигига 50 миллион АҚШ доллари ажратиш ҳақидаги таклифларига розилик берилсин.
2. Белгилаб қўйилсинки:
а) мазкур қарорга асосан ажратилган маблағлардан фойдаланиш мос равишда:
Ўзбекистон Республикаси Президентининг 2019 йил 24 октябрдаги «Оилавий тадбиркорликни ривожлантириш давлат дастурлари доирасида амалга оширилаётган лойиҳаларни кредитлаш тартибини такомиллаштиришнинг қўшимча чора-тадбирлари тўғрисида»ги ПҚ-4498-сон қарорида белгиланган тартиб ва шартларда Жамғарма ҳамда ваколатли банклар ўртасида тузилган кредит шартномаларига тегишли ўзгартириш ва қўшимчалар киритиш орқали амалга оширилади;
Жамғарма ҳамда Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди ўртасида тузиладиган шартнома орқали амалга оширилади;
Наманган вилоятида янги кичик саноат зоналарида инфратузилмани шакллантириш ва тадбиркорликни қўллаб-қувватлаш, шу жумладан Наманган шаҳридаги «Юксалиш» кичик саноат зонаси ҳудудида 2020-2021 йилларда полимер, енгил саноат, электр техникаси, кимё ва қурилиш маҳсулотларини халқаро талаблар асосида синов ўтказадиган лаборатория, молия, транспорт-логистика хизматларини ўз ичига оладиган комплекс хизматлар марказини ташкил этиш мақсадларига йўналтирилади;
б) Наманган вилоятига кичик саноат зоналари фаолиятини янада ривожлантириш учун ажратилган маблағлардан фойдаланиш тартиби Ўзбекистон Республикаси Вазирлар Маҳкамаси тасдиқлайдиган Кенгаш томонидан белгиланади.
3. Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди, Марказий банки, Бандлик ва меҳнат муносабатлари вазирлиги икки ҳафта муддатда микромолиявий хизматлар кўрсатувчи ташкилотлар ҳамда нодавлат нотижорат ташкилотларига ёшлар ва хотин-қизларни тадбиркорликка жалб қилиш лойиҳаларини қўллаб-қувватлаш учун маблағларни ажратиш тартибини Вазирлар Маҳкамасига киритсин.
4. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари Ж.А. Қўчқоров ва Ўзбекистон Республикаси Марказий банки раиси М.Б. Нурмуратов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2020 йил 14 июль,
ПҚ-4782-сон
Oʻzbekiston Respublikasi Prezidentining
Qarori
“Har bir oila — tadbirkor” dasturini hamda Namangan viloyatidagi kichik sanoat zonalarini rivojlantirishni moliyalashtirishga doir qoʻshimcha chora-tadbirlar toʻgʻrisida
Koronavirus pandemiyasi sharoitida ijtimoiy ahvoli va turmush sharoiti ogʻirlashgan oilalarning bandligini taʼminlash orqali ularga daromad manbaini yaratish hamda Namangan viloyatidagi kichik sanoat zonalarini rivojlantirishni moliyaviy resurslar bilan taʼminlash maqsadida:
1. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi hamda Moliya vazirligining Tiklanish va taraqqiyot jamgʻarmasidan (keyingi oʻrinlarda — Jamgʻarma):
a) “Har bir oila — tadbirkor” dasturi uchun qoʻshimcha ravishda 98 million AQSH dollari ekvivalentidagi mablagʻlarni:
“Agrobank” ATBga — 40 million AQSH dollari ekvivalentida;
AT Xalq bankiga — 30 million AQSH dollari ekvivalentida;
“Mikrokreditbank” ATBga — 28 million AQSH dollari ekvivalentida;
b) mikromoliyaviy xizmatlar koʻrsatuvchi tashkilotlar hamda nodavlat notijorat tashkilotlariga yoshlar va xotin-qizlarni kichik tadbirkorlikka jalb qilish loyihalarini qoʻllab-quvvatlashga — 2 million AQSH dollari ekvivalentida;
v) Namangan viloyatidagi kichik sanoat zonalari faoliyatini yanada rivojlantirish uchun Namangan viloyati hokimligiga 50 million AQSH dollari ajratish haqidagi takliflariga rozilik berilsin.
2. Belgilab qoʻyilsinki:
a) mazkur qarorga asosan ajratilgan mablagʻlardan foydalanish mos ravishda:
Oʻzbekiston Respublikasi Prezidentining 2019-yil 24-oktabrdagi “Oilaviy tadbirkorlikni rivojlantirish davlat dasturlari doirasida amalga oshirilayotgan loyihalarni kreditlash tartibini takomillashtirishning qoʻshimcha chora-tadbirlari toʻgʻrisida”gi PQ-4498-son qarorida belgilangan tartib va shartlarda Jamgʻarma hamda vakolatli banklar oʻrtasida tuzilgan kredit shartnomalariga tegishli oʻzgartirish va qoʻshimchalar kiritish orqali amalga oshiriladi;
Jamgʻarma hamda Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi oʻrtasida tuziladigan shartnoma orqali amalga oshiriladi;
Namangan viloyatida yangi kichik sanoat zonalarida infratuzilmani shakllantirish va tadbirkorlikni qoʻllab-quvvatlash, shu jumladan Namangan shahridagi “Yuksalish” kichik sanoat zonasi hududida 2020-2021-yillarda polimer, yengil sanoat, elektr texnikasi, kimyo va qurilish mahsulotlarini xalqaro talablar asosida sinov oʻtkazadigan laboratoriya, moliya, transport-logistika xizmatlarini oʻz ichiga oladigan kompleks xizmatlar markazini tashkil etish maqsadlariga yoʻnaltiriladi;
b) Namangan viloyatiga kichik sanoat zonalari faoliyatini yanada rivojlantirish uchun ajratilgan mablagʻlardan foydalanish tartibi Oʻzbekiston Respublikasi Vazirlar Mahkamasi tasdiqlaydigan Kengash tomonidan belgilanadi.
3. Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi, Markaziy banki, Bandlik va mehnat munosabatlari vazirligi ikki hafta muddatda mikromoliyaviy xizmatlar koʻrsatuvchi tashkilotlar hamda nodavlat notijorat tashkilotlariga yoshlar va xotin-qizlarni tadbirkorlikka jalb qilish loyihalarini qoʻllab-quvvatlash uchun mablagʻlarni ajratish tartibini Vazirlar Mahkamasiga kiritsin.
4. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov va Oʻzbekiston Respublikasi Markaziy banki raisi M.B. Nurmuratov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2020-yil 14-iyul,
PQ-4782-son
Президента Республики Узбекистан
Постановление
О дополнительных мерах по финансированию программы «Каждая семья — предприниматель» и развития малых промышленных зон в Наманганской области
В целях создания источника дохода семьям, социальное положение и условия жизни которых ухудшились в условиях коронавирусной пандемии, путем обеспечения их занятости, а также обеспечения финансовыми ресурсами развития малых промышленных зон в Наманганской области:
1. Согласиться с предложениями Министерства экономического развития и сокращения бедности и Министерства финансов Республики Узбекистан о выделении из Фонда реконструкции и развития (далее — Фонд):
а) дополнительно средств в эквиваленте 98 миллионов долларов США на программу «Каждая семья — предприниматель», в том числе:
АКБ «Агробанк» — в эквиваленте 40 миллионов долларов США;
АК «Халк банки» — в эквиваленте 30 миллионов долларов США;
АКБ «Микрокредитбанк» — в эквиваленте 28 миллионов долларов США;
б) Организациям по оказанию микрофинансовых услуг, а также негосударственным некоммерческим организациям на поддержку проектов по привлечению молодежи и женщин к малому бизнесу — в эквиваленте 2 миллионов долларов США;
в) хокимияту Наманганской области на дальнейшее развитие малых промышленных зон в Наманганской области — 50 миллионов долларов США.
2. Установить, что:
а) использование средств, выделенных на основании данного постановления осуществляется соответственно:
путем внесения соответствующих изменений и дополнений в кредитные договора, заключенные между Фондом и уполномоченными банками в порядке и на условиях, определенных в постановлении Президента Республики Узбекистан от 24 октября 2019 года № ПП-4498 «О дополнительных мерах по совершенствованию порядка кредитования проектов, реализуемых в рамках государственных программ развития семейного предпринимательства»;
путем заключения договоров между Фондом и Общественным фондом по поддержке негосударственных некоммерческих организаций и других институтов гражданского общества при Олий Мажлисе Республики Узбекистан;
на цели формирования инфраструктуры и поддержки предпринимательства в новых малых промышленных зонах Наманганской области, в том числе создания в 2020-2021 годах на территории малой промышленной зоны «Юксалиш» в городе Намангане центра комплексных услуг, включающего в себя лабораторные, финансовые и транспортно-логистические услуги для проведения испытаний продукции легкой промышленности, а также полимерной, электротехнической, химической и строительной продукции на основе международных требований;
б) порядок использования средств, выделенных Наманганской области на дальнейшее развитие малых промышленных зон, определяется Советом, утверждаемым Кабинетом Министров Республики Узбекистан.
3. Общественному фонду по поддержке негосударственных некоммерческих организаций и других институтов гражданского общества при Олий Мажлисе Республики Узбекистан, Центральному банку, Министерству занятости и трудовых отношений в двухнедельный срок внести в Кабинет Министров Республики Узбекистан Порядок выделения средств организациям по оказанию микрофинансовых услуг, а также негосударственным некоммерческим организациям для поддержки проектов по привлечению молодежи и женщин к предпринимательству.
4. Контроль за исполнением настоящего постановления возложить на заместителя Премьер-министра Республики Узбекистан Д.А. Кучкарова и председателя Центрального банка Республики Узбекистан М.Б. Нурмуратова.
Президент Республики Узбекистан Ш. МИРЗИЁЕВ
г. Ташкент,
14 июля 2020 г.,
№ ПП-4782