📅 2020-yil 23-iyun · Vazirlik va idoralar hujjatlari · Davlat bojxona qoʻmitasi
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 23 июнь · Вазирлик ва идоралар ҳужжатлари · Давлат божхона қўмитаси
Расмий матн. Расмий ҳужжат. Таҳририй изоҳлар киритилмаган.
📅 23 июня 2020 г. · Документы министерств и ведомств · Государственного таможенного комитета
Официальный текст. Официальный документ. Редакционные примечания не включены.
📅 23 June 2020 · Ministry and agency documents · Davlat bojxona qoʻmitasi
Official text. Official document. Editorial notes are not included.
Ўзбекистон Республикаси Давлат божхона қўмитасининг
қарори
НИЗОМ
тартиби
Вақтинча олиб кириш тўғрисидаги конвенцияни (Истанбул, 1990 йил 26 июнь) қўллаш тартиби тўғрисидаги низомни тасдиқлаш ҳақида
Ўзбекистон Республикаси Божхона кодекси ва Ўзбекистон Республикаси Президентининг 2020 йил 24 апрелдаги ПҚ-4694-сон «Халқаро шартномага қўшилиш тўғрисида»ги қарорига мувофиқ Ўзбекистон Республикаси Давлат божхона қўмитаси қарор қилади:
1. Вақтинча олиб кириш тўғрисидаги конвенцияни (Истанбул, 1990 йил 26 июнь) қўллаш тартиби тўғрисидаги низом иловага мувофиқ тасдиқлансин.
2. Мазкур қарор расмий эълон қилинган кундан эътиборан уч ойдан кейин кучга киради.
Ўзбекистон Республикаси Давлат божхона қўмитасининг 2020 йил 23 июндаги 01-02/12-28-сон қарорига ИЛОВА
Вақтинча олиб кириш тўғрисидаги Конвенцияни (Истанбул, 1990 йил 26 июнь) қўллаш тартиби тўғрисидаги
Мазкур Низом Ўзбекистон Республикаси Божхона кодекси (бундан буён матнда Божхона кодекси деб юритилади) ва Ўзбекистон Республикаси Президентининг 2020 йил 24 апрелдаги ПҚ-4694-сон «Халқаро шартномага қўшилиш тўғрисида»ги қарорига мувофиқ Ўзбекистон Республикаси божхона чегарасидан товарларни божхона назорати ва божхона расмийлаштирувидан ўтказишда Вақтинча олиб кириш тўғрисидаги Конвенцияни (Истанбул, 1990 йил 26 июнь) (бундан буён матнда Конвенция деб юритилади) қўллаш тартибини белгилайди .
1-боб. Умумий қоидалар
1. Ушбу Низомда қуйидаги тушунчалар қўлланилади:
АТА карнети ― божхона декларациясига тенглаштирилган, товарларни идентификациялашга ва вақтинча олиб киришга (транспорт воситаларидан ташқари) имкон берадиган ҳамда божхона тўловларини тўлашнинг халқаро миқёсда кафолатини ўз ичига олган халқаро божхона ҳужжати;
кафолатловчи уюшма ― вақтинча олиб кириш тўғрисидаги ҳужжатларни бериш учун масъул бўлган ва вақтинча олиб кириш шартлари бузилган тақдирда божхона тўловларини тўлаш бўйича кафолатловчи ваколатли ташкилот ― Ўзбекистон Республикаси Савдо-саноат палатаси (кейинги ўринларда Савдо-саноат палатаси);
божхона операцияси ― товарларнинг божхона расмийлаштирувида товарларга нисбатан божхона органларининг мансабдор шахси ва (ёки) ваколатли шахс томонидан амалга ошириладиган ҳаракат ;
божхона режими ― божхона чегараси орқали олиб ўтиладиган товарларнинг мақомини божхона мақсадлари учун белгиловчи қоидалар мажмуи ;
декларациялаш ― божхона чегараси орқали олиб ўтилаётган ва (ёки) божхона назорати остида турган товарлар тўғрисидаги зарур маълумотларни божхона органларига маълум қилиш .
2. АТА карнетини қўллаган ҳолда божхона тўловларидан тўлиқ шартли равишда озод қилинадиган товарларга нисбатан божхона операциялари Конвенциянинг А-иловаси «Вақтинча олиб кириш ҳужжатлари тўғрисида » билан биргаликда Конвенциянинг қуйидаги иловалардан бирининг шартларига риоя қилган ҳолда амалга оширилади:
В.1-илова «Кўргазмалар, ярмаркалар, конференциялар ёки шу каби тадбирларда намойиш қилиш ёхуд фойдаланиш учун товарлар тўғрисида »;
В.2-илова «Профессионал асбоб-ускуна тўғрисида »;
В.3-илова «Тижорат операцияси муносабати билан олиб кирилган контейнерлар, поддонлар, ўрамлар, намуналар ва бошқа товарлар тўғрисида »;
В.5-илова «Таълим, илмий ёки маданий мақсадларда олиб кирилган товарлар тўғрисида »;
В.6-илова «Саёҳатчиларнинг шахсий буюмлари ва спорт мақсадларида олиб кирилган юкларга тегишли илова ».
3. Божхона органи қуйидаги ҳолларда АТА карнетини божхона декларацияси ва божхона тўловларини тўлашнинг халқаро миқёсидаги кафолати ҳамда божхона органлари олдидаги мажбуриятнинг бажарилишини кафолатловчи ҳужжат сифатида қабул қилиши мумкин:
агар АТА карнетида кафолатловчи уюшма ва халқаро тизимнинг номи кўрсатилган бўлса;
АТА карнетини эгаси ва уни берган кафолатловчи уюшма томонидан мазкур Низомда белгиланган тартибда тўлдирилган бўлса;
товар олиб чиқилаётган (экспорт қилувчи) мамлакатнинг божхона органи томонидан расмийлаштирилган бўлса.
4. ATA карнетини қўллаган ҳолда расмийлаштириладиган товарлар учун вақтинчалик олиб кириш муддати товарларни Ўзбекистон Республикаси ҳудудига олиб киришда назорат божхона органи томонидан ATA карнети қабул қилинган кундан бошлаб ушбу товарлар амалда олиб чиқилган кунгача ҳисобланади.
5. ATA карнетини қўллаган ҳолда олиб кирилган товарларни қайта олиб чиқиш мажбурияти улар Ўзбекистон Республикасидан амалда олиб чиқилганидан ёки Божхона кодексига мувофиқ «вақтинча олиб кириш» божхона режими тугалланганидан бошлаб бажарилган ҳисобланади.
6. Божхона органи ATA карнетини қабул қилиб олганда ATA карнетининг тўғри тўлдирилганлигини текширади.
Бунда Конвенцияга аъзо мамлакатларнинг кафолатловчи уюшмалари томонидан берилган ATA карнети муқовасининг устки қисмида ATA карнети қабул қилиниши мумкин бўлган мамлакатлар кўрсатилиши лозим, ушбу мамлакатларнинг кафолатловчи уюшмалари номлари ёки божхона ҳудудлари ATA карнетининг охирги яшил бети орқа томонининг юқори бандида кўрсатилиши керак.
ATA карнетининг амал қилиш муддати уюшма томонидан берилган кундан бошлаб бир йилдан ошмаслиги лозим.
ATA карнетини қўллаган ҳолда товарларни вақтинча олиб кириш (олиб чиқиш) муддати ATA карнетида белгиланган муддатдан ошиб кетмаслиги керак.
ATA карнетини қўллаган ҳолда вақтинча олиб кирилган товарлардан фақат ATA карнетида назарда тутилган мақсадларда фойдаланиш мумкин, тижорат мақсадларида фойдаланишга йўл қўйилмайди, бундан Конвенция ва унинг иловаларида бошқача қоида назарда тутилган ҳоллар мустасно.
7. ATA карнетининг барча варақлари бир хил тўлдирилиши лозим, бириктирилган қоғозлар, стикерлар ва ҳавола (изоҳ) кўринишидаги қўшимчаларга йўл қўйилмайди. Барча варақлардаги маълумотлар муқовадаги маълумотлар билан бир хил бўлиши керак;
Муқова ва унга қўшимча варақлар ATA карнети муқовасининг «А» графаси ҳамда унинг варақларида кўрсатилган эгаси (ATA карнетини божхона органларига тақдим этиш орқали товарларни декларациялаётган жисмоний ва (ёки) юридик шахс) томонидан ATA карнети расмийлаштирилишидан олдин имзоланиши лозим, қолган варақлари божхона органидан ўтишига қараб эгаси (вакили) томонидан тўлдирилади.
8. ATA карнетининг тўғри тўлдирилганлигини текширишда қуйидагиларга алоҳида эътибор берилади:
ATA карнетининг амал қилиш муддати;
Ўзбекистон Республикасига олиб кириладиган товарларга нисбатан ATA карнетини қўллаш имконияти;
ATA карнети муқовасининг устки қисмида ундан Ўзбекистон Республикасида фойдаланиш мумкинлиги тўғрисидаги ёзувнинг мавжудлиги ва кафолатловчи уюшмаси ATA карнетининг охирги яшил бети орқа томони юқори бандида кўрсатилиши;
товарларнинг умумий рўйхати ва қўшимча варақлари (мавжуд бўлса) тўлдирилганлиги ва расмийлаштирилганлиги;
ATA карнетининг корешоги ва йиртиб олинадиган ваучерлари тўлдирилганлиги (уларга киритилган маълумотлар ATA карнети муқовасининг устки қисми ва орқа томонида кўрсатилган маълумотларга ҳамда транспорт ва товарнинг кузатув ҳужжатларида кўрсатилган маълумотларга мос келиши керак);
АТА карнетининг юқори ўнг бурчагида «have been exported» ёки «ont ete exportees» ёзуви бўлган ATA карнетининг сариқ рангдаги «exportation» корешогида олиб чиқилаётган товарларнинг божхона расмийлаштирувидан ўтказилганлиги тўғрисидаги белгиларнинг (тўлдирилиши, олиб чиқаётган мамлакатнинг муҳр ва штамплари) мавжудлиги.
ATA карнетини расмийлаштириш учун барча зарур талаблар бажарилган ҳолларда божхона органининг мансабдор шахси бундай ATA карнетини қабул қилади.
9. Божхона органлари ATA карнетини қўллаган ҳолда олиб кириладиган товарларни божхона назоратидан ўтказади .
Божхона кўриги далолатномаларини тузишда товарларнинг тавсифи сифатида товарларнинг умумий рўйхатидан фойдаланишга рухсат этилади.
Божхона органлари томонидан божхона мақсадлари учун товарларни таснифлаш амалга оширилади.
Бунда ATA карнетида кўрсатилган товарларни идентификациялаш ва божхона тўғрисидаги қонунчилик ҳужжатларига мувофиқ тақиқ ва чекловлар ўрнатилмаганлигини аниқлаш имкони мавжуд бўлса, Ўзбекистон Республикасининг ягона Ташқи иқтисодий фаолият товар номенклатурасига (бундан буён матнда ТИФ ТН деб юритилади) мувофиқ товар позицияси даражасида 6 белгидан кам бўлмаган товарларни таснифлашга йўл қўйилади. Агар товарларга божхона тўғрисидаги қонунчилик ҳужжатлари билан тақиқ ва чекловлар ўрнатилган бўлса, товар коди ТИФ ТНга мувофиқ 10 белги даражасида аниқланади.
10. ATA карнетини қўллаган ҳолда вақтинча олиб кирилаётган (олиб чиқилаётган) товарлар бўйича божхона органи томонидан «ATA карнети бўйича товарларни қайд этиш журнали» электрон кўринишда юритилади.
11. Божхона органлари томонидан ATA карнетини қўллаган ҳолда вақтинча олиб киришга рухсат берилган товарларнинг тўланган божхона тўловлари бутун муддат давомида кафолатланиши учун божхона органлари томонидан белгиланган бундай товарларни қайтиб олиб чиқиш муддати ATA карнетини берган кафолатловчи уюшма томонидан қўйилган амал қилиш муддатидан ошмаслиги керак.
12. Олиб чиқилаётган товарларга нисбатан божхона операцияларини амалга оширишда «вақтинча олиб чиқиш» божхона режимига мувофиқ Конвенциянинг амал қилиш доирасига кирадиган товарларнинг божхона декларацияланиши декларантнинг танловига кўра божхона декларацияси сифатида Савдо-саноат палатаси томонидан берилган ATA карнетини унга илова қилинган транспорт (ташувчи) ва тижорат ҳужжатлари билан бирга қўллаган ҳолда амалга оширилиши мумкин.
13. Божхона органи томонидан ATA карнети қабул қилиб олинганидан сўнг, унга ўзгартириш ва (ёки) қўшимчалар киритилишига йўл қўйилмайди.
14. Божхона органига тақдим этиладиган ATA карнети давлат тилида ёки рус тилида ва инглиз (француз) тилида тўлдирилган бўлиши лозим.
2-боб. ATA карнетини қўллаган ҳолда олиб кирилаётган товарларни декларациялаш
15. ATA карнетини қўллаган ҳолда товарларни олиб киришда унинг эгаси (вакили) назорат божхона органига товарларни ҳамда ATA карнетини тақдим этади.
16. ATA карнетини расмийлаштиришда назорат божхона органининг мансабдор шахси ATA карнетининг оқ рангдаги «importation» корешоклари ва йиртиб олинадиган ваучерларини мазкур Низом иловасининг 1-бандига мувофиқ тартибда тўлдиради.
17. Корешоклар ва йиртиб олинадиган ваучерларни тўлдиргандан сўнг назорат божхона органининг мансабдор шахси:
ATA карнетининг оқ рангдаги йиртиб олинадиган «importation» ваучерини бирлаштирилган варақларидан ажратиб олади;
ATA карнети бўйича вақтинча олиб киришни рўйхатдан ўтказилганини ёки ATA карнети бўйича етказиб берилган товарларнинг рўйхатдан ўтказилганини, ATA карнетини қўллаган ҳолда товарларга нисбатан божхона операцияларини амалга оширишдаги ҳаракатлар тўғрисидаги зарур маълумотларни электрон маълумотлар базасига киритади;
расмийлаштирилган ATA карнетини унинг эгаси (эгасининг вакили)га қайтаради.
18. ATA карнетининг расмийлаштирилган йиртиб олинадиган ваучерлари АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси ҳамда илова қилинадиган ҳужжатлар нусхаси билан бирга назорат божхона органида қолади.
19. Назорат божхона органи товарларни «вақтинча олиб кириш» божхона режими шартларига риоя этилишини олиб қолинган АТА карнетининг расмийлаштирилган йиртиб олинадиган ваучерлари ҳамда АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси асосида божхона назоратини амалга оширади.
3-боб. ATA карнетини қўллаган ҳолда Ўзбекистон Республикасига вақтинча олиб кирилган товарларнинг вақтинча олиб кириш муддатини узайтириш
20. ATA карнети эгасининг (вакилининг) аризасига асосан товарларни вақтинча олиб кириш учун белгиланган муддат ATA карнети эгаси (вакили) жойлашган жойдаги Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг тегишли бошқармаси (бундан буён матнда ҳудудий божхона бошқармаси деб юритилади) қарорига асосан ATA карнетининг амал қилиш муддати мобайнида узайтирилади.
Товарларни вақтинча олиб кириш учун белгиланган муддатни узайтиришда ҳудудий божхона бошқармасининг мансабдор шахси томонидан мазкур Низом иловасининг 3-бандида белгиланган тартибда ATA карнетининг оқ рангдаги йиртиб олинадиган «importation» ваучерлари тўлдирилади ва электрон маълумотлар базасида ATA карнетининг маълумотлари бўйича узайтириш муддатини кўрсатган ҳолда тегишли ёзувни киритади.
4-боб. Илгари АТА карнетидан фойдаланган ҳолда вақтинча олиб кирилган товарларни Ўзбекистон Республикасидан қайта олиб чиқишда ( реэкспортда ) декларациялаш
21. Товарлар реэкспорт қилинаётганда, назорат божхона органига АТА карнетининг эгаси (вакили) илгари олиб кирилган товарлар ва АТА карнетини тақдим этади. Божхона органи мансабдор шахси томонидан АТА карнетининг оқ рангдаги йиртиб олинадиган «reexportation» ваучерлари тўлдирилади.
Товарлар бир ёки бир нечта партияларда қайтариб олиб чиқилиши мумкин.
АТА карнетини қўллаган ҳолда вақтинча олиб кирилган товарларни олиб чиқиш (реэкспорт) дастлаб олиб кирилган назорат божхона органи жойлашган ҳудуддан бошқа ҳудудда жойлашган божхона органи орқали олиб чиқилиши мумкин.
22. Илгари АТА карнетидан фойдаланган ҳолда вақтинча олиб кирилган товарларни қайта олиб чиқишда (реэкспортда) назорат божхона органининг мансабдор шахси томонидан мазкур Низом иловасининг 2-бандига мувофиқ тартибда АТА карнетининг оқ рангли йиртиб олинадиган «reexportation» ваучери тўлдирилади.
23. Божхона органининг мансабдор шахси томонидан АТА карнетининг оқ рангдаги «reexportation» корешоги ва йиртиб олинадиган ваучери тўлдирилганидан сўнг:
АТА карнетининг оқ рангдаги йиртиб олинадиган «reexportation» ваучерини бошқа бирлаштирилган АТА карнети варақларидан ажратади;
АТА карнетини қўллаган ҳолда вақтинча олиб киришни руйхатдан ўтказишнинг электрон маълумотлар базасида АТА карнетини қўллаган ҳолда вақтинча олиб кирилган товарларга нисбатан амалга оширилган божхона операциялари тўғрисида маълумотларни киритади;
расмийлаштирилган АТА карнетини унинг эгасига (вакили) қайтаради.
24. АТА карнетининг оқ рангдаги йиртиб олинадиган «reexportation» ваучерлари АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси ҳамда илова қилинадиган ҳужжатлар нусхаси билан бирга божхона органида қолади.
АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси ҳамда илова қилинадиган ҳужжатлар билан бирга назорат божхона органида қолади
25. АТА карнетини қўллаган ҳолда олиб кирилган товарларни қайта олиб чиқишда (реэкспорт) декларациялаш Ўзбекистон Республикасидан товарларни олиб чиқишни расмийлаштирадиган божхона органи томонидан амалга оширилади.
26. АТА карнети эгасининг (вакили) «вақтинча олиб кириш» божхона режими шартларига риоя қилиш мажбурияти, АТА карнетидан фойдаланишнинг ўзига хос хусусиятлари ва божхона тўловларини тўлаш кафолатини ҳисобга олган ҳолда товарлар Ўзбекистон Республикасидан олиб чиқилишига қадар ўз кучини сақлаб қолади.
27. Назорат божхона органи АТА карнетининг оқ рангдаги йиртиб олинган «reexportation» ваучери ҳамда АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси асосида «вақтинча олиб кириш» божхона режими шартларига риоя қилиниши юзасидан божхона назоратини амалга оширади.
28. АТА карнетини қўллаган ҳолда олиб кирилган товарларни қайта олиб чиқиш (реэкспорт) амалга оширилганда, тегишли божхона органи АТА карнетининг оқ рангли йиртиб олинадиган «reexportation» ваучерини расмийлаштиради ва уч кун ичида унинг нусхасини «вақтинча олиб кириш» божхона режимини назорат қилишни якунлаш учун назорат божхона органига юборади.
ATA карнетининг расмийлаштирилган йиртиб олинадиган ваучерлари АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси ҳамда илова қилинадиган ҳужжатлар нусхаси билан бирга назорат божхона органида қолади.
5-боб. АТА карнетидан фойдаланган ҳолда Ўзбекистон Республикасига вақтинча олиб кирилган товарларга нисбатан божхона тўловлари тўланишининг кафолатлари
29. Конвенция қоидалари бузилган тақдирда АТА карнетини қўллаган ҳолда олиб кирилган товарлар бўйича Савдо-саноат палатаси божхона тўловлари тўланишини кафолатлайди.
30. ATA карнетини қўллаган ҳолда олиб кирилган товарлар учун назорат божхона органи олдида мазкур Низомнинг 35-бандига мувофиқ ҳисобланган божхона тўловларини тўлаш бўйича Савдо-саноат палатаси билан биргаликда АТА карнетининг эгаси солидар тартибда жавобгар бўладилар.
Савдо-саноат палатасига тўлаш учун тақдим этилган божхона тўловлари умумий миқдорининг 10 фоизидан ошиб кетиши мумкин эмас.
31. АТА карнетининг амал қилиш муддати тугаган санадан бошлаб, бир йиллик муддат ичида божхона тўловларини тўлаш юзасидан назорат божхона органи томонидан АТА карнети эгаси ва Савдо-саноат палатасига божхона тўловларини тўлаш тўғрисида талабнома (бундан буён матнда талабнома деб юритилади) юборилади.
32. АТА карнетини қўллаган ҳолда олиб кирилган товарлар қайта олиб чиқилганлигини (реэкспорт) исботлаш учун Савдо-саноат палатаси талабномани олган кундан эътиборан олти ой ичида назорат божхона органига АТА карнетини қўллаган ҳолда олиб чиқишни (реэкспорт) расмийлаштирган божхона органи томонидан белгиланган тартибда тўлдирилган ва муҳри билан тасдиқланган АТА карнетининг оқ рангдаги йиртиб олинадиган «reexportation» ваучерлари нусхасини тақдим этади.
Назорат божхона органи АТА карнетини қўллаган ҳолда олиб кирилган товарларнинг қайта олиб чиқилиганлиги (реэкспорт) далиллари сифатида бошқа ҳужжатларни қабул қилишлари мумкин.
Тақдим этилган ҳужжатлар асосида «вақтинча олиб кириш» божхона режимининг амал қилиш муддати тугаган ҳолатларда, назорат божхона органи бу ҳақда Савдо-саноат палатасига хабар беради.
33. Мазкур Низомнинг 32-бандида кўрсатилган ҳужжатларнинг амал қилиш муддати белгиланган муддатгача божхона органларига тақдим этилмаган тақдирда, АТА карнети эгалари ва Савдо-саноат палатаси мазкур Низомнинг 30-бандида кўрсатилган миқдорларда божхона тўловларини тўлаши шарт.
34. Агар Савдо-саноат палатаси ёки АТА карнетининг эгаси ёки бошқа манфаатдор шахс божхона органларига авария ёки енгиб бўлмайдиган куч (форс-мажор) ҳолати туфайли товарларнинг тўлиқ йўқ қилиниши ёки йўқотилиши тўғрисида қониқарли далилларни тақдим этса ва АТА карнетининг амал қилиш муддати тугаган кундан бошлаб бир йил ўтган бўлса, талабнома Савдо-саноат палатасига тақдим этилмайди.
6-боб. Конвенция қоидалари бузилган тақдирда АТА карнетини қўллаган ҳолда олиб кирилган товарлар бўйича божхона тўловларини ундириш
35. Конвенция талаблари, шунингдек, «вақтинча олиб кириш» божхона режимлари шартлари бузилган тақдирда, божхона тўловларини ҳисоблаш назорат божхона органи томонидан қуйидаги тартибда амалга оширилади:
a) ATA карнетини қўллаб расмийлаштирилган товарлар Ўзбекистон Республикасидан ATA карнетида кўрсатилган муддатда амалда олиб чиқилмаган бўлса, божхона тўловлари суммаси ушбу товарлар «эркин муомалага чиқариш (импорт)» режимига жойлаштирилганда тўланиши лозим бўлган суммалар миқдорида ҳисобланади.
Бунда Божхона кодексининг 45-бобига мувофиқ божхона органи АТА карнетини қабул қилинган кунда амал қиладиган бож тўловлари ставкалари, шунингдек чет эл валютасининг курслари қўлланилади;
б) товарлар вақтинча олиб кириш муддати якунланганидан сўнг олиб чиқилганда, божхона тўловлари Божхона кодексининг 11-бобига мувофиқ вақтинча олиб кириш муддати тугаган кундан товарлар амалда олиб чиқилган кунгача бўлган вақт учун ҳисобланади;
в) ATA карнетини қўллаган ҳолда вақтинча олиб кирилган товарларни мақсадсиз фойдаланган, аммо улар белгиланган муддатда олиб чиқилган тақдирда, Божхона кодексининг 11-бобига мувофиқ улар бўйича тўланиши лозим бўлган божхона тўловлари ушбу товарларни уларнинг мақсади бўйича фойдаланиш талабини бузган ҳолда муомалага чиқарилган кундан бошлаб ҳисобланади, агар ушбу кун белгиланмаган бўлса АТА карнетининг назорат божхона органи қабул қилган кундан кейинги кундан бошлаб ҳисобланади.
36. Мазкур Низомнинг 35-бандида кўрсатилган «вақтинча олиб кириш» божхона режимининг шартлари бузилган тақдирда, божхона расмийлаштируви учун божхона йиғимлари ундирилади.
37. Конвенция талаблари ва «вақтинча олиб кириш» божхона режими шартлари бузилган тақдирда божхона органи томонидан АТА карнети эгаси ва Савдо-саноат палатасига бу ҳақда талабнома юборади.
Талабномада қоидабузарликнинг моҳияти баён қилинади, бузилиш фактини тасдиқловчи ҳужжатлар нусхалари, шу жумладан, божхона органи томонидан расмийлаштирилган АТА карнетининг назорат варақаси нусхаси, шунингдек, божхона тўловлари ва божхона расмийлаштируви учун божхона йиғимлари миқдорини ҳисоби кўрсатилади.
38. Мазкур Низомнинг 35-бандида кўрсатилган «вақтинча олиб кириш» божхона режимининг шартлари бузилган тақдирда, божхона органи АТА карнети эгасидан божхона тўловлари ва йиғимларини мажбурий ундириш бўйича зарур чораларни кўради.
Божхона органи томонидан АТА карнети эгасидан божхона тўловлари ва йиғимлари қисман ундирилган бўлса, у ҳолда қолган қисмини ундириш бўйича Савдо-саноат палатасига маълум қилади.
Божхона органи томонидан АТА карнети эгасидан божхона тўловлари ва йиғимлари тўлиқ ундирилган бўлса, у ҳолда Савдо-саноат палатасига талабнома қўйилмайди ёки юборилган талабнома қайтариб олинади.
39. Савдо-саноат палатаси талабнома олинган кундан бошлаб, олти ой ичида қайта олиб чиқиш тўғрисида далиллар ёки АТА карнетини тегишли равишда расмийлаштирилганлигини тақдим этса, божхона органи далиллар олинган кундан бошлаб 15 кун ичида уларни кўриб чиқади ва талабномани тўлиқ (қисман) қайтариб олиш ёки уларни рад этиш тўғрисида қарорини қабул қилади. Талабномани тўлиқ (қисман) қайтариб олиш ёки уларни рад этиш тўғрисида қарор қабул қилинган кундан кейинги иш кунидан кечиктирмай, божхона органи Савдо-саноат палатасини ушбу қарорни қабул қилинганлиги тўғрисида хабардор қилади.
40. Савдо-саноат палатасидан талабнома олинган кундан бошлаб олти ой ичида ҳеч қандай тушунтириш олинмаса ёки улар божхона органи томонидан рад этилган бўлса, Савдо-саноат палатаси дарҳол божхона органининг ҳисоб рақамига талабномада кўрсатилган божхона расмийлаштируви учун божхона тўловлари ва божхона йиғимлари суммасини ушбу Низомнинг 30-бандида кўрсатилган миқдорларда ўтказиши шарт.
41. Талабномада кўрсатилган божхона тўловлар ва йиғимлари тўланган кундан бошлаб уч ой мобайнида Савдо-саноат палатаси товарларнинг қайта олиб чиқилиши (реэкспорт) тўғрисида далиллар тақдим қилиши мумкин.
Ҳудудий божхона бошқармаси товарларни қайтариб олиб чиқиш (реэкспорт) далиллари олинган кундан бошлаб 15 кундан кечиктирмай уларни кўриб чиқади ва Савдо-саноат палатасига далилларни тўлиқ (қисман) қабул қилинганлиги ёки улар рад этилганлиги (сабабларини кўрсатган ҳолда) ҳақида хабар беради. Товарларнинг олиб чиқилганлиги (реэкспорт) далиллари мавжуд бўлган ва Конвенция талаблари бузилмаган тақдирда, Савдо-саноат палатаси томонидан тўланган суммалар Божхона кодексининг 49-бобига мувофиқ қайтарилади.
42. Тўланиши лозим бўлган суммалар божхона органларининг ҳисоб рақамига ўтказилмаса, олти ойлик муддат ўтгандан сўнг божхона органи ушбу суммаларни Савдо-саноат палатасидан ундириш тўғрисида даъво аризаси билан судга мурожаат қилади.
43. «Вақтинча олиб кириш» божхона режимини Божхона кодексига мувофиқ бошқа божхона режимига ўзгартиришда ва ушбу божхона режимининг шартлари Ўзбекистон Республикасидан товарларни олиб чиқишни назарда тутмайдиган бўлса, божхона органи АТА карнетининг оқ рангдаги йиртиб олинадиган «importation» ваучерига белги қўяди ва шу пайтдан бошлаб Савдо-саноат палатаси мажбуриятлардан озод қилинади, шунингдек, АТА карнетининг оқ рангдаги «importation» корешогида божхона декларациясининг рақами кўрсатилади.
7-боб. Ўзбекистон Республикасидан вақтинча олиб чиқиш учун АТА карнетидан фойдаланган ҳолда товарларни декларациялаш
44. Конвенция талаблари тадбиқ қилинадиган товарлар «вақтинча олиб чиқиш» божхона режимига жойлаштирилганда, уларни декларациялаш Савдо-саноат палатаси томонидан тақдим этилган АТА карнети декларантнинг танловига кўра товарларга декларация сифатида фойдаланилиши мумкин.
Божхона органлари Божхона кодексида белгиланган тартибда АТА карнетини қўллаган ҳолда вақтинча олиб чиқилаётган товарларга нисбатан божхона назоратини амалга оширади.
Божхона кўриги далолатномасини расмийлаштиришда товарларнинг тавсифи сифатида товарларнинг умумий рўйхатидан фойдаланишга рухсат этилади.
45. АТА карнети божхона органига тақдим этилади ва уни берган кафолатловчи уюшма томонидан тўлдирилган ва расмийлаштирилган тақдирда қабул қилинади.
Бунда, АТА карнетининг муқовасида уни берган кафолатловчи уюшма АТА карнети қабул қилиниши мумкин бўлган мамлакатларни ва ушбу мамлакатлар ёки божхона ҳудудларининг кафолатли бирлашмаларининг номлари кўрсатилиши керак.
Божхона органига АТА карнети тақдим этилганда, унинг эгаси (вакили) томонидан АТА карнетининг сариқ рангдаги «exportation» йиртиб олинадиган ваучери тўлдирилади.
46. АТА карнетнинг амал қилиш муддати АТА карнетини тақдим этувчи кафолатловчи уюшма томонидан берилган санадан эътиборан бир йилдан ошмаслиги лозим.
АТА карнетидан фойдаланиб ҳаракатланаётган товарларни вақтинча олиб чиқиш муддати Конвенцияда белгиланган талабларга мувофиқ белгиланади.
47. Божхона органи АТА карнетини қабул қилганда унинг тўлдирилганлигини текширади.
Бунда қуйидагиларга алоҳида эътибор берилади:
АТА карнетининг амал қилиш муддати;
товарларнинг умумий рўйхати ва қўшимча варақаларни тегишли равишда тўлдириш ва расмийлаштириш;
сариқ рангдаги ATA карнетининг йиртиб олинадиган ваучерини тўлдириш (унда келтирилган маълумотлар АТА карнетининг муқоваси олд ва орқа томонларида кўрсатилган ва юк кузатув ва транспорт ҳужжатларида кўрсатилган маълумотларга мос келиши керак).
Барча талаблар бажарилган тақдирда АТА карнетини расмийлаштириш учун божхона органининг мансабдор шахси бундай АTA карнетини рўйхатдан ўтказиш учун қабул қилади.
Товарларни чиқаришга қарор қилинганда, ATA карнети вақтинча олиб чиқиш руйхатидан ўтказишнинг электрон маълумотлар базасида рўйхатдан ўтказилади.
Бунда божхона органининг мансабдор шахси мазкур Низом иловасининг 4-бандида кўрсатилган маълумотларни АТА карнети муқовасининг олдинги чап томонининг пастки қисмига АТА карнетнинг сариқ рангдаги «exportation» корешоги ва йиртиб олинадиган ваучерига киритади.
48. АТА карнетнинг сариқ рангдаги «exportation» корешоги ва йиртиб олинадиган ваучери тўлдирилганидан сўнг, божхона органининг мансабдор шахси:
АТА карнетининг сариқ рангдаги йиртиб олинадиган ваучерни бошқа бирлаштирилган варақларидан ажратади;
расмийлаштирилган АТА карнетини эгасига (вакилига) қайтаради.
49. ATA карнетининг расмийлаштирилган сариқ рангдаги йиртиб олинадиган ваучерлари АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси ҳамда илова қилинадиган ҳужжатлар нусхаси билан бирга назорат божхона органида қолади.
50. Назорат божхона органи товарларни «вақтинча олиб чиқиш» божхона режими шартларига риоя этилишини олиб қолинган АТА карнетининг расмийлаштирилган йиртиб олинадиган ваучерлари ҳамда АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси асосида божхона назоратини амалга оширади.
51. Божхона органи томонидан ATA карнети қабул қилиб олингандан сўнг унга ўзгартириш ва (ёки) қўшимчалар киритилишига йўл қўйилмайди.
8-боб. Илгари АТА карнетини қўллаган ҳолда вақтинча олиб чиқилган товарларни Ўзбекистон Республикасига қайтариб (реимпорт) олиб кириш
52. Ўзбекистон Республикасидан илгари вақтинча олиб чиқилган товарларни «реимпорт» божхона режими остида АТА карнетидан фойдаланган ҳолда жойлаштиришда уларнинг божхонада декларацияланиши АТА карнети товарлари учун декларация сифатида қўлланиши мумкин.
53. Божхона органи АТА карнетини расмийлаштиришда унинг сариқ рангдаги «reimportation» корешоги ва йиртиб олинадиган ваучерини мазкур Низом иловасининг 5-бандига мувофиқ тартибда тўлдирилади.
54. Божхона органлари Божхона кодексига мувофиқ АТА карнети асосида Ўзбекистон Республикасига қайта олиб кириладиган (реимпорт) товарларга нисбатан божхона назорати шаклларидан фойдаланади.
Божхона кўриги далолатномаларини тузишда товар тавсифи сифатида товарларнинг умумий рўйхатларидан фойдаланишга йўл қўйилади.
55. АТА карнетининг корешоги ва йиртиб олинадиган ваучери тўлдирилгандан сўнг, божхона органининг мансабдор шахси:
йиртиб олинадиган ваучерни «реимпорт» божхона режими остида товарларни жойлаштиришда АТА карнетининг сариқ рангдаги «reimportation» ваучерини бирлаштирилган АТА карнети варақларидан ажратади;
электрон маълумотлар базасига зарур маълумотларни киритади;
расмийлаштирилган АТА карнетининг эгасига (вакилига) қайтаради.
56. АТА карнетининг расмийлаштирилган йиртиб олинадиган ваучерлари АТА карнетидаги товарларнинг умумий рўйхати ва унинг қўшимча варақларининг (мавжуд бўлганда) нусхаси ҳамда илова қилинадиган ҳужжатлар нусхаси билан бирга назорат божхона органида қолади.
57. Товарлар «реимпорт» божхона режими остига ушбу товарларни «вақтинчалик олиб чиқиш» божхона режими остида жойлаштирган божхона органидан бошқа божхона органида жойлаштирилган бўлса, ушбу божхона органи АТА карнетининг сариқ рангдаги «reimportation» йиртиб олинадиган ваучери нусхаси ва товарлар умумий рўйхатининг нусхаси билан уч кун ичида товарларни «вақтинчалик олиб чиқиш» божхона режими остида АТА карнетини қўллаган ҳолда жойлаштирган божхона органига хабарнома (хат) юборади.
9-боб. АТА карнетини қўллаган ҳолда Ўзбекистон Республикасидан вақтинча олиб чиқилган товарларни вақтинчалик олиб чиқиш муддатини узайтириш
58. АТА карнети эгасининг (вакилининг) аризасига асосан товарларни вақтинчалик олиб чиқиш учун белгиланган муддат АТА карнетининг эгаси (вакили) мурожаат қилган ҳудудий божхона бошқармаси қарори асосан ATA карнетининг амал қилиш муддати мобайнида узайтирилади.
59. Товарларни вақтинча олиб чиқиш учун белгиланган муддатни узайтиришда ҳудудий божхона бошқармасининг мансабдор шахси томонидан мазкур Низом иловасининг 6-бандида белгиланган тартибда ATA карнетининг сариқ рангдаги «exportation» корешоги ва йиртиб олинадиган ваучерлари тўлдирилади ва электрон маълумотлар базасига ATA карнетининг маълумотлари бўйича узайтириш муддати кўрсатилган ҳолда тегишли ёзув киритилади.
10-боб. Якуний қоидалар
60. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.
61. Мазкур Низом Ўзбекистон Республикаси Савдо-саноат палатаси билан келишилган.
Вақтинча олиб кириш тўғрисидаги конвенцияни (Истанбул, 1990 йил 26 июнь) қўллаш тартиби тўғрисидаги Низомга ИЛОВА
Божхона органи томонидан АТА карнетининг корешоклари ва йиртиб олинадиган ваучерларини тўлдириш ва расмийлаштириш
1. АТА карнетининг оқ рангдаги «importation» корешок ва йиртиб олинадиган ваучерларини тўлдириш ва расмийлаштириш:
а) йиртиб олинадиган ваучерда:
«Н» графасининг «b» кичик бандида товарларни Ўзбекистон Республикасидан қайтариб олиб чиқиш вақтини ҳисобга олмаган ҳолда улардан АТА карнетини қўллаган ҳолда мақсадли фойдаланиш тугайдиган муддат санаси қўйилади ва у қуйидагича шакллантирилади:
GGGG/MM/DD, бунда
GGGG ― йил;
ММ ― ой;
DD ― кун.
Ушбу сана АТА карнети муқовасининг олд томонидаги кафолатловчи уюшма томонидан қўйилган («G» графанинг «с» кичик банди «Valid until/Valable jusqʼau») АТА карнетининг амал қилиш муддатидан кўп бўлиши мумкин эмас;
«Н» графасининг «с» кичик бандида божхона юк декларациясидаги рўйхатга олиш рақами каби шакллантириладиган божхона органида рўйхатга олиш рақами қўйилади;
«Н» графасининг «d» кичик бандида товарларга нисбатан амалга оширилган божхона операциялари тўғрисида назорат божхона органининг алоҳида қуйидаги белгилари қўйилади:
божхона кўриги ўтказилганлиги;
қўлланилган идентификация воситалари, шу жумладан, қўйилган божхона пломбалари, уларнинг рақамлари ва бошқа маълумотлар кўрсатилади. Агар божхона органи томонидан идентификация воситалари қўлланилган бўлса, ушбу йиртиб олинадиган ваучерга тегишли бўлган товарларнинг умумий рўйхатининг 7-устунига ушбу товарлар тўғрисида маълумотлар киритилади;
«Н» графасининг пастки қисмига «At» сўзидан сўнг, назорат божхона органининг тўлиқ номи ва коди қўйилади ҳамда декларациялашнинг натижалари тўғрисидаги маълумот киритилади («Юк чиқаришга рухсат берилди» штампи, товарлар чиқарилган сана, шунингдек, «signature and stamp» сўзларининг устига шахсий рақамли муҳр ва имзо қўйилади).
б) корешокда:
1-графада йиртиб олинадиган ваучернинг «F» графаси «а» кичик бандидан божхона назорати амалга оширилган товарларнинг тартиб рақамлари қўйилади;
2-графада йиртиб олинадиган ваучернинг «Н» графаси «b» кичик бандида кўрсатилган сана қўйилади;
3-графада йиртиб олинадиган ваучернинг «Н» графаси «с» кичик бандидан божхона органида рўйхатга олиш рақами қўйилади;
4-графада йиртиб олинадиган ваучернинг «Н» графаси «d» кичик бандидан алоҳида белгилар қўйилади;
5-графада назорат божхона органининг тўлиқ номи ва коди қўйилади;
6-графада назорат божхона органининг таркибий тузилмаси жойлашган аҳоли пункти номи кўрсатилади;
7-графада йиртиб олинадиган ваучернинг «Н» графаси қуйи қисмидан йиртиб олинадиган ваучернинг расмийлаштирув санаси қўйилади;
8-графада назорат божхона органининг мансабдор шахси штампи, шахсий муҳри, имзо, шунингдек, йиртиб олинадиган ваучернинг «Н» графаси қуйи қисмидан бошқа маълумотлар қўйилади.
2. АТА карнетининг оқ рангдаги «reexportation» корешоги ва йиртиб олинадиган ваучерининг назорат божхона органининг масъул мансабдор шахси томонидан тўлдирилиши ва расмийлаштирилиши:
а) йиртиб олинадиган ваучерда:
«Н» графасининг «а» кичик бандида йиртиб олинадиган ваучернинг «F» графаси «а» кичик бандидан кўрсатилиб, олиб кирилган товарларнинг божхона назоратидан ўтказилганлиги тўғрисида «текширилди» ёзувини қўлда ёзган ҳолда белги қўйилади;
«Н» графасининг «b» кичик бандида товарларга нисбатан амалга оширилган божхона операцияли кўрсатилади, агар улар амалга оширилса, бироқ олиб чиқилмасдан Ўзбекистон Республикасида бошқа божхона режимига жойлаштирилса (агар ушбу товарларга нисбатан Ўзбекистон Республикасининг Божхона кодексида белгиланган тартибда божхона операцияларини амалга ошириш лозим бўлса). Бундай ҳолда АТА карнетининг оқ рангдаги «reexportation» йиртиб олинадиган ваучерининг «F» графаси «b» кичик бандида кўрсатилган товарларнинг бошқа божхона режимига жойлаштирилган божхона декларациялари тўғрисидаги маълумотлар кўрсатилади;
«Н» графасининг «с» кичик бандида божхона органига тақдим қилиш ва Ўзбекистон Республикасидан олиб чиқиш (реэкспорт) имкони йўқ бўлган товарларга нисбатан қўлланилган ҳаракатлар кўрсатилади. Мазкур кичик бандда қуйидаги каби ҳужжатлар (шу жумладан, божхона декларациялари) кўрсатилади:
ушбу товарларнинг аввал қайтариб олиб чиқилиши амалга оширилган АТА карнетининг оқ рангдаги «reexportation» йиртиб олинадиган ваучерлари;
Ўзбекистон Республикаси Божхона кодексига мувофиқ товарлар бошқа божхона режимларига жойлаштирилган божхона декларациялари;
«Н» графасининг «d» кичик бандида божхона юк декларациясидаги рўйхатга олиш рақами каби шакллантириладиган, божхонада рўйхатга олиш рақами қўйилади;
«Н» графасининг «е» кичик банди товарларни қайтариб олиб чиқишни расмийлаштириш ва амалда олиб чиқиш назорат божхона органидан бошқа божхона органи томонидан амалга оширилганда тўлдирилади. Мазкур кичик бандда товарлар олиб чиқиладиган божхона органининг коди ва тўлиқ номи қўйилади;
«Н» графанинг «f» кичик банди АТА карнетининг оқ рангдаги «importation» йиртиб олинадиган ваучерининг «Н» графаси «d» кичик банди учун белгиланган тартибда тўлдирилади;
«Н» графасининг пастки қисмига «At» сўзидан сўнг, божхона органининг коди, тўлиқ номи қўйилади, божхона операциялари ва божхона назорати натижалари тўғрисидаги маълумот киритилади («Юк чиқаришга рухсат берилди» штампи, товарлар шартли чиқарилган сана, шунингдек, «signature and stamp» сўзларининг устига шахсий муҳр ва имзо қўйилади).
б) корешокда:
1-графада АТА карнетининг оқ рангдаги «importation» ваучерининг божхона рўйхат рақамларини кўрсатган ҳолда ушбу ваучерлар бўйича вақтинча олиб кирилган ва йиртиб олинадиган ваучернинг «F» графаси «а» кичик бандидан қайта олиб чиқишга (реэкспорт) рухсат берилган товарларга нисбатан товарларнинг умумий рўйхатидан товарларнинг тартиб рақамлари қўйилади;
2-графада йиртиб олинадиган ваучернинг «Н» графаси «b» кичик бандидан маълумотлар кўрсатилади;
3-графада йиртиб олинадиган ваучернинг «Н» графаси «с» кичик бандидан маълумотлар кўрсатилади;
4-графада йиртиб олинадиган ваучернинг «Н» графаси «d» кичик бандидан божхона органи томонидан рўйхатга олиш рақами қўйилади;
5, 6, 7 ва 8-графалар АТА карнетининг оқ рангдаги «importation» корешогининг мос графаларини тўлдириш талабларига мувофиқ тўлдирилади.
3. Товарларни вақтинча олиб кириш учун белгиланган муддатни узайтиришда АТА карнетининг оқ рангдаги «importation» корешоги ва йиртиб олинадиган ваучерларини тўлдириш ва расмийлаштириш:
а) ATA карнетининг оқ рангдаги «importation» йиртиб олинадиган ваучерининг «Н» графаси «b» кичик бандига «вақтинча олиб кириш муддати ....гача узайтирилди» ёзувини қўл билан ёзиб, узайтирилган муддатни кўрсатган ҳолда вақтинча олиб кириш муддатининг узайтирилганлиги тўғрисида белги, шахсий муҳр ва имзо қўйилади;
б) ATA карнетининг оқ рангдаги «importation» корешоги 2-бандига «вақтинча олиб кириш муддати ....гача узайтирилди» ёзувини қўл билан ёзиб, узайтирилган муддатни кўрсатган ҳолда вақтинча олиб кириш муддатининг узайтирилганлиги тўғрисида белги, шахсий муҳр ва имзо қўйилади.
4. Божхона органининг мансабдор шахси томонидан АТА карнетининг муқоваси юз томонидаги «Н» графанинг пастки чап катакчаси, сариқ рангдаги «exportation» корешоги ва йиртиб олинадиган ваучерларнинг тўлдирилиши ва расмийлаштирилиши:
а) АТА карнетининг муқоваси юз томонидаги «Н» графасининг пастки чап катакчасида:
«а» кичик бандида АТА карнетидаги товарларнинг умумий рўйхати 7 колонкасидаги идентификация воситалари қўйилган товарлар умумий рўйхатидан товарлар ва қўшимча варақлар рақамлари кўрсатилади;
«b» кичик бандида божхона кўриги ўтказилганлиги тўғрисида белги қўйилади. Божхона кўриги ўтказилганда «yes/да»нинг рўпарасига тегишли белги қўйилади, «no/нет» чизиб ўчирилади;
«с» кичик бандида божхона юк декларациясидаги рўйхатга олиш рақами каби шакллантириладиган, божхонада рўйхатга олиш рақами қўйилади;
«d» кичик бандида товарларга нисбатан божхона операциялари амалга оширилаётган божхона органининг коди ва тўлиқ номи;
қуйидаги шаклда шакллантириладиган АТА карнетининг расмийлаштирув санаси:
GGGG/MM/DD, бунда:
GGGG ― йил;
ММ ― ой;
DD ― кун;
шахсий рақамли муҳр ва имзо;
б) АТА карнетининг сариқ рангдаги «exportation» корешоги ва йиртиб олинадиган ваучерда:
йиртиб олинадиган ваучерда:
«Н» графанинг «а» кичик бандида товарларнинг умумий рўйхатидан ва қўшимча варақларнинг «F» графаси «а» кичик бандидан олиб чиқилаётган товарларнинг тартиб рақамлари киритилади;
«Н» графанинг «b» кичик бандида агар Ўзбекистон Республикасининг Божхона кодексига мувофиқ товарларни олиб чиқишда қайтариб олиб кириш шарт бўлса, Ўзбекистон Республикасидан олиб чиқилган ва «реимпорт» божхона режимига жойлаштирилаётган товарларнинг қайтариб олиб кириш санаси қўйилади ва у қуйидаги тартибда шакллантирилади:
GGGG/MM/DD, бунда:
GGGG ― йил;
ММ ― ой;
DD ― кун;
«Н» графанинг «с» кичик банди тўлдирилмайди;
«Н» графанинг «d» кичик бандида товарларга нисабтан амалга оширилган божхона операциялари ва божхона назоратидаги ҳаракатлар тўғрисида божхона органининг махсус белгилари, хусусан:
божхона кўриги ўтказилганлиги,
қўлланилган қиёслаш воситалари, шу жумладан, қўйилган божхона пломбалари ва уларнинг рақамлари ҳамда бошқа маълумотлар кўрсатилади. Агар божхона органлари томонидан идентификация воситалари қўлланилган бўлса, улар тўғрисидаги маълумот ушбу йиртиб олинадиган ваучерга тегишли товарларнинг умумий рўйхати 7-устунининг тегишли жойида кўрсатилади;
«Н» графасининг пастки қисмига «At» сўзидан сўнг, товарлар «вақтинча олиб чиқиш» божхона режимига жойлаштирилган божхона органининг коди ва тўлиқ номи кўрсатилиб, божхона операцияларини амалга ошириш ва божхона назорати натижалари тўғрисидаги маълумотлар киритилади («Юк чиқаришга рухсат берилди» штампи, товарлар шартли чиқарилган сана, шунингдек, «signature and stamp» сўзларининг устига шахсий рақамли муҳр ва имзо қўйилади);
корешокда:
1-графада йиртиб олинадиган ваучернинг «Н» графаси «а» кичик бандидан олиб чиқилаётган товарларнинг тартиб рақамлари қўйилади;
2-графада белгиланган катакда йиртиб олинадиган ваучернинг «Н» графаси «b» кичик бандида кўрсатилган сана қўйилади;
3-графада йиртиб олинадиган ваучернинг «Н» графаси «d» кичик бандидан махсус белгилар қўйилади;
4-графада товарларни шартли чиқаришни амалга оширган божхона органининг коди ва тўлиқ номи кўрсатилади;
5-графада божхона органининг таркибий тузилмаси жойлашган аҳоли пункти номи кўрсатилади;
6-графада «Н» йиртиб олинадиган ваучернинг пастки қисмидан товарларнинг шартли чиқариш санаси қўйилади;
7-графада тегишли штамп ва шахсий рақамли муҳр, имзо ва йиртиб олинадиган ваучернинг «Н» графаси «d» кичик банди пастки қисмидан бошқа маълумотлар қўйилади.
5. Божхона органининг мансабдор шахси томонидан АТА карнетининг сариқ рангдаги «reimportation» корешоги ва йиртиб олинадиган ваучерларининг тўлдирилиши ва расмийлаштирилиши:
а) йиртиб олинадиган варақ ваучерда:
«Н» графасининг «а» кичик банди агар товарлар назорат божхона органидан бошқа божхона органида «вақтинча олиб чиқиш» божхона режимига жойлаштирилган бўлса тўлдирилади. Мазкур кичик бандда АТА карнетининг сариқ рангдаги «exportation» 4-графасида божхона органининг коди ва тўлиқ номи қўйилади;
«Н» графанинг «с» кичик банди АТА карнетининг сариқ рангдаги «exportation» йиртиб олинадиган ваучери «Н» графаси «d» кичик банди талаблари бўйича тўлдирилади. Агар товарлар бир нечта туркумлар билан қайтариб олиб кирилаётган бўлса, товарларнинг аввалги қайта олиб кирилганлигини (реимпорт) тасдиқловчи маълумотлар ва «вақтинча олиб чиқиш» божхона режимига жойлаштирилган товарларнинг бошқа божхона режимига жойлаштирилганлиги (бундай товарларга нисбатан божхона операциялари Ўзбекистон Республикасининг Божхона кодексига мувофиқ тартибда амалга оширилади) тўғрисидаги маълумотлар кўрсатилади. Бундай ҳолда кичик бандда ушбу товарлар аввал реимпорт қилинган сариқ рангдаги «reimportation» йиртиб олинадиган ваучерлар тўғрисида. АТА карнетининг сариқ рангдаги йиртиб олинадиган ваучерининг «F» графаси «с» кичик бандида кўрсатилган, товарлар бошқа божхона режимларига расмийлаштирилган божхона юк декларациялари тўғрисида маълумотлар кўрсатилади;
«Н» графасининг пастки қисмига «At» сўзидан сўнг, товарларни «қайта олиб кириш» (реимпорт) божхона режимига жойлаштирган божхона органининг коди ва тўлиқ номи кўрсатилиб, божхона операцияларини амалга ошириш ва божхона назорати натижалари тўғрисидаги маълумотлар киритилади («Юк чиқаришга рухсат берилди» штампи, товарлар чиқарилган сана, шунингдек, «signature and stamp» сўзларининг устига шахсий рақамли муҳр ва имзо қўйилади).
б) корешокда:
1-графада товарларнинг умумий рўйхатидан АТА карнетининг сариқ рангдаги «exportation» ваучерлари бўйича вақтинча олиб чиқилган ва йиртиб олинадиган варақ ваучернинг «F» графаси «а» кичик бандидан қайта олиб киришга (реимпорт) рухсат берилган товарларнинг тартиб рақамлари ушбу ваучерларнинг божхонада рўйхатга олиш рақамлари кўрсатилган ҳолда қўйилади;
2-графада АТА карнетининг «exportation» йиртиб олинадиган варағи «Н» графаси «с» кичик бандидан маълумотлар кўрсатилади;
3-графада АТА карнетини қўллаган ҳолда қайта олиб кирилаётган (реимпорт) товарларни чиқаришни амалга оширган божхона органининг коди ва тўлиқ номи кўрстаилади;
4-графада божхона органининг таркибий тузилмаси жойлашган аҳоли пунктининг номи, товарларни расмийлаштираётган ваколатли мансабдор шахс кўрсатилади;
5-графада йиртиб олинадиган ваучернинг «Н» графаси пастки қисмидан АТА карнетининг сариқ рангдаги йиртиб олинадиган ваучер расмийлаштирилган ва товарлар чиқариб юборилган сана қўйилади;
6-графада тегишли штамплар, шахсий муҳр, имзо, шунингдек, йиртиб олинадиган ваучернинг «Н» графаси пастки қисмидан бошқа маълумотлар қўрсатилади.
6. Товарларни вақтинча олиб чиқиш учун белгиланган муддатни узайтиришда АТА карнетининг сариқ рангдаги «exportation» йиртиб олинадиган ваучерларини тўлдириш ва расмийлаштириш:
а) АТА карнетининг сариқ рангдаги йиртиб олинадиган «exportation» ваучери «Н» графасининг «b» бандига узайтириш санасини кўрсатган қўлда ёзилган ёзув билан белги қўяди, шунингдек, шахсий муҳр ва имзо қўйилади;
б) АТА карнетининг «exportation» корешоги 2-графасига вақтинчалик олиб чиқиш муддати узайтирилгани ҳақида қўлда ёзилган ёзув билан ҳамда шахсий муҳр ва имзо қўйилади;
в) АТА карнетлари бўйича вақтинчалик олиб чиқиш ва қайта олиб киришни рўйхатга олиш электрон маълумотлар базасида ушбу АТА карнетининг «вақтинчалик олиб чиқишга рухсат муддати» графасига узайтириш санаси кўрсатилган ҳолда «муддат ...гача узайтирилган» деб қўшимча қилади.
Раис М. АЗИМОВ
Ўзбекистон Республикаси Савдо-саноат палатаси раиси А. ИКРАМОВ
Тошкент ш.,
2020 йил 23 июнь,
2020 йил 22 июнь
01-02/12-28-сон
Oʻzbekiston Respublikasi Davlat bojxona qoʻmitasining
qarori
NIZOM
tartibi
Vaqtincha olib kirish toʻgʻrisidagi konvensiyani (Istanbul, 1990-yil 26-iyun) qoʻllash tartibi toʻgʻrisidagi nizomni tasdiqlash haqida
Oʻzbekiston Respublikasi Bojxona kodeksi va Oʻzbekiston Respublikasi Prezidentining 2020-yil 24-apreldagi PQ-4694-son “Xalqaro shartnomaga qoʻshilish toʻgʻrisida”gi qaroriga muvofiq Oʻzbekiston Respublikasi Davlat bojxona qoʻmitasi qaror qiladi:
1. Vaqtincha olib kirish toʻgʻrisidagi konvensiyani (Istanbul, 1990-yil 26-iyun) qoʻllash tartibi toʻgʻrisidagi nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran uch oydan keyin kuchga kiradi.
Oʻzbekiston Respublikasi Davlat bojxona qoʻmitasining 2020-yil 23-iyundagi 01-02/12-28-son qaroriga ILOVA
Vaqtincha olib kirish toʻgʻrisidagi Konvensiyani (Istanbul, 1990-yil 26-iyun) qoʻllash tartibi toʻgʻrisidagi
Mazkur Nizom Oʻzbekiston Respublikasi Bojxona kodeksi (bundan buyon matnda Bojxona kodeksi deb yuritiladi) va Oʻzbekiston Respublikasi Prezidentining 2020-yil 24-apreldagi PQ-4694-son “Xalqaro shartnomaga qoʻshilish toʻgʻrisida”gi qaroriga muvofiq Oʻzbekiston Respublikasi bojxona chegarasidan tovarlarni bojxona nazorati va bojxona rasmiylashtiruvidan oʻtkazishda Vaqtincha olib kirish toʻgʻrisidagi Konvensiyani (Istanbul, 1990-yil 26-iyun) (bundan buyon matnda Konvensiya deb yuritiladi) qoʻllash tartibini belgilaydi .
1-bob. Umumiy qoidalar
1. Ushbu Nizomda quyidagi tushunchalar qoʻllaniladi:
ATA karneti ― bojxona deklaratsiyasiga tenglashtirilgan, tovarlarni identifikatsiyalashga va vaqtincha olib kirishga (transport vositalaridan tashqari) imkon beradigan hamda bojxona toʻlovlarini toʻlashning xalqaro miqyosda kafolatini oʻz ichiga olgan xalqaro bojxona hujjati;
kafolatlovchi uyushma ― vaqtincha olib kirish toʻgʻrisidagi hujjatlarni berish uchun masʼul boʻlgan va vaqtincha olib kirish shartlari buzilgan taqdirda bojxona toʻlovlarini toʻlash boʻyicha kafolatlovchi vakolatli tashkilot ― Oʻzbekiston Respublikasi Savdo-sanoat palatasi (keyingi oʻrinlarda Savdo-sanoat palatasi);
bojxona operatsiyasi ― tovarlarning bojxona rasmiylashtiruvida tovarlarga nisbatan bojxona organlarining mansabdor shaxsi va (yoki) vakolatli shaxs tomonidan amalga oshiriladigan harakat ;
bojxona rejimi ― bojxona chegarasi orqali olib oʻtiladigan tovarlarning maqomini bojxona maqsadlari uchun belgilovchi qoidalar majmui ;
deklaratsiyalash ― bojxona chegarasi orqali olib oʻtilayotgan va (yoki) bojxona nazorati ostida turgan tovarlar toʻgʻrisidagi zarur maʼlumotlarni bojxona organlariga maʼlum qilish .
2. ATA karnetini qoʻllagan holda bojxona toʻlovlaridan toʻliq shartli ravishda ozod qilinadigan tovarlarga nisbatan bojxona operatsiyalari Konvensiyaning A-ilovasi “Vaqtincha olib kirish hujjatlari toʻgʻrisida ” bilan birgalikda Konvensiyaning quyidagi ilovalardan birining shartlariga rioya qilgan holda amalga oshiriladi:
V.1-ilova “Koʻrgazmalar, yarmarkalar, konferensiyalar yoki shu kabi tadbirlarda namoyish qilish yoxud foydalanish uchun tovarlar toʻgʻrisida ”;
V.2-ilova “Professional asbob-uskuna toʻgʻrisida ”;
V.3-ilova “Tijorat operatsiyasi munosabati bilan olib kirilgan konteynerlar, poddonlar, oʻramlar, namunalar va boshqa tovarlar toʻgʻrisida ”;
V.5-ilova “Taʼlim, ilmiy yoki madaniy maqsadlarda olib kirilgan tovarlar toʻgʻrisida ”;
V.6-ilova “Sayohatchilarning shaxsiy buyumlari va sport maqsadlarida olib kirilgan yuklarga tegishli ilova ”.
3. Bojxona organi quyidagi hollarda ATA karnetini bojxona deklaratsiyasi va bojxona toʻlovlarini toʻlashning xalqaro miqyosidagi kafolati hamda bojxona organlari oldidagi majburiyatning bajarilishini kafolatlovchi hujjat sifatida qabul qilishi mumkin:
agar ATA karnetida kafolatlovchi uyushma va xalqaro tizimning nomi koʻrsatilgan boʻlsa;
ATA karnetini egasi va uni bergan kafolatlovchi uyushma tomonidan mazkur Nizomda belgilangan tartibda toʻldirilgan boʻlsa;
tovar olib chiqilayotgan (eksport qiluvchi) mamlakatning bojxona organi tomonidan rasmiylashtirilgan boʻlsa.
4. ATA karnetini qoʻllagan holda rasmiylashtiriladigan tovarlar uchun vaqtinchalik olib kirish muddati tovarlarni Oʻzbekiston Respublikasi hududiga olib kirishda nazorat bojxona organi tomonidan ATA karneti qabul qilingan kundan boshlab ushbu tovarlar amalda olib chiqilgan kungacha hisoblanadi.
5. ATA karnetini qoʻllagan holda olib kirilgan tovarlarni qayta olib chiqish majburiyati ular Oʻzbekiston Respublikasidan amalda olib chiqilganidan yoki Bojxona kodeksiga muvofiq “vaqtincha olib kirish” bojxona rejimi tugallanganidan boshlab bajarilgan hisoblanadi.
6. Bojxona organi ATA karnetini qabul qilib olganda ATA karnetining toʻgʻri toʻldirilganligini tekshiradi.
Bunda Konvensiyaga aʼzo mamlakatlarning kafolatlovchi uyushmalari tomonidan berilgan ATA karneti muqovasining ustki qismida ATA karneti qabul qilinishi mumkin boʻlgan mamlakatlar koʻrsatilishi lozim, ushbu mamlakatlarning kafolatlovchi uyushmalari nomlari yoki bojxona hududlari ATA karnetining oxirgi yashil beti orqa tomonining yuqori bandida koʻrsatilishi kerak.
ATA karnetining amal qilish muddati uyushma tomonidan berilgan kundan boshlab bir yildan oshmasligi lozim.
ATA karnetini qoʻllagan holda tovarlarni vaqtincha olib kirish (olib chiqish) muddati ATA karnetida belgilangan muddatdan oshib ketmasligi kerak.
ATA karnetini qoʻllagan holda vaqtincha olib kirilgan tovarlardan faqat ATA karnetida nazarda tutilgan maqsadlarda foydalanish mumkin, tijorat maqsadlarida foydalanishga yoʻl qoʻyilmaydi, bundan Konvensiya va uning ilovalarida boshqacha qoida nazarda tutilgan hollar mustasno.
7. ATA karnetining barcha varaqlari bir xil toʻldirilishi lozim, biriktirilgan qogʻozlar, stikerlar va havola (izoh) koʻrinishidagi qoʻshimchalarga yoʻl qoʻyilmaydi. Barcha varaqlardagi maʼlumotlar muqovadagi maʼlumotlar bilan bir xil boʻlishi kerak;
Muqova va unga qoʻshimcha varaqlar ATA karneti muqovasining “A” grafasi hamda uning varaqlarida koʻrsatilgan egasi (ATA karnetini bojxona organlariga taqdim etish orqali tovarlarni deklaratsiyalayotgan jismoniy va (yoki) yuridik shaxs) tomonidan ATA karneti rasmiylashtirilishidan oldin imzolanishi lozim, qolgan varaqlari bojxona organidan oʻtishiga qarab egasi (vakili) tomonidan toʻldiriladi.
8. ATA karnetining toʻgʻri toʻldirilganligini tekshirishda quyidagilarga alohida eʼtibor beriladi:
ATA karnetining amal qilish muddati;
Oʻzbekiston Respublikasiga olib kiriladigan tovarlarga nisbatan ATA karnetini qoʻllash imkoniyati;
ATA karneti muqovasining ustki qismida undan Oʻzbekiston Respublikasida foydalanish mumkinligi toʻgʻrisidagi yozuvning mavjudligi va kafolatlovchi uyushmasi ATA karnetining oxirgi yashil beti orqa tomoni yuqori bandida koʻrsatilishi;
tovarlarning umumiy roʻyxati va qoʻshimcha varaqlari (mavjud boʻlsa) toʻldirilganligi va rasmiylashtirilganligi;
ATA karnetining koreshogi va yirtib olinadigan vaucherlari toʻldirilganligi (ularga kiritilgan maʼlumotlar ATA karneti muqovasining ustki qismi va orqa tomonida koʻrsatilgan maʼlumotlarga hamda transport va tovarning kuzatuv hujjatlarida koʻrsatilgan maʼlumotlarga mos kelishi kerak);
ATA karnetining yuqori oʻng burchagida “have been exported” yoki “ont ete exportees” yozuvi boʻlgan ATA karnetining sariq rangdagi “exportation” koreshogida olib chiqilayotgan tovarlarning bojxona rasmiylashtiruvidan oʻtkazilganligi toʻgʻrisidagi belgilarning (toʻldirilishi, olib chiqayotgan mamlakatning muhr va shtamplari) mavjudligi.
ATA karnetini rasmiylashtirish uchun barcha zarur talablar bajarilgan hollarda bojxona organining mansabdor shaxsi bunday ATA karnetini qabul qiladi.
9. Bojxona organlari ATA karnetini qoʻllagan holda olib kiriladigan tovarlarni bojxona nazoratidan oʻtkazadi .
Bojxona koʻrigi dalolatnomalarini tuzishda tovarlarning tavsifi sifatida tovarlarning umumiy roʻyxatidan foydalanishga ruxsat etiladi.
Bojxona organlari tomonidan bojxona maqsadlari uchun tovarlarni tasniflash amalga oshiriladi.
Bunda ATA karnetida koʻrsatilgan tovarlarni identifikatsiyalash va bojxona toʻgʻrisidagi qonunchilik hujjatlariga muvofiq taqiq va cheklovlar oʻrnatilmaganligini aniqlash imkoni mavjud boʻlsa, Oʻzbekiston Respublikasining yagona Tashqi iqtisodiy faoliyat tovar nomenklaturasiga (bundan buyon matnda TIF TN deb yuritiladi) muvofiq tovar pozitsiyasi darajasida 6 belgidan kam boʻlmagan tovarlarni tasniflashga yoʻl qoʻyiladi. Agar tovarlarga bojxona toʻgʻrisidagi qonunchilik hujjatlari bilan taqiq va cheklovlar oʻrnatilgan boʻlsa, tovar kodi TIF TNga muvofiq 10 belgi darajasida aniqlanadi.
10. ATA karnetini qoʻllagan holda vaqtincha olib kirilayotgan (olib chiqilayotgan) tovarlar boʻyicha bojxona organi tomonidan “ATA karneti boʻyicha tovarlarni qayd etish jurnali” elektron koʻrinishda yuritiladi.
11. Bojxona organlari tomonidan ATA karnetini qoʻllagan holda vaqtincha olib kirishga ruxsat berilgan tovarlarning toʻlangan bojxona toʻlovlari butun muddat davomida kafolatlanishi uchun bojxona organlari tomonidan belgilangan bunday tovarlarni qaytib olib chiqish muddati ATA karnetini bergan kafolatlovchi uyushma tomonidan qoʻyilgan amal qilish muddatidan oshmasligi kerak.
12. Olib chiqilayotgan tovarlarga nisbatan bojxona operatsiyalarini amalga oshirishda “vaqtincha olib chiqish” bojxona rejimiga muvofiq Konvensiyaning amal qilish doirasiga kiradigan tovarlarning bojxona deklaratsiyalanishi deklarantning tanloviga koʻra bojxona deklaratsiyasi sifatida Savdo-sanoat palatasi tomonidan berilgan ATA karnetini unga ilova qilingan transport (tashuvchi) va tijorat hujjatlari bilan birga qoʻllagan holda amalga oshirilishi mumkin.
13. Bojxona organi tomonidan ATA karneti qabul qilib olinganidan soʻng, unga oʻzgartirish va (yoki) qoʻshimchalar kiritilishiga yoʻl qoʻyilmaydi.
14. Bojxona organiga taqdim etiladigan ATA karneti davlat tilida yoki rus tilida va ingliz (fransuz) tilida toʻldirilgan boʻlishi lozim.
2-bob. ATA karnetini qoʻllagan holda olib kirilayotgan tovarlarni deklaratsiyalash
15. ATA karnetini qoʻllagan holda tovarlarni olib kirishda uning egasi (vakili) nazorat bojxona organiga tovarlarni hamda ATA karnetini taqdim etadi.
16. ATA karnetini rasmiylashtirishda nazorat bojxona organining mansabdor shaxsi ATA karnetining oq rangdagi “importation” koreshoklari va yirtib olinadigan vaucherlarini mazkur Nizom ilovasining 1-bandiga muvofiq tartibda toʻldiradi.
17. Koreshoklar va yirtib olinadigan vaucherlarni toʻldirgandan soʻng nazorat bojxona organining mansabdor shaxsi:
ATA karnetining oq rangdagi yirtib olinadigan “importation” vaucherini birlashtirilgan varaqlaridan ajratib oladi;
ATA karneti boʻyicha vaqtincha olib kirishni roʻyxatdan oʻtkazilganini yoki ATA karneti boʻyicha yetkazib berilgan tovarlarning roʻyxatdan oʻtkazilganini, ATA karnetini qoʻllagan holda tovarlarga nisbatan bojxona operatsiyalarini amalga oshirishdagi harakatlar toʻgʻrisidagi zarur maʼlumotlarni elektron maʼlumotlar bazasiga kiritadi;
rasmiylashtirilgan ATA karnetini uning egasi (egasining vakili)ga qaytaradi.
18. ATA karnetining rasmiylashtirilgan yirtib olinadigan vaucherlari ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi hamda ilova qilinadigan hujjatlar nusxasi bilan birga nazorat bojxona organida qoladi.
19. Nazorat bojxona organi tovarlarni “vaqtincha olib kirish” bojxona rejimi shartlariga rioya etilishini olib qolingan ATA karnetining rasmiylashtirilgan yirtib olinadigan vaucherlari hamda ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi asosida bojxona nazoratini amalga oshiradi.
3-bob. ATA karnetini qoʻllagan holda Oʻzbekiston Respublikasiga vaqtincha olib kirilgan tovarlarning vaqtincha olib kirish muddatini uzaytirish
20. ATA karneti egasining (vakilining) arizasiga asosan tovarlarni vaqtincha olib kirish uchun belgilangan muddat ATA karneti egasi (vakili) joylashgan joydagi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining tegishli boshqarmasi (bundan buyon matnda hududiy bojxona boshqarmasi deb yuritiladi) qaroriga asosan ATA karnetining amal qilish muddati mobaynida uzaytiriladi.
Tovarlarni vaqtincha olib kirish uchun belgilangan muddatni uzaytirishda hududiy bojxona boshqarmasining mansabdor shaxsi tomonidan mazkur Nizom ilovasining 3-bandida belgilangan tartibda ATA karnetining oq rangdagi yirtib olinadigan “importation” vaucherlari toʻldiriladi va elektron maʼlumotlar bazasida ATA karnetining maʼlumotlari boʻyicha uzaytirish muddatini koʻrsatgan holda tegishli yozuvni kiritadi.
4-bob. Ilgari ATA karnetidan foydalangan holda vaqtincha olib kirilgan tovarlarni Oʻzbekiston Respublikasidan qayta olib chiqishda ( reeksportda ) deklaratsiyalash
21. Tovarlar reeksport qilinayotganda, nazorat bojxona organiga ATA karnetining egasi (vakili) ilgari olib kirilgan tovarlar va ATA karnetini taqdim etadi. Bojxona organi mansabdor shaxsi tomonidan ATA karnetining oq rangdagi yirtib olinadigan “reexportation” vaucherlari toʻldiriladi.
Tovarlar bir yoki bir nechta partiyalarda qaytarib olib chiqilishi mumkin.
ATA karnetini qoʻllagan holda vaqtincha olib kirilgan tovarlarni olib chiqish (reeksport) dastlab olib kirilgan nazorat bojxona organi joylashgan hududdan boshqa hududda joylashgan bojxona organi orqali olib chiqilishi mumkin.
22. Ilgari ATA karnetidan foydalangan holda vaqtincha olib kirilgan tovarlarni qayta olib chiqishda (reeksportda) nazorat bojxona organining mansabdor shaxsi tomonidan mazkur Nizom ilovasining 2-bandiga muvofiq tartibda ATA karnetining oq rangli yirtib olinadigan “reexportation” vaucheri toʻldiriladi.
23. Bojxona organining mansabdor shaxsi tomonidan ATA karnetining oq rangdagi “reexportation” koreshogi va yirtib olinadigan vaucheri toʻldirilganidan soʻng:
ATA karnetining oq rangdagi yirtib olinadigan “reexportation” vaucherini boshqa birlashtirilgan ATA karneti varaqlaridan ajratadi;
ATA karnetini qoʻllagan holda vaqtincha olib kirishni ruyxatdan oʻtkazishning elektron maʼlumotlar bazasida ATA karnetini qoʻllagan holda vaqtincha olib kirilgan tovarlarga nisbatan amalga oshirilgan bojxona operatsiyalari toʻgʻrisida maʼlumotlarni kiritadi;
rasmiylashtirilgan ATA karnetini uning egasiga (vakili) qaytaradi.
24. ATA karnetining oq rangdagi yirtib olinadigan “reexportation” vaucherlari ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi hamda ilova qilinadigan hujjatlar nusxasi bilan birga bojxona organida qoladi.
ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi hamda ilova qilinadigan hujjatlar bilan birga nazorat bojxona organida qoladi
25. ATA karnetini qoʻllagan holda olib kirilgan tovarlarni qayta olib chiqishda (reeksport) deklaratsiyalash Oʻzbekiston Respublikasidan tovarlarni olib chiqishni rasmiylashtiradigan bojxona organi tomonidan amalga oshiriladi.
26. ATA karneti egasining (vakili) “vaqtincha olib kirish” bojxona rejimi shartlariga rioya qilish majburiyati, ATA karnetidan foydalanishning oʻziga xos xususiyatlari va bojxona toʻlovlarini toʻlash kafolatini hisobga olgan holda tovarlar Oʻzbekiston Respublikasidan olib chiqilishiga qadar oʻz kuchini saqlab qoladi.
27. Nazorat bojxona organi ATA karnetining oq rangdagi yirtib olingan “reexportation” vaucheri hamda ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi asosida “vaqtincha olib kirish” bojxona rejimi shartlariga rioya qilinishi yuzasidan bojxona nazoratini amalga oshiradi.
28. ATA karnetini qoʻllagan holda olib kirilgan tovarlarni qayta olib chiqish (reeksport) amalga oshirilganda, tegishli bojxona organi ATA karnetining oq rangli yirtib olinadigan “reexportation” vaucherini rasmiylashtiradi va uch kun ichida uning nusxasini “vaqtincha olib kirish” bojxona rejimini nazorat qilishni yakunlash uchun nazorat bojxona organiga yuboradi.
ATA karnetining rasmiylashtirilgan yirtib olinadigan vaucherlari ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi hamda ilova qilinadigan hujjatlar nusxasi bilan birga nazorat bojxona organida qoladi.
5-bob. ATA karnetidan foydalangan holda Oʻzbekiston Respublikasiga vaqtincha olib kirilgan tovarlarga nisbatan bojxona toʻlovlari toʻlanishining kafolatlari
29. Konvensiya qoidalari buzilgan taqdirda ATA karnetini qoʻllagan holda olib kirilgan tovarlar boʻyicha Savdo-sanoat palatasi bojxona toʻlovlari toʻlanishini kafolatlaydi.
30. ATA karnetini qoʻllagan holda olib kirilgan tovarlar uchun nazorat bojxona organi oldida mazkur Nizomning 35-bandiga muvofiq hisoblangan bojxona toʻlovlarini toʻlash boʻyicha Savdo-sanoat palatasi bilan birgalikda ATA karnetining egasi solidar tartibda javobgar boʻladilar.
Savdo-sanoat palatasiga toʻlash uchun taqdim etilgan bojxona toʻlovlari umumiy miqdorining 10 foizidan oshib ketishi mumkin emas.
31. ATA karnetining amal qilish muddati tugagan sanadan boshlab, bir yillik muddat ichida bojxona toʻlovlarini toʻlash yuzasidan nazorat bojxona organi tomonidan ATA karneti egasi va Savdo-sanoat palatasiga bojxona toʻlovlarini toʻlash toʻgʻrisida talabnoma (bundan buyon matnda talabnoma deb yuritiladi) yuboriladi.
32. ATA karnetini qoʻllagan holda olib kirilgan tovarlar qayta olib chiqilganligini (reeksport) isbotlash uchun Savdo-sanoat palatasi talabnomani olgan kundan eʼtiboran olti oy ichida nazorat bojxona organiga ATA karnetini qoʻllagan holda olib chiqishni (reeksport) rasmiylashtirgan bojxona organi tomonidan belgilangan tartibda toʻldirilgan va muhri bilan tasdiqlangan ATA karnetining oq rangdagi yirtib olinadigan “reexportation” vaucherlari nusxasini taqdim etadi.
Nazorat bojxona organi ATA karnetini qoʻllagan holda olib kirilgan tovarlarning qayta olib chiqiliganligi (reeksport) dalillari sifatida boshqa hujjatlarni qabul qilishlari mumkin.
Taqdim etilgan hujjatlar asosida “vaqtincha olib kirish” bojxona rejimining amal qilish muddati tugagan holatlarda, nazorat bojxona organi bu haqda Savdo-sanoat palatasiga xabar beradi.
33. Mazkur Nizomning 32-bandida koʻrsatilgan hujjatlarning amal qilish muddati belgilangan muddatgacha bojxona organlariga taqdim etilmagan taqdirda, ATA karneti egalari va Savdo-sanoat palatasi mazkur Nizomning 30-bandida koʻrsatilgan miqdorlarda bojxona toʻlovlarini toʻlashi shart.
34. Agar Savdo-sanoat palatasi yoki ATA karnetining egasi yoki boshqa manfaatdor shaxs bojxona organlariga avariya yoki yengib boʻlmaydigan kuch (fors-major) holati tufayli tovarlarning toʻliq yoʻq qilinishi yoki yoʻqotilishi toʻgʻrisida qoniqarli dalillarni taqdim etsa va ATA karnetining amal qilish muddati tugagan kundan boshlab bir yil oʻtgan boʻlsa, talabnoma Savdo-sanoat palatasiga taqdim etilmaydi.
6-bob. Konvensiya qoidalari buzilgan taqdirda ATA karnetini qoʻllagan holda olib kirilgan tovarlar boʻyicha bojxona toʻlovlarini undirish
35. Konvensiya talablari, shuningdek, “vaqtincha olib kirish” bojxona rejimlari shartlari buzilgan taqdirda, bojxona toʻlovlarini hisoblash nazorat bojxona organi tomonidan quyidagi tartibda amalga oshiriladi:
a) ATA karnetini qoʻllab rasmiylashtirilgan tovarlar Oʻzbekiston Respublikasidan ATA karnetida koʻrsatilgan muddatda amalda olib chiqilmagan boʻlsa, bojxona toʻlovlari summasi ushbu tovarlar “erkin muomalaga chiqarish (import)” rejimiga joylashtirilganda toʻlanishi lozim boʻlgan summalar miqdorida hisoblanadi.
Bunda Bojxona kodeksining 45-bobiga muvofiq bojxona organi ATA karnetini qabul qilingan kunda amal qiladigan boj toʻlovlari stavkalari, shuningdek chet el valyutasining kurslari qoʻllaniladi;
b) tovarlar vaqtincha olib kirish muddati yakunlanganidan soʻng olib chiqilganda, bojxona toʻlovlari Bojxona kodeksining 11-bobiga muvofiq vaqtincha olib kirish muddati tugagan kundan tovarlar amalda olib chiqilgan kungacha boʻlgan vaqt uchun hisoblanadi;
v) ATA karnetini qoʻllagan holda vaqtincha olib kirilgan tovarlarni maqsadsiz foydalangan, ammo ular belgilangan muddatda olib chiqilgan taqdirda, Bojxona kodeksining 11-bobiga muvofiq ular boʻyicha toʻlanishi lozim boʻlgan bojxona toʻlovlari ushbu tovarlarni ularning maqsadi boʻyicha foydalanish talabini buzgan holda muomalaga chiqarilgan kundan boshlab hisoblanadi, agar ushbu kun belgilanmagan boʻlsa ATA karnetining nazorat bojxona organi qabul qilgan kundan keyingi kundan boshlab hisoblanadi.
36. Mazkur Nizomning 35-bandida koʻrsatilgan “vaqtincha olib kirish” bojxona rejimining shartlari buzilgan taqdirda, bojxona rasmiylashtiruvi uchun bojxona yigʻimlari undiriladi.
37. Konvensiya talablari va “vaqtincha olib kirish” bojxona rejimi shartlari buzilgan taqdirda bojxona organi tomonidan ATA karneti egasi va Savdo-sanoat palatasiga bu haqda talabnoma yuboradi.
Talabnomada qoidabuzarlikning mohiyati bayon qilinadi, buzilish faktini tasdiqlovchi hujjatlar nusxalari, shu jumladan, bojxona organi tomonidan rasmiylashtirilgan ATA karnetining nazorat varaqasi nusxasi, shuningdek, bojxona toʻlovlari va bojxona rasmiylashtiruvi uchun bojxona yigʻimlari miqdorini hisobi koʻrsatiladi.
38. Mazkur Nizomning 35-bandida koʻrsatilgan “vaqtincha olib kirish” bojxona rejimining shartlari buzilgan taqdirda, bojxona organi ATA karneti egasidan bojxona toʻlovlari va yigʻimlarini majburiy undirish boʻyicha zarur choralarni koʻradi.
Bojxona organi tomonidan ATA karneti egasidan bojxona toʻlovlari va yigʻimlari qisman undirilgan boʻlsa, u holda qolgan qismini undirish boʻyicha Savdo-sanoat palatasiga maʼlum qiladi.
Bojxona organi tomonidan ATA karneti egasidan bojxona toʻlovlari va yigʻimlari toʻliq undirilgan boʻlsa, u holda Savdo-sanoat palatasiga talabnoma qoʻyilmaydi yoki yuborilgan talabnoma qaytarib olinadi.
39. Savdo-sanoat palatasi talabnoma olingan kundan boshlab, olti oy ichida qayta olib chiqish toʻgʻrisida dalillar yoki ATA karnetini tegishli ravishda rasmiylashtirilganligini taqdim etsa, bojxona organi dalillar olingan kundan boshlab 15 kun ichida ularni koʻrib chiqadi va talabnomani toʻliq (qisman) qaytarib olish yoki ularni rad etish toʻgʻrisida qarorini qabul qiladi. Talabnomani toʻliq (qisman) qaytarib olish yoki ularni rad etish toʻgʻrisida qaror qabul qilingan kundan keyingi ish kunidan kechiktirmay, bojxona organi Savdo-sanoat palatasini ushbu qarorni qabul qilinganligi toʻgʻrisida xabardor qiladi.
40. Savdo-sanoat palatasidan talabnoma olingan kundan boshlab olti oy ichida hech qanday tushuntirish olinmasa yoki ular bojxona organi tomonidan rad etilgan boʻlsa, Savdo-sanoat palatasi darhol bojxona organining hisob raqamiga talabnomada koʻrsatilgan bojxona rasmiylashtiruvi uchun bojxona toʻlovlari va bojxona yigʻimlari summasini ushbu Nizomning 30-bandida koʻrsatilgan miqdorlarda oʻtkazishi shart.
41. Talabnomada koʻrsatilgan bojxona toʻlovlar va yigʻimlari toʻlangan kundan boshlab uch oy mobaynida Savdo-sanoat palatasi tovarlarning qayta olib chiqilishi (reeksport) toʻgʻrisida dalillar taqdim qilishi mumkin.
Hududiy bojxona boshqarmasi tovarlarni qaytarib olib chiqish (reeksport) dalillari olingan kundan boshlab 15 kundan kechiktirmay ularni koʻrib chiqadi va Savdo-sanoat palatasiga dalillarni toʻliq (qisman) qabul qilinganligi yoki ular rad etilganligi (sabablarini koʻrsatgan holda) haqida xabar beradi. Tovarlarning olib chiqilganligi (reeksport) dalillari mavjud boʻlgan va Konvensiya talablari buzilmagan taqdirda, Savdo-sanoat palatasi tomonidan toʻlangan summalar Bojxona kodeksining 49-bobiga muvofiq qaytariladi.
42. Toʻlanishi lozim boʻlgan summalar bojxona organlarining hisob raqamiga oʻtkazilmasa, olti oylik muddat oʻtgandan soʻng bojxona organi ushbu summalarni Savdo-sanoat palatasidan undirish toʻgʻrisida daʼvo arizasi bilan sudga murojaat qiladi.
43. “Vaqtincha olib kirish” bojxona rejimini Bojxona kodeksiga muvofiq boshqa bojxona rejimiga oʻzgartirishda va ushbu bojxona rejimining shartlari Oʻzbekiston Respublikasidan tovarlarni olib chiqishni nazarda tutmaydigan boʻlsa, bojxona organi ATA karnetining oq rangdagi yirtib olinadigan “importation” vaucheriga belgi qoʻyadi va shu paytdan boshlab Savdo-sanoat palatasi majburiyatlardan ozod qilinadi, shuningdek, ATA karnetining oq rangdagi “importation” koreshogida bojxona deklaratsiyasining raqami koʻrsatiladi.
7-bob. Oʻzbekiston Respublikasidan vaqtincha olib chiqish uchun ATA karnetidan foydalangan holda tovarlarni deklaratsiyalash
44. Konvensiya talablari tadbiq qilinadigan tovarlar “vaqtincha olib chiqish” bojxona rejimiga joylashtirilganda, ularni deklaratsiyalash Savdo-sanoat palatasi tomonidan taqdim etilgan ATA karneti deklarantning tanloviga koʻra tovarlarga deklaratsiya sifatida foydalanilishi mumkin.
Bojxona organlari Bojxona kodeksida belgilangan tartibda ATA karnetini qoʻllagan holda vaqtincha olib chiqilayotgan tovarlarga nisbatan bojxona nazoratini amalga oshiradi.
Bojxona koʻrigi dalolatnomasini rasmiylashtirishda tovarlarning tavsifi sifatida tovarlarning umumiy roʻyxatidan foydalanishga ruxsat etiladi.
45. ATA karneti bojxona organiga taqdim etiladi va uni bergan kafolatlovchi uyushma tomonidan toʻldirilgan va rasmiylashtirilgan taqdirda qabul qilinadi.
Bunda, ATA karnetining muqovasida uni bergan kafolatlovchi uyushma ATA karneti qabul qilinishi mumkin boʻlgan mamlakatlarni va ushbu mamlakatlar yoki bojxona hududlarining kafolatli birlashmalarining nomlari koʻrsatilishi kerak.
Bojxona organiga ATA karneti taqdim etilganda, uning egasi (vakili) tomonidan ATA karnetining sariq rangdagi “exportation” yirtib olinadigan vaucheri toʻldiriladi.
46. ATA karnetning amal qilish muddati ATA karnetini taqdim etuvchi kafolatlovchi uyushma tomonidan berilgan sanadan eʼtiboran bir yildan oshmasligi lozim.
ATA karnetidan foydalanib harakatlanayotgan tovarlarni vaqtincha olib chiqish muddati Konvensiyada belgilangan talablarga muvofiq belgilanadi.
47. Bojxona organi ATA karnetini qabul qilganda uning toʻldirilganligini tekshiradi.
Bunda quyidagilarga alohida eʼtibor beriladi:
ATA karnetining amal qilish muddati;
tovarlarning umumiy roʻyxati va qoʻshimcha varaqalarni tegishli ravishda toʻldirish va rasmiylashtirish;
sariq rangdagi ATA karnetining yirtib olinadigan vaucherini toʻldirish (unda keltirilgan maʼlumotlar ATA karnetining muqovasi old va orqa tomonlarida koʻrsatilgan va yuk kuzatuv va transport hujjatlarida koʻrsatilgan maʼlumotlarga mos kelishi kerak).
Barcha talablar bajarilgan taqdirda ATA karnetini rasmiylashtirish uchun bojxona organining mansabdor shaxsi bunday ATA karnetini roʻyxatdan oʻtkazish uchun qabul qiladi.
Tovarlarni chiqarishga qaror qilinganda, ATA karneti vaqtincha olib chiqish ruyxatidan oʻtkazishning elektron maʼlumotlar bazasida roʻyxatdan oʻtkaziladi.
Bunda bojxona organining mansabdor shaxsi mazkur Nizom ilovasining 4-bandida koʻrsatilgan maʼlumotlarni ATA karneti muqovasining oldingi chap tomonining pastki qismiga ATA karnetning sariq rangdagi “exportation” koreshogi va yirtib olinadigan vaucheriga kiritadi.
48. ATA karnetning sariq rangdagi “exportation” koreshogi va yirtib olinadigan vaucheri toʻldirilganidan soʻng, bojxona organining mansabdor shaxsi:
ATA karnetining sariq rangdagi yirtib olinadigan vaucherni boshqa birlashtirilgan varaqlaridan ajratadi;
rasmiylashtirilgan ATA karnetini egasiga (vakiliga) qaytaradi.
49. ATA karnetining rasmiylashtirilgan sariq rangdagi yirtib olinadigan vaucherlari ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi hamda ilova qilinadigan hujjatlar nusxasi bilan birga nazorat bojxona organida qoladi.
50. Nazorat bojxona organi tovarlarni “vaqtincha olib chiqish” bojxona rejimi shartlariga rioya etilishini olib qolingan ATA karnetining rasmiylashtirilgan yirtib olinadigan vaucherlari hamda ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi asosida bojxona nazoratini amalga oshiradi.
51. Bojxona organi tomonidan ATA karneti qabul qilib olingandan soʻng unga oʻzgartirish va (yoki) qoʻshimchalar kiritilishiga yoʻl qoʻyilmaydi.
8-bob. Ilgari ATA karnetini qoʻllagan holda vaqtincha olib chiqilgan tovarlarni Oʻzbekiston Respublikasiga qaytarib (reimport) olib kirish
52. Oʻzbekiston Respublikasidan ilgari vaqtincha olib chiqilgan tovarlarni “reimport” bojxona rejimi ostida ATA karnetidan foydalangan holda joylashtirishda ularning bojxonada deklaratsiyalanishi ATA karneti tovarlari uchun deklaratsiya sifatida qoʻllanishi mumkin.
53. Bojxona organi ATA karnetini rasmiylashtirishda uning sariq rangdagi “reimportation” koreshogi va yirtib olinadigan vaucherini mazkur Nizom ilovasining 5-bandiga muvofiq tartibda toʻldiriladi.
54. Bojxona organlari Bojxona kodeksiga muvofiq ATA karneti asosida Oʻzbekiston Respublikasiga qayta olib kiriladigan (reimport) tovarlarga nisbatan bojxona nazorati shakllaridan foydalanadi.
Bojxona koʻrigi dalolatnomalarini tuzishda tovar tavsifi sifatida tovarlarning umumiy roʻyxatlaridan foydalanishga yoʻl qoʻyiladi.
55. ATA karnetining koreshogi va yirtib olinadigan vaucheri toʻldirilgandan soʻng, bojxona organining mansabdor shaxsi:
yirtib olinadigan vaucherni “reimport” bojxona rejimi ostida tovarlarni joylashtirishda ATA karnetining sariq rangdagi “reimportation” vaucherini birlashtirilgan ATA karneti varaqlaridan ajratadi;
elektron maʼlumotlar bazasiga zarur maʼlumotlarni kiritadi;
rasmiylashtirilgan ATA karnetining egasiga (vakiliga) qaytaradi.
56. ATA karnetining rasmiylashtirilgan yirtib olinadigan vaucherlari ATA karnetidagi tovarlarning umumiy roʻyxati va uning qoʻshimcha varaqlarining (mavjud boʻlganda) nusxasi hamda ilova qilinadigan hujjatlar nusxasi bilan birga nazorat bojxona organida qoladi.
57. Tovarlar “reimport” bojxona rejimi ostiga ushbu tovarlarni “vaqtinchalik olib chiqish” bojxona rejimi ostida joylashtirgan bojxona organidan boshqa bojxona organida joylashtirilgan boʻlsa, ushbu bojxona organi ATA karnetining sariq rangdagi “reimportation” yirtib olinadigan vaucheri nusxasi va tovarlar umumiy roʻyxatining nusxasi bilan uch kun ichida tovarlarni “vaqtinchalik olib chiqish” bojxona rejimi ostida ATA karnetini qoʻllagan holda joylashtirgan bojxona organiga xabarnoma (xat) yuboradi.
9-bob. ATA karnetini qoʻllagan holda Oʻzbekiston Respublikasidan vaqtincha olib chiqilgan tovarlarni vaqtinchalik olib chiqish muddatini uzaytirish
58. ATA karneti egasining (vakilining) arizasiga asosan tovarlarni vaqtinchalik olib chiqish uchun belgilangan muddat ATA karnetining egasi (vakili) murojaat qilgan hududiy bojxona boshqarmasi qarori asosan ATA karnetining amal qilish muddati mobaynida uzaytiriladi.
59. Tovarlarni vaqtincha olib chiqish uchun belgilangan muddatni uzaytirishda hududiy bojxona boshqarmasining mansabdor shaxsi tomonidan mazkur Nizom ilovasining 6-bandida belgilangan tartibda ATA karnetining sariq rangdagi “exportation” koreshogi va yirtib olinadigan vaucherlari toʻldiriladi va elektron maʼlumotlar bazasiga ATA karnetining maʼlumotlari boʻyicha uzaytirish muddati koʻrsatilgan holda tegishli yozuv kiritiladi.
10-bob. Yakuniy qoidalar
60. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
61. Mazkur Nizom Oʻzbekiston Respublikasi Savdo-sanoat palatasi bilan kelishilgan.
Vaqtincha olib kirish toʻgʻrisidagi konvensiyani (Istanbul, 1990-yil 26-iyun) qoʻllash tartibi toʻgʻrisidagi Nizomga ILOVA
Bojxona organi tomonidan ATA karnetining koreshoklari va yirtib olinadigan vaucherlarini toʻldirish va rasmiylashtirish
1. ATA karnetining oq rangdagi “importation” koreshok va yirtib olinadigan vaucherlarini toʻldirish va rasmiylashtirish:
a) yirtib olinadigan vaucherda:
“N” grafasining “b” kichik bandida tovarlarni Oʻzbekiston Respublikasidan qaytarib olib chiqish vaqtini hisobga olmagan holda ulardan ATA karnetini qoʻllagan holda maqsadli foydalanish tugaydigan muddat sanasi qoʻyiladi va u quyidagicha shakllantiriladi:
GGGG/MM/DD, bunda
GGGG ― yil;
MM ― oy;
DD ― kun.
Ushbu sana ATA karneti muqovasining old tomonidagi kafolatlovchi uyushma tomonidan qoʻyilgan (“G” grafaning “s” kichik bandi “Valid until/Valable jusqʼau”) ATA karnetining amal qilish muddatidan koʻp boʻlishi mumkin emas;
“N” grafasining “s” kichik bandida bojxona yuk deklaratsiyasidagi roʻyxatga olish raqami kabi shakllantiriladigan bojxona organida roʻyxatga olish raqami qoʻyiladi;
“N” grafasining “d” kichik bandida tovarlarga nisbatan amalga oshirilgan bojxona operatsiyalari toʻgʻrisida nazorat bojxona organining alohida quyidagi belgilari qoʻyiladi:
bojxona koʻrigi oʻtkazilganligi;
qoʻllanilgan identifikatsiya vositalari, shu jumladan, qoʻyilgan bojxona plombalari, ularning raqamlari va boshqa maʼlumotlar koʻrsatiladi. Agar bojxona organi tomonidan identifikatsiya vositalari qoʻllanilgan boʻlsa, ushbu yirtib olinadigan vaucherga tegishli boʻlgan tovarlarning umumiy roʻyxatining 7-ustuniga ushbu tovarlar toʻgʻrisida maʼlumotlar kiritiladi;
“N” grafasining pastki qismiga “At” soʻzidan soʻng, nazorat bojxona organining toʻliq nomi va kodi qoʻyiladi hamda deklaratsiyalashning natijalari toʻgʻrisidagi maʼlumot kiritiladi (“Yuk chiqarishga ruxsat berildi” shtampi, tovarlar chiqarilgan sana, shuningdek, “signature and stamp” soʻzlarining ustiga shaxsiy raqamli muhr va imzo qoʻyiladi).
b) koreshokda:
1-grafada yirtib olinadigan vaucherning “F” grafasi “a” kichik bandidan bojxona nazorati amalga oshirilgan tovarlarning tartib raqamlari qoʻyiladi;
2-grafada yirtib olinadigan vaucherning “N” grafasi “b” kichik bandida koʻrsatilgan sana qoʻyiladi;
3-grafada yirtib olinadigan vaucherning “N” grafasi “s” kichik bandidan bojxona organida roʻyxatga olish raqami qoʻyiladi;
4-grafada yirtib olinadigan vaucherning “N” grafasi “d” kichik bandidan alohida belgilar qoʻyiladi;
5-grafada nazorat bojxona organining toʻliq nomi va kodi qoʻyiladi;
6-grafada nazorat bojxona organining tarkibiy tuzilmasi joylashgan aholi punkti nomi koʻrsatiladi;
7-grafada yirtib olinadigan vaucherning “N” grafasi quyi qismidan yirtib olinadigan vaucherning rasmiylashtiruv sanasi qoʻyiladi;
8-grafada nazorat bojxona organining mansabdor shaxsi shtampi, shaxsiy muhri, imzo, shuningdek, yirtib olinadigan vaucherning “N” grafasi quyi qismidan boshqa maʼlumotlar qoʻyiladi.
2. ATA karnetining oq rangdagi “reexportation” koreshogi va yirtib olinadigan vaucherining nazorat bojxona organining masʼul mansabdor shaxsi tomonidan toʻldirilishi va rasmiylashtirilishi:
a) yirtib olinadigan vaucherda:
“N” grafasining “a” kichik bandida yirtib olinadigan vaucherning “F” grafasi “a” kichik bandidan koʻrsatilib, olib kirilgan tovarlarning bojxona nazoratidan oʻtkazilganligi toʻgʻrisida “tekshirildi” yozuvini qoʻlda yozgan holda belgi qoʻyiladi;
“N” grafasining “b” kichik bandida tovarlarga nisbatan amalga oshirilgan bojxona operatsiyali koʻrsatiladi, agar ular amalga oshirilsa, biroq olib chiqilmasdan Oʻzbekiston Respublikasida boshqa bojxona rejimiga joylashtirilsa (agar ushbu tovarlarga nisbatan Oʻzbekiston Respublikasining Bojxona kodeksida belgilangan tartibda bojxona operatsiyalarini amalga oshirish lozim boʻlsa). Bunday holda ATA karnetining oq rangdagi “reexportation” yirtib olinadigan vaucherining “F” grafasi “b” kichik bandida koʻrsatilgan tovarlarning boshqa bojxona rejimiga joylashtirilgan bojxona deklaratsiyalari toʻgʻrisidagi maʼlumotlar koʻrsatiladi;
“N” grafasining “s” kichik bandida bojxona organiga taqdim qilish va Oʻzbekiston Respublikasidan olib chiqish (reeksport) imkoni yoʻq boʻlgan tovarlarga nisbatan qoʻllanilgan harakatlar koʻrsatiladi. Mazkur kichik bandda quyidagi kabi hujjatlar (shu jumladan, bojxona deklaratsiyalari) koʻrsatiladi:
ushbu tovarlarning avval qaytarib olib chiqilishi amalga oshirilgan ATA karnetining oq rangdagi “reexportation” yirtib olinadigan vaucherlari;
Oʻzbekiston Respublikasi Bojxona kodeksiga muvofiq tovarlar boshqa bojxona rejimlariga joylashtirilgan bojxona deklaratsiyalari;
“N” grafasining “d” kichik bandida bojxona yuk deklaratsiyasidagi roʻyxatga olish raqami kabi shakllantiriladigan, bojxonada roʻyxatga olish raqami qoʻyiladi;
“N” grafasining “e” kichik bandi tovarlarni qaytarib olib chiqishni rasmiylashtirish va amalda olib chiqish nazorat bojxona organidan boshqa bojxona organi tomonidan amalga oshirilganda toʻldiriladi. Mazkur kichik bandda tovarlar olib chiqiladigan bojxona organining kodi va toʻliq nomi qoʻyiladi;
“N” grafaning “f” kichik bandi ATA karnetining oq rangdagi “importation” yirtib olinadigan vaucherining “N” grafasi “d” kichik bandi uchun belgilangan tartibda toʻldiriladi;
“N” grafasining pastki qismiga “At” soʻzidan soʻng, bojxona organining kodi, toʻliq nomi qoʻyiladi, bojxona operatsiyalari va bojxona nazorati natijalari toʻgʻrisidagi maʼlumot kiritiladi (“Yuk chiqarishga ruxsat berildi” shtampi, tovarlar shartli chiqarilgan sana, shuningdek, “signature and stamp” soʻzlarining ustiga shaxsiy muhr va imzo qoʻyiladi).
b) koreshokda:
1-grafada ATA karnetining oq rangdagi “importation” vaucherining bojxona roʻyxat raqamlarini koʻrsatgan holda ushbu vaucherlar boʻyicha vaqtincha olib kirilgan va yirtib olinadigan vaucherning “F” grafasi “a” kichik bandidan qayta olib chiqishga (reeksport) ruxsat berilgan tovarlarga nisbatan tovarlarning umumiy roʻyxatidan tovarlarning tartib raqamlari qoʻyiladi;
2-grafada yirtib olinadigan vaucherning “N” grafasi “b” kichik bandidan maʼlumotlar koʻrsatiladi;
3-grafada yirtib olinadigan vaucherning “N” grafasi “s” kichik bandidan maʼlumotlar koʻrsatiladi;
4-grafada yirtib olinadigan vaucherning “N” grafasi “d” kichik bandidan bojxona organi tomonidan roʻyxatga olish raqami qoʻyiladi;
5, 6, 7 va 8-grafalar ATA karnetining oq rangdagi “importation” koreshogining mos grafalarini toʻldirish talablariga muvofiq toʻldiriladi.
3. Tovarlarni vaqtincha olib kirish uchun belgilangan muddatni uzaytirishda ATA karnetining oq rangdagi “importation” koreshogi va yirtib olinadigan vaucherlarini toʻldirish va rasmiylashtirish:
a) ATA karnetining oq rangdagi “importation” yirtib olinadigan vaucherining “N” grafasi “b” kichik bandiga “vaqtincha olib kirish muddati ....gacha uzaytirildi” yozuvini qoʻl bilan yozib, uzaytirilgan muddatni koʻrsatgan holda vaqtincha olib kirish muddatining uzaytirilganligi toʻgʻrisida belgi, shaxsiy muhr va imzo qoʻyiladi;
b) ATA karnetining oq rangdagi “importation” koreshogi 2-bandiga “vaqtincha olib kirish muddati ....gacha uzaytirildi” yozuvini qoʻl bilan yozib, uzaytirilgan muddatni koʻrsatgan holda vaqtincha olib kirish muddatining uzaytirilganligi toʻgʻrisida belgi, shaxsiy muhr va imzo qoʻyiladi.
4. Bojxona organining mansabdor shaxsi tomonidan ATA karnetining muqovasi yuz tomonidagi “N” grafaning pastki chap katakchasi, sariq rangdagi “exportation” koreshogi va yirtib olinadigan vaucherlarning toʻldirilishi va rasmiylashtirilishi:
a) ATA karnetining muqovasi yuz tomonidagi “N” grafasining pastki chap katakchasida:
“a” kichik bandida ATA karnetidagi tovarlarning umumiy roʻyxati 7 kolonkasidagi identifikatsiya vositalari qoʻyilgan tovarlar umumiy roʻyxatidan tovarlar va qoʻshimcha varaqlar raqamlari koʻrsatiladi;
“b” kichik bandida bojxona koʻrigi oʻtkazilganligi toʻgʻrisida belgi qoʻyiladi. Bojxona koʻrigi oʻtkazilganda “yes/da”ning roʻparasiga tegishli belgi qoʻyiladi, “no/net” chizib oʻchiriladi;
“s” kichik bandida bojxona yuk deklaratsiyasidagi roʻyxatga olish raqami kabi shakllantiriladigan, bojxonada roʻyxatga olish raqami qoʻyiladi;
“d” kichik bandida tovarlarga nisbatan bojxona operatsiyalari amalga oshirilayotgan bojxona organining kodi va toʻliq nomi;
quyidagi shaklda shakllantiriladigan ATA karnetining rasmiylashtiruv sanasi:
GGGG/MM/DD, bunda:
GGGG ― yil;
MM ― oy;
DD ― kun;
shaxsiy raqamli muhr va imzo;
b) ATA karnetining sariq rangdagi “exportation” koreshogi va yirtib olinadigan vaucherda:
yirtib olinadigan vaucherda:
“N” grafaning “a” kichik bandida tovarlarning umumiy roʻyxatidan va qoʻshimcha varaqlarning “F” grafasi “a” kichik bandidan olib chiqilayotgan tovarlarning tartib raqamlari kiritiladi;
“N” grafaning “b” kichik bandida agar Oʻzbekiston Respublikasining Bojxona kodeksiga muvofiq tovarlarni olib chiqishda qaytarib olib kirish shart boʻlsa, Oʻzbekiston Respublikasidan olib chiqilgan va “reimport” bojxona rejimiga joylashtirilayotgan tovarlarning qaytarib olib kirish sanasi qoʻyiladi va u quyidagi tartibda shakllantiriladi:
GGGG/MM/DD, bunda:
GGGG ― yil;
MM ― oy;
DD ― kun;
“N” grafaning “s” kichik bandi toʻldirilmaydi;
“N” grafaning “d” kichik bandida tovarlarga nisabtan amalga oshirilgan bojxona operatsiyalari va bojxona nazoratidagi harakatlar toʻgʻrisida bojxona organining maxsus belgilari, xususan:
bojxona koʻrigi oʻtkazilganligi,
qoʻllanilgan qiyoslash vositalari, shu jumladan, qoʻyilgan bojxona plombalari va ularning raqamlari hamda boshqa maʼlumotlar koʻrsatiladi. Agar bojxona organlari tomonidan identifikatsiya vositalari qoʻllanilgan boʻlsa, ular toʻgʻrisidagi maʼlumot ushbu yirtib olinadigan vaucherga tegishli tovarlarning umumiy roʻyxati 7-ustunining tegishli joyida koʻrsatiladi;
“N” grafasining pastki qismiga “At” soʻzidan soʻng, tovarlar “vaqtincha olib chiqish” bojxona rejimiga joylashtirilgan bojxona organining kodi va toʻliq nomi koʻrsatilib, bojxona operatsiyalarini amalga oshirish va bojxona nazorati natijalari toʻgʻrisidagi maʼlumotlar kiritiladi (“Yuk chiqarishga ruxsat berildi” shtampi, tovarlar shartli chiqarilgan sana, shuningdek, “signature and stamp” soʻzlarining ustiga shaxsiy raqamli muhr va imzo qoʻyiladi);
koreshokda:
1-grafada yirtib olinadigan vaucherning “N” grafasi “a” kichik bandidan olib chiqilayotgan tovarlarning tartib raqamlari qoʻyiladi;
2-grafada belgilangan katakda yirtib olinadigan vaucherning “N” grafasi “b” kichik bandida koʻrsatilgan sana qoʻyiladi;
3-grafada yirtib olinadigan vaucherning “N” grafasi “d” kichik bandidan maxsus belgilar qoʻyiladi;
4-grafada tovarlarni shartli chiqarishni amalga oshirgan bojxona organining kodi va toʻliq nomi koʻrsatiladi;
5-grafada bojxona organining tarkibiy tuzilmasi joylashgan aholi punkti nomi koʻrsatiladi;
6-grafada “N” yirtib olinadigan vaucherning pastki qismidan tovarlarning shartli chiqarish sanasi qoʻyiladi;
7-grafada tegishli shtamp va shaxsiy raqamli muhr, imzo va yirtib olinadigan vaucherning “N” grafasi “d” kichik bandi pastki qismidan boshqa maʼlumotlar qoʻyiladi.
5. Bojxona organining mansabdor shaxsi tomonidan ATA karnetining sariq rangdagi “reimportation” koreshogi va yirtib olinadigan vaucherlarining toʻldirilishi va rasmiylashtirilishi:
a) yirtib olinadigan varaq vaucherda:
“N” grafasining “a” kichik bandi agar tovarlar nazorat bojxona organidan boshqa bojxona organida “vaqtincha olib chiqish” bojxona rejimiga joylashtirilgan boʻlsa toʻldiriladi. Mazkur kichik bandda ATA karnetining sariq rangdagi “exportation” 4-grafasida bojxona organining kodi va toʻliq nomi qoʻyiladi;
“N” grafaning “s” kichik bandi ATA karnetining sariq rangdagi “exportation” yirtib olinadigan vaucheri “N” grafasi “d” kichik bandi talablari boʻyicha toʻldiriladi. Agar tovarlar bir nechta turkumlar bilan qaytarib olib kirilayotgan boʻlsa, tovarlarning avvalgi qayta olib kirilganligini (reimport) tasdiqlovchi maʼlumotlar va “vaqtincha olib chiqish” bojxona rejimiga joylashtirilgan tovarlarning boshqa bojxona rejimiga joylashtirilganligi (bunday tovarlarga nisbatan bojxona operatsiyalari Oʻzbekiston Respublikasining Bojxona kodeksiga muvofiq tartibda amalga oshiriladi) toʻgʻrisidagi maʼlumotlar koʻrsatiladi. Bunday holda kichik bandda ushbu tovarlar avval reimport qilingan sariq rangdagi “reimportation” yirtib olinadigan vaucherlar toʻgʻrisida. ATA karnetining sariq rangdagi yirtib olinadigan vaucherining “F” grafasi “s” kichik bandida koʻrsatilgan, tovarlar boshqa bojxona rejimlariga rasmiylashtirilgan bojxona yuk deklaratsiyalari toʻgʻrisida maʼlumotlar koʻrsatiladi;
“N” grafasining pastki qismiga “At” soʻzidan soʻng, tovarlarni “qayta olib kirish” (reimport) bojxona rejimiga joylashtirgan bojxona organining kodi va toʻliq nomi koʻrsatilib, bojxona operatsiyalarini amalga oshirish va bojxona nazorati natijalari toʻgʻrisidagi maʼlumotlar kiritiladi (“Yuk chiqarishga ruxsat berildi” shtampi, tovarlar chiqarilgan sana, shuningdek, “signature and stamp” soʻzlarining ustiga shaxsiy raqamli muhr va imzo qoʻyiladi).
b) koreshokda:
1-grafada tovarlarning umumiy roʻyxatidan ATA karnetining sariq rangdagi “exportation” vaucherlari boʻyicha vaqtincha olib chiqilgan va yirtib olinadigan varaq vaucherning “F” grafasi “a” kichik bandidan qayta olib kirishga (reimport) ruxsat berilgan tovarlarning tartib raqamlari ushbu vaucherlarning bojxonada roʻyxatga olish raqamlari koʻrsatilgan holda qoʻyiladi;
2-grafada ATA karnetining “exportation” yirtib olinadigan varagʻi “N” grafasi “s” kichik bandidan maʼlumotlar koʻrsatiladi;
3-grafada ATA karnetini qoʻllagan holda qayta olib kirilayotgan (reimport) tovarlarni chiqarishni amalga oshirgan bojxona organining kodi va toʻliq nomi koʻrstailadi;
4-grafada bojxona organining tarkibiy tuzilmasi joylashgan aholi punktining nomi, tovarlarni rasmiylashtirayotgan vakolatli mansabdor shaxs koʻrsatiladi;
5-grafada yirtib olinadigan vaucherning “N” grafasi pastki qismidan ATA karnetining sariq rangdagi yirtib olinadigan vaucher rasmiylashtirilgan va tovarlar chiqarib yuborilgan sana qoʻyiladi;
6-grafada tegishli shtamplar, shaxsiy muhr, imzo, shuningdek, yirtib olinadigan vaucherning “N” grafasi pastki qismidan boshqa maʼlumotlar qoʻrsatiladi.
6. Tovarlarni vaqtincha olib chiqish uchun belgilangan muddatni uzaytirishda ATA karnetining sariq rangdagi “exportation” yirtib olinadigan vaucherlarini toʻldirish va rasmiylashtirish:
a) ATA karnetining sariq rangdagi yirtib olinadigan “exportation” vaucheri “N” grafasining “b” bandiga uzaytirish sanasini koʻrsatgan qoʻlda yozilgan yozuv bilan belgi qoʻyadi, shuningdek, shaxsiy muhr va imzo qoʻyiladi;
b) ATA karnetining “exportation” koreshogi 2-grafasiga vaqtinchalik olib chiqish muddati uzaytirilgani haqida qoʻlda yozilgan yozuv bilan hamda shaxsiy muhr va imzo qoʻyiladi;
v) ATA karnetlari boʻyicha vaqtinchalik olib chiqish va qayta olib kirishni roʻyxatga olish elektron maʼlumotlar bazasida ushbu ATA karnetining “vaqtinchalik olib chiqishga ruxsat muddati” grafasiga uzaytirish sanasi koʻrsatilgan holda “muddat ...gacha uzaytirilgan” deb qoʻshimcha qiladi.
Rais M. AZIMOV
Oʻzbekiston Respublikasi Savdo-sanoat palatasi raisi A. IKRAMOV
Toshkent sh.,
2020-yil 23-iyun,
2020-yil 22-iyun
01-02/12-28-son