📅 2020-yil 12-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 12 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 12 августа 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 12 August 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Республикаси вакилларининг ўқишини ташкил этиш учун Япония Ҳукумати грантидан самарали фойдаланиш чора-тадбирлар тўғрисида
Ўзбекистон Республикаси вакилларининг 2020-2021 йилларда Японияда ўқишини ташкил этиш учун Япония Ҳукуматининг грантидан самарали фойдаланиш мақсадида Вазирлар Маҳкамаси қарор қилади:
1. Япония халқаро ҳамкорлик агентлигининг (кейинги ўринларда — JICA) «Кадрлар тайёрлаш учун стипендиялар тақдим этиш лойиҳаси» (кейинги ўринларда — лойиҳа) доирасида Япониянинг етакчи университетлари магистратурасида Ўзбекистон Республикаси вакилларининг ўқишини ташкил этиш мақсадида қуйидагилар маълумот учун қабул қилинсин:
2018-2019 йиллар учун 261 млн япон йени (2,46 млн АҚШ доллари эквивалентида) ва 2019-2020 йиллар учун 262 млн япон йени (2,47 млн АҚШ доллари эквивалентида) миқдорида грант ажратилди;
«Ўзбекистон Республикаси Ташқи иқтисодий фаолият миллий банки» АЖ (кейинги ўринларда — «Ўзмиллийбанк» АЖ) томонидан Япониянинг MUFG Bank, Ltd. банки (кейинги ўринларда — Япония банки) билан банклараро шартнома ҳамда Олий ва ўрта махсус таълим вазирлиги билан келишув асосида ўтган давр учун грант бўйича ҳисоб-китоб хизматлари кўрсатилди;
Олий ва ўрта махсус таълим вазирлиги ҳамда Инвестициялар ва ташқи савдо вазирлиги вакиллари иштирокида Япониянинг Ўзбекистон Республикасидаги Элчихонаси ва JICA билан ҳамкорликда ўтказилган танлов натижаларига кўра йилига 17 нафардан, ўтган икки йил учун жами 34 нафар Ўзбекистон Республикасининг вакиллари Япония университетларида ўқишга юборилди;
бошқарув комиссияси, иш берувчилар ва лойиҳа стипендиатлари ўртасида ўқиш даврида стипендиатларнинг мажбуриятлари ва ҳуқуқлари, шунингдек, ўқишни тамомлагач ишга жойлаштириш мажбуриятлари ҳамда кафолатлари белгиланган уч томонлама битимлар имзоланди.
2. 2019 йил 28 августда Ўзбекистон Республикаси Ҳукумати ва JICA ўртасида Айирбошлаш нотаси ва Грант битими имзолангани ҳамда уларда қуйидагилар назарда тутилгани маълумот учун қабул қилинсин:
Ўзбекистон Республикаси вакилларининг 2020-2021 йилларда Япония етакчи университетлари магистратураси ва докторантурасида ўқишини ташкил этиш учун Япония Ҳукуматининг беғараз ёрдам дастури бўйича Япония Ҳукумати томонидан 263 млн япон йени (2,48 млн АҚШ доллари эквивалентида) миқдорида грант тақдим этиш;
JICA томонидан белгиланадиган ташкилотнинг стипендиатни танлаш, унга ўқиш жараёнида ҳамроҳлик қилиш ҳамда уч томонлама битим бажарилишининг мониторинги билан боғлиқ хизматлари учун харажатларни грант ҳисобидан қоплаш;
давлат бошқаруви органлари, хўжалик бирлашмалари, маҳаллий давлат ҳокимияти органларида меҳнат қилаётганлар орасидан Япония етакчи университетлари магистратурасида ўқиш учун 18 нафар ва докторантурасида ўқиш учун 1 нафар талабгорни танлаш шартлари;
Вазирлар Маҳкамасининг Таълим ва соғлиқни сақлаш масалалари котибияти, Олий ва ўрта махсус таълим вазирлиги ҳамда Инвестициялар ва ташқи савдо вазирлиги Ўзбекистон томонидан, Япониянинг Ўзбекистон Республикасидаги Элчихонаси ва JICA Япония томонидан ушбу лойиҳанинг амалга оширилишини ва ўқиш учун номзодларни танлаб олишни мувофиқлаштирувчилар этиб белгилаш;
грантга ҳисоб-китоб хизматини кўрсатиш шартлари ва тартиби, шунингдек, «Ўзмиллийбанк» АЖ томонидан банк битимлари тузиш асосида зарур ҳисоб-китобларни амалга ошириш;
грант бўйича ҳисоб-китоб хизматини кўрсатиш учун «Ўзмиллийбанк» АЖ ва Япония банки ўртасида банклараро шартнома имзолаш.
3. Ўзбекистон Республикаси Олий ва ўрта махсус таълим вазирлигига:
Япония томони билан келишган ҳолда лойиҳани амалга ошириш доирасида грант олиш ва унга хизмат кўрсатиш билан боғлиқ барча тартиботларни расмийлаштириш;
«Ўзмиллийбанк» АЖ томонидан тегишли талабнома тақдим этилгандан сўнг уч иш куни ичида Япония банки комиссияси харажатларини тўлаб бериш вазифаси юклатилсин.
4. «Ўзмиллийбанк» АЖга ҳар йили тегишли Япония банки ҳамда Ўзбекистон Республикаси Олий ва ўрта махсус таълим вазирлиги билан лойиҳа доирасида шартнома асосида ҳисоб-китоб хизматларини амалга ошириш тавсия этилсин.
5. Ўзбекистон Республикаси Олий ва ўрта махсус таълим вазирлиги грант бўйича ҳисоб-китоб хизмати кўрсатилганлиги учун Япония томонига воситачилик харажатлари учун тўловни Олий таълим муассасаларини ривожлантириш жамғармаси маблағлари ҳисобига амалга оширсин.
6. Ўзбекистон Республикаси Ташқи ишлар вазирлиги Олий ва ўрта махсус таълим вазирлигининг буюртманомалари бўйича лойиҳани амалга оширишда иштирок этувчи хорижий мутахассисларга кириш визалари консуллик йиғимлари ва бошқа йиғимлар ундирилмасдан белгиланган тартибда расмийлаштирилишини таъминласин.
7. Ўзбекистон Республикаси Ички ишлар вазирлиги Олий ва ўрта махсус таълим вазирлигининг буюртманомалари бўйича лойиҳани амалга оширишда иштирок этувчи хорижий мутахассисларга давлат божлари ундирилмасдан визалар берилиши ва уларнинг муддати узайтирилиши, шунингдек, уларнинг яшаш жойида вақтинча рўйхатдан ўтказилиши ва вақтинча рўйхатдан ўтказиш муддати узайтирилишини таъминласин.
8. Ўзбекистон Республикаси Олий ва ўрта махсус таълим вазирлиги, Инвестициялар ва ташқи савдо вазирлиги манфаатдор давлат бошқаруви органлари, хўжалик бирлашмалари ҳамда маҳаллий ижро этувчи ҳокимият органлари билан биргаликда:
лойиҳа доирасида Япониянинг етакчи университетлари магистратураси ва докторантурасида мақсадли ўқиб келган битирувчиларнинг ишга жойлашиши ҳолати мониторинги ва таҳлилини таъминласин;
мониторинг ва таҳлил натижаларига кўра, ҳар йили ҳисобот йилининг октябрь ойигача ўқиш тугагандан сўнг уч йил мобайнида битирувчиларни иш билан таъминлашнинг жорий ҳолати тўғрисидаги маълумотларни ҳамда Япония Ҳукумати грантидан фойдаланиш самарадорлигини янада ошириш юзасидан Вазирлар Маҳкамасига таклифлар тақдим этсин;
лойиҳанинг барча битирувчиларини иш билан таъминлашнинг жорий ҳолати тўғрисида бир ой муддатда Вазирлар Маҳкамасига маълумотлар киритсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев, Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков ҳамда олий ва ўрта махсус таълим вазири И.У. Маджидов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 12 август,
478-сон
Oʻzbekiston Respublikasi Vazirlar Mahkamasining
qarori
Oʻzbekiston Respublikasi vakillarining oʻqishini tashkil etish uchun Yaponiya Hukumati grantidan samarali foydalanish chora-tadbirlar toʻgʻrisida
Oʻzbekiston Respublikasi vakillarining 2020-2021-yillarda Yaponiyada oʻqishini tashkil etish uchun Yaponiya Hukumatining grantidan samarali foydalanish maqsadida Vazirlar Mahkamasi qaror qiladi:
1. Yaponiya xalqaro hamkorlik agentligining (keyingi oʻrinlarda — JICA) “Kadrlar tayyorlash uchun stipendiyalar taqdim etish loyihasi” (keyingi oʻrinlarda — loyiha) doirasida Yaponiyaning yetakchi universitetlari magistraturasida Oʻzbekiston Respublikasi vakillarining oʻqishini tashkil etish maqsadida quyidagilar maʼlumot uchun qabul qilinsin:
2018-2019-yillar uchun 261 mln yapon yeni (2,46 mln AQSH dollari ekvivalentida) va 2019-2020-yillar uchun 262 mln yapon yeni (2,47 mln AQSH dollari ekvivalentida) miqdorida grant ajratildi;
“Oʻzbekiston Respublikasi Tashqi iqtisodiy faoliyat milliy banki” AJ (keyingi oʻrinlarda — “Oʻzmilliybank” AJ) tomonidan Yaponiyaning MUFG Bank, Ltd. banki (keyingi oʻrinlarda — Yaponiya banki) bilan banklararo shartnoma hamda Oliy va oʻrta maxsus taʼlim vazirligi bilan kelishuv asosida oʻtgan davr uchun grant boʻyicha hisob-kitob xizmatlari koʻrsatildi;
Oliy va oʻrta maxsus taʼlim vazirligi hamda Investitsiyalar va tashqi savdo vazirligi vakillari ishtirokida Yaponiyaning Oʻzbekiston Respublikasidagi Elchixonasi va JICA bilan hamkorlikda oʻtkazilgan tanlov natijalariga koʻra yiliga 17 nafardan, oʻtgan ikki yil uchun jami 34 nafar Oʻzbekiston Respublikasining vakillari Yaponiya universitetlarida oʻqishga yuborildi;
boshqaruv komissiyasi, ish beruvchilar va loyiha stipendiatlari oʻrtasida oʻqish davrida stipendiatlarning majburiyatlari va huquqlari, shuningdek, oʻqishni tamomlagach ishga joylashtirish majburiyatlari hamda kafolatlari belgilangan uch tomonlama bitimlar imzolandi.
2. 2019-yil 28-avgustda Oʻzbekiston Respublikasi Hukumati va JICA oʻrtasida Ayirboshlash notasi va Grant bitimi imzolangani hamda ularda quyidagilar nazarda tutilgani maʼlumot uchun qabul qilinsin:
Oʻzbekiston Respublikasi vakillarining 2020-2021-yillarda Yaponiya yetakchi universitetlari magistraturasi va doktoranturasida oʻqishini tashkil etish uchun Yaponiya Hukumatining begʻaraz yordam dasturi boʻyicha Yaponiya Hukumati tomonidan 263 mln yapon yeni (2,48 mln AQSH dollari ekvivalentida) miqdorida grant taqdim etish;
JICA tomonidan belgilanadigan tashkilotning stipendiatni tanlash, unga oʻqish jarayonida hamrohlik qilish hamda uch tomonlama bitim bajarilishining monitoringi bilan bogʻliq xizmatlari uchun xarajatlarni grant hisobidan qoplash;
davlat boshqaruvi organlari, xoʻjalik birlashmalari, mahalliy davlat hokimiyati organlarida mehnat qilayotganlar orasidan Yaponiya yetakchi universitetlari magistraturasida oʻqish uchun 18 nafar va doktoranturasida oʻqish uchun 1 nafar talabgorni tanlash shartlari;
Vazirlar Mahkamasining Taʼlim va sogʻliqni saqlash masalalari kotibiyati, Oliy va oʻrta maxsus taʼlim vazirligi hamda Investitsiyalar va tashqi savdo vazirligi Oʻzbekiston tomonidan, Yaponiyaning Oʻzbekiston Respublikasidagi Elchixonasi va JICA Yaponiya tomonidan ushbu loyihaning amalga oshirilishini va oʻqish uchun nomzodlarni tanlab olishni muvofiqlashtiruvchilar etib belgilash;
grantga hisob-kitob xizmatini koʻrsatish shartlari va tartibi, shuningdek, “Oʻzmilliybank” AJ tomonidan bank bitimlari tuzish asosida zarur hisob-kitoblarni amalga oshirish;
grant boʻyicha hisob-kitob xizmatini koʻrsatish uchun “Oʻzmilliybank” AJ va Yaponiya banki oʻrtasida banklararo shartnoma imzolash.
3. Oʻzbekiston Respublikasi Oliy va oʻrta maxsus taʼlim vazirligiga:
Yaponiya tomoni bilan kelishgan holda loyihani amalga oshirish doirasida grant olish va unga xizmat koʻrsatish bilan bogʻliq barcha tartibotlarni rasmiylashtirish;
“Oʻzmilliybank” AJ tomonidan tegishli talabnoma taqdim etilgandan soʻng uch ish kuni ichida Yaponiya banki komissiyasi xarajatlarini toʻlab berish vazifasi yuklatilsin.
4. “Oʻzmilliybank” AJga har yili tegishli Yaponiya banki hamda Oʻzbekiston Respublikasi Oliy va oʻrta maxsus taʼlim vazirligi bilan loyiha doirasida shartnoma asosida hisob-kitob xizmatlarini amalga oshirish tavsiya etilsin.
5. Oʻzbekiston Respublikasi Oliy va oʻrta maxsus taʼlim vazirligi grant boʻyicha hisob-kitob xizmati koʻrsatilganligi uchun Yaponiya tomoniga vositachilik xarajatlari uchun toʻlovni Oliy taʼlim muassasalarini rivojlantirish jamgʻarmasi mablagʻlari hisobiga amalga oshirsin.
6. Oʻzbekiston Respublikasi Tashqi ishlar vazirligi Oliy va oʻrta maxsus taʼlim vazirligining buyurtmanomalari boʻyicha loyihani amalga oshirishda ishtirok etuvchi xorijiy mutaxassislarga kirish vizalari konsullik yigʻimlari va boshqa yigʻimlar undirilmasdan belgilangan tartibda rasmiylashtirilishini taʼminlasin.
7. Oʻzbekiston Respublikasi Ichki ishlar vazirligi Oliy va oʻrta maxsus taʼlim vazirligining buyurtmanomalari boʻyicha loyihani amalga oshirishda ishtirok etuvchi xorijiy mutaxassislarga davlat bojlari undirilmasdan vizalar berilishi va ularning muddati uzaytirilishi, shuningdek, ularning yashash joyida vaqtincha roʻyxatdan oʻtkazilishi va vaqtincha roʻyxatdan oʻtkazish muddati uzaytirilishini taʼminlasin.
8. Oʻzbekiston Respublikasi Oliy va oʻrta maxsus taʼlim vazirligi, Investitsiyalar va tashqi savdo vazirligi manfaatdor davlat boshqaruvi organlari, xoʻjalik birlashmalari hamda mahalliy ijro etuvchi hokimiyat organlari bilan birgalikda:
loyiha doirasida Yaponiyaning yetakchi universitetlari magistraturasi va doktoranturasida maqsadli oʻqib kelgan bitiruvchilarning ishga joylashishi holati monitoringi va tahlilini taʼminlasin;
monitoring va tahlil natijalariga koʻra, har yili hisobot yilining oktabr oyigacha oʻqish tugagandan soʻng uch yil mobaynida bitiruvchilarni ish bilan taʼminlashning joriy holati toʻgʻrisidagi maʼlumotlarni hamda Yaponiya Hukumati grantidan foydalanish samaradorligini yanada oshirish yuzasidan Vazirlar Mahkamasiga takliflar taqdim etsin;
loyihaning barcha bitiruvchilarini ish bilan taʼminlashning joriy holati toʻgʻrisida bir oy muddatda Vazirlar Mahkamasiga maʼlumotlar kiritsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev, Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov hamda oliy va oʻrta maxsus taʼlim vaziri I.U. Madjidov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 12-avgust,
478-son