📅 2020-yil 30-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 30 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 июля 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 30 July 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Коронавирус инфекцияси тарқалишига қарши кураш, аҳолининг санитария-эпидемиологик осойишталиги ва саломатлигини сақлашга жалб қилинган тез тиббий ёрдам ходимларини қўшимча моддий рағбатлантириш тўғрисида
Жаҳон миқёсида коронавирус инфекциясининг тарқалиши авж олаётган ҳозирги даврда республикамизнинг соғлиқни сақлаш тизимида 52 мингдан ортиқ тез тиббий ёрдам ходимлари (врач ходимлар, ўрта тиббиёт ходимлари ва ҳайдовчилар) ҳам жонбозлик кўрсатишмоқда.
Ўзбекистон Республикаси Президентининг «Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида» 2020 йил 30 июлдаги ПФ-6038-сон Фармонига мувофиқ, фуқароларнинг ҳаёти ва соғлиғини муҳофаза қилишга қўшаётган улкан ҳиссаларини ва фидокорона хизматларини эътироф этган ҳолда ҳамда кириб келаётган Қурбон ҳайити байрами муносабати билан коронавирус инфекцияси тарқалишига қарши кураш, аҳолининг санитария-эпидемиологик осойишталиги ва саломатлигини сақлашга жалб қилинган тез тиббий ёрдам ходимларини қўшимча моддий рағбатлантириш мақсадида Вазирлар Маҳкамаси қарор қилади:
1. Ўзбекистон Республикаси Президентининг « Коронавирус инфекцияси тарқалишига қарши курашишга жалб қилинган тиббиёт ва санитария-эпидемиология хизмати ходимларини қўллаб-қувватлашга оид қўшимча чора-тадбирлар тўғрисида » 2020 йил 26 мартдаги ПҚ-4652-сон ва « Коронавирус пандемияси даврида санитария-эпидемиология хизмати ходимларини янада рағбатлантириш чора-тадбирлари тўғрисида » 2020 йил 24 апрелдаги ПҚ-4695-сон ҳамда Вазирлар Маҳкамасининг « Коронавирус инфекциясига қарши кураш даврида аҳолини тез тиббий ёрдам хизмати билан қамраб олиш чора-тадбирлари тўғрисида » 2020 йил 20 июлдаги 446-сон қарорлари билан коронавирус инфекцияси тарқалишига қарши курашишга жалб қилинган тиббиёт ва санитария-эпидемиология хизмати ходимлари, шу жумладан тез тиббий ёрдам ходимларига қўшимча рағбатлантириш тўловлари белгиланганлиги маълумот учун қабул қилинсин.
2. Ўзбекистон Республикаси Президентининг «Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида» 2020 йил 30 июлдаги ПФ-6038-сон Фармонига мувофиқ тез тиббий ёрдам ходимларини бир марталик моддий рағбатлантириш учун Ўзбекистон Республикаси республика бюджетидан 100 млрд. сўм миқдорида маблағ ажратилганлиги маълумот учун қабул қилинсин.
Шунингдек, ушбу мақсадлар учун таниқли тадбиркор ватандошимиз А.Б. Усмонов томонидан қўшимча равишда 100 млрд. сўм (10 млн. АҚШ доллари эквивалентида) миқдорида ҳомийлик хайрияси ажратилганлиги инобатга олинсин.
3. Республикамизда коронавирус инфекцияси тарқалишига қарши кураш, аҳолининг санитария-эпидемиологик осойишталиги ва саломатлигини сақлашга жалб қилинган тез тиббий ёрдам ходимларига қуйидаги миқдорларда бир марталик моддий рағбатлантириш тўловлари белгилансин:
врач ходимларга ― 5 миллион сўм;
ўрта тиббиёт ходимлари (фельдшерлар ва санитарлар)га ― 4 миллион сўм;
ҳайдовчиларга ― 3 миллион сўм.
Белгилансинки, ушбу бандда назарда тутилган тўловлар 2020 йил 1 июнгача ишга қабул қилинган ходимларга нисбатан тадбиқ қилинади.
4. Тез тиббий ёрдам ходимларига бир марталик моддий рағбатлантириш тўловларини ўз вақтида ва манзилли тўланишини таъминлашнинг қуйидаги тартиби ўрнатилсин:
ушбу қарорнинг 2-бандига мувофиқ ажратилган маблағлар Ўзбекистон Республикаси Соғлиқни сақлаш вазирлиги ҳузуридаги Тез тиббий ёрдамни мувофиқлаштириш жамғармасида (бундан буён ― Жамғарма) жамланади;
Қорақалпоғистон Республикаси Соғлиқни сақлаш вазирлиги, вилоятлар соғлиқни сақлаш бошқармалари ва Тошкент шаҳар соғлиқни сақлаш бош бошқармаси (бундан буён — ҳудудий бошқармалар) уч кун муддатда Ўзбекистон Республикаси Соғлиқни сақлаш вазирлигига бир марталик моддий рағбатлантириш тўловларини тўлаш учун Жамғармадан ажратилиши зарур бўлган маблағлар миқдори тўғрисида муассасалар кесимида буюртма беради. Бунда буюртма ушбу қарор билан белгиланган миқдорлардан келиб чиқиб, маблағларни олувчи муассасаларнинг бюджетдан ташқари шахсий ғазна ҳисобварақларини кўрсатган ҳолда шакллантирилади;
Ўзбекистон Республикаси Соғлиқни сақлаш вазирлиги ҳудудий бошқармаларнинг буюртмаларига мувофиқ икки кун муддатда пул маблағларини Жамғармадан тегишли ҳажмларда маблағларни олувчи муассасаларнинг бюджетдан ташқари шахсий ғазна ҳисобварақларига ўтказиб беради;
пул маблағларни олувчи муассасалар бир иш куни ичида тегишли тез тиббий ёрдам ходимларининг банк карталарига ўтказиб бериш ёки нақд пул маблағларини бериш орқали бир марталик моддий рағбатлантириш тўловларининг тўлаб берилишини таъминлайди.
5. Ўзбекистон Республикаси Молия вазирлиги Ғазначилигига бир марталик моддий рағбатлантириш тўловларини ўз вақтида ва манзилли тўланиши устидан назорат қилиш юклансин.
6. Бир марталик моддий рағбатлантириш тўлови суммаси жисмоний шахслардан олинадиган даромад солиғини ҳисоблашда жами даромад таркибига кирмаслиги маълумот учун қабул қилинсин.
7. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари ― иқтисодий тараққиёт ва камбағалликни қисқартириш вазири Дж.А. Кучкаров ва Ўзбекистон Республикаси Бош вазирининг ўринбосари Б.А. Мусаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 30 июль,
458-сон
Oʻzbekiston Respublikasi Vazirlar Mahkamasining
qarori
Koronavirus infeksiyasi tarqalishiga qarshi kurash, aholining sanitariya-epidemiologik osoyishtaligi va salomatligini saqlashga jalb qilingan tez tibbiy yordam xodimlarini qoʻshimcha moddiy ragʻbatlantirish toʻgʻrisida
Jahon miqyosida koronavirus infeksiyasining tarqalishi avj olayotgan hozirgi davrda respublikamizning sogʻliqni saqlash tizimida 52 mingdan ortiq tez tibbiy yordam xodimlari (vrach xodimlar, oʻrta tibbiyot xodimlari va haydovchilar) ham jonbozlik koʻrsatishmoqda.
Oʻzbekiston Respublikasi Prezidentining “Koronavirus pandemiyasi davrida ijtimoiy himoyaga va yordamga muhtoj aholi qatlamlarini moddiy qoʻllab-quvvatlashga doir qoʻshimcha chora-tadbirlar toʻgʻrisida” 2020-yil 30-iyuldagi PF-6038-son Farmoniga muvofiq, fuqarolarning hayoti va sogʻligʻini muhofaza qilishga qoʻshayotgan ulkan hissalarini va fidokorona xizmatlarini eʼtirof etgan holda hamda kirib kelayotgan Qurbon hayiti bayrami munosabati bilan koronavirus infeksiyasi tarqalishiga qarshi kurash, aholining sanitariya-epidemiologik osoyishtaligi va salomatligini saqlashga jalb qilingan tez tibbiy yordam xodimlarini qoʻshimcha moddiy ragʻbatlantirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “ Koronavirus infeksiyasi tarqalishiga qarshi kurashishga jalb qilingan tibbiyot va sanitariya-epidemiologiya xizmati xodimlarini qoʻllab-quvvatlashga oid qoʻshimcha chora-tadbirlar toʻgʻrisida ” 2020-yil 26-martdagi PQ-4652-son va “ Koronavirus pandemiyasi davrida sanitariya-epidemiologiya xizmati xodimlarini yanada ragʻbatlantirish chora-tadbirlari toʻgʻrisida ” 2020-yil 24-apreldagi PQ-4695-son hamda Vazirlar Mahkamasining “ Koronavirus infeksiyasiga qarshi kurash davrida aholini tez tibbiy yordam xizmati bilan qamrab olish chora-tadbirlari toʻgʻrisida ” 2020-yil 20-iyuldagi 446-son qarorlari bilan koronavirus infeksiyasi tarqalishiga qarshi kurashishga jalb qilingan tibbiyot va sanitariya-epidemiologiya xizmati xodimlari, shu jumladan tez tibbiy yordam xodimlariga qoʻshimcha ragʻbatlantirish toʻlovlari belgilanganligi maʼlumot uchun qabul qilinsin.
2. Oʻzbekiston Respublikasi Prezidentining “Koronavirus pandemiyasi davrida ijtimoiy himoyaga va yordamga muhtoj aholi qatlamlarini moddiy qoʻllab-quvvatlashga doir qoʻshimcha chora-tadbirlar toʻgʻrisida” 2020-yil 30-iyuldagi PF-6038-son Farmoniga muvofiq tez tibbiy yordam xodimlarini bir martalik moddiy ragʻbatlantirish uchun Oʻzbekiston Respublikasi respublika budjetidan 100 mlrd. soʻm miqdorida mablagʻ ajratilganligi maʼlumot uchun qabul qilinsin.
Shuningdek, ushbu maqsadlar uchun taniqli tadbirkor vatandoshimiz A.B. Usmonov tomonidan qoʻshimcha ravishda 100 mlrd. soʻm (10 mln. AQSH dollari ekvivalentida) miqdorida homiylik xayriyasi ajratilganligi inobatga olinsin.
3. Respublikamizda koronavirus infeksiyasi tarqalishiga qarshi kurash, aholining sanitariya-epidemiologik osoyishtaligi va salomatligini saqlashga jalb qilingan tez tibbiy yordam xodimlariga quyidagi miqdorlarda bir martalik moddiy ragʻbatlantirish toʻlovlari belgilansin:
vrach xodimlarga ― 5 million soʻm;
oʻrta tibbiyot xodimlari (feldsherlar va sanitarlar)ga ― 4 million soʻm;
haydovchilarga ― 3 million soʻm.
Belgilansinki, ushbu bandda nazarda tutilgan toʻlovlar 2020-yil 1-iyungacha ishga qabul qilingan xodimlarga nisbatan tadbiq qilinadi.
4. Tez tibbiy yordam xodimlariga bir martalik moddiy ragʻbatlantirish toʻlovlarini oʻz vaqtida va manzilli toʻlanishini taʼminlashning quyidagi tartibi oʻrnatilsin:
ushbu qarorning 2-bandiga muvofiq ajratilgan mablagʻlar Oʻzbekiston Respublikasi Sogʻliqni saqlash vazirligi huzuridagi Tez tibbiy yordamni muvofiqlashtirish jamgʻarmasida (bundan buyon ― Jamgʻarma) jamlanadi;
Qoraqalpogʻiston Respublikasi Sogʻliqni saqlash vazirligi, viloyatlar sogʻliqni saqlash boshqarmalari va Toshkent shahar sogʻliqni saqlash bosh boshqarmasi (bundan buyon — hududiy boshqarmalar) uch kun muddatda Oʻzbekiston Respublikasi Sogʻliqni saqlash vazirligiga bir martalik moddiy ragʻbatlantirish toʻlovlarini toʻlash uchun Jamgʻarmadan ajratilishi zarur boʻlgan mablagʻlar miqdori toʻgʻrisida muassasalar kesimida buyurtma beradi. Bunda buyurtma ushbu qaror bilan belgilangan miqdorlardan kelib chiqib, mablagʻlarni oluvchi muassasalarning budjetdan tashqari shaxsiy gʻazna hisobvaraqlarini koʻrsatgan holda shakllantiriladi;
Oʻzbekiston Respublikasi Sogʻliqni saqlash vazirligi hududiy boshqarmalarning buyurtmalariga muvofiq ikki kun muddatda pul mablagʻlarini Jamgʻarmadan tegishli hajmlarda mablagʻlarni oluvchi muassasalarning budjetdan tashqari shaxsiy gʻazna hisobvaraqlariga oʻtkazib beradi;
pul mablagʻlarni oluvchi muassasalar bir ish kuni ichida tegishli tez tibbiy yordam xodimlarining bank kartalariga oʻtkazib berish yoki naqd pul mablagʻlarini berish orqali bir martalik moddiy ragʻbatlantirish toʻlovlarining toʻlab berilishini taʼminlaydi.
5. Oʻzbekiston Respublikasi Moliya vazirligi Gʻaznachiligiga bir martalik moddiy ragʻbatlantirish toʻlovlarini oʻz vaqtida va manzilli toʻlanishi ustidan nazorat qilish yuklansin.
6. Bir martalik moddiy ragʻbatlantirish toʻlovi summasi jismoniy shaxslardan olinadigan daromad soligʻini hisoblashda jami daromad tarkibiga kirmasligi maʼlumot uchun qabul qilinsin.
7. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari ― iqtisodiy taraqqiyot va kambagʻallikni qisqartirish vaziri Dj.A. Kuchkarov va Oʻzbekiston Respublikasi Bosh vazirining oʻrinbosari B.A. Musayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 30-iyul,
458-son